NKHANI YOPFUNZIRA 32
Mbakhulupirirani maninge Mulengi wanu
‘Chikhulupiriro ni . . . umboni wooneka wa vinthu chaivo podiya kuti ni vosawoneka.’—AHEB. 11:1.
NYIMBO NA. 11 Chilengedwe Chimatamanda Mulungu
VOMWE TIPFUNZIRE *
1. Ko mudapfunzisiwa chani va Mulengi wathu?
PENO imwepo mudakulira m’banja ya Mboni, ndiye kuti mudapfunzira va Yahova mudakali mng’ono. Mudapfunzisiwa kuti iye ni Mulengi, anamakhalidwe yabwino nakuti ankufuna kuti dziko yose idzakhale paradaiso.—Gen. 1:1; Mac. 17:24-27.
2. Ko wanthu anango achawawona tani wanthu wokhulupirira kuti kuli Mulengi?
2 Koma wanthu azinji atsimikizalini kuti Mulungu alikodi nakuti peno ndiyedi adalenga vinthu vose. Iwo achakhulupirira kuti moyo udayamba na tunthu twamoyo tung’ono-tung’ono tomwe tudachinja pang’ono-pang’ono nkukonzambo vamoyo vosiyanasiyana. Anango womwe achakhulupirira vimwivi ni wopfunzira maninge. Iwo achati sayantsi ichawonesa kuti Baibolo ni yophonyeka ndipo wanthu wosapfunzira, wonyozeka na wosowa nzeru ndiwo achadekana kukhulupirira kuti kuli Mulengi.
3. Ndawa chani ni vofunika maninge kulimbisa chikhulupiriro chathu?
3 Ko volewa va wanthu mwawa vingatichitise kuleka kukhulupirira kuti Yahova ni Mulengi wathu wachikondi? Vimwevi vingathembe pakuti ndawa chani tichakhulupirira kuti Yahova ni Mulengi. Ko tichakhulupirira kuti iye aliko ndawa yakuti tidachita kuuziwa, panango ndawa yakuti tidafufuza kuti tichite kutsimikizira tekha? (1 Akor. 3:12-15) Viribe basa peno ndise Mboni kwa nthawe itali tani, tose tichadekana kulimbisa chikhulupiriro chathu. Tikachita vimwivi tidzanamiziwelini na nzeru za ‘wanthu wopfunzira maninge na machenjera yawo yalibe na basa’ pakundofuna kutichitisa kuwona kuti Mawu ya Mulungu ni yophonyeka. (Akol. 2:8; Aheb. 11:6) Pakufuna kutithandiza, nkhani mwiyi ifotokoze kuti (1) ndawa chani wanthu azinji akhulupiriralini kuti kuli Mulengi, (2) vamungachite kuti mumbakhulupirire maninge kuti Yahova ni Mulengi, na (3) vomwe mungachite kuti chikhulupiriro chanu chipitirize kukhala cholimba.
NDAWA CHANI TICHAKHULUPIRIRA KUTI MULENGI ALIKODI?
4. Mobverana na Aheberi 11:1, ko Baibolo ichati chani pa vinthu vomwe tichadekana kukhulupirira?
4 Wanthu anango achaganiza kuti kukhala na chikhulupiriro ni kukhulupirira vinthu viribe umboni. Koma mobverana na Baibolo, chikhulupiriro chatene ni chaicholini. (Lewengani Aheberi 11:1.) Baibolo ichati timbakhulupirire vinthu vomwe vinaumboni. Ndipomwapa, podiya kuti tingakwaniselini kuwona Yahova, Yesu na Ufumu wa kudzulu, tichakhulupirira kuti nchaivodi ndawa tinaumboni wotsimikizika. (Aheb. 11:3) Mwamuna munango wasayantsi yemwe adadzakhala Mboni adati: ‘Wa Mboni za Yahova achakhulupirira vinthu vomwe anavo umboni. Sikuti iwo achatsutsana na vomwe wasayantsi agumana.’
5. Ndawa chani wanthu azinji achakhulupirira kuti moyo ulibe kuchita kulengewa?
5 Panango tingadzibvunze kuti: ‘Peno panaumboni wotsimikizika kuti kuli Mulengi, ndawa chani wanthu azinji achakhulupirira kuti vinthu vamoyo vilibe kulengewa na Mulungu?’ Ndawa yakuti wanthu azinji achafagafagalini umboni pa vomwe achakhulupirira. Robert yemwe manje ni wa Mboni za Yahova adati: ‘Nimbawona kuti kulibe Mulengi ndawa yakuti nkhani mweyi ifokozewakolini ku shikola. Inepano nidafika mpakana magole 20 nikanati kuyankhulako na wa Mboni za Yahova kuti anitsimikizire kuchokera m’Baibolo kuti vinthu vidachita kulengewa.’ *—Onani bokosi yakuti: “ Mawu kwa azibereki.”
6. Ndawa chani wanthu anango achakhulupiriralini kuti kuli Mulengi?
6 Wanthu anango achafotokoza kuti tingakhulupirirelini kuti kuli Mulengi ndawa yakuti tikanati kumuwonako. Koma iwo achakhulupirira vinthu vomwe akanati kuviwona ninge mphanvu ya kukwekweta ya dziko yomwe ni yodziwika bwino. Kukhala na chikhulupiriro chafotokozewa m’Baibolo kuchaphatanidza kukhala na umboni wowoneka wa vinthu ‘chaivo podiya kuti viwonekalini.’ (Aheb. 11:1) Pachadekana khama na nthawe kuti tipfunzire vinthu na cholinga chakuti tikhale na umboni, ndipo wanthu achawona kuti vilibe phindu kufagafga kuti atsimikizire wokha. Munthu yemwe alibe khama yakufagafaga umboni chaiwo achamalizira kukhala na chikhulupiriro chakuti Mulungu kulibe.
7. Ko wanthu wose wopfunza achakhulupiriralini kuti kuli Mulengi? Fotokozani.
7 Wasayantsi anango afika pakukhulupirira kuti Mulungu aliko patsogolo pakupfunzira mawumboni. * Ninge Robert watafotokoza kumayambiriro, wanthu anango adafika pakumbakhulupirira kuti kulibe Mulengi ndawa nkhani mweyi ichapfunzisiwalini ku universidade. Koma wasayantsi azinji adafika pakuyamba kudziwa Yahova na kumukonda. Ninge wasayantsi mwawa, isepanombo tichadekana kulimbisa chikhulupiriro chathu kwa Mulungu, vilibe basa peno ndise wopfunza panango neye. Palibe munthu munango angatichitire vimwevi.
VAMUNGACHITE KUTI MUMBAKHULUPIRIRE MANINGE MULENGI
8-9. (a) Ko tikambirane mbvunzo uponi? (b) Ko kupfunzira vachilengedwe kungakuphinduliseni tani?
8 Ko mungachite tani kuti mumbakhulupirire maninge Mulengi? Naboni tikambirane njira zinayi.
9 Pfunzirani vachilengedwe. Imwepo mungakhulupirire maninge Mulengi mukambawona vinyama, miti na nyenyezi. (Sal. 19:1; Yes. 40:26) Imwepo mukapfunzira vizinji va vinthu vimwevi, mudzakhale wotsimikizira kuti Yahova ni Mulengi. M’mabukhu yathu munankhani zomwe zichafotokoza vinthu vizinji volewa va chilengedwe. Mbayesesani kupfunzira nkhani zimwizi podiya kuti mungambashupike kubvesa vinango. Mbalewengani momwe mungakwanisire ndipo ayi kuyebwa kubwerezera kuwona nkhani zimwizi pa jw.org na kunyang’anira mavidiyo yolewa vachilengedwe yomwe yadawonesewa pamisonkhano yachigawo ya manjemanje.
10. Fotokozani chitsanzo chowonesa kuti Mulengi alikodi. (Aroma 1:20)
10 Mukambapfunzira vachilengedwe, khalani tcheru maninge pa vinthu vomwe vinkuwonesa kuti kuli Mulengi. (Lewengani Aroma 1:20.) Mwakulinganiza, dzuwa ichavunika na kuthumisa vamoyo padziko. Koma dzuwa ibodzibodzi mweyi ingapereke mphanvu yakupsa maninge yomwe ingadzonge vinthu. Isepano wanthu tichada kutetezewa ku mphanvu yakupsa mweyi. Ndipo titetezewa kale. Mwanjira yanyi? Dziko yapasi yomwe ni muyi wathu iri kale na chinthu chotetezera, chomwe ni camada de ozono. Dzuwa ikatentha maninge camada de ozono ichitisa kuti mphanvu ya dzuwa ifike yochepa padziko yapasi. Dzuwa ikambatentha maninge, mphanvu ya camada de ozono ikulambo. Manje imwepo munkuwonambolini kuti alipo Mulengi wanzeru yemwe adavikonza tene kuti timbatetezeke?
11. Nkuponi kwatingagumane nkhani zotsimikizira kuti kuli Mulengi? (Onani bokosi yakuti: “ Nkhani zinango zolimbisa chikhulupiriro.”)
11 Imwepo mungagumane nkhani zizinji zofotokoza va chilengedwe mu Índice das Publicações da Torre de Vigia na kungena pa jw.org. Panango mungayambe na kuwona ndandanda ya nkhani na mavidiyo yakuti: “Kodi Zinangochitika Zokha?” Pamwapa mungagumanepo mpfundo zachigwato na zobveka bwino zofotokoza va vinyama na vinthu vinango. Mungagumanepo soti vomwe wasayantsi ankuchita pakukonza vinthu potengera chilengedwe.
12. Tikambapfunzira Baibolo, ko tichadekana kumbachita chidwi na vinthu viponi?
12 Pfunzirani Baibolo. Wasayantsi watafotokoza kumayambiriro ule pakuyamba ambatsutsa kuti kuli Mulengi. Koma nkuyenda kwa nthawe iye adayamba kutsimikiza kuti aliko. Iye adati: ‘Chomwe chidanithandiza kukhulupirira kuti kuli Mulengi sikuti ni vomwe nidapfunzira pa nkhani ya sayantsi vokha, komasoti ndawa ya vomwe nidapfunzira mosamala mu Baibolo. Panango imwepo munkudziwa kale vinthu vizinji va m’Baibolo.’ Podiya vili tene, kuti mupitirize kukhala na chikhulupiriro cholimba muchadekana kupfunzira Mawu ya Mulungu. (Yos. 1:8; Sal. 119:97) Mwakulinganiza, ganizirani vinthu vomwe Baibolo idaleweratu bwinobwino kuti vidzachitike ndipo ivo nkuchitikadi. Khalani na chidwi na maulosi mwaya na kuwona momwe yadakwanirisikira ndendende. Mukachita vimwevi, mudzatsimikizire kuti Mulengi wanzeru na wachikondi ndiye adatilenga ndipo ndiye adauzira Baibolo. *—2 Tim. 3:14; 2 Pet. 1:21.
13. Ko ni chitsanzo chiponi cha nzeru zogumanika m’Mawu ya Mulungu?
13 Mukambapfunzira Mawu ya Mulungu, wonani momwe malangizo yaliri yothandiza. Mwakulinganiza, kalekale Baibolo idaleweratu kuti kukonda kobiri ni ngozi ndipo kubweresa ‘vowawa vizinji.’ (1 Tim. 6:9, 10; Miy. 28:20; Mat. 6:24) Ko idakali ngozi namanje? Bukhu inango yofotokoza momwe wanthu aliri ntsiku zino idati: ‘Tikapenda bwinobwino, wanthu womwe aganiza kuti angakhale wokondwa pokhapokha akakhala na chuma chizinji alibe chimwemwe ndipo andokhala wokwinyirira. Olo wanthu womwe anakobiri zizinji andokhalira kushupika na moyo.’ Ndipomwapa malangizo ya m’Baibolo yakuti osati timbakonde kobiri ni yothandiza maninge. Ko imwepo munkudziwako malangizo yanango ya m’Baibolo yomwe ni yothandiza maninge? Tikambalemekeza malangizo ya m’Baibolo, tidzathembe maninge nzeru zochokera kwa Mulengi wathu wachikondi. (Yak. 1:5) Phindu yake niyakuti tidzakhale wokondwa maninge.—Yes. 48:17, 18.
14. Mukambapfunzira Baibolo, ko muzadziwe chani va Yahova?
14 Pfunzirani Baibolo na cholinga chakuti mumudziwe bwino Yahova. (Yoh. 17:3) Mukambapfunzira Malemba muzadziwe makhalidwe ya Yahova. Ndipo makhalidwe mwaya ni yabodzibodzi yomwe mudayapfunzira mu chilengedwe. Kupfunzira makhalidwe ya Yahova kungakutsimikizireni kuti iye alikodi. (Eks. 34:6, 7; Sal. 145:8, 9) Mukambamudziwa bwinobwino Yahova, imwepo mudzayambe kumukhulupirira maninge, chikondi chanu kwa iye chidzakule ndipo mudzakhale naye paushamwali wolimba.
15. Ko mudzaphindule tani mukambauza anango vomwe muchakhulupirira?
15 Mumbauzeko anango vomwe muchadziwa va Mulungu. Mukambachita vimwevi, chikhulupiriro chanu chidzalimbe maninge. Ko mungachite tani peno munthu yemwe munkumulalikira ankukhulupiralini kuti Mulungu aliko ndipo imwepo munkusowa kuti mumudawire tani? Yesesani kugumana m’dawiro m’mabukhu yathu ndipo patsogolo pake kamufotokozereni. (1 Pet. 3:15) Mungabvunze pomwe wofalisa wodziwa vizinji kuti akuthandizeni. Peno iye akhulupirire m’dawiro wa m’Baibolo panango neye, imwepo mudzaphindule maninge ndawa ya kufagafaga kwanu. Mudzakhale na chikhulupiriro cholimba. Phindu yake ni yakuti, imwepo mudzanamiziwelini na nzeru za wanthu womwe achawoneka kuti niwopfunzira maninge akambakuuzani kuti kulibe Mulengi.
KHALANI NA CHIKHULUPIRIRO CHOLIMBA
16. Ko nchani chingachitike peno taleka kulimbisa chikhulupiriro chathu?
16 Vilibe basa kuti tatumikira Yahova kwa nthawe itali tani, tichadekana kupitiriza kulimbisa chikhulupiriro chathu chakuti iye aliko. Ndawa chani? Ndawa yakuti tikaleka kusamala, chikhulupiriro chathu chingafoke. Kumbukirani kuti chikhulupiriro chichaphatanidzapo kukhulupirira vinthu vosawoneka koma votsimikizika. Vinthu vomwe tiviwonalini, tingaviyebwe mosashupa. Ndipo Paulo adati kusowa chikhulupiriro ‘ni chimo yomwe itikasha mosashupa.’ (Aheb. 12:1) Manje tingachite tani kuti tileke kukashiwa mu msampha moyu?—2 Ates. 1:3.
17. Ko chingatithandize nchani kupitiriza kukhala na chikhulupiriro cholimba?
17 Chakuyamba, kumbirani Yahova kuti akupaseni mzimu wake, ndipo mbachitani vimwevi nthawe zose. Ndawa chani? Ndawa yakuti chikhulupiriro ni chipaso cha mzimu. (Agal. 5:22, 23) Isepano tingakwaniselini kulimbisa chikhulupiriro chathu mosathandiziwa na mzimu wakuchena. Tikapitiriza kukumbira Yahova kuti atipase mzimu wake, iye adzatipase. (Luka 11:13) Isepano patekha timbakumbire kuti: ‘Tiingizireni chikhulupiriro.’—Luka 17:5.
18. Mobverana na Salimo 1:2, 3, ko ni mphaso iponi yatingakondwe nayo ntsiku zino?
18 Kuthimizira mwapa, mbapfunzirani mwakhama Mawu ya Mulungu pamwekha. (Lewengani Salimo 1:2, 3.) Pomwe Salimo mweyi imbanembewa, Aizirayeli ang’onong’ono ndiwo enze adamalizako kukopera Chilamulo cha Mulungu. Podiya venze tene, venze vokwanisika kuti mafumu na wantsembe akhale nacho Chilamulo. Ndipo pa magole 7 yaliyose pambachitiwa makonzedwe yakuti ‘amuna, akazi, wana’ na alendo wokhala mu Izirayeli kuti abvesere kuwerengewa kwa Chilamulo cha Mulungu. (Deut. 31:10-12) Mu ntsiku za Yesu, mipukutu imbandogumanika na wanthu ang’ong’ono na m’masunagoge basi. Koma ntsiku zino, azinji ise tinayo Mawu ya Mulungu. Moyu ni mwayi ukulu maninge. Ko tingawonese tani kuti tichatembeja mwayi wokhala na Baibolo?
19. Ko tichadekana kuchita chani kuti tikhale na chikhulupiriro cholimba?
19 Isepano tingawonese kuti tinkutembeja mwayi moyu wokhala na Mawu ya Mulungu mwa kuyalewenga nthawe zose. Osati timbandopfunzira pokhapokha tikakhala na mpata. Peno tingambapfunzire nthawe zose, tidzakhale na chikhulupiriro cholimba.
20. Ko tichadekana kukhala wotsimikiza kuchita chani?
20 Mosiyana na ‘wanthu wopfunzira na wanzeru’ wa mudziko ino, ise chikhulupiriro chathu nchozikika pa Mawu ya Mulungu. (Mat. 11:25, 26) Ndawa ya kupfunzira mosamala Mawu ya Mulungu, tinkudziwa kuti ndawa chani mudziko munamabvuto yazinji na momwe Yahova adzayamalisire. Ndipomwapa naboni tikhale wotsimikiza kulimbisa chikhulupiriro chathu kuti timbakhulupirire maninge Mulengi wathu. (1 Tim. 2:3, 4) Ndipo naboni tipitirize kudikhira nthawe yomwe munthu aliye wokhala padziko yapasi adzatamande Yahova na kulewa mawu yomwe yali pa Chivumbulutso 4:11 yakuti: ‘Ndimwe wodikana Yahova Mulungu wathu kutambira ulemerero . . . ndawa yakuti mudalenga vinthu vose.’
NYIMBO NA. 2 Dzina Lanu Ndinu Yehova
^ ndi. 5 Malemba yachatipfunzisa kuti Yahova Mulungu ni Mulengi. Koma wanthu azinji akhulupiriralini vimwivi. Iwo achati moyo udandokhalako wokha. Vomwe iwo achakhulupirira vingatidzongelini peno tinkuchita khama kulimbisa chikhulupiriro chathu chakuti kuli Mulungu nakuti Baibolo ni mawu yake. Munkhani ino tikambirane momwe tingachitire vimwivi.
^ ndi. 5 M’mashikola yazinji yodziwika, maticha yachafotokozakolini kuti moyo wathu udachita kulengewa. Maticha yanango yachati kupfunzisa aluno nkhani mwizi nkuwaphera ufulu wa chipembedzo.
^ ndi. 7 Nkhani za wanthu wopfunza woposha 60 kuphatanidzapo wasayantsi womwe achakhulupirira kuti vinthu vidachita kulengewa zinkugumanika mu bukhu yakuti Índice das Publicações da Torre de Vigia. Mungawone msolo wakuti “Ciência” ndipo fagani pakuti “cientistas expressando crença na criação.” Zinango mwa nkhani zimwezi zinkugumanika mu Buku Lofufuzira Nkhani la Mboni za Yahova. Mungazigumane pa msolo wakuti: “Sayansi ndi Luso la Zopangapanga,” fagani pa ka msolo kakuti: “‘Kucheza ndi Munthu Wina’ (Nkhani za mu Galamukani!).”
^ ndi. 12 Mwakulinganiza, onani nkhani yakuti: “Kodi Sayansi ndi Baibulo Zimagwirizana?” mu Galamukani! ya Fevereiro 2011 na nkhani yakuti: “Zimene Mulungu Amalosera Zimakwaniritsidwa” mu Nsanja ya Olonda ya Janeiro 2008.
