1. Wetin they don teach you about the God wey make everything?

IF YOU grow for Jehovah Witness family, you go don learn about Jehovah from small pikin. They teach you say na Jehovah make everything, say e get fine-fine character, and say e get better thing for mind for us.—Gen. 1:1; Acts 17:24-27.

2. Wetin some people de think about people wey believe say na God make everything?

² But plenty people no believe say God dey, or say e make everything. Instead, they believe say life start by e self for some kind simple way. Then from that one, small-small, other things wey get life begin come out. Some of the people wey believe this kind thing really go school well. They fit claim say science people don prove-am say Bible no correct, and say na people wey no go school, wey no know anything, or wey just de believe anything wey they hear, de believe say na God make everything.

3. Why e dey important to make our own faith dey strong?

³ The thing wey some people wey go school talk, go fit make us doubt say na Jehovah make everything? We need to first ask ourself why we believe say na Jehovah be the Creator. Na because they tell us to believe-am, or na because we don take the time by ourself to study the things wey prove say na Jehovah make everything? (1 Cor. 3:12-15) No matter how long we don de serve Jehovah, all of us need to make our faith de strong more-more. If we do like that, we no go allow people deceive us when they talk say the thing wey Bible talk no correct. (Col. 2:8; Heb. 11:6) To help us, this article go talk about (1) why plenty people no believe say na God make everything, (2) how you fit make your faith for Jehovah wey be your Creator dey strong, and (3) how you fit maintain that strong faith.

4. As e dey for Hebrews 11:1 and footnote, wetin Bible talk say real faith be?

⁴ Some people think say, person wey get faith na person wey just de believe something and proof no dey to show say the thing na true. But as e dey for Bible, that one no be real faith. (Read Hebrews 11:1 and footnote.) Bible show say faith de get proof to show say something na true. So even though say we no fit see Jehovah, Jesus, and the Kingdom, we get proof say them dey real. (Heb. 11:3) One science person wey become Jehovah Witness talk say: “We get proof for the things wey we believe. Our faith no de close eye for things wey science don find out say na true.”

5. Why plenty people believe say life just start by e self?

⁵ We fit ask say, ‘Why plenty people believe say no be God make everything, when e be say plenty things dey to prove say na God make everything?’ The truth be say, some people never study this things by theirself. Robert wey don be Jehovah Witness now, talk say: “Since they no teach me for school say na God make everything, so I just think say na so e be. Na when I dey 22 years I talk to Jehovah Witness people and learn say, Bible give us better reasons to believe say na God make everything.” *—Check the box “ Important Message for Papa and Mama.”

6. Why some people believe say no be God make everything?

⁶ Some people no believe say na God make everything because they say na only the things wey they fit see, them de believe.  But the truth na say, they believe things wey they no fit see, like breeze, because they get proof say e dey real. For the same way, the kind faith wey Bible talk about get proof for things wey we no fit see but them dey real. (Heb. 11:1) If we want study the proof by ourself, e go take time and we go work. But plenty people no dey ready to do this kind work. Person wey no want study the proof by e self fit just believe-am say God no dey.

7. Na everybody wey go school talk say no be God make everything? Explain.

⁷ After some science people don study proof wey show say na God make everything, they come believe say na true. * Like Robert wey we talk about before, some people fit don feel say no be God make everything because they no ever teach them for university. But plenty science people don  know and love Jehovah now. Just like this science people, all of us need to make our faith for God dey strong, whether we go school or we no go school. Nobody fit do this one for us.

8-9. (a) Which question we go talk about now? (b) If you study about the things around you, how this one fit help you?

⁸ How you fit make your faith dey strong say na God make everything? Make we talk about four ways.

⁹ Study things wey dey around you. You fit make your faith for God dey strong when you take time de look the animals, plants, and stars. (Ps. 19:1; Isa. 40:26) The more you de study this kind things, the more your faith go de strong say na Jehovah make everything. Our publications de get articles wey explain different-different things wey God make. Make you no jump this kind articles if them dey hard for you to understand well. Learn-am as you fit. And for our jw.org website, we get fine-fine videos wey talk about the things wey God don make, and we don de show them for our convention for some years now. Remember to watch this videos again.

10. Talk one example to prove say Creator dey. (Romans 1:20)

¹⁰ When you de study the things around you, sofri put your mind for this things and see wetin you fit learn about God from them. (Read Romans 1:20.) For example, you fit know say the sun de bring heat and light wey living things need to dey alive for this earth. But some of the light from the sun fit still cause problem. So people need wetin go protect them from this kind light. And the truth be say, we get protection! How? One kind gas dey around the earth and the gas de protect us from this light wey fit give us problem. As this light de strong more-more, the amount of gas wey de protect us de plenty more-more. Now, you no gree say person dey wey make this things, and say the person get love and sense?

11. Where you fit see things wey go make your faith strong more say na God make everything? (Check the box “ Some Things Wey Go Make Your Faith Dey Strong Say Creator Dey.”)

¹¹ You fit see plenty things wey go make your faith dey strong about the things wey God make, when you check Watch Tower Publications Index and you do research for our jw.org website. You fit start with the different-different topics and videos under “They Make-am Or E Just Appear?” This topics and videos dey short and they talk some wonderful things about animals and plants. They still get examples of how science people don try to copy wetin they see for the things wey God don make.

12. When we de study Bible, wetin be some things wey we suppose think about?

¹² Study Bible. That science man wey we talk about for paragraph four, no first believe say na God make everything. But as time de go, e come get faith. E talk say: “No be only the thing wey I study for science make me get faith. Another reason na because I take time study Bible.” You fit don already know Bible well. Even with that one, if you want make your faith dey strong say na God make everything, you must continue to study Bible. (Josh. 1:8; Ps. 119:97) For example, think about the correct way wey Bible talk about the things wey don happen long time ago. And think about all the things wey happen as Bible don talk-am, and how the different people wey write Bible agree with each other. This one go make your faith dey strong more say the God wey  make us get love and sense. And say, e use e spirit direct the people wey write Bible. *—2 Tim. 3:14; 2 Pet. 1:21.

13. Wetin be one example wey show say na better sense dey Bible?

¹³ When you de study Bible, think about how the advice de help person. For example, no be today Bible don warn say danger dey when person love money and this one go bring “plenty pain.” (1 Tim. 6:9, 10; Prov. 28:20; Matt. 6:24) This thing wey Bible talk dey correct today? One book wey talk about how people de behave for our time talk say: “Many times, people wey believe say to get money dey important pass any other thing for this life, no de get joy. Even people wey just want get more money no de get joy and them de get more problem with their health.” So as Bible warn us make we no love money, that one na really good advice. You fit think of any other advice for Bible wey don help you? When we de think about all the better advice for Bible, we go see say the God wey make us love us, and we go always trust the sense wey e de give. (Jas. 1:5) Because of this one, we go enjoy our life more.—Isa. 48:17, 18.

14. When we de study Bible, wetin this one go teach us about Jehovah?

¹⁴ The thing wey go dey your mind as you de study Bible, na to know Jehovah more-more. (John 17:3) As you de study Bible, you go learn about the kind person wey Jehovah be. Na this same fine-fine character you learn about when you study the things wey Jehovah make. This fine-fine character them, make us dey sure say Jehovah na real Person. (Ex. 34:6, 7; Ps. 145:8, 9) As you de know Jehovah more-more, your faith, friendship, and love for Jehovah, go de strong more-more.

15. When you de tell people about God, how this one fit help you?

¹⁵ Tell other people about your faith for God. As you de do like that, your faith go de strong more-more. But what if person wey you preach to, de doubt whether God dey and you no know wetin to answer? Try find answer for inside one of our publications to see wetin Bible talk about-am, and then discuss the information with the person. (1 Pet. 3:15) You fit still ask another brother or sister with experience to help you. Whether the person accept the answer for Bible or e no accept-am, you go gain from the research wey you don do. Your faith go strong more. Because of this one, you no go believe people wey be like say they get sense or go school well, and people wey talk say no be God make everything.

16. Wetin fit happen if we no continue to make our faith strong?

¹⁶ No matter how long we don de serve Jehovah, we must continue to make our faith for Jehovah de strong. Why? Na because if we no dey careful, our faith fit weak. Remember say faith de get proof for the things wey we no fit see, but wey dey real. We fit forget about something quick-quick when we no fit see-am. No wonder, when person no get faith or e faith dey weak, Paul call this kind condition “the sin wey de quick slow us down.” (Heb. 12:1) So wetin we fit do make this trap no catch us?—2 Thess. 1:3.

17. Wetin fit help us continue to get faith?

¹⁷ Number one, beg Jehovah for e holy spirit, and de always do like that. Why? Na  because faith dey part of the fruit wey holy spirit de help us get. (Gal. 5:22, 23) We no go fit continue to make our faith for God dey strong if e holy spirit no help us. If we continue to beg Jehovah for e spirit, e go give us. (Luke 11:13) We fit even pray say: “Give us more faith.”—Luke 17:5.

18. As e dey for Psalm 1:2, 3, which better gift we fit get now?

¹⁸ Another thing be say, make you de always study Bible. (Read Psalm 1:2, 3.) When they write that psalm, the number of people for Israel wey get complete copy of God Law wey they write, no plenty. Even with that one, the king and the priest them fit get copies of the Law. And every seven years, arrangement dey for “the men, the women, the children,” and the strangers for Israel to listen to God Law as them de read-am come out. (Deut. 31:10-12) For time of Jesus, na only small number of people get Bible as scrolls. People fit still see this scrolls for synagogues. But today, plenty people fit get complete Bible or part of-am. That one na really better gift. How we fit show say we like as we fit get Bible?

19. Wetin we need to do if we want continue to make our faith strong?

¹⁹ We fit show say we like as we get Bible when we de always read-am. We need to get time wey we de use read and study Bible, no be to read-am just anytime wey we get chance. If we make sure say we de always study Bible, this one go make our faith continue to dey strong.

20. Wetin we go make up our mind to do?

²⁰ We no be like people for this world wey be like say they get sense and they really go school well. Instead, we get strong faith wey come from Bible. (Matt. 11:25, 26) Because we de study Bible, we know why the condition for earth de bad more-more and the thing wey Jehovah go do about-am. So, make we make up our mind to continue to make our faith strong, and help plenty people as we fit to get faith say na God make everything. (1 Tim. 2:3, 4) And make we continue to use all our heart wait for the time when everybody wey dey alive for this earth go praise Jehovah and talk wetin dey Revelation 4:11: ‘Jehovah our God, na you deserve the praise because na you make everything.’