LONGO DIA 32
Khala Mukolesa Gutshigina Guaye Gudi Mufugi
‘Gutshigina gudi . . . gijiyishilo gia ndaga jia giamatshidia jinyi jianago gumonega.’—HEB. 11:1.
Lungimbo 11 La création loue Jéhovah
NDAGA JIDI MULONGO EDI *
1. Ndaga jitshi agulongesele mukunda nu Mufugi wetu?
GULA wavuadiwe mu fami ya Matemue a Yehowa yajiya gukhale egi walongugile ndaga jiatadila Yehowa sendese ulenge waye. Agulongesele nji egi muene udi Mufugi wetu, wakhala nu makalegelo abonga nu mbawubuisa mavu awa phaladiso.—Gis. 1:1; Makal. 17:24-27.
2. Luholo lutshi athu ako anatadila athu anasha gutshigina gudi Mufugi?
2 Athu avula ana tshigina ndo egi Nzambi wakhala guene nga ndo muene wafugile ima yagasue. Uvi ana tshigina egi monyo wadizogele hakhawo, gungima wasendesele gusombegesa mage-mage. Ana zuela egi wasendesele mu ima yazonda gungima waya nu gusombegesa mu ima yakoma idi nu monyo. Mukatshi dia athu ana tshigina ndaga eji, ako alongugile muavula. Ana zuela egi sianse yana monesa egi Biblia yana zuela ndaga jia mambo. Ana zuela nji egi athu ana gusha gutshigina gudi Mufugi alongugilego nu ashigo nu ndunge.
3. Mukunda natshi gukolesa gutshigina guetu gudi nu ndando?
3 Ndaga eji jiana zuela athu alongugile muavula jiajiya gututuma ha gukhala nu ba dute egi, Yehowa ashigo Mufugi wetu wa guzumba ba? Ha guhana kueteya gu muhu owu, tudi naye gujiya mukunda natshi tuana tshigina egi Yehowa udi Mufugi wetu. Tuana tshigina ndaga yene handaga atuwambelele egi tudi naye guyitshigina nga ndo tuazudile tangua dia gulonguga esue hakhetu ndaga jidi gututshiginyisa egi Yehowa watufugile? (1 Kol. 3:12-15) Ikhale tuana kombelela gale Yehowa sendese mualeha mukut’etu agasue tudi naye gukolesa gutshigina guetu. Gula tuatshita ngenyi mbatushigo muhuigiwa gudi enya ‘filozofi nga malongo a mambo’ ana longesa athu. Malongo ene anago gudivua nu Mbimbi ya Nzambi. (Kol. 2:8; Heb. 11:6) Longo edi diza gutukuatesa ha gujiya ndaga thathu. Ya thomo, mukunda natshi athu avula anago gutshigina egi Nzambi wafugile ima yagasue? Ya mbadi, luholo lutshi wajiya gukolesa gutshigina guaye gudi Yehowa Mufugi wetu? Ya thathu, luholo tshi wajiya gulandula gukolesa gutshigina guaye?
MUKUNDA NATSHI ATHU AVULA ANAGO GUTSHIGINA EGI NZAMBI WAFUGILE IMA YAGASUE?
4. Ha gutadila Hebelu 11:1, gutshigina gudi itshi?
4 Athu avula ana tangiza egi, gukhala nu gutshigina gudi mukotelesa gusha mutshima mu gima gimoshi ngenyi tushigo mujiya gula gidi gia giamatshidia nga ndo giakhala guene. Uvi Biblia yana zuela egi gutshigina gua luholo elu gushigo gua giamatshidia. (Tanga Hebelu 11:1.) Biblia yana longesa egi gutshigina gua giamatshidia gudi naye gukhala nu ijiyishilo. Hene, ikhale tuajiyilego gumona Yehowa, Yesu nu Ufumu wa Nzambi, uvi tudi nu ijiyishilo idi mumonesa egi ana khala diago guene. (Heb. 11:3) Phangi mumoshi wana khala muenya sianse udi muzuela egi: “Matemue a Yehowa anajiya diago ndaga ana tshigina, anago nji gutuna ndaga jiana zuela sianse.”
5. Mukunda natshi athu avula ana gutshigina egi ishigo Nzambi wafugile ima yagasue idi nu monyo?
5 Tuajiya gudihula egi: ‘Gula gudi diago nu ijiyishilo idi mumonesa egi Mufugi wakhala guene, mukunda natshi athu avula anago gutshigina egi Nzambi wafugile ima yagasue idi nu monyo?’ Athu ako anago gutshigina egi Nzambi wafugile ima yagasue, handaga khenji azudile tangua dia gutadila ene hakhawo ijiyishilo idi mumonesa ndaga yene. Phangi Robert udi muzuela egi: “Luholo akhalelego gutulongesa ndaga yatadila gufugiwa gu khalasa, ngakhalelego mutangiza egi ima yafugiwe. Uvi tangua ngatagenesele ivo 20, ngatele maga nu Matemue a Yehowa. Angulongesele egi Biblia idi gutuhana ijiyishilo idi gutukuatesa ha gutshigina egi Nzambi wafugile ima yagasue.” *—Tala galuanda “ Ndaga Mvuaji Jidi Naye Gukalagala.”
6. Mukunda natshi athu ako anago gutshigina egi Mufugi wana khala guene?
6 Athu ako anago gutangiza egi gudi nu Mufugi handaga ana zuela egi adi naye gusha gutshigina phamba mu ndaga ana mona. Uvi ana gutshigina egi ima iko yanago gumonega gifua muhehe yana khala guene, handaga adi nu ijiyishilo idi guyimonesa. Biblia yana monesa egi, gutshigina guana kotelesa egi gukhala nu ijiyishilo ya ndaga jia ‘giamatshidia jinyi jianago gumonega.’ (Heb. 11:1) Yana toga tangua nu ngolo jiavula ha gulonguga ijiyishilo yene esue hakhetu. Hene athu avula anago gutshigina gukalagala ngenyi. Gula muthu ashigo muzula tangua dia gulonguga ijiyishilo yene muene hakhenji, wajiya guzuela egi Nzambi wakhalago guene.
7. Athu agasue alongugile muavula ana tuna egi ishigo Nzambi wafugile ima yagasue ba? Kotelesa.
7 Enya sianse ako atshiginyile egi Nzambi wafugile ima yagasue, tangua alongugile ijiyishilo idi mumonesa ndaga yene. * Ako mukatshi diawo gifua phangi Robert tuazuelela gu thunda, akhalelego mutshigina egi Mufugi wakhala guene, handaga aalongeselego ndaga yene gu khalasa. Ikhale ngenyi enya sianse avula ajiyile gale Yehowa nu ana gumuzumba. Gifua enya sianse awa tuazuelela, mukut’etu agasue tudi naye gukolesa gutshigina guetu gudi Nzambi ikhale tualongugile muavula nga ndo. Gushigo nu muthu wajiya gukalagala ndaga yene ha fundo dietu.
LUHOLO LUTSHI WAJIYA GUKOLESA GUTSHIGINA GUAYE GUDI MUFUGI?
8-9. (a) Muhu utshi tuza muzuelela? (b) Luholo tshi gulonguga ima yafugiwe guajiya gugukuatesa?
8 Luholo lutshi wajiya gukolesa gutshigina guaye gudi Mufugi? Tutadilenu maluholo mbadi ajiya gugukuatesa.
9 Khala mulonguga ima yafugile Nzambi. Wajiya gukolesa gutshigina guaye gudi Mufugi gula udi muzula tangua dia gutala shitu, mitshi nu themua. (Ngi. 19:1; Yesh. 40:26) Gula udi mulonguga ima yene muavula, mbayigukuatesa diago ha gutshigina egi Yehowa wafugile ima yagasue. Mikanda yetu yana khala nu malongo avula ana monesa ndaga jiavula jiatadila ima yafugiwe. Utunyigo gulonguga malongo ene, ikhale udi mumona egi adi lamba ha guakotelesa muabonga. Tomba malongo anyi wajiya gukotelesa muabonga. Ujimbilago nji gutala video jiawaha jidi mumonesa ima yafugiwe jidi mu site yetu jw.org. Video jiene jiazogele gu ba asamble a masugu thathu a ivo eyi yabalega.
10. Hana gifezegeselo gidi mumonesa egi gudi nu muthu wafugile ima yagasue. (Lomo 1:20)
10 Tangua udi mulonguga ima yafugiwe, kalagala yagasue ha gujiya ndaga ima yene idi gugulongesa mukunda nu Mufugi wetu. (Tanga Lomo 1:20.) Ha gufezegesa, tangua diana tuma muanya watagana mukunda nu ima yagasue idi ha mavu, uvi diana zola nji ba rayons ako (ana tamegewa egi rayons ultraviolets), ana khala abola. Na mukunda natshi ba rayons ene anago gututshita gubola? Handaga muhehe wana tamegewa egi ozone wana bamba mavu muabonga diago. Tangua ba rayons ultraviolets ana gudivudisa, muhehe wana bamba mavu nji wana gudivudisa. Ndaga eyi idi gugutuma ha gutshigina egi gudi nu muthu wajifugile nu muthu muene wana gutuzumba nu wakhala watema ba?
11. Gui wajiya guheta malongo ajiya gugukuatesa ha gukolesa gutshigina guaye egi ima yagasue yafugiwe? (Tala galuanda “ Ndaga Jiajiya Gugukuatesa ha Gukolesa Gutshigina Guaye Gudi Mufugi.”)
11 Wajiya guheta malongo ajiya gugukuatesa ha gukolesa gutshigina guaye mu ima yafugiwe, gula udi mukalegela Index des publications des Témoins de Jéhovah nu gula udi mukalagala ba recherche mu jw.org. Wajiya gusendesa gutanga malongo nu ba video adi mu longo “Évolution ou conception?” Malongo ene nu ba video akhala ahihia nu ana zuelela ndaga jiazonda jiawaha jiatadila shitu nu mitshi. Adi nji nu ifezegeselo yana monesa luholo enya sianse ana kamba gukalagala ima gifua inyi yafugile Nzambi.
12. Ndaga tshi tudi naye gutangigiza tangua tudi mutanga Biblia?
12 Khala mulonguga Biblia. Thomo muenya sianse tuazuelela mu paragrafe 4, akhalelego mutshigina egi Mufugi wakhala guene. Uvi gungima wasendesele gutshigina egi Mufugi wakhala guene. Udi muzuela egi: “Ngakhalelego mumonesa gutshigina phamba mukunda nu ndaga ngalongugile gu sianse, uvi yakhalele mukunda nu ndaga ngalongugile mu Biblia.” Yajiya gukhala egi aye nji wajiyile gale muabonga malongo a Biblia, uvi ha gukolesa gutshigina guaye egi Mufugi wakhala guene, udi naye gulonguga ndaga jidi mu Mbimbi ya Nzambi. (Yosh. 1:8; Ngi. 119:97) Ha gufezegesa, tangiza luholo Biblia yana guzuelela mene jia mutangua dikulu nu giamatshidia giagasue. Tangiza nji luholo ba profesi a Biblia adi mutagenesewa nu luholo ndaga jiagasue jidi mu Biblia jiana gudivua. Gula tuatshita ngenyi mbatukolesa gutshigina guetu egi gudi nu Mufugi wa guzumba nu watema watufugile. Mbatujiya nji egi Biblia idi Mbimbi Yenji.—2 Tim. 3:14; 2 Phet. 1:21.
13. Hana gifezegeselo gia Biblia gidi mumonesa egi malongo a Biblia adi nu ndando?
13 Gula udi mutanga Mbimbi ya Nzambi mbawumona diago egi malongo enji adi nu ndando yavula. Ha gufezegesa, sendese mualeha Biblia yana zuela egi guzumba mbongo gushigo ndaga yabonga, guana bata ‘malamba a maluholo agasue.’ (1 Tim. 6:9, 10; Ish. 28:20; Mat. 6:24) Longo edi didi nu ndando mangino ba? Mukanda umoshi wana zuelela makalegelo a athu a mu masugu etu, udi muzuela: “Athu avula ana guzumba mbongo ana khala ndo nu gusuanguluga, ana gudisagesa nji muavula. Ikhale athu anyi ana kamba gukhala nu mbongo jiavula ana khala ndo nu gusuanguluga nu ana kata muavula.” Yadiago longo dia Biblia diana zuela egi tuzumbigo mbongo didi diabonga diago! Wajiya nji gutangiza malongo a Biblia anyi agukuatesele. Gula tudi mulandula gutangiza malongo agasue abonga adi mu Biblia, mbatukotelesa diago egi Mufugi wetu wa guzumba udi mujiya ndaga jiabonga mukunda nu esue nu mbatulandula gushila malongo enji mutshima. (Yak. 1:5) Ngenyi mbatukhala nu gusuanguluga guavula mu monyo wetu.—Yesh. 48:17, 18.
14. Gula walonguga Biblia ndaga tshi mbawujiya mukunda nu Yehowa?
14 Tangua udi mulonguga Biblia dihagele felela dia gujiya Yehowa muabonga. (Yone 17:3) Mbawumona luholo makalegelo agasue a Yehowa ana monega mu ima yafugile muene. Yadiago gula tualonguga makalegelo a Yehowa mbatukotelesa diago egi wana khala guene. (Guz. 34:6, 7; Ngi. 145:8, 9) Gula wajiya Yehowa muabonga diago mbawukolesa gutshigina guaye gudi muene, mbawumuzumba muavuala nu mbawukolesa ufuta waye nenji.
15. Gubonga tshi mbawuheta gula udi muwambela athu ako ndaga jiatadila Nzambi?
15 Khala muwambela athu ako ndaga jiatadila Nzambi. Gula udi mutshita ngenyi mbawukolesa gutshigina guaye. Uvi gula muthu udi mulongesa wa guwambele egi anatshigina ndo egi Nzambi wakhala guene, nu aye nji ushigo mujiya mvutu ya gumuhana, na itshi wajiya gukalagala? Kamba verse imoshi ya Biblia idi muhana mvutu gu muhu wene mu mikanda yetu, gungima izuelelenu nu muthu muene. (1 Phet. 3:15) Wajiya nji gutoga phangi muko udi nu eksperianse ha gugukuatesa. Gutshita ngenyi mbagugukuatesa ha gukolesa gutshigina guaye, ikhale muthu muene watshigina nga watuna genji mvutu ya Biblia. Ngenyi mbawutuna gutshigina ndaga jia mambo jiana zuela athu ana monega gifua akhala atema nu alongugile muavula egi, Mufugi wana khala ndo guene.
KHALA MUKOLESA GUTSHIGINA GUAYE!
16. Ndaga itshi yajiya gutubuila gula tushigo mulandula gukolesa gutshigina guetu?
16 Ikhale tuana kombelela gale Yehowa sendese mualeha, tudi naye gulandula gukolesa gutshigina guetu gudi muene. Mukunda natshi? Handaga gula tuamoneselego gutema gutshigina guetu guajiya guleba. Gifua luholo tuayimonyi, gutshigina guana kotelesa gukhala nu ijiyishilo ya ndaga jia giamatshidia jinyi jianago gumonega. Tuajiya gujimbila muphushi ima inyi tushigo mumona nu meso. Gishina giene Phaula watamegele gutuna gumonesa gutshigina egi, ‘masumu ana gutukanga njila muphushi.’ (Heb. 12:1) Luholo lutshi tuajiya gujiya egi gutshigina guetu gudi guakola?—2 Tes. 1:3.
17. Itshi yajiya gutukuatesa ha gukolesa gutshigina guetu?
17 Thomo, khala mutoga nyuma ya Yehowa. Mukunda natshi? Handaga nyuma ya Nzambi yana gutukuatesa ha gukolesa gutshigina guetu. (Gal. 5:22, 23) Tuajiyilego gukolesa gutshigina guetu gudi Mufugi gula nyuma yenji yatukuateselego. Yehowa mbawutuhana nyuma yenji gula tudi mulandula gumutoga nayo. (Luka 11:13) Matangua ako tuajiya nji gutoga Yehowa egi: ‘Tuhane gutshigina guavula.’—Luka 17:5.
18. Ha gutadila Ngimbo 1:2, 3, kado tshi tuajiya guheta mangino?
18 Ya mbadi, khala mulonguga Biblia lusugu nu lusugu. (Tanga Ngimbo 1:2, 3.) Tangua asonegele gitshinyi egi gia mukanda wa ngimbo, phamba enya Isalele azonda akhalele nu Mikhuala yagasue ya Nzambi ya gusonega. Uvi mafumu nu nganga-nzambi akhalele nu Mikhuala ya Nzambi ya gusonega. Hene, mu givo giagasue gia guhululuga (giakhalele mukalegewa gungima dia ivo 7), ‘mala nu akhetu nu ana’ nu ngenji jiakhalele gu Isalele jiakhalele gudibungisa hamoshi ha gutegelela tangua akhalele guatangela Mikhuala ya Nzambi. (Mikh. 31:10-12) Mu tangua dia Yesu phamba athu azonda akhalele nu rulo, uvi akhalele mubamba rulo jiavula mu ba sinagoga. Mangino athu avula ana khala nu Biblia ya mudidi nga ya gitshinyi. Biblia idi diago kado ga ndando. Luholo lutshi tuajiya gumonesa egi tuana guyizula nu ndando?
19. Itshi tudi naye gukalagala ha gukolesa gutshigina guetu?
19 Tuajiya gumonesa egi tudi muzula Mbimbi ya Nzambi nu ndando gula tudi guyitanga lusugu nu lusugu. Tushigo naye gutanga nu gulonguga Biblia phamba gula tudi nu tangua, uvi tudi naye gukhala nu programe yabonga. Gula tudi mulonguga Biblia lusugu nu lusugu mbatukolesa gutshigina guetu.
20. Desizio ditshi tudi naye guzula?
20 Tushigo gifua ‘enya ndunge nu enya gutema’ a ha mavu awa, handaga gutshigina guetu gudi mukatuga mu ndaga jiana zuela Mbimbi ya Nzambi. (Mat. 11:25, 26) Gulonguga gua Biblia guana gutukuatesa ha gujiya mukunda natshi ndaga jia ha mavu jidi mulandula gubola nu ndaga Yehowa mbaaza mukalagala. Hene tuzulenu desizio dia gukolesa gutshigina guetu nu dia gukuatesa athu avula ha gukhala nu gutshigina gudi Mufugi wetu. (1 Tim. 2:3, 4) Tulandulenu nji gunengena tangua ima yagasue idi ha mavu mbayitumbuisa Yehowa nu mbimbi jidi mu mukanda wa Yatuwuwe 4:11 egi: ‘Yehowa Nzambi wetu, udi watagana ha guheta lutumbu . . . handaga aye wafugile ima yagasue.’
LUNGIMBO 2 Ton nom est Jéhovah
^ par. 5 Biblia yana zuela egi Yehowa Nzambi wafugile ima yagasue. Uvi athu avula anago gutshigina ndaga yene. Ana zuela egi monyo wadizogele wene hakhawo. Ndaga jia luholo elu jiajiyilego gutulebesa muila gula tudi mukalagala yagasue ha gukolesa gutshigina guetu gudi Nzambi nu mu Biblia. Longo edi diza gutumonesa ndaga tuajiya gukalagala.
^ par. 5 Mu makhalasa avula alongeshi ako ana guzuela egi, ishigo Nzambi wafugile ima yagasue idi guene. Ana tangiza egi gula awambela ana khalasa egi Nzambi wafugile ima yagasue, ajiya guashinjiga ha gukhala nu gutshigina gudi Nzambi.
^ par. 7 Wajiya gumona ndaga jiko jiazuelele athu alongugile muavula nu enya sianse ako gubalega 60, anyi ana tshigina egi ima yafugiwe mu Index des publications des Témoins de Jéhovah ha muto wa lumene “Science,” gungima tala ga muto ga lumene gadi muzuela egi “scientifiques partisans de la création.” Wajiya nji gumona ndaga jiko enya sianse ana zuela mu Guide de recherche pour les Témoins de Jéhovah. Ha muto wa lumene “Science, technologie,” gungima tala ga muto ga lumene gadi muzuela egi “Interviews.” (rubrique de Révéillez-vous!)
