1. Чаяакчывыстың дугайында кандыг билиглерлиг силер?

ИЕГОВАНЫҢ Херечилериниң өг-бүлезинге өзүп келген болзуңарза, бичииңерден тура, Бурганның дугайында билиглерни ап эгелээн чадавас силер. Ада-иеңер силерге долгандыр турар делегейни Бурган чаяап каан, Ооң кайгамчыктыг шынарларының база келир үеде кижилерге хамаарыштыр чүнү бодап алганын чугаалап турган (Э. д. 1:1; Аж.-ч. 17:24—27).

2. Чаяакчыга бүзүреп турар улусту чамдык улус чүү деп бодап турар?

² Ынчалзажок хөй улус Бурганны Чаяакчы деп санавас. Оон артык, Ол шуут чок деп бодап турар. Оларның саналы-биле алырга, чуртталга боду ала чайгаар тыптып келген база организмнерниң бөдүүн хевирлери чоорту сайзырааш, нарын хевирлерже шилчий берген. Оларның чамдыызы дээди эртем-билиглиг улус. Олар болза, Библия эртем-билиг-биле дүүшпес база Чаяакчыга бүзүрээр улусту бүзүрээчел болгаш угааны кызыы дээр.

3. Чаяакчы бар деп чүге боттарывыс шынзыгар ужурлуг бис?

³ Ат-алдарлыг улустуң үзел-бодалы бүзүреливисти кошкадып болур бе? Ол чүүл Иегованы Чаяакчы деп чүге бүзүреп турарывыстан хамааржыр. Бир кижи биске Иегова — Чаяакчы деп чугаалаарга, бүзүреп турар бис бе? Азы боттарывыс үени үндүрүп, бадыткалдарны шинчилээн бис бе? (1 Кор. 3:12—15). Чеже-даа үр үе дургузунда Иеговага бараалгап чоруур болзувусса, бүзүреливисти дөмей-ле быжыктырар ужурлуг бис. Ынчан Библияга бүзүревес улустуң «меге хоозун угаашкыннары» бисти дуурайлавас (Кол. 2:8; Евр. 11:6). Ынчангаш бо статьяга: 1) чүге хөй улус Чаяакчыга бүзүревес; 2) Иегова — Чаяакчы деп бүзүреливисти чүү быжыктырып болурун; база 3) ол бүзүрелди канчаар быжыктырарын сайгарып көөр бис.

4. Еврейлерге 11:1-ден алырга, ёзулуг бүзүрел дээрге чүл ол?

⁴ Чамдык улустуң саналы-биле алырга, бир-ле чүүл ылап бар деп бүзүрээринге бадыткалдарның херээ чок. Ынчалза-даа Библияда ындыг бүзүрелди хоозун дээн. (Номчуптуңар: Еврейлерге 11:1.) Бурганның Сөзүнден алырга, ёзулуг бүзүрел тода бадыткалдарга үндезилеттинген боор ужурлуг. Бис Иегованы, Иисусту, дээрде Бурганның Чагыргазын көрүп шыдавас бис, ынчалза-даа олар херек кырында бар деп шынзыдып турар барымдаалар хөй (Евр. 11:3). Биохимик Иегованың Херечизи мынча дээн: «Бистиң бүзүреливис согур эвес, эртем талазы-биле барымдааларны база кичээнгейге ап турар бис».

5. Улустуң хөй кезии чуртталга ала-чайгаар тыптып келген деп чүге бүзүреп турар?

⁵ Мындыг айтырыг тургустунуп кээр: Чаяакчы бар деп бадыткалдар бар хирезинде, улустуң хөй кезии чүге Аңаа бүзүревейн турарыл? Ооң харыызы дыка бөдүүн: чүге дээрге олар бадыткалдарны эки шинчилевээн. Роберт дээр Иегованың Херечизи мынча дээн: «Школага өөренип турумда, биске шупту чүве чаяаттынган деп кажан-даа өөретпейн турган. Ынчангаш мен ону анаа тоолчургу чугаа деп бодаар турган мен. Чүгле 22 харлыымда, бүгү чүве чаяаттынган деп ужур-уткалыг болгаш бүзүрелдиг библейжи шынзыдылгаларны Иегованың Херечилеринден дыңнап каан мен» *. (« Ада-иелерге» деп көзенекти көрүңер.)

6. Хөй улус Чаяакчы бар дээрзинге чүге бүзүревейн турар?

⁶ Чамдык улус Чаяакчы бар деп бүзүревес,  чүге дээрге олар Ону чаңгыс-даа көрбээн. Ол хирезинде олар оон өске көзүлбес чүүлдерге бүзүреп турар. Чижээ, тыртыжыышкын (гравитация) бар деп кым-даа чигзинмес. Бурганның Сөзүнде бүзүрелди «каракка көзүлбес чүүлдер-биле» бадыткаттынып турар дээн (Евр. 11:1). Шак ындыг бадыткалдарны шинчилээринге үе болгаш күжениишкин херек, а хөй улус ону кылырындан чалгаараар. Ынчангаш олар Чаяакчы бар деп айтырыгны эки шинчилевейн, Бурган шуут чок деп түңнелге кээп турарлар.

7. Эртем-билиглиг улустуң шуптузу Бурганга бүзүревейн турар бе? Тайылбырлаптыңар.

⁷ Чамдык эртемденнер бадыткалдарны кичээнгейлиг өөренип көргеш, Октаргайны Бурган чаяап каан деп түңнелге келген *. Олар ооң мурнунда Бурган бар деп бүзүревейн  турган чадавас, чүге дизе, мурнуку абзацта Роберттиң чугаалааны ышкаш, оларның башкылары Чаяакчы бар деп өөретпейн турган. Ындыг-даа бол, хөй эртемденнер Иегованың дугайында билип алгаш, Аңаа ынак апарган. Эртем-билиивис кандыг-даа болза, Бурганга бүзүреливисти боттарывыс сайзырадыр ужурлуг бис, бистиң орнувуска ону кым-даа кылып шыдавас.

8, 9. а) Ам чүнү сайгарар бис? б) Чаяалгаларны шинчилээри силерге чүзү-биле ажыктыг боорул?

⁸ Чаяакчыга бүзүрелди сайзырадып аарынга силерге чүү дузалаар? Дөрт сүмени көрүптээлиңер.

⁹Долгандыр чаяалгаларны шинчилеңер. Дириг амытаннарны болгаш үнүштерни кичээнгейлиг хайгаарап, дээрде сылдыстарны топтап көөр болзувусса, Чаяакчы ылап бар дээрзинге шынзыгар бис (Ыд. ыр. 18:2; Иса. 40:26). Шак ындыг шинчилелче хөй үени үндүрген тудум, Иегова Октаргайны чаяап каан дээрзинге бүзүреливис дам быжыгар боор. Иегова Бодунуң чаяалгаларын кайы хире кайгамчыктыг кылдыр чаяап каанының дугайында Иегованың Херечилери хөй статьяларны үндүрген. Ындыг статьяларның утказын билип алыры силерге чеже-даа амыр эвес болза, оларны эрттирбейн, шыдаар шааңар-биле билип алырын кызыңар. Оон ыңай сөөлгү чылдарның регион шуулганнарынга Бурганның чаяалгаларының дугайында дыка хөй чараш видеолар үнген. Ам ол роликтерни jw.org деп сайтыда салып каан. Оларны катап көрүп алыңар!

10. Чаяакчы ылап бар дээрзин бадыткап турар бир чижекти чугаалаңар (Римчилерге 1:20).

¹⁰ Чаяалгаларны шинчилеп тургаш, Бурганның шынарларын эскериңер. (Номчуптуңар: Римчилерге 1:20.) Чижээ, Хүн чылыгны болгаш чырыкты берип турарындан аңгыда, кижиге айыылдыг ультра кара-көк херелдерни база үндүрүп турар. Ынчангаш бистиң Черивисти озондан тургустунган карт камгалап, хүннүң хоралыг херелдерин бодунче киир сиңирип ап турар. Ультра кара-көк херелдер күштелген тудум, Черивистиң атмосферазында озон көвүдээр. Ындыг кайгамчык камгалалдыг тургузуг ала-чайгаар тыпты берген бе? Азы кижилерге ынак Чаяакчы ону кылып каан бе?

11. Бүгү чүвени Бурган чаяап каан деп оон ыңай бадыткалдарны кайыын тып ап болур? (« Чаяакчыга бүзүрелди быжыктырарынга чүү дузалаар?» деп көзенекти көрүңер.)

¹¹ Бүгү чүвени Бурган чаяап каан деп оон-даа өске бадыткалдарны «Индекс публикаций Сторожевой башни» деп дептерден тып ап азы jw.org деп сайттың дилээшкинин ажыглап болур. «Случайность или замысел?» деп рубрикада кыска статьялардан болгаш видеолардан эгелеп ап болур силер. Ында дириг амытаннарның болгаш өске-даа Бурганның чаяалгаларының дугайында солун фактылар бар. Оон ыңай эртемденнер бойдусту шинчилээш, кандыг чүүлдерни өттүнүп кылыксап турарын ында бижээн.

12. Библияны шинчилеп тургаш, чүүже кичээнгейни салыр болза эки?

¹²Библияны шинчилеңер. Кырында чугаалашканывыс биохимик кижи Чаяакчы бар дээрзинге баштай бүзүревейн турган. Ынчалза-даа чоорту ол Аңаа бүзүрей берген. Ол мынча дээн: «Мээң бүзүрелим чүгле эртем шинчилелдеринге эвес, а Библиядан бадыткалдарга үндезилеттинген». Силер Библияның өөредиглерин эки билир чадавас силер. Ынчалза-даа Чаяакчы бар дээрзинге бүзүрелди сайзырадыр дизиңерзе, Бурганның Сөзүн улаштыр шинчилээри эргежок чугула (Иис. 1:8; Ыд. ыр. 118:97). Шинчилел үезинде Библияда бичии-даа карышкак чүүлдерниң чогунче, ында төөгү болуушкуннарының кайы хире шын бижиттингенинче база өттүр билген медеглелдерниң канчаар күүсеттингенинче кичээнгейиңерни салыңар. Бурганның  Сөзүн шак ынчаар шинчилээр болзуңарза, бисти мерген угаанныг болгаш ынакшылдыг Чаяакчы чаяап каан база Библия Ооң ыдыктыг сүлдезиниң удуртулгазы-биле бижиттинген деп чүүлге дам шынзыгар силер * (2 Тим. 3:14; 2 Пет. 1:21).

13. Библейжи сүмелерниң кайы хире ажыктыын көргүскен чижекти чугаалаптыңар.

¹³ Оон ыңай Библияны шинчилеп тургаш, ооң ажыктыг сүмелеринче кичээнгейни салыңар. Чижээ, муң-муң чылдар бурунгаар ында «акша-хөреңгиге хандыкшыл кижини өлүмче киир идип, аңаа хөй хилинчек онааштырар» деп бижээн (1 Тим. 6:9, 10; У. ч. 28:20; Мф. 6:24). Амгы үеде ол сагындырыг ажыктыг бе? «Эпидемия нарциссизма» деп номда: «Акша-хөреңгиге ынак улус, өскелерге бодаарга, аас-кежик чок база депрессияга белен алзыптар. Безин анаа хөй акшалыг болуксаар улустуң иштики сагыш-сеткили хоозурап, мага-боду-даа аарыгларга алзыычал боор» деп бижээн. Библия анаа эвес бисти акша-хөреңгиге ынакшылдан оваарындырып турар! Оон өске кандыг библейжи сүмелер чуртталгаңарны экижидипкенил? Ону бодап чоруур болзуңарза, ынакшылдыг болгаш мерген угаанныг Чаяакчывыска оон-даа артык ынанып өөренип алыр силер (Иак. 1:5). Ооң сүмелери биске чүгле өөрүшкүнү эккеп, кезээде ажыктыг бооп артар (Иса. 48:17, 18).

14. Библияны шинчилээш, Иегованың дугайында чүнү билип ап турар силер?

¹⁴Иегованы оон-даа эки билип алыңар (Ин. 17:3). Библияны шинчилээр кол сорулгаңар ол боор ужурлуг. Ынчан силер, чеченчидир чугаалаарга, Библияның Авторунуң холунуң үжүү Чаяакчының холунуң үжүүнге дөмей деп билип каар силер. Библияны номчааш, Иегованың кандыызын дыка эки билип алыр силер. Ол дээрге анаа кижилерниң чогаадып каан чүвези эвес, а херек кырында бар Хуу-бот (Хост. 34:6, 7; Ыд. ыр. 144:8, 9). Иегованың болгаш Ооң шынарларының дугайында эки билген тудум, Аңаа бүзүрелиңер улгадып, ынакшылыңар күштелип, найыралыңар дам быжыгар.

15. Өске улуска Бурганның дугайында чугаалап турарывыс биске чүзү-биле ажыктыг?

¹⁵Өскелерге Бурганның дугайында чугаалаңар. Шак ынчаар бүзүрелиңерни быжыктырып алыр силер. А бир эвес Чаяакчы чок дээр кижиге суртаал үезинде таваржы бергеш, чүнү харыылаар аайын тыппайн барган болзуңарза, канчаарыл? Бистиң ном-дептерлеривисте аңаа хамаарыштыр чүнү бижип каанын база дараазында ол кижиге ужуражып келгеш, көргүзүп болур шүлүктерни тып ап болур силер (1 Пет. 3:15). Оон ыңай дуржулгалыг акы-угбалардан арга-сүмени айтырыңар. Ол кижи тып алган бадыткалдарыңар-биле чөпшээрешпес-даа болза, боттарыңарның бүзүрелиңерни дөмей-ле быжыктырып алган боор силер. Ынчан мерген угаанныг ышкаш кылдыр сагындырар, ынчалза-даа Чаяакчыга бүзүревес улустуң чугаалары силерниң бүзүрелиңерни бичии-даа кошкатпас.

16. Бүзүреливисти үргүлчү быжыктырбас болзувусса, чүү болу берип болур?

¹⁶ Иеговага каш-даа чыл бараалгап турар болзувусса, бүзүреливисти үргүлчү быжыктырары чугула, чүге дизе ол кошкай берип болур. Ооң мурнунда чугаалаанывыс дег, «бүзүрел каракка көзүлбес чүүлдерни бадыткап турар», а улус көрбейн турар чүүлүн уттуптар чаңчылдыг болгай. Павел элчин бүзүрелдиң чедишпезин «оруувуска моондак база чыпшыныычал бачыт» деп анаа эвес чугаалаан (Евр. 12:1). Ол дузакка канчаар алыспайн барып болур бис? (2 Фес. 1:3)

17. Бүзүреливисти чүү чокка кадагалап шыдавас бис?

 ¹⁷ Бирээде, Иеговадан ыдыктыг сүлдени катап-катап база үргүлчү дилеңер. Ол чүге чугула? Чүге дизе бүзүрел ыдыктыг сүлдениң үре-түңнелинче кирип турар (Гал. 5:22, 23). Ынчангаш бис ол чокта Чаяакчыга быжыг бүзүрелди сайзырадып-даа, быжыктырып-даа шыдавас бис. А бир эвес Иеговадан ыдыктыг сүлдени дилээр болзувусса, Ол биске ону албан бээр (Лк. 11:13). Бис безин: «Бүзүреливисти өстүрүп көрем» деп дорту-биле мөргүп болур бис (Лк. 17:5).

18. Иегова биске кандыг белек берген? (Ырлар 1:2, 3).

¹⁸ Ийиде, Библияны хууда шинчилээр графиктен быжыг туттунуңар. (Номчуптуңар: Ырлар 1:2, 3.) Ырлар номунуң бирги эгезин чогааткан үеде, чүгле каш санныг израильчилерге Бурганның Хоойлузунуң бүдүн сөзүглели бар турган. Ол дээрге хааннар болгаш өргээ бараалгакчылары-дыр. А арткан чон — эр, херээжен улус, ажы-төл болгаш даштыкы улус — Бурганның Хоойлузун чеди чылда чүгле чаңгыс катап номчуп турда, дыңнаар турган (Ы. х. к. 31:10—12). А Иисустуң хүннеринде Бижилгелерниң дүрүг номнары база чүгле каш борбак кижиге турган, арта оларны синагога иштинге шыгжаар чораан. Амгы үеде байдал көңгүс өске: черниң чурттакчыларының хөй кезии Библияны долузу-биле азы чамдык кезектерин номчуур аргалыг. Улустуң чүс-чүс чылдар дургузунда хууда Библиялыг болур аргазы чок турган, а бисте ындыг арга бар! Иеговага ол дээш өөрүп четтиргенивисти канчаар илередип болур бис?

19. Бүзүреливис кошкай бербес дизе, чүнү кылыр болзувусса эки?

¹⁹ Библиялыг боор аргалыг болганывыс дээш Иеговага өөрүп-четтиргенивисти, ону үргүлчү номчуп турарывыс-биле көргүзүп болур бис. Бурганның Сөзүн номчуп, шинчилээр үени албан аңгылап алыр болза эки, ындыг үе ала-чайгаар тыптып келбес. Ынчаар кылыр болзувусса, бүзүреливис кошкавас.

20. Чүнү кылырынче хөөнненип алган силер?

²⁰ Мерген угаанныг болгаш эртем-билиглиг бис дээр улус бистиң дугайывыста чүнү-даа бодап турар болза, бүзүреливис Бурганның Сөзүнден ылап шын бадыткалдарга үндезилеттинген (Мф. 11:25, 26). Ол ыдыктыг номну шинчилээнивистиң ачызында, делегейде байдалдың чүге баксырап турарын база Иегова байдалды канчаар өскертиптерин билип алган бис. Ынчангаш бүзүреливисти улаштыр быжыктырып, Чаяакчы бар деп хөй улуска чугаалаалыңар (1 Тим. 2:3, 4). Ынчан бис Ажыдыышкын 4:11-де: «Дээрги-Чаяакчы-Бурганывыс, алдарны хүлээп аарынга төлептиг сен, чүге дээрге Сен бүгү чүвени чаяаган сен» дээн сөстерни чер кырында шупту кижилерниң чугаалап турарын ийи караавыс-биле көрүп каар бис.