1. Ni byahi ebyo wabirikangiriribwa okwa Muhangiki wethu?

WAMABYA iwakulira omo kwenene, wangabya imuwigha oku Yehova iwukine mulere. Muwakangiriribwa ngoku iyo ya Muhangiki, kw’awithe emibere eyuwene, kandi kw’awithire abandu b’ekighendererwa ekyuwene.​—Enz. 1:1; Emib. 17:24-27.

2. Abandi bandu bakalhangira bathi abak’ikiriraya omwa Muhangiki?

² Nomwabine, abandu bangyi sibal’ikiriraya bathi Nyamuhanga aneho, kandi ku ya Muhangiki. Omwakanya k’ekyo, bikirirye bathi engebe yayibuthukira ini kandu kake neryo lyolho-lyolho yamaghenda yikalhuamu ebindi bindu binene-binene ebiwithe engebe. Abaghuma b’okwa bandu aba basomire kali-kali. Bakabugha bathi esayansi yabirikangania ngoku e Biblia yiwire kandi bathi abak’ikiriraya omwa Muhangiki ni bandu abathasomire, abathasiki, kutse abakaligha lhuba-lhuba.

3. Busana naki ni kikulhu erighumya erikirirya lyethu?

³ Mbwino ebikabughawa n’abandi abasomire binemwendi tsingya-tsingya erikirirya lyethu ngoku Yehova ya Muhangiki wethu w’olhwanzo? Kutsibu-tsibu eki ikikendi sighikira okwa kikaleka ithwaligha ngoku Yehova ya Muhangiki. Mbwino thwabwirawa indi thukwame ky’ikirirya ekyo kutse muthwathwalha obuthuku eriyeghesya ebikakanganaya ngoku ya Muhangiki? (1 Kor. 3:12-15) Nomuthwangabya ithwamaghunza myaka mingahi ithune Bema ba Yehova, ithwe bosi thutholere ithwalholha embere erighumya erikirirya lyethu. Omw’ikolha ekyo, isithwendi thebibwa omwa “menge w’abandu n’eritheba buyira,” eby’abandu abakahakanisaya Ekinywe kya Nyamuhanga. (Kol. 2:8; Ebr. 11:6) Erithuwathikya, omwatsi ono akendikania (1) okwa kikaleka abangyi ibath’ikirirya omwa Muhangiki, (2) ngoku wangahimba erikirirya lyawu omu Yehova, Omuhangiki wawu, na (3) ngoku wangaleka erikirirya eryo libye irinaghumire.

4. Ngoku kiri omwa Abaebrania 11:1, erikirirya ly’okwenene liseghemere okuki?

⁴ Abandi bandu bakalengekanaya bathi eribya n’erikirirya kikamanyisaya eriligha ekindu isihali ekikaleka. Aliwe erikwamana ne Biblia eryo s’ikirirya ly’okwenene. (Soma Abaebrania 11:1.) Eriligha ekindu wutholere iwaminya ekwenene eyikihambireko. Neryo erikirirya omwa bithelhangirawa, nga Yehova, Yesu, n’Obwami, liseghemere oko bwema obukaleka ithwaligha. (Ebr. 11:3) Omunya sayansi oyuwabiribya Mwema, mwakikaniako athya: “Erikirirya lyethu si ry’ekitura muthwe wuthi mbwino likagheghena eby’esayansi ebihikire.”

5. Busana naki abangyi b’ikirirye bathi engebe si yahangikawa?

⁵ Ithwangana yibulya, ‘Hamabya ihane ebikakanganaya ngoku Omuhangiki aneho, busana naki abandu bangyi sibalikiriraya bathi Nyamuhanga yuwahangika ebindu byosi?’ Abandi sibali bathanza eriyileberya ndeke ebikakanganaya ngoku Nyamuhanga aneho. Robert, oyo lino ni Mwema wa Yehova, akabugha athi: “Kundi eby’erihangika isibirikanibawako omwa sukuru, iningalengekanaya indi sibihikire. Nabere nahika omwa myaka ya 20 nimonabya nakanirye n’Abema ba Yehova n’eriowa esyonzumwa sye Biblia esihikire esikakanganaya ngoku hane Omuhangiki.” *​—Lebaya akasanduko “ Omwatsi Okwa Babuthi.”

6. Busana naki abandi bakabugha bathi sihali Muhangiki?

⁶ Abandi sibal’ikiriraya omwa Muhangiki kundi bakabugha bathi bak’ikiriraya omwa bya bakalhangira bisa. Kandi wukabana iban’ikirirye n’omwa bindu ebithelhangirawa  ng’omuyagha, kandi kwenene aneho. Erikirirya erikanibweko omwa Biblia, liseghemere n’okwa yindi ‘myatsi eyo thuthelhangira.’ (Ebr. 11:1) Kikayithagha obuthuku n’akaghalha eriyeghesya oko bwema obukakanganaya ku hane Omuhangiki, kandi abandu bangyi sibalyanza erikolha ekyo. Omundu oyutheyithendaya ndeke oko bwema obo anganaghunzerera athi sihali Nyamuhanga.

7. Abanya sayansi abosi bakanaghana bathi Nyamuhanga s’iyo Muhangiki w’ebyosi? Soborera.

⁷ Abandi banya sayansi bakabya babirigha oko bikakanganaya ku hane Muhangiki, bakaligha ku yuwahangika ekyanya n’ebyosi ebirimu. * Nga Robert, oyothulyakanayako, abandi bangabya imubakwama kyalengekania bathi sihali Muhangiki kundi eby’erihangika sibiribyatheghesibwa  okwa yunivasite. Aliwe abanya sayansi bangyi babiriminya Yehova n’erimwanza. Ngoku byanabya okwa banya sayansi aba, ithwe bosi thutholere ithwaghumya erikirirya lyethu omu Nyamuhanga, mbulha thusomire kingahi. Sihali oyuwanga thukolera ekyo.

8-9. (a) Ni kibulyo kyahi ekyathukayakanayako? (b) Thwanga ghasirwa thuthi omw’iyeghesya okwa bihangikwa?

⁸ Wanga himba wuthi erikirirya lyawu omwa Muhangiki? Leka thulebaye esyonzira ibiri.

⁹ Yeghesaye okwa bihangikwa. Wangana himba erikirirya lyawu omwa Muhangiki omw’isamalira ndeke ebisoro, ebirimwa, n’esyongununu. (Esy. 19:1; Isa. 40:26) Wukabya wuk’ongera erigha okwa bindu ng’ebyo, kwa wukan’ongera wuthya eriligha ngoku Yehova ya Muhangiki. Ebitabu byethu bikabya ibinemwasira mw’emyatsi eyikasoborera ebihangikwa muthina-muthina. Isiwasagha emyatsi ng’eyo yamabya nga yamakukalira eriyitheghererya ndeke. Lengaho eriyitheghererya ebyo wangathoka. Kandi isithw’ibirirawa eribya ithunemulebya esyovidiyo syethu esyuwene esihambire okwa bihangikwa esya thunemulebya okwa mihindano minene-minene y’erijoni eya lino-lino esiri okwa muthahulha wethu we jw.org.

10. Iha eky’erileberyako ekikakanganaya ngoku ebihangikwa bikabisulha ku hane Omuhangiki. (Abanya Roma 1:20)

¹⁰ Wukayeghesya okwa bihangikwa, lengaho erilhangira ekya bikabisulha okwa Muhangiki wethu. (Soma Abanya Roma 1:20.) Ng’eky’erileberyako, wanganaminya ngoku eryuba likathuha ekyakakalha n’ekihuhania, aliwe kandi lyanganalhuako emisalhalha ey’akabi. Ithwe ng’abandu thutholere ithwatheghibwa okwa misalhalha eyo. Kandi thunatheghibirwe! Thuthi? Hane omuka (ozone) owathimbire okwa kihugho kyethu owakathutheghaya okwa misalhalha ey’akabi eyo. Emisalhalha ya kabi eyo yikabya yinemuyongera, n’omuka owakathutheghaya oyo kw’akanayongera athya. Neryo, si wathalhangira ngoku hatholere eribya ihane omundu oyukasondolha eki kandi oyutholere eribya ini Muhangiki w’olhwanzo kandi ow’amenge?

11. Ni hayi aho wangabana emyatsi eyihambire okwa bihangikwa eyikahimba erikirirya? (Lebaya akasanduko “ Ebighuma by’Okwa Biri mw’Ebikahimba Erikirirya.”)

¹¹ Wangana bana emyatsi mingyi eyikahimba erikirirya omw’ilebya e Watch Tower Publications Index n’omw’isekulya okwa jw.org. Iwangana tsuka n’emyatsi n’esyovidiyo ebikabera eryasira omwa katsweka “Mbwino Kyakolerererawa?” Eyi ni myatsi mikuhi-mikuhi kandi yikakanganaya emyatsi eyikaswekaya eyihambire okwa bisoro n’ebindi bihangikwa. Kandi yirimo eby’erileberyako ebikakanganaya ngoku abanya sayansi babirilengaho erikopa ebyo bakalhangira omwa by’obuhangwa.

12. Ni myatsi nga yahi eyo thutholere ithwalengekaniako thukigha e Biblia?

¹² Igha e Biblia. Okw’itsuka omunya sayansi oyukanibweko omwa nungu ya kani iniakaghana athi sihali Muhangiki. Aliwe endambi muyahika am’ikirirya ku hane Omuhangiki. Akabugha athi: “Erikirirya lyaghe siryabya liseghemere okwa bya n’igha omwa sayansi bisa. Lyabya liseghemere n’okw’iyeghesya ndeke e Biblia.” Obundi wabiriminya ndeke esyongangirirya sye Biblia. Nomwabine, erihimba erikirirya lyawu omwa Muhangiki, wutholere iwalholha embere erigha Ekinywe kya Nyamuhanga. (Yos. 1:8; Esy. 119:97) Thalengekania okwa mibere e Biblia yikasoboreramo ndeke ebyabya kera. Lebaya amaminyereri wayu kandi ngoku akalighirana. Erikolha ekyo kyangana ghumya erikirirya lyawu ngoku Omuhangiki w’olhwanzo kandi ow’amenge mwathuhangika  kandi ngoku yuwatheghekanaya e Biblia. *​—2 Tim. 3:14; 2 Pet. 1:21.

13. Eky’erileberyako kighuma ky’okwa menge awali omwa Kinywe kya Nyamuhanga ky’ekyahi?

¹³ Wukayeghesya Ekinywe kya Nyamuhanga, lebaya ngoku erihabulha lyakyo likawathikaya. Ng’eky’erileberyako, e Biblia yabirikunga yithi erianza esyosente mukalhua eriaghalhwa na “malighe mangyi.” (1 Tim. 6:9, 10; Emi. 28:20; Mt. 6:24) Mbwino erikunga eryo likine ly’omughaso? Ekitabu Narcissism Epidemic kikabugha kithi: “Mughulhu mungyi abandu abanzire ebindu sibatsemire kandi bawithe amaghaniryo mangyi. Nibya abandu abakanza eribana esyosente nene bakabana ebitsibu by’obwongo; kandi ibabya n’amakoni-makoni.” Neryo kwesi, erikunga lye Biblia erihambire okwanza esyosente ni ry’omughaso! Wangana lengekania okwa yindi misingyi ye Biblia eyabirikuwathikya? Thukabya thuk’ongera eritsemera erihabulha eriri omwa Biblia, kwa thukan’ongera thuthya eriyikethera amenge awathehwa okwa buthuku agho Omuhangiki wethu w’olhwanzo abirithuha. (Yak. 1:5) Eki kikaleka ithwongera eritsemera engebe.​—Isa. 48:17, 18.

14. Eriyeghesya e Biblia likabisulhaki oku Yehova Nyamuhanga?

¹⁴ Igha iwunawithe ekilhubirirwa ekitholere eky’eriminya Yehova. (Yn. 17:3) Wukendibya wuk’igha Amasako, wukendibanamu emibere ya Yehova eyo wukendi lhangira n’omwa bihangikwa wukabighako. Erigha okwa mibere ya Yehova, kikathukakasaya ngoku kwenene aneho. (Eri. 34:6, 7; Esy. 145:8, 9) Wukendibya wunemuminya Yehova ya ndeke, erikirirya lyawu omw’iyo likendi ghuma, olhwanzo olhwa wumuwithire ilhw’ongera, n’obunywani bwawu nayu ibw’ongera erikamatha.

15. Wukendi ghasirwa wuthi omw’ibwira abandi okwa bya wikirirye?

¹⁵ Bwira abandi okwa bya w’ikirirye omu Nyamuhanga. Erikolha ekyo, kikendi leka erikirirya lyawu iryaghuma. Aliwe ibbwa omundu oyo wukathulira amabulya ekibulyo ekihambire okw’ibyaho lya Nyamuhanga kandi isiwasi eky’erisubirya? Sondaya eky’erisubirya ekiseghemere okwa Masako ekisoborerwe omwa bitabu byethu, neryo mubwire kukyo. (1 Pet. 3:15) Kandi iwangana saba Omwema mulikyethu oyuwasi bingyi y’obuwathikya. Mbulha omundu oyo amaligha eby’erisubirya bye Biblia kutse eyihi, iwe iwukendi ghasirwa omw’isekulya erya wulyakolha. Erikirirya lyawu irikendyongera erighuma. Ekyo ikikendi leka iwuthathebibwa omwa mabehi w’abandu abakayowa nga bawithe amenge kandi nga basomire abakabugha bathi sihali Omuhangiki.

16. Ni kyahi ekyangabya thwamathendi lholha embere erihimba n’erighumya erikirirya lyethu?

¹⁶ Nomuthwangabya ithwamabirighunza buthuku bungahi ithunemukolera Yehova, thutholere ithwalholha embere erihimba n’erighumya erikirirya lyethu omw’iyo. Busana naki? Kundi thwamathendi yitheya, erikirirya lyethu irikendi tseka. Wibuke, erikirirya liseghemere okwa emyatsi eyo thuthelhangira. Thwangan’ibirirwa lhuba ebya thuthe lhangira. Ky’ekyaleka Paulo iniahulha erithendibya n’erikirirya mwa “bibi ebikathuhamba.” (Ebr. 12:1) Neryo thwanga yihighulha thuthi okwa kithegho ekyo?​—2 Tes. 1:3.

17. Ni buwathikya bwahi obwa thukayithagha erighumya erikirirya lyethu?

¹⁷ Eky’erimbere, lemba-lemba Yehova akuhe omulimu wiwe abuyirire, kandi kikole mughulhu wosi. Busana naki? Kundi erikirirya ni kighuma ky’okwa mikolere y’omulimu. (Gal. 5:22, 23) Sithwangathoka erihimba n’erighumya erikirirya  lyethu omwa Muhangiki ahathe obuwathikya bw’omulimu wiwe abuyirire. Thwamalholha embere erisaba Yehova y’omulimu wiwe, iniakendi thuhagho. (Lk. 11:13) Kwilhabirirya, thusabe thuthi: “Wukanyaye erikirirya lyethu.”​—Lk. 17:5.

18. Ni lhusunzo lhwahi olhwa thwanga tsemera? (Esyonyimbo 1:2, 3)

¹⁸ Eryongera okw’ekyo, kwama-kwamanaya endegheka yawu y’eriyeghesya Ekinywe kya Nyamuhanga. (Soma Esyonyimbo 1:2, 3.) Olhwimbo olho lhukahandikwa, Abaisraeli bake ba babya bawithe esyokopi esiri mw’Emighambo ya Nyamuhanga eyosi. Aliwe, omwami n’abahereri ibakabana esyokopi esi, kandi obuli enyuma w’emyaka musanju, emitheghekere iyikahirawaho nuku “abalhume, n’abakali n’abaana,” n’ab’ehandi abali omwa Baisraeli bahulikirire Emighambo ya Nyamuhanga yikasomwa. (Ebi. 31:10-12) Omwa buthuku bwa Yesu, abandu bake ibabakabya n’emikunzo y’Amasako kandi iyabya n’omwa syosinagogi. Aliwe munabwire, abandu bangyi bangana bana e Biblia kutse ekitsweka kyayu. Olho ka ni lhusunzo! Thwanga kangania thuthi ku thukasima olhusunzo ng’olho?

19. Thutholere ithwakolhaki erikirirya lyethu eribya irinaghumire?

¹⁹ Thwangana kangania ku thukasima olhusunzo olhw’eribya n’Ekinywe kya Nyamuhanga omw’isomakyo mughulhu wosi. Thutholere ithwahiraho endegheka y’eriyeghesya, butsira erikolha ekyo thukayowa ithwamabana akathuku. Thwamakwama-kwamania endegheka yethu y’eriyeghesya, erikirirya lyethu irikendibya irinaghumire.

20. Thutholere ithwathwamu erikolhaki?

²⁰ Erithendibya ‘ng’ab’amenge n’ab’eriminya’ ab’ekihugho kino, ithwe thuwithe erikirirya erighumire eriseghemere okwa Biblia. (Mt. 11:25, 26) Busana n’erisoma e Biblia, thukaminya ekikaleka emibere eyiri okwa kihugho iyayongera eritsanda n’ekya Yehova akayakolerayo. Neryo kwesi thuthwemu erighumya erikirirya lyethu n’eriwathikya abangyi ngoku thwanga thoka nabu babye n’erikirirya omwa Muhangiki. (1 Tim. 2:3, 4) Kandi ka thulhole embere erilindirira omughulhu abosi okwa kihugho bakendi syabugha ebinywe ebiri omwa Eribisulirwa 4:11 bino: ‘Yehova Nyamuhanga wethu! Iwe wutholere eribana olhukengerwa kusangwa wahangika ebindu byosi.’