1. ¿Toni xa mitsonmachtijkej keman katka tionkonetsinok?

KOMO keman tionyolik motatuan katkajya itaixpantijkauan Jiova, xa semi katka tionkonetsinok keman tikonmatik ke Jiova kichijchiuak nochi tein onkak, ke kipia kualtsitsin kualneskayomej uan ke kineki maj tinemikan itech se Xochital nikan taltikpak (Gén. 1:1; Hech. 17:24-27).

2. ¿Keniuj seki taltikpakneminij kinitaj akin kineltokaj ke moajsi se Tachijchiujkej?

² Sayoj ke miakej amo kineltokaj ke Dios nemi oso ke yejuatsin kichijchiuak nochi tein onkak. Kineltokaj ke nochi tein onkak iselti nesik uan ke satepan yolik mopatatiajki. Sekin akin kineltokaj nejin kiselijkej miak tamachtilis. Xa kijtouaj ke tein kiajsinij tamatinij kinextia ke tein Biblia kijtoua amo melauak, uan ke kineltokaj ke moajsi se Tachijchiujkej sayoj akin amo teyi kimatij, akin amo momachtijkej uan akin nochi kineltokaj.

3. ¿Keyej moneki tikchikauaskej totakuaujtamatilis?

³ ¿Kichiuas maj amo tikneltokakanok ke Jiova kichijchiuak nochi tein onkak tein kijtouaj akin kiselijkej miak tamachtilis? Uelis tiknankiliskej nejin netajtanil komo tikmatij keyej tikneltokaj ke Jiova kichijchiuak nochi tein onkak. ¿Tikneltokaj porin yejua nejon techiluijkej ke monekia tikneltokaskej? ¿Oso porin timomachtianij uan tikitanij toni kinextia ke Jiova tachijchiuak? (1 Cor. 3:12-15). Maski uejkaujya oso yankuixtokok peuak tiktekitiliaj Jiova, tinochin moneki tiksentokaskej tikchikauaskej totakuaujtamatilis. Komo tikchiuaj nejin, amo techkajkayauaskej akin kijtouaj ke tein Biblia tamachtia amo melauak (Col. 2:8; Heb. 11:6). Nejin tamachtilis techpaleuis porin tikitaskej keyej miakej amo kineltokaj ke moajsi se Tachijchiujkej, keniuj uelis tikchikauaskej totakuaujtamatilis itech Jiova, akin techchijchiuak,  uan toni techpaleuis maj totakuaujtamatilis kisentoka chikauak.

4. Ika tein kijtoua Hebreos 11:1, ¿toni kijtosneki takuaujtamatilis?

⁴ Sekin kinemiliaj ke se takuaujtamatis kijtosneki se kineltokas teisa maski amo teyi kinextia ke yekmelauj onkak oso ke yekmelauj nemi. Sayoj ke ika tein kijtoua Biblia, nejon amo takuaujtamatilis (xikonixtajtolti Hebreos 11:1, TNM). Tikneltokaskej ke teisa yekmelauj onkak oso ke yekmelauj nemi komo onkak tein kinextia ke melauak nejon. Yejua ika tikneltokaj ke Jiova uan Jesús yekmelauj nemij uan ke iTekiuajyo Dios yekmelauj moajsi porin onkak tein kinextia ke melauak nejon (Heb. 11:3). Se takat akin kiselij miak tamachtilis uan mochiuak itaixpantijkauj Jiova kijtoua: “Itaixpantijkauan Jiova takuaujtamatij porin onkak tein kinextia ke tein kineltokaj yekmelauj nemi oso yekmelauj onkak uan no kiitaj tein kiajsinij tamatinij”.

5. ¿Keyej miakej amo kineltokaj ke Dios kichijchiuak nochi tein onkak?

⁵ Komo onkak tein kinextia ke moajsi se Tachijchiujkej, ¿keyej miakej amo kineltokaj ke Dios kichijchiuak nochi tein onkak? Porin sekin amo momachtianij tein kinextia ke Dios tachijchiuak. Robert, akin axkan itaixpantijkauj Jiova, kijtoua: “Kemej itech kaltamachtiloyan amo keman ika tajtouayaj ke tein onkak kichijchiujkej, amo nikneltokaya ke moajsi se Tachijchiujkej. Hasta keman nikajxitij 22 xiujmej nitajtoj iniuan itaixpantijkauan Jiova, uan nechnextilijkej ke Biblia kijtoua miak taman tein kinextia ke Dios kichijchiuak nochi tein onkak”. * (Xikonita recuadro “ Tein tikiniluiaj tetatmej”).

6. ¿Keyej sekin kijtouaj ke amo moajsi se Tachijchiujkej?

⁶ Sekin amo kineltokaj ke moajsi  se Tachijchiujkej porin kijtouaj ke sayoj kineltokaj tein ueli kiitaj. Sayoj ke tein melauj, kemaj kineltokaj tein amo ueli kiitaj. Kemej neskayot, kineltokaj ejekat porin moajsi tein kinextia ke kemaj onkak. Tejuan tikpiaj takuaujtamatilis tein ika motajtoua itech Biblia porin onkak tein kinextia ke “tein amo se kiita yekmelauj onkak” (Heb. 11:1, TNM). Sayoj ke moneki timochikauaskej timomachtiskej nejon tein kinextia ke yekmelauj onkak tein amo tikitaj. Sayoj ke miakej amo kinekij momachtiskej, yejua ika kijtouaj ke Dios amo nemi.

7. ¿Nochin akin kiselijkej miak tamachtilis kineltokaj ke Dios amo tachijchiuak? Xikonmelaua.

⁷ Seki tamatinij kineltokakej ke Dios kichijchiuak nochi tein onkak satepan ke momachtijkej tein kinextia ke yejuatsin tachijchiuak. *  Ijkon kemej kipanok Robert, akin ika titajtojkej itech párrafo 5, sekin xa amo kineltokaj ke moajsi se Tachijchiujkej porin itech universidades amo tamachtiaj ke tein onkak kichijchiujkej. Sayoj ke miakej tamatinij kiixmatkej Jiova uan kitasojtaj. Ijkon kemej kichiujkej yejuan, tinochin moneki tikchikauaskej totakuaujtamatilis itech Dios maski tikselijkej miak tamachtilis oso amo. Amo akin uelis toka kichiuas nejon.

8, 9. 1) ¿Katiyejua netajtanil tiknankilitij? 2) ¿Keniuj techpaleuis komo timomachtiaj keniuj chijchiujtok seki taman?

⁸ ¿Keniuj uelis tikchikauaskej totakuaujtamatilis itech toTachijchiujkauj? Maj tikitakan naui taman.

⁹ Maj tikitakan tein onkak. Komo kuali tikitaj keniuj chijchiujtokej tapialmej, tatokmej, koujmej uan sitalimej, mochikauas totakuaujtamatilis itech toTachijchiujkauj (Sal. 19:1; Is. 40:26). Komo kuali timomachtiaj nochi nejin, okachi tikneltokaskej ke Jiova tachijchiuak. Miakpa kisa tamachtilis itech toamaixuan tein kimelaua keniuj chijchiujtok seki taman tein onkak. Maski ouij techkisas tikajsikamatiskej, maj timochikauakan tikixtajtoltiskej uan maj timochikauakan tikelnamikiskej seki taman. No maj tikelnamikikan ke itech jw.org oksepa uelis tikitaskej kualtsitsin videos tein ika tajtouaj keniuj chijchiujtok seki taman, tein yankuixtok kiskej itech uejueyi nechikolmej tein uejkauaj eyi tonal.

10. ¿Toni se taman kinextia ke moajsi se Tachijchiujkej? (Romanos 1:20).

¹⁰ Keman timomachtiskej keniuj chijchiujtok tein onkak, maj tikitakan keniuj techpaleuia maj tikixmatikan toTachijchiujkauj (xikonixtajtolti Romanos 1:20). Kemej neskayot, Tonaltsin tatanextia uan takauantia nikan taltikpak, nejon tapaleuia maj yolto tein onkak. Sayoj ke no kitamota se tanex tein amo techpaleuia. Yejua ika, taltikpak kiyoualojtok se gas tein kitsakuilia nejon tanex uan tapaleuia maj amo teyi techchiuili. Keman tanex okachi chikauak, nejon gas momiakilia. ¿Melauj ke nejin kinextia ke taixejekol maj se kineltoka ke moajsi se Tachijchiujkej akin semi tamatkej uan semi techtasojta?

11. ¿Kani uelis tikajsiskej tamachtilis tein techpaleuis maj mochikaua totakuaujtamatilis itech toTachijchiujkauj? (Xikonita recuadro “ Nepaleuilmej tein kichikauaj totakuaujtamatilis”).

¹¹ Itech Índice de las publicaciones Watch Tower uan itech jw.org ika motajtoua keniuj chijchiujtok miak taman tein onkak, tein techpaleuis maj mochikaua totakuaujtamatilis. Xa uelis tipeuaskej ika tamachtilismej uan videos tein moajsij itech taxelol “¿Lo diseñó alguien?”, tein amo uejueykej uan ika tajtouaj keniuj chijchiujtokej seki tapialmej uan tatokmej. No kijtouaj keniuj tamatinij kitemouanij kichijchiuaskej seki taman ijkon kemej chijchiujtokej seki tapialmej uan tatokmej.

12. ¿Toni moneki itech titanemiliskej keman timomachtiaj Biblia?

¹² Maj timomachtikan Biblia. Tokniuj takat akin ika titajtojkej itech párrafo 4 akin kiselij miak tamachtilis, yekinika amo kineltokaya ke moajsi se Tachijchiujkej, sayoj ke satepan kipatak itanemilil. Yejua kijtoua: “Nitakuaujtamati amo sayoj porin nimomachtiani miak taman tein kiajsinij tamatinij, ta no porin kuali nimomachtiani Biblia”. Tejuan xa kuali tikixmatijya tein Biblia tamachtia. Maski ijkon, moneki tiksentokaskej timomachtiskej porin nejon techpaleuis maj mochikaua totakuaujtamatilis itech toTachijchiujkauj (Jos. 1:8; Sal. 119:97). Kemej neskayot, maj itech titanemilikan ke Biblia amo teyi kitatia keman ika tajtoua tein panok ne uejkauj, ke seki taman tein kijtojka ke mochiuaskia mochiuakya uan ke maski miakej kijkuilojkej, tein kijtoua amo mopapata. Nejin techpaleuis maj okachi titakuaujtamatikan ke techchijchiujkej uan ke Akin techchijchiuak semi tamatkej  uan tetasojtakej, uan ke yejuatsin kichiuak maj moijkuilo Biblia (2 Tim. 3:14; 2 Ped. 1:21). *

13. Xikonijto se neskayot kampa moita ke tein iTajtol Dios tayolmajxitia semi tapaleuia.

¹³ Keman timomachtiskej iTajtol Dios, maj tikitakan ke tein tayolmajxitia semi tepaleuia. Kemej neskayot, Biblia uejkaujya tanejmachtijka ke semi se kipatiuitas tomin amo tepaleuia uan ke teualkuilia “miak tataman ouijkayome” (1 Tim. 6:9, 10; Prov. 28:20; Mat. 6:24). Nejon tein tanejmachtij kisentoka tapaleuia. Se amatajkuilol tein ika tajtoua keniuj tanemiliaj taltikpakneminij itech totonaluan, kijtoua: “Akin kinemiliaj ke semi moneki se kipias tomin, miakpa amo yolpakij uan semi motayokoltiaj. Hasta akin kinekij kipiaskej okachi tomin amo yolpakij uan okachi mokokouaj”. Nejin kinextia ke semi tapaleuia maj Biblia tayolmajxiti maj amo semi se kipatiuita tomin. ¿Tikelnamikij okseki tajkuilolmej tein semi techpaleuianij? Keman itech titanemiliaj kuali tayolmajxitilis tein kitemaka Biblia, tikitaj ke toTachijchiujkauj akin semi techtasojta kimati toni okachi techpaleuis, uan yejua ika nochipa tiktemoskej maj yejuatsin techyolmajxiti (Sant. 1:5). Nejon kichiuas maj okachi tiyolpakikan (Is. 48:17, 18).

14. ¿Toni tikmatiskej keman timomachtiskej Biblia?

¹⁴ Maj timomachtikan Biblia porin tiknekij okachi tikixmatiskej Jiova (Juan 17:3). Ijkon kemej timomachtijtiaskej Biblia, tikixmatiskej ikualneskayouan Jiova. Nejon kualneskayomej moitaj itech itachijchiualis. Kuali tikixmatiskej ikualneskayouan techpaleuis maj tikneltokakan ke Jiova yekmelauj nemi (Éx. 34:6, 7; Sal. 145:8, 9). Ijkon kemej okachi tikixmatiskej Jiova, okachi itech titakuaujtamatiskej, okachi tiktasojtaskej uan okachi kuali iuan timouikaskej.

15. ¿Keniuj techpaleuis komo tikintapouiaj oksekin tein tikneltokaj?

¹⁵ Maj tikintapouikan oksekin tein tikneltokaj. Nejin techpaleuis maj mochikaua totakuaujtamatilis. Sayoj ke ¿toni uelis tikchiuaskej komo se akin tiknojnotsaj amo kineltoka ke nemi Dios uan amo tikmatij toni tikiluiskej? Maj tiktemokan tamachtilis itech toamaixuan uan satepan maj tikuikan keman iuan titajtoskej (1 Ped. 3:15). No uelis tikiluiskej se tokniuj maj techpaleui. Maski taltikpaknenkej kineltokas oso amo tein tiknextiliskej itech Biblia, tejuan semi techpaleuis tein tikajsiskej porin totakuaujtamatilis okachi mochikauas. Nejon techpaleuis maj amo tikneltokakan ke amo moajsi se Tachijchiujkej, kemej kijtouaj akin moita ke kipiaj miak tamatilis oso akin kiselijkej miak tamachtilis.

16. ¿Toni uelis panos komo amo tiksentokaj tikchikauaj totakuaujtamatilis?

¹⁶ Maski uejkaujya oso yankuixtokok peuak tiktekitiliaj Jiova, moneki tiksentokaskej tikchikauaskej totakuaujtamatilis. Komo amo tikchiuaj, amo semi itech titakuaujtamatiskejok Jiova. Maj tikelnamikikan ke titakuaujtamatij itech tein amo tikitaj porin onkak tein kinextia ke yekmelauj onkak oso ke yekmelauj nemi. Sayoj ke tein amo se kiita niman se kielkaua. Yejua ika Pablo kijtoj ke amo se takuaujtamatis yejua “ne tajtakol ten techmekania” (Heb. 12:1). Komo ijkon, ¿toni uelis techpaleuis maj totakuaujtamatilis kisentoka chikauak? (2 Tes. 1:3).

17. ¿Toni techpaleuis maj totakuaujtamatilis kisentoka chikauak?

¹⁷ Yekinika, maj nochipa tiktajtanikan Jiova maj techmaka iyektikatsin espíritu. ¿Keyej? Porin takuaujtamatilis se kualneskayot tein yektikatsin espíritu techpaleuia maj tikpiakan (Gál. 5:22, 23). Komo yektikatsin espíritu amo techpaleuia, amo uelis tikchikauaskej totakuaujtamatilis itech toTachijchiujkauj. Maj tiksentokakan  tiktajtanikan Jiova iyektikatsin espíritu uan yejuatsin techmakas (Luc. 11:13). Uelis tikiluiskej: “Xitechonmajxitili totakuautamatilis kachi ok” (Luc. 17:5).

18. ¿Toni ueyi netetayokolil tikpiaj? (Salmo 1:2, 3).

¹⁸ No moneki nochipa timomachtiskej iTajtol Dios (xikonixtajtolti Salmo 1:2, 3). Keman nejin salmo moijkuiloj, amo onkayaj miak amatajkuilolmej tein kipiaya iTanauatil Dios uan sayoj sekin uelia kipiayaj, kemej tekiuanij uan tiopixkamej. Uan chijchikometika xiuit, “takamej, siuamej, konemej uan akin okseko kayomej”, akin nemiaj Israel, monekia mosentiliskej uan kikakiskej iTanauatil Dios (Deut. 31:10-12). Itech itonaluan Jesús, sayoj sekin kipiayaj amatatetekuinolmej kampa ijkuiliujtoya iTajtol Dios, uan miak nejon amatatetekuinolmej yetoyaj itech sinagogas. Sayoj ke axkan, timiakej tikpiaj Biblia ajsitok oso seki amatajkuilolmej tein kipia. Nejin se ueyi netetayokolil. ¿Keniuj uelis tiknextiskej ke timotasojkamatij porin tikpiaj Biblia?

19. ¿Toni moneki tikchiuaskej tein techpaleuis maj totakuaujtamatilis kisentoka chikauak?

¹⁹ Uelis tiknextiskej ke tiktasojkamatij tikpiaskej iTajtol Dios komo nochipa tikixtajtoltiaj. Moneki ixyetosya kemanian tikixtajtoltiskej uan timomachtiskej Biblia. Maj amo sayoj tikchiuakan keman tikitaskej ke tikpiaj tiempo. Komo nochipa timomachtiaj, totakuaujtamatilis kisentokas chikauak.

20. ¿Toni moneki tikixtaliskej tikchiuaskej?

²⁰ Totakuaujtamatilis tikchikauanij ika tein timomachtianij itech iTajtol Dios, amo kemej “in taixmatini uan in tamachilejke” (Mat. 11:25, 26). Kemej timomachtianij iTajtol Dios tikmatij keyej okachi mochiua tein amo kuali uan keniuj tayektalis Jiova. Yejua ika, maj tikixtalikan tikchikauaskej totakuaujtamatilis uan tikinpaleuiskej nochin akin tiueliskej maj takuaujtamatikan itech toTachijchiujkauj (1 Tim. 2:3, 4). Uan maj tiksentokakan tikchiakan maj ejko tonal keman nochin akin nemiskej nikan taltikpak kiueyichiuaskej Jiova uan kijtoskej tein moajsi itech Apocalipsis 4:11: “Totekotsin Dios, Tejuatsin mitsonnamiki xikselijto nochi ne mouistililis [...]. Porin sayo Tejuatsin tikonchijchiuak nochi ten ongak”.