1. ¿Xi nánnaluʼ de Dios ni bizáʼ guiráʼ cosa?

¿ÑEE biniisiluʼ ndaaniʼ ti familia de testigu stiʼ Jehová la? Pa zacá ni, zándaca bisiidicabe lii de Jehová dxi nahuiiniluʼ. Biziidiluʼ laabe nga bizaʼbe guiráʼ cosa, nápabe cualidad sicarú ne racaláʼdxibe guibani guiráʼ binni ndaaniʼ ti paraísu lu Guidxilayú riʼ (Gén. 1:1; Hech. 17:24-27).

2. ¿Xi riníʼ ique caadxi binni de ca ni runi cré nuu tu bizáʼ guiráʼ cosa?

² Yanna, stale binni qué runi cré pa nuu Dios o qué runi crecaʼ pa laa bizáʼ guiráʼ cosa. Runi crécabe ni málasi guyuu guendanabani ne chaahuiʼ chaahuiʼ guca evolucionar guiráʼ cosa ni nabani. Nuu de ca binni ni riníʼ ique sicaríʼ guzacaʼ scuela roʼ. Zándaca riníʼcabe maʼ bisihuinni ciencia cadi jneza ni rusiidiʼ Biblia ne ca binni ni runi cré nuu tu bizáʼ guiráʼ cosa nga, ca binni ni qué ñé scuela, ni cadi nuu xpiaaniʼ ne ni nagueenda riguítecabe laa.

3. ¿Xiñee nabé risaca cada tobi guquidxi fe stiʼ?

³ ¿Ñee zusaana de guni crenu Jehová nga bizáʼ guiráʼ cosa pur ni riníʼ ique xcaadxi binni la? Ni zacané laanu nga guiníʼ íquenu xiñee runi crenu Dios nga bizáʼ guiráʼ cosa. ¿Ñee purtiʼ nga nga ni bisiidicabe laanu la? ¿O purtiʼ maʼ guleenu tiempu para guni estudiarnu ca prueba ni rusihuinni dxandíʼ Dios bizáʼ guiráʼ cosa la? (1 Cor. 3:12-15). Neca maʼ zinenu stale iza de cayúninu ni ná Jehová, guiranu caquiiñeʼ guquídxinu fe stinu. Pa gúninu ni la? qué zudiʼnu lugar «guchenda tuuxa [laanu] né ni zeeda si de xquendabiaaniʼ» ne riniʼcaʼ cadi dxandíʼ ni zeeda lu Biblia (Col. 2:8; Heb. 11:6). Para ganda gúninu ni, zacané artículo riʼ laanu guiénenu xiñee nuu stale binni qué runi cré nuu tu bizáʼ guiráʼ cosa, ximodo guquídxinu fe ni nápanu Jehová, Dios ni bizáʼ laanu, ne ximodo cadi gusaana de guquídxinu fe stinu.

4. Casi ná Hebreos 11:1, ¿xii nga fe?

⁴ Nuu binni riníʼ ique fe nga guni cré tuuxa xiixa cosa neca qué gapa prueba pa dxandíʼ ni. Peru Biblia rusiene cadi nga diʼ nga gapa binni fe (biindaʼ Hebreos 11:1). Biblia rusiidiʼ fe nga ti prueba ni rusihuinni dxandíʼ ni runi crenu, nga runi neca qué ridúʼyanu Jehová, Jesús ne Reinu ni nuu guibáʼ, nápanu prueba dxandíʼ nuu ca ni (Heb. 11:3). Ti científicu ni despué guca Testigu, guníʼ: «Ca Testigu nápadu prueba de guiráʼ cosa ni runi credu ne runi respetardu guiráʼ ni maʼ bidxela ca científicu».

5. ¿Xiñee stale binni qué runi cré Dios bizáʼ guiráʼ cosa ni nabani?

⁵ Yanna, pa dxandíʼ nuu prueba nuu tu bizáʼ guiráʼ cosa, ¿xiñee stale binni qué runi cré pa Dios bizáʼ guiráʼ cosa ni nabani yaʼ? Purtiʼ nuu binni qué huabee tiempu para guni estudiar ca prueba ca. Robert, ni yanna maʼ testigu stiʼ Jehová laa, guníʼ: «Cumu ra scuela qué rusiidicabe nuu tu bizáʼ guiráʼ cosa ca la? nga runi guníʼ iqueʼ cadi dxandíʼ. Dxi maʼ napaʼ 22 iza guniʼné ca testigu stiʼ Jehová naa, ne biquiiñecaʼ Biblia para guluiʼcaʼ naa dxandíʼ zanda guni crenu Dios bizáʼ guiráʼ cosa». * (Biiyaʼ cuadru « Ni naquiiñeʼ ganna ca padre»).

6. ¿Xiñee qué runi cré caadxi binni dxandíʼ nuu Dios?

⁶ Nuu caadxi binni qué runi cré pa  nuu tu bizáʼ guiráʼ cosa purtiʼ nácabe runi crécabe ni ruuyasícabe. Peru ni dxandíʼ nga runi crécabe cosa ni qué ruuyacabe. Guzéʼtenu ti ejemplu, runi crécabe nuu gravedad purtiʼ nápacabe prueba dxandíʼ nuu ni. Fe ni riete lu Biblia, laani nga «prueba ni rusihuinni dxandíʼ ni runi crenu neca qué ridúʼyanu ni» (Heb. 11:1). Stale binni qué riná guni estudiar ca prueba riʼ purtiʼ qué rinacaʼ cueecaʼ tiempu, nga runi qué runi crecaʼ Dios.

7. ¿Xiñee nánnanu cadi guiráʼ binni ni guzá scuela roʼ riniʼcaʼ cadi Dios bizáʼ universu?

⁷ Nuu caadxi científicu runi crecaʼ Dios bizáʼ universu purtiʼ maʼ biʼniʼ estudiarcaʼ ca prueba ni nuu. * Cásica Robert, ni bizéʼtenu lu párrafo gaayuʼ que, zándaca nuu binni qué runi cré pa dxandíʼ nuu Dios ni bizáʼ guiráʼ cosa purtiʼ qué rusiidicabe de laani ndaaniʼ ca scuela ca. Peru stale científicu maʼ runi crecaʼ Jehová ne nadxiicaʼ laabe. Cásica biʼniʼ ca científicu riʼ, laaca caquiiñeʼ guquídxinu fe ni nápanu Dios, neca guzanu o qué nizanu scuela roʼ. Cada tobi de laanu naquiiñeʼ guquidxi fe stiʼ.

8, 9. a) ¿Xi pregunta zacábinu? b) ¿Xi zabeendunu pa guni estudiarnu guiráʼ cosa ni bizáʼ Dios?

⁸ ¿Ximodo guquídxinu fe ni nápanu Dios ni bizáʼ guiráʼ cosa? Guidúʼyanu tapa modo.

⁹ Guni estudiarnu guiráʼ ni bizáʼ Dios. Pa guiduʼyaʼ chaahuinu ca manihuiiniʼ, ca yagahuiiniʼ ne ca beleguí ca, zaguidxi fe ni nápanu Dios ni bizáʼ guiráʼ cosa (Sal. 19:1; Is. 40:26). Ora jma guni estudiarnu ca cosa riʼ jma zuni crenu Jehová nga bizáʼ guiráʼ ni. Lu ca publicación stinu zeeda caadxi artículo ni cusiene de ca cosa ni bizáʼ Dios. Neca gaca nagana para laanu guiénenu ni, gúninu stipa pur guidúʼndanu ne guizíʼdinu biaʼ gándatiʼ. Ne cadi guiaandaʼ laanu lu sitiu jw.org, zanda guidúʼyanu ca videu ni caníʼ de guiráʼ cosa ni bizáʼ Dios ni bidúʼyanu lu ca asamblea regional ni gúpanu.

10. Bizeeteʼ ti ejemplu ni culuíʼ nuu tu bizáʼ guiráʼ cosa (Romanos 1:20).

¹⁰ Ora guni estudiarnu guiráʼ ni bizáʼ Dios, galán guiníʼ íquenu xi guiráʼ rusiidiʼ ni laanu de Jehová (biindaʼ Romanos 1:20). Guzéʼtenu ti ejemplu, rudii Gubidxa ca laanu biaaniʼ ne calor ni caquiiñeʼ para chuʼ guendanabani lu Guidxilayú, peru laaca rudiini laanu caadxi xtuxhu ni rábicabe rayos ultravioleta, ne malu ca xtuxhu riʼ. ¿Xi rapa binni guidxilayú para cadi guniná ca xtuxhu ca laa yaʼ? Nuu Guidxilayú riʼ ndaaniʼ ti capa de gas ni rábicabe ozono, ne zeeda gácani casi ti escudu ni rucueeza ca xtuxhu malu ca. Ora jma maʼ stale xtuxhu malu ca cundaa Gubidxa ca la? laaca jma stale gas ca riuu para gucueeza ni. Nga runi, ¿cadi dxandíʼ rábitu nuu tobi ni bizáʼ guirani ne nuu xpiaaniʼ ne nadxii binni la?

11. ¿Paraa zadxélanu información de ca ni bizáʼ Jehová ni zacané laanu iguidxi fe stinu? (Biiyaʼ cuadru « Ca herramienta ni zacané laanu iguidxi fe stinu»).

¹¹ Pa guyúbinu información lu Ca tema ni huabee ca testigu stiʼ Jiobá ne lu jw.org, zadxélanu stale información ni caníʼ de guiráʼ ni maʼ bizáʼ Jehová ne zuquídxini fe stinu. Zanda guidúʼyanu ca artículo ne videu ni nuu lu sección «¿Ñee nuu tu bizáʼ ni la?», nachucu ca ni ne cusiene ca ni caadxi cosa galán de ca manihuiiniʼ ne ca yagahuiiniʼ. Laaca zeeda ejemplu stiʼ ca científicu ni huayacaláʼdxicaʼ guni copiarcaʼ ni bizáʼ Jehová para gúnicaʼ xiixa cosa.

12. ¿Xi caquiiñeʼ guiníʼ íquenu ora cayuni estudiarnu Biblia?

¹² Guni estudiarnu Biblia. Científicu ni bizéʼtenu lu párrafo tapa que guníʼ dxiqué qué ñuni cré pa nuu tuuxa ni bizáʼ guiráʼ cosa, peru gudiʼdiʼ si tiempu bichaabe modo riníʼ íquebe. Laabe guniʼbe: «Napaʼ fe cadi purtiʼ si nannaʼ de ciencia, sínuque laaca bineʼ estudiar chaahueʼ Biblia». Zándaca maʼ nánnanu xi rusiidiʼ Biblia. Neca zacá, cadi naquiiñeʼ gusaana de guni estudiarnu para guquídxinu fe ni nápanu Dios ni bizáʼ guiráʼ xixé cosa (Jos. 1:8; Sal. 119:97). Guiníʼ íquenu pabiáʼ jneza ruzeeteʼ Biblia ca cosa ni bizaaca dxiqué,  ca profecía ni riete luni ne ximodo ti tema si caniʼni. Ndiʼ zacané laanu gápanu fe dxandíʼ nuu ti Dios ni nadxii laanu, ni nuu xpiaaniʼ, ni bizáʼ laanu ne ni guníʼ xi guicá lu Biblia (2 Tim. 3:14; 2 Ped. 1:21). *

13. Bizeeteʼ ti ejemplu ni rusihuinni jneza nga ni rusiidiʼ Stiidxaʼ Dios.

¹³ Ora guni estudiarnu Stiidxaʼ Dios, guiníʼ íquenu pabiáʼ zacané ca conseju stini laanu. Guzéʼtenu ti ejemplu, maca xadxí guníʼ Biblia pa gannaxhii tuuxa bueltu zapa yuubaʼ ne zuniná ni laa (1 Tim. 6:9, 10; Prov. 28:20; Mat. 6:24). De yanna dxandíʼ ni ná textu riʼ. Sicaríʼ ruzeeteʼ ti libru ni caníʼ ximodo naca binni tiempu riʼ: «Stale biaje ca binni ni riníʼ ique bueltu nga ni jma risaca, cadi nabánicaʼ nayecheʼ ne nuucaʼ triste. Dede ca binni ricá ique gapa jma bueltu cadi nabánicaʼ nayecheʼ ne raca huaracaʼ». Racá ridúʼyanu jneza nga conseju stiʼ Biblia de cadi gannaxhiinu bueltu. ¿Ñee cayeedasilú laanu xcaadxi conseju ni zeeda lu Biblia ni huayacané laanu la? Ra jma gusisácanu ca conseju zeeda lu Biblia, jma zápanu confianza Jehová nga nanna xii nga ni jma galán para laanu (Sant. 1:5). Pa gúninu ni la? zabáninu jma nayecheʼ (Is. 48:17, 18).

14. ¿Xi zazíʼdinu de Jehová ora guni estudiarnu Biblia?

¹⁴ Guni estudiarnu para gunibiáʼ chaahuinu Jehová (Juan 17:3). Ra guni estudiarnu Biblia, zunibiaʼnu ca cualidad stiʼ Jehová, ne rihuinni ca cualidad riʼ lu guiráʼ ni bizaʼbe. Pa gunibiaʼnu ca cualidad ca, zuni crenu dxandíʼ nuu Jehová (Éx. 34:6, 7; Sal. 145:8, 9). Ra jma gunibiáʼ chaahuinu Jehová, jma zaguidxi fe ni nápanu laabe, jma zannaxhiinu laabe ne zaca xhamígunu laabe.

15. ¿Xi zabeendunu pa guinínenu binni de fe ni nápanu Dios?

¹⁵ Ora guinínenu binni xiñee nápanu fe Dios zuquídxini fe ni nápanu laabe. Peru pa chuʼ tuuxa ni cayuni predicarnu guinabadiidxaʼ laanu pa dxandíʼ nuu Dios ne qué gánnanu xi guicábinu yaʼ? Guyúbinu lu ca publicación stinu respuesta stiʼ pregunta ni biʼniʼ binni ca laanu ne despué guluinu ni laabe (1 Ped. 3:15). Laaca zanda guinábanu ti hermanu ni napa experiencia gacané laanu. Neca qué gucaadiaga binni ni biʼniʼ predicarnu ca laanu, zacané ni biʼniʼ investigarnu iguidxi fe stinu. Ne ni zabeendunu nga qué zuni crenu binni ni ná nuu xpiaaniʼ ni riníʼ gastiʼ Dios.

16. ¿Xi zazaaca pa qué gápanu ne guquídxinu fe stinu?

¹⁶ Neca maʼ zinenu stale tiempu de cayúninu ni ná Jehová o huaxiéʼ, cadi gusaana de guquídxinu ne gápanu fe ni nápanu laabe. ¿Xiñee yaʼ? Purtiʼ pa qué gúninu ni la? zará fe stinu. Cadi guiaandaʼ laanu, fe ca nga ti prueba ni rusihuinni dxandíʼ ni runi crenu neca qué ridúʼyanu ni. Ne ca cosa ni qué rihuinni nagueenda riaandaʼ ni laanu. Nga runi Pablo guníʼ pa qué gápanu fe zeeda gácani «pecadu ni ruchenda laanu nagueendaca» (Heb. 12:1). Yanna, ¿xi caquiiñeʼ gúninu para cadi gusaana de gaca fe stinu naguidxi yaʼ? (2 Tes. 1:3).

17. ¿Xi zacané laanu para cadi gusaana de chuʼ fe stinu naguidxi?

¹⁷ Primé, guinábanu Jehová gatigá gudii laanu espíritu santu stiʼ. ¿Xiñee yaʼ?  Purtiʼ espíritu santu ca nga racané laanu gápanu fe (Gál. 5:22, 23). Qué zanda diʼ guquídxinu ne gápanu fe Dios ni bizáʼ laanu pa qué gacané espíritu santu laanu. Nga runi, cadi gusaana de guinábanu Jehová espíritu stiʼ, ne laa zudiini laanu (Luc. 11:13). Zanda gábinu laabe: «Dané laadu jma fe» (Luc. 17:5).

18. Casi ná Salmo 1:2, 3, ¿xi regalu nabé risaca nápanu?

¹⁸ Laaca cadi naquiiñeʼ gusaana de guni estudiarnu Stiidxaʼ Dios (biindaʼ Salmo 1:2, 3). Dxi gucuá salmo riʼ, huaxiéʼ israelita gupa ti copia ra cá Ley stiʼ Dios. Peru ca rey ne ca sacerdote gúpacaʼ ti copia stini. Ne cada gadxe iza «ca hombre, ca gunaa, ca xcuidi ne binni de sti ladu» ni nuu ndaaniʼ guidxi Israel naquiiñeʼ gaca reunircaʼ para gucaadiágacaʼ ora riuundaʼ Ley stiʼ Dios (Deut. 31:10-12). Tiempu stiʼ Jesús, huaxiéʼ si binni gupa rollo ra cá Stiidxaʼ Dios ne stale de laani guyuuni ndaaniʼ ca sinagoga. Tiempu riʼ, maʼ casi guiráʼ binni napa guidubi Biblia o pur parte. ¿Ximodo zanda gusihuínninu rudiʼnu xquixe peʼ pur regalu ni nápanu riʼ?

19. ¿Xi naquiiñeʼ gúninu para cadi gusaana de gápanu ti fe naguidxi?

¹⁹ Zanda gusihuínninu rusisácanu Stiidxaʼ Dios pa guidúʼndanu ni guiráʼ dxi. Qué zanda diʼ gápanu estudiu personal stinu ora si gápanu tiempu. Pa quíxhenu ti horariu para gápanu estudiu personal stinu, zacané ni laanu iguidxi fe stinu.

20. ¿Xi maʼ gudixhe íquenu gúninu?

²⁰ Maʼ gadxé laanu de «ca binni nuu xpiaaniʼ» para binni guidxilayú, purtiʼ nápanu fe lu guiráʼ ni zeeda lu Stiidxaʼ Dios (Mat. 11:25, 26). Pur runi estudiarnu ni, nánnanu xiñee ziguchaa xpiaʼ binni ne xi chiguni Jehová pur laani. Nga runi, quixhe íquenu guquídxinu fe stinu ne gacanenu binni biaʼ gándatiʼ gápacaʼ fe Dios ni bizáʼ laanu (1 Tim. 2:3, 4). Nga runi, cadi gusaana de cuézanu né guendanayecheʼ guedandá dxi gusisaca guiráʼ ni nabeza lu Guidxilayú riʼ Jehová ne guiniʼcaʼ ca diidxaʼ ni cá lu Apocalipsis 4:11: «Jehová Dios stidu, lii nga runi merecerluʼ guicaaluʼ gloria, [...] purtiʼ lii bizaʼluʼ guiráʼ xixé ni nuu».