1. O rutilwe’ng ka Mmopi?

GE E BA o godišitšwe ke Dihlatse tša Jehofa, o ka ba o ile wa ithuta ka Jehofa go tloga o sa le yo monyenyane. Le gona o ithutile gore ke Mmopi wa dilo ka moka, o na le dika tše dibotse le gore o nyaka gore batho ba tle ba phele paradeiseng.—Gen. 1:1; Dit. 17:24-27.

2. Batho ba bangwe ba nagana’ng ka batho bao ba dumelago gore go na le Mmopi?

² Batho ba bantši ga ba dumele gore Modimo o gona le gore o bopile dilo ka moka. Go e na le moo ba dumela gore dilo tše di phelago di itirile gomme ganyenyane-ganyenyane dilo tšeo tša fetoga diphedi tše dingwe tše dintši tša mehutahuta. Le gona ba bangwe ba batho bao ba bolelago dilo tše, ba rutegile kudu. Ba ka ba ba bolela gore saense e hlatsetše gore Beibele e bolela maaka le gore batho bao ba dumelago gore go na le Mmopi ga se ba rutega goba ga ba bohlale le gore ba forega gabonolo.

3. Ke ka baka la’ng go le bohlokwa go matlafatša tumelo ya rena?

³ Na dilo tšeo di bolelwago ke borasaense di tla dira gore re belaele ge e ba Jehofa e le Mmopi wa rena yo a re ratago? Karabo ya potšišo ye e ithekgile ka gore ke ka baka la eng re dumela gore Jehofa ke Mmopi wa rena. Na ke ka gobane re ile ra no botšwa gore re dumele seo goba ke ka gobane re ile ra ipha nako ya go ithuta bohlatse bja gore ka nnete Mmopi o gona? (1 Bakor. 3:12-15) Ka moka ga rena re swanetše go dula re matlafatša tumelo ya rena, go sa šetšwe gore re na le nako e kaakang re le Dihlatse tša Jehofa. Ge re ka dira seo, re ka se arošwe ke “filosofi le bofora bja lefeela” bjoo bo rutwago ke batho bao ba bolelago gore Beibele e bolela maaka. (Bakol. 2:8; Baheb. 11:6) Sehlogo se se tla re thuša go matlafatša tumelo ya rena ka go araba dipotšišo tše di latelago. (1) Ke ka baka la’ng batho ba bantši ba sa dumele gore Mmopi o gona? (2) O ka dira eng gore o be le tumelo  ya gore Jehofa ke Mmopi wa gago? (3) O ka dira eng gore o dule o na le tumelo e tiilego?

4. Go ya ka Baheberu 11:1, tumelo ya nnete e theilwe go eng?

⁴ Batho ba bangwe ba re go ba le tumelo ke go dumela go dilo tšeo go se nago bohlatse bja gore di gona. Eupša go ya ka Beibele, seo ga se tumelo ya nnete. (Bala Baheberu 11:1.) Beibele e re hlalosetša gore tumelo ya nnete e theilwe go bohlatse bjoo bo lego gona. Ka mohlala, le ge re sa kgone go bona Jehofa le Jesu re na le bohlatse bja gore ba gona. Le gona, le ge re sa kgone go bona Mmušo wo o bušago legodimong, eupša re na le bohlatse bja gore o gona. (Baheb. 11:3) Ngwanabo rena yo mongwe yoo e lego rasaense o re: “Tumelo ya rena e ithekgile ka dilo tšeo re nago le bohlatse bja gore di gona. E bile ga re hlokomologe seo saense e se bolelago.”

5. Ke ka baka la’ng batho ba bantši ba dumela gore dilo di itirile?

⁵ Re ka ipotšiša gore: ‘Ge e ba go na le bohlatse bja gore Mmopi o gona, ke ka baka la’ng batho ba bantši ba dumela gore Modimo ga se yena a bopilego dilo?’ Batho ba bangwe ga se ba ka ba inyakela bohlatse bja taba ye ka bobona. Robert yoo gona bjale e lego yo mongwe wa Dihlatse tša Jehofa o re: “Ka ge sekolong re be re sa rutwe ka tlholo, ke be ke no nagana gore ga se nnete gore Modimo ke yena a bopilego dilo. Ke thomile go ithuta Beibele le Dihlatse tša Jehofa ge ke be ke na le mengwaga e 22, gomme ka ithuta gore Beibele e re nea mabaka a kwagalago a go dumela gore Modimo ke yena a bopilego dilo ka moka.” *—Bona lepokisi leo le  rego “ Molaetša o Bohlokwa Woo Batswadi ba Swanetšego go o Tseba.”

6. Ke ka baka la’ng batho ba bangwe ba nagana gore Mmopi ga a gona?

⁶ Batho ba bangwe ga ba dumele gore Mmopi o gona ka gobane ba re ba dumela feela go dilo tšeo ba kgonago go di bona. Eupša ge e le gabotse ba dumela go dilo tšeo ba sa kgonego go di bona. Ka mohlala, ba dumela gore moya o gona ka ge ba na le bohlatse bja seo. Tumelo yeo go bolelwago ka yona ka Beibeleng e akaretša bohlatse bjo bo lego molaleng bja “dilo tša kgonthe tšeo di sa bonwego.” (Baheb. 11:1) Go nyakega nako le maiteko gore motho a be le bohlatse bja gore Mmopi o gona. Le gona batho ba bantši ga ba nyake go dira maiteko ao. Motho yoo a sa itirelego nyakišišo a ka phetha ka gore Modimo ga a gona.

7. Na ke batho ka moka ba go rutega bao ba sa dumelego gore Modimo o bopile dilo ka moka? Hlalosa.

⁷ Ka morago ga gore borasaense ba bantši ba ithute gore Modimo ke yena a bopilego dilo ka  moka ba ile ba tshepa gore o gona. * Go no swana le Robert yoo re boletšego ka yena pejana, batho ba bangwe ba ka nagana gore ga go na Mmopi ka gobane ba sa nka ba ithuta ka taba ye yunibesithi. Eupša borasaense ba bantši ba ile ba feleletša ba tseba Jehofa le go mo rata. Go no swana le ge borasaense ba ba ile ba ithuta ka Modimo gomme ba ba le tumelo go yena, le rena re swanetše go ba le tumelo e tiilego go Modimo go sa šetšwe gore re rutegile goba ga se ra rutega. Ga go na motho yo a ka re direlago seo.

8-9. (a) Ga bjale re tlo boledišana ka potšišo efe? (b) Go ithuta ka tlholo go tla go hola bjang?

⁸ O ka dira’ng gore o be le tumelo ya gore Mmopi o gona? A re lebeleleng ditsela tše nne.

⁹ Ithute ka tlholo. O ka ba le tumelo ya gore Mmopi o gona ka go lebeledišiša diphoofolo, dimela le dinaledi. (Ps. 19:1; Jes. 40:26) Ge o ipha nako ya go ithuta ka dilo tše, o tla kgodišega gore Jehofa ke Mmopi. Gantši dikgatišo tša rena di na le dihlogo tšeo di bolelago ka tlholo. O se ke wa beela dihlogo tše ka thoko ge o bona eka o tlo thatafalelwa ke go di kwešiša. Ithute dilo tše dintši kamoo o ka kgonago ka gona. Le gona o se ke wa lebala go bogela dibidio tše di kgahlišago tšeo di bolelago ka tlholo wepesaeteng ya rena ya jw.org/nso. Dibidio tšeo re di bogetše dikopanong tša selete tšeo di sa tšwago go feta.

10. Nea mohlala wo o bontšhago gore Mmopi o gona. (Baroma 1:20)

¹⁰ Ge o ithuta ka tlholo, hlokomela dilo tše bohlokwa tšeo o ithutago ka tšona tšeo di bontšhago gore Mmopi o gona. (Bala Baroma 1:20.) Ka mohlala, o ka ba o tseba gore go bohlokwa gore re hwetše phišo yeo e tšwago letšatšing. Eupša go na le mahlasedi a kotsi ao a tšwago go lona. Re hloka go šireletšwa mahlaseding ao. Nnete ke gore re šireleditšwe! Bjang? Lefase la rena le apareditšwe ke moya wo o thibelago mahlasedi ao gore a se ke a re gobatša. Eupša ge mahlasedi ao a tšwago letšatšing e e ba a mantši, le moya woo o šireleditšego lefase o a oketšega. Na dilo tše ga di dire gore o dumele gore go na le Mmopi yo a re ratago le yo bohlale?

11. O ka hwetša kae ditaba tša mabapi le tlholo tšeo di ka tiišago tumelo ya gago? (Bona lepokisi leo le rego, “ Dilo tše Dingwe Tšeo di ka go Thušago Gore o Tiiše Tumelo ya Gago go Mmopi.”)

¹¹ O ka hwetša ditaba tše dintši tša mabapi le tlholo tšeo di ka tiišago tumelo ya gago ka pukung ya Tlhahlo ya go Dira Nyakišišo ya Dihlatse tša Jehofa le ka go dira nyakišišo wepesaeteng ya jw.org/nso. Mohlomongwe o ka thoma ka go bala dihlogo le go bogela dibidio tšeo di lego karolong yeo e rego “Na di Hlamilwe?” Ke tše dikopana e bile di re botša bonyenyane ka diphoofolo le ka dilo tše dingwe tšeo Modimo a di bopilego. Le gona di re nea mehlala ya dilo tša tlhago tšeo borasaense ba lekilego go di ekiša.

12. Ke dilo dife tšeo re swanetšego go nagana ka tšona ge re ithuta Beibele?

¹² Ithute Beibele. Rasaense yo re boletšego ka yena pejana, mathomong o be a sa dumele gore Mmopi o gona. Eupša ge nako e dutše e eya, o ile a thoma go ba le tumelo. O re: “Tumelo ya ka e be e sa thewa feela dilong tšeo ke ithutilego tšona dithutong tša saense, e be e theilwe le go seo ke ilego ka ithuta sona ka mo go tseneletšego ka Beibeleng.” Mohlomongwe o šetše o tseba seo Beibele e se rutago. Eupša o swanetše go tšwela pele o ithuta Beibele e le gore o kgone go tiiša tumelo ya gago ya gore Mmopi o gona. (Josh. 1:8; Ps. 119:97) Ka mohlala,  nagana kamoo Beibele e nepagetšego ka gona ge e bolela ka dilo tšeo di diragetšego kgale. Le gona nagana ka diporofeto tše dintši tša ka Beibeleng tšeo di ilego tša phethagala le kamoo dilo tšeo bangwadi ba Beibele ba di ngwadilego di dumelelanago ka gona. Go dira seo go tla matlafatša tumelo ya gago ya gore Mmopi yo bohlale le yo a re ratago ke yena a go bopilego le gore ke yena a dirilego gore Beibele e ngwalwe. *—2 Tim. 3:14; 2 Pet. 1:21.

13. Ke keletšo efe e nngwe e botse yeo re e hwetšago ka Beibeleng?

¹³ Ge o ithuta Beibele, bona kamoo e nago le dikeletšo tše dibotse ka gona. Ka mohlala, ke kgale Beibele e boletše gore go rata tšhelete go kotsi le gore go baka “mahloko a mantši.” (1 Tim. 6:9, 10; Die. 28:20; Mat. 6:24) Na seo e sa le nnete? Puku e nngwe yeo e bolelago ka tsela yeo batho ba itshwarago ka yona lehono e re: “Batho bao ba ratago dilo tše dintši ga se ba thaba e bile ba gateletšegile. Le gona batho bao ba nyakago go ba le tšhelete e ntši ba phela ba na le stress e bile gantši ba a babja.” Ruri Beibele e re neile keletšo e botse ya gore re se ke ra rata tšhelete! Na o ka nagana ka melao ya motheo e mengwe ya ka Beibeleng yeo e kilego ya go thuša? Ge re dula re leboga keletšo yeo e lego ka Beibeleng, re tlo bona gore Mmopi wa rena o a re rata e bile re tlo ithekga ka yena le go feta. (Jak. 1:5) Mafelelong bophelo bja rena bo tlo re thabiša kudu.—Jes. 48:17, 18.

14. Go ithuta Beibele go tlo go ruta’ng ka Jehofa?

¹⁴ Ithute Beibele ka gobane o nyaka go tseba Jehofa gakaone. (Joh. 17:3) Ge o dutše o ithuta Beibele o tla tseba Jehofa gabotse le go tseba dika tša gagwe le go bona gore dika tšeo di swana le tšeo o di bonego ge o be o ithuta ka tlholo. Dika tšeo di tla go thuša go bona gore Jehofa ke Modimo wa nnete. (Ek. 34:6, 7; Ps. 145:8, 9) Ge o dutše o tseba Jehofa gabotse, o tla ba le tumelo e tiilego go yena, wa mo rata kudu e bile o tlo ba le segwera se sebotse le yena.

15. O tla holega bjang ge o botša ba bangwe ka tumelo ya gago?

¹⁵ Botša ba bangwe ka seo o se dumelago ka Modimo. Ge o dira seo, tumelo ya gago e tlo matlafala. Eupša o tlo dira eng ge e ba motho yoo o bolelago le yena a re Modimo ga a gona gomme o sa tsebe gore o mo arabe bjang? Leka go hwetša karabo yeo e theilwego ka Mangwalong ka dikgatišong tša rena gore o tle o kgone go araba motho yoo. (1 Pet. 3:15) Le gona o ka kgopela Mokriste yo mongwe gore a go thuše. Go sa šetšwe gore motho yoo o bolelago le yena o tla dumelelana le karabo ya gago yeo e theilwego ka Beibeleng goba a ka se dumelelane le yona, wena o tla ba o holegile ka go dira nyakišišo. Tumelo ya gago e tlo tia. Ka baka leo, o ka se no dumela gabonolo maaka a batho bao ba ipotšago gore ba bohlale goba bao ba rutegilego bao ba rego ga go na Mmopi.

16. Go ka direga’ng ge e ba re sa dule re tiiša tumelo ya rena?

¹⁶ Re swanetše go dula re tiiša tumelo ya rena go Jehofa go sa šetšwe gore re thomile go mo hlankela neng. Ka baka la’ng? Ka gobane ge e ba re sa hlokomele, tumelo ya rena e ka fokola. Gopola gore tumelo e akaretša go dumela go dilo tša kgonthe tšeo re sa kgonego go di bona. Dilo tšeo re sa kgonego go di bona go ka ba bonolo gore re di lebale. Ka baka leo, Paulo o itše go se be le tumelo ke “sebe seo se re tatetšago gabonolo.” (Baheb. 12:1) Re ka dira eng gore tumelo ya rena e dule e tiile?—2 Bathes. 1:3.

17. Re ka thušwa ke’ng gore re dule re na le tumelo e tiilego?

¹⁷ Sa pele, dula o kgopela Jehofa gore a go fe  moya o mokgethwa. Ka baka la’ng? Ka gobane moya o mokgethwa o re thuša gore re be le tumelo. (Bagal. 5:22, 23) Ga go kgonege gore re dule re na le tumelo go Mmopi wa rena ge e ba re sa kgopele moya wa gagwe o mokgethwa gore o re thuše. Ge e ba re dula re kgopela Jehofa moya wa gagwe o mokgethwa o tlo re nea wona. (Luka 11:13) Le gona ge re rapela re ka kgopela Jehofa gore: “Re nee tumelo e oketšegilego.”—Luka 17:5.

18. Go ya ka Psalme 1:2, 3, re na le tokelo efe?

¹⁸ Sa bobedi, dula o ithuta Beibele ka mehla. (Bala Psalme 1:2, 3.) Ge mantšu ao a lego Psalmeng ye a be a ngwalwa, ke Baisiraele ba sego kae feela bao ba bego ba na le kopi e feletšego ya Molao wa Modimo. Eupša dikgoši le baperisita ba be ba na le dikopi tša bona, gomme ka morago ga mengwaga e mengwe le e mengwe e šupago ba be ba kgoboketša “banna, basadi, bana” le badiiledi gore ba tlo theetša ge Molao wa Modimo o balwa. (Doit. 31:10-12) Mehleng ya Jesu, ke batho ba sego kae feela bao ba bego ba na le dikopi tša Mangwalo gomme tše dingwe di be di bewa disinagogeng. Eupša lehono batho ba bantši ba na le Beibele e feletšego goba dikarolo tša yona. Yeo ke tokelo e kgolo kudu. Re ka bontšha bjang gore re leboga gore re na le Beibele?

19. Re swanetše go dira’ng gore tumelo ya rena e dule e tiile?

¹⁹ Re ka bontšha gore re leboga tokelo ya go ba le Beibele ka go e bala ka mehla. Ga se ra swanela go ithuta Beibele ge feela re ikwa eka re na le nako. Eupša re swanetše go dula re ithuta Beibele ka mehla e le gore re tiiše tumelo ya rena.

20. Re swanetše go ikemišetša go dira’ng?

²⁰ Rena re fapana le batho “ba bohlale le ba tlhaologanyo” ba lefase, ka gobane re na le tumelo yeo e theilwego Lentšung la Modimo. (Mat. 11:25, 26) Ka baka la ge re ithuta Beibele, re a tseba gore ke ka baka la eng mo lefaseng go direga dilo tše mpe le gore Jehofa o tlo dira eng ka dilo tšeo. Ka gona, a re ikemišetšeng go ba le tumelo e tiilego go Mmopi wa rena le go thuša ba bantši kamoo re ka kgonago gore ba be le tumelo go yena. (1 Tim. 2:3, 4) A re duleng re letile nako yeo ka yona batho ka moka ba tlago go reta Jehofa ka go bolela mantšu ao a lego go Kutollo 4:11, ao a rego: “Wena Jehofa Modimo wa rena o swanelwa ke go amogela letago . . . gobane o bopile dilo ka moka.”