1. So te roditeljija sikavđe tut ando okova kova sa ćerđa?

AKO tane te roditeljija e Jehovase svedokija, on sigurno pana kotar tiknipe sikavđe tut ando Jehova. On sikavđe tut so o Jehova tano okova kova sa ćerđa, so isi le but šuže osobine hem so mangela te ćerel i phuv te ovel raj (Post. 1:1; Dela 17:24-27).

2. Sar disave manuša dikhena upro okola kola verujinena so postojini o Stvoritelj?

² But manuša na verujinena so postojini o Devel, hem so ov sa ćerđa. On verujinena so sa ulo slučajno hem so kotar jekh jednostavno životno oblik ulje sa avera životna oblikija. Čak disave but školujime manuša verujinena ko akava. On phenena so i nauka mothovđa so odova so pisini ki Biblija nane tačno hem so samo o manuša kola nane but školujime hem kolen šaj lokho te hovave verujinena so postojini o Stvoritelj.

3. Sose tano važno hem ponodri te ovel amen zorali vera?

³ So valjani te ćera ako na mangaja upro amende te utičini akale manušengo razmislibe? But tano važno te đana sose verujinaja so o Jehova tano okova kova sa ćerđa. Da li ko odova verujinaja samo sose neko phenđa amenđe odova ja sose kokri amen uverinđam amen ko odova? (1. Kor. 3:12-15). Kobor god dugo te služina e Jehovase važno tano hem ponodri te ćera ko odova te ovel amen zorali vera. Tegani, na ka prevarinen amen o manuša kola phenena so odova so pisini ko e Devleso Lafi nane tačno (Kol. 2:8; Jevr. 11:6). Ko akava članko ka dikha trin buća: (1) Sose but manuša na verujinena so postojini o Stvoritelj, (2) sar šaj te uverine tut so o Jehova tano okova kova sa ćerđa hem (3) so valjani te  ćera te šaj amari vera hem ponodri te ovel zorali.

4. Premalo Jevrejima 11:1, ko so temeljini pe amari vera?

⁴ Disave manuša mislinena so te ovel tut vera značini te verujine ko diso bizo dokazija. Ama, i Biblija mothovi so odova nane pravo vera. (Čitin Jevrejima 11:1.) Oj vaćeri so i pravo vera temeljini pe ko dokazija. Iako našti te dikha e Jehova, e Isuse hem e Devleso Kraljevstvo, amen isi amen dokazija so on ćaće postojinena (Jevr. 11:3). Jekh naučnik kova kasnije ulo e Jehovaso svedoko, phenđa: „E Jehovase svedokija isi len dokazija aso sa o buća ko kola verujinena. Odova ko so on verujinena slažini pe e naukaja.“

5. Sose but manuša mislinena so na postojini o Stvoritelj?

⁵ Ama, šaj pućaja amen: „Ako isi odobor buća kola mothovena so postojini o Stvoritelj, tegani sose but manuša na verujinena so o Devel tano okova so sa ćerđa?“ Disave manuša niked na rodinđe dokazija aso odova ko so verujinena. O Robert kova tano akana amaro phral, phenela: „Ki škola niked na sikavđe amen so postojini o Stvoritelj. Odolese, mislinđum so o Stvoritelj na postojini. Ked hine man 22 berš, vaćerđum e Jehovase svedokonencar. On koristinđe i Biblija te mothoven maje sose tano logično te verujina so postojini o Stvoritelj.“ * (Dikh o okvir „ Jekh molba e roditeljenđe.“)

6. Sose disave manuša na verujinena so postojini o Stvoritelj?

⁶ Disave manuša na verujinena so postojini o Stvoritelj, sose on phenena so šaj te  verujinen samo ko buća kola šaj te dikhen pe jaćhencar. Ama, isi disave buća kola na dikhena pe, a sare amen verujinaja so postojinena. Na primer, i bavlal, iako na dikhaja la, verujinaja so postojini sose osetinaja la ked phudela. Isto ađahar, i vera andi koja i Biblija vaćeri valjani te temeljini pe ko buća kola tane „ćaće, iako na dićhona“ (Jevr. 11:1). Te šaj te arakha dokazija aso odova ko so verujinaja, valjani te odvojina hari vreme. Ama, but manuša na mangena te roden dokazija. Odolese, šaj te mislinen so o Stvoritelj na postojini.

7. Da li sa o školujime manuša mislinena so o Devel na postojini? Objasnin.

⁷ Palo odova so ispitinđe o dokazija, disave naučnikija uverinđe pe so o Devel tano okova kova sa ćerđa. Sar o Robert, kolestar vaćerđam angleder, disave olendar na verujinđe so postojini o Stvoritelj, sose ki škola na sikavđe len odolestar. Ama, but naučnikija penđarđe e Jehova hem ulje paše oleja. Sar  on, hem amen valjani te zorjaćera amari vera ko Devel, bizo obzir da li hijam školujime ja na. Niko našti te ćerel odova umesto amende. *

8-9. (a) Sostar ka vaćera akana? (b) Sose tano šukar te sikljova ando buća soj tane stvorime?

⁸ Sar šaj te ovel tut pana pobari vera ko odova so postojini o Stvoritelj? Akana ka dikha štar buća kola ka pomožinen amen ko odova.

⁹ Sikljov kotar o buća soj tane stvorime. Sa soj tano stvorimo – o životinje, o biljke hem o ćerenja – šaj te pomožini amen te ovel amen pana pobari vera ko odova so postojini o Stvoritelj (Ps. 19:1; Is. 40:26). So pobuter sikljovaja ando buća soj tane stvorime, pana pobuter ka ova uverime so o Jehova sa stvorinđa. Ko amare publikacije šaj te arakha člankija kola vaćerena ando odova soj tano stvorimo. Iako podijekh puti šaj te ovel amenđe pharo te haljova asavke člankija, šukar tano te čitina len. Kobor god šaj, sikljov ando buća soj tane stvorime. Isto ađahar, ma bistri te đa ko amaro sajt. Odothe šaj te dikhe o video-materijali ando amare regionalna kongresija, kova vaćeri ando buća soj tane stvorime.

10. Vaćer jekh primer kova mothovi so postojini o Stvoritelj. (Rimljanima 1:20)

¹⁰ Đi sikljoveja ando odova soj tano stvorimo, razmislin so odova mothovi tuće ando Stvoritelj. (Čitin Rimljanima 1:20.) Na primer, o Kham dela amen sa so valjani te šaj te živina ki phuv. Dela amen svetlost hem taćari amen. Ama, o Kham mukhela o ultraljubičasta zrakija kola tane štetna. Ama, amen hijam zaštitime. Sar? Okolo amari phuv isi o ozonsko omotači kova štitini amen ando odola štetna zrakija. Soj tano o zračenje pozoralo hem i količina ando ozon barjola. So tu mislineja, da li akava mothovi tuće so postojini jekh mudro Stvoritelj kova but mangela e manušen?

11. Kuri šaj te arakhe o informacije kola mothovena so postojini o Stvoritelj? (Dikh o okvir „ O publikacije kola zorjaćerena ti vera“.)

¹¹ Ko Indeks publikacija hem ko amaro sajt, šaj te arakhe but informacije kola šaj te pomožinen tut te uverine tut so postojini o Stvoritelj. Šaj te čitine o člankija hem te dikhe o video-materijali kotar serija ando člankija „Da li je to neko osmislio?“ Odola tikne člankija vaćerena kotar disave zanimljiva buća ando životinje hem ando biljke. Isto ađahar, on mothovena sar o naučnikija, premalo odova so dikhena ki priroda, ćerena razna šukar buća.

12. Ando kola buća valjani te razmislina đi proučinaja i Biblija?

¹² Proučin i Biblija. O naučnik, kolestar vaćerđam ko štarto odlomko, na verujinđa odmah ko odova so postojini o Stvoritelj. Hari po hari, ov uverinđa pe ko odova. Ov phenela: „Mi vera ko odova so postojini o Stvoritelj, na temeljinđa pe samo ko naučna buća, već hem ko odova so sikljiljum ando e Devleso Lafi.“ Šaj hem tu šukar penđareja e Devleso Lafi. Ama, te šaj te ovel tut pana pobari vera, valjani hem ponodri te proučine i Biblija (Is. Nav. 1:8; Ps. 119:97). Đi ćereja odova, dikh sar i Biblija tačno vaćeri ando događaja kola ulje beršencar angleder. Dikh sar ispuninđe pe o proročanstvija andi Biblija hem sar odova so e biblijake piscija pisinđe,  slažini pe jekh jekheja. Odova ka pomožini tut te uverine tut so jekh mudro Stvoritelj ćerđa amen hem so i Biblija tani oleso Lafi (2. Tim. 3:14; 2. Petr. 1:21). *

13. Vaćer jekh primer kova mothovi kobor tane šukar o savetija andi Biblija.

¹³ Đi proučineja i Biblija, dikh kobor tane šukar olake savetija. Na primer, beršencar angleder ki Biblija hine vaćerdo so o mangipe premalo pare na anela ništa šukar (1. Tim. 6:9, 10; Posl. 28:20; Mat. 6:24). Da li tano hem avdije ađahar? Ki jekh knjiga, koja mothovi sar o manuša avdije razmislinena, pisini: „O manuša kola mislinena soj tano najvažno te ovel tut but pare, nane bahtale hem but tane depresivna. Čak hem o manuša kola samo mangena te ovel len hari pobuter pare, nane bahtale hem isi len but problemija sastipaja.“ Akava mothovi kobor tano mudro odova so i Biblija vaćeri ando mangipe premalo pare. Da li šaj te setine tut ko pana disave savetija andi Biblija kola pomožinđe tuće? Ked razmislinaja ando savetija kotar i Biblija, ka dikha so amaro Stvoritelj đanela soj tano najšukar amenđe hem uvek ka roda savet olestar (Jak. 1:5). Sebepi odova, ka ova pana pobahtale (Is. 48:17, 18).

14. So šaj te sikljove ando Jehova đi proučineja e Devleso Lafi?

¹⁴ Ked proučineja e Devleso Lafi, to cilj valjani te ovel te penđare e Jehova pana pošukar (Jov. 17:3). Odova ka pomožini tut te haljove save osobine o Jehova isi le. Ista odola osobine ka dikhe ked razmislineja ando buća soj tane stvorime. Đi sikljoveja ando olese osobine, ka uverine tut so ov ćaće postojini (Izl. 34:6, 7; Ps. 145:8, 9). So pošukar penđareja le, ti vera ka ovel pana pobari, pana pobuter ka mange le hem ka ove pana popaše oleja.

15. Sose tano šukar te vaćere averencar ando Devel?

¹⁵ Vaćer averencar ando Devel. Sebepi odova, ti vera ka ovel sa pobari. Ama, so ako neko phenela tuće so na verujini so o Devel postojini? So ako na đaneja so te phene ko odova? Ko amare publikacije šaj te dikhe so i Biblija vaćeri odolestar. Odova so arakhljan, koristin đi vaćereja e manušeja (1. Petr. 3:15). Isto ađahar, šaj te puće jekhe iskusno phrale, ja jekha phenja te pomožini tut te odgovorine ko odova pućibe. Ama, čak iako odova manuš na prihvatini o odgovor andi Biblija, tuće ka ovel korisno so istražinđan odija tema. Ti vera ka ovel pana pozorali. Sebepi odova, čak ako neko koj tano školujimo phenela so na postojini o Stvoritelj, tu na ka verujine ko odova hovajbe.

16. Sose tano važno amari vera hem ponodri te ovel zorali?

¹⁶ Kobor god dugo te služina e Jehovase, valjani te da sa amendar hem ponodri amari vera te aćhol zorali. Odova tano važno, sose ako na hijam oprezna, šaj te našala amari vera. Sar so dikhljam, amari vera temeljini pe ko buća kola tane ćaće, ama kola na dićhona. Odova so na dikhaja, lokho šaj te bistra. O apostol Pavle phenđa so ked neko nane le dovoljno vera odova tano „greh kova lokho šaj te peravi amen“ (Jevr. 12:1). Odolese, so valjani te ćera te šaj amari vera hem ponodri te ovel zorali? (2. Sol. 1:3).

17. So šaj te pomožini amen te ovel amen pobari vera?

¹⁷ Najangleder, but putija molin e Jehova te del tut po sveti duh. Odova tano važno sose i vera tani plod ando e Devleso sveti duh  (Gal. 5:22, 23). Bizo e Devleso sveti duh našti te ovel amen vera. Ako molinaja e Jehova te del amen po sveti duh, ov ka ćerel odova (Luka 11:13). Čak, đi molinaja amen e Jehovase, šaj te phena: „De amen pobuter vera“ (Luka 17:5).

18. Premalo Psalam 1:2, 3, savo poklon dobinđam?

¹⁸ Uzo odova, redovno proučin e Devleso Lafi. (Čitin Psalam 1:2, 3.) Ked akava psalam hine pisimo, samo disave Izraelcija, maškaro kola hine o kralj hem o sveštenikija, hine len o prepisime primerkija ando e Devleso zakon. Svako eftato berš, o murša, o đuvlja, o ćhave hem o strancija, ćedinđe pe hem anglo lende čitinđa pe e Devleso zakon (Pon. zak. 31:10-12). Ko e Isuseso vreme samo disave manuša hine len o svitkija ja šaj hine te arakhen pe samo ko sinagoge. Ama, avdije but manuša šaj te čitinen disave delovija ja celo e Devleso Lafi. I Biblija tani ćaće poklon ando Devel. Sar šaj te mothova so ceninaja odova poklon?

19. So valjani te ćera te šaj amari vera hem ponodri te aćhol zorali?

¹⁹ Amen šaj te mothova so hijam zahvalna asi Biblija, ako čitinaja la svako dive. Valjani te ovel amen raspored ked ka čitina la hem ked ka proučina la, a na te ćera odova samo ked isi amen vreme. Ako ćeraja ađahar, amari vera hem ponodri ka aćhol zorali.

20. So valjani te ćera hem ponodri?

²⁰ Amari vera hem e manušengi vera but razlikujini pe. Amari vera temeljini pe ko dokazija ando e Devleso Lafi (Mat. 11:25, 26). E Devleso Lafi mothovi amenđe sose isi odobor lošnipe ki phuv hem so ka ćerel o Devel pana hari. Odolese, mangaja hem ponodri te ćera ki amari vera hem mangaja te pomožina averenđe te uverinen pe so postojini o Stvoritelj (1. Tim. 2:3, 4). Jedva ađićeraja o dive ked sarine ki phuv ka hvalinen e Jehova e lafencar ando Otkrivenje 4:11: „Jehova, Devla amaro, dostojno hijan te primine i slava, i čast hem i moć, sose tu sa stvorinđan hem te voljaja sa ulo hem stvorimo tano.“