1. Nuna Medhdhidaagaabaa ay tamaaradii?

NENA dichchidaageeti Yihoowa Markkata gidikko, Yihoowabaa neeni naatettaappe doommada tamaarennan waayi aggana. I Medhdhidaagaa gidiyoogaa, ufayssiya eeshshati awu deˈiyoogaanne I saˈaa gannate oottanawu koyiyoogaa tamaaradasa.—Doo. 1:1; Oos. 17:24-27.

2. Medhdhidaagaa ammaniya asaa xeelliyaagan amaridaageeti woygidi qoppiyoonaa?

² SHin daro asay Xoossay deˈiyoogaa woy I ubbabaa medhdhidoogaa ammanenna. Deˈoy bawu doommidi keehi guuttabaappe muttumurettidabawu loddan loddan laamettiis giidi eti ammanoosona. Hegaadan ammaniyaageetuppe amaridaageeti keehi tamaaridaageeta. Eti Geeshsha Maxaafay likke gidennaagaa saynisee qonccissees goosonanne Medhdhidaagaa ammaniya asay tamaaribeennaagaa, eeyya woy sohuwaara cimettiyaagaa giidi yootoosona.

3. Nu ammanuwaa kaseegaappe aaruwan minttiyoogee keehi koshshiyoy aybissee?

³ Keehi tamaarida issi issi asay Yihooway nuna medhdhida siiqiyaagaa gidiyoogaa nuuni sirana mala ay yootii? Hegee Yihooway Medhdhidaagaa gidiyoogaa nuuni ammaniyo gaasuwaara gayttidaba. Nuuni hegaa ammaniyoy asi odido gishshataasseeyye, woy wodiyaa bazzidi hegaa nu huuphen xannaˈidi naqaashaa demmido gishshataassee? (1 Qor. 3:12-15) Nuuni Yihoowa Markka gidoosappe ay keena wode gidikkonne, nuuni ubbay nu ammanuwaa minttana koshshees. Yaatikko, Geeshsha Maxaafay yootiyoobay worddo giidi asay odiyo wode nuuni cimettokko. (Qol. 2:8; Ibr. 11:6) Ha huuphe yohoy, (1) daroti Medhdhidaagaa ammanennay aybissakko, (2) nena medhdhida Yihoowa kaseegaappe aaruwan neeni waata ammanana danddayiyaakko, qassi (3) he ammanuwaa ubbatoo waata minttanaakko qonccissiyoogan nena maaddana.

4. Ibraawe 11:1 maaran, Geeshsha Maxaafay ammanuwaabaa ay yootii?

⁴ Ammano giyoogee naqaashi baynnan issibaa coo ammaniyoogaa giidi issi issi asay qoppees. SHin Geeshsha Maxaafaa maaran hegee tumu ammano gidenna. (Ibraawe 11:1 nabbaba.) Geeshsha Maxaafay ammanuwawu naqaashay denddo gidiyoogaa yootees. Hegaa gishshawu, nuuni Yihoowa, Yesuusanne Kawotettaa beˈana xayikkonne, eti beettiyaagaa keena qoncce gidiyoogaa bessiya naqaashay deˈees. (Ibr. 11:3) Yihoowa Markka gidida saynisiyaa eranchchay hagaadan giis: “Yihoowa Markkati ammaniyoobawu naqaashay deˈees. Eti saynisee yootiyo tumubaa ammanoosona.”

5. Deˈuwan deˈiyaabaa Xoossay medhdhibeenna giidi daro asay ammaniyoy aybissee?

⁵ ‘Deˈuwan deˈiya ubbabaa Xoossay medhdhidoogaa bessiya keehi daro naqaashay deˈiyaaba gidikkonne, he ubbabaa I medhdhidoogaa daro asay ammanennay aybissee?’ Amaridaageeti hegaabaa bantta huuphen mule pilggi erokkona. Yihoowa Markka gidida Roberti hagaadan gees: “Timirtte keettan meretaabaa aybanne tamaarissenna gishshawu, hegee tuma gidenna gaada qoppaas. Tawu layttay 22 gidin Yihoowa Markkatuura haasayada Xoossay ubbabaa medhdhidoogaa ammananaadan oottiyaabaa Geeshsha Maxaafaappe erana gakkanaashin hegaadan qoppiyoogaa aggabeykke.” *—“ Yelidaageeti Erana Bessiya Keehi Koshshiyaabaa” giya saaxiniyaa xeella.

6. Issoti issoti medhdhidaagee baawa giidi ammaniyoy aybissee?

⁶ Issoti issoti eti beˈana danddayiyooba xallaa ammanana bessees giidi qoppiyo gishshawu Medhdhidaagaa ammanokkona. SHin eti beˈana danddayennabaa ammanoosona, leemisuwawu, carkkoy deˈiyoogee tuma gidiyoogaa naqaashay  bessiyo gishshawu hegaa ammanoosona. Geeshsha Maxaafay yootiyo ammanuwawu naqaasha gididabaakka nuuni beˈana danddayokko. (Ibr. 11:1) He naqaashaa nu huuphen pilggiyoogee wodiyaanne wolqqaa ekkiyaaba gidiyo gishshawu, daro asay hegaadan pilgganawu baaxetana koyenna. Naqaashaa ba huuphen pilggenna uri Xoossay baawa giidi qoppana danddayees.

7. Tamaarida asa ubbay Xoossay ubbabaa medhdhidoogaa kashi gii? Qonccissa.

⁷ Xoossay ubbabaa medhdhidoogaa saynisiyaa eranchchatuppe amaridaageeti naqaashaa pilggi simmidi ammanidosona. * Qommoora abaa denttido Roberttaagaadan, amaridaageeti yuniversttiyan meretaabaa mule tamaaribeenna gishshawu,  medhdhidaagee baawa giidi qoppennan waayi aggana. SHin saynisiyaa eranchchatuppe daroti Yihoowabaa erido gishshawu A siiqoosona. Nuuni ay keena tamaaridaageeta gidikkonne, he saynisiyaa eranchchati oottidoogaadan, Xoossaa kaseegaappe aaruwan ammanana koshshees. Hegaa nuuyyo hara asi oottana danddayenna.

8-9. (a) Nuuni haˈˈi beˈana oyshay awugee? (b) Meretaabaa xannaˈiyoogee nena waati maaddanee?

⁸ Medhdhidaagaa ne ammaniyo ammanuwaa waata minttana danddayay? Oyddu ogeta ane beˈoos.

⁹ Meretaabaa xannaˈa. Doˈaa mehiyaa, maataa mittaanne xoolintteta loytta xeelliyoogan Medhdhidaagaa ne ammaniyo ammanuwaa minttana danddayaasa. (Maz. 19:1; Isi. 40:26) Hegeeta neeni loytta xannaˈiyoogan, Yihooway Medhdhidaagaa gidiyoogaa loytta ammanana. Nu xuufetun meretaabaa loytti qonccissiya huuphe yohoti darotoo kiyoosona. He huuphe yohoti akeekanawu metiyaaba gidikkonne, nabbabennan aggoppa. Neeyyo danddayettidaagaa keenaa xannaˈa. Mata wodeppe ha simmin nu killiliyaa shiiquwan kiyida meretaabaa qonccissiya loˈˈiya biidota jw.org saytiyan zaarettada beˈiyoogaa dogoppa.

10. Medhdhidaagee deˈiyoogaa qonccissiyaabaa yoota. (Roome 1:20)

¹⁰ Neeni meretaabaa xannaˈiyo wode nuna medhdhidaagaabaa tamaarana danddayiyoobaa yuushsha qoppa. (Roome 1:20 nabbaba.) Leemisuwawu, saˈan deˈuwan deˈiyaabawu koshshiya hoˈˈuwaanne pooˈuwaa awaa ayfiyaappe demmoos. SHin awaa ayfiyaappe kiyiya cararetuppe amaridaageeti qohana danddayoosona. Nuuni he cararetuppe naagettana koshshees. Qassi nuuni naagettida! Waanidi? He qohiya cararetuppe nuna naagiya gaazee biittaa yuushuwan deˈees. Qohiya carareti wolqqaami wolqqaami biyo wode, teqqiya gaazeekka gujji gujji bees. Hagaa giigissidaagee deˈiyoogaa, qassi I siiqiyaagaanne ooppenne eran aadhdhiya Medhdhidaagaa gidiyoogaa neeni maayettiyoogee qoncce.

11. Medhdhidaagaa ne ammaniyo ammanuwaa minttanaadan maaddiyaabaa awuppe demmana danddayay? (“ Medhdhidaagaa Ne Ammaniyo Ammanuwaa Minttanaadan Maaddiyaabaa” giya saaxiniyaa xeella.)

¹¹ Wach Tawur Pablikeeshins Indeksiyaa goˈettiyoogaaninne jw.org saytiyan kiyiyaabaa pilggiyoogan meretaa xeelliyaagan ammanuwaa minttiya darobaa demmana danddayaasa. “Giigissiday Deˈii?” giya kaalli kaalli kiyiya huuphe yohotanne biidota pilggiyoogan doommana danddayaasa. He huuphe yohuwan kiyiyaabati qantta, qassi mehiyaa doˈaabaanne mittaa maataabaa maalaalissiya amaridabaa yootoosona. Saynisiyaa eranchchati meretan beˈiyoobaa milatissidi medhdhanawu malidoogaa bessiyaabatikka hegan kiyoosona.

12. Geeshsha Maxaafaa xannaˈiyo wode nuuni loytti qoppana koshshiyaabati aybee?

¹² Geeshsha Maxaafaa xannaˈa. Mentto oyddan abay odettido saynisiyaa eranchchay Medhdhidaagaa sohuwaara ammanibeenna. SHin medhdhidaagee deˈiyoogaa I guyyeppe ammaniis. I hagaadan giis: “Ta ammanuwaayyo denddo gididabay taani saynisiyaa xannaˈada eridobaa gidennan, Geeshsha Maxaafaa xannaˈiyoogan eridoba.” Geeshsha Maxaafay tamaarissiyoobaa neeni suure eriyaagaa gidana danddayaasa. SHin Medhdhidaagaa ne ammaniyo ammanuwaa minttanawu Xoossaa Qaalaa ubbatoo xannaˈana koshshees. (Yaas. 1:8; Maz. 119:97) Leemisuwawu, daro wodiyaappe kase hanidabaa Geeshsha Maxaafay suure qonccissiyoogaa yuushsha qoppa. Geeshsha Maxaafaa hiraagatanne Geeshsha Maxaafay yootiyoobay issoy issuwaara maayettiyoogaakka qoppa. Yaatiyoogee siiqiya aadhdhida eranchcha gidida Medhdhidaagaanne Geeshsha Maxaafaa I nuussi xaafissidoogaa ne ammaniyo ammanuwaa minttana danddayees.—2 Xim. 3:14; 2 PHe. 1:21.

13. Xoossaa Qaalan aadhdhida eratettay deˈiyoogaa bessiyaabay aybee?

 ¹³ Xoossaa Qaalaa xannaˈiyo wode, an deˈiya zoree keehi maaddiyoogaa akeeka. Leemisuwawu, miishshaa siiqiyoogee qohiyoogaanne hegee ‘daro metuwaa’ kaalettiyoogaa Geeshsha Maxaafay daro wodiyaappe kasetidi yootiis. (1 Xim. 6:9, 10; Lee. 28:20; Maa. 6:24) Hegee ha wodiyaankka hanii? Ha wodiyaa asaa eeshshaabaa yootiya issi maxaafay hagaadan giis: “Miishshaa demmiyoogee keehi koshshiyaaba giidi qoppiya asay ufayttenna, qassi unˈˈettees. Haray atto, daro miishshaa demmanawu koyiyaageeti ufayttokkona, ubba daro sahuwaa sahettoosona.” Yaatiyo gishshawu, nuuni miishshaa siiqennaadan Geeshsha Maxaafay yootiyoobay keehi loˈˈo zore! Geeshsha Maxaafan deˈiya nena maaddida hara zoriyaa hassayay? Geeshsha Maxaafay yootiyo zore ubbaa nuuni loytti qoppikko, nuussi keehi loˈˈo gididabaa nuna medhdhida siiqiyaagee eriyoogaa akeekananne zoriyaa demmanawu an ubbatoo ammanettana. (Yaaq. 1:5) Yaatiyoogee nuuni keehi ufayttanaadan oottees.—Isi. 48:17, 18.

14. Geeshsha Maxaafaa xannaˈiyoogee Yihoowabaa ne ay eranaadan maaddii?

¹⁴ Yihoowa loytta eranawu halchchada Geeshsha Maxaafaa xannaˈa. (Yoh. 17:3) Yaatiyoogan neeni Yihoowabaanne A eeshshatubaa erana. Hegeeti neeni meretaabaa xannaˈiyo wode erido eeshshatuura issi mala. Yihoowa eeshshatubaa nuuni xannaˈiyoogee Yihooway tumuppe deˈiyoogaa ammanettanaadan oottees. (Kes. 34:6, 7; Maz. 145:8, 9) Neeni Yihoowa kaseegaappe aaruwan loytta eriyo wode, ne A ammaniyo ammanoy minnana, neeni wozanappe A siiqananne aara dabbotido dabbotay kaseppe minnana.

15. Xoossaabaa haratuyyo yootiyoogee nena waati maaddii?

¹⁵ Neeni Xoossaa ammaniyo ammanuwaabaa haratussi yoota. Yaatiyo wode, ne ammanoy minnana. SHin neeni markkattiyo uri Xoossay deˈiyoogaa siriyo wode woyganaakko ne erana xayikko waatuutee? Geeshsha Maxaafay he oyshawu yootiyo zaaruwaa nu xuufetuppe issuwan demmanawu mala, yaatada hegaa aara tobba. (1 PHe. 3:15) Yihoowa Markka gidida hara uri neeni he oyshaa zaaranawu maaddanaadankka oychchana danddayaasa. Geeshsha Maxaafaappe zaariyoobaa he uri ekkin ekkana xayin, pilggidoogee nena maaddana. Ne ammanoy kaseegaappe aaruwan minnana. Yaatikko, medhdhidaagee baawa giya eranchcha woy keehi tamaaridaba milatiya asay yootiyoobaa neeni ammanakka.

16. Nuuni nu ammanuwaa ubbatoo minttana xayikko waanana danddayii?

¹⁶ Nuuni Yihoowawu daro layttaa haggaazidaageeta gidin aggin, Yihoowa ammaniyo nu ammanuwaa ubbatoo minttana bessees. Ayssi giikko, nuuni naagettana xayikko, nu ammanoy shuggana danddayees. Nuuni xannaˈidoogaadan, ammanuwawu denddo gidiya naqaashaa beˈana danddayokko. Nuuni beˈana danddayennabaa eesuwaara dogana danddayoos. Hegaa gishshawu, ammanuwan shuggiyoogee eesuwan ‘baqqi oyqqiya nagara’ gidiyoogaa PHawuloosi yootiis. (Ibr. 12:1) Yaatin, nuuni ha piriyaappe waani naagettana danddayiyoo?—2 Tas. 1:3.

17. Nu ammanuwaa ubbatoo minttanaadan nuna aybi maaddana danddayii?

¹⁷ Koyro, Yihooway ba geeshsha ayyaanaa immanaadan ubbatoo woossa. Ayssi giikko, ammanoy geeshsha ayyaanaa ayfiyaa macaratuppe issuwaa. (Gal. 5:22, 23) Xoossaa geeshsha ayyaanay maaddennan, Medhdhidaagaa ammaniyo nu ammanuwaa ubbatoo minttana danddayokko. Yihooway ba geeshsha ayyaanaa immanaadan nuuni ubbatoo woossikko, I nuuyyo hegaa immana. (Luq. 11:13) “Nuussi ammanuwaa gujja” giidikka woossana danddayoos.—Luq. 17:5.

18. Mazamure 1:2, 3 yootiyoogaadan, nuuni ha wodiyan demmido alˈˈo imotay aybee?

 ¹⁸ Qassi, Xoossaa Qaalaa ubbatoo xannaˈa. (Mazamure 1:2, 3 nabbaba.) Ha mazamuree xaafettiyo wode, Xoossaa Higgiyaa maxaafay kumettay amarida Israaˈeelatu xallawu deˈees. Gidoppe attin, kawotinne qeeseti Xoossaa Higgiyaa maxaafaa demmana danddayoosona; qassi ‘attumaageeti, maccaageeti, naatinne’ Israaˈeela biittan deˈiya kare biittaa asay Xoossaa Higgee nabbabettiyo wode siyanawu laappun layttan layttan issippe shiiqoosona. (Zaa. 31:10-12) Yesuusi saˈan deˈiyo wode, xaatta Geeshsha Maxaafay amarida asatu xallawunne Ayhuda woosa keettatun deˈees. SHin, ha wodiyan daro asay Xoossaa Qaalaa amaridaagaa woy kumettaa nabbabana danddayees. Hegee alˈˈo imota. Xoossay Geeshsha Maxaafaa nuussi immido gishshawu A galatiyoogaa waati bessana danddayiyoo?

19. Nu ammanuwaa ubbatoo minttanawu nuuni waatana koshshii?

¹⁹ Xoossaa Qaalaa ubbatoo nabbabiyoogan I Geeshsha Maxaafaa nuussi immido gishshawu A galatiyoogaa bessana danddayoos. Nuuni Geeshsha Maxaafaa nabbabiyoy nuussi wodee deˈiyo wode xallan gidennan, wodiyaa bazzidi Geeshsha Maxaafaa nabbabananne xannaˈana koshshees. Nuuni aggennan xannaˈiyaaba gidikko, nu ammanuwaa ubbatoo minttana danddayoos.

20. Nuuni waatanawu murttana koshshii?

²⁰ Ha alamiyaa “aadhdhida eranchchatuppenne akeekanchchatuppe” dumma hanotan, Xoossaa Qaalan baasettida mino ammanoy nuussi deˈees. (Maa. 11:25, 26) Saˈan hanotay iiti iiti biyo gaasuwaanne sinttappe hegaa Yihooway waatanaakko Geeshsha Maxaafay qonccissees. Yaatiyo gishshawu, nu ammanuwaa minttanawunne nuna Medhdhidaagaa daro asay ammananaadan maaddanawu nuuyyo danddayettida ubbabaa oottanawu murttidaageeta gidoos. (1 Xim. 2:3, 4) Qassi saˈan paxa deˈiya ubbay Yihoowa sabbanawu Ajjuutaa 4:11 yootiyoogaadan, “Nu Godau Xoossau, neeni bonchchuwaa, . . . ekkanau bessaasa. Aissi giikko, ubbabaa neeni medhdhadasa” giyo wodiyaa ubbatoo yeemuwan naagiyaageeta gidoos.