1. Ka yo aprann-vou asi Kréyatè-la ?

SI YO lévé-w adan lavérité, pétèt kè dépi toupiti ou tann palé dè Jéova. Sèten kè fanmi a-w aprann-vou kè sé-y ki kréyé tout biten, kè i ni onlo bèl kalité, kè i ni on pwojé pou limanité é kè pwojé-lasa plen lanmou (Jén. 1:1 ; Akt 17:24-27).

2. Lè on moun ka kwè kè sé Bondyé ki kréyé tout biten, ka sèwten moun ka pansé dè sa ?

² Men ni onlo moun ki pa’a kwè an Bondyé, oben ki pa’a kwè kè sé-y ki kréyé tout biten. Pou yo, lavi enn parèt tousèl a-y. Yo ka kwè kè odépa, lavi koumansé èvè dé toupiti biten é kè piti-a-piti sé biten-lasa dévlopé pou bay tousa ki ka ègzisté konnyéla la. Sèwten adan sé moun-lasa fè onlo lékòl. Yo ka di kè lasyans montré kè sa Labib ka di pa vré é kè sé enki moun ki pa fè onlo lékòl é moun ki la kwè tousa yo ka di-yo ki ka kwè adan on Kréyatè.

3. Fò-nou fè fwa an nou vin pli fò. Poukwa sa enpòwtan ?

³ Nou sèten kè sé Jéova ki kréyé tout biten é kè i fè sa èvè onlo lanmou. Si on moun ki fè onlo lékòl ka vin di-w kè a pa vré, ès sa ké mèt dout an tèt a-w ? Sa pé rivé a fèt si voumenm pa sav poukwa ou ka kwè adan sa vréman. Èskè ou ka kwè kè sé Bondyé ki kréyé tout biten pas yo di-w sa, oben ès ou pran tan ègzaminé sé prèv-la ki ka montré sa ? (1 Kor. 3:12-15). Ki nou Témwen a Jéova dépi lontan ki nou toufré adan lavérité, fò-nou fè tousa nou pé pou fè fwa an nou vin pli fò. Konsa, nou pé ké lésé pon « mansonj initil » ki pa annakò èvè Pawòl a Bondyé kouyonné-nou (Kol. 2:8 ; Ébr. 11:6). Adan awtik-lasa, nou  ké vwè 1) poukwa onlo moun pa’a kwè kè Bondyé kréyé tout biten, 2) ka nou pé fè pou fwa an nou vin pli fò adan Kréyatè an nou Jéova é 3) ka nou pé fè pou fwa an nou rété solid.

4. Dapré Ébré 11:1, fò fwa an nou bazé asi on biten. Ki biten ésa ?

⁴ Sèwten moun ka pansé kè on moun ki ni fwa, sé on moun ki ka kwè adan on biten menmsi i pa ni prèv. Men, Labib ka èspliké kè a pa sa ki lafwa (li Ébré 11:1). I ka di kè lafwa bazé asi prèv ki solid. Pa ègzanp, menmsi nou pa’a vwè ni Jéova, ni Jézi, ni Wayòm-la, nou sav yo ka ègzisté vréman pas nou ni prèv (Ébr. 11:3). Mi sa on syantifik ki Témwen a Jéova ka di : « Nou pa’a enn kwè adan on biten konsa. Nou ka tchenn kont dè prèv kè lasyans ka ban-nou. »

5. Poukwa onlo moun pa’a kwè kè sé Bondyé ki kréyé tout biten ?

⁵ Pétèt nou ka mandé-nou : « Poukwa ni onlo moun ki pa’a kwè kè sé Bondyé ki kréyé tout biten alòskè ni prèv ki ka montré sa ? » Byensouvan, sé paskè sèwten moun pa pran tan ègzaminé sé prèv-lasa. Mi sa Robert ki Témwen a Jéova jòdijou ka di : « An pa té ka kwè kè sé Bondyé ki té kréyé tout biten pas lékòl a pa sa yo té ka anségné moun. Lè an vin ni 22 an, an jwenn èvè Témwen a Jéova é yo montré-mwen déotwa biten adan Labib ki édé-mwen kwè kè sé Bondyé ki kréyé tout biten *. » (Gadé ti karé-la «  On ti mo pou sé paran-la ».)

6. Poukwa sèwten moun vé pa kwè kè sé Bondyé ki kréyé tout biten ?

 ⁶ Ni sèwten moun ki ka di kè yo ka kwè yenki sa yo ka vwè, kifè pou yo, a pa Bondyé ki kréyé tout biten. Poutan, yo ka kwè adan sèwten biten kè yo pa’a vwè. Pa ègzanp, yo pa’a vwè van-la men yo sèten i ka ègzisté. Adan Labib, lèwvwè yo ka palé dè lafwa, yo ka palé dè on biten ki bazé asi dé « biten byen réyèl kè nou pa’a vwè ». É nou sèten kè sé biten-lasa ka ègzisté pas nou ni prèv (Ébr. 11:1). Men pou touvé sé prèv-lasa, sa ka mandé onlo tan é onlo éfò. Sé pousa, ni sèwten moun, sonjé yo ka sonjé sa, yo pa menm anvi koumansé chèché. Men, si nou pa’a fè éfò-lasa, nou pé rivé a mèt an tèt an nou kè Bondyé pa ka ègzisté.

7. Èskè sé tout sé syantifik-la ki ka di kè a pa Bondyé ki kréyé tout biten ? Bay on ti èsplikasyon.

⁷ Lè sèwten syantifik fè rèchèch, yo vin sèten a san pou san kè sé Bondyé ki kréyé  linivè *. Talè la nou palé dè Robert, é kon li, ni sèwten moun ki té ka di kè a pa Bondyé ki kréyé tout biten pas yo pa ka anségné sa linivèwsité oben adan gran lékòl. Men, ni onlo syantifik ki aprann konnèt Jéova é ki aprann enmé-y osi. Menmjan ki sé syantifik-lasa, fò-nou fè tousa nou pé pou nou fè fwa an nou vin pli fò kèlkèswa kantité lékòl nou fè. Ponmoun pé’é pé fè sa anplas an nou.

8-9. a) Alèla a ki kèsyon nou kay réponn ? b) Si ou pran tan étidyé lanati, ka sa ké pòté dè bon ba-w ?

⁸ Ka ou pé fè pou ou kwè pli fò adan Kréyatè-la ? An-nou vwè 2 mannyè nou pé fè sa.

⁹ Pran tan étidyé lanati. Ou pé fè fwa a-w vin pli fò adan Kréyatè-la si ou ka pran tan gadé sé zannimo-la, sé plant-la é sé zétwal-la (Sòm 19:1 ; Iz. 40:26). Pli ou ké pran tan étidyé lanati, pli ou ké sèten kè sé Jéova ki kréyé tout biten. Adan piblikasyon an nou, ou ké touvé déotwa awtik ki ka montré jan tousa Bondyé kréyé bèl. Fè on éfò pou li-yo menmsi délè ou pé touvé sèwten biten difisil a konprann. Aprann tousa ou pé asi sa. É pa oubliyé ay asi sit an nou jw.org pou wougadé sé bèl vidéo-la yo montré la adan sé dènyé lasanblé réjyonal la. Sé vidéo-lasa té ka palé dè lakréyasyon.

10. Bay on ègzanp ki ka montré kè ni on moun ki kréyé tout biten (Women 1:20).

¹⁰ Lè ou ka étidyé lanati, pran on tan pou gadé byen ka sa ka aprann-vou asi Kréyatè-la (li Women 1:20). Pa ègzanp, solèy-la ka voyé onlo chalè é onlo limyè, é sé grasa sa nou pé viv si latè. Men adan limyè-la i ka voyé la, ni on biten ki pa bon pou nou. Ès ni on biten ki ka pwotéjé-nou dè biten-lasa ? Wi ! Latè lantouré èvè on gaz ki ka pwotéjé-nou. Pi solèy-la ka voyé limyè, pi i ka voyé biten-la ki pa bon ban nou la. É pi ni biten-la ki pa bon ban nou la, pi kantité gaz-la ki ka pwotéjé-nou la ka ògmanté. Lé ou ka gadé jan tousa ka fonksyonné, ou pa’a di kè ni on moun ki kréyé tousa, kè moun-lasa entélijan toubònman é kè i enmé-nou onlo ?

11. Ola ou ké touvé déotwa enfòwmasyon ki ké fè fwa a-w vin pli fò ? (gadé ti karé-la «  Déotwa biten ki pé fè fwa a-w vin pli fò »).

¹¹ Si ou k’ay adan Index des publications des Témoins de Jéhovah é si ou k’ay fè rèchèch asi jw.org, ou ké touvé onlo enfòwmasyon ki ké édé-w kwè pi fò ankò kè sé Bondyé ki kréyé tout biten. Pou koumansé, ou pé li sé awtik-la oben gadé sé vidéo-la ki ka touvé-yo adan « Évolution ou conception ? » ki asi sit an nou. Yo piti men yo ka bay onlo détay èstraòwdinè asi zannimo é plant. Anplisdisa, yo ka palé dè onlo ti détay ki ni adan lanati kè sé syantifik-la ka éséyé imité.

12. Lè nou ka étidyé Labib, ka pou nou pran tan gadé ?

¹² Pran tan étidyé Labib. Syantifik-la nou palé dè-y talè la pa té ka kwè kè té ni on kréyatè. Men piti-a-piti, i fin pa chanjé lidé. Mi sa i ka èspliké : « Si an ni lafwa, a pa yenki grasa sa an étidyé adan lasyans, men sé osi pas an pran tan étidyé Labib. » Pétèt ou ja konnèt Labib byen.  Men pou ou kontinyé ni plis fwa adan Kréyatè-la, fò ou kontinyé étidyé Pawòl a Bondyé (Joz. 1:8 ; Sòm 119:97). Pa ègzanp, gadé jan Labib ka bay détay ki ègzak lèwvwè i ka palé dè biten ki fèt ja ni lontan. Sonjé osi kijan tout sé biten-la Labib té ja anonsé la réyalizé. É anplisdisa, pa ni pon liv adan Labib ki ka kontrèdi ondòt. Si ou ka fè sa, ou ké pli sèten ankò kè Jéova sé on Kréyatè ki ni sajès é ki plen lanmou, é ou ké pli sèten osi kè sé Jéova ki sèvi èvè déotwa moun pou yo té maké Labib * (2 Tim. 3:14 ; 2 Pyè 1:21).

13. Labib ka ban-nou onlo konsèy ki plen sajès. Bay yonn adan yo.

¹³ Lè ou ka étidyé Pawòl a Bondyé, gadé kijan sé konsèy-la ki adan-y la pé itil ba-w. Pa ègzanp, dépi plizyè milyé lanné, Labib ka di-nou fò pa nou enmé lajan pas sa danjéré é pas sa ka menné « onpakèt doulè » (1 Tim. 6:9, 10 ; Pwov. 28:20 ; Mat. 6:24). Ès konsèy-lasa valab jòdijou ? Mi sa on liv ki ka palé dè jan moun ka aji a épòk an nou * ka di : « Pli souvan ki rarman, moun ki ka mèt lajan prèmyé douvan an vi a yo pa jen ni tchè-kontan é yo ka fè déprésyon. Menm sé moun-la ki ka di kè yo té’é anvi ni plis lajan pa ni tchè-kontan é yo pa ni on bon santé nonplis. » Nou ka tou konprann kè lè Labib ka di-nou kè fò pa nou enmé lajan, sé on bon konsèy i ka ban-nou ! Men pétèt kè ni dòt prensip a Labib ki édé-w adan vi a-w ? Labib sé on bèl kado Kréyatè an nou ki enmé-nou fè-nou. Pli nou ké ba sé prensip la ki an Bib-la valè, pli nou ké mèt-yo an pratik é pli nou ké ni tchè-kontan (Jak 1:5 ; Iz. 48:17, 18).

14. Si ou ka étidyé Labib, ka sa ké aprann vou asi Jéova ?

¹⁴ Lè ou ka étidyé Labib fò ou ni on òbjèktif : aprann konnèt Jéova (Jan 17:3). Ou ké aprann kè Jéova sé on moun ki ni onlo bèl kalité é sé sé menm kalité-lasa ou ké dékouvè lé ou ké ka étidyé lanati. Lè ou ké aprann ki kalité Jéova ni, ou ké sèten kè i ka ègzisté poudèbon (Ègz. 34:6, 7 ; Sòm 145:8, 9). Pli ou ké aprann konnèt Jéova, pli ou ké ni fwa adan-y é pli ou ké enmé-y. Sa ké édé-w vin pibon zanmi èvè-y osi.

15. Lè ou ka palé dè Labib èvè lézòt, kijan sa pé édé-w ?

¹⁵ Palé lézòt dè Bondyé. Si ou fè sa fwa a-w ké vin pi fò. Men imajiné on moun ka di-w kè i pa’a kwè an Bondyé é voumenm a-w pa sav kijan pou ou réponn-li, ka ou ka fè ? Ou pé éséyé chèché déotwa prèv Labib ka bay adan piblikasyon an nou é aprésa ou pé éséyé diskité dè sa èvè moun-la (1 Pyè 3:15). Ou pé mandé on frè oben on sè ki ni èkspéryans édé-w osi. Ki moun-la aksèpté sa ou ka di-y la, ki moun-la pa aksèpté, sé bon biten sa ké menné ba-w paskè sé rèchèch-la ou ké fè la ké ba-w plis fwa. Konsa, lèwvwè on moun ki ka sanm sa i konnèt onlo biten oben ki fè onlo lékòl ké vin di-w kè a pa Bondyé ki kréyé tout biten, ou pé’é bigidi.

16. Ka ki pé rivé-nou si nou pa’a fè ansòt pou fwa an nou vin pli fò ?

¹⁶ Ki nou ka sèvi Jéova dépi déotwa tan ki nou ka sèvi-y dépi lontan, fò-nou fè ansòt pou fwa an nou rété solid. Pou ki rézon ? Paskè si nou pa fè sa, sa ka riské dè fébli fwa an nou. Fò pa nou oubliyé kè  nou ni fwa adan sèwten biten ki ka ègzisté men kè nou pé pa vwè. Men lè nou pa’a vwè on biten, nou pé oubliyé-y fasilman. Dayè, Pòl di kè lè on moun pa ni asé fwa sé ‘on péché ki ka mélé-y fasilman’ (Ébr. 12:1). Ka nou pé fè pou nou pa pri adan pyèj-lasa ? (2 Tés. 1:3).

17. Ka ki ké édé-nou pou fwa an nou rété solid ?

¹⁷ Prèmyèwman, fò nou pran labitid sipliyé Jéova pou i ban-nou lèspri sen a-y. Men poukwa sa enpòwtan kè nou fè sa ? Paskè lafwa ka fè pawti a fwi a lèspri sen a Bondyé (Gal. 5:22, 23). Si nou pa ni lèspri sen a Bondyé pou édé-nou, nou pé’é pé ni fwa adan Kréyatè an nou é fwa an nou pé’é rété solid nonplis. Alò, fò-nou kontinyé mandé Jéova lèspri sen a-y é nou pé sèten kè i ké ban-nou-y (Lik 11:13). Sé pousa, fò pa nou ézité priyé-y pou mandé-y : « Ban-nou plis fwa » (Lik 17:5).

18. Dapré Sòm 1:2, 3, ki bèl kado nou ni ?

¹⁸ Dézyèmman, fò ou pran labitid étidyé Pawòl a Bondyé (li Sòm 1:2, 3). Lè yo maké sòm-lasa, pa té ni onlo Izraélit ki té ni on kopi a tout Lwa a Bondyé a kaz a yo. Wa-la é sé prèt-la té ni plizyè kopi a Lwa-la anba men a yo. É toulésétan, yo té ka pran on dispozisyon pou sé misyé-la, sé madanm-la, sé timoun-la é sé étranjé-la té kouté Lwa-la (Dét. 31:10-12). An tan a Jézi, yo té ka ékri Lézékriti asi on woulo. Men sé yenki déotwa moun ki té ni yo oben ou té ka touvé sé woulo-lasa osi adan sé sinagòg-la. Men jòdijou, lamajorité a sé moun-la ni Pawòl a Bondyé : swa yo ni tout Bib-la swa yo ni on mòso a-y. Mi on bèl kado mi ! Kijan nou pé montré kè nou ka aprésyé kado-lasa ?

19. Ka nou pé fè pou fwa an nou rété solid ?

¹⁹ Lè nou ka li Labib touléjou, nou ka montré kè nou ka aprésyé bèl kado-la Jéova fè-nou la. Nou pé pa kontanté-nou dè étidyé yenki lè nou ni tibwen tan douvan nou. Fò-nou ni pwòp pwogram an nou pou nou étidyé Labib é fò-nou fè tousa nou pé pou nou suiv pwogram-lasa. Sé konsa nou ké fè ansòt pou fwa an nou rété solid.

20. Ka pou nou byen désidé a fè ?

²⁰ Nou pa kon sé ‘saj-la é sé grangrèk-la’ ki adan mond-lasa pas nou ni fwa adan Pawòl a Bondyé é fwa-lasa bazé asi dé biten ki byen réyèl (Mat. 11:25, 26). Konm nou ka pran tan étidyé Labib, ki sé on liv sakré, nou sav poukwa sitiyasyon-la nou ka viv la ka vin pli mové é nou sav ka Jéova kay fè talè pou ranjé sitiyasyon-lasa. Sé pousa, an-nou fè tousa nou pé pou nou ni on fwa ki solid é an-nou édé on maksimòm dè moun a ni fwa adan Kréyatè an nou (1 Tim. 2:3, 4). É an-nou kontinyé atann jou-la toutmoun asi latè ké ba Jéova louwanj é ké di-y : « Jéova, Dyé an nou, ou mérité rèsèvwa glwa-la [...], pas sé vou ki kréyé tout biten » (Rév. 4:11).