1. Makajijiswenyi ngo pamusoro po Musiki wedu?

KUDARI makarehwa ngo vabari vari Zvapupu zva Jehovha, kangaije makajija ngo pamusoro pa Jehovha pomainga mudoko. Makajijiswa kuti iyena ndi Musiki, ano mugariro jakanaka, ndiyenazve anoda kuti nyika ino ive paradhiso.—Genesi 1:1; Mabasa o Vapostori 17:24-27.

2. Vandhu vamweni vanovona kudini vaya vanotenda kuti Musiki ariyo?

² Vandhu vazinji avatendi kuti Mwari ariyo kana kuti ndiyena wakasika zviro zvese. Kusiyapo izvo, ivona vanotenda kuti upenyu wakatanga wega, perapo wocinja padoko ngo padoko kuvha pa ciro cinopona cicikanesi kwenda pa ciro cinonesa. Vandhu vamweni vanotendaro izvi, vakajija maningi. Ivona vanotonanga kuti siensia yakavonesa pambhene kuti Bhaibheri rakaposeka. Cimwenizve, ivona vanonanga kuti vandhu vanotenda Musiki avazivi kujija, avazivi ciro kana kuti avanesi kucengejwa.

3. Ngenyi zvinosisira maningi kuti muvangise mwega rutendo hwenyu?

³ Waro mavonero anonangwari ngo vandhu vakajijari maningi, anozungunyisa kutenda komunoita kuti Jehovha ndiyena Musiki wedu? Izvi zvinofira maningi pa kuti ngenyi tinotenda kuti Jehovha ndiyena Musiki. Tinotenda ngokuti takavhunjwa kuti titende zvondhozvo kana kuti takatora mukuvo kuti tijije tega zvinovonesaro? (1 VaKorinte 3:12-15) Azvinenyi kuti taano makore mangana tiri Zvapupu zva Jehovha, tese tinodikana kwenderera mberi tecivangisa rutendo hwedu. Tikaita kudaro, atizocengejwi ngo ‘ungwaru hwo nyika no ucengeji hwabiresi’ unojijiswa no vandhu vanohwisana no Soko ra Mwari. (Vakorose 2:8; Vahebheru 11:6) Kuti tibesereke, musoro uwu unozobhuya (1) ngenyi tinotenda kuti Musiki ariyo,  (2) tingavangisa kudini rutendo hwedu kuna Jehovha, Musiki wedu i (3) tingaendereresa kudini mberi tecivangisa rutendo hwedu.

4. Mukuzwirana no Vahebheru 11:1, rutendo hwokadi wakacijikira pacinyi?

⁴ Vandhu vamweni vanorangarira kuti rutendo i kutenda ciro pacina cinokhohwesa. Asi mukuzwirana no Bhaibheri, uwo asipi rutendo hwokadi. (Verenganyi Vahebheru 11:1.) Vonanyi kuti kutenda zvicikavoneki zvakadari inga Jehovha, Jesu, Umambo hwo kudenga, kwakacijikira pa zvitatijo zvinokhohwesa. (Vahebheru 11:3) Sientista umweni wakazova Capupu ca Jehovha, wakati: “Zvinotendwa ngo Zvapupu zva Jehovha pano pozvakacijikira. Izvona zvinotendavo zvinonangwa ngo siensia.”

5. Ngenyi vandhu vazinji vanotenda kuti upenyu hwakatanga ucizivi kusikwa?

⁵ Mungajivhunjisa kudari: ‘Waro ngenyi vandhu vanotenda kuti Mwari aazivi kusika zviro zvese zvinopona, kuveni zviripo zvinovonesa kuti iyena wakazvisika?’ Vamweni avazivi kupsaka vega zvinovakhohwesaro. Robert, wari waacapupu ca Jehovha, wakati: “Zvecivoneka kuti kushikora andizivi kujijiswa ngo pamusoro po kusikwa ko zviro, ndairangarira kuti azvicaengepi izvona kuti zviro zvakasikwa. Izvi wari azvicaengepi izvona, mbhera pondakava no makumaviri o makore pondakabhuya no Zvapupu zva Jehovha. Ndojija kuti Bhaibheri rinopa mathangwe aushoni anovonesa kuti Mwari ngaakasika zviro zvese.” *—Vonanyi bhokiso rinoti: “ Masoko Anosirira ku Vabari.”

6. Ngenyi vandhu vamweni vanoramba kuti Mwari ariyo?

 ⁶ Vandhu vamweni vanonanga kuti avatendi kuti Musiki ariyo ngokuti vanonanga kuti ivona vanotenda zviro zvavanovona basi. Asi ivona vanotenda zviro zvovacikavoni. Inga muezaniso, vanotenda kuti simba rinokwevera zviro pasi ririyodi. Ngokuti vanazvo zvinovonesa kuti irona ririyo. Mukhaindi wo rutendo hunonangwa mu Bhaibheri, unobatanija kutenda zvivoniso zvimweni “zvicikavoneki kuti ndizvonadi.” (Vahebheru 11:1) Zvinoda mukuvo no simba kuti tijije tega zvikhombijo izvi. Vandhu vazinji avadi kuvangisira kuti vaite jijo iyi wari. Mundhu acikadi kujija zvikhombijo izvi wari naari ega, angaguma pa mbhejiso yo kuti Mwari aako.

7. Kunanga kuti vandhu vese vakajija maningi vanoramba kuti Mwari ndiyena wakasika nyezuru no pasi? Durujiranyi.

⁷ Pasure po kujija zvikhombijo izvi, masientista amweni akakhohwa kuti Mwari ngaakasika  nyezuru no pasi. * Inga ndi Robert wanangwaya pakutanga, vamweni vainanga havo kuti akuna Musiki ngokuti ku univhersidhadhi avacaijijiswa kuti zviro zvakaitwa ngo kusikwa. Asi masientista mazinji akaguma pa kuziva Jehovha no kumuda. Inga zvinoitikari no masientista aya, itusu tese tinodikana kuvangisa kutenda kwatinoita Mwari. Azvinenyi dangani takajija maningi kana kuti haiwa. Akuna mundhu angatiitira zviro izvi.

8-9. (a) Muvhunjo wapi watinozodavira? (b) Munozobesereka kudini ngo kujija ngo pamusoro po zvakasikwa?

⁸ Mungaengejeresa kudini kutenda komunoita kuti Musiki ariyo? Ngativone njira murongomuna.

⁹ Jijanyi ngo pamusoro po zvakasikwa. Mungavangisa rutendo hwenyu kuti Mwari ariyo ngo kusota zvinyama, mamiti no ndhondho. (Nduyo 19:2; Isaia 40:26) Mukajija maningi zviro izvi, kukhohwa kwenyu kuti Jehovha ndiyena Musiki kunoengejekavo maningi. Mabhuku edu kazinji anoviisa musoro jinodurujira masoko mazinji ngo pamusoro po kusikwa ko zviro. Mucaphuka musoro iji, pikija mecijivona inga jinonesa kuzwisisa. Jijanyi zvamunokwanisaro. Mucakanganwa kwenda kosota mu saiti yedu jw.org, mavhidhiyo anodakajisa akavoneswa pa magungano edu o mutundhu pa makore aperari.

10. Ipanyi muezaniso unovonesa kuti ariyo Musiki. (Varoma 1:20)

¹⁰ Pamunojija zviro zvakasikwa, nasanyi kusotesesa zviro zvinokhohwesa kuti Musiki ariyo. (Verenganyi Varoma 1:20.) Inga muezaniso, imwimwi munoziva kuti zuva rinopisa no kuvhenekera zvinodiwaya kuti pasi pano pave no zviro zvinopona. Asi kupisa kumweni ko zuva kunokhuvaza. Itusu vandhu tinoda kujivirihwa pa kupisa uku. Zvokadi itusu takatojivirihwa. Kuitisa kudini? Kuno kamadha yo gajhi, inodanijwa kuti kamadha yo ozono, yakatendeneja nyika yese kuti itijivirire pa zuva iri rinokhuvazari. Kupisa uku kunokhuvazari pakunoengejera, kamadha yo gajhi iyi inoengejeravo. Izvi wari zvinotikhohwesa kuti ariyo Musiki ano ungwaru ari kuitisari izvi. Iyena anotida.

11. Mungawanisa kudini masoko anovangisa rutendo ngo pamusoro po kuti zviro zvakaitwa kusikwa? (Vonanyi bhokiso rinoti: “ Masoko Anovangisa Rutendo.”)

¹¹ Mungawana masoko mazinji anovonesa kuti zviro zvakaitwa kusikwa ngo kupsaka mu Índice das Publicações da Torre de Vigia no mu jw.org. Mungatanga ngo kupsaka musoro no mavhidhiyo ari pasi po musoro unoti: “Zvakangoitika Zvega Here?” Musoro iji jinoviisa masoko akafupika ngo pamusoro po zvinyama no zvisikwa zvimweni. Musoro iji jinazve muezaniso jo kuti masientista akaejesa kudini kutevejera zviro zvakasikwa.

12. Patinojija Bhaibheri ngozvapi zvatinodikana kusotesesa?

¹² Jijanyi Bhaibheri. Sientista wanangwaya pakutanga aacaitenda kuti Musiki ariyo. Asi pa kufamba ko nguva iyena wakaguma pa kutenda kuti Musiki ariyodi. Iyena wakati: “Kutenda kwangu akucijikiri pa zvandakajija mu siensia. Asi kunocijikira pa kunasa kujija Bhaibheri kondakaita.” Kangaije imwimwi maakuziva kare zvinojijisa Bhaibheri. Pikija zvakadaro, kuti muvangise kutenda kwenyu kuti Musiki ariyo munodikana kwenderera mberi mecijija Soko ra Mwari. (Joxwa 1:8; Nduyo 119:97) Inga muezaniso, rangariranyi  ngo pamusoro po kunasa kusanangura kunoita Bhaibheri zvakaitika kare. Rangariranyizve ngo pamusoro po zviro zvese zvakanangwa ngo Bhaibheri kuti zvaizoitika no kuzwirana ko zvakatahwa ngo vatari vo Bhaibheri. Mukaita kudaro, munozovangisa kutenda kwenyu kuti kuna Musiki ano rudo no wakangwara wakatiita, ndiyena wakafemera Bhaibheri. *—2 Timoti 3:14; 2 Pedhru 1:21.

13. Muezaniso wapi unovonesa uzivi unowanika mu Soko ra Mwari?

¹³ Pamunojija Bhaibheri vonanyi manera amungabesereka ngo mazano aro. Inga muezaniso, irona rakangwaja kare kamare kuti kudisisa mare kunokhuvaza no kuviisa “matambujiko mazinji.” (1 Timoti 6:9, 10; Mazwi Akangwara 28:20; Mateu 6:24) Kunanga kuti ngwajo iyi icishanda wari uno? Bhuku rimweni rinobhuya ngo pamusoro po mukuvo wedu uno, rakati: “Kazinji, vandhu vanotenda kuti kuva no mare yakawanda kunosisira maningi mu upenyu hwavo, avazivi kudakara i vakasuruvara maningi. Atee vandhu vondhovo vanazve zvineso zvizinji mu upenyu hwavo.” Ngwajo yo Bhaibheri ngo pamusoro po kudisisa mare, inobesera maningi kamare. Kunanga kuti makakwanisa kuvona manera omakabesereka ngo kushandisa ndhungamiriro jo Bhaibheri mu upenyu hwenyu? Pamunorangarira ngo pamusoro po ngwajo jaushoni jiri mu Bhaibheri, munozovona kuti Musiki wedu ano rudo anoziva zvaushoni kwatiri. Cimwenizve, mazano aanotipa nguva jese aushoni kamare. (Jakobo 1:5) Inga muviyo, upenyu hwedu hunozodakajisa maningi.—Isaia 48:17, 18.

14. Ngozvapi zvamunozoziva pamunojija Bhaibheri?

¹⁴ Jijanyi Bhaibheri no cido co kuda kuziva ushoni Jehovha. (Johani 17:3) Imwimwi munozoziva ngo pamusoro po undhu hwa Jehovha no mugariro jake. Mugariro iji ndijona jondhojo no jomunojija, pamunojija ngo pamusoro po zvakasikwa. Kujija ngo pamusoro po mugariro ja Jehovha, kunozomukhohwesa kuti iyena ariyodi kamare. (Exodo 34:6, 7; Nduyo 145:8, 9) Pamunonasa kuziva Jehovha, kutenda kwamunomuita kunoengejeka, kuda komunomuita kunoengejeka i ushamwari hwenyu naye hunovanga maningi.

15. Munozobesereka kudini ngo kuvhunja vamweni zvamunotenda?

¹⁵ Vhunjanyi vamweni ngo zvamunotenda ngo pamusoro pa Mwari. Mukaita kudaro, rutendo hwenyu hunovanga maningi. Maizoitenyi kudari ari wese wamunocumaera akamuitira muvhunjo wo kuti Mwari ariyo nokuti aako, imwimwi motama kuziva kuti maizomudavirisa kudini? Psakanyi kuwana mupinguro unovha mu Bhaibheri unodavira muvhunjo wondhowo mu amwe o mabhuku edu, perapo mozomuvhunja mundhuwo. (1 Pedhru 3:15) Mungakumbira kuti hama imweni imubese kudavira muvhunjoo. Azvinenyi dangani mundhuwo anotenda kana kuti haiwa. Imwimwi munozobesereka ngo kupsakisisa komaitaya. Rutendo hwenyu hunozovanga maningi. Inga muviyo, imwimwi amuzotendi zvinonangwa ngo vandhu vanovoneka inga kuti vakangwara kana vakajija maningi, vanonangaya kuti akuna Musiki.

16. Ngozvapi zvingaitika kudari tikatama kugara tecivangisa rutendo hwedu?

¹⁶ Azvinenyi kuti tiri kushandira Jehovha ko mukuvo wakadini, tinodikana kwenderera mberi tecivangisa rutendo hwedu. Ngenyi? Ngokuti tikatama kungwarira, rutendo hwedu hunoremba. Inga zvotavona, rutendo hunocijikira  pa zviro zvaticikavoni. Itusu atinganesehwi kukanganwa zviro zvaticikavoni. Mupostori Pauro wakadanija kutama rutendo kuti “cishaishi cinotisunga ngo kukasika.” (Vahebheru 12:1) Waro tingaitenyi kuti rutendo hwedu ugare hwakavanga?—2 Vatesaronika 1:3.

17. Zvicinyi zvinotibesera kuti tigare no rutendo hwakavanga?

¹⁷ Cokutanga, deketeranyi Jehovha kuti amupe mujimu mucena wake, momukumbira kazinji. Ngenyi? Ngokuti rutendo ndi mugariro watinobesehwa ngo mujimu mucena kuti tive nawo. (Vagaratiya 5:22, 23) Itusu atingavi no rutendo hwakavanga ku Musiki wedu, ticikabeswi ngo mujimu mucena. Kudari tikaenderera mberi tecikumbira Jehovha kuti atipe mujimu mucena wake, iyena anozotipa. (Ruka 11:13) Tingatokumbirazve kudari: “Engejeranyi rutendo hwedu.”—Ruka 17:5.

18. Mukuzwirana na Nduyo 1:2, 3, cipo capi co mutengo mukuru cotingava naco wari?

¹⁸ Cocipiri, jijanyi mukuvo wese Soko ra Mwari mwega. (Verenganyi Nduyo 1:2, 3.) Poyakatahwa nduyo iyi Vaiziraeri vashoma vainga no Mutemo wese wa Mwari wakaita kutahwa. Asi majimambo no vapiri ndivona vaiuwana. Paindokwana kuita makore manomwe, kwaiitwa nasiriro yo kuti vanarume, vanakaji, vana no vandhu vaivha mu nyika jimweni vaigara Iziraeri, vazwe kuverengwa ko Mutemo wa Mwari. (Deuteronòmio 31:10-12) Mu njiku ja Jesu, muphukutu jo Matahwa jaiwanika basi no vandhu vanganani mu sinagoga. Mukusiyana, nyamasi uno vandhu vazinji vangawana Soko ra Mwari rese ramutero kana divi raro. Irona i cipo co mutengo mukuru maningi. Tingatatijisa kudini kuti tiri kubonga ngo Bhaibheri?

19. Tinodikana kuitenyi kuti tive no rutendo hwakavanga?

¹⁹ Tingatatija kubonga kwedu ngo kuva no Soko ra Mwari, ngo kuriverenga mukuvo wese. Tinodikana kuita urongwa wo kuverenga Bhaibheri, kuciripi kuriverenga patinowana weya mukuvo. Tikabatisisa urongwa uhu, tinozova no rutendo hwakavanga.

20. Tinodikana kutema civaringo co kuitenyi?

²⁰ Mukusiyana no “vazivi no vakangwara” vo nyika ino, itusu tina rutendo hwakacijikira mu Soko ra Mwari. (Mateu 11:25, 26) Inga muviyo wo kujija kwedu Bhaibheri, itusu tinoziva kuti ngenyi mugariro wo nyika ino wakashata. Tinozivazve kuti Jehovha anozoitenyi. Ngokudaro, ngatiteme civaringo co kuvangisa rutendo hwedu no kubesera vamweni kuti vatende kuti kuno Musiki. (1 Timoti 2:3, 4) Ngatienderere mberi tecivetera mukuvo watinozosimba Jehovha ngo masoko ari pa Apokaripsi 4:11, okuti: “Imwimwi Jehovha Mwari wedu, munofanera kureremejwa . . . ngokuti makasika zviro zvese.”