1. Ihi yakulonga kya kya yalungu ni Mubhangi wetu?

SE AKUSASELA ku mwiji wa Jimbangi ja Jihova, nange akulongo kya ima yavulu yalungu ni mwene, tunde undege wé. Akulongo kwila, Jihova mwene o Mubhangi wa ima yoso, mwene wala ni idifwa yambote, wamesena kukitula o ixi yoso palayízu.—Dim. 1:1; Ika. 17:24-27.

2. Sáyi athu atala kyebhi yó axikina ku Mubhangi?

² Maji athu avulu kaxikina kwila kwene Nzambi, wabhange o ima yoso. Muveji dya kiki, o athu axikina kwila o mwenyu mungongo wamoneke ngó, wamateka mu twima twofele tutwayi ni kudivwalula kate kikwamoneka o ima yoso yala ni mwenyu. Sayi athu abanza kiki, adilongo mu jixikola ja katunda. Ene atena kwamba kwila, o jingijiye alondekesa kya kwila, o milongi ya Bibidya ki ya kidi, ni kwila, o kuxikina ku Mubhangi phala ngó o athu kadilongo kyavulu, mayówa, kabhonzo ku anganala.

3. Mukonda dyahi kima kyambote kukolesa o kixikanu kyetu?

³ O kwila twandakwehela o athu adilongo kyavulu kuzozesa o kixikanu kyetu kya kwila, Jihova mwéne mwene o Mubhangi wetu wa henda? Tuxikina kwila Jihova mwene o Mubhangi mukonda atutangela kyu, inga mukonda twasoto kithangana phala kudilonga o ima ubheka wetu? O kima kikubhangesa kuxikina kwila Jihova mwene o Mubhangi, kyene kyandalondekesa se wandakayela o ixinganeku ya athu mba kana. (1 Kol. 3:12-15) Kikale se twamateka ukulu mba kindala kubheza Jihova, etwenyoso twabhingi kukolesa o kixikanu kyetu. Se tubhanga kiki, kandatunganala bhukaxi ka ‘wanji ni makutu’ alonga o athu akambe kuxikina mu Mak’â Nzambi. (Kol. 2:8; Jihe. 11:6) Phala kutukwatekesa o milongi yiyi yandazwela (1) mukonda dyahi avulu kaxikina ku Mubhangi, (2) Kyebhi ki utena kukolesa o kixikanu kye kwa Jihova, o Mubhangi wetu, ni (3) kyebhi ki utena kukolokota jinga mu kixikanu kye.

4. Kala kilondekesa Jihebelewu 11:1 o kixikanu kya kidi kyalungu ni ihi?

⁴ Sayi athu abanza kwila, kukala ni kixikanu, kilombolola kudyelela mu kima, sé kima kilondekesa kwila, kya kidi mwene. Maji, kala kilondekesa o Bibidya, kiki ki kixikanu kya kidi, kana. (Tanga Jihebelewu 11:1.) O Bibidya ijimbulula kwila, o kixikanu kyalungu ni kudyelela mu ima ya kidi, ki imoneka ku mesu. Kyenyikiphe, sumbala kitutena kumona Jihova, Jezú ni Utuminu, sayi ima ilondekesa ni kidi kyoso kwila, yene yalaku. (Jihe. 11:3) Sayi ngijiye Mbangi ya Jihova wadilongo o ima yala ni mwenyu, wambe kiki: “O Jimbangi ja Jihova adyelela mu ima yakidi. Ene asuwa we o milongi ya jingijiye.”

5. Mukonda dyahi athu avulu axinganeka kwila, o mwenyu wamoneke ngó, ki Nzambi wa ubhange?

⁵ Tutena kudibhwidisa, ‘se kwene ima yavulu ilondekesa kwila kwene Mubhangi, mukonda dyahiphe athu avulu kaxikina kwila, Nzambi mwene wabhange o mwenyu?’ Sayi ya, kaxikina kutonginina o ima ilondekesa kwila, kwene Nzambi. Robert, kindala Mbangi ya Jihova, wambe kiki: “Kuma mu xikola kexile mu kitumbula, eme ngaxinganeka kwila, o milongi ya kwila, sayi Mubhangi wa ima yoso, milongi yamakutu. Maji kyoso kingatenesa 20 amivu ngazwela ni Jimbangi ja Jihova, angilondekesa milongi ya Bibidya ya ngixikinisa kwila, Jihova mwene o Mubhangi wa ima yoso.” *—Tala o kaxa “ Njimbu ya Katunda Phala o Jitata.”

6. Mukonda dyahi amoxi kaxikina kwila kwene Mubhangi?

⁶ Sayi yá kaxikina ku Mubhangi, mukonda,  kala kyamba ene, kaxikina mukima kya kambe kumona ni mesu mâ. Maji mukidi ene axikina kyá mu ima katena ku imona. Mukifika, o nguzu ibhangesa o ima kubwa, mukonda ene ejiya kuma kiki kidi mwene. O kixikanu kyotumbule mu Bibidya, kyalungu dingi ni ima yengi, kifwa, “ima kiluwa imoneka.” (Jihe. 11:1) Kubhinga kithangana ni nguzu phala kudilonga o ima yiyi. Athu avulu kala ni vondadi phala kubhanga o kikalakalu kiki. O muthu ukamba kutokwesa phala kumona ubheka, utena kuxikina kwila, kikwene Nzambi.

7. O kwila o athu oso adilongo kyavulu kaxikina kwila kwene Nzambi wabhange o dyulu ni ixi? Jimbulula.

⁷ Kyoso kyazubha kutokwesa o ima, sayi jingijiye abhixila mukixinganeku kya kwila, kwene mwene Nzambi wabhange o dyulu ni ixi. * Kala kyabhiti ni Robert twamutumbula kudimatekenu,  sayi athu abanza kwila kikwene Mubhangi wa ima yoso, mukonda kya alongokyu mujixikola jakatunda. Maji jingijiye javulu eza mukwijiya ni kuzola Jihova. Kikale se twadilongo kyavulu mba kana, kala kyabhange o jingijiye jiji, etwenyoso twatokala kukolesa o kixikanu kyetu kwa Nzambi. Séku muthu utena kubhanga kiki mu kididi kyetu.

8-9. (a) Ibhwidisu yebhi itwandadilonga kindala kiki? (b) Mbote yahi iwandakatula mukudilonga yalungu ni ibhangelu?

⁸ Kyebhi ki utena kukolesa o kixikanu kyé ku Mubhangi? Twandamona maukexilu awana.

⁹ Dilonge yalungu ni ibhangelu. Eye utena kukolesa o kixikanu kyé ku Mubhangi, mu kutala kyambote o yama, o isasa ni jithethembwa. (Jisá. 19:1; Iza. 40:26) Kyoso ki uya ni kudilonga dingi o ima yiyi, wandaxikina ni kidi kyoso kwila, Jihova mwéne mwene o Mubhangi wetu. Mu madivulu metu mwala milongi yavulu ijimbulula o ibhangelu ya Jihova. Kana kufula kudilonga o jimbandu jiji, né mwene se umona kwila yakubhonzo ku itendela. Sota kutendela kate bhu watena. Kana kujimba we kutala lwamukwa o jividyu jambote jalungu ni ibhangelu, mu sayte yetu jw.org, itwamono muyônge yamakota, mumivu kudima.

10. Bhana phangu ilondekesa kwila, sayiku Mubhangi. (Loma 1:20)

¹⁰ Tonginina i utena kudilonga yalungu ni Mubhangi mukutala o ima yakukondoloka. (Tanga Loma 1:20.) Mukifika, kyoso o kutema kwa mwanya ki uya ni kudibandekesa utubhana o mukengeji utwabhindamena phala mu ixi mu kale mwenyu. Maji sayi kutema kwa mwanya kutena kutubhanga kyayibha. Etu tu athu twabhingi kilangidilu kumwanya yú. Kwene mwene kima kitulangidila! Kyebhi? Kwene munza a wixana (camada de ozônio) wajinguluka o ixi yoso utulanga mukutema kwa mwanya mba ji raio solar. O kyoso o kutema kwa mwanya ki uya ni kudibandekesa, o munza yú uya we ni kudibandekesa phala kutulanga. Ki uxikina kwila kwene Mubhangi wa henda, wala ni unjimu, wasokejeka kyambote o ima phala tukale kumwenyu?

11. Kwebhi ku utena kusanga milongi yalungu ni ibhangelu itena kukolesa o kixikanu kyê? (Tala o kaxa “ Jifalamenda Jandakolesa o Kixikanu Kyé ku Mubhangi.”)

¹¹ Eye utena kusanga milongi yavulu yalungu ni ibhangelu yandakolokotesa o kixikanu kyé mu kutokwesa mu Índice ni mu sayte jw.org. Eye utena kumateka mukutala o milongi ni jividyu jimoneka mu mbandu: “Teve Um Projeto?” O jimbandu jiji jofele jilombolola milongi yakatunda yalungu ni yama ni ibhangelu yamukwâ, jijimbulula we kyebhi o jingijiye kyasota kufikisa o ima yabhange Nzambi mu ngongo.

12. Kyoso kituya ni kudilonga o Bibidya, ima yahi itwatokala kutonginina?

¹² Dilonge o Bibidya. O ngijiye itwatumbula kyá, kudimatekenu kyexile muxikina kwila, kwene Nzambi wabhange o ima yoso. Maji mukubhita kithangana waxikina kwila, kwene mwene Mubhangi. Mwene wambe: “O kima kyangibhangesa kukala ni kixikanu o kutala o ibhangelu ni kudilonga o Bibidya.” Nange eye wejiya kyá o kidi kilonga o Bibidya. Nékiki, phala kukolesa o kixikanu kyé ku Mubhangi, wabhingi kusuluka ni kudilonga o Mak’â Nzambi. (Josu. 1:8; Jisá. 119:97) Mukifika xinganeka kyebhi o Bibidya yajimbulula kyambote o ima yabhiti m’ukulu. Xinganeka we mu ima yoso yambele o Bibidya ande dya kubhita, iyadikumbila mwene. Xinganeka kyebhi o asoneki oso a Bibidya asoneka ngó njimbu imoxi. Kubhanga kiki kwandakolesa o kixikanu kyé kya kwila, kwene mwene Mubhangi wa henda, wala ni unjimu, watubhange yu watumina o athu kusoneka o Bibidya.—2 Tim. 3:14; 2 Phe. 1:21.

13. Bhana phangu ilondekesa kwila mu Bibidya mwala milongi yambote.

 ¹³ Kyoso ki uya ni kudilonga o Mak’â Nzambi, tonginina kyambote o milonga mba itendelesu itena kukukwatekesa. Mukifika, mivu yavulu kudima, o Bibidya yadimwine kya kwila, o kuzola o kitadi kilwezu, ni kwila, kubhekela “mavuwa mavulu.” (1 Tim. 6:9, 10; Jisa. 28:20; Mat. 6:24) O kwila kiki kyamubhita mwene mu izuwa yalelu? Sayi divulu dijimbulula o ukexilu wa athu mu izuwa yalelu, dyamba: “Bhukaxi ka athu oso, o yó awabhela kyavulu o jimbote ene dingi akambe o kusanguluka ala ni kuluwala kwa muxima. Kate mwene o athu amesena kubandekesa ngó o kitadi kyala nakyu kya, adibhana dingi ni kuluwala, akala we dingi ni mauhaxi.” Kyenyikiphe o kidimwinu kya Bibidya kyalungu ni kilwezu kya kuzola o kitadi, kyatokala mwene! O kwila utena kuxinganeka mukitendelesu kyengi kya Bibidya kya kukwatekesa kya? O kuxinganeka mu itendelesu yambote yala mu Bibidya kutukwatekesa kumona kwila, o Mubhangi wetu wa henda, wejiya o ima itubhekela o kusanguluka, mu ithangana yoso wamesena ngó o mbote yetu. (Tiya. 1:5) Se tubhanga kiki twandakala dingi ni kusanguluka ku mwenyu.—Iza. 48:17, 18.

14. Ihi itudilonga yalungu ni Jihova mukudilonga o Bibidya?

¹⁴ Kudilonga o Bibidya ni disukilu dyambote kutukwatekesa kwijiya we dingi kyambote Jihova. (Nzwá 17:3) O kudilonga o Mak’â Nzambi, kwanda kukwatekesa kwijiya o ukexilu ni idifwa ya Jihova. O idifwa yiyi yene iwejiya kyoso kiwadilongo o Bibidya. Kudilonga o idifwa yiyi, kwandatukwatekesa kuxikina kwila, kwene mwene Nzambi. (Mak. 34:6, 7; Jisá. 145:8, 9) Kyoso ki uya ni kwijiya dingi kyambote Jihova, o kixikanu ni henda yé kwa mwene, yandadibandekesa dingi. O ukamba wé ni mwene, wandakola we dingi.

15. Mbote yahi iwandakatula se uya ni kulonga o Bibidya kwa akwenu?

¹⁵ Zwela ni akwenu yalungu ni kixikanu kyé kwa Nzambi. Kyoso ki uya ni kubhanga kiki, o kixikanu kyé kyandadibandekesa we dingi. Maji se mukubhana o umbangi kumoneka muthu ukubhanga kibhwidisu kyalungu se kwene Nzambi mba kana, eye kiwejiya kukitambwijila kyambote? Sota milongi ya Bibidya mu madivulu metu, phala usange o kitambwijilu kya kibhwidisu kya kubhange, mukusuluka, zwela ne yalungu ni milongi iwasange. (1 Phe. 3:15) Zwela we ni jiphange jamukwa ala ni uhete, phala kukukwatekesa kutambwijila o kibhwidisu. Kikale se o muthu uxikina o kitambwijilu kya Bibidya mba kana, eye wandakatula mbote mukutokwesa. O kixikanu kyé kyandakola dingi. Kyenyiki, eye kiwanda xikina mumilongi ya athu amoneka kala jingijiye, adilongo kyavulu, amba kwila kikwene Mubhangi wa ima yoso.

16. Ihi itena kubhita se tukamba kukolesa jinga o kixikanu kyetu?

¹⁶ Kikale se twamateka ukulu kubheza Jihova mba kindala, etwenyoso twatokala kusuluka ni kukolesa o kixikanu kyetu kwa mwene. Mukonda dyahi? Mukonda se tukamba kudilanga, o kixikanu kyetu kitena kuzoza. Kala kitwadilongo kate bhabha, o kixikanu kyalungu ni kudyelela mu ima yakidi kitutena ku imona. O kima kitutena kukimona ni mesu, kikibhonzo kukijimba. Kiki kyene kyabhangesa Phawulu kuzwela kwila, o kukamba o kixikanu kyene o “kituxi kyoso kya tu naminina.” (Jihe. 12:1) Ihiphe itwatokala kubhanga phala kitudibhale mumubhetu wakukamba o kixikanu?—2 Tes. 1:3.

17. Ihi itena kutukwatekesa kukala ni kixikanu kyakolo?

¹⁷ Kya dyanga, bhinga o nzumbi ikôla kwa Jihova,  bhanga kiki muveji javulu. Mukonda dyahi? Mukonda o kixikanu kibhanga mbandu kukibundu ki’ima o nzumbi ikôla. (Nga. 5:22, 23) Etu kitutena kukala ni kixikanu kyakolo ku Mubhangi wetu, sé o kikwatekesu kya nzumbi yê ikôla. Se tubhinga muveji javulu o nzumbi ikôla kwa Jihova, mwene wandatubhanayu. (Luka 11:13) Ubheka wetu, tutena kusamba kiki: “Tu vudise dingi o kuxikana kwetu.”—Luka 17:5.

18. Kala kilondekesa Jisálamu 1:2, 3, ujitu webhi ututena kutambula kindala kiki?

¹⁸ Kumbandu yengi, dilonge jinga o Mak’â Nzambi ubheka we. (Tanga Jisálamu 1:2, 3.) Kyoso kyasoneka o izwelu yiyi, athu ofele bhukaxi ka Izalayele, exile ni mikanda mwexile o Ijila ya Nzambi. Maji o Sobha ni akunji akexile ni mikanda yiyi. Kyenyiki, musambwadi ni sambwadi amivu, exile musokejeka o ima phala o “mala, ni ahatu, ni an’a ndenge,” ni akwa jixi jengi atungile mu ixi ya Izalayele, kwivwa o kitangelu kya Ijila ya Nzambi. (Mate. 31:10-12) Mu izuwa ya Jezú atolo exile ni mikanda yiyi, yene exile mu ibhaka mumalombe. Maji lelu, athu avulu ala ni Bibidya kikale mbandu kikale yamuvimba. O Bibidya ujitu wadikota watubhana Nzambi. Kyebhi kitutena kulondekesa o kisakidilu kyetu ku ujitu yú?

19. Ihi itwatokala kubhanga phala kukala jinga ni kixikanu kyakolo?

¹⁹ Tutena kulondekesa o kisakidilu kyetu mu ujitu utwatambula, o Mak’â Nzambi, mu kwa atanga izuwa yoso. Twatokala kubhanga ni kukayela o programa yetu yakutanga ni kudilonga o Bibidya, muveji dya ku itanga ngó se kumoneka kithangana. Se twenda jinga ni kudilonga izuwa yoso, twandakala ni kixikanu kyakolo

20. Ihi itwatokala kusota kubhanga se kufula?

²⁰ Etu kitwadifu ni “jinjimu” ni yó “adimuka” kumundu yú. Etu twala ni kixikanu mu ima yakidi, ni kikwatekesu kya Mak’â Nzambi. (Mat. 11:25, 26) Bhukaxi ka kudilonga ni kutokwesa kwetu, o Bibidya yatujimbulwila se mukonda dyahi o mundu wala mu ukexilu yú wayibha, ni ihi yamubhanga Jihova phala ku uyudika. Kyenyikiphe, tubhangyenu yoso itutena phala kukolesa o kixikanu kyetu, ni kukwatekesa oso ututena kukala we ni kixikanu ku Mubhangi wetu. (1 Tim. 2:3, 4) Tusulukyenu ni kutala kuhádya, kyoso kyandabhixila o kithangana kya kwila, o athu oso andakala kumwenyu, mu ngongo, andaximana Jihova, mukwamba o izwelu ya Dijingunwinu 4:11: “Eye u Ngana yetu, Nzambi yetu! Kya ku fwama o kutambula fuma . . . Mukonda é’Mwène wa bhanga yoso.”