1. Bici wayigirizibwe okubiyerekire Omulemi?

ERHI akaba ababusi bawe baba Bahamirizi ba Yehova, byanahashikana erhi wayigirizibagwa okubiyerekire Yehova kurhenga oli mwana murho. Bakuyigiriza oku yeba Mulemi, oku ajira amorhere minja bwenene n’oku ajira omuhigo mwinja gw’obuzigire kuyerekera bene bantu.​—Murh. 1:1; Ebj. 17:24-27.

2. Gurhi bantu baguma baguma babona balya babà bayemire oku haba Omulemi?

² Cikone bantu banji barhayemera oku ho Nnâmahanga aba, ciru barhanayemera oku yeba Mulemi. Babà bayemire oku obuzine bwarhonderaga ntya-ntya kone, mpu na buzinda bwayisha bwahinduka bunyi-bunyi kuhika bwahikira aha bwaba buzine buyenire. Baguma baguma ba muli abo bantu babà basomire bwenene. Banaderha mpu esiyanse yayerekine oku Ebibliya erhaba edesire okuli n’oku abantu barhamanyiri kantu, abarhagwerhi bwenge, n’abakarhebwa duba-duba bo babà bayemire oku haba Omulemi.

3. Bulya gurhi kuli kwa bulagirire okuzibuhya obuyemere bwirhu?

³ K’ezo ntanya za bantu baguma baguma zanarhuma nirhu rhurhaciba n’obuyemere muli Yehova Mulemi wirhu w’obuzigire? Oko kwanalinganana bwenene n’ebirhuma rhuyemera oku Yehova yeba Mulemi. Ka rhunayemere oku yeba Mulemi bulya barhubwizire ntyo kone erhi bulya rhwacihîre akasanzi k’okujira obusagasi lyo rhubona ebiyerekine oku kobinali yeba Mulemi? (1 Kr. 3:12-15) Rhube rhukola rhugwerhe myaka minji rhuli Bahamirizi ba Yehova erhi rhuciri bahyahya, rhweshi rhushinganine rhugendekere rhwazibuhya obuyemere bwirhu. Erhi rhwakakajira ntyo, rhurhakacirhebwa “n’obwenguza bw’efilozofiya y’obunywesi” eyigirizibwa n’abantu bakalahira ebi Akanwa ka Nnâmahanga kadesire. (Kl. 2:8; Hb. 11:6) Lyo rhuhâbwa oburhabale, eci cigabi caganirira (1) bulya gurhi bantu banji barhayemera oku haba Omulemi, (2) gurhi wakazibuhya obuyemere bwawe muli  Yehova, Mulemi wawe, na (3) gurhi wakajira ly’ogendekera waba n’obuyemere buzibuhire.

4. Nk’oku biyerekinwe omu lwandiko lwa Abahabraniya 11:1, n’amahugûlo g’idako, bici obuyemere bw’okunali buba buyimangireko?

⁴ Bantu baguma baguma banarhanye oku okuba n’obuyemere kuli kuyemera kantu kalebe buzira ebyakarhuma wakayemera. Cikone nk’oku Ebibliya edesire, obo burhali buyemere bw’okunali. (Osome Abahabraniya 11:1, NWT, n’amahugûlo g’idako.) Ohugûkwe oku obuyemere omu bintu birhabonekana, kwa lwiganyo nka Yehova, Yezu, n’Obwami bw’empingu, buba kuyimangire oku bintu byakayemeza omuntu n’obwalagale. (Hb. 11:3) Muhamirizi muguma wa Yehova wasomire eby’esiyanse aderha n’obwalagale ntya: “Obuyemere bwirhu bujira ebi buba buyimangireko, rhurhalahira ebintu by’okuli esiyanse eyigiriza.”

5. Bulya gurhi bantu banji babà bayemire oku arhali Nnâmahanga ye walemaga obuzine?

⁵ Rhwanacidosagya ntya: ‘Erhi akaba haba ebintu byakayemeza omuntu n’obwalagale oku haba Omulemi, bulya gurhi bantu banji baderha oku arhali Nnâmahanga ye walemaga obuzine?’ Baguma na baguma ba mulibo barhasagijira obusagasi lyo bacibonera bone ebintu byakabayemeza. Robert, okola oba Mahamirizi wa Yehova, adesire ntya: “Bulya barhayigiriza enyanya z’obulemi emasomo, oko kwakarhuma narhanya mpu eby’obulemi birhaba by’okuli. Erhi ngwerhe myaka 20 na kulusha lyo naganiraga n’Abahamirizi ba Yehova, nayumva enderho nyinja z’omu Bibliya z’okunali na zakuyemeza ziyerekire obulemi.” *​—Olole ecisanduku cidesire “ Amahano g’Obulagirire oku Babusi.”

6. Bulya gurhi bantu baguma na baguma barhayemera oku haba Omulemi?

 ⁶ Bantu baguma na baguma banaderhe oku barhakayemera oku haba Omulemi bulya barhakayemera ebi barhakahashibona. Cikone banayemere bintu biguma na biguma birhabonekana, kwa lwiganyo nk’emisi erhuma igulu lyakola bwinja (pesanteur), bulya hali ebintu biyerekana oku eyo misi eba y’okunali. Obuyemere buganirirwe omu Bibliya nabo buba buyimangire oku “bintu by’okunali birhabonekana.” (Hb. 11:1, NWT) Binahûne akasanzi n’obushiru lyo rhuciyigiriza rhwene ebintu byakarhuyemeza n’obwalagale oku haba Omulemi, na bantu banji barhajira obo bushiru b’okujira ntyo. Omuntu orhajira busagasi ly’abona ebirhumire byakamuyemeza oku haba Omulemi, anahikira aha aderha oku Nnâmahanga arhahaba.

7. K’abantu basomire boshi bakalahira oku arhali Nnâmahanga ye walemaga amalunga n’igulu? Ohugûle.

⁷ Enyuma z’okuyiga ebintu byakayemeza oku haba Omulemi, bantu baguma na baguma basomire esiyanse bahikire aha bayemera oku amalunga  n’igulu byalemirwe. * Aka Robert, rhwaganiriraga embere, baguma na baguma ba mulibo nkaba bahikire aha baderha oku harhaba Omulemi mpu bulya ntamango bakola bayigirizize eby’obulemi oku université. Cikone, bantu banji basomire eby’esiyanse bahikire aha bamanya Yehova n’okumuzigira. Nk’oko abo basomire eby’esiyanse bajijire, rhweshi rhushinganine rhuzibuhye obuyemere bwirhu omu Mulemi, rhube rhwasomire erhi rhurhasomaga. Nta muntu wakajira ntyo oku nafasi yirhu.

8-9. (a) Idoso lihi rhukolaga rhwashuzako? (b) Gurhi okuciyigiriza binji okubiyerekire obulemi kwakakurhabalamwo?

⁸ Gurhi wakajira ly’ozibuhya obuyemere bwawe omu Mulemi? Rhuganirire njira ini zakarhurhabala.

⁹ Oyige binji okubiyerekire obulemi. Wanazibuhya obuyemere omu Mulemi omu kukalabiriza ensimba, emirhi, n’enyenyezi. (Enna. 19:1; Iz. 40:26) Erhi wakagendekera waciyigiriza binji okubiyerekire ebyo bintu, ko wakanagendekera wayemera n’obwalagale oku Yehova yeba Lulema. Kanji-kanji ebitabu birhu binabemo ebigabi bihugwîre bintu binji lugenda obulemi. Orhakagiyoboha okusoma ebyo bigabi mpu bulya biri bizibu okuhugûkwa. Okabisoma nk’oku wakanahasha. Orhanakag’iyibagira okukaja oku site yirhu y’e Enternete jw.org, ly’obonako amavideo gaganirire obulemi rhwabonaga amango g’entimanano zirhu z’e eneo za mw’eyi myaka egezire.

10. Ohâne olwiganyo luyerekine gurhi obulemi buyerekanamwo n’obwalagale oku haba Lulema. (Abaroma 1:20)

¹⁰ Amango oli waciyigiriza okubiyerekire ebiremwa, ojire okwawe koshi ly’ohugûkwa ebi eco ciremwa cifulwîre kuli Omulemi wirhu. (Osome Abaroma 1:20.) Kwa lwiganyo, wanamanya oku ahanyuma n’okurhumolekera n’okurhuha ecidurhu cirhuma obuzine bwagendekera, izuba lirhu libamo ebi baderha rayons ultraviolets zakahira obuzine omu mazibu. Rhuli bene bantu rhuba rhulagirire oku kantu kakarhulanga kw’ezo rayons. Rhunanalangwe! Gurhi rhulangwamwo? Enyumpa yirhu, kw’okuderha igulu lijira empezi ekalilanga, ehamagalwa couche d’ozone, enakacuya ezo rayons ultraviolets zirhenga omw’izuba lyo zirhag’irhuhikako. Oku ezo rayons ultraviolets zigendekera zayaka ko n’eyo couche d’ozone nayo egendekera yayushuka. K’orhayemirigi oku hashinganine habe muntu mulebe wajiraga ebyo byoshi n’oku yeba Mulemi w’obuzigire na mwenge?

11. Ngahi wakakula ebintu byakazibuhya obuyemere bwawe okubiyerekire obulemi? (Olole ecisanduku cidesire “ Bintu Biguma Biguma Byakakurhabala Ozibuhye Obuyemere Bwawe.”)

¹¹ Wanabona bintu binji byakazibuhya obuyemere bwawe okubiyerekire obulemi omu kujira obusagasi omu Fahirisi n’oku site yirhu y’e Enternete jw.org. Nkaba wanarhangirira oku bigabi erhi mavideo gadesire “Kitu Hiki Kilijifanya Chenyewe?” Ago mavideo n’ebyo bigabi biba byofofi, na kandi biba biyerekine ebintu by’okusomeza okubiyerekire ensimba n’ebindi biremwa. Bibamo n’enyiganyo ziyerekine gurhi abasomire eby’esiyanse bakalonza okutula bintu bilebe omu kulolera oku biremwa birhuzungulusire.

12. Amango rhuli rhwayiga Ebibliya, bintu bihi rhushinganine rhurhanyeko?

¹² Oyige Ebibliya. Olya mwene wirhu wasomire eby’esiyanse rhwaganiriraga embere arhaliyemire oku haba Omulemi. Cikone erhi hagera kasanzi, ahikira aha aba n’eby’okumuyemeza oku haba Omulemi. Adesire ntya: “Obuyemere bwani burhal’iyimangire kw’ebi nakag’iyiga omu siyanse byone. Cikone kandi bwal’iyimangire kw’ebi nakag’iyiga omu Bibliya.” Nkaba  okola ojira obumanye bw’okuli bw’enyigirizo z’Ebibliya. Ciru akaba ntyo, ly’ozibuhya obuyemere bwawe omu Mulemi, oshinganine ogendekere waciyigiriza Akanwa ka Nnâmahanga. (Yoz. 1:8; Enna. 119:97) Okarhanya oku bintu bihugwîrwe omu Bibliya byajirikanaga mango mîra. Orhanye gurhi ebintu byoshi Ebibliya yalebaga byahikirire na gurhi ebi abandisi boshi b’Ebibliya bayandisire biba bipatine. Okujira ntyo kwanazibuhya obuyemere bwawe oku haba Omulemi w’obuzigire na mwenge warhulemaga analongoza Ebibliya n’iroho litagatifu. *​—2 Tm. 3:14; 2 Pt. 1:21.

13. Lwiganyo luhi luyerekine obwenge buba omu Kanwa ka Nnâmahanga?

¹³ Amango oli wayiga Akanwa ka Nnâmahanga, wanarhanya kunganaci amahano gamuba gakakurhabala. Kwa lwiganyo, Ebibliya yali erhi yarhonzire oku okuzigira ensaranga kuba kubi n’oku kunanalerhe “malumwa manji omu murhima.” (1 Tm. 6:9, 10; Mig. 28:20; Mt. 6:24) K’obo burhonde buciri bw’okunali kuhika ene? Citabu ciguma (The Narcissism Epidemic) ciyerekine ntya: “Kanji-kanji abantu balugisima eby’en’igulu, barhajira mwishingo bananakavunika omurhima. Ciru na balya balonza okuba na nsaranga nyinji barhajira mwishingo na kandi bajira mazibu manji g’amagala.” Obo burhonde Ebibliya erhuhîre bw’okurhazigira ensaranga buli bwa bulagirire bwenene! Ka hali agandi makanuni g’Ebibliya nawe wabwine oku gali ga bulagirire? Oku rhwakagendekera okuzigira amahano gali omu Bibliya, ko rhwakanagendekera okulangalira obwenge buhubûka emwa Omulemi wirhu w’obuzigire. (Yk. 1:5) N’oko kwanarhuma akalamo kirhu kaba n’omwishingo.​—Iz. 48:17, 18.

14. Bici ifunzo ly’Ebibliya lyakafulûla kuli Yehova?

¹⁴ Okayiga erhi ogwerhe n’omuhigo gw’okulonza okumanya Yehova bwinja. (Yn. 17:3) Omu kuyiga Amandiko, wanabona obumuntu n’amorhere ga Yehova; ago morhere go n’ago go gabonekana kugerera obulemi. Okuyiga amorhere ga Yehova kunarhuyemeze n’obwalagale oku hw’aba. (Lub. 34:6, 7; Enna. 145:8, 9) Oku wagendekera wamanya Yehova bwinja-bwinja, ko wanagendekera waba n’obuyemere buzibuhire muliye, ko n’obuzigire bwawe kuli ye bwayushuka, ko n’obwîra bwawe haguma naye bwasêra.

15. Gurhi wakayunguka omu kuganirira abandi enyanya z’obuyemere bwawe?

¹⁵ Okaganirira abandi enyanya z’obuyemere bwawe muli Nnâmahanga. Erhi wakakajira ntyo, obuyemere bwawe bwanazibuha. Cikone gurhi wakajira erhi oyu oli waganiza akakudosa idoso liyerekine oku agwerhe akarhinda lugenda okubaho kwa Nnâmahanga, orhanamanyiri gurhi wakamushuza? Olonze ishuzo ly’Ebibliya omu citabu cirhu cilebe na buzinda wanaliganirira oyo muntu. (1 Pt. 3:15) Na kandi wanabwira owundi Muhamirizi okuzire kiroho okurhabale. Oyu wajiganiza ayemere ishuzo wamuha erhi alilahire, wanayunguka bwenene okubona wajijire obo busagasi. Obuyemere bwawe bwanagendekera bwazibuha. Na ntyo orhakaciyemera enderho za balya bantu babonekana nka benge erhi basomi bakaderha oku harhaba Omulemi.

16. Gurhi byakaba erhi rhwakabula kugendekera kwazibuhya obuyemere bwirhu?

¹⁶ Rhube rhukola rhugwerhe myaka minji rhuli Bahamirizi ba Yehova erhi rhuciri bahyahya, rhweshi rhushinganine rhugendekere rhwazibuhya obuyemere bwirhu. Bulya gurhi? Bulya erhi rhwakabula buba masu, obuyemere bwirhu bwanazambanya. Okengere oku obuyemere buba buyimangire oku bintu by’okunali birhabonekana. Kwanaba kulembu okuyibagira ebintu rhurhali rhwabona. N’oko ko kwarhumaga Paolo aderha oku okubula obuyemere biri ‘byaha birhuzonzire.’ (Hb. 12:1) Gurhi rhwakayakamw’ogo murhego?​—2 Ts. 1:3.

17. Bici rhulagirireko lyo rhugendekera rhwazibuhya obuyemere bwirhu?

 ¹⁷ Burhangiriza, okashenga Yehova ngasi mango akuhe iroho lyage litagatifu. Bulya gurhi? Bulya obuyemere buba cigabi ciguma c’omu bigabi b’ilehe l’iroho litagatifu. (Gl. 5:22, 23) Rhurhakahash’iba n’obuyemere omu Mulemi wirhu n’okubuzibuhya buzira burhabale bw’iroho litagatifu. Erhi rhwakakashenga Yehova iroho lyage litagatifu, anarhuha lyo. (Lk. 11:13) Ci bwenene rhwanakahûna Yehova ntya: “Orhuyushulire obuyemere.”​—Lk. 17:5.

18. Nk’oku biyerekinwe omu lwandiko lwa Ennanga 1:2, 3, luhembo luhi rhugwerhe ene?

¹⁸ Na kandi, okayiga ngasi mango Akanwa ka Nnâmahanga. (Osome Ennanga 1:2, 3.) Erhi olo lulanga lutungwa, ba Israheli basungunu bone bagwerhe ecitabu c’Amarhegeko ga Nnâmahanga coshi cigumana. Cikone, mwami n’abakuhani bakabire bagwerhe eco citabu, na ngasi myaka nda, emihigo yalirhôzirwe ly’ “abalume, abakazi, abana,” n’ebigolo byal’ilamire haguma n’Aba Israheli bayumverheza obusomi bw’Amarhegeko ga Nnâmahanga. (Lush. 31:10-12) Erhi Yezu ali hanw’igulu, bantu basungunu bone bagwerhe ebitabu by’okukunjwa by’Amandiko na binji byakagibikirwa omu sinagogi. Lubero n’oko, ene, bantu banji bagwerhe obulyo bw’okusoma Akanwa ka Nnâmahanga koshi erhi cigabi cilebe. Olo luli luhembo lunene bwenene. Gurhi rhwakayerekanamwo oku rhushagalukire olo luhembo?

19. Bici rhushinganine rhujire lyo rhugendekera rhwaba n’obuyemere buzibuhire?

¹⁹ Rhwanayerekana oku rhushagalukire oluhembo lw’okuba n’Akanwa ka Nnâmahanga omu kukakasoma ngasi mango. Rhwanapanga eprograme y’okukasoma Ebibliya ci arhali kukayisoma amango rhugwerhe akasanzi kone. Omu kukaciyigiriza Akanwa ka Nnâmahanga, ngasi mango rhwanaba n’obuyemere buzibuhire.

20. Bici rhushinganine rhuhige okujira?

²⁰ Lubero n’ “ab’obukengere bunji” ba mw’er’igulu, rhugwerhe obuyemere busezire buyimangire oku Kanwa ka Nnâmahanga. (Mt. 11:25, 26) Okuciyigiriza eco citabu citagatifu kwarhumire rhwahugûkwa bulya gurhi igulu ligendekire lyabiha, na bici Yehova arheganyize okujira lugenda aga mabi goshi. Co cirhumire rhuhige okugendekera kwazibuhya obuyemere bwirhu n’okurhabala bantu banji nka bihashikine nabo babe n’obuyemere omu Mulemi wirhu. (1 Tm. 2:3, 4) Na kandi rhugendekere rhwalindirira amango abantu boshi bazine balamire okw’igulu banakakuza Yehova omu kuderha ezi nderho ziri omu Amafulûlo 4:11: “Nnawirhu Nyamuzinda, oshinganine ohâbwe irenge . . . bulya we walemaga ebintu byoshi.”