1. Kuzê ki bu prende sobri nos Kriador?

SI BU kria na un família di Tistimunhas di Jeová, talvês désdi pikinoti bu prende sobri Jeová. Bu pai ku bu mai inxina-u ma é Jeová ki kria tudu kuza. Tanbê es inxina-u ma el ten kualidadis rei di bunitu i ma el ta ben bira Téra un paraízu. — Gén. 1:1; Atos 17:24-27.

2. Kuzê ki alguns algen ta pensa di kes ki ta kridita ma é Deus ki kria tudu kuza?

² Txeu algen ka ta kridita ma Deus ta izisti ô ma é el ki kria tudu kuza. Envês di kel-li, es ta kridita ma vida kumesa el sô i el ba ta dizenvolve di kes fórma di vida más sinplis ti kes fórma di vida más difísil. Alguns di kes algen ki ta kridita na kel-li ten txeu skóla. Talvês ti es ta fla ma siênsia dja prova ma Bíblia sta eradu. Tanbê es ta fla ma ki ta kridita na un Kriador é sô kes algen ki ka ten skóla, ki é iginoranti ô ki ka é intilijenti.

3. Pamodi ki é inportanti nu bira nos fé más fórti?

³ Kes kuza ki kes algen ki ten txeu skóla ta fla, pode pô-nu ku dúvida ma Jeová é un Kriador ki ta ama-nu? Kel-li ta dipende txeu di pamodi ki nu ta kridita ma Jeová é Kriador. É pamodi nu fladu pa nu kridita na kel-li ô é pamodi nu tra ténpu pa nu djobe próvas di nos pa nos? (1 Cor. 3:12-15) Sikrê dja dura ki nos é Tistimunhas di Jeová, nu meste kontinua ta bira nos fé más fórti. Si nu faze kel-li, ómis ka ta ngana-nu ku ses ‘filozofia i palavras sen valor ki ta ngana’ i ki ka sta di akordu ku Bíblia. (Col. 2:8; Heb. 11:6) Pa djuda-nu ten un fé más fórti na kriason, kel studu li sta ben pâpia di três kuza: (1) pamodi ki txeu algen ka ta kridita na un Kriador, (2) modi ki bu pode ten un fé más  fórti na Jeová, bu Kriador, i (3) modi ki bu pode kontinua ta ten un fé fórti.

4. Sima sta na Hebreus 11:1 i nóta di rodapé, fé ten bazi na kuzê?

⁴ Alguns algen ta atxa ma ten fé siginifika kridita na un kuza sen ninhun próva. Má di akordu ku Bíblia, kel-li é ka fé di verdadi. (Lé Hebreus 11:1 i nóta di rodapé.) Bíblia ta fla ma fé ten bazi na próvas. Nton, nbóra nu ka ta odja Jeová, Jizus i Reinu na Séu, nu ten próvas ki ta mostra-nu ma es ta izisti mê. (Heb. 11:3) Un sientista ki bira Tistimunha di Jeová, fla: “Fé di Tistimunhas di Jeová ten bazi na próvas i es ka ta iginora kes próva ki siênsia ta da.”

5. Pamodi ki txeu algen ta atxa ma vida kumesa el sô?

⁵ Si ten txeu próva ki ta da-nu sertéza ma izisti un Kriador, nton pamodi ki txeu algen ka ta kridita ma ten un Kriador? Prubléma é ki alguns algen nunka ka ta para pa pensa na kes próva ki izisti. Rubertu ki oji é Tistimunha di Jeová, fla: “Dja ki nunka es ka pâpia di kriason na skóla, N ka ta kriditaba na kriason. É sô dipôs ki N tinha 22 anu ki N pâpia ku Tistimunhas di Jeová i N prende ma Bíblia ta da-nu bons razon pa nu kridita ma é Deus ki faze tudu kuza.” * — Odja kuadru “ Un mensaji inportanti pa pai ku mai.”

6. Pamodi ki alguns algen ka ta kridita na un Kriador?

⁶ Alguns algen ka ta kridita na un Kriador pamodi es ta fla ma es ta kridita sô  na kel ki es ta konsigi odja. Má na verdadi, es ta kridita na kuzas ki es ka ta konsigi odja. Pur izénplu, es ta kridita na béntu pamodi ten próvas ki ta mostra ma el ta izisti mê. Kel tipu di fé ki Bíblia ta pâpia di el ta nvolve próvas di ‘kuzas ki nu ka ta odja, má ki é rial.’ (Heb. 11:1) Ta meste ténpu i sforsu pa un algen studa kes próva di el pa el. Má txeu algen ka ta krê faze kel-li. Un algen ki ka ta studa kes próva di el pa el, ta atxa ma Deus ka ta izisti.

7. É tudu algen ki ten txeu skóla ki ta fla ma ka ten un Kriador? Splika.

⁷ Alguns sientista studa kes próva ki ta mostra ma ta izisti un Kriador i es fika konvensidu ma é Deus ki kria tudu kuza. *  Sima kontise ku Rubertu, ki dja nu papiaba di el antis, alguns di es pode atxa ma ka ten un Kriador pamodi nunka es ka prende sobri kriason na universidadi. Má simé, txeu sientista ben konxe Jeová i es pasa ta ama-l. Sima kes sientista li faze, nos tudu nu meste bira nos fé más fórti na Deus, ka ta nporta si nu ten txeu skóla ô nau. Ningen ka ta pode faze kel-li pa nos.

8-9. (a) Ki pergunta nu sta ben responde gósi? (b) Pamodi ki é bon nu studa sobri kriason?

⁸ Modi ki bu pode bira bu fé más fórti na Kriador? Nu ben odja kuatu manera di faze kel-li.

⁹ Studa sobri kriason. Bu pode bira bu fé más fórti na Kriador óras ki bu ta djobe pa animal, plantas i strélas. (Sal. 19:1; Isa. 40:26) Kantu más bu studa sobri kes kuza la, más sertéza bu ta ten ma é Jeová ki kria tudu kuza. Txeu bês nos publikasons ta ten artigus ki ta splika txeu kuza sobri kriason. Sikrê bu ta atxa difísil di ntende kel asuntu li, ka bu dexa di le-s. Prende tudu kel ki bu ta pode. I ka bu skese di torna djobe kes vídiu bunitu di kriason ki mostradu na kongrésus di kes últimu anu li, ki sta na nos site jw.org.

10. Da un izénplu ki ta prova modi ki kriason ta mostra ma ta izisti un Kriador. (Romanos 1:20)

¹⁰ Óras ki bu ta studa sobri kriason, presta txeu atenson na kuzê ki kes próva ta mostra sobri nos Kriador. (Lé Romanos 1:20.) Pur izénplu, sól ta da-nu kalor i lus ki nu meste pa nu vive li na Téra. Má alguns lus di sól pode prujudika-nu. Pur isu nu meste proteje di kes lus li. I nu ten kel proteson li. Modi? Téra, ki é nos kaza, ten se própi proteson. Ten un kamada di gas na vólta di Téra ki ta txomadu ozonu. El ta proteje-nu di kes lus prigozu. Óras ki kes lus prigozu ta bira más fórti, kel gas ki txoma ozonu, ki ten na vólta di Téra ta bira más txeu. Nton, bu ka ta konkorda ma ten algen ki faze kel proteson li i ma el debe ser un Kriador txeu intilijenti i ki ta ama-nu?

11. Na undi ki bu pode atxa informasons ki pode djuda-u ten un fé más fórti na Kriador? (Odja kuadru “ Informasons ki ta djuda-nu ten un fé más fórti na nos Kriador.”)

¹¹ Si bu krê atxa más informason ki pode bira bu fé más fórti na un Kriador, djobe Índice das Publicações da Torre de Vigia i faze piskiza na nos site jw.org. Bu pode kumesa ku kes artigu i vídius ki ta faze párti di kel grupu di artigu li: “Tevi un algen ki faze-l?”. Es é kurtu i es ten alguns próva ki ta dexa-nu dimiradu sobri animal i sobri otus kriason. Tanbê, es ta mostra modi ki sientistas sta ta tenta kôpia kuzas ki es ta odja na naturéza.

12. Óras ki nu ta studa Bíblia, na kuzê ki nu debe presta atenson?

¹² Studa Bíblia. Kel sientista ki dja nu papiaba di el antis, ka ta kriditaba ma ta izistiba un Kriador. Má ku ténpu, el fika konvensidu ma ten un Kriador. El fla: “Kuzê ki pô-m ta ten fé, é ka sô kel ki dja N studaba na siênsia, má tanbê kel ki N studa na Bíblia.” Talvês dja bu konxe dretu kes kuza ki Bíblia ta inxina. Má simé, pa bira bu fé más fórti na bu Kriador, bu meste kontinua ta studa Palavra di Deus. (Jos. 1:8; Sal. 119:97) Pur izénplu, pensa na modi ki Bíblia ta fla tintin pa tintin kes kuza ki dja ten txeu ténpu ki kontise. Presta atenson na kes profesia di Bíblia i na modi ki kes párti diferenti sta di akordu ku kunpanheru. Si bu faze kel-li, bu ta ten más sertéza ma ta izisti un Kriador  intilijenti ki faze-nu, ki ta ama-nu txeu i ma Bíblia é se mensaji pa nos. *— 2 Tim. 3:14; 2 Ped. 1:21.

13. Kal ki é un di kes izénplu di sabedoria ki nu ta atxa na Palavra di Deus?

¹³ Óras ki bu ta studa Palavra di Deus, repara modi ki se konsedju ta djuda-nu. Pur izénplu, dja ten txeu ténpu ki Bíblia aviza-nu ma amor pa dinheru é prigozu i ta traze ‘txeu sufrimentu.’ (1 Tim. 6:9, 10; Pro. 28:20; Mat. 6:24) Kel avizu li inda ta sirbi pa nos ténpu? Un livru ki ta pâpia di atitudi di pesoas na nos ténpu ta fla: “Maioria di kes algen ki ta ama dinheru é ka filís i es é más deprimidu. Sô di fika ta pensa na ten más dinheru, un algen ten más xansi di panha depreson, el ta ten más preokupason i otus prubléma di saúdi.” Ta fika klaru ma kel konsedju di Bíblia di ka ama dinheru ta djuda-nu txeu! Bu ta konsigi pensa na un otu konsedju di Bíblia ki dja djuda-u? Kantu más nu da kes konsedju di Bíblia valor, más nu ta kunfia na se sabedoria ki ta sirbi pa tudu ténpu i ki ta ben di nos Kriador, ki ta ama-nu txeu. (Tia. 1:5) Asi, nu ta ten un vida mutu más sábi. — Isa. 48:17, 18.

14. Studa Bíblia ta djuda-u prende kuzê sobri Jeová?

¹⁴ Studa Bíblia pa bu konxe Jeová más midjór. (João 17:3) Timenti bu ta ba ta studa Bíblia, bu ta konxe manera di ser di Jeová i se kualidadis. I é kes mésmu kualidadi li ki bu prende kantu bu staba ta studa sobri kriason. Óras ki bu ta prende sobri un kualidadi di Jeová, bu ta odja ma el é un algen ki ta izisti mê i ma el é ka sô imajinason di un algen. (Êxo. 34:6, 7; Sal. 145:8, 9) Sima bu ta ba ta konxe Jeová kada bês midjór, bu fé i bu amor pa el ta fika más fórti i nhos ta bira kada bês más amigu.

15. Modi ki pâpia ku otus sobri Jeová ta djuda-u?

¹⁵ Pâpia ku otus sobri bu fé na Deus. Óras ki bu ta faze kel-li, bu fé ta bira kada bês más fórti. Má i si un algen ki bu da tistimunhu fla-u ma el ten dúvida si Deus ta izisti i bu ka sabe modi ki bu ta responde-l? Tenta djobe respósta di kel pergunta li na un di nos publikason i dipôs mostra kel algen. (1 Ped. 3:15) Tanbê, bu pode pidi un irmon ki ten más spiriénsa pa djuda-u. Sikrê kel algen ka seta respósta ki Bíblia ta da, kes piskiza ki bu faze ta djuda-u tanbê. Bu fé ta fika más fórti. Asi, kes algen ki ta parse ma é spértu, ki ten txeu skóla i ki ta fla ma ka ten un Kriador, ka ta konsigi ngana-u.

16. Kuzê ki pode kontise si nu ka kontinua ta bira nos fé más fórti?

¹⁶ Sikrê dja nu ten txeu ténpu ta sirbi Jeová, nu meste kontinua ta kuida di nos fé. Pamodi? Pamodi si nu ka faze kel-li nos fé pode frakise. Sima dja nu odjaba, nos fé ten bazi na kes kuza ki nu ka ta odja i é faxi nu skese di es. É pur isu ki apóstlu Polu fla ma falta di fé é un ‘pekadu ki é faxi nu kai na el’. (Heb. 12:1) Nton, kuzê ki nu pode faze pa nu ka kai na kel armadilha li? — 2 Tes. 1:3.

17. Kuzê ki pode djuda-nu kontinua ku nos fé fórti?

¹⁷ Primeru, pidi Jeová pa da-u se spritu santu i faze kel-li sénpri. Pamodi? Pamodi fé é un kualidadi ki ta faze párti di frutu di spritu. (Gál. 5:22, 23) Nu ka ta konsigi mante nos fé fórti na nos Kriador sen ajuda di se spritu santu. Jeová ta da-nu se  spritu si nu kontinua ta pidi-l. (Luc. 11:13) Tanbê nu pode ora i pidi-l pa el ‘da-nu más fé.’ — Luc. 17:5.

18. Sima sta na Salmo 1:2, 3, ki priviléjiu nu ten oji?

¹⁸ Sugundu, faze bu studu pesoal di Palavra di Deus sénpri. (Lé Salmo 1:2, 3.) Kantu kel salmu li skrebedu, é poku israelita ki tinha un kópia konplétu di Lei di Deus. Má kes rei i kes saserdóti tinha kópias di Lei. Na kada 7 anu ‘kes ómi, mudjeris, kriansas’ i kes stranjeru ki ta moraba na Israel devia djuntaba pa obiba leitura di Lei di Deus. (Deut. 31:10-12) Na ténpu di Jizus, é sô alguns algen ki tinha kópias di rolu di Skrituras i maioria di kes rolu ta fikaba na sinagóga. Oji situason é diferenti. Maioria di algen, ta pode ten un Bíblia interu ô sô un párti. Kel-li é un grandi priviléjiu. Modi ki nu pode mostra ma nu ta da kel priviléjiu li valor?

19. Kuzê ki nu meste faze pa nu kontinua ta ten un fé fórti?

¹⁹ Nu ta mostra ma nu ta da valor pa kel priviléjiu di ten Palavra di Deus, óras ki nu ta le-l tudu dia. Nu ka debe pensa ma nu debe faze studu pesoal sô óras ki da. Nu debe tra ténpu pa nu lé i studa Bíblia i kontinua ta sigi kel prugrama. Si nu faze si, nu ta konsigi kontinua ta ten un fé fórti.

20. Kuzê ki nu debe sta disididu na faze?

²⁰ ‘Kes algen ki ten sabedoria i kes ki ten txeu konhisimentu’ na kel mundu li, ka ten fé na Palavra di Deus. (Mat. 11:25, 26) Má anos é ka sima es. Anos nu ten fé na Bíblia. É pamodi el ki nu sabe pamodi ki Téra sta xeiu di prubléma i kuzê ki Jeová ta ben faze pa rezolve-s. Pur isu, sta disididu na kontinua ta bira bu fé más fórti i ta djuda tudu kenha ki bu ta pode, ten fé na nos Kriador. (1 Tim. 2:3, 4) I kontinua ta spéra pa kel dia ki tudu algen na Téra ta ben fla kes palavra ki sta na Apocalipse 4:11: ‘Jeová nos Deus, bo ki merese resebe glória, pamodi bu kria tudu kuza’.