1. Тӧ дәрһәԛа Әʹфьрандар чь зани?

ҺӘГӘР де-баве тә Шәʹдед Йаһоԝа нә, демәк тӧ жь зарʹотийе зани ԝәки Йаһоԝа йә Әʹфьрандар. Мәсәлә, тӧ пеһʹәсийайи кӧ әԝи һәр тьшт әʹфьрандийә, кӧ хәйсәт-һʹӧнӧред ԝи чь щурʹәйи нә у нета ԝи бона мә чь йә (Дәстпебун 1:1; Кʹаред Шандийа 17:24-27).

2. Һьнә кәс чаԝа сәр ван мәрьва дьньһерʹьн, йед кӧ баԝәр дькьн ԝәки Әʹфьрандар һәйә?

² Ле гәләк кәс баԝәр накьн ԝәки Хԝәде һәйә у кӧ әԝи һәр тьшт әʹфьрандийә. Әԝана дьбежьн кӧ жийин хԝәха жь шанед бьчʹук пешда һатийә. Ль гора ньһерʹандьна ԝан, формед жийине йед сьст һеди-һеди дьһатьнә гӧһастьне у дьбунә формед дьһа ԛәԝи. Һьнә кәсед кӧ ве йәке баԝәр дькьн, мәрьвнә гәләк хԝәнди нә. Әԝана дьфькьрьн кӧ зандари избат кьрийә, ԝәки Кʹьтеба Пирозда шаши һәнә, у тʹәне мәрьвед нәхԝәнди, бәләнгаз у нәзан баԝәр дькьн ԝәки Әʹфьрандар һәйә.

3. Чьрʹа фәрз ә баԝәрийа хԝә ԛәԝи кьн?

³ Гәло ньһерʹандьна кәсед нав у дәнг ԝе баԝәрийа мә сьст бькьн? Щаба ве пьрсе ве йәкева гьредайи йә, кӧ әм чьрʹа баԝәр дькьн ԝәки Йаһоԝа Әʹфьрандар ә. Гәло һʹиме баԝәрийа мә әв ә кӧ кәсәки мәрʹа ӧса готийә, йан әв ә кӧ мә хԝәха леколин кьрийә? (1 Корьнтʹи 3:12-15) Фьрԛи тʹӧнә чәнд сал ә әм Шәʹдед Йаһоԝа нә, гәрәке әм тʹьме баԝәрийа хԝә ԛәԝи кьн. Һәгәр әм ӧса бькьн, әме нәкʹәвьн бәр байе «сәрԝахтийа дәрәԝә пʹучʹ» йед мәрьвед кӧ Кʹьтеба Пироз рʹәт дькьн (Колоси 2:8; Ибрани 11:6). Ве готареда, әме бьвиньн кӧ (1) гәләк кәс чьма баԝәр накьн ԝәки Хԝәде һәйә, (2) әм чаԝа дькарьн баԝәрийа хԝә дьһа ԛәԝи бькьн ԝәки Хԝәде һәйә у әԝи һәр тьшт әʹфьрандийә у (3) әм чаԝа дькарьн баԝәрийа хԝә хԝәй бькьн.

4. Ль гора Ибрани 11:1, баԝәрийа рʹаст сәр һʹиме чь йә?

⁴ Һьнә кәс дьфькьрьн кӧ баԝәри әв ә, гава мәрьв тьштәки бе избат у чʹәʹвгьрти баԝәр дькә. Ле ль гора Кʹьтеба Пироз, баԝәрийа рʹаст ӧса нинә (Ибрани 11:1 бьхунә, ДТʹ). Кʹьтеба Пироз нишан дькә, ԝәки баԝәри һьндава тьштед кӧ найен дитьн, мәсәлә баԝәри һьндава Йаһоԝа, Иса Мәсиһ у Пʹадшатийа әʹзмана – сәр һʹиме избаткьрьна йә (Ибрани 11:3). Бийокʹимйазанәки кӧ Шәʹде Йаһоԝа йә ӧса дьбежә: «Баԝәрийа мә кор нинә, у рʹастийед зандарийе инкʹар накә».

5. Гәләк кәс чьрʹа баԝәр дькьн кӧ һәр тьшт хԝәха пешда һатийә?

⁵ Әм дьбәкә бәрхԝә дькʹәвьн: «Һәгәр һаԛас избат һәнә кӧ Хԝәде һәйә, чьрʹа гәләк мәрьв баԝәр накьн кӧ Хԝәде жийин әʹфьрандийә?» Сәбәб щарна әв ә ԝәки һьнә мәрьва избаткьрьн ԛәт леколин нәкьрьнә. Роберт, йе кӧ ньһа Шәʹде Йаһоԝа йә, дьбежә: «Мәкʹтәбеда мәрʹа тʹӧ щара нәдьготьн ԝәки  жийин һатийә әʹфьрандьн, ләма жи әз дьфькьрим кӧ жийин бь рʹасти нәһатийә әʹфьрандьн. Ле гава әз 22 сали бум, мьн тʹәви Шәʹдед Йаһоԝа хәбәр да, у мьн дит ԝәки Кʹьтеба Пироз чаԝа бь логики нишан дькә кӧ һәр тьшт һатийә әʹфьрандьн» * (Чаргошә бь наве « Ширәт бона Де-Бава» бьньһерʹә).

6. Һьнә кәс чьрʹа баԝәр накьн кӧ Әʹфьрандар һәйә?

⁶ Һьнә кәс дьбежьн ԝәки әԝана баԝәрийа хԝә ԝан тьшта тиньн, кӧ тенә дитьне,  ләма жи әԝана баԝәр накьн ԝәки Хԝәде һәйә. Ле диса жи, әԝана һьнә тьштед кӧ найен дитьн баԝәр дькьн, мәсәлә ԛәԝата гравитасийайе, чьмки әԝ йәк әшкәрә йә. Мина ве йәке, Кʹьтеба Пироз жи бәʹса ван тьшта дькә, «йед  кӧ найенә дитьн, ле бь рʹастийе һәнә», у баԝәри һьндава ван тьшта сәр һʹиме избатед әшкәрә йә (Ибрани 11:1, ДТʹ). Йазьх гәләк кәс хирәт накьн, ԝәки ван избата леколин бькьн, ләма жи дьфькьрьн кӧ Хԝәде тʹӧнә.

7. Гәло һʹәму мәрьвед хԝәнди инкʹар дькьн, ԝәки һәр тьшт Хԝәде әʹфьрандийә? Шьровәкә.

⁷ Һьнә зандар паши леколина избата баԝәр кьрьн, кӧ һәр тьшт жь алийе Хԝәдева һатийә әʹфьрандьн. * Мина Роберт,  һьнә жь ԝан зандара бәре баԝәр нәдькьрьн ԝәки Хԝәде һәйә, чьмки университетеда һин нәдькьрьн кӧ Хԝәде һәйә. Ле гәләк зандара дәрһәԛа Йаһоԝа пеһʹәсийан у ньһа ԝи һʹьз дькьн. Фьрԛи тʹӧнә әм хԝәнди йан жи нәхԝәнди нә, лазьм ә кӧ әм жи мина ван зандара баԝәрийа хԝә һьндава Хԝәде ԛәԝи бькьн. Гәрәке әм ве йәке хԝәха бькьн, чьмки тʹӧ кәс нькарә ве йәке дәԝса мә бькә.

8-9. (а) Ньһа әме дәрһәԛа чь хәбәр дьн? (б) Чьрʹа ԝе баш бә кӧ әм тʹәбийәте леколин бькьн?

⁸ Гәло тӧ ча дькари баԝәрийа хԝә дьһа ԛәԝи ки? Ԝәрә әм дина хԝә бьдьнә ван чар метода.

⁹ Тʹәбийәте леколин бькә. Һәгәр тӧ дина хԝә бьди һʹәйԝан, шинкайи у стәйрка, баԝәрийа тә ԝе дьһа ԛәԝи бә (Зәбур 19:1; Ишайа 40:26). Чьԛас тӧ тьштед ӧса леколин бьки, тӧйе дьһа зедә баԝәр би ԝәки һәр тьшт чекьрьна дәсте Йаһоԝа йә. Әʹдәбйәтед мәда, дәрһәԛа тʹәбийәте гәләк готар һәнә. Һәгәр тәрʹа зор бә һьнә готар фәʹм бьки, диса жи хирәт бькә вана бьхунә. Ӧса жи, сәр малпәра мә jw.org, видеойед дәрһәԛа тʹәбийәте йед кӧ сәр щьватед мәзьн дәркʹәтьбун, бьньһерʹә.

10. Ль гора Рʹомайи 1:20, тʹәбийәт чаԝа избат дькә ԝәки Әʹфьрандар һәйә?

¹⁰ Чахе тӧ тʹәбийәте леколин дьки, дина хԝә бьде кӧ тʹәбийәт дәрһәԛа Хԝәде чь әшкәрә дькә (Рʹомайи 1:20 бьхунә). Мәсәлә, әм заньн кӧ бе рʹонайи у гәрмайа тәʹве, жийин ԝе тʹӧнә буйа. Жь алийе дьнва, шәԝԛед ултравиолет (UV) дькарьн зийане бьдьн мә. Ләма жи лазьм ә кӧ мәрьв жь ван шәԝԛа бенә хԝәйкьрьне. У әм жь ван шәԝԛа бь рʹасти хԝәйкьри нә. Гәло чаԝа? Атмосфереда газа озоне һәйә, йа кӧ радиасийа филтр дькә у мә жь зийане хԝәй дькә. Чьԛас шәԝԛед ултравиолет зедә дьбьн, һаԛас озон жи зедә дьбә. Ле гәло тӧ ԛәбул дьки ԝәки әв йәк билани у һʹьзкьрьна Хԝәде әʹйан дькә?

11. Кʹижан кани баԝәрийа мә һьндава әʹфьрандьне ԛәԝи дькьн? (Чаргошә « Канийед кӧ Баԝәрийа Мә Дьһа Ԛәԝи Дькьн» бьньһерʹә.)

¹¹ Әʹдәбйәтед мәда, мәсәлә «Индекса Әʹдәбйәта Бьрща Ԛәрәԝьлийеда» у сәр jw.org, тӧ дькари дәрһәԛа әʹфьрандьне гәләк информасийа бьвини, йа кӧ ԝе баԝәрийа тә дьһа ԛәԝи бькә. Мәсәлә, дина хԝә бьдә готар у видеойед жь рʹеза бь наве «Гәло Әԝ Йәк Кәсәки Әʹфьрандийә?» Ԝедәре дәрһәԛа һьнә һʹәйԝан у тьштед дьн информасийа кьн у һʹәԝас һәйә. Ӧса жи, һун дькарьн пебьһʹәсьн кӧ зандар ча хирәт дькьн ԝәки һьнә тьшта хут чаԝа тʹәбийәтеда һәнә, чекьн.

12. Гава әм Кʹьтеба Пироз леколин дькьн, ԝе баш бә әм дина хԝә бьдьнә чь?

¹² Кʹьтеба Пироз леколин бькә. Бийокʹимйазане кӧ мә бәʹса ԝи кьрьбу, серида ԛәбул нәдькьр ԝәки Хԝәде һәйә. Ле ԝәʹдә шунда, әԝи баԝәр кьр кӧ Хԝәде һәйә. Әԝ дьбежә: «Хенщи тьштед кӧ әз жь зандарийе һин бьбум, леколина Кʹьтеба Пироз жи али мьн кьр ԝәки әз баԝәрийа хԝә Хԝәде биньм». Дьбәкә тӧ Кʹьтеба Пироз рʹьнд зани. Диса жи, сәва кӧ баԝәрийа тә дьһа ԛәԝи бә, гәрәке тӧ бәрдәԝам ки Кʹьтеба Пироз леколин бьки (Йешу 1:8; Зәбур 119:97). Дина хԝә бьде Кʹьтеба Пироз ча һур бь һур дьбежә кӧ тʹәрихийеда чь ԛәԝьми. Ӧса жи, дина хԝә бьде кӧ Кʹьтеба Пироз чаԝа пʹехәмбәрти кьрьбу, ԝәки чь ԝе бьԛәԝьмә, у готьнед ньвискʹаред Кʹьтеба Пироз чаԝа һәвва гьредайи нә. Бь ви щурʹәйи, баԝәрийа тә ԝе дьһа ԛәԝи бә кӧ Хԝәдайәки дьлован у билан әм әʹфьрандьнә у Кʹьтеба Пироз жь бина  бәр ԝи һатийә ньвисандьн (2 Тимотʹейо 3:14; 2 Пәтрус 1:21).

13. Гәло ширәтед Кʹьтеба Пироз керһати нә? Мәсәле бинә.

¹³ Гава тӧ Кʹьтеба Пироз леколин дьки, бинә бәр чʹәʹве хԝә ԝәки ширәтед ԝе чьԛас керһати нә. Мәсәлә, Кʹьтеба Пироз жь бәрева готьбу кӧ «пʹәрәһʹьзи» тьштәки хьраб ә у дьбә сәбәба «кӧл у дәрда» (1 Тимотʹейо 6:9, 10; Мәтʹәлок 28:20; Мәтта 6:24). Гәло һʹәта рʹожа иройин жи ӧса нә? Кʹьтебәк ӧса дьбежә: «Һʹәчʹи зәʹф мәрьвед һәбукһʹьз бәхтәԝар ниньн у гәләк щар дькʹәвьнә депресийайе. Кәсед кӧ тʹәне пәй пʹәра дькʹәвьн, гәләк щар алийе психики у физикида нәхԝәш дькʹәвьн» («The Narcissism Epidemic»). Бәле, бь рʹасти жи ширәта Кʹьтеба Пироз кӧ «пʹәрәһʹьз» нибьн, чьԛас керһати йә! Бь тʹәхмина тә, диса кʹижан принсипед дьн жь Кʹьтеба Пироз керһати нә? Чьԛас әм ширәтед Кʹьтеба Пироз ԛимәт бькьн, һаԛас әме хԝә бьсперьн биланийа Хԝәде, кӧ һәр тʹьм керһати йә (Аԛуб 1:5). Ахьрийеда, әме жь жийина хԝә дьһа зедә шабуне бьстиньн (Ишайа 48:17, 18).

14. Гава әм Кʹьтеба Пироз леколин дькьн, әм дәрһәԛа Йаһоԝа чь һин дьбьн?

¹⁴ Гава тӧ Кʹьтеба Пироз леколин дьки, гәрәке нета тә әв бә ԝәки Йаһоԝа нас бьки (Йуһʹәнна 17:3). Чахе тӧ Кʹьтеба Пирозда дәрһәԛа хәйсәт-һʹӧнӧред Йаһоԝа бьхуни, тӧйе бьвини кӧ тʹәбийәтеда жи әв һʹӧнӧред ԝи әʹйан дьбьн. Бәле, чахе әм дәрһәԛа һʹӧнӧред Йаһоԝа һин дьбьн, әм фәʹм дькьн ԝәки әԝ кәсе реали йә у бь рʹасти һәйә (Дәркʹәтьн 34:6, 7; Зәбур 145:8, 9). Чьԛас тӧ Йаһоԝа баштьр нас бьки, баԝәрийа тә ԝе дьһа ԛәԝи бә, тӧйе ԝи һе ԛайим һʹьз бьки у достийа тә тʹәви ԝи ԝе һе незик бә.

15. Ԝе чьрʹа баш бә кӧ әм кәсед дьнрʹа бәʹса баԝәрийа хԝә бькьн?

¹⁵ Дәрһәԛа баԝәрийа хԝә һьндава Хԝәде мәрьварʹа гьли кә. Әв йәк ԝе баԝәрийа тә дьһа ԛәԝи кә. Ле һәгәр кәсәк дьпьрсә һәла чь избаткьрьн һәнә ԝәки Хԝәде һәйә, у тӧ ньзани чь щабе бьди, тӧ дькари чь бьки? Әʹдәбйәтед мәда щабе бьгәрʹә у ве информасийайе ԝирʹа бежә (1 Пәтрус 3:15). Ӧса жи, тӧ дькари жь хушк йан бьраки щерʹьбанди аликʹарийе бьхԝази. Һәгәр кәсе нәбаԝәрмәнд щабед жь Кʹьтеба Пироз ԛәбул нәкә, тӧйе диса жи жь леколине кʹаре бьстини. Баԝәрийа тә ԝе дьһа ԛәԝи бә, у тӧйе нәкʹәви бәр байе мәрьвед ӧса кӧ хԝә хԝәнди у билан һʹәсаб дькьн, ле баԝәр накьн кӧ Хԝәде һәйә.

16. Һәгәр әм баԝәрийа хԝә ԛәԝи нәкьн у хԝәй нәкьн, чь дькарә бьԛәԝьмә?

¹⁶ Фьрԛи тʹӧнә чәнд сал ә әм хьзмәткʹаред Йаһоԝа нә, гәрәке әм тʹьме баԝәрийа хԝә ԛәԝи бькьн. Гәло чьрʹа? Чьмки һәгәр әм һаш жь хԝә тʹӧнә бьн, баԝәрийа мә дькарә сьст бә. Бир нәкә ԝәки баԝәри сәр һʹиме ван избата йә кӧ найенә дитьне. Щарна әм тьштед кӧ навиньн, зу бир дькьн. Ләма жи, Паԝлосе шанди баԝәрийа сьст нав кьр ча «гӧне кӧ рʹьһʹәт ль мә дьԝәлә» (Ибрани 12:1). Гәло әм чаԝа дькарьн хԝә жь ве тʹәльке дур бьгьрьн? (2 Тʹесалоники 1:3).

17. Сәва кӧ әм баԝәрийа хԝә ӧнда нәкьн, әм һʹәԝще чь нә?

¹⁷ Йа пешьн, тʹьме жь Йаһоԝа рʹӧһʹе пироз бьхԝазә. Гәло чьрʹа? Чьмки баԝәри, пʹарәкә «бәре рʹӧһʹ» ә (Галати 5:22, 23). Бе аликʹарийа рʹӧһʹе пироз, әм нькарьн баԝәрийа хԝә дьһа ԛәԝи кьн. Кʹьтеба Пироз дьбежә кӧ һәгәр әм бәрдәԝам кьн жь Йаһоԝа һиви бькьн ԝәки әԝ рʹӧһʹе пироз бьдә мә, әԝе дӧайед мә ԛәбул бькә  (Луԛа 11:13). Әм дькарьн ӧса жи дӧа бькьн: «Баԝәрийа мә зедә кә» (Луԛа 17:5).

18. Ль гора Зәбур 1:2, 3, гәрәке әм чь бькьн, у әв йәк иро чьрʹа һеса йә?

¹⁸ Йа дӧда, тʹьме Кʹьтеба Пироз леколин бькә (Зәбур 1:2, 3 бьхунә). Чахе әв зәбур һат ньвисандьн, тʹәмамийа ньвисара Ԛануна Хԝәде дәсте гәләк мәрьвада тʹӧнә бу. Ле копийед Ԛануна Хԝәде дәсте пʹадша у кʹаһинада һәбун. У һәр сала һʹәфта, әв Ԛануна Хԝәде гьшкарʹа, демәк «жьна, мера, зарʹа у хәрибед» кӧ ԝәлате Исраеледа дьжитьн, дьһатә хԝәндьн (Ԛануна Дӧщари 31:10-12). Рʹожед Исада, Ньвисаред Пироз йед гӧломәтккьри тʹәне щәм һьнә кәса у кʹьништада һәбу. Ле иро гәләк мәрьв дькарьн Кʹьтеба Пироз йан жи һьнә пʹаред ԝе, дәстхьн. Чь кʹәрәмәкә мәзьн ә! Гәло әм чаԝа дькарьн нишан бькьн кӧ Хәбәра Хԝәде ԛимәт дькьн?

19. Сәва кӧ баԝәрийа мә ԛәԝи бә, гәрәке әм чь бькьн?

¹⁹ Бәле, әв йәк кӧ дәсте мәда Хәбәра Хԝәде һәйә, кʹәрәмәкә мәзьн ә! Ләма жи гәрәке әм леколина Кʹьтеба Пироз паш нәхьн у һивийа ԝәʹдәки дьһа баш нибьн, ле һәр рʹож бьхуньн. Һәрге графика мәйә хԝәндьна Кʹьтеба Пироз һәйә у әм хԝә ль ве графике дьгьрьн, әме бькарьбьн баԝәрийа хԝә ԛәԝи хԝәй кьн.

20. Ԝе баш бә кӧ әм чь бькьн?

²⁰ Баԝәрийа мә сәр һʹиме избатед жь Хәбәра Хԝәде йә. Ләма жи әм мина ‹зана у биланед› ве дьнйайе, ниньн (Мәтта 11:25, 26). Жь леколина Кʹьтеба Пироз, әм заньн кӧ чьрʹа һʹале дьнйайе чьԛас дьчә дьһа хьраб дьбә, у Йаһоԝа ви һʹале хьраб ԝе ча рʹаст бькә. Ләма, ԝәрә әм баԝәрийа хԝә һе ԛәԝи бькьн у али кәсед дьн бькьн ԝәки әԝана жи баԝәрийа хԝә Хԝәде биньн (1 Тимотʹейо 2:3, 4). Әм һивийа ԝе рʹоже нә, гава һәр кәс ԝе ван готьнед жь Әʹйанти 4:11 бежә: «Йа Хӧдан Хԝәдейе мә, тӧ һежа йи кӧ рʹумәт, һӧрмәте у ԛәԝате бьстини ... чьмки тә һәр тьшт әʹфьрандьн».