1. Nkinyi kibabadi bakulongieshe pabitale Mupangi?

SU MBAKUKUSHE kui baledi ba Temue ba Yehowa, we mulongie pabitale Yehowa kubanga nka ku bukinga bobe. Babadi bakulongieshe’shi aye ngi mupangi, e na ngikashi i buwa na’shi akekasha nsenga bu mpaladisu.​—Kib. 1:1; Bik. 17:24-27.

2. Bangi bantu abamonaa bangi be na lukumino mui Mupangi naminyi?

² Bantu be bungi abambaa’shi Efile Mukulu te kuanka na’shi nta naye mupangie bintu bioso. Anka, abambaa’shi muwa ubadi witukile ao nkubanga kulumbuluka kubanga ku bintu bipela mpa na ku bintu bikata. Bantu abakuminaa ino mianda nka baba balongie ngofu. Abamba’shi sianse mmuleshe patoka’shi Bible te buwa, na’shi bantu be na lukumino mui Mupangi mbantu bashi balongie, bantu babulakane.

3. Buakinyi abitungu’shi onyingishe lukumino lobe?

³ Mianda ayakula bantu balongie kalolo ngilombene kuitutakula mu kuelesha mpaka’shi Yehowa nta Mupangi etu sha kifulo su? Kintu ki na muulo nkuuka buakinyi tui bakumine’shi Yehowa ngi Mupangi. Tui bakumine muanda wa’shi mbetulungule, su tui bakumine muanda wa’shi tui baate nsaa atue banabene ya kuilongiela bua kumona bishinkamisho mu atue banabene su? (1 Kod. 3:12-15) Sunga tuekala bapue kukita mafuku bungi kinyi bu ba Temue ba Yehowa, abitungu tutungunukie na kunyingisha lukumino luetu. Su tubakitshi bino, t’atudimbibua ku “miisambo ya bisumanga ayituku ku binangu bya bantu” abamba’shi abiakula Bible mbia madimi. (Kol. 2:8, EEM; Eb. 11:6) Bua kuitukuasha, uno muisambo awakuila (1) buakinyi bantu be bungi t’abakuminaa mui Mupangi, (2) mmushindo kinyi oodi mulombene kunyingisha lukumino lobe mui Yehowa Mupangi oobe, na (3) mmushindo kinyi oodia  kutungunuka na kulama lukumino lobe lunyingie?

4. Muyile Bena-Ebelu 11:1, lukumino lua binyibinyi nduimene pa kinyi?

⁴ Bangi bantu abapuandjikishaa’shi kuikala na lukumino, nkukumina kintu kioshi na bishinkamisho. Anka muyile Bible, lualua nta ndukumino lua binyi nya. (Badika Bena-Ebelu 11:1.) Bible apatuula’shi lukumino nduimene pa bishinkamisho, sunga ta tui balombene kumona Yehowa, Yesu, na Bufumu, tui na bishinkamisho abilesha’shi be kuanka binyibinyi. (Eb. 11:3) Ungi biochimiste mufikie Temue a Yehowa akula’shi: “Ba Temue ba Yehowa be na bishinkamisho bi mu Bible bia mianda yabadi bakumine ta mbayilue mianda ya sianse.”

5. Buakinyi bantu be bungi abakumina’shi muwa nguitukile kushi kupangibua?

⁵ Tui kuyipusha’shi su kui bishinkamisho abilesha’shi kui Mupangi binyibinyi, buakinyi bantu be bungi t’abakuminaa’shi Efile Mukulu mmupangie bintu bioso? Bangi bantu ta babangile kukimba bishinkamisho abo banabene nya. Robert, tadi binobino Temue a Yehowa amba’shi: “Biabashabakulaa muanda wa mupangi mu kalasa, nadi namono’shi mmuanda wa madimi. Panalombeshe bipua 20 nesambile na ba Temue ba Yehowa abampele bishikamisho bia mu Bible pabitale Mupangi.” *​—Tala kashibo akamba’shi: “ Elango kui ba nambutuile.”

6. Buakinyi bangi mbalombene kupela kukumina mui Mupangi?

⁶ Bangi tabakumina mui Mupangi muanda  abakumina nka mu kiakia kia bamono. Anka bakuete abakumina mu bingi bintu bia basha bamono bu gravitation, muanda be na bishinkamisho abilesha’shi e kuanka. Lukumino aluakuila Bible nalo namu nduimene pa “bishikamisho bia tushi balombene kumona.” (Eb. 11:1) Abitungu nsaa nakuikitshisha kui bungi bua kuilongiela bino bishinkamisho, anka bantu be bungi tabakumina kukita bino. Muntu shelongiela aye nabene bua kuuka bino bishinkamisho, mulombene kuamba’shi Efile Mukulu te kuanka.

7. Bantu boso balongie ngofu abamba’shi Efile Mukulu ta naye mupangie bintu bioso? Patuula.

⁷ Kunyima kuabo kulonga bishinkamisho, bena sianse be bungi mbafikie mu kukumina’shi Efile Mukulu Mupangi a eyilu na nsenga. * Nka bu Robert atatupuile kutemuna kunundu, bangi be kuamba’shi ta kui mupangi muanda’shi ta mbebalongieshi ku Universite.  Anka bena sianse be bungi mbafikie mu kuuka Yehowa na kumufula. Anka bu bano be na sianse, atue boso abitungu’shi tunyingishe lukumino luetu mui Efile Mukulu, biatuikala balongie bi bungi sunga bipela. Ta kui muntu mulombene nkukitshina bianka.

8-9. (a) Ndukonko kinyi lutatutalula binobino? (b) Kulonga pabitale bipangua kui nkukuasha naminyi?

⁸ Mushindo kinyi odia kunyigisha lukumino lobe mui mupangi? Tutaluleyi mianda inanka.

⁹ Longiela ku bipangua. We kunyingisha lukumino lobe mui mupangi pa kutala nyema, mitshi, na nyenyene. (Mis. 19:2; Yesh. 40:26) Nsaa yonyisha kulonga pabitale bino bintu onyisha kushinkamisha’shi Yehowa ngi Mupangi. Mu mikanda yetu mui miisambo ilekenelekene, ayakuila pabitale bintu bipangibue. Tosukanga kubadika ino miisambo sunga yekala bukopo bua kuiyipusha. Kita mobe moso bua kuiyilonga. Toiluanga dingi kutala ma video e buwa aakuila pabitale bipangua atumuene mu bikongeno bia mafuku asatu bipua bishale, e mu jw.org.

10. Tusha kileshesho akilesha’shi kui Mupangi (Bena-Looma 1:20)

¹⁰ Nsaa ya tulongo pabitale bipangua, abitungu tutume binangu ku mianda ayitunshikamisha’shi kui Mupangi. (Badika Bena-Looma 1:20.) Bu kileshesho, nguba atushaa kibobo na kanya bina muulo bua muuwa pano pa nsenga, anka nguba atusha ingi nsembue i masaku. Atue bantu tuina lukalo lua kukaluilua ku ino nsembue. Na tui bakaluilue ku yanka! Mushindo kinyi? Nsenga yetu ina kintu kia betaminaa bu kushe a ozone akitukaluila ku ino nsembue i masaku. Apeele ino nsembue i masaku bukopo bungi bua kushe ya ozone namu abufuimi. Binobino tomono’shi kui muntu mui tupangie sha kifulo na ena binangu su?

11. Mbalo kinyi yodia kupeta mianda ya kunyigisha lukumino lobe mui Mupangi? (Tala kashibo akamba’shi: “ Bingi bintu bilombene kunyingisha lukumino luetu.”)

¹¹ We kupeta ingi mianda ya kunyingisha lukumino pabitale bintu bipangibue, mu dilongiesha dia 9 dia broshire a Myaluulo ku nkonko 10 yabeyipushaa kwi bansongwa. We mulombene kutala dingi ma video pabitale bipangua e mu jw.org. Ano ma video aakuila mianda i buwa pabitale nyema na mitshi. Mui mpa na bileshesho bia be na sianse abatompa kukita bintu muyile bi’abamono kui bipangua.

12. Nsaa y’atuilongiela Bible mianda kinyi ayitungu’shi tulamiine?

¹² Elongiele Bible. Biochimiste atatupuile kutemuna badi apele’shi ta kui Mupangi. Anka muenda mafuku bafikile mu kushinkamisha’shi kui Mupangi. Bakuile’shi : “Lukumino luande talubadi luimene nka penda mu mianda inalongiele mu sianse. Lubadi dingi luimene mu mianda inalongiele mu Bible.” Pangi we mupue kuuka Bible kalolo. Sunga mbiabia bua kunyingisha lukumino lobe mui Mupangi, abitungu otungunukie na kuilongiela Eyi d’Efile Mukulu. (Yos. 1:8; Mis. 119:97) Bu kileshesho, nangushena pa mushindo wikale Bible alesha mianda ibadi ipue kukitshika takudi bipua bi bungi. Nangushena dingi, ku matemuki oso a mu Bible apue kulombana na bipushene mianda ya badi bafunde. Kukita bino akunyigisha lukumino lobe’shi kui Mupangi sha kifulo na binangu muitupangie na muyokiele Bible. *​—2 Tim. 3:14; 2 Mp. 1:21.

13. Nkileshesho kinyi kimune akilesha bi binangu bi mu Eyi d’Efile Mukulu?

 ¹³ Nsaa yuelongiela Eyi di’Efile Mukulu, tala mushindo ulombene nkukuasha malango e muanka. Bu kileshesho, Bible badi mutemukie takudi bipua bi bungi’shi kifulo kia nfwalanga ki masaku na kino ngi akifuishaa “makyenga e bungi.” (1 Tim. 6:9, 10; Nki. 28:20; Mat. 6:24) Bino mbia binyibinyi na lelo uno su? Ungi mukanda awakuila bi muenono a bantu mu ano mafuku etu awamba’shi: “Ke bungi, bantu abakuminaa’shi kuikala na makuta e bungi mu nshalelo kui na muulo ta bekala na muloo. Abekala na tuinyongoshi, mpa na bano abakumina kupeta makuta e bungi ta bekala na muloo nyi buakinyi elango dia mu Bible adiamba’shi tuekalanga kifulo na makuta di buwa bukile.” We kupeta angi mayi a kulonda e mu Bible e nkukuasha su? Nsaa yatunyisha kusankila malongo oso e mu Bible, atunyisha kukulupila’ shi Mupangi etu sha kifulo na binangu auku kiakia kilombene kuituikasha bibuwa, na atutungunuka na kutumikila malongo aye. (Shak. 1:5) Bu kipeta, atuikala na muloo wi bungi mu nshalelo etu.​—Yesh. 48:17, 18.

14. Kuilongiela Bible kui nkulongiesha kinyi pabitale Yehowa?

¹⁴ Elongiele Bible na kepatshila ka kuuka​—Yehowa kalolo. (Yo. 17:3) Olongo pabitale bu muntu bua Yehowa na ngikashi yaye, ino ngikashi yodi molungie pabitale bipangua biaye. Kulonga ino ngikashi ya Yehowa akukushinkamisha’shi nyi mmuntu a binyibinyi. (Efi. 34:6, 7; Mis. 145:8, 9) Nsaa youku Yehowa kalolo, lukumino na kifulo kiobe buaye abinyigi ngofu, na kipuano kiobe naye a kikala bukopo.

15. Kulungula bangi pabitale lukumino lobe kui nkukuasha naminyi?

¹⁵ Lungula bangi bua lukumino lobe mui Efile Mukulu. Su bokitshi biabia, lukumino lobe alunyingi. Su touku bia kulongiesha muntu elesha mpaka’shi Efile Mukulu te kuanka, we kukita kinyi? Kimba kifundue kia kualula ku lukonko mu mikanda yetu na wekilungule yawa muntu. (1 Mp. 3:15) Teka mungi Temue a Yehowa buadia nkukuasha bua kualula lualua lukonko. Su yawa muntu akumina lualua lualulo alutukila mu Bible sunga kui lupela, abikukuasha muanda we mukimbule na lukumino lobe alunyisha kinyinga. Bu kipeta, tokumina mu mianda ya madimi ya bantu abemono bu basha binangu na bu balongie ngofu abamaba’shi takui Mupangi.

16. Nkinyi a kikitshika su tuakutua kutungunuka na kulama na kunyingisha lukumino luetu?

¹⁶ Sunga tuekala bapue kufubila Yehowa munda mua bipua bi bungi, abitungi tutungunukie na kunyingisha na kulama lukumino luetu muadi. Buakinyi? Muanda su ta tui banyingie, lukumino luetu alubofula. Anka bu bitatupuile kuibimona, lukumino nduimene pa bintu bishabimueka. Kintu kiatusha tumono, tui kuikiluankana bukidi. Nyi buakinyi, Mpoolo bakuile bwa kukutua kua lukumino’shi, “mmiluisho ayiuku kuituanyina.” (Eb. 12:1) Tui kulama na kunyingisha lukumino naminyi?​—2 Tes. 1:3.

17. Nkinyi ki kuitukuasha bua kulama lukumino luetu lunyingie?

¹⁷ Kia kumpala, ikala otekie Yehowa kikudi kiaye, na ebikite efuku dioso. Buakinyi? Muanda lukumino nyi nkipindi kia kikuba kia kikudi ki selele. (Nga. 5:22, 23) Ta tui balombene kulama na kunyingisha lukumino luetu mui Mupangi, kushi bukuashi bua kikudi ki selele nya. Su tuatungunuka na kuteka Yehowa kikudi kiaye, etupa kianka. (Luk. 11:13) Abintungu, tutekie’shi: “Etukumbeeshe namu lukumiino.”​—Luk. 17:5.

18. Muyile Misambo 1:2, 3, kia buntu kinyi ki buwa kiatudi nakio?

 ¹⁸ Kia kabidi, ikala welongiela Eyi di’Efile Mukulu efuku dioso. (Badika Misambo 1:2, 3.) Nsaa ibabadi bafunde uno musambo, nka penda bena Isaleele bapela nyi babadi na mukanda upela wa Miya y’Efile Mukulu ulombane. Anka Mfumu na batshite-muakuidi nyi abadi balombene kupeta ino mikanda, na mu kipua kia musambobidi kioso abadi abata mpango bua’shi “bantu balume, bantu bakashi, bana,” na benyi bashale na bena Isaleele bapushe kubadika kua Miya Efile Mukulu. (Miy. 31:10-12) Mu mafuku a Yesu, nka penda bantu bapela nyi abadi na mifungofungo ya bifundue, ke bungi abadi abeyilama mu bitumbuilo. Anka lelo uno, bantu be bungi mbalombene kupeta kapindi ka Bible sunga oso mushima. Kino nyi kia buntu ki buwa. Mushindo kinyi watudi mbalombene kulesha’shi atusankila kino kia buntu?

19. Tui na lukalo na kinyi bua kunyigisha lukumino luetu?

¹⁹ Atulesha’shi tui na lutumbu lua kupeta Eyi di’Efile Mukulu, pa kuidibadi nsaa yoso. Ta tulekanga kuibadikila Bible pa bupenka, sunga ku mubadika nka patudi na nsaa. Kadi tuikitshishe bua kumuibadikila pa kiubishi, bino abinyigisha lukumino luetu.

20. Tui kuata kitshibilo kia kukita kinyi?

²⁰ Mu kuilekena na “basha-binangu na basha-kapatupatu” ba mu ino nsenga, atue tuina lukumino lunyingie luimene mu Eyi di’Efile Mukulu. (Mat. 11:25, 26) Bible kuete etupatuluila bua kuuka buakinyi mianda ikuete kuenda na kuluila mu nsenga, na akikiebe kukita Yehowa. Biabia tuateyi kitshibilo kia kunyingisha lukumino luetu na kukuasha bantu be bungi buabadia kuikala na lukumino mui Mupangi etu. (1 Tim. 2:3, 4) Na tutungunukieyi na kutengiela nsaa, ya bakatumbisha Yehowa kui bipangua bioso bi pa nsenga na mayi e mu Kibafumbwilwe 4:11, aamba’shi: “Yehowa Eefile etu we mmulombene kupeta ntumbo . . . mwanda obe nyi bapangile bintu byoso.”