1. Bichi wayigirizwe oku bilolere Omulemi werhu?

AKABA WAKULIRAGA omu mulala gw’Abahamirizi ba Yehova, nkabaga wayigire oku bilolere Yehova kurhenga ochili mwana mudorho. Bakuyigiriza oku ye Mulemi, anagwerhe engeso zikwirire bwenene, n’oku alonzeze kujira egulu libe paradizo.​—Mwa. 1:1; Mdo. 17:24-27.

2. Gurhe bantu baguma banabona balala bayemerere oku Omulemi abaho?

² Aliko, bantu banene barhayemera oku Mungu abaho, changwa oku yewe ye walemaga ebintu byoshi. S’ahubwe, bayemerere oku obuguma-guma bwachilerhaga bonyine bwaja bwahindamuka kubuyabuya n’okuba buguma-guma bw’ebintu binyoli-nyoli bwenene na buzinda bwaja bwaba buguma-guma bw’ebintu bisomeze bilamire. Bantu baguma mw’abola, bali bantu basomere bwenene. Bakaderha oku esiyanse yayerekene oku Ebiblia enabesha n’oku abantu barhasomaga, abarhaherhe bwenge changwa ebinganyi, ba bakayemera oku Omulemi abaho.

3. Bulagurhe kuli kw’akamaro rhukomeze obwemere bwerhu?

³ Ka rhwaleka bilala abasomere bwenene banaderha byarhuma rhwagwarha engangane, oku Yehova arhali ye Mulemi werhu w’obuzigire? Kwayumangira ahanene oku mpanvu zirhumire rhwayemera oku Yehova ye Mulemi. Ka rhuyemerere ntyo bulala kubarhubwiraga changwa rhwarholere ebisanzi by’okugerereza rhwenyine ebintu by’okuli birhuyemezeze? (1 Ko. 3:12-15) Chiro akaba rhwamamala myaka migeke changwa minene eyi rhuli Bahamirizi ba Yehova, rhweshi rhukwanene kugenderera kukomeza obwemere bwerhu. Rhukajira ntyo, rhurharhebekwa “n’efilozofi n’obubeshi bukabizye” buli bwayigirizwa na balala banapinga Echinwa cha Mungu. (Kol. 2:8; Ebr. 11:6) Omu kurhurhabala, gunola mwazi gwaganira oku 1) bulagurhe bantu banene barhayemera oku Omulemi abaho, 2) gurhe wakakomeza obwemere bwawe mu Yehova, Mulemi wawe, na  3) nka gurhe wakagenderera kukomeza obwemere bwawe.

4. Nk’oku olwandiko lwa Waebrania 11:1 n’amahugulo m’eshishi biderhere, bichi obwemere b’okuli buba buyumangireko?

⁴ Bantu banene banawaza ok’okugwarha obwemere kuli kufachakuyemera chintu chilebe konyine. Aliko nk’oku Ebiblia ederhere, obola burhali bwemere b’okuli. (Osome Waebrania 11:1 n’amahugulo m’eshishi.) Ebiblia erhubwirire oku obwemere buba bayumangiire oku bintu biyemezeze. Bobola, chiro akaba rhurhakagala kubona Yehova, Yesu, n’Obwami, rhugwerhe ebirhuyemezeze, oku baliho, n’Obwami nabo buliho. (Ebr. 11:3) Muntu muguma wasomaga esiyanse wabere Muhamirizi wa Yehova, aderhere ntya: “Obwemere bwerhu burhali bwemere buhumire mpu bufunde kubona ebintu by’okuli esiyanse ederhere.”

5. Bulagurhe bantu baguma banayemera oku obuguma-guma bwachilerhaga buzira Mulemi?

⁵ Rhwakachibaza, ‘bulagurhe bantu banene banayemera oku arhali Mungu ye walemaga obuguma-guma nabo hali bintu binene birhuyemezeze oku ye wabilemaga?’ Baguma barhasaga kugerereza bonyine chiro n’akatyu ebintu biyerekene oku Mungu ye walemaga byoshi. Robert, okala ali zene Muhamirizi wa Yehova, aderhere ntya: “Bulala oku masomo abalimu barhaliri baderha chiro n’akatyu oku bilolere obulemi, nayinja nawaza oku burhali b’okuli. Aliko nayeneze myaka 20 ntya, nashambala n’Abahamirizi ba Yehova nayunva emyazi yoshi efarhene n’obwenge erhengere omu Biblia eyerekene oku kweri Mungu ye walemaga ebintu byoshi.” *​—Olole echisanduku “ Omukonge oku Bazere.”

6. Bulagurhe bantu banene banaderha oku Omulemi arhabaho?

 ⁶ Bantu baguma barhayemera oku haba Omulemi, bulala banaderha oku banayemera ebi banabona byonyine n’amesho mabo. Aliko okuderha okuli, abola bantu banayemera ebintu birhakabonekana n’amesho mabo. Omufano, emisi y’egulu enarhuma ebintu bilemerere (bizidohere) byarhoga, bulala hali ebintu biyerekene oku eyola misi ebaho. Obwemere buganirirwe omu Biblia buyumangire kandi oku bintu “biyemezeze birhabonekana n’amasu.” (Ebr. 11:1) Byakahema ebisanzi n’obushiru, yi rhuyiga rhwenyine ebyola bintu biyemezeze, na bantu banene barhachihangana kujira ntyo. Omuntu orhayigire yenyine ebyola bintu biyemezeze, akahikira kuderha oku Mungu arhabaho.

7. K’abantu boshi basomere bwenene banahakana oku arhali Mungu ye walemaga ebintu byoshi? Sabanura.

⁷ Enyuma y’okuyiga ebintu biyemezeze, bantu baguma basomere esiyanse, bayemerere  oku Mungu ye walemaga amahanga. * Kuguma na Robert rhwashambalagako burhanzi, baguma bakawaza oku Omulemi arhabaho, bulala barhayigaga chiro n’eliguma oku bilolere obulemi oku iniversite. Aliko, bantu banene basomere esiyanse bahikire kumenya Yehova n’okumuzigira. Kuguma n’abola bantu basomere esiyanse, rhweshi rhukwanene kukomeza obwemere bwerhu mu Mungu, chiro akaba rhwasomere masomo manene changwa mageke. Nta windi muntu wakajira ntyo ahali herhu.

8-9. a) Chibazo chihe rhukola kuganirako? b) Okuyiga oku bilolere obulemi kwakulerhera nyungu zichi?

⁸ Nka gurhe wakakomeza obwemere bwawe omu Mulemi? Rhushambalage ku njira ene.

⁹ Oyige oku bilolere Obulemi. Wakakomeza obwemere bwawe omu Mulemi, omu kulolereza enyama, emimera, n’enyenyezi. (Zb. 19:1; Isa. 40:26) Ok’onali wagenderera kuyiga oku bilolere ebyola bintu, kuwanagenderera kuchizera oku Yehova ye Mulemi werhu. Ebitabu byerhu bizigana kuba eyi bili mw’emyazi ederhere ku bintu binene oku bilolere obulemi. Omenye washabuka eyola myazi chiro yakaba ekomere kuyiyunva. Ochihangane kuyiyunva nk’okuwakanagala. Omenye wayibagira kushuba kulola eyola myazi oku site yerhu y’Enternete, jw.org, n’evideo zikwirire zilolere obulemi zayerekanwaga oku mbungano zerhu z’eneo omu myaka echizindire gera!

10. Gurhe ebintu byalemwaga biyerekene oku Omulemi abaho? Lerha omufano. (Waroma 1:20)

¹⁰ Amango oli wayiga oku bilolere obulemi, oseze obwenge oku biwamayiga oku bilolere Omulemi werhu. (Osome Waroma 1:20.) Omufano, ezuba linarhuhereza echuka omwengezi, n’ebyola binarhuma akalamo kagenderera bwinja oku gulu. Aliko mimole miguma y’ezuba yakayirha ebintu bigwerhe obuguma-guma oku gulu. Che chirhumire rhwabo nka bantu rhukwanene rhulangwe kw’eyola mimole. Kweri rhunalangirwe! Nka gurhe? Egulu rhulamireko lijira empenzi yage y’okulilanga; k’okuderha echintu chilishukulire chili nka hema ly’egaze chiyirikwa ozone, chiba chizungulikire egulu, yi chililanga n’emimole yakayirha ebiliko. Amango eyola mimole mibi yamakaliha, n’eyola gaze ye ozone nayo yanayushuka. Bobunola orhayemerere oku hakwanene habe muntu mulebe oli enyuma w’ebyola byoshi, okwanene kuba eyi ali Mulemi ogwerhe obuzigire onagwerhe obwenge si?

11. Ngahe wakakula emyazi y’okukomeza obwemere bwawe oku bilolere Omulemi? (Olole Echisanduku “ Myazi Miguma Yakakomeza Obwemere Bwawe omu Mulemi.”)

¹¹ Wakabona binene bilolere obulemi byakakomeza obwemere bwawe omu kulola omu Index des Publications des Témoins de Jéhovah n’okulonza emyazi oku jw.org. Wakasima kuhwanza kujira ntyo omu kusoma emyazi n’okulola evideo bili omu chigabi “Echi Chintu Chalemwaga Si?” Eyola myazi n’ezola video zili nyofi zinagwerhe emyazi esomeze oku bilolere enyama n’ebindi bilemwa. Kandi zigwerhe emifano eyerekene okuntu abantu basomere esiyanse bayiganyize ebi banabona omu bulemi.

12. Bintu bihe rhukwanene kusezako obwenge amango rhuli rhwayiga Ebiblia?

¹² Oyige Ebiblia. Olala mulume wasomere esiyanse rhwashambalagako omu chifungo cha 4, arhaliyemerere han’aho obulemi. Aliko hagera amango ayemera oku Omulemi abaho. Aderhere ntya: “Obwemere bwani  burhaliyumangire konyine oku binayigaga omu siyanse. Aliko kandi bwaliyumangire oku binayigaga bwinja-bwinja omu Biblia.” Nkabaga okola ogwerhe obumenyi burhagwerhe magosa bwe Biblia. Aliko, y’okomeza obwemere bwawe omu Mulemi, bihemere ogenderere kuyiga Echinwa cha Mungu. (Yos. 1:8; Zb. 119:97) Omufano, waza okuntu Ebiblia eshambere oku bukweri boshi bw’ebintu byajirikaga mira. Oseze obwenge oku bulebi bwayo n’okuntu bupatene. Okujira ntyo kwakomeza obwemere bwawe oku Omulemi ogwerhe obuzigire n’obwengehe, yi warhulemaga n’oku yi wayandikisaga Ebiblia. *​—2 Ti. 3:14; 2 Pe. 1:21.

13. Mufano guhe muguma gubonekene omu Chinwa cha Mungu?

¹³ Amango oli wayiga Echinwa cha Mungu, olole gurhe empanulo zacho zili z’akamaro bwenene. Omufano, Ebiblia yabaga yakengusize oku, okusima efuranga kunalerha obuhanya na “malumwa manene.” (1 Ti. 6:9, 10; Mez. 28:20; Mt. 6:24) K’ogola mukonge guchili g’okuli kuhika zene? Chitabu chiguma chishambere oku bilolere oborhere bw’abantu ba zene, chiderhere ntya: “Mango manene, abantu bayemera ok’okugwarha efuranga che chintu ch’akamaro bwenene omu kalamo, barhajira busime n’okuvunika omurhima bwenene. Chiro n’abantu balonza bagwarhe furanga zinene, barhajira busime, banagwarha bibazo binene by’amagala.” Che chirhumire, empanulo ye Biblia erhubwirire oku rhurhakwanene kusima efuranga, eli mpanulo nyinja bwenene! Ka wakawaza oku zindi mpanulo ze Biblia zakurhabere? Amango rhwamawaza oku mpanulo zoshi ze Biblia, rhwanabona oku Omulemi werhu w’obuzigire ayinji echakarhubera chinja kandi rhwagenderera kulonza empanulo emunda ali. (Yak. 1:5) Echola charhuma rhwagwarha busime bunene omu kalamo kerhu.​—Isa. 48:17, 18.

14. Bichi okuyiga Ebiblia kwa kuyigiriza ku Yehova?

¹⁴ Oyige Ebiblia ey’onagwerhe omuhigo g’okumenya Yehova bwinja. (Yoh. 17:3) Amango oli wayiga Amandiko, wamenya oborhere n’engeso za Yehova, ezola zenangeso wabonaga amango wayigaga oku bilolere obulemi. Okuyiga engeso za Yehova kunarhuyemeza oku kweri Yehova abaho. (Kut. 34:6, 7; Zb. 145:8, 9) Okahikira kumenya Yehova bwinja-bwinja, obwemere bwawe muye bwakomera, wamuzigira bwenene, n’obwira bwawe haguma naye bwakomera bwenene.

15. Nka gurhe okushambala n’abandi oku bilolere Mungu, kwakurhabala ogenderere kukomeza obwemere bwawe?

¹⁵ Oshambale n’abandi oku bilolere obwemere bwawe mu Mungu. Ok’onali wajira ntyo, obwemere bwawe bwakomera. Aliko si gurhe byakaba amango omuntu oli wahubiri amalerha echibazo akaba Mungu abaho changwa nanga, orhanamenyere gurhe wakamushubiza? Wakalonza Olwandiko lwakashubiza echola chibazo lubonekene mu chiguma omu bitabu byerhu, wanaja wachishambalako n’oyola muntu. (1 Pe. 3:15) Kandi, wakahema owindi mwene-werhu akurhabale omenye okuntu wakashubiza echola chibazo. Chiro akaba oyola muntu ayemerere changwa arhayemerere echishubizo che Biblia, woyo wagwarha enyungu bulala walilonzeze emyazi. Obwemere bwawe bwakomera. Okajira ntyo, orhachirhebekwa n’obubeshi bwa balala banabonekana nka bengehe banasomere bwenene, banaderha oku Omulemi arhabaho.

16. Bichi byakarhuhikira akaba rhurhagenderere kukomeza obwemere bwerhu?

¹⁶ Chiro akaba hamagera myaka minene changwa migeke eyi rhuli rhwakolera Yehova, rhukwanene kugenderera kukomeza obwemere bwerhu muye. Bulagurhe? Bulala akaba rhurhakengukire, obwemere bwerhu bwakahola.  Nk’oku rhwaganirire, obwemere buba buyumangiire oku bintu biyemezeze birhabonekana n’amasu. Rhwakayibagira juba-juba ebintu birhabonekana n’amasu. Che charhumaga Paulo ayirika okubula obwemere “echaha chirhufarha juba-juba nka murhego.” (Ebr. 12:1) Bobola si, nka gurhe rhwakachilanga n’ogola murhego?​—2 Te. 1:3.

17. Bichi byakarhurhabala rhukomeze obwemere bwerhu?

¹⁷ Ech’oburhanzi, oheme Yehova eroho lyage lichesibwa onajire ntyo buli mango. Bulagurhe? Bulala obwemere buli omu ngeso z’etunda ly’eroho. (Gal. 5:22, 23) Rhurhakagala kugenderera kukomeza obwemere bwerhu omu Mulemi, buzira oburhabale bw’eroho lyage lichesibwa. Rhugenderere okuhema Yehova eroho lyage lichesibwa, arhuha lyo. (Lu. 11:13) Ahanene rhwakasalira ntya: “Orhuhe bwemere bunene.”​—Lu. 17:5.

18. Nk’oku Zaburi 1:2, 3 ederhere, lukengo luhe rhugwerhe?

¹⁸ Kandi, ogenderere kujira efunzo lyawe-lyawe lye Chinwa cha Mungu oku kahunda. (Osome Zaburi 1:2, 3.) Amango eyila zaburi yayandikwaga, Baizraeli bageke b’abaligwerhe echitabu chiyenere che Sheriya ya Mungu. Aliko omwami n’abadahwa b’abaligwerhe ebitabu, na ngasi buli myaka mushanvu, emipango yalijirirwe oku “balume, abakazi, abana,” n’abenjira b’omu Izraeli bayunvirize gurhe Esheriya ya Mungu eli yasomwa. (Kum. 31:10-12) Amango Yesu aliri oku gulu, bantu bageke b’abaligwerhe ebitabu by’okukunja by’Amandiko na binene mu byo, byaliri byabikwa omu masinagogi. Aliko zene, bantu banene bagwerhe echigabi che Biblia changwa yoshi eyenere. Olola luli lukengo lunene. Nka gurhe rhwakayerekana oku rhusimisizwe n’olola lukengo?

19. Bichi rhukwanene kujira y’obwemere bwerhu bugenderera kukomera?

¹⁹ Rhwakayerekana oku rhusimisizwe n’olukengo l’okugwarha Echinwa cha Mungu, omu kuchisoma oku kahunda. Rhukwanene kurheganya akasanzi k’okusoma n’okuyiga Ebiblia si rhurhayinjaga rhwafayisoma konyine amango rhwamapata ebisanzi. Rhukagenderera kuyiga Ebiblia buli lusiku, obwemere bwerhu bwakomera.

20. Bichi rhukwanene kuhigirira kujira?

²⁰ “Abengehe n’abantu basomere” b’elila gulu barhagwerhe bwemere, aliko rhwewe rhugwerhe obwemere bukomere buyumangire oku Chinwa cha Mungu. (Mt. 11:25, 26) Kugerera efunzo lyerhu lye Biblia, rhumenyere bulagurhe ebintu bili byagenderera kubiha oku gulu, na bichi Yehova ajira eju y’echola. Che chirhumire rhuhigirirage kugenderera kukomeza obwemere bwerhu n’okurhabala bantu banene nk’oku byakanagalikana nabo bagwarhe obwemere omu Mulemi werhu. (1 Ti. 2:3, 4) Rhunagendererage kulangalira amango boshi balamire oku gulu nji baderha ebila binwa bili omu Ufunuo 4:11: “Okwanene Yehova Mungu werhu kuhabwa obukuze . . . bulala walemere ebintu byoshi.”