1. Yumanyi yayidizishawu hadi Nleñi yetu?

NEYI ayikulishilili muchisaka chawaYinsahu jaYehova, hadaha mwamwilukili Yehova himwadiña akansi. Ayidizishili nawu diyi Nleñi, wukweti yilwilu yayiwahi, nawa wakeñaña kwilisha iseki kwikala Paradisa.—Kutach. 1:1; Yilw. 17:24-27.

2. Indi antu amakwawu ahoshaña nawudi hadi antu akuhwelela mudi Nleñi?

² Hela chochu, antu amavulu akuhwelela nawu kwekala Nzambi wanyi nawa nawu diyi waleñeli yuma yejima wanyi. Ilaña, akuhwelela nawu yuma yadivumbukilili hohu yayeni nawa yatachikili kutuñika kufuma mutuyuma twanyanya tukweti wumi nakwikala yuma yamaneni yashiyashana yikweti wumi. Antu amakwawu akuhwelela mwenimu hiyantu ataña nankashi. Ashimunaña nawu sayansi yinamwekeshi nawu Bayibolu yashimunaña mwakutwamba nawa antu akuhwelela mudi Nleñi hiyantu abula kutaña, abula kubabala, hela aswayi kudimba.

3. Muloñadi chichalemena kukolesha chikuhwelelu chetu?

³ Komana yuma yahoshañawu antu amakwawu ataña chikupu yinateli kutuletesha kujinoka netu Yehova hiNleñi yetu wukweti kukeña? Chumichi chinashindameni hachuma chaletesha tukuhweleli netu Yehova diyi Nleñi. Komana atulejeli hohu tahindi, tahindi twadiña nampinji yakudiza hawunsahu wamwekeshaña nawu diyi Nleñi? (1 Kor. 3:12-15) Hela chakwila hanashimbuli kufuma hitwekalili Chinsahu chaYehova, wejima wetu twatela kutwalekahu kukolesha chikuhwelelu chetu. Neyi twila mwenimu, akutudimba wanyi “namaana awantu, nintañishilu yamukunkulwayi yamwaya tushidikilu twawantu,” yatadikishaña Izu daNzambi. (Kol. 2:8; Heb. 11:6) Hakwila chitukwashi, achinu chibaaba chikushimuna (1) chuma chaleteshaña antu amavulu kubula kukuhwelela mudi Nleñi, (2) chitunateli kutwalekahu kukolesha chikuhwelelu chetu mudi Yehova, Nleñi yetu, (3) nichitunateli kutwalekahu kukolesha chikuhwelelu chetu.

4. Kwesekeja naAHeberu 11:1 nitumazu twaheshina, chikuhwelelu chalala chashindamena hankahi?

⁴ Antu amavulu atoñojokaña nawu chikuhwelelu chatalisha mukukuhwelela chuma chakadi wunsahu wunakumwekesha nawu ochu chuma chidi kwoku. Ilaña kwesekeja naBayibolu, ichi hichikuhwelelu wanyi. (Tañenu AHeberu 11:1 nitumazu twaheshina.) Bayibolu yalumbulula nawu chikuhwelelu chashindamena hawunsahu walala, hela chakwila twamumonaña wanyi Yehova, Yesu niWanta, tukweti wunsahu wamwekeshaña nawu iyi yuma yekala kwoku. (Heb. 11:3) Sayantisiti wumu wekalili Chinsahu chaYehova wahosheli nindi: “AYinsahu jaYehova akweti wunsahu wayiletesha kukuhwelela, bayi neyi akaanaña chahoshañawu asayansiku.”

5. Muloñadi antu amavulu chakuhwelelawu nawu yuma yadisefukilili yayeni chakadi Nleñi?

⁵ Neyi kudi wunsahu wamwekeshaña nawu Nleñi wekala kwoku, ‘Hanu dinu muloñadi antu amavulu chakuhwelelawu nawu Nzambi diyi waleñeli wanyi yuma yonaña?’ Muloña amakwawu kanda asandujoleñahu dehi iwu wunsahu halwawu. Robert, wekalili Chinsahu chaYehova, wahosheli nindi: “Chineli kushikola atutañishileña wanyi hayileñaleña, natoñojokeleña nami iyi nsañu yalala wanyi. Sampu nichinashikijili yaaka yamuma 20 hinadizileña nawaYinsahu jaYehova nichinelukili nami Bayibolu yatulejaña wunsahu watuleteshaña kukuhwelela netu Nzambi diyi waleñeli yuma yejima.” *—Talenu chikasha chinakwila nawu, “ Nsañu Yalema Yinakulejawu Anvwali.”

6. Muloñadi antu amakwawu chakaaninañawu nawu kwekala Nleñi wanyi?

⁶ Antu amakwawu akuhwelela wanyi mudi Nleñi muloña ahoshaña nawu anateli kukuhwelela hohu yuma yamonañawu. Hela chochu,  akuhwelela muyuma yabulaña kumonawu, chakutalilahu, ñovu yakokaña, muloña akweti wunsahu wunakumwekesha nawu iyi yuma yalala. Chikuhwelelu chashimunawu muBayibolu mwabombela yuma “yalala hela chakwila hitwayimonaku.” (Heb. 11:1) Chakeñekaña mpinji niñovu yakushinshika wunsahu etu aweni, nawa antu amavulu akeñaña wanyi kuzata nañovu kulonda awani wunsahu. Muntu wabulaña kudiza kulonda yawani wunsahu yomweni nateli kukunkulula nindi kwekala Nzambi wanyi.

7. Komana antu ejima ataña akaanaña nawu Nzambi diyi waleñeli yuma yejima wanyi? Lumbululenu.

⁷ Hanyima yakudiza wunsahu, asayantisiti amakwawu anakuhweleli nawu Nzambi diyi waleñeli mawulu nimaseki. * Kufwana Robert itwatena,  antu amakwawu anateli kutoñojoka nawu kwekala Nleñi wanyi muloña kumashikola amaneni kwayiliwu hiyayitañishilihu hayileñaleñaku. Hela chochu, asayantisiti amavulu anamwiluki Yehova nawa anamukeñi. Neyi chocheliliwu awa asayantisiti, wejima wetu twatela kukolesha chikuhwelelu chetu mudi Nzambi, hela chakwila twataña hela hitwatañaku. Kwosi muntu wunateli kutukoleshela chikuhwelelu chetuku.

8-9. (a) Lwihwinyi lutukuhanjekahu? (b) Indi kudiza hayileñaleña kunateli kuyikwasha ñahi?

⁸ Munateli kukolesha ñahi chikuhwelelu chenu mudi Nleñi? Tuhanjekenu hanjila jiwana.

⁹ Dizenu hayileñaleña. Munateli kukolesha chikuhwelelu chenu mudi Nleñi neyi mubanjilaña anyama, nyitondu nitutumbwa. (Mas. 19:1; Isa. 40:26) Neyi mudizaña chikupu haniyi yuma, mukwiluka chikupu nenu Yehova diyi Nleñi. Kakavulu munyikanda yetu mwekala yibaaba yalumbulula yuma yayivulu yahosha hayileñaleña. Bayi muyikilukilaña iyi yibaaba hela chakwila yakala kuyitiyishishaku. Dizenu yimukutwesha kudiza. Bayi muvulamena kutala cheñi hawebusayiti yetuku, ha jw.org, hadi mavidiyo amawahi anakuhosha hayileñaleña itwatalileña hakupompa kweluña hayaaka yinahitihu.

10. Shimunenu chakutalilahu chinakumwekesha nawu kwekala Nleñi. (ARoma 1:20)

¹⁰ Neyi munakudiza hayileñaleña, shenu muchima hayuma yinakumwekesha nawu Nleñi wekala kwoku. (Tañenu ARoma 1:20.) Chakutalilahu, itena datwinkaña iyena nichejeji, chakwashaña yuma yonaña hamaseki. Hela chochu, yuma yikwawu yafumaña kwitena yafwana. Etu antu atela kutukiña kuniyi yuma nawa atukiñaña! Munjilanyi? Hanu hamaseki hekala mpepela yatukiñaña kuniyi yuma yejima. Neyi iyi yuma yafwana yisweja ñovu, mpepela yatukiñaña niyena yaswejelañaku. Komana mukwiteja wanyi nenu kwatela kwekala muntu washaku yumiyi nawa hiNleñi wukweti kukeña nawa wukweti maana chikupu?

11. Kudihi kumunateli kuwana nsañu yalala yinakuhosha hayileñaleña yinateli kukolesha chikuhwelelu chenu? (Talenu chikasha chinakwila nawu “ Yuma Yinateli Kuyikwasha Kukolesha Chikuhwelelu Chenu.”)

¹¹ Munateli kuwana nsañu yayivulu yinakuhosha hayileñaleña yinateli kuyikwasha kwikala nachikuhwelelu chakola muWatchtower Publications Index nikusandujola ha jw.org. Hadaha mukutachika nayibaaba nimavidiyo adi muyibaaba yinakuhosha nawu, “Komana Achileñeli?” Iyi yibaaba yayihi nawa yashimunaña nsañu yalala yantesha hadi anyama niyileñaleña yikwawu. Muniyi yibaaba mwekala cheñi yakutalilahu yinakumwekesha asayantisiti chembujolañawu yileñaleña.

12. Neyi tunakudiza Bayibolu, yumanyi yikwawu yitwatela kutoñojokañahu chikupu?

¹² Dizenuña Bayibolu. Sayantisiti itwashimuna muparagilafu 4 hakusambila wakaanini yitoñojoka yakwila nawu kwekala Nleñi. Chimwahitili mpinji, wakuhweleleli nindi Nleñi wekala kwoku. Wahosheli nindi: “Chikuhwelelu chami hichashindameneni hohu hayuma yinadizili mujasayansiku. Ilaña chashindameneni cheñi hayuma yinadizili muBayibolu.” Hadaha mweluka dehi chalala chamuBayibolu. Hela chochu, hakwila mutwalekihu kukolesha chikuhwelelu chenu mudi Nleñi, mwatela kutwalekahu kudiza Izu daNzambi. (Yosh. 1:8; Mas. 119:97) Chakutalilahu toñojokenu Bayibolu chiyashimuna choloka hayuma yamwekeni kunyima oku. Toñojokenu hawuprofwetu wejima nichiwanuñañana. Kwila mwenimu kukukolesha chikuhwelelu chenu nakwiluka nenu, Nleñi wukweti kukeña nimaana diyi watuleñeli nawa wonena Bayibolu. *—2 Tim. 3:14; 2 Pet. 1:21.

13. Kufumbanyi kumu kwamaana kwekala Mwizu daNzambi?

 ¹³ Neyi munakudiza Izu daNzambi, shinshikenu kufumba kwekalamu chikunateli kuyikwasha. Chakutalilahu, Bayibolu yashimwineñahu dehi nawu kusweja kukeña mali kwatama nawa kwaleteshaña muntu kwikala ‘muyihuñu yayivulu.’ (1 Tim. 6:9, 10; Yish. 28:20; Mat. 6:24) Komana iyi nsañu yazatikaña nichayinu mpinji? Mukanda waThe Narcissism Epidemic wahosha nawu: “Antu amavulu akeña nankashi maheta ekalaña namuzañalu wanyi nawa aluwankanaña nankashi. Niantu akeñaña kwikala namali amavulu akabakanaña muyitoñojoka niwena akataña nankashi.” Dihafuma Bayibolu hiyikutusoñamisha nawu bayi mukeña maliku! Kudihu yishina yikwawu yamuBayibolu yinayikwashi? Neyi tulemeshaña chatulejaña Bayibolu, tukushindamenaña hamaana atulejañayi Nleñi yetu wukweti kukeña. (Yak. 1:5) Chikufumamu, tukwikalaña namuzañalu muchihandilu chetu.—Isa. 48:17, 18.

14. Kudiza Bayibolu kukuyikwasha kwilukadi hadi Yehova?

¹⁴ Dizenuña namuchima wakufwila kumwiluka Yehova. (Yow. 17:3) Chimukudizaña jiNsona mukwiluka chekalayi Yehova niyilwilu yindi yayiwahi yamwekenaña muyileñaleña. Neyi twiluka yilwilu yaYehova chikutukwasha kwiluka chikupu netu Yehova wekala kwoku. (Kwid. 34:6, 7; Mas. 145:8, 9) Chimukumwilukaña Yehova chikupu, chikuhwelelu chenu chikukola, mukusweja kumukeña nawa wubwambu wenu nayena wukusweja kukolelaku chikupu.

15. Kuleja antu yuma yimweluka hadi Nzambi kunateli kuyikwasha ñahi?

¹⁵ Lejenuña antu yuma yimweluka hadi Nzambi. Chimukuyilejaña, chikuhwelelu chenu chikusweja kukola. Mukwila ñahi neyi muntu imunakushimwina nakujinoka nindi Nzambi wekalaku wanyi nawa muneluki wanyi chakumwakula? Keñakeñenu ñakwilu yamuNsona munyikanda yetu nawa hanjekenu nindi. (1 Pet. 3:15) Munateli cheñi kumwila mukwenu mukwaKristu wapama kulonda yayikwashi. Hela chakwila owu muntu wukwiteja chinakuli Bayibolu hela nehi, nsañu yimunasandujoli yikuyikwasha. Chikuhwelelu chenu chikukolelaku. Nawa chikufumamu, akuyidimbaña wanyi kudi antu amwekanaña neyi akweti maana hela ataña chikupu ahoshaña nawu kwekala Nleñi wanyi.

16. Chumanyi chinateli kumwekana neyi tubulaña kukolesha chikuhwelelu chetu?

¹⁶ Hela chakwila tunamukalakeli Yehova hadi yaaka yayivulu, twatela kutwalekahu kukolesha chikuhwelelu chetu mudi yena. Muloñadi? Muloña neyi kubabala nehi chikuhwelelu chetu chinateli kuzeya. Neyi chitwahanjekahu, chikuhwelelu chashindamena hawunsahu walala wayuma yitwabulaña kumona. Twavulamenaña swayi yuma yitwabulaña kumona. Dichuma chateneniyi Pawulu nindi kubula chikuhwelelu, “nshidi yanyakalaña kututañila.” (Heb. 12:1) Hanu dinu, tunateli kwila ñahi hakwila chikuhwelelu chetu chitwalekihu kwikala chakola?—2 Tes. 1:3.

17. Chumanyi chinateli kutukwasha kwikala nachikuhwelelu chakola?

¹⁷ Chatachi, mulombenu Yehova yayinki spiritu yindi yajila nawa ilenuña mwenimu mpinji yejima. Muloñadi? Muloña chikuhwelelu himukabu waspiritu. (Ñal. 5:22, 23) Hitunateli kwikala nachikuhwelelu hela kutwalekahu kumukuhwelela Nleñi yetu chakadi spiritu yindi yajilaku. Neyi tutwalekahu kumulomba Yehova spiritu yindi yajila, wukutwinka. (Luka 11:13) Tunateli nikulomba netu: “Tuvulishili chikuhwelelu.”—Luka 17:5.

18. Kwesekeja naMasamu 1:2, 3, chawananyi chitukweti makonu?

¹⁸ Kubombelahu, dizenuña Izu daNzambi mpinji yejima. (Tañenu Masamu 1:2, 3.) Hampinji  yasonekeliwu idi isamu, aIsarela antesha adiña dehi nanshimbi jaNzambi jakusoneka. Hela chochu, anyanta niatupristu adiña dehi nanyivuñilu nawa hamwaaka wamu 7 kwadiña ntanjikilu yakwila “amayala, ambanda, anyana,” nienyi ejima amuIsarela ayitañilileña Nshimbi Mwizu daNzambi. (Kuhit. 31:10-12) Mumafuku aYesu, nyivuñilu yawanikileña hohu kudi antu antesha nimumasinagogi. Kwambukaku, makonu antu amavulu akweti Izu daNzambi. Iku hikukooleka chikupu. Tunateli kumwekesha ñahi netu twasakililaña hakwikala naBayibolu?

19. Chumanyi chitwatela kwila hakwila tukolesheña chikuhwelelu chetu?

¹⁹ Tunateli kumwekesha netu twasakililaña hakwikala Nezu daNzambi neyi tuditañaña mpinji yejima. Twatela kwikala nandandanda yakutaña nikudiza Bayibolu chatela tutañeña hohu neyi tunakeñi. Neyi tutañaña nikudiza chakadi kukilokela, chikuhwelelu chetu chikukola nankashi.

20. Chumanyi chitunakufwila kwila?

²⁰ Kwambukaku “nawakwamaana niantu adiza” amukanu kaayi, etu chikuhwelelu chetu chashindamena Hezu daNzambi. (Mat. 11:25, 26) Muloña wakwila twadizaña Bayibolu, tuneluki yuma chiyinakutaminaku hanu hamaseki nichuma chakelayi Yehova. Dichi tutwalekihu kukolesha chikuhwelelu chetu nikukwasha antu amavulu kumukuhwelela Nleñi yetu. (1 Tim. 2:3, 4) Dichi tutwalekihu kutalila mpinji yakahoshawu antu ejima akekalaku amomi hanu hamaseki mazu ekala haChimwekeshu 4:11 nawu: “Yehova Nzambi yetu, watelela kutambwila kulema, . . . muloña yeyi waleñeli yuma yejima.”