1. San i sabi fu a Sama di meke ala sani?

EFI i kiya a waaleiti, da a yonkuuyonkuu kaba i leli sani fu Yehofa. I leli taki neen meke ala sani, i sabi sowtu manii a abi. I sabi tu taki a seeka sani gi libisama fu den sa tan aini wan paladeisi a goontapu aini a ten di e kon.​—Gen. 1:1; Toli 17:24-27.

2. Fa son sama e si den sama di e biibi taki wan Gadu de di meke ala sani?

² A omen sama nai biibi taki wan Gadu de di meke ala sani. Den sama ya e biibi taki ala sani kon fu denseefi. Den taki a wantu pikinpikin sani di be de senten, kengi kon toon ala den sani di wi e si nownow. Son wan fu den sama di e biibi a sani ya, a sama di go a hei sikoo. Den e fende taki den sani di koniman ondoosuku, bun moo den sani di sikiifi aini Beibel. Son leisi den e taki a sama di don, efuso sama di á go a hei sikoo wawan e biibi taki a Gadu meke ala sani.

3. Saide a pelensipali fu taanga a biibi fu u?

³ Yu o meke den sani di koniman e taki swaki a biibi fi i te da i nai biibi moo taki a Yehofa meke ala sani? Fu man piki a akisi ya, i mu sabi fosi saide yu e biibi taki a Yehofa meke ala sani. Yu e biibi a sani ya fu di wan sama taigi i taki a so a de, efuso yu e biibi en fu di iseefi ondoosuku sani? (1 Kor. 3:12-15) Winsi on langa wi e dini Yehofa kaba, toku ala u mu tan meke moiti fu taanga a biibi fu u.  Efu u biibi taanga, sama ná o poi koli u taki den sani di sikiifi aini Beibel a ná tuu (Kol. 2:8; Heb. 11:6). Aini a artikel ya, wi o luku (1) saide son sama nai biibi taki wan Sama de di meke ala sani (2) saide i sa biibi taki a Yehofa na a Sama di meke ala sani, anga (3) san i mu du fi i biibi á swaki.

4. Enke fa Hebrewsama 11:1 e soi, da san biibi wani taki?

⁴ Son sama e si enke te yu e biibi taki wan Gadu de, i ná abi buweisi fu a sani di yu e biibi. Ma Beibel e soi u kiin taki te yu e biibi wan sani, i mu abi buweisi fu a sani di yu e biibi. (Leisi Hebrewsama 11:1.) Winsi fa wi á poi si Yehofa, Yesesi anga a Kownukondee di de a hemel, toku sani de di e soi kiin taki den de tuutuu (Heb. 11:3). Wan ondoosukuman di e dini Yehofa nownow taki: ‘Yehofa Kotoigi nai biibi sani sondee fu sabi fa a de tuutuu. Son leisi den e wooko anga san koniman ondoosuku tu.’

5. Saide omen sama nai biibi taki wan Gadu de di meke ala sani?

⁵ Efu sani de di e soi kiin taki wan Sama de di meke ala sani, da saide omen sama nai biibi a sani ya? Gaanse fu den sama di nai biibi taki wan Gadu de, á teke ten ondoosuku fa sani de tuutuu. Wan man den e kai Robert taki: ‘Di mi be de a sikoo, noiti den leli u taki a wan Sama meke ala sani, neen meke mi be e denki taki a sani ya a wan anainsitoli. A di mi pasa 20 yali fosi, di mi bigin taki anga den Yehofa Kotoigi, neen mi kon fusutan taki Beibel e soi kiin taki wan  Sama de di meke ala sani.’ *​—Luku a faki ‘ Wan pelensipali bosikopu gi mma anga dda.’

6. Saide son sama nai biibi taki wan Sama de di meke ala sani?

⁶ Son sama nai biibi taki wan Gadu de, bika den fende taki a san den poi si anga den ain namo den e biibi. Ma denseefi sama ya e biibi taki winta de. Saide? Bika den e si den sani di a winta poi du. Beibel e soi tu taki winsi wi á poi si wan sani, toku u sa biibi taki a de, te u poti pakisei a den buweisi di e soi taki a sani de tuu (Heb. 11:1). Efi i wani sabi efu wan sama de di meke ala sani tuutuu, i mu meke ten fu ondoosuku sani finifini. Somen sama nai du a sani ya seefi fosi den bigin taki Gadu á de.

7. Na ala sama di go a hei sikoo e biibi taki ala sani kon fu denseefi?

 ⁷ Baka di son koniman ondoosuku sani finifini, den kon si taki wan Gadu musu de di meke ala sani. * Leti enke Robert, kande omen fu den be denki taki a sani ya a wan anainsitoli fu di noiti den leli en a sikoo. Ma omen fu den koniman ya kon lobi Yehofa fu di den teke ten ondoosuku sani finifini. Leti enke den sama ya, useefi mu meke moiti fu taanga u biibi. Winsi yu á go a hei sikoo, toku i poi du a sani ya. Taa sama á poi taanga i biibi gi i, a iseefi mu meke moiti fu taanga i biibi.

8-9. (a) Sowtu akisi wi o luku? (b) Sowtu wini yu o fende te yu e poti pakisei a den sani di Gadu meke?

⁸ San o yeepi yu fu biibi taki wan Sama de di meke ala sani? Wi o luku fo sani di o yeepi u fu taanga u biibi.

⁹ Poti pakisei a den sani di Gadu meke. Te yu e poti pakisei na a fasi fa den meti, den bon, anga den sitali meke, da a sani ya o yeepi i fu biibi taki wan Sama musu de di meke den (Ps. 19:1; Yes. 40:26). O moo yu e poti pakisei a den sani ya, o moo yu o biibi taki a Yehofa meke den tuu. Den buku fu wi abi toli aini di e taki fu den sani di Gadu meke. Te i doo den pisi ya, yu á mu abaa den fu di yu e si enke a taanga tumisi fu fusutan. Aini den yali di pasa, a olikanisâsi meke omen felon di e taki fu den sani di Gadu meke. Den sowtu felon ya o yeepi i tu fu taanga i biibi.

10. San e soi taki wan Sama de di meke ala sani? (Romesama 1:20)

¹⁰ Te yu e luku den sani di de a goontapu, meke moiti fu si san i sa leli fu a Sama di meke den. (Leisi Romesama 1:20.) Meke u poti pakisei a wan fu den sani ya. Libisama anga meti abi a san fanowdu fu tan a libi. Ma sani de aini a san tu di sa meke u siki. Ma wantu gas lontu a goontapu enke paasoo. Na a sani ya e kibii a goontapu fu a á waan tumisi. Te den pisi fu a san di á bun gi libisama e kon moo ipi, da den gas di lontu a goontapu e kon moo ipi tu. Te i luku a fasi fa den sani ya meke, da yu á si enke a wan Sama di lobi u meke den noh?

11. Pe i sa fende sani di o yeepi i fu biibi taki wan Sama de di meke ala sani? (Luku a faki ‘ Wantu sani di sa yeepi i fu taanga i biibi’.)

¹¹ A omen sani i sa fende aini den buku fu u di e soi taki wan Sama de di meke ala sani. Wantu felon de a JW.Library tu na a pisi di den e kai ‘Den sani di Gadu meke’. Den felon ya á langa, ma den e leli wi omen sani fu den meti anga taa sani di Gadu meke. Den e soi tu fa koniman e luku den sani di Gadu meke fu meke taa sani di libisama sa wooko anga den.

12. San u mu du te wi e sutudeli Beibel?

¹² Sutudeli Beibel. Biginbigin, a koniman di u be taki fi en a fesi be e biibi taki ala sani kon fu denseefi, ma bakaten a kon si taki wan Sama musu de di meke ala sani. A taki: ‘A ná a ondoosuku di mi e ondoosuku den sani di de a goontapu namo yeepi mi fu biibi taki wan Sama de di meke ala sani. A sutudeli di mi e sutudeli Beibel yeepi mi tu. Kande i sabi a Beibel bun kaba, ma efi i wani i biibi  taanga, i mu tan sutudeli a Wowtu fu Gadu (Yow. 1:8; Ps. 119:97). Poti pakisei na a fasi fa Beibel e taki finifini fu sani di pasa a fositen, anga den polofeititoli fu Beibel di e kon tuu aini a ten ya. Luku tu fa ala den pisi fu Beibel e kai anga denseefi. Efi yu e du den sani ya, i biibi o moo taanga. Yu o kon si tu taki na a Sama di meke u, gi wi a Beibel fu di a lobi u.​—2 Tim. 3:14; 2 Peit. 1:21.

13. Saide u sa wooko anga den leli fu Beibel aini a ten ya ete?

¹³ Te yu e sutudeli, luku fa den leli fu Beibel sa yeepi i. Langa ten a fesi, Beibel be taki te wan sama lobi moni, a sani ya e tyai omen takuu bakapisi gi en (1 Tim. 6:9, 10; Odo 28:20; Mat. 6:24). I si enke a sani ya a tuu aini a ten ya ete? Wan buku di e taki fu a fasi fa sama e tyai denseefi aini a ten ya e taki: ‘Gaanse sama di e si den gudu fu den enke a moo pelensipali sani nai de koloku, den e moo lai booko-ede, den e moo siki lawlaw tu. Winsi wan sama pooti ma a lobi moni, a sani ya sa tyai takuu bakapisi gi en.’ A sani ya e soi taki Beibel á lei, sama di lobi moni e moo lai booko-ede. Te wi e poti pakisei a den leli fu Beibel, wi o moo fitoow a Sama di meke u, bika wi o si taki a soso wini wi e fende te wi e wooko anga san a taki (Yak. 1:5). A libi o moo switi gi u tu te wi e wooko anga den sani di sikiifi aini Beibel.​—Yes. 48:17, 18.

14. San yu o leli fu Yehofa te yu e sutudeli Beibel?

¹⁴ Te yu e sutudeli Beibel, i mu du a sani ya fu di i wani kon sabi Yehofa moo bun (Yoh. 17:3). Te yu e poti pakisei a den sani di de a goontapu anga hemel, i man si wantu moin manii fu a Sama di meke den. A denseefi manii fu Yehofa ya yu e si tu te yu e sutudeli Beibel. A sani ya e soi kiin taki a wan Sama meke ala sani, den á poi kon fu denseefi (Ek. 34:6, 7; Ps. 145:8, 9). Te i kon sabi Yehofa moo bun, i biibi o moo taanga, yu o moo lobi en, yu anga en o toon moo bun mati tu.

15. Sowtu wini yu o fende te yu e taigi taawan san yu e biibi?

¹⁵ Taigi taawan san yu e biibi. A sani ya o meke i biibi moo taanga. Ma san i mu du te yu e taki anga wan sama di nai biibi taki Gadu de? Luku aini den buku fu wi efi i sa fende wan tekisi di e piki a akisi fu a sama (1 Peit. 3:15). I sa akisi wan peleikiman di abi ondoofeni fu yeepi i tu. Winsi a sama á wani biibi i, toku i biibi o moo taanga fu di i go ondoosuku sani. Te i gwenti ondoosuku sani, i ná o buuya te sama di go a hei sikoo e taki Gadu á de.

16. San sa pasa efu u nai meke moiti fu taanga u biibi ala yuu?

¹⁶ Winsi on langa wi e dini Yehofa kaba, toku u mu tan meke moiti fu taanga u biibi, bika efu wi á luku bun, u biibi sa swaki. Enke fa u be luku a fesi, da wi á poi si son wan fu den sani di wi e biibi. Te u nai si wan sani, u sa feegete en makiliki. Pawlesi be taki a swaki di wan sama biibi e swaki, a wan sondu di sa kisi u makiliki (Heb. 12:1). San u mu du efu wi á wani u biibi swaki?​—2 Tes. 1:3.

17. San u mu du efu u wani u biibi moo taanga?

¹⁷ A fosi sani di u mu du, a taki u mu e begi Yehofa naamo fu a gi wi en santa yeye. Saide? Biibi a wan fu den manii di a santa yeye fu Gadu e meke sama abi (Gal. 5:22, 23). Neen meke wi abi a santa yeye fu Yehofa fanowdu efu u wani u biibi taanga. Efu wi e akisi Yehofa naamo fu a gi wi en santa yeye, a o gi wi en (Luk. 11:13). Te wi e begi u sa akisi en taki: ‘Meke a biibi fu mi kon moo taanga baa.’​—Luk. 17:5.

18. Enke fa Psalm 1:2, 3 e soi, da sowtu gaandi wi abi aini a ten ya?

 ¹⁸ Du fu tu, i mu e sutudeli Gadu Wowtu ala yuu. (Leisi Psalm 1:2, 3.) A pisiten di a psalm ya sikiifi, a den kownu, den pilisite anga wantu Islayelisama namo be abi a Weiti fu Gadu a pampila. Ala baka 7 yali, den be e seeka sani fu leisi a Wowtu fu Gadu ‘gi den mannengee, den uman, den pikinnengee anga ala den taa kondee sama di be e tan anga den’ (Deit. 31:10-12). Aini a ten fu Yesesi seefi a wantu sama namo be abi bukulolo fu a Wowtu fu Gadu. Wantu bukulolo be e de aini den snoga tu. Ma nownow, gaanse sama abi wan Beibel. Fa u sa soi taki wi e teke en fu bigi taki wi abi a Beibel aini a ten ya?

19. San u mu du efu u wani u biibi taanga?

¹⁹ Te wi e leisi a Wowtu fu Gadu ala dei, da wi e soi taki wi e teke a kado ya fu bigi. Efu wi o luku taki a te u fende ten da wi o leisi efuso sutudeli Beibel, noiti wi o fende ten. A meke u mu meke ten fu du den sani ya. Te wi e du den sani ya, da u biibi o taanga.

20. San u mu e meke moiti fu du ala yuu?

²⁰ Den koniman anga den leliman fu a goontapu ya, á sabi fu saide den e biibi son sani. Ma a Beibel e yeepi u fu si kiin taki wan Gadu de di meke ala sani (Mat. 11:25, 26). Na a sutudeli di wi e sutudeli Beibel e yeepi u fu sabi saide a goontapu e ogii namo dei fu dei, anga san Yehofa o du gi wi aini a ten di e kon. Neen meke u mu meke moiti fu taanga a biibi fu u. U mu e du ala san u poi tu fu leli taa sama taki wan Gadu de di meke ala sani (1 Tim. 2:3, 4). Wi e wakiti a ten pe ala sama a goontapu o taki den sani di sikiifi a Openbaring 4:11. Ai taki: ‘Yehofa u Gadu, a yu fiti fu fende gaandi, bika a yu meke ala sani.’