STƆDI ATIKUL 32
Kɔntinyu fɔ Gɛt Strɔng Fet pan di Wan we Mek Ɔltin
“Fet na . . . di pruf we [pɔsin] gɛt fɔ sho se sɔntin rial pan ɔl we i nɔ si am yet.”—IBRU. 11:1.
SIŊ 11 Di Tin dɛn we Gɔd Mek De Prez Am
WETIN WI GO LAN? *
1. Wetin dɛn bin dɔn tich yu bɔt di Wan we mek wi?
IF YU mɛn as Jiova Witnɛs, yu go mɔs dɔn lan bɔt Jiova frɔm we yu smɔl. Dɛn bin tich yu se na in mek ɔltin, i gɛt fayn fayn kwaliti dɛn, ɛn i want fɔ mek dis wɔl bi Paradays.—Jɛn. 1:1; Akt 17:24-27.
2. Wetin sɔm pipul dɛn tink bɔt di wan dɛn we biliv se Pɔsin de we mek ɔltin?
2 Bɔt bɔku pipul dɛn nɔ biliv se Gɔd de ɔ na in mek ɔltin. Bifo dat, dɛn biliv se layf kam bay insɛf, dɔn smɔl smɔl, di simpul simpul tin dɛn we gɛt layf bigin chenj to ɔda tin dɛn we gɛt layf ɛn we at fɔ ɔndastand. Sɔm pan di pipul dɛn we biliv dis na pipul dɛn we lan bɔku buk. Dɛn kin tɔk se sayɛns dɔn pruv se di Baybul rɔng, ɛn na pipul dɛn we nɔ lan buk, we nɔ gɛt sɛns, ɔ we dɛn kin ful izi wan kin gɛt fet se Pɔsin de we mek ɔltin.
3. Wetin mek i impɔtant fɔ mek wi tray fɔ gɛt fet fɔ wisɛf?
3 Fɔ se wetin sɔm masta sabi bukman dɛn tɔk go mek wi dawt se Jiova na di Wan we mek wi? Di men tin we go mek wi no di ansa na we wi no wetin mek wi biliv se Jiova na di Wan we mek ɔltin. Fɔ se na bikɔs dɛn tich wi mek wi biliv dat, ɔ na bikɔs wisɛf sɛf dɔn tek tɛm stɔdi di tin dɛn we pruv se na Jiova mek ɔltin? (1 Kɔr. 3:12-15) I nɔ mata aw lɔng wi dɔn bi Jiova Witnɛs, wi ɔl nid fɔ tray tranga wan fɔ gɛt mɔ fet. If wi du dat, pipul dɛn we nɔ gri wit di Baybul nɔ go ful wi wit “di sɛns na dis wɔl ɛn di lay lay we aw pipul dɛn de tink.” (Kol. 2:8; Ibru. 11:6) Fɔ ɛp wi, dis atikul go tɔk bɔt (1) wetin mek bɔku pipul dɛn nɔ biliv se Pɔsin de we mek ɔltin, (2) aw yu go gɛt mɔ fet pan Jiova we mek yu, ɛn (3) aw yu go mek yu fet strɔng mɔ ɛn mɔ.
WETIN MEK BƆKU PIPUL DƐN NƆ BILIV SE PƆSIN DE WE MEK ƆLTIN?
4. Akɔdin to Ibruz 11:1, wetin di Baybul tɔk bɔt fet?
4 Sɔm pipul dɛn tink se we yu gɛt fet min se yu biliv pan sɔntin we nɔ gɛt pruf. Bɔt frɔm wetin di Baybul se, dat nɔto rial fet. (Rid Ibruz 11:1.) Fɔ lɛ yu biliv tranga wan pan sɔntin, yu nid fɔ no di tru tin dɛn bɔt am. So pan ɔl we wi nɔ de si Jiova, Jizɔs, ɛn di Kiŋdɔm na ɛvin, wi gɛt pruf dɛn we de mek wi biliv tranga wan se dɛn rili de. (Ibru. 11:3) Wan sayɛnsman we na Jiova Witnɛs bin se: “Jiova Witnɛs dɛn gɛt pruf fɔ di tin dɛn we dɛn biliv. Dɔn bak, dɛn biliv di tru tin dɛn we sayɛns de se.”
5. Wetin mek bɔku pipul dɛn nɔ biliv se Pɔsin de we mek layf?
5 Wi go want aks se, ‘Wetin mek bɔku pipul dɛn nɔ biliv se na Gɔd mek ɔltin we gɛt layf, pan ɔl we bɔku pruf de fɔ sho se na in mek ɔltin?’ Sɔm pipul dɛn nɔ ɛva tray fɔ no di pruf fɔ dɛnsɛf. Rɔbɔt, we na Jiova Witnɛs naw bin se: “We a bin de go skul, dɛn nɔ ɛva tich wi se Pɔsin de we mek ɔltin. So dat bin mek a nɔ ɛva tink se da tichin de na tru. Na we a bin ol 22 ia, na in a tɔk to Jiova Witnɛs dɛn, ɛn a lan se di Baybul de gi wi bɔku pruf fɔ mek wi biliv se na Gɔd mek ɔltin.” *—Rid di bɔks we gɛt di taytul, “ Impɔtant Mɛsej fɔ Mama ɛn Papa Dɛn.”
6. Wetin mek sɔm pipul dɛn nɔ biliv se Pɔsin de we mek ɔltin?
6 Sɔm pipul dɛn nɔ biliv se Pɔsin de we mek ɔltin bikɔs dɛn se dɛn jɔs de biliv pan wetin dɛn de si. Bɔt fɔ tru, dɛn biliv pan tin dɛn we dɛn nɔ de si, fɔ ɛgzampul, briz, bikɔs dɛn gɛt pruf se i rial. Di kayn fet we di Baybul tɔk bɔt gɛt fɔ du wit di pruf we wi gɛt fɔ sho se ɔda tin dɛn ‘rial pan ɔl we wi nɔ de si dɛn.’ (Ibru. 11:1) I kin tek tɛm ɛn trɛnk fɔ stɔdi di pruf dɛn fɔ wisɛf, ɛn bɔku pipul dɛn nɔ gɛt di zil we dɛn nid fɔ du dat. We pɔsin nɔ stɔdi di pruf fɔ insɛf, i kin izi fɔ mek i biliv se Gɔd nɔ de.
7. Na ɔl udat lan buk nɔ biliv se na Gɔd mek ɔltin? Ɛksplen.
7 Afta we sɔm sayɛnsman dɛn dɔn stɔdi di pruf dɛn, dɛn dɔn kam fɔ biliv tranga wan se na Gɔd mek ɔltin. * Jɔs lɛk Rɔbɔt, we wi bin dɔn tɔk bɔt, sɔm pipul dɛn bin tink se Pɔsin nɔ de we mek ɔltin bikɔs dɛn nɔ ɛva tich dɛn bɔt dat na yunivasiti. Bɔt, bɔku sayɛnsman dɛn dɔn kam fɔ no ɛn lɛk Jiova. Jɔs lɛk wetin dɛn sayɛnsman dɛn ya du, wi ɔl nid fɔ tray tranga wan fɔ gɛt mɔ fet pan Gɔd, i nɔ mata ɔmɔs buk wi lan. Nɔbɔdi nɔ go ebul du dat fɔ wi.
AW FƆ GƐT MƆ FET PAN DI WAN WE MEK ƆLTIN?
8-9. (a) Us kwɛstyɔn wi de kam tɔk bɔt? (b) Aw yu go bɛnifit we yu stɔdi di tin dɛn we Gɔd mek?
8 Aw yu go gɛt mɔ fet pan di Wan we mek ɔltin? Lɛ wi tɔk bɔt 4 we dɛn.
9Stɔdi di tin dɛn we i mek. Yu go ebul fɔ gɛt mɔ fet pan di Wan we mek ɔltin bay we yu tek tɛm luk di animal dɛn, di plant dɛn, ɛn di sta dɛn. (Sam 19:1; Ayz 40:26) Di mɔ we yu de stɔdi dɛn tin dɛn ya, na di mɔ yu go biliv tranga wan se na Jiova mek ɔltin. Bɔku tɛm, wi pɔblikeshɔn dɛn kin gɛt atikul dɛn we de tɔk bɔt difrɛn difrɛn tin dɛn we Gɔd mek. Nɔ avɔyd fɔ rid dɛn atikul dɛn ya, ilɛksɛf dɛn at fɔ ɔndastand. Lan wetin yu ebul fɔ lan. Ɛn nɔ fɔgɛt fɔ wach di fayn vidio dɛn we de na jw.org, we de tɔk bɔt di tin dɛn we Gɔd mek, we dɛn dɔn sho na wi kɔnvɛnshɔn dɛn dis biɛn tɛm.
10. Gi wan ɛgzampul we sho klia wan se Pɔsin de we mek ɔltin. (Romans 1:20)
10 We yu de stɔdi di tin dɛn we Gɔd mek, tek tɛm pe atɛnshɔn to di tin dɛn we yu go lan bɔt di Wan we mek wi. (Rid Romans 1:20.) Fɔ ɛgzampul, di san de gi it ɛn layt we de ɛp layf fɔ kɔntinyu na di wɔl. Bɔt sɔm pan di layt we di san de pul go ambɔg wi if i mit wi. Wi as mɔtalman nid sɔntin we go protɛkt wi frɔm da layt de. Ɛn sɔntin de we de protɛkt wi! Wetin na da tin de? Na di gas we de rawnd di wɔl. We di layt de brayt mɔ ɛn mɔ, di gas we de protɛkt wi insɛf de ad mɔ ɛn mɔ. So yu nɔ gri se pɔsin go mɔs de we de mek dis tin apin, ɛn in na di Pɔsin we mek ɔltin, i lɛk wi, ɛn i gɛt sɛns?
11. Usay yu go fɛn infɔmeshɔn dɛn we go ɛp yu fɔ gɛt mɔ fet se Pɔsin de we mek ɔltin? (Rid di bɔks we gɛt di taytul, “ Infɔmeshɔn dɛn we Go Ɛp Yu fɔ Gɛt Mɔ Fet pan di Pɔsin we Mek Ɔltin.”)
11 Yu go ebul fɛn bɔku tin dɛn we go ɛp yu fɔ gɛt mɔ fet bɔt di tin dɛn we Gɔd mek bay we yu stɔdi di Watch Tower Publications Index ɛn bay we yu du risach na jw.org. Sɔntɛm yu go lɛk fɔ stat wit atikul ɛn vidio dɛn frɔm di siriz we gɛt di taytul, “Was It Designed?” Dɛn atikul ɛn vidio dɛn ya shɔt, ɛn dɛn de tɔk smɔl bɔt wɔndaful tin bɔt animal dɛn ɛn ɔda tin dɛn we Gɔd mek. Dɛn gɛt bak ɛgzampul dɛn bɔt aw sayɛnsman dɛn dɔn tray fɔ kɔpi wetin dɛn de si pan di tin dɛn we Gɔd mek.
12. We wi de stɔdi di Baybul, wetin na sɔm tin dɛn we wi fɔ tink bɔt?
12Stɔdi di Baybul. Di sayɛnsman we wi bin tɔk bɔt na paregraf 4, nɔ bin gri fɔs se Pɔsin de we mek ɔltin. Bɔt as tɛm de go, i bin kam fɔ gɛt fet. I se: “A nɔ jɔs gɛt fet bikɔs ɔf wetin a stɔdi na sayɛns, bɔt na bikɔs a tek tɛm stɔdi di Baybul bak.” Sɔntɛm, yu ɔlrɛdi dɔn lan tru tin dɛn bɔt wetin di Baybul de tich. Bɔt fɔ mek yu go kɔntinyu fɔ gɛt fet pan di Wan we mek ɔltin, yu stil nid fɔ kɔntinyu fɔ stɔdi di Baybul. (Jɔs. 1:8; Sam 119:97) Fɔ ɛgzampul, tink bɔt aw di Baybul tɔk kɔrɛkt wan bɔt di tin dɛn we bin dɔn apin trade trade. Dɔn, tink bak bɔt ɔl di tin dɛn we di Baybul bin dɔn se go apin, we bin kam tru, ɛn aw di difrɛn man dɛn we rayt di Baybul bin gri wit wetin di ɔda wan dɛn rayt. We yu du dat, i go ɛp yu fɔ gɛt mɔ fet se di Pɔsin we mek wi gɛt lɔv ɛn sɛns, ɛn na in dayrɛkt pipul dɛn fɔ rayt di Baybul. *—2 Tim. 3:14; 2 Pit. 1:21.
13. Wetin na wan ɛgzampul we de sho di sɛns we de na Gɔd in Wɔd?
13 We yu de stɔdi Gɔd in Wɔd, tink bɔt aw di advays dɛn rili de ɛp yu. Fɔ ɛgzampul, fɔ lɔng tɛm, di Baybul bin dɔn wɔn wi se fɔ lɛk mɔni rili bad ɛn i de mek wi gɛt bɔku “pen.” (1 Tim. 6:9, 10; Prɔv. 28:20; Mat. 6:24) Fɔ se da wɔnin de stil impɔtant tide? Wan buk we de tɔk bɔt di we aw pipul dɛn de biev insay wi tɛm, bin se: “Bɔku tɛm, pipul dɛn we lɛk mɔni nɔ kin gladi, ɛn dɛn kin gɛt pwɛlat. Ivin pipul dɛn we jɔs want fɔ gɛt mɔ mɔni, nɔ kin gɛt gladi-at, ɛn dɛn kin gɛt bɔku wɛlbɔdi prɔblɛm.” So i rili fayn we di Baybul de advays wi fɔ mek wi nɔ lɛk mɔni! Yu ebul tink bɔt ɔda advays dɛn na di Baybul we dɔn bɛnifit yu? We wi tink bɔt ɔl di gud advays dɛn na di Baybul, wi go si se wi Papa we mek wi no wetin gud fɔ wi, ɛn wi go abop pan am ɔltɛm fɔ advays. (Jems 1:5) Bikɔs ɔf dat, wi go ɛnjɔy wi layf mɔ ɛn mɔ.—Ayz. 48:17, 18.
14. Wetin yu go lan bɔt Jiova we yu stɔdi di Baybul?
14Yu fɔ stɔdi di Baybul wit di gol fɔ sabi Jiova mɔ ɛn mɔ. (Jɔn 17:3) Yu go lan bɔt aw Jiova tan lɛk, ɛn yu go lan bak bɔt in kwaliti dɛn. Na dɛn sem kwaliti dɛn ya yu bin lan bɔt we yu bin de stɔdi di tin dɛn we i mek. We wi de lan bɔt Jiova in kwaliti dɛn, dat de mek wi biliv tranga wan se Jiova na rial Pɔsin. (Ɛks. 34:6, 7; Sam 145:8, 9) As yu de kam fɔ no Jiova mɔ ɛn mɔ, yu go kɔntinyu fɔ gɛt mɔ fet, yu go lɛk am mɔ, ɛn yu padi biznɛs wit am go tayt mɔ ɛn mɔ.
15. Aw yu go bɛnifit we yu tɛl ɔda pipul dɛn bɔt Gɔd?
15Tɛl ɔda pipul dɛn bɔt Gɔd. We yu du dat, yusɛf go gɛt mɔ fet. Bɔt wetin yu go du if yu prich to pɔsin we de dawt se Gɔd de, ɛn yu nɔ no wetin fɔ se? Tray fɔ fɛn skripchɔ we ansa in kwɛstyɔn na wan pan wi pɔblikeshɔn dɛn, ɛn tɔk bɔt am to di pɔsin. (1 Pit. 3:15) Yu kin aks ɔda ɛkspiriɛns Jiova Witnɛs fɔ ɛp yu ansa di kwɛstyɔn. Ilɛksɛf di pɔsin gri ɔ i nɔ gri wit di ansa na di Baybul, yu go bɛnifit we yu du di risach. Yu go gɛt fet mɔ ɛn mɔ. Dat go mek yu nɔ biliv di wan dɛn we luk lɛk pipul dɛn we gɛt sɛns ɔ we lan bɔku buk, ɛn we se Pɔsin nɔ de we mek ɔltin.
KƆNTINYU FƆ GƐT STRƆNG FET!
16. Wetin go apin if wi nɔ kɔntinyu fɔ gɛt strɔng fet?
16 Ilɛk i dɔn te we wi de sav Jiova ɔ i nɔ te yet, wi fɔ kɔntinyu fɔ gɛt strɔng fet pan am. Wetin mek? Na bikɔs if wi nɔ tek tɛm, wi fet go wik. Mɛmba se fet gɛt fɔ du wit di pruf we wi gɛt fɔ sho se sɔntin rial pan ɔl we wi nɔ si am yet. I izi fɔ lɛ wi fɔgɛt wetin wi nɔ de si. Na dat mek Pɔl bin se “di sin we de tangul wi izi wan” na we wi nɔ gɛt fet. (Ibru. 12:1) So wetin wi go du fɔ lɛ wi kɔntinyu fɔ gɛt strɔng fet?—2 Tɛs. 1:3.
17. Wetin go ɛp wi fɔ kɔntinyu fɔ gɛt strɔng fet?
17 Fɔs, beg Jiova fɔ in spirit, ɛn du dat ɔltɛm. Wetin mek? Na bikɔs fet na wan kwaliti we di oli spirit de ɛp wi fɔ gɛt. (Gal. 5:22, 23) Wi nɔ go ebul fɔ kɔntinyu fɔ gɛt fet pan di Wan we mek wi, if in oli spirit nɔ ɛp wi. If wi kɔntinyu fɔ aks Jiova fɔ in spirit, i go gi wi. (Lyuk 11:13) Wi kin ivin pre se: “Mek lɛ wi gɛt mɔ fet.”—Lyuk 17:5.
18. Akɔdin to Di Sam Dɛm 1:2, 3, us wɔndaful gift wi gɛt?
18 Dɔn bak, go de stɔdi Gɔd in Wɔd ɔltɛm. (Rid Di Sam Dɛm 1:2, 3.) Insay di tɛm we dɛn rayt Di Sam Dɛm 1, bɔku Izrɛlayt dɛn nɔ bin gɛt ɔl di kɔpi dɛn fɔ di Lɔ we Gɔd bin dɔn gi dɛn. Bɔt di kiŋ ɛn di prist dɛn bin ebul fɔ gɛt am, ɛn afta ɛvri sɛvin ia, ‘di man dɛn, di uman dɛn, di pikin dɛn,’ ɛn di trenja dɛn na Izrɛl, bin de gɛda togɛda fɔ lisin we dɛn de rid Gɔd in Lɔ. (Dit. 31:10-12) Insay Jizɔs in tɛm, di pipul dɛn we bin gɛt di Skripchɔ dɛn nɔ bin bɔku. Dɛn bin de kip bɔku pan di wan dɛn we dɛn bin dɔn kɔpi na di sinagɔg. Bɔt insay wi yon tɛm, bɔku pipul dɛn ebul fɔ rid sɔm pat ɔ ivin ɔl wetin de insay di Baybul. Dat na wɔndaful gift. Aw wi go sho se wi gladi fɔ we wi gɛt di Baybul?
19. Wetin wi nid fɔ du fɔ gɛt strɔng fet?
19 Wi go sho se wi gladi we wi gɛt di Baybul bay we wi de rid am ɔltɛm. Wi fɔ mek tɛm fɔ rid ɛn stɔdi di Baybul, wi nɔ fɔ jɔs rid am we wi gɛt tɛm. If wi de stɔdi ɔltɛm, wi go ebul fɔ gɛt strɔng fet.
20. Wetin wi fɔ mekɔp wi maynd fɔ du?
20 Wi nɔ tan lɛk “di wan dɛn we gɛt sɛns ɛn . . . we lan buk” na dis wɔl bikɔs wi gɛt pruf na di Baybul we de sho wetin mek wi gɛt fet. (Mat. 11:25, 26) Di Baybul de ɛksplen wetin mek di wɔl de go frɔm bad to wɔs, ɛn wetin Jiova go du bɔt dat. So lɛ wi mekɔp wi maynd fɔ kɔntinyu fɔ gɛt strɔng fet ɛn fɔ ɛp bɔku pipul dɛn fɔ gɛt fet pan di Wan we mek ɔltin. (1 Tim. 2:3, 4) Ɛn lɛ wi kɔntinyu fɔ wet fɔ di tɛm we ɔlman we de na di wɔl go prez Jiova ɛn tɔk di wɔd dɛn we de na Rɛvɛleshɔn 4:11 we se: “Jiova wi Gɔd, yu fit fɔ gɛt di glori, . . . bikɔs na yu mek ɔltin.”
SIŊ 2 Jiova Na Yu Nem
^ par. 5 Di Baybul tich wi klia wan se na Jiova Gɔd mek ɔltin. Bɔt bɔku pipul dɛn nɔ biliv dat. Dɛn biliv se nɔbɔdi nɔ de we mek layf. Fɔ se di tin dɛn we dɛn de tɔk go mek wi dawt se na Jiova mek ɔltin we gɛt layf? Nɔ, wans wi du ɔl wetin wi ebul fɔ gɛt strɔng fet pan Gɔd ɛn di Baybul. Dis atikul go tɔk bɔt aw wi go du dat.
^ par. 5 Na sɔm skul dɛn, ticha dɛn nɔ de ivin tich se i pɔsibul fɔ se na Gɔd mek ɔltin. Dɛn tink se if dɛn tɔk dat, dɛn go fos di studɛnt dɛn fɔ biliv pan Gɔd.
^ par. 7 Kɔmɛnt dɛn frɔm pas 60 masta sabi bukman dɛn, ivin sayɛnsman dɛn we biliv se na Gɔd mek ɔltin, de na di Watch Tower Publications Index. Ɔnda di say we se “Science,” luk fɔ di ɛdin we se “scientists expressing belief in creation.” Wi go ebul fɛn sɔm pan dɛn kɔmɛnt dɛn ya bak na di Research Guide for Jehovah’s Witnesses. Ɔnda di say we se “Science and Technology,” luk fɔ di ɛdin we se “‘Interview’ (Awake! siriz).”
^ par. 12 Fɔ ɛgzampul, rid di atikul we gɛt di taytul, “Are Science and the Bible Compatible?” I de na di Fɛbwari 2011 Awake! Ɛn di atikul we gɛt di taytul, “What Jehovah Foretells Comes to Be.” I de na di Janwari 1, 2008, Wachtawa.
