1. Bõe la b zãms yãmb d Naandã zugu?

YÃMB roagdbã sã n yaa a Zeova Kaset rãmba, tõeeme tɩ y bãnga bũmb wʋsg a Zeova zug hal y yãadmẽ. B wilga yãmb tɩ yaa a Zeova la Naandã, t’a tara zʋg-sõma wʋsgo, la t’a na n wa kɩtame tɩ tẽngã gill lebg arzãna.—Sɩng. 1:1; Tʋʋ. 17:24-27.

2. Neb kẽer tagsg yaa wãn ne neb nins sẽn tẽed tɩ Naand n be wã?

² Neb wʋsg pa tẽed tɩ Wẽnnaam beeme, tɩ b pa sokd yaa yẽ la Naandã ye. B tẽedame tɩ bũmb fãa wa n bee woto bala, la tɩ yaa bõn-vɩɩs sẽn yaa kɩds n tall toeengo, n wa lebg bõn-vɩ-kãsemse. Neb nins sẽn tẽed woto wã kẽer yaa neb sẽn karem n zãage. B yetame tɩ siãnsã wilgdame tɩ Biiblã goamã pa sɩda, la tɩ yaa neb nins sẽn pa karmã, sẽn pa tar-b yamã, la zɩtbã n tẽed tɩ Naand n be.

3. Bõe yĩng tɩ tar yõod tɩ d modg n bɩɩs d mengã tẽebo?

³ Neb kẽer sẽn karem n zãagã sẽn yet bũmb ninsã kɩtame tɩ y maand sãmbs t’a Zeova n yaa d Naandã bɩ? Sẽn yɩɩd fãa, rẽ bee ne bũmb ning yĩng sẽn kɩt tɩ d tẽed t’a Zeova la d Naandã. Yaa b sẽn yeel-d tɩ d tẽ t’a Zeova n yaa d Naandã yĩng bɩ? Bɩ yaa tõnd mengã n maag d yĩng n vaees n bãng d toore? (1 Kor. 3:12-15) Baa d sẽn tũud a Zeova wã sã n kaoosa wʋsgo, d fãa segd n modgame n ket n bɩɩsd d tẽebã. D sã n maand woto, neb nins sẽn yet tɩ Biiblã goamã pa sɩdã pa na n tõog n belg-d ye. (Kol. 2:8; Ebre. 11:6) Sẽn na yɩl n tõog n maan dẽ, sõs-kãngã na n sõng-d lame tɩ d bãng 1) bũmb ning sẽn kɩt tɩ neb wʋsg pa tẽed tɩ Naand n be wã, 2) d sẽn tõe n maane, n maaneg n kɩs sɩd t’a Zeova n yaa d Naandã, la 3) d sẽn tõe n maan tɩ d tẽebã kell n tall pãnga.

4. Sẽn zems ne Ebre-rãmb 11:1 wã, tẽeb hakɩɩk tika bõe zugu?

⁴ Neb kẽer tẽedame tɩ tall tẽeb yaa f sẽn na n tẽed tɩ bũmb beeme, n yaool n pa tar kaset ye. La sã n yaa ne Biiblã, woto pa tẽeb hakɩɩk ye. (Karm-y Ebre-rãmb 11:1.) Biiblã wilgdame tɩ tẽeb tika kaset zugu. Wala makre, baa d sẽn pa ne a Zeova, a Zeezi la Rĩungã, d tara kaset tɩ b beeme. (Ebre. 11:3) Siãnsã ned a ye sẽn wa n lebg a Zeova Kaset soab yeelame: “A Zeova Kaset rãmbã sẽn tẽed bũmb ninsã tara tikri. La b pa maand b toog kae ne bũmb nins siãnsã rãmb sẽn yetã ye.”

5. Bõe yĩng tɩ neb wʋsg tẽed tɩ bũmb fãa wa n bee woto tɩ pa tũ ne Naand sababo?

⁵ Tõe tɩ y sokda y meng yaa: ‘Kaset sã n beeme n wilgd vẽeneg tɩ Naand n be, bõe yĩng tɩ neb wʋsg pa tẽed tɩ Wẽnnaam n naan bũmb fãa?’ Neb kẽer zɩ n vaees n na n bãng tɩ Naand n sɩd be ye. A Robɛɛr sẽn lebg a Zeova Kaset soab masã wã yeelame: “B sẽn pa wilgd nebã lekoll-dãmbẽ wã tɩ Wẽnnaam n naan bũmb fãa wã yĩnga, kɩtame tɩ m da pa tẽed tɩ Naand n be ye. Yaa m sẽn wa n tar yʋʋm 22 la m sõs ne a Zeova Kaset rãmbã, tɩ b sõng-m tɩ m bãng tɩ Biiblã tara kaset sẽn wilgd vẽeneg tɩ Wẽnnaam n naan bũmb fãa.” *—Ges-y zĩ-gũbrã: “ Koɛɛga, roagdbã yĩnga.”

6. Bõe yĩng tɩ neb kẽer pa tẽed tɩ Naand n be?

⁶ Neb kẽer pa tẽed tɩ Naand n be, bala b yetame tɩ yaa bãmb sẽn ne wã bal la b tẽeda. La b yaool n sak n deegame tɩ bũmb b sẽn pa ne sɩd beeme, wala makre, pemsmã. Tẽeb ning yell Biiblã sẽn gomdã  me tika kaset sẽn wilgd tɩ bũmb kẽer d “sẽn pa ne sɩd beeme.” (Ebre. 11:1) Yɩl n vaees n bãng rẽ baooda sẽk la modgre. La neb wʋsg yaool n pa rat n maan modgr a woto ye. Ned sẽn pa rat n maan vaeesg a toor n bãng rẽ wat n baas n yeelame bal tɩ Wẽnd kae ye.

7. Yaa sẽn karem-b n zãagã fãa n pa tẽed tɩ Wẽnnaam n naan bũmb fãa bɩ? Wilg-y y leoorã võore.

⁷ Siãnsã neb kẽer sẽn maan vaeesgã, b wa n sak n deegame tɩ Wẽnnaam n naan bũmb fãa. * Wala a Robɛɛre, neb kẽer ra tẽedame bal tɩ Naand kae, b sẽn pa zãms-b inivɛrsiteẽ wã tɩ Wẽnnaam n naan bũmb  fãa wã yĩnga. La siãnsã neb wʋsg wa n baoome n bãng a Zeova la b nong-a. Wa siãnsã nin-kãensã sẽn maanã, d karem n zãagame tɩ d pa karem me, d fãa segd n modgame tɩ d sẽn tẽed Wẽnnaam to-to wã pãng paase. Ned pa tõe n deeg d zĩig n maan rẽ ye.

8-9. a) Sok-bʋg leoor la d na n bao n bãng masã? b) Y sã n nong n bʋgsd a Zeova sẽn naan bũmb ninsã zugu, wãn to la na n naf-yã?

⁸ Bõe la yãmb tõe n maane, n maneg n kɩs sɩd tɩ Naand n be? Bɩ d gom bũmb a naas yelle.

⁹ Get-y bũmb nins Wẽnnaam sẽn naanã: Y sã n maag y yĩng n ges rũmsã, tɩɩsã la ãdsã, na n sõng-y lame tɩ y maneg n kɩs sɩd tɩ Naand n be. (Yɩɩn. 19:2; Eza. 40:26) Y sã n nong n get bõn-kãensã n bʋgsd b zugu, y na n maneg n kɩsa sɩd t’a Zeova la Naandã. Siglgã sɛbã pʋsẽ, d nong n gomda a Zeova sẽn naan bũmb ninsã yell sõma. Da raag-y sõs-kãensã buudã n base, y sẽn tagsd tɩ b võor wʋmb yaa toogã yĩng ye. Modg-y n karm-y-b wa y sẽn tõe tɛka. Sẽn paase, kẽ-y tõnd sɩt jw.org pʋgẽ, n lebg n ges video nins b sẽn yiis rasem a tãab tigis-kãsemsã sasa sẽn nan pa kaoosã, sẽn gomd bũmb nins a Zeova sẽn naanã yellã.

10. Togs-y bũmb sẽn yaa kaset tɩ Naand n be. (Rom dãmb 1:20)

¹⁰ Y sã n wa get bũmb nins a Zeova sẽn naanã, bɩ y maag y yĩng n bao n bãng rẽ sẽn wilgd tõnd bũmb ning d Naandã zugu. (Karm-y Rom dãmb 1:20.) Wala makre, wĩntoogã tʋʋlmã la a vẽenemã yaa tɩlɛ bõn-vɩɩsã yĩnga. La wĩntoogã tara vẽenem buud a sẽn tʋrsde, tɩ pa sõma ne bõn-vɩɩsã ye. Yaa tɩlɛ tɩ ninsaalbã paam tɩ b kogl-b ne vẽenem-kãnga. Sɩd me, a Zeova kogenda tõnd ne rẽ. Wãn to? A naana tẽngã t’a tar pemsem buud b sẽn boond tɩ ozonn sẽn gũbgd tẽngã, n kokd vẽenem-kãng tɩ pa tat ninsaalbã ye. Wĩntoogã vẽenem-kãngã sã n paamd pãnga, ozonnã me pãng paasdame. Y sã n bʋgs rẽ zug neere, y pa ne tɩ yaa Wẽnnaam sẽn yaa d Naanda, la sẽn yaa yam-kãseng soabã n kɩt tɩ woto maandẽ sɩda?

11. Yɛ la y tõe n paam sõss la bũmb a taab sẽn gomd bũmb nins a Zeova sẽn naanã yelle, tɩ paas y tẽebã pãnga? (Ges-y zĩ-gũbrã: “ Bũmb kẽer sẽn tõe n paas y tẽebã pãnga.”)

¹¹ Y sã n ges Index des publications des Témoins de Jéhovah wã pʋgẽ, la sɩt jw.org pʋgẽ, y na n yãa sõss wʋsg sẽn gomd bũmb nins a Zeova sẽn naanã yelle, tɩ tõe n paas y tẽebã pãnga. Sẽn na yɩl n sɩnge, y tõe n gesa sõss nins sẽn nong n yit t’a gom-zugã yaa “Hasard ou conception” wã pʋgẽ. Y na n yãa sõss buud toor-toor la video-koees sẽn gomd rũms la bũmb a taab a Zeova sẽn naan tɩ yaa yel-solemde. B leb n wilga bũmb kẽer siãnsã rãmb sẽn ges a Zeova sẽn naan bũmb ninsã n maane.

12. Y sã n wa zãmsd Biiblã, bõe ne bõe la y segd n bao n bãnge?

¹² Zãmsd-y Biiblã: Siãnsã ned ning yell d sẽn gom sull a naasã pʋgẽ wã ra pa tẽed sɩngrẽ wã tɩ Naand n be ye. Ad a sẽn yeele: “Pa bũmb nins mam sẽn zãms siãnsã tʋʋmdã pʋgẽ wã bal n sõng-m tɩ m bãng tɩ Naand n be ye. Yaa m sẽn zãms bũmb ning Biiblã pʋgẽ wã me yĩnga.” Tõe tɩ yãmb zoe n mii Biiblã sẽn yet bũmb ningã sõma. Baa ne rẽ, sẽn na yɩl n kell n kɩs sɩd tɩ Naand n be, y segd n ket n zãmsda Wẽnnaam Gomdã. (Zoz. 1:8; Yɩɩn. 119:97) Wala makre, tags-y Biiblã sẽn togs yɛl sẽn zĩnd pĩnd wẽndẽ wã tɩ sɩd yaa kɛpɩ wã yelle. Leb-y n tags-y n ges-y  bũmb nins fãa Biiblã sẽn pĩnd n togs tɩ pidsdẽ wã yelle, la a goamã sẽn pa kɩɩsd taabã me yelle. Y sã n maand woto, y na n maneg n kɩsa sɩd tɩ Naand sẽn tar nonglem la sẽn yaa yam-kãseng soab n naan tõndo, la tɩ yaa yẽ n kɩt tɩ b gʋls Biiblã. *—2 Tɩm. 3:14; 2 Pɩy. 1:21.

13. Togs-y bũmb sẽn wilgd tɩ Biiblã saglsã sɩd nafdame.

¹³ Y sã n wa zãmsd Wẽnnaam Gomdã, bɩ y maag y yĩng n ges a saglsã sẽn nafd to-to wã. Wala makre, Biiblã pĩnd n keooga tõnd hal daar zãr ne ligdã nonglem, n yeel tɩ wãada neda, la tɩ kɩtdame tɩ ned paam “tood wʋsgo.” (1 Tɩm. 6:9, 10; Yel. 28:20; Mat. 6:24) Ket n yaa woto rũndã-rũndã bɩ? Sebr a yembr sẽn gomd nebã manesem sẽn lebg to-to rũndã-rũndã wã yell pʋgẽ, b yeelame: “Neb nins sẽn tagsd tɩ f sã n tar ligd wʋsg f vɩɩmã pʋgẽ, rẽ n tar yõod n yɩɩdã pa tar sũ-noog ye. Yaa sũ-sãamse. Baa neb nins sẽn dat bal n paam ligd wʋsgã pa tar sũ-noogo, b leb n pa tar yĩns laafɩ ye.” Dẽnd Biiblã sẽn keoogd tõnd tɩ d da nong ligdã yaa saglg sẽn yaa sõma wʋsgo. Yãmb nee Biiblã sagls a taab sẽn naf yãmb bɩ? D sã n tags sagls nins fãa sẽn be Biiblã pʋgẽ wã yelle, d yãta vẽeneg tɩ d saasẽ Ba wã mii sẽn yaa sõma ne-do, tɩ rẽ na n kɩt tɩ wakat fãa bɩ d tũud sagls nins a sẽn kõt tõndã. (Zak 1:5) Woto, d vɩɩmã na n maneg n yɩɩ noog n paase.—Eza. 48:17, 18.

14. D sã n zãmsd Biiblã, bõe la d na n bãng a Zeova zugu?

¹⁴ Y sã n wa zãmsd Biiblã, segd n yɩɩ y sẽn dat n bãng a Zeova sõma n paas yĩnga. (Zã 17:3) Woto, y na n yãa a zʋg-sõma wã, zʋg-sõma nins y sẽn bãnge, y sẽn wa n tagsd bũmb nins a sẽn naanã zugã. Y sã n bao n bãng a Zeova zʋg-sõma wã, na n kɩtame tɩ y kɩs sɩd t’a beeme. (Yik. 34:6, 7; Yɩɩn. 145:8, 9) Y sã n bãngd a Zeova sõma n paasdẽ, y na n maneg n tẽed-a lame, n nong-a wʋsgo, tɩ zood ning y sẽn tar ne-a wã me pãng paasdẽ.

15. Y sã n gomd Wẽnnaam yell ne neb a taabã, wãn to la na n naf-yã?

¹⁵ Sõng-y neb a taabã tɩ bãmb me tẽ tɩ Wẽnnaam beeme. Y sã n maand woto, yãmb mengã tẽebã pãng na n paasdame. Ned yãmb sẽn taas koɛɛgã sã n sãmbda Wẽnnaam sã n beeme, tɩ y pa mi y sẽn na n leok-a to-to, y maanda wãna? Bao-y Biiblã vɛrse b sẽn wɛgs siglgã sɛbã pʋsẽ, n sõs rẽ zug ne-a. (1 Pɩy. 3:15) Y leb n tõe n kosa a Zeova Kaset soab sẽn tar minim t’a sõng-yã. A soabã sak n deega Biiblã sẽn yetã t’a pa sak me, y sẽn maan vaeesg n bãng bũmb ningã na n nafa yãmb mengã. Y tẽebã pãng na n paasame. Y sã n maand woto, na n kɩtame tɩ y ra tẽ neb nins sẽn yet tɩ b tara yam bɩ tɩ b karem n zãagame, n yaool n pa sak n deeg tɩ Naand n be wã.

16. D sã n pa bɩɩs d tẽebã la d modg t’a ket n tar pãnga, bõe n tõe n maane?

¹⁶ Baa d sẽn tũud a Zeova wã sã n kaoosame, d segd n ket n bɩɩsda d tẽebã, la d modg t’a pãngã ket n paasdẽ. Bõe yĩnga? Bala d sã n pa gũusi, d tẽebã tõe n komsame. Tẽeg-y me tɩ tẽebã tika kaset d sẽn tare, tɩ bũmb kẽer d sẽn pa ne sɩd beeme. D tõe n yĩma bũmb nins d sẽn pa ne wã yell faag-faaga. Rẽ n so t’a Poll bool tẽebã kaalmã tɩ “yel-wẽnd ning sẽn gĩt tõnd nana-nana wã.” (Ebre. 12:1) Rẽ wã, bõe la d tõe n maan tɩ d tẽebã kell n tall pãnga?—2 Tes. 1:3.

17. Bõe n tõe n sõng-d tɩ d tẽebã kell n tall pãnga?

 ¹⁷ Pipi, nong-y n kot-y a Zeova a vʋʋsem sõngã. Bõe yĩnga? Bala tẽebã naaga vʋʋsem sõngã biis sʋka. (Gal. 5:22, 23) D pa tõe n bɩɩs d tẽebã la d kell n kɩs sɩd tɩ Naand n be, tɩ pa tũ ne vʋʋsem sõngã sõngr ye. D sã n ket n kot a Zeova a vʋʋsem sõngã, a na n kõ-d lame. (Luk 11:13) D pʋd n tõe n pʋʋsa a Zeova n kos-a yaa: “Sõng-y tõnd tɩ d tẽebã pãng paase.”—Luk 17:5.

18. Sẽn zems ne Yɩɩn-sõamyã 1:2, 3, bõe la d tar tɩ yaa bark menga?

¹⁸ Sẽn paase, zãmsd-y Wẽnnaam Gomdã n pa vaandẽ ye. (Karm-y Yɩɩn-sõamyã 1:2, 3.) B sẽn wa n gʋls yɩɩn-kãngã goamã, rẽ tɩ Israyɛll neb bilf bal n da tar Wẽnnaam tõogã b sẽn gʋlsã. Rĩmã ne maan-kʋʋdbã me ra tarame. Yʋʋm a yopoe fãa, b ra kɩtdame tɩ “rapã, pagbã, kambã,” la sãamb nins fãa sẽn be Israyɛllã tigim taaba, n kelg Wẽnnaam tõogã karengo. (Tõo. 31:10-12) A Zeezi wakatẽ wã me, neb a wãn bal n da tar Gʋls-sõamyã. B ra bĩnga sɛbã wʋsg zʋɩf-rãmbã karen-dotẽ wã. La rũndã-rũndã, neb wʋsg tõe n paama Wẽnnaam Gomdã tõrã, wall a pʋ-sʋka. Woto yaa bark meng-menga. Wãn to la d tõe n wilg tɩ d sũur nooma ne d sẽn tar Biiblã?

19. Bõe la d tõe n maan tɩ d tẽebã pãng ket n paasdẽ?

¹⁹ D sã n karemd Wẽnnaam Gomdã daar fãa, d wilgdame tɩ d sũur nooma ne d sẽn paam n tar-a wã. D segd n yãka wakat n karemd Biiblã la d zãmsd-a, la d da karemd-a d sẽn wat n tar sẽk bal ye. D sã n modg n zãmsd Biiblã n pa vaandẽ, d tẽebã pãng na n paasdame.

20. Bõe la d segd n yãk yam n maane?

²⁰ Tõnd pa wa dũniyã ‘yam dãmbã la bãngdbã’ ye. Tõnd tara tẽeb sẽn tik Wẽnnaam Gomdã zugu. (Mat. 11:25, 26) D sã n zãmsd Biiblã, d bãngda bũmb ning sẽn kɩt tɩ vɩɩmã pa lebd be tẽngã zugã, la a Zeova sẽn na n wa maan bũmb ning rẽ wɛɛngẽ. Rẽ wã, bɩ d modg tɩ d tẽebã kell n tall pãnga, la d sõng neb wʋsg wa d sẽn tõe tɩ b tẽ tɩ Naand n be. (1 Tɩm. 2:3, 4) Bɩ d ket n gũud wakat ning neb nins fãa sẽn be tẽngã zugã sẽn na n pẽg Wẽnnaam, n togs goam nins sẽn be Vẽnegr 4:11 pʋgẽ wã. B yeta be yaa: “Tõnd Wẽnnaam a Zeova, yãmb n zems tɩ reeg ziir la waoogre . . . bala yãmb n naan bũmb fãa.”