1. ¿Tlen tikmati itech Jehová?

IJKUAK otikatka titsikitsin, ¿mofamilia yokatka iTlaixpantijka Jehová? Xamo ijkuakon opejki tikixmati. Otimomachti ye kipia kuali iyelis uan kineki tinochtin ma tichantikan nikan tlaltikpak itech se xochitlali (Gén. 1:1; Hech. 17:24-27).

2. ¿Tlen mokuayejyekouaj sekimej ijkuak kitaj oksekimej kineltokaj kajki ikaj tlen otlachijchi?

² Miakej amo kineltokaj kajki toTajtsin Dios noso ye otlachijchi. Miakej tlaneltokaj itech evolución. Sekimej tlen ijkon kineltokaj, okachi miak xiuitl omomachtijkej itech escuela. Xamo kijtouaj ciencia yokiteititi amo melauak tlen kijtoua Biblia uan san akinmej amo ixtlamatkej kineltokaj kajki ikaj tlen otlachijchi.

3. ¿Tleka tisejsej moneki tikchikauaskej totlaneltokilis?

³ Tlen sekimej ixtlamatkej kineltokaj, uelis kichiuas ayakmo ma tikneltokakan Jehová nochi okichijchi. Tla amo tiknekij ijkon ma techpano moneki tikitaskej tleka tikneltokaj ye otlachijchi. ¿Titlaneltokaj porque otechiluijkej ijkon ma tikchiuakan? (1 Cor. 3:12-15). Maski yitikpiaj miak xiuitl tiktekichiuilijtokej Jehová noso amo, moneki timochijchikauaskej para okachi titlaneltokaskej itech Jehová. Tla ijkon tikchiuaj, amo tikkauaskej ma techkajkayauakan “ika tlamachtílisteh non amitla impati” tlen kijtouaj amo kineltokaj tlen kijtoua Biblia (Col. 2:8; Heb. 11:6). Para amo techkajkayauaskej itech nin tlamachtil tikitaskej (1) ¿Tleka miakej amo tlaneltokaj kajki ikaj tlen nochi okichijchi? (2) ¿Tlen techpaleuis okachi ma tikneltokakan Jehová nochi okichijchi? uan (3) ¿Ken nochipa tikpiaskej chikauak totlaneltokilis?

4. Ijkon ken kijtoua Hebreos 11:1, ¿tlen kijtosneki titlaneltokaskej?

⁴ Sekimej kijtouaj tla titlaneltokaj itech itlaj, kijtosneki san titlaneltokaj maski amitlaj kiteititia tleka titlaneltokaj. Pero Biblia amo ijkon kijtoua (xiktlajtolti Hebreos 11:1). Ompa kiyekijtoua uelis titlaneltokaskej maski amo tikitaj Jehová, Jesús uan iTekiuajkayo Jehová porque onka miak tlamantli tlen kiteititia melauak katej. Ik non, maski amo ueli tikinmitaj tejuan titlaneltokaj (Heb. 11:3). Se bioquímico tlen omochi iTlaixpantijka Jehová okijto: “TiiTlaixpantijkauan Jehová achto yotikitakej melauak kajki tlen tikneltokaj pero noijki tikneltokaj tlen omomachtijkej ixtlamatkej uan kiteititia melauak”.

5. ¿Tleka miakej amo kineltokaj toTajtsin Dios otlachijchi?

⁵ ¿Tleka miakej amo kineltokaj toTajtsin Dios otlachijchi, tla onka miak tlamantli tlen ijkon kiteititia? Porque miakej amo momachtiaj tlen kiteititia ijkon opanok. Se tokni tlen motokayotia Robert okijto: “Itech escuela amo otechmachtijkej toTajtsin Dios otlachijchi, ik non, amo onitlaneltokaya. Ijkuak onikpiaya 22 xiuitl onimotlapoui iuan iTlaixpantijkauan Jehová, yejuan onechititijkej ika Biblia uan ika okseki tlamantli ikaj otlachijchi”. * (Xikita recuadro “ Tetajmej xikmatikan nin”).

6. ¿Tleka miakej kineltokaj ikaj otlachijchi?

⁶ Sekimej amo kineltokaj kox ikaj otlachijchi porque kijtouaj san tlen kitaj non  kineltokaj. Pero kineltokaj tlen amo ueli kitaj. Tlaneltokaj itech gravedad tlen “maya se amo kita” (Heb. 11:1). Moneki timochijchikauaskej timomachtiskej tla tiknekij tikmatiskej non melauak pero miakej amo kinekij momachtiskej, ik non, kineltokaj amo kajki toTajtsin Dios.

7. ¿Nochtin akinmej omomachtijkej itech escuela amo kineltokaj toTajtsin Dios nochi otlachijchi?

⁷ Ixtlamatkej yokitakej onka miak tlamantli tlen kiteititia toTajtsin Dios otlachijchi. * Ijkon ken tokni Robert tlen itech yotimotlapouijkej itech párrafo 5, xamo sekimej omokuayejyekojkej amikaj otlachijchi porque amo ijkon okinmachtijkej itech universidad. Miakej ixtlamatkej okixmatkej Jehová uan opejkej  kitlasojtlaj. Ijkon ken yejuan moneki okachi titlaneltokaskej itech toTajtsin Dios, maski miak xiuitl otimomachtijkej escuela noso amo. Uan amikaj uelis ijkon kichiuas topatka.

8, 9. (1) ¿Tlen tlajtlanilistli tikitaskej? (2) ¿Ken techpaleuis tla okachi timomachtiskej tlen toTajtsin Dios okichijchi?

⁸ ¿Ken uelis okachi titlaneltokaskej ikaj otlachijchi? Ma tikitakan naui tlamantli tlen techpaleuis.

⁹ Ma timomachtikan tlen toTajtsin Dios okichijchi. Tla kuali tikinmitaj yolkamej, xochitl uan sitlalimej, okachi tikneltokaskej toTajtsin Dios nochi okichijchi (Sal. 19:1; Is. 40:26). Moneki okachi ma timomachtikan porque non techpaleuis ma tikneltokakan Jehová otlachijchi. Itech amatlajkuilolmej kiyekijtouaj ken okichijchi tlen onka. Ik non, maski oui tikajsikamatiskej ma tiktlajtoltikan tlen ompa kijtoua uan ma tikilnamiktokan tlen ompa otimomachtijkej. Noijki itech jw.org uelis tikinmitaskej videos kanin mota tlen toTajtsin Dios okichijchi. Nonmej videos okiskej itech ueyi nechikol regional.

10. Xikijto tlen kiteititia toTajtsin Dios otlachijchi.

¹⁰ Ijkuak tikitaskej tlen techmachtia tlen toTajtsin Dios okichijchi, ma tikitakan ken kipia iyelis (xiktlajtolti Romanos 1:20). Ma tikitakan ken techmachtia. Tonaltsin amo san kitlauilia tlaltikpak uan kichiua ma tlatotonia para nochi tlen onka ma yolto, noijki kitemaka rayos ultravioleta tlen uelis techkojkos. Ik non, ¿tlen uelis techmaluis? Tlaltikpak kipia itlaj tlen kitokayotiaj ozono. Yetoskia ken se escudo tlen techmaluia para amo techtlatis tonaltsin uan uelis timokokoskej. Ijkuak okachi momiaktilia rayos ultravioleta noijki okachi momiaktilia ozono. Non techititia melauak kajki toTajtsin Dios akin nochi okichijchi uan techtlasojtla.

11. ¿Tlen techpaleuis okachi ma tikneltokakan toTajtsin Dios otlachijchi? (Xikita recuadro “ Amatlajkuilolmej tlen techpaleuiaj okachi ma titlaneltokakan”).

¹¹ Tla titlatemouaj itech amatlajkuilol Tlen ika momachtiaj iTlaixpantijkauan Jehová uan itech jw.org, techpaleuis okachi ma titlaneltokakan toTajtsin Dios otlachijchi. Uelis tikinmitaskej tlamachtilmej uan videos tlen amo ueyi tlen katej itech sección “¿Lo diseñó alguien?” uan kiyekijtouaj ken chijchitokej yolkamej uan xiuitl. Ompa noijki kijtoua ken ixtlamatkej kinekij kichiuaskej seki tlamantli ijkon ken chijchitok tlen yoltok.

12. ¿Tlen tlamantli moneki kuali tikitaskej ijkuak timomachtiaj Biblia?

¹² Ma timomachtikan Biblia. Bioquímico tlen itech otimotlapouijkej itech párrafo 4 okijto achto amo otlaneltokaya toTajtsin Dios otlachijchi pero satepan kema otlaneltokak. Ye okijto: “Amo nitlaneltoka san porque onimomachti miak tlamantli, nitlaneltoka porque noijki onimomachti tlen kijtoua Biblia”. Xamo tejuan yitikmatij tlen kijtoua Biblia pero ok moneki timomachtijtoskej para okachi tikneltokaskej toTajtsin Dios otlachijchi (Jos. 1:8; Sal. 119:97). Xikita ken kiyekijtoua Biblia tlen opanok, profecías uan ken kuali mouika nochi tlen ompa ijkuilitok. Non kichiuas okachi ma tikneltokakan toTajtsin Dios okichi ma tiyoltokan, ye ixtlamatki, techtlasojtla uan okichi ma kijkuilokan  tlen kajki itech Biblia (2 Tim. 3:14; 2 Ped. 1:21). *

13. Xikijto tleka ueli techpaleuia iTlajtol toTajtsin Dios.

¹³ Ijkuak timomachtiaj Biblia. Ma tikitakan ken uelis techpaleuis, yiuejkika ompa ijkuilitok akinmej kinekij kipiaskej miak tomin “kimotetemiliah intlaijyowilis” (1 Tim. 6:9, 10; Prov. 28:20; Mat. 6:24). ¿Ok techpaleuia tlen ompa kijtoua? Kema. Se amochtli tlen kiteititia miakej ken kipiaj inyelis, kijtoua: “Miakej tlen kitemouaj kipiaskej okachi miak tlamantli, okachi amo yolpakij uan moyolkokouaj. Noijki akinmej san mokuayejyekouaj kinekij kipiaskej miak tomin, noijki amo yolpakij, san moyolkokojtokej uan noijki okachi mokokouaj”. Ik non, kuali technejmachtia tlen kijtoua Biblia amo ma tiknekikan tikpiaskej miak tomin. ¿Tikinmilnamikij okseki principios bíblicos tlen yotechpaleuijkej? Tla tikchiuaj tlen kijtoua Biblia, okachi tikneltokaskej uan tikchiuaskej tlen Jehová nochipa techiluijtos (Sant. 1:5). Uan ijkon tiyolpakiskej (Is. 48:17, 18).

14. ¿Tlen tikmatij itech Jehová ijkuak timomachtiaj Biblia?

¹⁴ Ma timomachtikan uan ijkon okachi ma tikixmatikan Jehová (Juan 17:3). Ijkuak timomachtijtiaskej tikitaskej ken iyelis Jehová uan ken kiteititia non itech nochi tlen okichijchi. Non techpaleuis okachi ma tikneltokakan ye melauak kajki (Éx. 34:6, 7; Sal. 145:8, 9). Ijkuak okachi tikixmatiskej Jehová okachi itech titlaneltokaskej, tiktlasojtlaskej uan okachi kuali iuan timouikaskej.

15. ¿Ken techpaleuis tla tikintlapouiaj oksekimej titlaneltokaj itech toTajtsin Dios?

¹⁵ Ma tikintlapouikan oksekimej kajki toTajtsin Dios. Non kichiuas okachi ma titlaneltokakan. Pero ¿tlen uelis tikchiuaskej tla amo tikmatij ken tiknankiliskej ikaj tlen techtlajtlania kox melauak kajki toTajtsin Dios? Ma timomachtikan tlen kijtouaj amatlajkuilolmej uan tlen kijtoua Biblia uan non ma tikititikan akin otechtlajtlani (1 Ped. 3:15). Noijki uelis tikiluiskej se tokni tlen yikipia miak xiuitl kitechiuilia Jehová ma techpaleui. Tla akin tiktlapouiaj maski kikaki tlen kijtoua Biblia noso amo, tejuan techpaleuia tlen otimomachtijkej porque okachi titlaneltokaskej itech Jehová. Ijkon amo tikinneltokiliskej akinmej kijtouaj amikaj otechchijchi.

16. ¿Tlen panos tla timochijchikauaj okachi titlaneltokaj itech Jehová?

¹⁶ Maski yimiak xiuitl tiktekichiuilijtokej Jehová noso amo. Moneki okachi itech titlaneltokaskej uan nochipa ijkon ma tikchiuakan. Porque tla amo ijkon tikchiuaskej ayakmo titlaneltokaskej. Ma tikilnamikikan titlaneltokaj kijtosneki tikneltokaj itlaj tlen amo mota. Uan tlen amo tikitaj san niman tikilkauaj. Ik non, apóstol Pablo okijto akin amo tlaneltoka se “tlajtlákoli” uan yetoskia ken ‘kijilpia’ (Heb. 12:1). Ik non, ¿tlen uelis tikchiuaskej para okachi titlaneltokaskej? (2 Tes. 1:3).

17. ¿Tlen techpaleuis okachi ma titlaneltokakan?

¹⁷ Achto, nochipa ma tikiluikan Jehová ma techmaka iespíritu santo. Porque  san iespíritu santo Jehová techpaleuia ma titlaneltokakan (Gál. 5:22, 23). Tla amo techpaleuis, amo uelis titlaneltokaskej itech toTajtsin Dios (Luc. 11:13). Ik non, uelis tikiluiskej: “Xikmiakili totlaneltokalis” (Luc. 17:5).

18. Ijkon ken kijtoua Salmo 1:2, 3, ¿tlen tetliokolil tikpiaj?

¹⁸ Noijki ma timomachtikan iTlajtol toTajtsin Dios (xiktlajtolti Salmo 1:2, 3). Ijkuak okijkuilojkej non salmo san sekimej israelitas okipiayaj nochi itlanauatil toTajtsin Dios. Pero tekiuajkej uan teopixkej kema omonekiaya kipiaskiaj copias. Ijkuak oajsiaya chikome xiuitl, tlakamej, siuamej, konemej uan tlen amo okatkaj israelitas omonechikouayaj uan okikakiayaj iTlajtol toTajtsin Dios (Deut. 31:10-12). Ijkuak okatka Jesús amo miakej okinpiayaj rollos kanin ijkuilitok iTlajtol toTajtsin Dios porque san okatkaj itech sinagogas. Pero axkan miakej tikpiaj Biblia ajsitok noso san tlajko. ¿Ken uelis tikteititiskej tikpatioitaj tikpiaj non tetliokolil?

19. ¿Tlen moneki tikchiuaskej tla tiknekij nochipa titlaneltokaskej?

¹⁹ Tikteititiskej tikpatioitaj iTlajtol toTajtsin Dios tla nochipa tiktlajtoltiaj. Ik non, moneki timochijchikauaskej timajxiliskej timomachtiskej. Tla nochipa timomachtiskej nochipa titlaneltokaskej.

20. ¿Tlen moneki tikchiuaskej?

²⁰ Tlen tikneltokaj kajki itech iTlajtol toTajtsin Dios, amo ken ixtlamatkej uan akinmej miak xiuitl omomachtijkej escuela (Mat. 11:25, 26). Ijkuak timomachtiaj tlen kijtoua Biblia tikmatij tleka panotok tlen amo kuali uan tlen kichiuas Jehová. Ik non, ma timochijchikauakan okachi ma titlaneltokakan uan ma tikinpaleuikan oksekimej noijki ma tlaneltokakan itech akin otlachijchi (1 Tim. 2:3, 4). Uan ma tikchixtokan ijkuak nochtin akinmej nikan tichantij tikueyichiuaskej Jehová uan tikijtoskej tlen kijtoua Apocalipsis 4:11: “Toteko Dios, sanwel Tejwatsi moaxka n weyílistli [...]. Porke Tejwatsi otikchijchi nochi tlan onka”.