EKICWEKA EKY’OKWEGA 32
Yongyera Kwikiririza omu Muhangi
‘Okwikiriza nikwo kurikutumanyisiza kimwe ebitarikureebwa.’—HEB. 11:1.
EKYESHONGORO 11 Ebyahangirwe Nibihimbisa Ruhanga
EBIRAAGAMBWEHO *
1. Okeegyesibwa bintu ki ebirikukwata aha Muhangi?
KU ORAABE waakuriire omu ka y’Abajurizi ba Yehova, obundi okeega ebirikukwata ahari Yehova okiri omwereere. Okeegyesibwa ngu n’Omuhangi, aine emitwarize mirungi, kandi ngu ainiire abantu ekigyendererwa kya rukundo.—Kut. 1:1; Byak. 17:24-27.
2. Abamwe nibareeba bata abarikwikiririza omu Muhangi?
2 Kwonka abantu baingi, tibarikwikiriza ngu Ruhanga ahariho, kandi ngu niwe Muhangi. Kureka, nibaikiriza ngu ebiine amagara bikatandika kubaho ahabwa butandu, kandi ngu akantu kakye niko kaarugiremu ebiine amagara eby’amaani. Bamwe aha bantu aba beegire munonga. Nibagira ngu saayansi eyorekire obuhame ngu Baibuli egwire, kandi ngu okwikiririza omu Muhangi n’okw’abantu abateegire, abataine bwengye, kandi aboorobi kubeihabeiha.
3. Ahabw’enki ni kikuru kwombeka okwikiriza kwaitu?
3 Ebirikugambwa abantu bamwe abeegire munonga shi nibiija kutuubya okwikiriza kwaitu tubure kureeba Yehova nk’Omuhangi waitu owa rukundo? Eki nikiija kurugiirira munonga aha nshonga ahabw’enki nitwikiriza ngu Yehova niwe Muhangi. Mbwenu shi n’ahabw’okugira ngu ekyo nikyo turikugambirwa kwikiriza, nari tubaasize kutunga obwire bw’okweshwijumira obuhame? (1 Kor. 3:12-15) Yaaba tumazire bwire ki turi Abajurizi ba Yehova, twena twine kugumizamu nitwombeka okwikiriza kwaitu. Twakora tutyo, titurikwija kuhabisibwa “obwengye bw’abantu n’oburyarya obutaine mugasho” oburikwegyesibwa abarikuhakanisa Ekigambo kya Ruhanga. (Kol. 2:8; Heb. 11:6) Ekicweka eki nikiza kutuhwera kushwijuma (1) ahabw’enki baingi nibaikiririza omu Muhangi, (2) oku orikubaasa kwombeka okwikiriza kwawe omuri Yehova, Omuhangi waitu, (3) n’oku orikubaasa kuhamya okwikiriza okwo.
ENSHONGA ERIKUREETERA BAINGI KUTAIKIRIRIZA OMU MUHANGI
4. Kurugiirira aha Abaheburaayo 11:1, okwikiriza okwabuzima nikwegamira ahari ki?
4 Abamwe nibateekateeka ngu okugira okwikiriza nikimanyisa okufa agaikiriza ekintu otaine buhame. Kwonka kurugiirira ahari Baibuli, okwo ti kwikiriza okwabuzima. (Shoma Abaheburaayo 11:1.) Yetegyereze ngu okwikiririza omu bintu ebyabuzima, kwonka ebitarikureebwa nka Yehova, Yesu, n’Obukama bw’omu iguru, nikyegamira aha buhame obuhikire. (Heb. 11:3) Omujurizi wa Yehova omwe orikucondooza aha bihangirwe naakigambaho ati: “Okwikiriza kwaitu ti kwikiririza eryo turikwehuzya obuhame bwa saayansi.”
5. Ahabw’enki abantu baingi nibaikiriza ngu ebiine amagara bikabaho hatariho Muhangi?
5 Nitubaasa kwebuuza buti: ‘Obuhame ku buraabe nibworeka gye ngu hariho Omuhangi, ahabw’enki abantu baingi batarikwikiriza ngu niwe yaahangire ebiine amagara?’ Abamwe tibakateerahoga kweshwijumira obuhame. Robert, hati ori omwe aha Bajurizi ba Yehova, naagira ati: “Ahabw’okugira ngu okuhanga kukaba kutarikugambwaho aha ishomero, nkaba ninteekateeka ngu kugwire. Obu naabaire nyine emyaka nka 20 nibwo naagaaniiraho n’Abajurizi ba Yehova, reero nkeega enshonga nungi omu Baibuli ezirikworeka ngu Ruhanga niwe yaahangire byona.” *—Reeba akabokusi “ Okwehanangiriza Abazaire.”
6. Ahabw’enki abamwe nibanga kwikiririza omu Muhangi?
6 Abamwe tibarikwiririza omu Muhangi ahakuba nibagira ngu nibaikiririza omu bi barikureeba. Kwonka buzima nibaikiririza omu bintu ebitarikureebwa, nk’amaani agarikugarura ebintu ahansi. Okwikiriza okurikugambwaho omu Baibuli nikutwariramu obuhame ‘oburikutumanyisiza kimwe ebitarikureebwa.’ (Heb. 11:1) Nikitwara obwire n’amaani kweshwijumira obuhame, kandi abantu baingi tibaine mujinya gw’okukora omurimo ogu. Omuntu otarikusherura obuhame naabaasa kugira ngu tihariho Ruhanga.
7. Abeegire boona shi tibarikwikiriza ngu Ruhanga niwe yaahangire ebintu? Shoboorora.
7 Abanyasaayansi abamwe bwanyima y’okushwijuma obuhame, babaasize kwikiriza ngu Ruhanga niwe yaahangire ebintu byona. * Nka Robert, owaagambwaho aha ruguru, abamwe nibabaasa kuba baabaire nibateekateeka ngu tihariho Muhangi ahabw’okugira ngu aha yunivasite tibarikwegyesa aha kuhanga. Kwonka, abanyasaayansi baingi babaasize kumanya Yehova n’okumukunda. Nk’oku abanyasaayansi abo baakozire, twena twine kwombeka okwikiriza kwaitu omuri Ruhanga, n’obu twakuba twine obwegyese burikwingana ki. Tihaine ondiijo orikubaasa kutukorera eki.
OKU ORIKUBAASA KWONGYERA KWIKIRIRIZA OMU MUHANGI
8-9. (a) Nituza kugarukamu kibuuzo ki? (b) Okwega aha kuhanga nikiija kukugasira kita?
8 Noobaasa kwombeka ota okwikiriza kwawe omu Muhangi? Ka tureebe emiringo ena.
9 Okwetegyereza ebihangirwe. Noobaasa kwombeka okwikiriza kwawe omu Muhangi orikwetegyereza enyamaishwa, ebimera, n’enyonyoozi. (Zab. 19:1; Isa. 40:26) Oku orikwongyera kwetegyereza ebintu ebi, nikwo orikwija kwongyera kuhamya ngu Yehova niwe Muhangi. Ebitabo byaitu nibikira kushoboorora bingi ebirikukwata aha byahangirwe. Otakaatiina kushoma ebicweka ebi n’obu byakuba nibikugumira kubyetegyereza. Yegamu ebi orikubaasa kwetegyereza. Kandi oteebwa kushwijuma ebiri aha mukura gwaitu, jw.org, na vidiyo nungi ezirikukwata aha kuhanga ezaayorekirwe aha nteerane zaitu empango!
10. Ha eky’okureeberaho kworeka ngu ebyahangirwe nibihamya ngu hariho Omuhangi. (Abarooma 1:20)
10 Waaba nooyetegyereza ebyahangirwe, fayo munonga aha ki birikukwegyesa aha Muhangi waitu. (Shoma Abarooma 1:20.) Nk’eky’okureeberaho, noobaasa kuba noomanya ngu eizooba ryaitu oyihireho okutuha obutagatsi n’ekyererezi ebirikubaisaho amagara, nirishohoza n’amaranzi ag’akabi. Itwe abantu twine kurindwa kutahikwaho amaranzi ago. Kandi kwo buzima turinzirwe! Tuta shi? Ensi yaitu eine omwanya aha gati yaayo ogurimu emyika erikucencura amaranzi ago ag’akabi ekagazibira kutuhikaho. Amaranzi g’eizooba aga ag’akabi ku garikweyongyera amaani, n’emyika y’omu mwanya erikugaremesa nayo neeyeyongyera kukanya. Torikwikiriza shi ngu hariho Omuhangi w’obwengye na rukundo owaakozire eki?
11. Ni nkahi ahu orikubaasa kwiha ebirikuhamya okwikiriza kwawe omu Muhangi? (Reeba akabokusi “ Ebiraakuhwere Kwongyera Kwikiririza omu Muhangi.”)
11 Noobaasa kutunga bingi ebirikuhamya okwikiriza kwawe orikuza omu Watch Tower Publications Index n’okucondooza aha jw.org. Noobaasa kwenda kutandika orikushwijuma vidiyo n’ebicweka ebiri ahansi y’omutwe “Kikahangwa?” Ebi n’ebicweka bigufu kandi nibiha obuhame bw’amaani bukye aha nyamaishwa n’ebyahangirwe ebindi. Birimu n’eby’okureeberaho ebirikworeka oku abanyasaayansi barikuteeraho kutooreza ebi barikureeba omu byahangirwe.
12. Twaba nitwega Baibuli, ni bintu ki ebimwe ebi twine kwetegyereza?
12 Yega Baibuli. Orikucondooza aha byahangirwe owaaba yaagambirweho, akaba atarikwikiriza ngu hariho Omuhangi. Kwonka bwanyima y’obwire, akaija yaikiriza. Naagira ati: “Tindagizire okwikiriza ahabw’ebi naayegire omu saayansi byonka. Beitu okwikiriza kwangye kukaba nikwegamira n’aha kwega Baibuli n’obwegyendesereza.” Shana obundi oine okumanya okuhikire okurikukwata aha nyegyesa za Baibuli. Kwonka, kubaasa kwikiririza omu Muhangi, oine kugumizamu nooyega Ekigambo kye. (Yos. 1:8; Zab. 119:97) Teeraho kwetegyereza oku Baibuli arikushoboorora aha byabaireho omu byafaayo. Ta omutima aha bunabi bwayo n’oku ebirimu birikuhikaana. Waakora otyo nooyongyera kwombeka okwikiriza kwawe omu Muhangi waitu omunyabwengye, n’omu Baibuli ei yaahandiikiise. *—2 Tim. 3:14; 2 Pet. 1:21.
13. Ni ky’okureeberaho ki kimwe eky’obwengye ekirikushangwa omu Kigambo kya Ruhanga?
13 Waaba nooyega Ekigambo kya Ruhanga, teeraho kwetegyereza oku obuhabuzi bwayo burikuhwera. Nk’eky’okureeberaho, Baibuli ekarabura kare ngu okukunda esente n’eky’akabi, kandi ngu nikureeta “n’enaku nyingi.” (1 Tim. 6:9, 10; Enf. 28:20; Mat. 6:24) Mbwenu shi okurabura oku nikukikora? Ekitabo Narcissism Epidemic nikigira kiti: “Okutwarira hamwe, abantu abarikukunda eby’obugaiga baine okushemererwa kukye n’amaganya. Nangwa n’abantu abaine ekigyendererwa ky’okugira esente nyingi nibagira endwara z’emitwe, kandi nibaba baine n’amagara mabi.” Ka n’eky’obwengye Baibuli kuturabura aha kukunda sente! Noobaasa kwijuka emisingye endiijo omu Baibuli ekubeereire ey’omugasho? Oku turikwongyera kwetegyereza obuhabuzi bwa Baibuli, nikwo turikwongyera kwesiga obwengye obu Omuhangi waitu arikutuha, oburikukora obwire bwona. (Yak. 1:5) N’ekiraarugyemu, nitwija kwongyera kwesiimira amagara.—Isa. 48:17, 18.
14. Okwega Baibuli nikukuhwera kumanya ki ahari Yehova?
14 Yega oine ekigyendererwa kihikire, eky’okumanya Yehova. (Yoh. 17:3) Waaba nooyega Ebyahandiikirwe, noija kwega aha mitwarize ya Yehova, kandi emitwarize egyo niyo orikubaasa n’okureebera omu byahangirwe. Emitwarize egi n’ey’omuntu owaabuzima atari ou turikuteebereza ngu ariho kyonka. (Kut. 34:6, 7; Zab. 145:8, 9) Waaguma nooyongyera kumanya gye Yehova, okwikiriza kwawe omuriwe nikwija kwongyera kuhama, noija kwongyera kumukunda, kandi omukago gwawe nawe nigwija kwongyera kuhama.
15. Noija kugasirwa ota waagambira abandi aha bi orikwikiriza?
15 Gambira abandi aha kwikiriza kwawe. Waakikora, okwikiriza kwawe nikwija kweyongyera. Kandi shi ku waakubuurira omuntu akabuuza aha kubaho kwa Ruhanga, kandi otarikumanya oku oraamugarukyemu? Teeraho kutunga eky’okugarukamu ky’ekibuuzo ekyo omu kimwe aha bitabo byaitu, reero okigaaniireho nawe. (1 Pet. 3:15) Noobaasa n’okushaba ow’eishe-emwe mugyenzi waawe orikumanya kushoboorora gye enshonga egi kukuhwera. Yaaba omuntu ogwo aikiriza eky’okugarukamu kuruga omu Baibuli nari ayanga, noija kugasirwa ahabw’okucondooza. Kandi okwikiriza kwawe nikwija kwongyera kuhama. N’ekiraarugyemu, okwikiriza kwawe tikurikwija kutuuba ahabw’okugira ngu abantu abarikureebeka nk’abanyabwengye nibagira ngu tihariho Muhangi.
HAMYA OKWIKIRIZA KWAWE!
16. Niki ekirikubaasa kubaho twaba tutagumiizemu twine okwikiriza kandi turikukuhamya?
16 N’obu twakuba tumazire obwire burikwingana ki turikuheereza Yehova, twine kugumizamu nitumwikiririzamu kandi turikuhamya okwikiriza okwo. Ahabw’enki? Ahakuba twaba tutegyendesereize, okwikiriza kwaitu nikubaasa kutuuba. Ijuka ngu, nikutwariramu okugira obuhame aha bintu ebitarikureebwa. Ebintu ebi tutarikureeba, nitubaasa kurahuka kubyebwa. N’ahabw’ekyo, okutagira okwikiriza Paulo akakweta ‘ekibi ekitwezingiriire.’ (Heb. 12:1) Mbwenu shi nitubaasa kwetantara tuta omutego ogwo?—2 Tes. 1:3.
17. Niki ekirikubaasa kutuhwera kwongyera kuhamya okwikiriza kwaitu?
17 Okubanza, yeshengyereze Yehova kukuha omwoyo gurikwera, kandi kikore obutoosha. Ahabw’enki? Ahakuba okwikiriza n’omutwarize gw’omwoyo gurikwera. (Gal. 5:22, 23) Titurikubaasa kwikiririza omu Muhangi kandi tukaguma twine okwikiriza okwo, twaba tutaine obuhwezi bw’omwoyo gurikwera. Twaguma nitushaba Yehova omwoyo gurikwera, naija kugutuha. (Luk. 11:13) Omu muringo gwa butunu, nitubaasa kushaba ‘kwongyerwaho okwikiriza.’—Luk. 17:5.
18. Kurugiirira ahari Zaaburi 1:2, 3, twine mugisha ki ogw’omuhendo hati?
18 Kandi, hamira aha ntebeekanisa yaawe y’okwega Ekigambo kya Ruhanga. (Shoma Zaaburi 1:2, 3.) Obu zaaburi egyo yaahandiikwa, n’Abaisraeli bakye abaabaire baine ekitabo ky’Ebiragiro ebihandiikirwe. Kwonka, omugabe n’abanyamurwa bakaba nibabaasa kutunga ebiragiro ebihandiikirwe, kandi buri myaka mushanju, entebeekanisa zikaba zikorwa kugira ngu “abashaija n’abakazi n’abaana, n’abashuhuuki” omuri Israeli baahurikize Ekigambo kya Ruhanga kirikushomwa. (Bir. 31:10-12) Omu bwire bwa Yesu, emizingo y’Ebyahandiikirwe ekaba einwe abantu bakye omuri sinagogi. Okutaana n’ekyo, obunaku obu abantu abarikukira obwingi nibabaasa kutunga bimwe aha bitabo by’Ekigambo kya Ruhanga nari byona. Ogwo n’omugisha gw’omuhendo. Nitubaasa kworeka tuta ngu nitusiima omugisha ogwo?
19. Twine kukora ki kubaasa kuguma twine okwikiriza kuhami?
19 Nitubaasa kworeka ngu nitusiima omugisha gw’okugira Ekigambo kya Ruhanga turikukishoma obutoosha. Titushemereire kweyegyesa obu twine obwire bwonka, kureka twine kutaho entebeekanisa y’okuguma nitwega tutarikwosha. Twahamira aha ntebeekanisa yaitu ey’okwega butoosha, nitubaasa kuhamya okwikiriza kwaitu.
20. Tushemereire kumariirira kukora ki?
20 Okutashushana ‘n’abanyabwengye n’abarikwetegyereza’ ab’ensi egi, twine okwikiriza kuhami okurikwegamira aha Kigambo kya Ruhanga. (Mat. 11:25, 26) Ahabw’okwega ekitabo eki ekirikwera, nitumanya ahabw’enki embeera omu nsi nizongyera kusiisikara, n’eki Yehova arikwija kukora. N’ahabw’ekyo ka tumariirire kuhamya okwikiriza kwaitu, kandi tuhwere baingi nk’oku kirikubaasika kwikiririza omu Muhangi waitu. (1 Tim. 2:3, 4) Kandi ka tugumizemu twiniire ekihika obwire obu abantu boona omu nsi baraagambe ebigambo ebiri omu Okushuuruurwa 4:11, ebirikugira ngu Yehova ‘Ruhanga waitu, oshemereire kuhimbisibwa, ahabw’okuba niiwe waahangire byona.’
EKYESHONGORO 2 Yehova Niryo Eiziina Ryawe
^ kacw. 5 Ebyahandiikirwe nibyegyesa butunu ngu Ruhanga niwe Muhangi waitu. Kwonka ekyo abantu baingi tibarikukiikiriza. Nibangisiriza ngu ebiine amagara bikabaho byonka. Ebi barikugamba tibirikwija kutureetera kutuubya obwesigye bwaitu twakora n’amaani kwongyera kwikiririza omuri Ruhanga na Baibuli. Ekicweka eki nikiza kushoboorora oku ekyo turikubaasa kukikora.
^ kacw. 5 Omu mashomero maingi, abashomesa tibarikwegyesa na kakye aha bukomooko bwaitu. Abashomesa abamwe nibagira ngu eki nikibaasa kuteganisa obugabe bw’omwegi obw’okucwamu ediini ei arikwenda kuzamu.
^ kacw. 7 Ebyagambirwe abahangu n’abanyasaayansi abarikwiririza omu kuhanga abarengire 60, nibibaasa kushangwa omu Watch Tower Publications Index. Ahansi y’omutwe “Saayansi,” omutwe omukye “abanyasaayansi nibooreka ngu nibaikiririza omu kuhanga.” Nibibaasa n’okushangwa omu Katabo k’Okucondooza ak’Abajurizi ba Yehova. Ahansi y’omutwe “Okutunguuka omu bya Saayansi,” reero oze aha “‘Okubuuzibwa’ (ebicweka bya Awake!).”
^ kacw. 12 Nk’eky’okureeberaho, reeba ekicweka “Saayansi Neikirizana n’Ebiri omu Baibuli?” omu Awake! eya Febwari 2011 n’ekicweka “Ebi Yehova Arikugamba Nibihikiirira” omu Watchtower eya Jenwari 1, 2008.
