1. Со сиклиљан башо амаро Створители?

АКО бариљан сар јекх таро е Јеховаскере сведокија, веројатно таро тикнипе сиклиљан башо Јехова. Сикавѓе тут кај ов тано о Створители, кај иси ле бут шуже особине хем кај иси ле шужи намера е манушенцар (1. Мој. 1:1; Дела 17:24-27).

2. Со мислинена несаве башо окола со верујнена ко Створители?

² Бут мануша на верујнена кај иси Девел, или кај ов створинѓа са о буќа. Наместо адава, ола верујнена кај о живото уло случајно хем кај похари развинѓа пе таро едноставна жива материе ко посложена врсте живото. Несаве таро адала мануша тане бут школујме. Ола шај вакерена кај и наука докажинѓа кај и Библија нане точно хем кај окола со верујнена ко Створители нане школујме, нане интелигентна хем кај тане наивна.

3. Соске тано важно те бајраре тли вера?

³ Дали адава со вакерена несаве школујме мануша ка чхивел амен те сумнина амен кај о Јехова тано амаро Створители? Акава бут зависинела таро адава соске верујнаја кај о Јехова тано Створители. Дали верујнаја адалеске со сикавѓе амен аѓаар те верујна, или адалеске со амен коркори испитинѓем о доказија? (1. Кор. 3:12-15). Бизи разлика кобор време сием е Јеховаскере сведокија, сарине амен понадари да ваљани те бајрара амари вера. Ако кераја аѓаар, тегани окола со вакерена кај и Библија нане точно, ка нашти те ховавен амен „филозофијаја хем ховавне хем чуче лафенцар“ (Кол. 2:8; Евр. 11:6). Акаја статија ка поможинел аменге те дикха 1) соске бут џене на верујнена ко Створители, 2) сар шај те градине тли вера ко Јехова, тло Створители хем 3) сар шај те икере зорали тли вера.

4. Спрема Евреите 11:1, ко со темелинела пе и чачутни вера?

⁴ Несаве мануша мислинена кај те овел тут вера значинела те верујне ко нешто бизо доказ. Ама, спрема и Библија, адаја нане чачутни вера. (Читин Евреите 11:1.) И Библија објаснинела кај и вера темелинела пе ко јасно доказ. Адалеске, иако нашти те дикха е Јехова, е Исусе хем о Царство, амен иси амен доказ кај ола постојнена (Евр. 11:3). Јекх научнико со уло е Јеховаскоро сведоко вакерела: „Амен верујнаја ко буќа коленде со иси амен темели хем на игнориринаја о научна доказија“.

5. Соске бут мануша на верујнена кај иси Створители кова со керѓа о живото?

⁵ Шај те пуча амен: „Ако иси јасна доказија кај иси Створители, тегани соске бут мануша на верујнена кај о Девел створинѓа о живото?“ Несаве мануша никогаш коркори на испитинѓе о доказија. О Роберт, кова со акана тано јекх таро е Јеховаскере сведокија, вакерела: „Адалеске со ки школа никогаш на спомнинела пе сине и идеја башо створибе, ме мислинава сине кај о живото на уло преку створибе. Ама кеда сине ман 22 берш, тегани керѓум лафи е Јеховаскере сведоконцар хем дознајнѓум тари Библија логична хем уверлива доказија кај о Девел створинѓа са“. * (Дикх и рамка „ Јекх поттик џи ко родителија“.)

6. Соске несаве на мангена те верујнен ко Створители?

⁶ Несаве на верујнена кај иси Створители соске вакерена кај верујнена само ко адава  со шај те дикхен. Ама уствари ола верујнена ко несаве буќа со нашти те дикхен лен, а иси лен доказ кај чаче постојнела сар на пример и гравитација. И вера сој спомними ки Библија вклучинела доказија башо буќа со постојнена иако нашти те дикха лен (Евр. 11:1). Ваљани време хем трудо те шај коркори те испитина о доказија, ама бут мануша на мангена те керен адава. Јекх мануш кова со коркори на испитинела о доказија шај те мислинел песке кај нане Девел.

7. Дали са о школујме мануша на верујнена кај о Девел створинѓа са? Објаснин.

⁷ Несаве научникија откеда испитинѓе о доказија, уверинѓе пе кај о Девел створинѓа о универзум. * Слично сар о Роберт, со спомнинѓем ле англедер, несаве шај мислинена песке сине кај нане Створители соске  ко факултети никогаш на керела пе сине лафи башо створибе. Сепак, бут научникија дознајнѓе башо Јехова хем замангле ле. Исто сар акала научникија, амен да мора те бајрара амари вера ко Девел бизи разлика кобор сием школујме. Никој јавер нашти те керел адава аменге ко тхан.

8-9. а) Башо кова пучибе ка кера лафи? б) Сар ка поможинел туке адава со ка истражине о створиме буќа?

⁸ Сар шај те бајраре тли вера ко Створители? Те дикха штар начинија.

⁹ Истражин о створиме буќа. Шај те бајраре тли вера ко Створители аѓаар со внимателно ка дикхе е животнен, о растенија хем о ѕвезде (Пс. 19:1; Иса. 40:26). Со повише истражинеа башо асавке буќа, добором повише ка уверине тут кај о Јехова тано о Створители. Ки амари литература бут пути шај те аракха статие коте сој објаснимо ко деталија сар тане створиме несаве буќа. Читин акала статие чак ако туке пхаро те хаљове лен. Сикљов кобор со шај повише. Хем ма бистре палем те дикхе ки амари интернет-страница jw.org о бут шуже видеоклипија башо створиме буќа кола со сине сикавде ко амаре регионална конгресија ко последна берша.

10. Вакер пример кова со докажинела кај иси Створители. (Римјаните 1:20)

¹⁰ Кеда истражинеа о створиме буќа, приметин со шај те сикљове лендар башо амаро Створители. (Читин Римјаните 1:20.) На пример, о кхам таќарела хем дела светлина, нешто сој бут потребно башо живото. Сепак, несаве таро зракија со авена таро кхам шај те овен е манушенге бут штетна. Ама, амен сием лендар заштитиме. Сар? Амаре пхувја иси ла пло штити, адава тано јекх слој таро гаси озон кова сој околу и пхув хем заштитинела ла таро штетна зракија. Со посилна овена акала штетна зракија, добором повише озон створинела пе. Со мислинеа, дали са акава уло случајно, или иси јекх љубезно хем интелигентно Створители кова со створинѓа са акава?

11. Коте шај те аракхе доказија кола со шај те бајрарен тли вера ко створиме буќа? (Дикх и рамка „ Информацие кола со шај те бајрарен тли вера ко Створители“.)

¹¹ Ако родеа ки јw.org, шај те аракхе бут доказија кола со шај те бајрарен тли вера ко створиме буќа. Шај те почмине аѓаар со ка разгледине о статие тари рубрика „Случајно или создадено?“ Ки ленде ко јекх кратко начин сикавена пе некобор бут интересна информацие башо животне хем растенија. Атхе исто аѓаар иси примерија сар о научникија пробинѓе те копиринен адава со дикхле ки природа.

12. Кола тане несаве буќа со ваљани те приметина кеда проучинаја и Библија?

¹² Проучин и Библија. О научнико коле со спомнинѓем ле англедер, ко почеток на верујнела сине кај иси Створители ама пало несаво време ов почминѓа те верујнел. Ов вакерела: „Мли вера на темелинела пе сине само ко адава со сиклиљум тари наука него исто аѓаар ко адава со хор проучинѓум и Библија“. Шај више џанеа и Библија шукар, ама те шај те бајраре тли вера ко Створители ваљани понадари да те проучине е Девлескоро Лафи (Ис. Нав. 1:8; Пс. 119:97). На пример, приметин кобор детално и Библија пишинела башо несаве историска настанија. Размислин башо адава сар исполнинѓе пе о пророштвија сој ки лате, хем сар цело Библија тани ко склад. Ако кераја аѓаар, панда повише ка уверина амен кај јекх љубезно, мудро Створители керѓа амен хем кај ов  денѓа амен и Библија * (2. Тим. 3:14; 2. Пет. 1:21).

13. Вакер јекх пример кова со сикавела кај о советија таро о Девлескоро Лафи тане корисна.

¹³ Кеда проучинеа е Девлескоро Лафи приметин кобор корисна советија иси ки лесте. На пример, и Библија панда бут одамна предупрединѓа кај о мангипе спрема о паре тано штетно хем анела бут дукха (1. Тим. 6:9, 10; Изр. 28:20; Мат. 6:24). Дали акава важинела авдиве да? Јекх лил кова со керела лафи башо е манушенгоро стави ко авдисутно време, вакерела: „Обично о мануша сој материјалистија нане бут бахтале хем тане подепресивна. Чак окола со бут мангена те заработинен повише паре нане бахтале хем иси лен проблемија састипаја“ (The Narcissism Epidemic). Кобор тано корисно о библиско предупредување кај на ваљани те манга о паре. Шај ли те сетине тут ко јавера библиска начелија кола со сине туке корисна? Со повише ценинаја о библиско совет, добором повише ка овел амен доверба кај амаро Створители џанела сој аменге најшукар хем секогаш ка рода лестар совет (Јак. 1:5). Тегани амаро живото ка овел побахтало (Иса. 48:17, 18).

14. Со шај те сикљове башо Јехова ако проучинеа и Библија?

¹⁴ Џикоте проучинеа и Библија, тли цел ваљани те овел пошукар те пенџаре е Јехова (Јован 17:3). Аѓаар ка сикљове башо лескере особине, хем ка дикхе кај адала иста особине шај те аракхен пе ко буќа со створинѓа лен. Кеда сикљоваја баши ленде, оваја поувериме кај о Девел чаче постојнела (2. Мој. 34:6, 7; Пс. 145:8, 9). Со повише сикљовеа башо Јехова, добором повише тли вера хем тло мангипе спрема лесте ка бајрон хем тумаро амалипе ка овел позорало.

15. Сави корист ка овел тут ако кереа јаверенцар лафи баши тли вера?

¹⁵ Кер е јаверенцар лафи баши тли вера ко Девел. Џикоте кереа адава тли вера ка овел позорали. Ама со ако некој каске со проповединеа сумнинела пе дали иси Девел а ту на џанеа со те вакере? Пробин те аракхе библиско одговор ко амаре публикацие, хем пало адава кер леа лафи (1. Пет. 3:15). Шај исто аѓаар те пуче поискусно објавителе те поможинел туке те аракхе одговор. Бизи разлика дали о јавер ка прифатинел о одговор или на, тут ка овел тут корист таро адава со истражинѓан. Тли вера ка овел позорали. Сар резултати, нане те верујне е манушенге, кола со дикхјона мудра хем бут школујме, кеда ка вакерен кај нане Створители.

16. Со шај те случинел пе ако понадари да на бајрараја хем на икераја амари вера зорали?

¹⁶ Бизи разлика кобор време служинаја е Јеховаске амен мора понадари да те бајрара хем те икера амари вера зорали. Соске? Ако на пазинаја, амари вера шај те слабонел. Сар со дикхлем, и вера темелинела пе ко доказија башо буќа со постојнена а нашти те дикхен пе. А адава со нашти те дикха, шај сигате те бистра. Адалеске о Павле вакерѓа кај, ако нане амен вера, о грево шај локхе те чхивел амен ки стапица (Евр. 12:1). Тегани сар шај те избегина адаја стапица? (2. Сол. 1:3).

17. Со ка поможинел аменге те икера амари вера зорали?

¹⁷ Прво, редовно молин е Јехова те дел тут пло свети дух. Соске? И вера тани особина  која со авела таро свети дух (Гал. 5:22, 23). Амен нашти те бајрара амари вера ко Створители хем те икера ла зорали бизо лескоро свети дух. Ако редовно молинаја е Јехова башо лескоро духо, ов ка дел ле аменге (Лука 11:13). Шај чак конкретно те молина ле те дел амен „повише вера“ (Лука 17:5).

18. Спрема Псалм 1:2, 3, кова скапоцено поклон иси амен?

¹⁸ Исто аѓаар, редовно проучин е Девлескоро Лафи. (Читин Псалм 1:2, 3.) Кеда сине пишимо акава Псалм само некоборе Израелцон сине лен цело примерок таро е Девлескоро закони. Ама, о цари хем о свештеникија шај сине те овен лен примерокија хем секола ефта берш сине керде подготовке те шај о мурша, о џувља, о чхаве хем окола со на сине Израелција те шунен сар читинела пе е Девлескоро закони (5. Мој. 31:10-12). Ко е Исусескоро време о свитокија таро списија шај сине те аракхен пе само ко некобор мануша хем ко синагоге. Ама авдиве побаро дело таро мануша иси лен цело Библија или барем дело латар. Акава тано јекх чаче скапоцено поклон. Сар шај те сикава кај ценинаја акава поклон?

19. Со ваљани те кера те шај те икера амари вера зорали?

¹⁹ Ка сикава кај ценинаја е Девлескоро Лафи аѓаар со секова диве ка читина ле. Ваљани те одвојна аменге време те читина хем те проучина и Библија, а на те кера адава само ако иси амен време. Ако редовно проучинаја, тегани ка икера амари вера зорали.

20. Ко со ваљани те ова одлучна?

²⁰ Различно таро мудра хем бут школујме мануша таро акава свето, амари вера темелинела пе ко е Девлескоро Лафи (Мат. 11:25, 26). Адалеске со проучинаја е Девлескоро Лафи, амен џанаја соске о условија ки Пхув тане добором лошна хем со ка керел о Јехова башо адава. Адалеске, те ова одлучна те кера зорали амари вера хем те поможина со повише манушенге те овел лен вера ко амаро Створители (1. Тим. 2:3, 4). Хем понадари да те ова спремна те аџикера о време кеда секова јекх ки Пхув ка славинел е Јехова хем ка вакерел о лафија таро Откровение 4:11: „Моќно Јехова, ту сиан амаро Девел хем заслужинеа сарине те славинен тут... соске ту керѓан са о буќа“.