1. Hpanˍ shehˍ hpaˇ cawˬ ve awˬ lawn nawˬ hkʼaˬ hkʼe gʼa henˇ jaw ve le?

 Nawˬ Shaˉhkiˆhkanˍ ve chaw ve yehˬ kʼa hkʼaw uiˍ la ve kʼo, Yaˬhoˉvaˬ ve awˬ lawn nawˬ yaˇ ehˉ htaˇ kaꞈ gʼa henˇ ve yoˬ hehˉ. Gʼuiˬ sha lehˬ teˇ ceuˬ le le htaꞈ hpanˍ shehˍ hpaˇ hpehꞈ ve tehꞈ nawˬ gʼa henˇ˗oˬ ve yoˬ. Yawˇ te hkʼaˇ dawˇ hkʼaˇ daꞈ ve laiˉ ceuˬ cawˬ leh miˬ guiˬ chi ve htaꞈ Paˍraˍdiˇsuˆ hpehꞈ tcuh gaˇ ve yoˬ.—Awˬ hkuiˉ puiˍ 1:1; Tcuh yaˇ 17:24-27.

2. Gʼuiˬ sha cawˬ ve tehꞈ yonˍ ve chaw hkʼaˬ hkʼe hpehꞈ ve le tehꞈ laiˉ gʼaˇ hkʼaˬ hkʼe shiˍ gaˇ ve le?

² Laiˉ gʼaˇ Gʼuiˬ sha cawˬ ve tehꞈ maˇ yonˍ leh hpanˍ shehˍ hpaˇ cawˬ ve kaꞈ maˇ yonˍ. A shaꞈ teꞈ ve hkʼa sha sha˗ehˬ cawˬ la leh a yehˉ yehˉ pa ve tehꞈ yawˇ hui yonˍ ve yoˬ. Liꞈ tanˇ mvuh ve chaw laiˉ gʼaˇ chi hkʼe yonˍ leh chaˬ nyi tehˆ nyi paˍ Liꞈ hpu hkʼaw chaˬ nyi˗oˬ leh awˬ tehˬ maˇ heˆ tehꞈ kʼoˆ ve yoˬ. Liꞈ maˇ henˇ jaw ve, cuˇ yiˍ maˇ cawˬ ve, leh heˍ sha ve chaw ceh tiˉ hpanˍ shehˍ hpaˇ cawˬ ve tehꞈ yonˍ ve yoˬ.

3. A htoꞈ ma te ngaˬ hui ve yonˍ hkʼaˇ hkʼa dehꞈ yonˍ yeˬ tuˬ te cawˇ ve le?

³ Yaˬhoˉvaˬ lehˬ teˇ ceuˬ le le htaꞈ hpanˍ shehˍ hpaˇ hpehꞈ ve tehꞈ ngaˬ hui yonˍ ve yoˬ. Yaꞈ hkʼaˇ, liꞈ henˇ mvuh ve chaw ve dawˇ hkʼaˇ ngaˬ hui ve yonˍ hkʼaˇ htaꞈ heuˆ la kuiˬ cawˬ˗aw laˇ? Aˬ htoꞈ ma te Yaˬhoˉvaˬ lehˬ hpanˍ shehˍ hpaˇ hpehꞈ ve tehꞈ ngaˬ hui yonˍ ve htaꞈ cawˬ ve yoˬ. Ngaˬ hui chi hkʼe gʼa henˇ jaw˗oˬ ve pa taw yonˍ ve, leh hpfuhˆ nyi leh a shu yawˇ hkʼaˇ yawˇ shaˉ hkiˆ mawˬ˗oˬ ve pa taw yonˍ ve laˇ? (1 Kawˇrenˍhtuˆ 3:12-15) Shaˉhkiˆhkanˍ ve chaw hpehꞈ ve hkʼaˬ hkʼe maw gaˬ˗oˬ ve htawˇ maˇ kʼoˆ, a shu yawˇ ve yonˍ hkʼaˇ yonˍ yeˬ tuˬ gʼaˇ hteꞈ gʼa te sheˍ. Chi hkʼe te ve kʼo, Liꞈ hpu hkʼaw maˍ ve awˬ ceuˬ heˍ ve tehꞈ kʼoˆ ve chaw, “cuˇ yiˍ maˍ yiˍ tawˇ hkawˇ leh tcuhˉ kuiˬ maˇ cawˬ ve heˍ ve tawˇ hkawˇ htaꞈ” ngaˬ hui maˇ na. (Kawˇlawˇsehˇ 2:8; Heˍbrehˇ 11:6) Awˬ lawn chi ve hkʼaw (1) hpanˍ shehˍ hpaˇ cawˬ ve tehꞈ aˬ htoꞈ ma te laiˉ gʼaˇ maˇ yonˍ ve le? (2) Yaˬhoˉvaˬ hpanˍ shehˍ hpaˇ hpehꞈ ve tehꞈ nawˬ hkʼa dehꞈ yonˍ  tuˬ aˬ htoꞈ ma ga laˇ ve le? (3) Nawˬ hkʼaˬ htaˆ kaꞈ yonˍ yeˬ tuˬ aˬ htoꞈ ma ga laˇ ve le? Chi ve teˇ hpaˍ teˇ geh henˇ tuˬ yoˬ.

4. Heˍbrehˇ liꞈ 11:1 hkʼaw kʼoˆ taˍ ve hkʼe, yonˍ ve aˬ htoꞈ ma htaꞈ kʼoˆ gaˇ ve le?

⁴ Chaw teˇ hpaˍ kʼoˆ ve shaˉ hkiˆ maˇ cawˬ ve kaꞈ yonˍ ve yoˬ. (Heˍbrehˇ 11:1 gʼaw sheˍ.) Yaꞈ hkʼaˇ, Liꞈ hpu hkʼaw kʼoˆ ve, chi lehˬ awˬ tehˬ yonˍ ve maˇ heˆ. Liꞈ hpu hkʼaw kʼoˆ ve, yonˍ ve lehˬ shaˉ hkiˆ gʼa cawˬ ve yoˬ. Chi htaꞈ pa taw ngaˬ hui Yaˬhoˉvaˬ, Yeˍsuˆ, leh Gʼuiˬ sha ve mvuhˇ miˬ htaꞈ ngaˬ hui maˇ mawˬ ve htawˇ, chi ve teˇ hpaˍ awˬ tehˬ cawˬ ve tehꞈ ngaˬ hui yonˍ ve yoˬ. (Heˍbrehˇ 11:3) Awˬ viˉ awˬ nyi teˇ gʼaˇ chaˬ nyi tehˆ nyi paˍ hpehꞈ ve kʼoˆ ve, “cuˇ yiˍ cawˬ paˍ kʼoˆ ve htaꞈ ngaˬ hui awˬ hkʼaˇ maˇ ca leh yonˍ ve maˇ heˆ.”

5. A shaꞈ teꞈ ve yawˇ hkʼaˇ yawˇ cawˬ la ve tehꞈ aˬ htoꞈ ma te laiˉ gʼaˇ chi hkʼe yonˍ ve le?

⁵ Ngaˬ hui htawˇ dawˇ nawˬ dawˇ cawˬ ve, ‘shaˉ hkiˆ hkʼa dehꞈ cawˬ ve htawˇ Gʼuiˬ sha hpanˍ shehˍ hpaˇ hpehꞈ ve tehꞈ aˬ htoꞈ ma te laiˉ gʼaˇ maˇ yonˍ sheˍ ve le?’ Yawˇ hui a shu yawˇ hkʼaˇ yawˇ shaˉ hkiˆ gʼa tuˬ maˇ hpfuhˆ nyi jaw ve pa taw yoˬ hehˉ. Chi teˇ hkui Ro˗beuꞈ Shaˉhkiˆhkanˍ ve chaw hpehꞈ˗oˬ ve kʼoˆ ve, “liꞈ henˇ yehˬ lo hpanˍ shehˍ hpaˇ cawˬ ve tehꞈ maˇ maˍ laˇ jaw ve pa taw, hpanˍ shehˍ hpaˇ awˬ tehˬ cawˬ ve tehꞈ ngaˬ maˇ dawˇ. Ngaˬ Yaˬhoˉvaˬ ve Shaˉhkiˆhkanˍ ve chaw geh gʼa yaw daꞈ leh Liꞈ hpu hkʼaw ve awˬ lawn shaˉ hkiˆ gʼa mawˬ leh hpanˍ shehˍ hpaˇ cawˬ ve tehꞈ yonˍ˗oˬ htaˇ ngaˬ 20 hkʼawꞈ hpaˆ˗oˬ.” *—Awˇ ceˍ awˇ fa “ Awˬ pa awˬ e teˇ gʼaˇ le le awˬ pon” htaꞈ nyi sheˍ.

6. Hpanˍ shehˍ hpaˇ cawˬ ve tehꞈ aˬ htoꞈ ma te laiˉ gʼaˇ maˇ yonˍ ve le?

⁶ Yawˇ hui kʼoˆ ve, yawˇ hui mawˬ gʼa ve awˬ ceuˬ htaꞈ ceh tiˉ yonˍ ve pa taw, hpanˍ shehˍ hpaˇ cawˬ ve tehꞈ maˇ yonˍ. Yaꞈ hkʼaˇ, mvuhˇ haw awˬ shaˉ maˇ  mawˬ gʼa ve htawˇ, cawˬ ve tehꞈ yawˇ hui yonˍ sheˍ ve yoˬ. Liꞈ hpu hkʼaw kʼoˆ ve, “ngaˬ hui maˇ mawˬ sheˍ ve awˬ ceuˬ teˇ hpaˍ awˬ tehˬ awˬ na cawˬ taˍ ve” tehꞈ ngaˬ hui gʼa yonˍ ve yoˬ. (Heˍbrehˇ 11:1) Ngaˬ hui shaˉ hkiˆ ca leh a shu yawˇ awˬ to yonˍ gʼa tuˬ, awˬ yanˇ yehˇ leh gʼa coˇ caˇ ve yoˬ. Yaꞈ hkʼaˇ, laiˉ gʼaˇ chi hkʼe maˇ te gaˇ ve pa taw, Gʼuiˬ sha maˇ cawˬ tehꞈ yawˇ hui kʼoˆ ve yoˬ.

7. Hpanˍ shehˍ hpaˇ maˇ cawˬ tehꞈ yonˍ ve liꞈ henˇ mvuh ve chaw teˇ gʼaˇ le le laˇ? Kʼoˆ maˍ laˇ sheˍ.

⁷ Chaˬ nyi tehˆ nyi paˍ teˇ hpaˍ shaˉ hkiˆ ca gʼa peuˬ hkʼawꞈ nawˉ, Gʼuiˬ sha lehˬ mvuhˇ naw ma miˬ naˆ ma htaꞈ hpanˍ shehˍ hpaˇ hpehꞈ ve tehꞈ yawˇ hui yonˍ ve yoˬ. * Liꞈ tanˇ mvuh ve liꞈ henˇ yehˬ hkʼaw chi hkʼe maˇ maˍ piˇ jaw ve pa taw, hpanˍ shehˍ hpaˇ maˇ cawˬ ve tehꞈ, chi awˬ gʼuˇ suhˍ htaˇ Ro˗beuꞈ dawˇ ve hkʼe chaw teˇ hpaˍ kaꞈ dawˇ ve yoˬ. Yaꞈ hkʼaˇ, chaˬ nyi tehˆ nyi paˍ laiˉ gʼaˇ Yaˬhoˉvaˬ ve  awˬ lawn gʼa henˇ˗oˬ leh yawˇ htaꞈ haꞈ ve yoˬ. Chaˬ nyi tehˆ nyi paˍ chi teˇ hpaˍ hkʼe leˇ ngaˬ hui kaꞈ te gʼa ve yoˬ. Gʼuiˬ sha htaꞈ hkʼa dehꞈ yonˍ tuˬ ngaˬ hui liꞈ hkʼaˬ hkʼe mvuh henˇ˗oˬ ve htawˇ maˇ kʼoˆ, te gʼa ve hkʼe te ve yoˬ. Chi hkʼe ve ngaˬ hui awˬ tanˬ shu te laˇ maˇ gʼa.

8-9. (a) Chi teˇ hkui ngaˬ hui na hkawˇ aˬ htoꞈ ma na hkawˇ htaꞈ henˇ tuˬ le? (b) Hpanˍ taˍ ve awˬ ceuˬ htaꞈ caˉ daꞈ ve nawˬ chaˬ nyi ve kʼo, aˬ htoꞈ ma awˬ bon gʼa tuˬ le?

⁸ Yaˬhoˉvaˬ hpanˍ shehˍ hpaˇ hpehꞈ ve tehꞈ nawˬ hkʼa dehꞈ yonˍ gʼa tuˬ aˬ htoꞈ ma ga laˇ gʼa ve le? Ngaˬ hui te gʼa ve 4 ceuˬ htaꞈ teˇ geh nyi sheˍ.

⁹ Hpanˍ taˍ ve awˬ ceuˬ htaꞈ chaˬ nyi ve. To nuˇ to shaˆ teˇ hpaˍ, suhˆ cehˬ hawˆ cehˬ, leh meuꞈ keu shiˍ, chi ve teˇ hpaˍ htaꞈ nawˬ chaˬ nyi ve kʼo, hpanˍ shehˍ hpaˇ cawˬ ve tehꞈ yonˍ gʼa ve yoˬ. (Chiˇ mvuh ve 19:1; Iˉsaˍyaˆ 40:26) Awˬ ceuˬ chi teˇ hpaˍ htaꞈ nawˬ hkʼa dehꞈ chaˬ nyi ve kʼo, Yaˬhoˉvaˬ lehˬ hpanˍ shehˍ hpaˇ hpehꞈ ve tehꞈ yonˍ gʼa tuˬ yoˬ. Gʼuiˬ sha hpanˍ taˍ ve awˬ ceuˬ htaꞈ kʼoˆ ve kʼo, yawˇ ve kanˉ hkʼaˇ maˇ maˇ gu teh taˍ laˇ ve yoˬ. Teˇ lawn lawn kʼo na gʼa tuˬ haˍ ve htawˇ, awˬ lawn oˇ ve htaꞈ gʼaw nyi leh nawˬ hkʼa peu˗eˬ maˇ tawnˇ gʼa ve htawˇ kaꞈ teꞈ chiˉ maˇ heˆ. Hpawnˬ daꞈ lonˉ 3 nyi hkʼaw Gʼuiˬ sha hpanˍ taˍ ve awˬ ceuˬ htaꞈ caˉ daꞈ ve VDO nawˬ nyi jaw˗oˬ ve htaꞈ teˇ pawˆ kʼawꞈ nyi gʼa ve yoˬ. Chi teˇ hkui ngaˬ hui ve vehˆsaiˉ jw.org hkʼaw kaꞈ cawˬ˗oˬ ve yoˬ.

10. Hpanˍ taˍ ve awˬ ceuˬ htaꞈ nyi htaˇ, hpanˍ shehˍ hpaˇ cawˬ ve tehꞈ aˬ htoꞈ ma shaˉ hkiˆ mawˬ ve le? (Roˉmaꞈ 1:20)

¹⁰ Hpanˍ taˍ ve awˬ ceuˬ htaꞈ nawˬ chaˬ nyi htaˇ, hpanˍ taˍ ve awˬ ceuˬ chi ve hpanˍ shehˍ hpaˇ htaꞈ caˉ daꞈ ve aˬ htoꞈ ma maˍ laˇ ve nawˬ dawˇ nyi sheˍ. (Roˉmaꞈ 1:20 gʼaw sheˍ.) Mvuhˇ nyi chiˆ leh awˬ gʼeuˆ ba laˇ ve pa taw, ngaˬ hui a shaꞈ teꞈ chehˇ gʼa tuˬ te laˇ ve nawˬ shiˍ ve yoˬ. Mvuhˇ nyi awˬ gʼeuˆ kawˆ tuˬ cawˬ ve kʼo, ngaˬ hui htaꞈ kaꞈ heuˆ laˬ kuiˬ cawˬ ve pa taw gʼa fanˬ taˍ cawˇ ve yoˬ. Yaꞈ hkʼaˇ, ngaˬ hui htaꞈ teˇ ceuˬ ceuˬ haꞈ shaˉ laˇ gʼa ve nawˬ shiˍ˗aˬ laˇ? Awˬ gʼeuˆ kawˆ tuˬ cawˬ ve miˬ guiˬ htaꞈ maˇ gʼa heuˆ la tuˬ htaˬ tuˬ htaˬ piˇ ve htaꞈ shuˍ ve yoˬ. Awˬ gʼeuˆ gʼaˇ hteꞈ chiˆ ve kʼo, kawˆ tuˬ cawˬ jaˇ. Chi hkʼe hpehꞈ tuˬ teˇ gʼaˇ dawˇ teh taˍ leh yawˇ lehˬ ngaˬ hui htaꞈ haꞈ jaˇ ve hpanˍ shehˍ hpaˇ hpehꞈ leh cuˇ yiˍ cawˬ jaˇ ve hpehꞈ ve tehꞈ nawˬ dawˇ˗aw laˇ?

11. Hpanˍ shehˍ hpaˇ cawˬ ve tehꞈ nawˬ yonˍ gʼa tuˬ hkʼaˬ kaˬ lo ca nyi gʼa tuˬ le? (Awˇ ceˍ awˇ fa “ Hpanˍ shehˍ hpaˇ cawˬ ve tehꞈ nawˬ hkʼa dehꞈ yonˍ gʼa tuˬ ve awˬ lawn” htaꞈ nyi sheˍ.)

¹¹ Hpanˍ shehˍ hpaˇ cawˬ ve tehꞈ nawˬ hkʼa dehꞈ yonˍ gʼa tuˬ hpanˍ taˍ ve awˬ ceuˬ htaꞈ caˉ daꞈ ve nawˬ chaˬ nyi gaˇ ve kʼo, Yaˬhoˉvaˬ ve Shaˉhkiˆhkanˍ ve chaw hpfuhˆ nyi kuiˬ laꞈ caˉ maˇ heˆ leh vehˆsaiˉ jw.org hkʼaw kaꞈ nyi gʼa ve yoˬ. “Shawehˇ laˇ paˍ cawˬ˗aw laˇ?” tehꞈ laiˉ lawn VDO hpehꞈ leh laiˉ tawn cawˬ ve VDO chi htaꞈ nawˬ tanˬ nyi gʼa ve yoˬ. Hpanˍ taˍ ve awˬ ceuˬ htaꞈ caˉ daꞈ ve leh to nuˇ to shaˆ teˇ hpaˍ ve awˬ lawn kaꞈ nyi gʼa ve yoˬ. Teˇ pawˆ pawˆ chaˬ nyi tehˆ nyi paˍ hpanˍ taˍ ve awˬ ceuˬ teˇ hpaˍ htaꞈ chaˬ nyi leh awˬ hkʼeun teˇ hpaˍ te ve yoˬ.

12. Ngaˬ hui Liꞈ hpu henˇ htaˇ aˬ htoꞈ ma ve awˬ lawn htaꞈ kaꞈ dawˇ nyi cawˇ ve le?

¹² Liꞈ hpu henˇ ve. Chi awˬ gʼuˇ suhˍ htaˇ kʼoˆ ve hkʼe, chaˬ nyi tehˆ nyi paˍ lehˬ awˉ lawˉ htaˇ hpanˍ shehˍ hpaˇ cawˬ ve tehꞈ maˇ yonˍ. Yawˇ kʼoˆ ve, “hpanˍ shehˍ hpaˇ cawˬ ve tehꞈ ngaˬ yonˍ ve lehˬ chaˬ nyi tehˆ nyi ve hpawˇ shaˉ hkiˆ htaꞈ ceh ngaˬ ca nyi ve maˇ heˆ. Yaꞈ hkʼaˇ, Liꞈ hpu hkʼaw ve shaˉ hkiˆ htaꞈ kaꞈ ngaˬ chaˬ nyi ve yoˬ.” Nawˬ Liꞈ hpu hkʼaw awˬ tehˬ ve htaꞈ hkʼa dehꞈ shiˍ˗oˬ ve yoˬ hehˉ. Yaꞈ hkʼaˇ, hpanˍ shehˍ hpaˇ cawˬ ve tehꞈ hkʼa dehꞈ yonˍ gʼa tuˬ nawˬ caˉ leh Liꞈ hpu gʼa henˇ cawˇ ve yoˬ. (Yawˇsuˆ 1:8; Chiˇ mvuh ve 119:97) Tawˇ pa haˉ te kʼo, Liꞈ hpu hkʼaw bvuhꞈ taˍ ve awˬ ceuˬ leh teˇ co˗e peuˬ teˇ co˗e awˬ tehˬ hpehꞈ la ve htaꞈ hkʼaˬ hkʼe taw hawˍ daꞈ ve nawˬ dawˇ nyi gʼa ve yoˬ. Tcuh kaˍ paˍ ve tawˇ hkawˇ bvuhꞈ taˍ ve kaꞈ awˬ tehˬ hpehꞈ leh Liꞈ hpu hkʼaw ve awˬ lawn awˬ tanˇ kaꞈ hawˍ daꞈ jaˇ ve yoˬ. Nawˬ chi hkʼe te ve kʼo, hpanˍ shehˍ hpaˇ cuˇ yiˍ cawˬ jaˇ leh nawˬ htaꞈ haꞈ ve tehꞈ yonˍ gʼa tuˬ yoˬ. Gʼuiˬ sha nawˬ htaꞈ hpanˍ leh yawˇ ve awˬ ha hpu dawˇ pawnˍ piˇ leh Liꞈ hpu kaꞈ  bvuhꞈ tcuh taˍ ve yoˬ. *—2 Tiˆmoˉseˍ 3:14; 2 Peˍtruˆ 1:21.

13. Liꞈ hpu hkʼaw Gʼuiˬ sha ve cuˇ yiˍ htaꞈ ngaˬ hui mawˬ tuˬ aˬ htoꞈ ma beˆ maˍ laˇ ve le?

¹³ Liꞈ hpu henˇ htaˇ beˆ maˍ laˇ taˍ ve hkʼaˬ hkʼe taw yuˬ yehˇ gʼa ve htaꞈ dawˇ nyi sheˍ. Tawˇ pa haˉ te kʼo, hpu htaꞈ haꞈ ve lehˬ kawˆ tuˬ cawˬ jaˇ ve leh ‘dawˇ haˍ tuˬ laiˉ ceuˬ nyi ma htaꞈ juˆ pawnˍ’ piˇ ve tehꞈ, Liꞈ hpu hkʼaw kʼoˆ taˍ ve maw jaˇ˗oˬ. (1 Tiˆmoˉseˍ 6:9, 10; Tawˇ naˉ ve 28:20; Maꞈhtehˍ 6:24) Beˆ maˍ laˇ hkawˇ chi yehˇ gʼa sheˍ ve laˇ? Liꞈ kʼoˆ teˇ kʼoˆ hkʼaw kʼoˆ ve, “maˇ˗awˍ ve kʼo, hpu shi mawˇ jeˬ htaꞈ haꞈ ve chaw lehˬ hkʼa dehꞈ maˇ ha lehˬ leh dawˇ haˍ ve yoˬ. Hpu maˇ maˇ cawˬ gaˇ ve chaw kaꞈ awˬ to hpawˇ leh nyi ma hpawˇ maˇ chehˇ sha tuˬ te piˇ ve yoˬ.” Leh hpu htaꞈ caˉ daꞈ ve Liꞈ hpu hkʼaw beˆ maˍ laˇ taˍ ve daꞈ jaˇ ve tehꞈ mawˬ˗aw laˇ? Liꞈ hpu hkʼaw beˆ maˍ laˇ taˍ ve nawˬ awˬ pon awˬ bon cawˬ ve aˬ htoꞈ ma cawˬ sheˍ ve mawˬ˗aw laˇ? Liꞈ hpu hkʼaw beˆ maˍ laˇ taˍ ve ngaˬ hui awˬ pon awˬ bon hkʼaˬ hkʼe taw cawˬ ve mawˬ htaˇ, hpanˍ shehˍ hpaˇ lehˬ ngaˬ hui awˬ pon aˬ htoꞈ ma daꞈ jaˇ ve yawˇ shiˍ ve tehꞈ yonˍ gʼa leh yawˇ beˆ maˍ laˇ taˍ ve htaꞈ gʼaꞈ te gaˇ ve yoˬ. (Yaˍkoˆ 1:5) Ngaˬ hui chi hkʼe te htaˇ, ha lehˬ jaˇ tuˬ yoˬ.—Iˉsaˍyaˆ 48:17, 18.

14. Nawˬ Liꞈ hpu henˇ ve kʼo, Yaˬhoˉvaˬ ve awˬ lawn aˬ htoꞈ ma gʼa henˇ tuˬ le?

¹⁴ Nawˬ Liꞈ hpu henˇ htaˇ dawˇ teh taˍ ve gʼa cawˬ ve lehˬ Yaˬhoˉvaˬ geh meuˆ daꞈ tuˬ awˬ pon yoˬ. (Yoˇhanˬ 17:3) Nawˬ Liꞈ hpu henˇ htaˇ Yaˬhoˉvaˬ hkʼaˬ hkʼe ve Gʼuiˬ sha hpehꞈ ve nawˬ gʼa mawˬ tuˬ yoˬ. Gʼuiˬ sha ve te hkʼaˇ dawˇ hkʼaˇ hkʼaˬ hkʼe cawˬ ve le? Nawˬ hpanˍ taˍ ve awˬ ceuˬ chaˬ nyi htaˇ te hkʼaˇ dawˇ hkʼaˇ chi teˇ hpaˍ htaꞈ gʼa mawˬ tuˬ yoˬ. (Tawˆ kʼai ve 34:6, 7; Chiˇ mvuh ve 145:8, 9) Nawˬ Yaˬhoˉvaˬ htaꞈ hkʼa dehꞈ shiˍ daꞈ ve kʼo, yawˇ htaꞈ yonˍ ve, yawˇ htaꞈ haꞈ ve, leh yawˇ geh hkʼa dehꞈ meuˆ daꞈ tuˬ yoˬ.

15. Nawˬ ve yonˍ hkʼaˇ shu htaꞈ kʼoˆ maˍ piˇ ve kʼo, aˬ htoꞈ ma awˬ bon gʼa tuˬ le?

¹⁵ Nawˬ ve yonˍ hkʼaˇ shu htaꞈ kʼoˆ ma piˇ ve kʼo, nawˬ aˬ htoꞈ ma awˬ bon gʼa tuˬ le? Nawˬ ve yonˍ hkʼaˇ shu htaꞈ kʼoˆ maˍ piˇ ve kʼo, awˬ hkʼaˇ chi lehˬ nawˬ ve yonˍ hkʼaˇ yonˍ yeˬ tuˬ te laˇ ve yoˬ. Tawˇ pa haˉ te kʼo, nawˬ yawˇ htaꞈ hto maˍ piˇ˗oˬ leh Gʼuiˬ sha cawˬ ve tehꞈ hkʼaˬ hkʼe te shiˍ gʼa ve le na laˇ ve kʼo, nawˬ maˇ hkʼawꞈ gʼa htaˇ hkʼaˬ hkʼe te tuˬ le? Gʼuiˬ sha ve kanˉ hkʼaˇ hkʼaw maˍ laˇ ve awˬ ceuˬ teˇ hpaˍ htaꞈ nawˬ hpfuhˆ nyi gʼa leh nawˬ ca gʼa ve awˬ lawn yawˇ geh yaw daꞈ gʼa ve yoˬ. (1 Peˍtruˆ 3:15) Nawˬ kʼoˆ maˍ piˇ ve htaꞈ yawˇ maˇ yonˍ ve htawˇ, nawˬ awˬ pon awˬ bon gʼa leh yonˍ hkʼaˇ kaꞈ yonˍ yeˬ tuˬ yoˬ. Hkʼe te leh, cuˇ yiˍ cawˬ leh liꞈ tanˇ mvuh ve chaw hpanˍ shehˍ hpaˇ maˇ cawˬ ve tehꞈ kʼoˆ ve htaꞈ nawˬ maˇ yonˍ taˬ.

16. Ngaˬ hui ve yonˍ hkʼaˇ hkʼaˬ htaˆ kaꞈ maˇ yonˍ yeˬ ve kʼo, aˬ htoꞈ ma hpehꞈ la gʼa tuˬ le?

¹⁶ Ngaˬ hui Yaˬhoˉvaˬ ve kanˉ hkʼaˬ hkʼe maw te˗oˬ ve htawˇ maˇ kʼoˆ, ngaˬ hui ve yonˍ hkʼaˇ hkʼaˬ htaˆ kaꞈ gʼa yonˍ yeˬ tcuh cawˇ ve yoˬ. Aˬ htoꞈ ma pa taw le? Ngaˬ hui shaˍ tiꞈ maˇ te ve kʼo, yonˍ hkʼaˇ kaꞈ awˬ gʼaˇ nuˇ la puiˉ ve yoˬ. Yonˍ ve teˇ ceuˬ lehˬ maˇ mawˬ sheˍ ve awˬ ceuˬ htaꞈ caˉ daꞈ ve pa taw, ngaˬ hui maˇ mawˬ gʼa ve awˬ ceuˬ lehˬ leunˇ puiˉ tuˬ te laˇ gʼa ve tehꞈ tawnˇ taˍ sheˍ. Chi htaꞈ pa taw Pawˇluꞈ kʼoˆ ve, yonˍ ve hkʼa dehꞈ maˇ cawˬ ve lehˬ “venˇ baˆ” te tuˬ sha jaˇ. (Heˍbrehˇ 12:1) Ngaˬ hui ve yonˍ hkʼaˇ hkʼaˬ htaˆ kaꞈ yonˍ yeˬ tuˬ, aˬ htoꞈ ma ga laˇ gʼa ve le? —2 Hteˇsaˍlawˇniˆ 1:3.

17. Ngaˬ hui ve yonˍ hkʼaˇ hkʼaˬ htaˆ kaꞈ yonˍ yeˬ tuˬ aˬ htoꞈ ma gʼa te cawˇ ve le?

¹⁷ Awˉ lawˉ teˇ ceuˬ lehˬ, ngaˬ hui Yaˬhoˉvaˬ geh daꞈ kehˬ ve awˬ ha hpu gʼa lawˬ leh hkʼaˬ htaˆ kaꞈ gʼa lawˬ ve. Aˬ htoꞈ ma pa taw le? Yonˍ ve lehˬ Gʼuiˬ sha ve awˬ ha hpu ve awˬ shiˍ nawꞈ ve pa taw yoˬ. (Gaˍlaˍtiˆ 5:22, 23) Gʼuiˬ sha ve awˬ ha hpu maˇ ga laˇ ve kʼo, hpanˍ shehˍ hpaˇ htaꞈ ngaˬ hui yonˍ tuˬ  te maˇ gʼa leh hkʼaˬ htaˆ kaꞈ yonˍ yeˬ tuˬ kaꞈ te maˇ gʼa. Ngaˬ hui lawˬ tcuhˉ taˍ ve kʼo, Gʼuiˬ sha ve awˬ ha hpu ga laˇ tuˬ yoˬ tehꞈ yonˍ gʼa ve yoˬ. (Luˉkaꞈ 11:13) “Ngaˬ hui yonˍ ve teˇ ceuˬ maˇ la tuˬ a ciˉ te laˇ˗oˆ tehꞈ” kʼoˆ leh bon chi hkʼe lawˬ kaꞈ gʼa ve yoˬ.—Luˉkaꞈ 17:5.

18. Chiˇ mvuh ve liꞈ 1:2, 3 hkʼaw kʼoˆ taˍ ve hkʼe, ngaˬ hui daꞈ jaˇ ve awˬ vuiˬ aˬ htoꞈ ma cawˬ ve le?

¹⁸ 2 ceuˬ teˇ ceuˬ lehˬ, ngaˬ hui Liꞈ hpu gʼaw leh hkʼaˬ htaˆ kaꞈ gʼa henˇ ve. (Chiˇ mvuh ve 1:2, 3 gʼaw sheˍ.) Chiˇ mvuh ve liꞈ kaˇ nanˉ uiˍ 1 bvuhꞈ htaˇ, Gʼuiˬ sha ve awˬ liˇ tawˇ hkawˇ liꞈ daw hkʼa peu˗eˬ cawˬ ve hkʼaˬ nyiˇ gʼaˇ maˇ cawˬ. Jawˇmawˇ leh paw hkuˇ ceh tiˉ liꞈ daw chi cawˬ leh “hawˉ hkʼaˆ, yaˇ miˇ, yaˇ ehˉ leh nawˬ hui geh chehˇ taˍ ve hkehˉ chaw hkʼa peu˗eˬ” htaꞈ 7 hkʼawꞈ gaˬ kʼo teˇ pawˆ Gʼuiˬ sha ve awˬ liˇ tawˇ hkawˇ gʼa gʼaw maˍ piˇ ve yoˬ. (Bon maˍ ve 31:10-12) Yeˍsuˆ ve awˬ co˗e htaˇ liꞈ daw a shu yawˇ mawˇ yawˇ cawˬ ve hkʼaˬ nyiˇ gʼaˇ maˇ cawˬ. Maˇ˗awˍ ve liꞈ daw lehˬ Yuˇdaꞈ chaw ve hpawnˬ daꞈ kuiˬ yehˬ hkʼaw teh taˍ ve yoˬ. Chi beuꞈ teˇ co˗e maˇ˗awˍ ve chaw a shu yawˇ mawˇ yawˇ Liꞈ hpu cawˬ ve yoˬ. Chi lehˬ daꞈ jaˇ. Chi htaꞈ ngaˬ hui awˬ hpfuhˇ shiˍ ve tehꞈ hkʼaˬ hkʼe te hpeuꞈ maw piˇ gʼa tuˬ le?

19. Ngaˬ hui ve yonˍ hkʼaˇ yonˍ yeˬ tuˬ hkʼaˬ hkʼe gʼa te cawˇ ve le?

¹⁹ Ngaˬ hui Liꞈ hpu hkʼaˬ htaˆ kaꞈ gʼaw ve kʼo, awˬ hpfuhˇ shiˍ ve tehꞈ hpeuꞈ maw piˇ ve yoˬ. Ngaˬ hui ve yonˍ hkʼaˇ yonˍ yeˬ tcuh gaˇ ve kʼo, Liꞈ hpu gʼaw tuˬ gu ve awˬ hkʼaˇ gʼa cawˬ leh hkʼaˬ htaˆ kaꞈ Liꞈ hpu gʼa henˇ cawˇ ve yoˬ. Ngaˬ hui tanˇ˗oˬ htaˇ Liꞈ hpu henˇ˗a tehꞈ dawˇ ve maˇ hpehꞈ.

20. Ngaˬ hui aˬ htoꞈ ma te tuˬ dawˇ teh taˍ cawˇ ve le?

²⁰ Miˬ guiˬ chi hkʼoˆ “cuˇ yiˍ maˍ yiˍ cawˬ ve chaw leh shiˍ puiˉ ve chaw hui hta” ngaˬ hui maˇ shuˍ daꞈ. Awˬ lawn kʼo, ngaˬ hui yonˍ ve lehˬ Liꞈ hpu hkʼaw shaˉ hkiˆ cawˬ ve yoˬ. (Maꞈhtehˍ 11:25, 26) Ngaˬ hui Liꞈ hpu gʼa henˇ leh miˬ guiˬ chi aˬ htoꞈ ma te gʼaˇ hteꞈ luˬ kʼai chehˇ ve shiˍ leh chi ve htaꞈ Yaˬhoˉvaˬ hkʼaˬ hkʼe gu tuˬ kaꞈ shiˍ ve yoˬ. Chi htaꞈ pa taw, ngaˬ hui ve yonˍ hkʼaˇ yonˍ yeˬ tcuh tuˬ dawˇ teh taˍ leh hpanˍ shehˍ hpaˇ Yaˬhoˉvaˬ htaꞈ shu yonˍ la tuˬ, ngaˬ hui ga gʼa ve hkʼe ga piˇ tuˬ yoˬ. (1 Tiˆmoˉseˍ 2:3, 4) Hpeuꞈ maˍ ve liꞈ 4:11 hkʼaw ‘ngaˬ hui ve Jawˇmawˇ Gʼuiˬ sha˗oˬ, nawˬ lehˬ awˬ meꞈ hponˇ teˇ ceuˬ htaꞈ gʼa keunˍ ve yoˬ. Awˬ lawn kʼo, awˬ ceuˬ hkʼa peu˗eˬ htaꞈ nawˬ hpanˍ taˍ ceˍ taˍ’ ve yoˬ. Choˬ kʼoˆ ve hkʼa shuˍ, miˬ guiˬ hkʼoˆ lo a shaꞈ teꞈ ve awˬ ceuˬ hkʼa peu˗eˬ Yaˬhoˉvaˬ htaꞈ chiˇ uiˍ chiˇ mvuhˇ tuˬ ve awˬ nyi htaꞈ ngaˬ hui law chehˇ ve yoˬ.