EKICWEKA C’OKWEGA 32
Kizaho kwikiriza ku hariho Omuhangi
‘Okwikiriza ni ko kutumanyisiza kimwe ebitari kurebwa.’—HEB 11:1.
ECESHONGORO CA 11 Ebyahangirwe Nibihimbisa Ruhanga
EMPINYE *
1. Ni enki eki wayegire aha bikwatirine n’Omuhangi?
YABA wakurire omu ka y’Abahamya ba Yehova nobasa kuba wayegire ebiri kumukwataho ocari omwana. Okega ku ari Omuhangi, ku ayine emitwarize mirungi kandi ku ayinire abantu ekigendererwa kirungi.—Kut 1:1; Byak 17:24-27.
2. Ni bata oku abamwe bari kureba abantu abari kwikiriza ku hariho Omuhangi?
2 Abantu bingi tibari kwikiriza ku Ruhanga ariho kandi ku ari Omuhangi. Omu mwanya gw’eco, nibegesa ku amagara gabireho aha bwa butandu rero bwanyima gakarugamu otuhangirwe tuce, natwo tukarugamu ebihangire bihango. Abamwe omuri bo bakashoma munonga. Nibagamba ku sayansi yayerekire ku Bibuli eri kugamba ebishuba kandi bagamba ku abantu abari kwikiriza ku hariho Omuhangi batarashomire, batine obwenge kandi ku bari kurahuka kubihabihwa.
3. Ahabw’enki tushemerire kugumya okwikiriza kwitu?
3 Mbehi ebi abantu bari kugamba nibituma twabanganisa ku Yehova ari Omuhangi oyine rukundo? Nikirugirira aha nshonga eri kutuma twayikiriza ku Yehova ari Omuhangi. Mbehi nitwikiriza ku hariho Omuhangi ahabw’okuba babitwegesize ninga ni ahabw’okuba twayerondire ebihamya? (1 Kor 3:12-15) Emyaka yona eyi twakuba tumazire turi Abahamya ba Yehova, tushemerire kuguma turi kombeka okwikiriza kwitu. Ku turakikore tusyoya, titurije kuhabisibwa n’‘obwenge n’oburyarya obutine omugasho’ bw’abantu abari kugamba ku Bibuli erimu ebishuba. (Kol 2:8; Heb 11:6) Eki kicweka caza kutukwasa kumanya (1) enshonga abantu bingi batari kwikiriza ku hariho Omuhangi, (2) oku ori kubasa kuguma kwikiriza ku Yehova ari Omuhangi wawe, n’oku (3) ori kubasa kugumya oko kwikiriza.
ENSHONGA ABANTU BINGI BATARI KWIKIRIZA KU HARIHO OMUHANGI
4. Tukuratize ebiri omu Baheburaayo 11:1, okwikiriza nikumanyisa ki?
4 Abantu abamwe nibatekateka ku okugira okwikiriza ari okwesiga ebintu ebitine ebihamya. Konka Bibuli yo negamba ku oko kutari okwikiriza okwa buzima. (Shoma omu Baheburaayo 11:1.) Bibuli negamba ku okwikiriza ebintu ebitari kurebwa nka Yehova, Yesu, n’Obukama bw’omu iguru kwegamire aha bihamya ebiri kwereka ku bariho. (Heb 11:3) Omuhamya omwe owabire ari omunyabwenge omu bya sayansi akagamba ati: “Okwikiriza kwitu hine ahu kwegamire kandi tituri kwehuza ebiri kukwata ahari sayansi.”
5. Ahabw’enki abantu bingi batari kwikiriza ku Ruhanga ari we owahangire amagara?
5 Mbwenu shi haba hariho ebihamya ebiri kwereka ku hariho Omuhangi, ahabw’enki abantu bingi batari kwikiriza ku Ruhanga ari we owahangire amagara?’ Abantu abamwe tibakeronderaga ebihamya ebiri kwereka ku Ruhanga ariho. Robert, ori Omuhamya wa Yehova hati akagamba ati: “Ahakuba ah’ishomero babire batari kwegesa eby’okuhangwa, nkaba nimanya ngu tihariho Omuhangi. Ku nahikize emyaka 20, ni bwo nabugine n’Abahamya ba Yehova bakanyereka ebihamya by’omuri Bibuli ebiri kwereka ku Ruhanga ari we owahangire ebintu byona.” *—Reba akashanduku akari kugira ngu: “Obutumwa bw’abazire.”
6. Ahabw’enki abantu bamwe batari kwikiriza ku hariho Omuhangi?
6 Abamwe tibari kwikiriza ku hariho Omuhangi ahakuba nibagamba ku bari kwikiriza ebi bari kureba kusha. Konka nibashanga bari kwikiriza ebintu bimwe ebitari kurebwa, nk’omuyaga, ahakuba bine ebihamya ebiri kwereka ku guriho. Okwikiriza okuri kugambwa omuri Bibuli kwegamire aha bihamya by’ebintu ‘ebitari kurebwa.’ (Heb 11:1) Nikitwara obwire n’amani ngu turonde ebyo bihamya kandi abantu bingi tibari kwenda kwerusya. Abantu nk’abo nibahendera bagambire ku hatariho Ruhanga.
7. Mbehi abantu bona abashomire nibahakanisa ku Ruhanga ari we owahangire ebintu byona? Shoborora.
7 Abamwe omu banyabwenge omu bya sayansi ku bashwijumire ebihamya, bakikiriza ku Ruhanga ari we owahangire iguru n’ensi. * Nka Robert, abamwe nibikiriza ku hatariho Omuhangi ahakuba bitari kwegesibwa omu mashomero. Konka abanyabwenge bingi omu bya sayansi bakamanya Yehova kandi bamukunda. Obwe rero, twena tushemerire kombeka okwikiriza kwitu, n’obu twakuba tushomire munonga. Tihine omuntu ori kubasa kukitukorera.
OKU ORI KUBASA KUGUMA ORI KWIKIRIZA KU YEHOVA ARI OMUHANGI
8-9. (a) Ni kiha kibuzo eki twaza kushwijuma? (b) Ni bata oku orije kugasirwa ku orayege aha byahangirwe?
8 Ni enki eki ori kubasa kukora kikakukwasa kuguma ori kwikiriza ku Yehova ari Omuhangi? Reka turebe ebintu bina ebi turi kubasa kukora.
9 Yega aha byahangirwe. Nobasa kombeka okwikiriza kwawe ori kwetegereza enyamishwa, ebimera n’enyonyozi. (Zab 19:1; Isa 40:26) Oku orikizaho kubyegaho, ni ko orikizaho kwikiriza ku Yehova ari Omuhangi. Ebitabo byitu na za vidiyo nibikunda kushoborora aha byahangirwe. Otareka kubishoma washanga bigumire kushoborocerwa. Gezaho kubyega nk’oku ori kubasa. Kandi ogume oyijuke kureba aha rubuga rwitu rwa jw.org za vidiyo ndungi eziri kugamba aha byahangirwe, ezashohwire omu biterane bihango bya juba!
10. Gamba ecokureberaho c’ebyahangirwe ekiri kwereka ku hariho Omuhangi. (Abarooma 1:20)
10 Waba ori kwega aha byahangirwe, guma ote omutima aha ki biri kukwegesa aha Muhangi. (Shoma omu Barooma 1:20.) Ecokureberaho: Nobasa kumanya ku izoba riri kutuha obutagasi, konka rikashuba rikatuha amaranzi agari kubasa kushisha. Obwe rero, hashemerire kuba hariho ekintu c’okuturinda ago maranzi! Kandi kiriho. Ni kiha? Hariho emyika eri kuturinda ago maranzi mabi. Ago maranzi ku gari kugira amani, emyika eri kuturinda na yo neyeyongera. Mbwenu shi hati tiwayerebera ku hariho omuntu owabihangire kandi ku ashemerire kuba ayine obwenge kandi ari kutukunda?
11. Ni nkahe ahu ori kubasa kubona ebihamya ebiri kombeka okwikiriza ebiri kwereka ku hariho Omuhangi? (Reba akashanduku akari kugira ngu: “ Ebihamya bimwe ebiri kombeka okwikiriza.”)
11 Nobasa kubona ebindi bihamya ebiri kombeka okwikiriza omu Irangiro ry’ebitabo rya Watchtower n’aha rubuga rwa jw.org. Nobasa kutandikira aha bicweka na za vidiyo eziri omu nkuru za burijo ahari kugira ngu “Mbehi bikahangwa?” Ni bigufu kandi nibishoborora ebiri kukwata aha nyamishwa n’aha bimera. Nambwenu harimu abantu b’abanyabwenge omu bya sayansi abakozire ebintu bari kurebera aha byahangirwe.
12. Ni biha bintu ebi tushemerire kutekateka twetonzire twaba turi kwega Bibuli?
12 Yega Bibuli. Omunyabwenge omu bya sayansi owu tugambireho akaba atari kwikiriza ku hariho Omuhangi. Konka ku hahwireho obwire, akagira okwikiriza. Akagamba ati: “Tindagizire okwikiriza ahabw’okwega ebya sayansi kusha, ahobwe nkakugira ahabw’okwega Bibuli nyetonzire.” Nobasa kuba ori kumanya enyegesa z’omuri Bibuli. Konka kugira ngu okizeho kwikiriza ku hariho Omuhangi, oshemerire kugumizamu kwega Ekigambo ca Ruhanga. (Yos 1:8; Zab 119:97) Guma otekateke aha ku Bibuli eri kushoborora aha bintu ebyabireho omu bwire bwa kare. Nambwenu guma otekateke aha buhanuzi obu Bibuli yagambire n’oku etari kuhakanisana. Ku orakikore, nikija kutuma wayikiriza ku Omuhangi oyine rukundo n’obwenge yatuhangire kandi ku Bibuli eri Ekigambo ceye. *—2 Tim 3:14; 2 Pet 1:21.
13. Ni buha buhabuzi bumwe obu turi kushanga omu Kigambo ca Ruhanga?
13 Waba ori kwega Bibuli, otekateke aha mugasho g’okukuratiza obuhabuzi oburimu. Ecokureberaho: Bibuli ekagamba ku okukunda esente hari kurugamu ebizibu “n’enaku nyingi.” (1 Tim 6:9, 10; Enf 28:20; Mat 6:24) Mbehi obwo buhabuzi bucatwinire omugasho n’omuri obu bwire? Ekitabo kimwe ekiri kugamba aha mitwarize y’abantu nikigira kiti: “Abantu bingi abari kukunda obutungi tibari kutunga okushemererwa kandi nibakunda kurwara endwara y’okweheba. Nambwenu abantu abari kwenda esente nyingi noshanga bine ebizibu by’omu bitekateko n’aha mubiri.” Mazima, twakuratiza obuhabuzi bw’omuri Bibuli bw’eby’okukunda esente nikitugasira! Mbehi nomanya endijo misinge ya Bibuli etwinire omugasho muri obu bwire? Oku turi kukizaho kukuratiza obuhabuzi bw’omuri Bibuli ni ko turi kukizaho kurondera obuhabuzi aha Muhangi witu ori kutukunda. (Yak 1:5) Kandi eco nikija kutuma twabaho tushemerirwe.—Isa 48:17, 18.
14. Ni enki eki orimanya ahari Yehova wayega Bibuli?
14 Guma oyege Bibuli oyine entego y’okukizaho kumanya Yehova. (Yoh 17:3) Ku oriyega Ebyahandikirwe, noyija kumanya emitwarize eyi wayegire aha byahangirwe. Eyo mitwarize neyereka ku Yehova ariho. (Kur 34:6, 7; Zab 145:8, 9) Ku orimanya ge Yehova, okwikiriza kwawe nikwija kuhama, rukundo eyi ori kumukunda eyeyongere kandi okizeho kugira obunywani burungi na we.
15. Ni bata oku kugambira abandi ebi ori kwikiriza kirije kukugasira?
15 Gambira abandi ebi ori kwikiriza. Ku orakikore, okwikiriza kwawe nikwija kukizaho kweyongera. Konka shi okakora ki owu ori kuburira yaba atari kwikiriza ku hariho Ruhanga kandi n’iwe otari kumanya ecokumugarukamu? Condoza omu bitabo byitu, rero ebi orabone obigambire ogo muntu. (1 Pet 3:15) Nambwenu nobasa kubuza Omukristo mugenzi wawe omanyirire akukwasa. N’obu omuntu yakuba atikirize eki wamugarukamu, okucondoza oku okozire nikwija kutuma okwikiriza kwawe kwakizaho kuhama. Kandi nikija kutuma otayikiriza abantu abari kurebeka nk’abanyabwenge ninga shi abashomire abatari kwikiriza ku hariho Omuhangi.
GUMA OYINE OKWIKIRIZA KUGUMIRE!
16. Ni enki ekiri kubasa kubaho twareka kugumizamu kugumya okwikiriza kwitu?
16 Obwire bwona obu twakuba tumazire turi kuhereza Yehova, tushemerire kugumizamu kugumya okwikiriza kwitu. Ahabw’enki? Ahakuba twaba tutabire misho, okwikiriza kwitu nikubasa kucendera. Yijuka, okwikiriza nikuba kwegamire aha bintu ebitari kurebwa. Ahakuba tutari kubireba, nitubasa kubyebwa juba. Kandi Pawulo akagamba ku okubura okwikiriza ari ‘ekibi ekitwezingirire.’ (Heb 12:1) Mbwenu shi ni bata oku turi kubasa kwerinda kugwa omuri ogo mutego?—2 Tes 1:3.
17. Ni enki ekirije kutukwasa kuguma twine okwikiriza kuhamire?
17 Guma oshabe Yehova omwika gweye oguri kwera. Ahabw’enki tushemerire kugushaba? Ni ahabw’okuba okwikiriza ni kimwe omu byana by’omwika oguri kwera. (Gal 5:22, 23) Tituri kubasa kuguma turi kwikiriza ku hariho Omuhangi, omwika oguri kwera gwaba gutatukwasize. Ku turiguma kushaba Yehova omwika gweye, nayije kugutuha. (Luk 11:13) Nambwenu nitubasa kushaba ngu: ‘Twongereho okwikiriza.’—Luk 17:5.
18. Tukuratize ebiri omuri Zaaburi ya 1:2, 3, ni guha mugisha ogu twine?
18 Nambwenu, guma oyeyegese Ekigambo ca Ruhanga. (Shoma omuri Zaaburi ya 1:2, 3.) Omu bwire obu egi zaaburi yabire eri kuhandikwa, Abisirayeli bace ni bo ababire bine ekitabo kijwire c’ebiragiro bya Ruhanga. Konka, abagabe n’abatambi ni bo ababire bine ebyo bitabo, kandi buri myaka mushanju, ‘abashija, abakazi, abana,’ n’abanyamahanga ababire batwire omuri Isirayeli bakaba nibateranira hamwe ngu bashomerwe ebiragiro bya Ruhanga. (Bir 31:10-12) Omu bwire bwa Yesu, abantu bace ni bo ababire bine emizingo y’Ebyahandikirwe kandi endijo ekaba eri omuri sinagogi. Konka omuri obu bwire, abantu abingi bine Bibuli. Ogo ni omugisha gw’amani! Ni bata oku turi kubasa kwereka ku nitusima ahabw’ogo mugisha ogu twine?
19. Ni enki eki tushemerire kukora kugira ngu okwikiriza kwitu kukizeho kuhama?
19 Nitubasa kwereka ku nitusima ahakuba twine Ekigambo ca Ruhanga turi kukishoma buri izoba. Tushemerire kweteraho entebekanisa y’okushoma n’okwega Bibuli n’obu twakuba tutine obwire oburi kumara. Ku turigumizamu kugira entebekanisa y’okwega Bibuli, okwikiriza kwitu nikwija kukizaho kuhama.
20. Ni enki eki tushemerire kumaririra kukora?
20 Tituri nk’‘abanyabwenge n’abari kwetegereza’ b’omuri egi nsi ahakuba okwikiriza kwitu kwegamire aha Kigambo ca Ruhanga. (Mat 11:25, 26) Ahakuba turi kweyegesa Bibuli, nitumanya enshonga ahabw’enki ensi yashishikire n’eki Yehova ari kwenda kugikorera. Nimureke tumarire kugumya okwikiriza kwitu kandi tukwase abandi kwikiriza ku hariho Omuhangi. (1 Tim 2:3, 4) Kandi nimureke twena tugume tutegerize obwire obu turihimbisa Yehova n’ebigambo by’omu Kushuuruurwa 4:11 ebiri kugira biti: ‘[Yehova] Ruhanga witu, oshemerire kuhimbisibwa, ahabw’okuba ni we owahangire byona.’
ECESHONGORO CA 2 Yehova Niryo Eiziina Ryawe
^ par. 5 Bibuli neshoborora ge ku Ruhanga ari we owahangire ebintu byona. Konka abantu bingi tibari kukikiriza. Nibagamba ku amagara gabireho aha bwa butandu. Konka ebi bari kugamba tibirije kutuma twabanganisa ku Ruhanga ari we owahangire ebintu byona. Eki kicweka caza kutukwasa kumanya eki turi kubasa kukora ngu twerinde okubanganisa
^ par. 5 Amashomero mingi tigari kwegesa ku Ruhanga ari we owahangire ebintu byona. Abegesa abingi nibagamba ku bakikozire bakuba bari kugema abegi kwikiriza ku hariho Omuhangi.
^ par. 7 Ebi abanyabwenge abashomire abari kurenga ahari 60, harimu n’abanyabwenge omu bya sayansi abari kwikiriza ku hariho Omuhangi, nibishangwa omu Kitabo ekirimu irangiro ry’ebitabo eca juba. Aha kicweka ekiri kugira ngu, “Sayansi,” reba akatwe akari kugira ngu, “abanyabwenge omu bya sayansi bakiriza Omuhangi.” Nambwenu ebindi nitubasa kubishanga omu Kitabo c’okucondorezamu c’Abahamya ba Yehova. Aha kicweka ekiri kugira ngu “Sayansi n’ebyoma by’obwenge,” reba akatwe akari kugira ngu, “Okubuzibwa.”
^ par. 12 Reba ekicweka ekiri kugira ngu, “Mbehi Sayansi na Bibuli nibyikirizana?” omuri Musisimuke! y’Okwakabiri 2011 n’ekicweka ekiri kugira ngu, “Ebi Yehova ari kugamba nibihikirira” omu Munara g’Omurinzi gw’aha kiro ca 1 Okokubanza, 2008.
