1. Iseda Havaraia Tauna dekenai dahaka oi dibaia?

BEMA oi be Witnes ruma besena ai oi tubu daekau, oi maragi negana amo Iehova oi dibaia. Oi diba ia be Havaraia Tauna bona mai ena kara namodia, bona ia ura inai tanobada be paradaiso ai do ia halaoa.​—Gen. 1:1; Kara 17:24-27.

2. Havaraia Tauna idia abidadama henia taudia dekenai haida edia lalohadai be dahaka?

² Taunimanima momo idia abia dae lasi Dirava ia noho, eiava ia be Havaraia Tauna. To idia abia dae, mauri be gau maragina ta amo ia matamaia ela bona mauri gauna badana ai ia lao. Unai lalohadai be diba bada taudia momo ese idia abia dae. Idia gwau, saiens ese Baibel ena hereva ia hakoikoia. Bona danu idia gwau Havaraia Tauna idia abidadama henia taudia be aonega lasi taudia.

3. Dahaka dainai iseda abidadama ita hagoadaia be mai anina bada?

³ Diba bada taudia haida edia hereva dainai, Iehova be iseda Havaraia Tauna do ita daradaralaia, a? Dahaka dainai oi abia dae Iehova be Havaraia Tauna? Haida ese oi idia hamaoroa unai oi abia dae totona, a? Eiava, oi sibona ese nega oi atoa hamomokania gaudia oi stadilaia, a? (1 Kor. 3:12-15) Ena be Iehova ena orea lalonai lagani momo ita noho, to namona be iseda abidadama ita hagoadaia noho. Bema unai ita karaia, Baibel idia gwauraia koikoi taudia edia hereva ese ita do idia koia lasi. (Kol. 2:8; Heb. 11:6) Inai atikol ai, ita do ia durua daladia toi do ita herevalaia: (1) Dahaka dainai momo be Havaraia Tauna idia abia dae lasi, (2) edena dala ai emu Havaraia Tauna, Iehova, dekenai emu abidadama do oi habadaia noho, bona (3) edena dala ai unai abidadama do oi dogoatao noho.

4. Heberu 11:1 hegeregerena, abidadama ena anina be dahaka?

⁴ Haida idia laloa abidadama anina be, ta be gau ta ia abia dae sibona, ena be hamomokania gauna ia noho lasi. To Baibel ia gwau unai be abidadama korikorina lasi. (Heberu 11:1 duahia.) Baibel ese ia hahedinaraia, ta be ia hamomokania gauna ia abidadama henia, unai dainai ena be Iehova, Iesu, bona Basileia ita itaia lasi, to ita abia dae idia noho momokani. (Heb. 11:3) Saiens tauna, hari ia be Witnes ta, ia gwau: “Iehova ena Witnes taudia ese idia abia dae gaudia be mai edia badina, bona saiens taudia ese unai idia hamomokania danu.”

5. Dahaka dainai momo idia abia dae lasi Dirava be mauri gaudia ia havaraia?

⁵ Reana do oi henanadai, ‘Bema hamomokania gaudia ese idia hahedinaraia Havaraia Tauna ia noho, dahaka dainai momo idia abia dae lasi Dirava be mauri gaudia ia havaraia?’ Haida be nega idia atoa lasi hamomokania gaudia idia tahua totona. Robert, hari ia be Witnes ta, ia gwau: “Sikuli dekenai havaraia gaudia idia herevalaia lasi, unai dainai lau laloa unai gaudia be idia vara kava. Egu mauri lagani be 22 neganai, Iehova ena Witnes taudia lau hereva henia bona idia ese Baibel amo idia hamomokania Dirava ese gau ibounai ia havaraia.” *​—Maua itaia: “ Tama Sina Dekenai mai Anina Bada Hereva Ta.”

6. Dahaka dainai haida idia abia dae Havaraia Tauna ia noho lasi?

⁶ Haida be Havaraia Tauna idia abia dae lasi, badina idia gwau idia itaia gaudia  sibona idia abia dae. To idia itaia lasi gaudia haida idia abia dae, hegeregere lai, badina hamomokania gaudia idia itaia. Baibel ese unai bamona abidadama ia herevalaia, ia gwau: “Oi diba momokani, oi abia dae gaudia be momokani, ena be unai gaudia oi itaia lasi.” (Heb. 11:1) Namona be nega ita atoa bona ita hekwarahi hamomokania gaudia ita stadilaia totona. To taunimanima momo be unai bamona idia karaia lasi. Bema ta be unai bamona hamomokania gaudia ia tahua lasi, reana do ia gwau diba, Dirava ia noho lasi.

7. Saiens taudia haida idia abia dae Dirava be Havaraia Tauna, a? Herevalaia.

⁷ Saiens taudia haida be hamomokania gaudia idia stadilaia murinai, idia abia dae Dirava ese iunives ia karaia. * Matamanai  ita herevalaia Robert hegeregerena, haida idia laloa Havaraia Tauna ia noho lasi, badinai iunivesiti dekenai havaraia gaudia idia herevalaia lasi. To, saiens taudia momo be Iehova idia diba bona idia lalokau henia. Idia karaia bamona, ita danu be Dirava dekenai eda abidadama do ita hagoadaia noho. Ta ese ita totona unai do ia karaia lasi.

8-9. (a) Dahaka henanadai do ita herevalaia? (b) Dirava ena havaraia gaudia oi stadilaia karana amo dahaka namo do oi davaria?

⁸ Edena dala ai Havaraia Tauna dekenai emu abidadama oi hagoadaia diba? Mani dala 4 ita herevalaia.

⁹ Dirava ese ia havaraia gaudia oi stadilaia. Animal idauidau, tubutubu gaudia, bona hisiu oi stadilaia neganai, Havaraia Tauna dekenai emu abidadama oi hagoadaia diba. (Sal. 19:1; Isa. 40:26) Unai gaudia oi stadilaia namonamo neganai, do oi abia dae momokani Iehova be Havaraia Tauna. Iseda pablikeisen lalonai idia noho atikol momo be Dirava ese mauri gaudia ia havaraia daladia idia herevalaia. Ena be unai bamona atikol oi lalopararalaia be auka, to namona be oi duahia, bona gau momo do oi dibaia. Danu, namona be vanegai rijinol hebouhebou dekenai idia hedinarai Dirava ese ia karaia gaudia edia vidio idauidau be jw.org dekenai oi itaia diba.

10. Edena haheitalai ese ia hahedinaraia Havaraia Tauna ta ia noho? (Roma 1:20)

¹⁰ Dirava ena havaraia gaudia ita stadilaia namonamo karana amo Ia ita dibaia. (Roma 1:20 duahia.) Hegeregere, dina ena siahu bona diari ese tanobada ai mauri gaudia ia durua, to dina ese ia halasia siahu haida be dika ia havaraia diba. To gau ta ese ita ia gimaia. Unai be dahaka? Ozone hodahoda ese tanobada ia hagegea, bona unai gauna ese dina ena siahu dikadia ia koua. Dina amo idia raka-lasi siahu dikadia idia goada momokani neganai, unai hodahoda ia bada ia lao. Oi abia dae Havaraia Tauna ta ia noho, bona ia ese mai lalokau bona aonega ida unai gaudia ia karaia, ani?

11. Edeseniai Havaraia Tauna dekenai emu abidadama ia hagoadaia gaudia oi davaria diba? (Maua itaia: “ Havaraia Tauna Dekenai Emu Abidadama Hagoadaia Gaudia.”)

¹¹ Watch Tower Publications Index bona jw.org dekenai, havaraia gaudia totona tahua gaukara oi karaia neganai, emu abidadama do ia hagoadaia bada. Unai oi karaia totona, oi lao jw.org ai inai kahana laibri, vidio, Baibel, bena “Havaraia Gaudia” oi tahua. Unuseniai vidio kwadogidia ese animal bona tubutubu gaudia idia herevalaia. Saiens taudia ese unai animal bona tubutubu gaudia amo gau haida idia karaia dalana idia herevalaia danu.

12. Baibel ita stadilaia neganai, dahaka ita laloa be namo?

¹² Baibel oi stadilaia. Paragraf 4 ai ita herevalaia saiens tauna be guna Havaraia Tauna ia abidadama henia lasi. To, gabeai ia abia dae Havaraia Tauna ia noho. Ia gwau: “Saiens sibona lau stadilaia lasi, to Baibel lau stadilaia namonamo dainai Havaraia Tauna lau abidadama henia.” Reana oi be Baibel oi diba namonamo, to emu Havaraia Tauna dekenai emu abidadama oi hagoadaia noho totona Baibel oi stadilaia noho be namo. (Ios. 1:8; Sal. 119:97) Hegeregere, Baibel ese idaunegai idia vara gaudia ia herevalaia namonamo dalana oi laloa. Danu, Baibel ena peroveta herevadia idia guguru dalana, bona Baibel idia torea taudia ese ta ta edia hereva idia hamomokania dalana oi laloa. Unai ese iseda abidadama do ia hagoadaia bona ita abia dae lalokau bona aonega Diravana ese ita  ia havaraia, bona Baibel be Iena hereva. *​—2 Tim. 3:14; 2 Pet. 1:21.

13. Baibel lalonai edena sisiba namona ta ia noho?

¹³ Baibel oi stadilaia neganai, do oi itaia ena sisiba ese oi do ia durua bada. Hegeregere, idaunegai Baibel ia gwau moni ura henia dikadika karana be mai ena dika bona “hisihisi momo” ia havaraia. (1 Tim. 6:9, 10; Aon. 28:20; Mat. 6:24) Hari inai negai unai sisiba be mai anina bada, a? Taunimanima edia kara ia herevalaia bukana ta ia gwau: “Kohu momo taudia be idia moale lasi bona idia lalohisihisi bada. Moni momo idia ura abia taudia be idia lalometau bona idia gorere momo.” Momokani, Baibel ena sisiba moni do ita ura henia bada lasi be mai anina bada! Baibel ena sisiba herevadia ma haida ese oi idia durua dalana oi laloa, a? Baibel ena sisiba namodia ita laloa neganai, do ita itaia iseda Havaraia Tauna be iseda namo ia laloa bada bona hanaihanai Ia dekenai do ita tabekau. (Iam. 1:5) Unai amo iseda mauri do ita moalelaia.​—Isa. 48:17, 18.

14. Baibel oi stadilaia neganai, Iehova dekenai dahaka do oi dibaia?

¹⁴ Iehova oi diba namonamo totona, Baibel oi stadilaia be namo. (Ioa. 17:3) Baibel oi stadilaia neganai, Iehova ena kara namodia do oi dibaia, bona ia havaraia gaudia amo unai kara namodia do oi dibaia danu. Iehova ena kara namodia oi dibaia neganai, do oi abia dae Iehova ia noho momokani. (Eso. 34:6, 7; Sal. 145:8, 9) Iehova oi diba namonamo neganai, emu abidadama do ia goada, emu lalokau do ia bada, bona emui hetura karana do ia goada.

15. Ma haida dekenai Dirava oi herevalaia neganai, edena dala ai unai ese oi do ia durua?

¹⁵ Ma haida dekenai emu abidadama oi herevalaia. Unai bamona oi karaia neganai, emu abidadama do ia goada. Bema oi haroro henia tauna ia gwau Dirava ia noho lasi, bona haere henia dalana oi diba lasi, dahaka do oi karaia? Namona be iseda pablikeisen amo Baibel ena haere maorona oi tahua bona ia ida oi herevalaia. (1 Pet. 3:15) Danu ekspiriens tadikaka eiava taihu ta amo heduru oi tahua. Ena be unai tauna ese Baibel ena haere do ia abia dae eiava lasi, to oi be tahua gaukara oi karaia dainai, unai ese emu abidadama do ia hagoadaia. Unai amo aonega eiava diba bada taudia idia gwau Dirava ia noho lasi neganai, edia hereva do oi abia dae lasi.

16. Bema iseda abidadama ita hagoadaia noho lasi, dahaka do ia vara?

¹⁶ Herevana lagani momo lalonai Iehova ita hesiai henia, to iseda abidadama ita hagoadaia noho be namo. Dahaka dainai? Badina bema ita naria namonamo lasi, iseda abidadama ia manoka diba. Laloatao, abidadama ena anina be oi abia dae gaudia be momokani, ena be unai gaudia oi itaia lasi. Ita itaia lasi gaudia do ita laloaboio haraga diba. Unai dainai, Paulo be abidadama lasi karana ia gwauraia “ita idia guia noho kara dika.” (Heb. 12:1) Edena dala ai iseda abidadama do ia goada noho?​—2 Tes. 1:3.

17. Dahaka ese ita do ia durua iseda abidadama ita hagoadaia noho totona?

¹⁷ Ginigunana be, hanaihanai Iehova ena lauma helaga totona oi noinoi. Dahaka dainai? Badina abidadama be lauma helaga ena huahua ta. (Gal. 5:22, 23) Bema lauma helaga ena heduru ita abia lasi, Havaraia Tauna dekenai iseda abidadama do ia goada lasi. Bema lauma helaga totona Iehova dekenai ita noinoi noho, ita dekenai do ia henia. (Luka 11:13) Namona  be ita guriguri: “Mani emai abidadama oi habadaia.”​—Luka 17:5.

18. Salamo 1:2, 3 hegeregerena, dahaka hahenamo ita moalelaia?

¹⁸ Iharuana be, hanaihanai Dirava ena Hereva oi stadilaia. (Salamo 1:2, 3 duahia.) Unai siri idia torea negana ai, Israela taudia haida sibona be Dirava ena toretore ena kopi idia abia. To, king bona hahelaga taudia be mai edia kopi ta ta, bona lagani 7 ta ta edia dokonai, hebou idia karaia neganai “tatau, hahine, natudia,” bona idau taudia dekenai Dirava ena Taravatu idia duahia. (Deu. 31:10-12) Iesu ena negai, haida sibona be lokua toretore idia abia, to kopi momo be sinagoga dekenai idia noho. To hari inai negai, momo ese Dirava ena hereva kahana eiava ibounai idia duahia diba. Unai be hahenamo badana. Edena dala ai ita hahedinaraia Baibel ita laloa bada?

19. Eda abidadama ia goada noho totona, dahaka ita karaia be namo?

¹⁹ Hanaihanai Dirava ena Hereva ita duahia neganai, ita hahedinaraia ita laloa bada. Namona be sediual ita karaia, Baibel ita duahia bona stadilaia totona. Bema hanaihanai unai sediual ita badinaia, iseda abidadama do ita hagoadaia noho.

20. Iseda lalona ita hadaia dahaka ita karaia totona?

²⁰ Ita be inai tanobada ena “aonega bona diba bada taudia” bamona lasi, to Dirava ena Hereva ita abidadama henia. (Mat. 11:25, 26) Baibel ese ita ia hadibaia dahaka dainai kara dika be ia bada ia lao, bona Iehova be dahaka do ia karaia. Unai dainai, iseda lalonai ita hadaia iseda abidadama ita hagoadaia noho bona momo ita durua Havaraia Tauna idia abidadama henia totona. (1 Tim. 2:3, 4) Vaira nega ita naria noho, unai nega ai idia roho mauri taudia ibounai ese Apokalupo 4:11 hegeregerena, Iehova do idia hanamoa, do idia gwau: “Iehova, aiemai Dirava e, oi be hegeregere momokani, hairai . . . oi abia totona, . . . badina oi ese gau ibounai oi havaraia.”