1. Сфӕлдисӕджы тыххӕй цы зоныс?

КӔД рӕстдзинад дӕ гыццылӕй фӕстӕмӕ зоныс, уӕд дӕ ныййарджытӕй базыдтай, алцыдӕр Йегъовӕ кӕй сфӕлдыста. Стӕй базыдтай йӕ диссаджы миниуджыты тыххӕй ӕмӕ йӕм адӕмы тыххӕй цы фӕнд ис, уый (Райд. 1:1; Хъуыд. 17:24–27).

2. Хуыцауыл чи ӕууӕнды, уыдоны тыххӕй иуӕй-иутӕ цы хъуыды кӕнынц?

² Фӕлӕ бирӕтӕ не ’ууӕндынц, алцыдӕр Хуыцау кӕй сфӕлдыста кӕнӕ Хуыцау уӕвгӕ кӕй ис, ууыл. Сӕ хъуыдымӕ гӕсгӕ, цард йӕхигъӕдӕй фӕзынд ӕмӕ, дам, вазыгджын царды формӕтӕ гыццылгай равзӕрдысты хуымӕтӕг царды формӕтӕй. Афтӕ чи фӕдзуры, уыдонӕй бирӕтӕ сты ахуыргонд адӕм. Уыдон фӕзӕгъынц, зӕгъгӕ, дам, наукӕ сбӕлвырд кодта, Библийы цы фыст ис, уый ӕцӕг кӕй нӕу ӕмӕ, дам, Хуыцауыл чи ӕууӕнды, уыдон сты ӕнахуыргонд, талынг ӕмӕ ӕнцонсайӕн адӕм.

3. Ахсджиаг цӕмӕн у нӕ уырнындзинад фидар кӕнын?

³ Цымӕ ахуыргӕндты ныхӕсты тыххӕй дызӕрдыг кӕнын райдайдзыстӕм, Йегъовӕ уарзӕгой Сфӕлдисӕг кӕй у, ууыл? Уый кӕнгӕ уыдзӕн, ууыл цӕмӕн ӕууӕндӕм, уымӕй. Йегъовӕ Сфӕлдисӕг кӕй у, ууыл уый тыххӕй ӕууӕндӕм, ӕмӕ нын уый чидӕр загъта? Ӕви рӕстӕг рахицӕн кодтам ӕмӕ нӕхӕдӕг бӕлвырдгӕнӕнтӕ раиртӕстам? (1 Кор. 3:12–15). Уӕлдай нӕу, Йегъовӕйӕн рагӕй лӕггад кӕнӕм ӕви йын ӕрӕджы райдыдтам лӕггад кӕнын,– не ’ппӕты дӕр хъӕуы дарддӕр нӕ уырнындзинад фидар кӕнын. Ӕмӕ нӕ уӕд, Библийыл чи не ’ууӕнды, уыдон сӕ «зондджын ныхӕстӕй ӕмӕ хинӕйбыд, афтид ахуырӕдтӕй» нӕ асайдзысты (Кол. 2:8; Дзут. 11:6). Ацы статьяйы аныхас кӕндзыстӕм ацы фарстатыл: 1) Бирӕты цӕуылнӕ уырны, Сфӕлдисӕг кӕй ис, уый? 2) Нӕ бон цы у аразын, цӕмӕй, Йегъовӕ Сфӕлдисӕг кӕй у, ууыл фидарӕй баууӕндӕм? 3) Нӕ бон цы у аразын, цӕмӕй нӕ уырнындзинад ма ӕрлӕмӕгъ уа?

4. Дзуттӕгтӕм 11:1 стихмӕ гӕсгӕ, ӕцӕг уырнындзинад цы у?

⁴ Иуӕй-иутӕм афтӕ кӕсы, ӕмӕ цӕмӕй кӕуылдӕр кӕнӕ цӕуылдӕр ӕууӕндай, уымӕн бӕлвырдгӕнӕнтӕ нӕ хъӕуы. Фӕлӕ Библимӕ гӕсгӕ, уый ӕцӕг уырнындзинад нӕу. (Бакӕс Дзуттӕгтӕм 11:1.) Библи ӕмбарын кӕны, ӕцӕг уырнындзинадӕн фидар бындур кӕй хъуамӕ уа. Кӕд Йегъовӕйы, Йесойы ӕмӕ Хуыцауы Паддзахад нӕ бон цӕстӕй фенын нӕу, уӕддӕр фидар бӕлвырдгӕнӕнты фӕрцы зонӕм, уыдон ӕцӕгдӕр кӕй сты (Дзут. 11:3). Йегъовӕйы Ӕвдисӕн чи сси, иу ахӕм ахуыргонд загъта: «Мах Хуыцауыл куырмӕджы не ’ууӕндӕм ӕмӕ, наукӕ кӕй сбӕлвырд кодта, уыцы хабӕрттӕм уӕлӕнгай цӕстӕй нӕ кӕсӕм».

5. Бирӕтӕ афтӕ цӕмӕн хъуыды кӕнынц, ӕмӕ цард йӕхигъӕдӕй фӕзынд?

⁵ Кӕд, Сфӕлдисӕг кӕй ис, уымӕн фидар бӕлвырдгӕнӕнтӕ ис, уӕд бирӕтӕ ууыл цӕуылнӕ ӕууӕндынц? Уыдон бӕлвырдгӕнӕнтӕ нӕ раиртӕстой. Роберт у Йегъовӕйы Ӕвдисӕн. Уый зӕгъы: «Алцыдӕр Хуыцау кӕй сфӕлдыста, уый мӕ нӕ уырныдта, уымӕн ӕмӕ нын уый скъолайы никуы амыдтой. Фӕлӕ стӕй базонгӕ дӕн Йегъовӕйы Ӕвдисӕнтимӕ, ӕмӕ мын уыдон Библийӕ бӕлвырдгӕнӕнтӕ ӕрхастой, Сфӕлдисӕг кӕй ис, уымӕн. Уӕд мыл цыди 22 азы» *. (Кӕс рамкӕ « Ныййарджытӕн».)

6. Сфӕлдисӕг кӕй ис, ууыл бирӕтӕ ноджыдӕр цӕуылнӕ ӕууӕндынц?

⁶ Бирӕтӕ Сфӕлдисӕгыл не ’ууӕндынц, цӕстӕй йӕ фенӕн кӕй нӕй, уый тыххӕй. Фӕзӕгъынц, зӕгъгӕ, дам, цы нӕ федтон, уый мӕ куыд хъуамӕ уырна. Фӕлӕ уӕддӕр, цӕстӕй  цы нӕй фенӕн, уыдӕттӕй цӕуылдӕрты ӕууӕндынц. Зӕгъӕм, уырны сӕ, дымгӕ кӕй ис, кӕд ӕй нӕ уынынц, уӕддӕр. Библимӕ гӕсгӕ, уырнындзинад уый у, ӕмӕ адӕймаг «бӕлвырдгӕнӕнты фӕрцы куы зона, цӕстӕй цы нӕ уыны, уыдон ӕцӕгдӕр кӕй сты» (Дзут. 11:1). Ӕмӕ цӕмӕй адӕймаг бӕлвырдгӕнӕнтӕ раиртаса, уымӕн ӕй фӕхъӕуы рӕстӕг рахицӕн кӕнын. Фӕлӕ бирӕты нӕ фӕфӕнды уый аразын. Ӕмӕ, бӕлвырдгӕнӕнтӕ чи нӕ раиртасы, уый, гӕнӕн ис, ахӕм хъуыдымӕ ӕрцӕуа, ӕмӕ Хуыцау нӕй.

7. Дун-дуне Хуыцау кӕй сфӕлдыста, ууыл ахуыргӕндтӕ се ’ппӕт не ’ууӕндынц? Бамбарын ӕй кӕн.

⁷ Дун-дуне Хуыцау кӕй сфӕлдыста, уый ахуыргӕндтӕй чидӕртӕ бамбӕрстой, бӕлвырдгӕнӕнтӕ куы раиртӕстой, уӕд *. Роберты  хабар куыд уыд, афтӕ бирӕ ахуыргӕндтӕ Хуыцауыл не ’ууӕндынц, уымӕн ӕмӕ сын скъолайы кӕнӕ университеты Сфӕлдисӕджы тыххӕй ницы дзырдтой. Фӕлӕ ахуыргӕндтӕй бирӕтӕ Йегъовӕйы базыдтой ӕмӕ йӕ бауарзтой. Ӕмӕ мах дӕр хъуамӕ бӕлвырдгӕнӕнтӕ нӕхӕдӕг раиртасӕм, цӕмӕй Хуыцауыл фидарӕй баууӕндӕм, уӕлдай нӕу, ахуырдзинад нӕм ис ӕви нӕ. Уый нӕ бӕсты ничи араздзӕн.

8, 9. а) Цавӕр фарстайыл аныхас кӕндзыстӕм? б) Дун-дунейы цытӕ ис, уыдӕтты тыххӕй фылдӕр куы базонай, уӕд дын уый куыд баххуыс кӕндзӕн?

⁸ Дӕ бон цы у аразын, цӕмӕй, Сфӕлдисӕг кӕй ис, ууыл фидарӕй баууӕндай? Ӕркӕсӕм цыппар хъуыддагмӕ.

⁹Дун-дунейы цытӕ ис, уыдӕтты тыххӕй фылдӕр базон. Цӕрӕгойтӕм, зайӕгойтӕм ӕмӕ стъалытӕм куы кӕсай ӕмӕ сыл куы хъуыды кӕнай, уӕд дын уый баххуыс кӕндзӕн Сфӕлдисӕгыл баууӕндынӕн (Пс. 19:1; Ис. 40:26). Уыдӕтты тыххӕй-иу цас фылдӕр базонай, уыйас дӕ тынгдӕр уырндзӕн, алцыдӕр Йегъовӕ кӕй сфӕлдыста. Нӕ организацийы уагъд статьятӕй бирӕтӕй базонӕн вӕййы, Йегъовӕ цы сфӕлдыста, уыдӕттӕ куыд диссаджы конд сты, уый. Кӕд дын ахӕм статьятӕ бамбарын ӕнцон нӕ вӕййы, уӕддӕр-иу сӕ бакӕс. Бацархай-иу, цӕмӕй, дӕ бон цас у, уыйбӕрц дзы бамбарай. Стӕй ма нӕ сайты jw.org ис, фӕстаг азты регионалон конгрессты, Йегъовӕ цы сфӕлдыста, уыдӕтты тыххӕй цы видеороликтӕ уыд, уыдон. Ӕмӕ-иу уыдонмӕ дӕр бакӕс.

10. Сфӕлдисӕг кӕй ис, уый нӕ Дун-дуне куыд бӕлвырд кӕны? Ӕрхӕсс цӕвиттон (Ромӕгтӕм 1:20).

¹⁰ Дун-дунейы цытӕ ис, уыдӕтты тыххӕй исты куы базоныс, уӕд-иу ахъуыды кӕн, Сфӕлдисӕджы тыххӕй цы ’ргом кӕнынц, ууыл. (Бакӕс Ромӕгтӕм 1:20.) Зӕгъӕм, хур зӕхх тавы ӕмӕ дӕтты рухс. Уый фӕрцы зӕххыл ис цард. Фӕлӕ хуры тынтӕй кӕцыдӕртӕ адӕймагӕн тӕссаг сты. Уыцы тынтӕй нӕ цы хъахъхъӕны? Зӕххы алыварс ис озоны цъар ӕмӕ нӕм уыцы тынтӕ нӕ уадзы. Ӕмӕ уыцы тынтӕ цас тыхджындӕр вӕййынц, уыйас озон дӕр фылдӕр фӕкӕны. Уӕдӕ уый ууыл дзурӕг нӕу, ӕмӕ ис, тынг зондджын чи у ӕмӕ нӕ тынг чи уарзы, ахӕм Сфӕлдисӕг?

11. Алцыдӕр Хуыцау кӕй сфӕлдыста, уымӕн бӕлвырдгӕнӕнтӕ кӕм ис ссарӕн? (Кӕс рамкӕ « Дӕ уырнындзинад фидар кӕнынӕн дын чи баххуыс кӕндзӕн, ахӕм ӕрмӕг».)

¹¹ «Индекс публикаций Сторожевой башни», стӕй дын нӕ сайт jw.org баххуыс кӕндзысты, алцыдӕр Хуыцау кӕй сфӕлдыста, уымӕн бирӕ бӕлвырдгӕнӕнтӕ ссарынӕн. Рубрикӕйы «Случайность или замысел?» дӕ бон у ссарын цыбыр статьятӕ ӕмӕ видеороликтӕ. Цӕрӕгойты ӕмӕ зайӕгойты тыххӕй дзы ис тынг цымыдисаг хабӕрттӕ. Дзырд ма дзы цӕуы, ӕрдзы цы ис, уыдӕттӕм гӕсгӕ ахуыргӕндтӕ цыдӕртӕ кӕй ӕрымысынц, ууыл дӕр.

12. Библи куы фӕиртасӕм, уӕд нӕ цӕмӕ фӕхъӕуы нӕ хъус ӕрдарын?

¹²Библи иртас. 4-ӕм абзацы цы ахуыргонды кой кодтам, уый фыццаг нӕ уырныдта, Сфӕлдисӕг кӕй ис, уый. Фӕлӕ рӕстӕг куы рацыд, уӕд Хуыцауыл баууӕндыд. Уый зӕгъы: «Уырнындзинад мӕм фӕзынд, наукӕ цы зӕгъы, ӕрмӕст уый фӕрцы нӕ, фӕлӕ, Библи лӕмбынӕг кӕй иртӕстон, уый фӕрцы дӕр». Чи зоны, Библийы цы фыст ис, уый хорз зоныс. Фӕлӕ цӕмӕй, Сфӕлдисӕг кӕй ис, ууыл тынгӕй-тынгдӕр ӕууӕндай, уый тыххӕй дӕ дарддӕр дӕр хъӕуы Хуыцауы Ныхас иртасын (Йес. Н. 1:8; Пс. 119:97). Дӕ хъус-иу ӕрдар, рагзаманты цы хабӕрттӕ ӕрцыд, уыдоны тыххӕй дзы гӕдыныхӕстӕ кӕй нӕй фыст, цы пехуымпарӕдтӕ дзы ис, уыдон куыд сӕххӕст сты ӕмӕ, Библийы фысджытӕ цы ныффыстой, уый кӕрӕдзийы ныхмӕ кӕй нӕу. Афтӕ куы кӕнай, уӕд дӕ фидарӕй уырндзӕн, уарзӕгой ӕмӕ нын зондджын Сфӕлдисӕг кӕй ис,  стӕй Библи Хуыцауы Ныхас кӕй у (2 Тим. 3:14; 2 Пет. 1:21) *.

13. Хуыцауы Ныхасы цавӕр зондджын уынаффӕтӕ ис? Ӕрхӕсс цӕвиттон.

¹³ Хуыцауы Ныхас куы фӕкӕсыс, уӕд-иу дӕ хъус ӕрдар, цы хорз уынаффӕтӕ дзы ис, уыдонмӕ. Зӕгъӕм, Библийы раджы фыст ӕрцыд, адӕймаг ӕхцауарзаг куы свӕййы, уӕд ын уый зиан кӕй ӕрхӕссы ӕмӕ йӕхи «бирӕ мӕстыты хай» кӕй бакӕны (1 Тим. 6:9, 10; Ӕмб. 28:20; Матф. 6:24). Абон дӕр хабар афтӕ у? Иу чиныджы фыст ис: «Мулк ӕмӕ ӕхца чи уарзы, уыдон афтӕ амондджын нӕ вӕййынц ӕмӕ арӕх сӕхимӕ ныхъхъусынц. Ӕмӕ, фылдӕр ӕхца йӕм уа, уымӕ ӕнӕуи бӕлгӕ чи кӕны, уыдон дӕр ӕнамонд вӕййынц ӕмӕ ма се ’нӕниздзинад дӕр фӕцуды» (The Narcissism Epidemic). Уӕдӕ нӕ Библи дзӕгъӕлы нӕ фӕдзӕхсы, цӕмӕй ӕхцауарзаг ма суӕм. Дӕуӕн та Библийӕ цавӕр уынаффӕтӕ баххуыс кодтой? Библийы уынаффӕтӕ нын царды куыд ӕххуыс кӕнынц, уый куы уынӕм, уӕд алкӕддӕр нӕ ныфс дардзыстӕм нӕ уарзӕгой Сфӕлдисӕгыл ӕмӕ дзы зонд курдзыстӕм (Иак. 1:5). Ӕмӕ уӕд бирӕ амондджындӕр уыдзыстӕм (Ис. 48:17, 18).

14. Библи иртасгӕйӕ Йегъовӕйы тыххӕй цы базондзынӕ?

¹⁴Библи куы фӕиртасыс, уӕд дӕ нысан хъуамӕ уа Йегъовӕйы хуыздӕр базонын (Иоан. 17:3). Куыд загътам, афтӕмӕй, Йегъовӕ цы сфӕлдыста, уыдӕттыл хъуыды кӕнгӕйӕ ис йӕ миниуджыты тыххӕй базонӕн. Ӕмӕ раст афтӕ йӕ миниуджыты тыххӕй базонӕн ис Библи иртасгӕйӕ дӕр (Рац. 34:6, 7; Пс. 145:8, 9). Уый фӕрцы бамбардзынӕ, Йегъовӕ удӕгас Хуыцау кӕй у, чидӕр ӕй кӕй не ’рхъуыды кодта. Ӕмӕ йӕ цас хуыздӕр зонай, уыйас ыл тынгдӕр ӕууӕнддзынӕ, тынгдӕр ӕй уарздзынӕ ӕмӕ йӕм ӕввахсдӕр кӕндзынӕ.

15. Хуыцауы тыххӕй иннӕтӕн куы дзурай, уӕд дын уый цы пайда ӕрхӕсдзӕн?

¹⁵Иннӕтӕн Хуыцауы тыххӕй дзур. Афтӕмӕй дӕхи уырнындзинад дӕр фидардӕр кӕндзӕн. Зӕгъӕм, кӕимӕ ныхас кӕныс, уый дызӕрдыг кӕны, Хуыцау кӕй ис, ууыл. Ӕмӕ йын цы зӕгъай, уый куы нӕ зонай, уӕд дӕ бон цы у саразын? Нӕ публикациты уый фӕдыл ӕрмӕг бацагур ӕмӕ-иу ын стӕй уырдыгӕй бӕлвырдгӕнӕнтӕ ӕрхӕсс (1 Пет. 3:15). Дӕ бон ма у хотӕ ӕмӕ ’фсымӕртӕй ӕххуыс ракурын. Адӕймаг, Библийы цы фыст ис, ууыл куы нӕ баууӕнда, уӕддӕр, уыцы ӕрмӕг кӕй раиртӕстай, уый дӕхицӕн пайда фӕуыдзӕн. Уый фӕрцы дӕ уырнындзинад сфидар уыдзӕн. Ӕмӕ уӕд, ацы дунейы зондджынтыл ӕмӕ ӕмбаргӕтыл кӕй нымайынц, уыдоны ныхӕсты тыххӕй нӕ фӕдызӕрдыг уыдзынӕ, Сфӕлдисӕг кӕй ис, ууыл.

16. Нӕ уырнындзинад дарддӕр дӕр куы нӕ фидар кӕнӕм, уӕд ныл цы ’рцӕудзӕн?

¹⁶ Кӕд Йегъовӕйӕн рагӕй лӕггад кӕнӕм, уӕддӕр хъуамӕ дарддӕр дӕр нӕ уырнындзинад фидар кӕнӕм. Афтӕ куы нӕ кӕнӕм, уӕд нӕ уырнындзинад, гӕнӕн ис, ӕрлӕмӕгъ уа. Куыд загътам, афтӕмӕй уырнындзинад уый у, ӕмӕ адӕймаг бӕлвырдгӕнӕнты фӕрцы куы зона, цӕстӕй цы нӕ уыны, уыдон ӕцӕгдӕр кӕй сты. Цӕстӕй цы нӕ уынӕм, уый нӕ, гӕнӕн ис, ӕнцонтӕй ферох уа. Кӕмӕдӕр фаг уырнындзинад кӕй нӕй, уый Павел схуыдта, адӕймаджы «ӕнцонӕй чи ӕрцахсы, уыцы тӕригъӕд» (Дзут. 12:1). Нӕ бон куыд у нӕхи уыцы къӕппӕгӕй бахизын? (2 Фес. 1:3).

17. Цы нын баххуыс кӕндзӕн, цӕмӕй нӕ уырнындзинад ма ӕрлӕмӕгъ уа?

¹⁷Фыццаг: Йегъовӕйӕ ӕппынӕдзух сыгъдӕг тых кур. Уый ахсджиаг цӕмӕн у? Уымӕн ӕмӕ уырнындзинад у, сыгъдӕг тыхы дыргъмӕ цы миниуджытӕ хауы, уыдонӕй иу (Гал. 5:22, 23). Ӕмӕ нын сыгъдӕг тых куы не ’ххуыс  кӕна, уӕд нӕ бон нӕ уыдзӕн Сфӕлдисӕгыл дарддӕр дӕр фидарӕй ӕууӕндын. Йегъовӕйӕ сыгъдӕг тых куы курӕм, уӕд нын ӕй ӕнӕмӕнг ратдзӕн (Лук. 11:13). Нӕ бон ма у афтӕ кувын дӕр: «Бафтау нын нӕ уырнындзинадыл» (Лук. 17:5).

18. Псалом 1:2, 3 стихтӕм гӕсгӕ, цавӕр лӕварӕй стӕм хайджын?

¹⁸Дыккаг: Хуыцауы Ныхас алы бон дӕр кӕс ӕмӕ йыл хъуыды кӕн. (Бакӕс Псалом 1:2, 3.) Ацы псалом фыст куы ’рцыд, уӕд Хуыцауы закъон ӕнӕхъӕнӕй уыд ӕрмӕстдӕр цалдӕр израилагмӕ. Се ’хсӕн уыдысты паддзах ӕмӕ сауджынтӕ. Иннӕ адӕм та-иу – «нӕлгоймӕгтӕ, сылгоймӕгтӕ, сывӕллӕттӕ» ӕмӕ, Израилы цы ӕрцӕуӕггӕгтӕ цард, уыдон – алы ӕвдӕм азы кӕрон дӕр ӕрӕмбырд сты, ӕмӕ-иу сын левиттӕ Закъон кастысты (Дык. з. 31:10–12). Йесойы рӕстӕджы дӕр Фыстад уыди ӕрмӕстдӕр цалдӕр адӕймагмӕ. Тыхтӕттӕн сӕ фылдӕр уыдысты ӕмбырдгӕнӕнты. Абон та адӕмӕн сӕ фылдӕрӕн у сӕ бон Хуыцауы Ныхас ӕнӕхъӕнӕй кӕнӕ йӕ кӕцыдӕр хӕйттӕ кӕсын. Уый стыр лӕвар куыннӕ у! Нӕ бон куыд у равдисын, уыцы лӕварӕн кӕй аргъ кӕнӕм, уый?

19. Цы хъӕуы аразын, цӕмӕй нӕ уырнындзинад фидар уа?

¹⁹ Хуыцауы Ныхасӕн кӕй аргъ кӕнӕм, уый бӕрӕг уыдзӕн, алы бон дӕр ӕй куы кӕсӕм, уымӕй. Хъуамӕ-иу Библи кӕсынӕн рӕстӕг рахицӕн кӕнӕм. Уыцы хъуыддаг йӕхи бар нӕй уадзӕн. Рӕстӕг нын куы фӕвӕййы, ӕрмӕст ӕй уӕд хъуамӕ ма кӕсӕм. Библи алы бон дӕр куы кӕсӕм, уӕд нӕ уырнындзинад уыдзӕн фидар.

20. Дарддӕр дӕр цы хъуамӕ аразӕм?

²⁰ Ацы дунейы «зондджынтӕ ӕмӕ ӕмбаргӕтӕй» уӕлдай, махӕн нӕ уырнындзинады бындур у Хуыцауы Ныхас (Матф. 11:25, 26). Библи нын ӕмбарын кӕны, абон зӕххыл уавӕр фыддӕрӕй-фыддӕр цӕмӕн кӕны ӕмӕ Йегъовӕ тагъд цы сараздзӕн, уый. Цӕй уӕдӕ дарддӕр дӕр нӕ уырнындзинад фидар кӕнӕм ӕмӕ, нӕ бон кӕмӕн у, уыдонӕн баххуыс кӕнӕм, цӕмӕй Сфӕлдисӕгыл баууӕндой (1 Тим. 2:3, 4). Мах зӕрдиагӕй ӕнхъӕлмӕ кӕсӕм фидӕнмӕ. Тагъд зӕххыл иууылдӕр Йегъовӕйы кадджын кӕндзысты Раргомады 4:11 стихы фыст ныхӕстӕй: «О Йегъовӕ, нӕ Хуыцау, ды дӕ кад ӕмӕ намысы аккаг, уымӕн ӕмӕ... ӕппӕт дӕр ды сфӕлдыстай»!