1. ¿Tlake tijmati tlen toTeotsij?

TLAJ KEMA titlakatki mochampoyouaj ipa kitekipanouayayaj Jehová, uajka tijyekok miak tlamantli tlen ya. Tijyekok ya kichijchijki nochi tlen onka, kinextia kuajkuali tlamantli uan kineki maseualmej ma itstokaj ipan Xochimili (Gén. 1:1; Hech. 17:24-27).

2. ¿Kenijkatsa kinitaj katli kineltokaj itstok katli tlachijchijki?

² Miakej maseualmej amo kineltokaj tlaj toTeotsij itstok o tlaj ya kichijchijki tlen onka. Inijuantij kiijtouaj tlen eltok iselti yolki uan kej panotiajki xiuitl mokueptiajkej uan moskaltijkej. Se keskij katli kineltokaj ni tlamantli, elij katli tlauel momachtijtokej. Uelis nojkia kiijtouaj Biblia amo kiijtoua tlen melauak, uan san katli amo tlauel ixtlamatij uan uiuitikej kineltokaj itstok se akajya katli tlachijchijki.

3. ¿Kenke moneki tijchiuasej kampeka kuali tlaneltokasej?

³ ¿Uelis kipatlasej tlen tijneltokaj katli tlauel kinixmatij? ¿Kichiuasej ayokmo ma tijneltokakaj Jehová tlachijchijki? Tlauel techpaleuis tlaj kuali timoiljuiaj kenke tijneltokaj nopa tlamantli. ¿Tijneltokaj Jehová tlachijchijki pampa sekinok kiampa techiljuijkej? ¿O tojuantij tijchijkej kampeka tijtemosej se keski tlamachtili? (1 Cor. 3:12-15). Maske ya uejkajtok tijtekipanouaj Jehová o amo, nojua moneki tijchijtosej kampeka kuali titlaneltokasej. Tlaj kiampa tijchiuasej, amo techkajkayauasej “ika miak tlajtoli yejyektsitsij” uan ika “tlen axmelauak uan tlen axipati”, kema techiljuisej Biblia amo kiijtoua tlen melauak (Col. 2:8; Heb. 11:6). Ni tlamachtili techpaleuis amo ma techkajkayauakaj uan tikitasej kenke miakej kineltokaj amo itstok se akajya katli tlachijchijki, kenijkatsa nojua titlaneltokasej uan nochipa kiampa tijchijtosej.

4. Kej kiijtoua Hebreos 11:1, ¿tlake techpaleuijtok titlaneltokasej?

⁴ Se keskij maseualmej moiljuiaj kema se akajya tlaneltoka, kineltoka se tlamantli maske amo nelia kimati. Nopa amo nelia (xijpoua Hebreos 11:1). Biblia kiijtoua kema se akajya tlaneltoka, kineltoka tlamantli tlen amo kiita, kej Jehová, Jesús uan toTeotsij iTlanauatijkayo, kiampa kichiua pampa kimati se keski tlamantli tlen kipaleuijtok ma motemachi (Heb. 11:3). Se bioquímico katli nojkia mochijki se Jehová itlajtoltemajka, kiijtoua: “Tlen tijneltokaj nelia eli melauak pampa tikitstokej tlen kiijtouaj ixtlamatinij mouika ika tlen tijneltokaj”.

5. ¿Kenke miakej maseualmej amo kineltokaj tlaj toTeotsij techchijchijki?

⁵ Onka miak tlamantli tlen kinextia toTeotsij tlachijchijki. Uajka, ¿kenke miakej amo kineltokaj? Pampa amo kema kitemojtokej se keski tlamantli tlen kinpaleuis. Robert, katli achtouia amo kitekipanouayaya Jehová, kiijtoua: “Ipan escuela amo kema techmachtijkej tlaj itstok se akajya katli tlachijchijki, yeka nojkia kiampa nijneltokayaya. Uan kema nikaxitik 22 xiuitl, nikamanaltik ininuaya Jehová itlajtoltemakauaj, inijuantij nechnextilijkej ipan Biblia kampa kinextia nelnelia itstok se akajya katli tlachijchijki”. * (Xikita recuadro “ Tlen tlauel kinpaleuis tetajmej”).

6. ¿Kenke se keskij maseualmej amo kineltokaj tlaj itstok katli tlachijchijki?

⁶ Se keskij maseualmej amo kineltokaj tlaj itstok se akajya katli tlachijchijki pampa kiijtouaj amo kiitaj. Maske kiampa kiijtouaj, kena kineltokaj tlamantli tlen amo kiitaj. Se neskayotl, inijuantij  kineltokaj onka gravedad ipan Tlaltipaktli pampa tlen kimajkauaj, uetsij. Biblia kiijtoua titlaneltokaj pampa kiitstokej se keski tlamantli tlen “niyon kentsi aya ueli tikinitaj” (Heb. 11:1). Tlaj nelia tijnekij tijneltokasej tlen melauak, moneki tijkixtisej tonali uan tochikaualis, uan miakej amo kinekij kiampa kichiuasej. Yeka, kiijtouaj amo itstok toTeotsij.

7. ¿Kenke se keskij ixtlamatinij kineltokaj itstok se akajya katli tlachijchijki?

⁷ Miakej ixtlamatinij maske achtouia amo kineltokayayaj tlaj itstok toTeotsij, teipa kena kineltokakej pampa kiitakej se keski tlamantli tlen kinpaleuik. * Miakej kinpano kej Robert, katli tikijtojkej ipan párrafo 5, amo kineltokaj tlaj itstok se akajya katli tlachijchijki pampa amo kinmachtiaj ipan universidad. Maske amo kinmachtiaj,  miakej ixtlamatinij kineltokatokej tlen Biblia tlamachtia uan yeka pejkej kiikneliaj Jehová. Kej kichijkej, tojuantij nojkia moneki toselti tijchiuasej kampeka nojua kuali titlaneltokasej maske amo tlauel tiixtlamatij.

8, 9. 1) ¿Tlake tlajtlanili tijnankilisej? 2) ¿Tlake tijyekosej tlaj timomachtisej tlen toTeotsij kichijchijtok?

⁸ Ma tikitakaj naui tlamantli tlen techpaleuis nojua ma tijneltokakaj itstok se akajya katli tlachijchijki.

⁹ Ma tikitakaj tlen toTeotsij kichijchijtok. Tlaj kuali tikitaj kenijkatsa elij tlapialmej, xiuitl uan sitlalimej, techpaleuis nojua tlauel titlaneltokasej ipan Jehová, katli tlachijchijki (Sal. 19:1; Is. 40:26). Kema tijchiuaj kampeka tijyekosej tlake techmachtia tlen eltok, techpaleuia ma timotemachikaj Jehová nelia tlachijchijki. Ipan se keski amatlajkuiloli nochipa kiixtoma kenijkatsa Jehová tlachijchijki, maske kemantika uelis tijmatisej ouij tijkuamachilisej, moneki tijchiuasej kampeka timomachtisej uan tikitasej tlake tijyekouaj. Nojkia, ipan jw.org, onka miak videos tlen kiski ipan uejueyi tlanechikolistli kampa kiixtoma kenijkatsa Jehová tlachijchijtok.

10. Kej kiijtoua Romanos 1:20, ¿tlake neskayotl kinextia nelia itstok katli tlachijchijki?

¹⁰ Kema tijyekouaj kenijkatsa toTeotsij tlachijchijtok, ma timoiljuikaj tlake techmachtia tlen ya (xijpoua Romanos 1:20). Se neskayotl, maske Tonati kitotonilia Tlaltipaktli uan kiampa techpaleuia ma tiyoltokaj, nojkia techtlanauia. ¿Tlake techpaleuijtok amo tlauel ma techtlanaui? Techpaleuia se tlamantli tlen kitsakua Tlaltipaktli tlen kitokaxtiaj ozono, ni eli kej se ayauitl tlen kichiua amo tlauel ma techtlati Tonati. Kema tlauel tlatotonia, tlen kitsakua Tlaltipaktli nojkia momiakilia. Uajka, nochi ni tlamantli techpaleuia ma tijneltokakaj itstok se akajya katli tlachijchijki, ya tlauel tlalnamiki uan tlauel teiknelia.

11. ¿Kanke uelis tijpantisej tlamachtili tlen techpaleuis nojua ma titlaneltokakaj? (Xikita recuadro “ Tlen mitspaleuis nojua titlaneltokas ipan Jehová”).

¹¹ Tlaj tijtemosej tlamachtili ipan Índice de las publicaciones Watch Tower uan ipan jw.org, tijpantisej tlen techpaleuis nojua tlauel ma titlaneltokakaj ipan toTeotsij. Uelis tijpouasej o tikitasej videos kampa kiijtoua “¿Lo diseñó alguien?”, nopa tlamachtili eli kototsi uan kiixtoma kenijkatsa elij tlapialmej uan xiuitl. Nojkia, kiixtoma kenijkatsa ixtlamatinij kichijchijtokej se keski tlamantli kej Jehová tlachijchijtok.

12. ¿Tlake moneki kuali tikitasej kema timomachtiaj Biblia?

¹² Ma timomachtikaj Biblia. Ipan párrafo 4 tikitakej nopa bioquímico amo kineltokayaya tlaj itstok se akajya katli tlachijchijki, uan teipa kipatlak kej moiljuiyaya. Ya Kiijtoua: “Nitlaneltoka amo san pampa tlauel nimomachtijtok ciencia, nojkia pampa nijchijtok kampeka nimomachtis tlen Biblia kiijtoua”. Maske uelis ya tijmatij tlake tlamachtia Biblia, moneki nojua tijchijtosej kampeka timomachtisej pampa nopa techpaleuis nojua ma titlaneltokakaj ipan toTeotsij (Jos. 1:8; Sal. 119:97). Yeka, ma tikitakaj kenijkatsa xitlauak kiijtoua tlen panok, moaxitik tlajtolpanextili uan tlen kiixtoma. Nopa techpaleuis ma tijneltokakaj katli tlachijchijki tlauel tlalnamiki uan tlauel techiknelia, uan nojkia kichijki ma moijkuilo Biblia (2 Tim. 3:14; 2 Ped. 1:21). *

13. Ika se neskayotl xikijto kenke nelia melauak tlen Biblia kiijtoua.

 ¹³ Kema timomachtiaj Biblia nochipa ma tikitakaj kenijkatsa tlauel techpaleuia. Se neskayotl, uejkajkia Biblia kiijtok kema se akajya tlauel kiiknelia tomij kipias “miak tlamantli tlajtlakoli” (1 Tim. 6:9, 10; Prov. 28:20; Mat. 6:24). ¿Nojua techpaleuia tlen tetlajtolmaka? Kena. Ma tikitakaj tlen kiijtoua se amochtli katli itoka La epidemia del narcisismo: “Miakej katli tlauel kinekij tlapijpiasej amo kinpaleuia ma yolpakikaj uan tlauel mokuesouaj. Nojkia, katli nochipa kinekij kipiasej miak tomij tlauel kinkokoua inintsonteko uan nojkia kipiaj sekinok kokolistli”. Tikitaj tlauel techpaleuia kema Biblia kiijtoua amo tlauel ma tijpatiitakaj tomij. ¿Tikilnamiki sekinok textos tlen tlauel mitspaleuijtok? Kema timoyoliljuiaj ipan tlen Biblia tetlajtolmaka, techpaleuia ma tikitakaj kenijkatsa Jehová kuali kimati tlake nelnelia techpaleuis (Sant. 1:5). Uan nopa kichiuas tlauel ma tiyolpakikaj (Is. 48:17, 18).

14. ¿Tlake tijyekosej tlen Jehová kema timomachtisej Biblia?

¹⁴ Kema timomachtiaj pampa tijnekij tikixmatisej Jehová (Juan 17:3). Kema timomachtijtiasej Biblia tikitasej nopa kuajkuali tlamantli tlen Jehová kinextik kema tlachijchijki, uan nopa techpaleuis tijneltokasej nelia itstok (Éx. 34:6, 7; Sal. 145:8, 9). Kema nojua tlauel tikixmajtiasej, techpaleuis nojua ma titlaneltokakaj, ma tikiknelikaj uan kuali ma timouampojchiuakaj iuaya.

15. ¿Kenijkatsa techpaleuis tlaj tikiniljuiaj sekinok tlen tijneltokaj?

¹⁵ Ma tikiniljuikaj sekinok nelia itstok se akajya katli tlachijchijki. Tlaj kiampa tijchiuasej, techpaleuis nojua kuali ma titlaneltokakaj. Uan, ¿tlake uelis tijchiuasej tlaj se akajya kinekis kimatis tlaj nelia itstok katli tlachijchijki uan tojuantij amo tijmatisej tlake tijnankilisej? Uelis tijtemosej tlamachtili ipan amatlajkuiloli uan teipa tikiljuisej nopa maseuali (1 Ped. 3:15). Nojkia, uelis tikiljuisej ma techpaleui se toikni katli miak xiuitl tlatekipanojtok. Uan tlaj nopa maseuali amo kinekis kitlakakilis nopa tlamachtili tlen tijtemojkej, amo ma timoyolkokokaj pampa nopa techpaleuis nojua kuali ma titlaneltokakaj. Uan nopa kichiuas amo ma tijneltokakaj tlen kiijtouaj katli moiljuiaj tlauel tlalnamikij uan amo kineltokaj tlaj nelnelia itstok katli tlachijchijki.

16. ¿Tlake uelis panos tlaj amo tijchiuaj kampeka nojua kuali titlaneltokasej?

¹⁶ Tlaj miak xiuitl titlatekipanojtokej o amo, nojua ma tijchiuakaj kampeka kuali titlaneltokasej. ¿Kenke moneki kiampa tijchiuasej? Pampa tlaj amo tijchiuaj, teipa ayokmo kuali titlaneltokasej. Ma tikilnamikikaj se akajya kuali tlaneltoka kema kineltoka ipan tlamantli tlen amo nesi. Uan tlen amo nesi, nima tikilkauaj. Yeka, apóstol Pablo kiijtok “ma timokixtilikaj [...] nopa tlajtlakoli tlen más techtsakuilia” (Heb. 12:1). Uajka, ¿tlake kinamiki tijchiuasej uan kiampa nojua kuali titlaneltokasej? (2 Tes. 1:3).

17. ¿Tlake techpaleuis nojua kuali titlaneltokasej?

¹⁷ Se. Ma tikiljuikaj Jehová ma techmaka itonal. ¿Kenke? Pampa toTeotsij itonal techpaleuia nojua kuali ma titlaneltokakaj (Gál. 5:22, 23). Tijmatij san Jehová itonal techpaleuis ma tijnextikaj ni kuali tlamantli uan ma titlaneltokakaj itstok se akajya katli tlachijchijki. Yeka, ma tikiljuikaj Jehová ma techmaka itonal, uan ya kiampa kichiuas (Luc. 11:13). Uelis tikiljuisej: “Xitechpaleui para más ma timitsneltokilikaj” (Luc. 17:5).

18. Kej kiijtoua Salmo 1:2, 3, ¿tlake tlateochiualistli tijpiaj?

 ¹⁸ Ome. Nochipa ma timomachtikaj Biblia (xijpoua Salmo 1:2, 3). Kema moijkuilok nopa salmo amo nochi israeleuanij kipixtoyaj toTeotsij itlanauatiljuaj, san kipixtoyaj tlanauatianij uan sacerdotes. Uan sejse chikome xiuitl “nochi tlakamej, siuamej, konemej uan sekinok tlali euanij” monekiyaya mosentilisej uan kiampa kikakisej toTeotsij iTlajtol (Deut. 31:10-12). Kema Jesús itstoya san se keskij maseualmej kipixtoyaj toTeotsij itlanauatiljuaj uan san kipouayayaj ipan sinagogas. Ipan ni tonali miakej kipiaj Biblia, uan san se keskij san kipiaj amochtli Mateo uan tlami ipan Apocalipsis. ¿Kenijkatsa tijnextisej nelnelia tijpatiitaj Biblia?

19. ¿Tlake moneki tijchiuasej tlaj tijnekij nojua kuali titlaneltokasej?

¹⁹ Kema tijpouaj mojmostla Biblia, tijnextiaj tijpatiitaj. Yeka, amo kinamiki timomachtisej san kemantika o kema timoiljuisej tijpiaj tonali. Tlaj nochipa kuali tikitaj tlake tonali timomachtisej uan kema tijchiuasej, techpaleuis kuali ma titlaneltokakaj.

20. ¿Tlake kinamiki timosentlalijtosej tijchiuasej?

²⁰ Nochi tlen tijneltokaj kistok ipan Biblia uan amo kej kineltokaj katli “moiljuiaj tlalnamikinij uan miak kimachiliaj” (Mat. 11:25, 26). Nopa techpaleuijtok tijmatisej kenke pano tlen amo kuali uan tlake kichiuas Jehová. Yeka, ma tijchiuakaj kampeka nojua kuali titlaneltokasej uan ma tikinpaleuikaj sekinok ma kineltokakaj itstok se akajya katli tlachijchijki (1 Tim. 2:3, 4). Uan ma tijchiuakaj ika miak pakilistli kema ipan nochi Tlaltipaktli kiueyichiuasej Jehová uan kiijtosej tlen kiijtoua Apocalipsis 4:11: “Ta titoTeko Dios tlen onpano tiueyi. [...] Kinamiki para san ta ma timitsueyichiuakaj. Ta tijchijchijki nochi tlen onka”.