EMHUOGHAẠPH ITUUGHẠ PHỌ 33
Moọgh Ibo Esi Aroopoogh Arukumuan Phọ Anạ
“Enighẹ ghụn epu dị ilọ nạ amhoọgh kegbaanyạn nyinhạ r’ooḅaghamhiạn aloor owạ ghan inhọn oomo amem.”—ECCL. 6:9.
AḌUỌR PHỌ 111 Our Reasons for Joy
OGHAẠPH OOKARAGH *
1. Ika kụ idị ibadị rokparaghạ ghan oḍighi oomo ipẹ bidị kotue bọ siẹn arukumuan phọ aZihova?
YIRA omoọgh ni oboom oḍighi oḍighi idiphọ aḅirinhi phọ ophọn phọ rasi bọ eekunha. (Mat. 24:14; Luk 10:2; 1 Pit. 5:2) Yira rowạ ni okumu aZihova oomo ipẹ yira kotue bọ. Ibadị mobughẹ rukumuan phọ abidị epẹ erugh phọ. Abuniin moḍighi bukọy eten. Abunhọn rowạ ghan oghị aBetẹl obobọ ophinhom aani abin rukumuan odoghoḍi aruutu ookpomhoghan phọ. Ḅilhẹ aḍita abumor rosianhaan ni okumuan idiphọ abudị rologhonhaạn ḍighaạgh ikumor awe phọ obobọ idiphọ ikumor awe. (1 Tim. 3:1, 8) P’eeghe idị olhoghi aZihova raḅaạl ghan omhiịn ookiạ uwaloor phọ ophọn phọ awe phọ odị omhoọgh bọ!—Ps. 110:3; Isa. 6:8.
2. Yira kologhoma ika eḍighi maạr dị yira u/tue uteẹny iniin asiigbu dị yira roporogh?
2 Yira otue ni oḅonyonhu ozuan eḍighi maạr dị yira okori okori kụ eepoogh obobọ asiigbu dị yira roporogh oteẹny i/tu. Obobọ yira otue ni oḅonyonhu ozuan eḍighi maạr dị aḍikpọ obobọ inhọn asidọl i/meera mọ aroopoogh dị yira rowạ m’iteẹny iyira. (Prov. 13:12) Ipẹ kụ imitenhaan oniin umarani dị oghol mọ Melissa. * Iḅeraạn ni nyodị oghị aani aBetẹl okumuan obobọ oghị aani School for Kingdom Evangelizers, kuolọ odị aḅẹm mọ: “Asiạ amhị mepel. Nyiidiphọ, aroopoogh phọ iphẹn phọ eḍighi idiphọ amalhạ bịn. Eeni amem mị raḅonyonhu ghan ni kazuan.”
3. Eeghe kụ edị eeni kewạ mọ abuniin oḍighi orue osianhaan iniin aroopoogh?
3 Abuniin dị oḍighi iḍoọgh ḅilhẹ omhoon loor kewạ ni dị kokpọ olhoghi oḅilhẹ omoọgh iniin araagharạ kụ ogbi ongọ abidị inhọn aroopoogh. Esi omaạm, eeni bidị omoọgh ni olhegheri iyaạr, omoọgh akpọ oḅio osopha osopha, ḅilhẹ omoọgh ikpukpụ oḍighi iyaạr; kuolọ eeni kewạ dị bidị komoọgh okparạm, omiigha ghan loor oḍighi iyaạr, obobọ olọgh ghan eegu bunhọn. Eḍighi maạr dị nạ alhọgh ikuph omhoọgh araagharạ phọ ewạ bọ dị nạ kamoọgh, pọ k’ongọ ni nyinhạ roopoogh arukumuan phọ nạ rawạ bọ. Ooḅeghiọn eḍeenhaan aNick. Mem dị odị amhạn 20 asiạ, odị alhoghoma ni mabi eniin amem dị u/mạ nyodị oḍighi aani oniin odị raloghonhaạn ḍighaạgh ikumor awe phọ. Odị aḅẹm mọ, “Mị ulhoghoma mọ eeni iyaạr edi ni mị ra/ḍighi agey.” Kuolọ i/pẹr Nick. Odị aḍighi ni oomo ipẹ odị katue bọ ophinhom aani abin roopoogh phọ edi bọ siphẹ ookpomhoghan phọ. Rodon odị maḍighi oniin olọ Ekụ Phọ Repogh Bọ olạ agadạ phọ.
4. Yira kooḅeghiọn eeghe siẹn emhuoghaạph phọ ephẹn phọ?
4 Eḍighi ni edị aḍiigbu dị nạ ko/rue oteẹny meḍighi idị nạ aḅonyonhu azuan ḍughụm? Eḍighi idiphọ, pọ kaạph ipẹ nạ alhoghoma bọ aḅenhị aZihova. (Ps. 37:5-7) Oḅarạm isiphẹ, teẹny onyọ umor dị asianhaan apuru nyodị ilọ idị nạ katue anighemhị rukumuan phọ nạ rangọ bọ Enhaạn, kụ aḅilhẹ akparaghạ osighẹ oḍighinhom oroma phọ. Nạ aḍighi ni iphẹn phọ, eeni nạ kamoọgh ni eepoogh arukumuan phọ obobọ ḍiigbu phọ. Kuolọ idiphọ emitenhaan bọ Melissa, eeni eepoogh phọ nạ rawạ bọ i/dugh dị nạ katue ateẹny nyiidiphọ. Ika kụ idị nạ katue apamanhạm ibo phọ anạ? Orue ophagharanhaạn aḍipuru phọ aḍiphẹ phọ, emhuoghaạph phọ ephẹn phọ keeḅeghiọn (1) esi phọ nạ kamoọgh bọ ibo, (2) ipẹ nạ katue bọ abughẹ ibo phọ anạ, ḅilhẹ (3) r’idọ asiigbu dị nạ katue apighi kụ ebughẹ ibo phọ anạ.
ESI PHỌ NẠ KAMOỌGH BỌ IBO
5. Orue omhoọgh ibo, yira ogbon ghan eeghe? (Ecclesiastes 6:9)
5 Idiphọ ogẹ bọ siphẹ Ecclesiastes 6:9, yira kotue ni omoọgh ibo eḍighi maạr dị yira oghị esi phọ ekpeanhaạn bọ kụ owạ. (Bạl.) Oye dị rakelhọm ghan ilọ odị “amhoọgh” ramoọgh ghan ogbaanyạn, odaphạn sidọl phọ odị. Ḍieriphọ aḍighaạgh phọ, oye dị raaḅaghamhiạn ghan loor owạ ghan inhọn araraạr dị odị ka/tue amoọgh ka/moọgh ogbaanyạn. Esi iduọn phọ, yira otuughạ eeghe siẹn phọ? Orue omhoọgh ibo, ogbon ipẹ yira omhoọgh bọ ḅilhẹ r’idị yira olhegheri ni mọ yira kotue ni omoọgh.
6. Eeghe aḍidogh kụ edị yira kooḅeghiọn nyiidiphọ, kụ yira kogbon eeghe?
6 Ketue ni ekạr edugh dị yira komoọgh ghan ogbaanyạn esi ipẹ yira moḍighi bọ obobọ omhoọgh bọ oḍighi ḍughụm? Ibadị awe ootughiạn mọ ke/tue edugh loor esi dị mọ riḅeraạn ghan iyira oghiọm aghisigh otuughạ ghan olhegheri imhoom araraạr ḅilhẹ r’ilọ oḍighi. Kuolọ ketue ni edugh. Yira kotue ni okelhọm raraạr phọ ipẹ yira omhoọgh bọ. Ika kụ idị yira kotue bọ oḍighi iphẹn phọ? Orue olhegheri, uguạ ooḅeghiọn ḍidogh ikpoki phọ aZizọs adogh bọ siphẹ Matiu 25:14-30. Yira kogbon iyaạr dị aḍidogh phọ kitughemhị iyira ilọ ipẹ yira kotue bọ omoọgh ibo ḅilhẹ obughẹ ibo aḍisẹph phọ yira omhoọgh bọ nyiidiphọ.
IDỊ NẠ KATUE ABUGHẸ IBO PHỌ ANẠ
7. Kaạph aakaragh ilọ aḍidogh ikpoki phọ aZizọs adogh bọ.
7 Siphẹ aḍidogh phọ, odẹ-otu phọ rawạ oghị erelhe eekelhạ ekpisi. Kụ tutụ odị kaḅuạ bọ, odị aamhaghạgh rebenhẹ phọ odị angooghị ikpokị dị bid kokori omuulhom ḍighi. Odị r’ophogh inyaạm ilọ oye r’oye, kụ angọ nyoniin ḍioph oonịr anaira, onhọn inya oonịr, onọn kẹn iyạl oonịr. Abuḅẹl iyạl arebenhẹ phọ odị ulhọgh ni ikuph osighẹ oḍighinhom ikpoki phọ. Toroboiperolbọ, omhunhenhiom iraạr ebenhẹ phọ o/ḍighinhom iyaạr ikpoki phọ ongọ bọ nyodị, kụ odẹ-otu phọ aphorogh nyodị.
8. Eeghe kụ iḍighi kụ oḅẹl ebenhẹ phọ oghol bọ siphẹ aḍidogh phọ amhoọgh bọ ibo?
8 Olhoghi oḅẹl ebenhẹ phọ aḅaạl li iduọn odẹ-otu phọ angọ bọ nyodị ikpoki phọ. Ipẹ phọ k/iịny ikpoki, kụ kẹn eḍeenhaan odọ idị odẹ-otu phọ aḍuom nyodị olhoghi! Kuolọ kokaạph ika ilọ omhunhenhiom iyạl ebenhẹ phọ? Odị mutue ni aḅonyonhu azuan loor iduọn u/ngọ aani bọ nyodị iboom ikpoki idiphọ oḅẹl phọ. Kuolọ odị aḍighi ika?
Yira otuughạ eeghe esi omhunhenhiom iyạl ebenhẹ phọ oghol bọ siphẹ aḍidogh phọ aZizọs? (1) Odẹ-otu phọ odị angọ nyodị inya oonịr anaira. (2) Odị akumuan ni iboom omhoọgh inhọn opumom ipẹ odẹ-otu phọ angọ bọ nyodị. (3) Odị amhoọgh ni inhọn ikpoki apumom ipẹ odẹ-otu phọ angọ bọ nyodị (Miịn siikpịgh phọ 9-11)
9. Eeghe iyaạr kụ edị aZizọs u/kaạph ilọ omhunhenhiom iyạl ebenhẹ phọ? (Matiu 25:22, 23)
9 Bạl Matiu 25:22, 23. AZizọs o/ghaạph mughumọ omhunhenhiom iyạl ebenhẹ phọ akururu ni obobọ aghạgh ni olhoghi loor iduọn ongọ bọ nyodị inya oonịr anaira bịn. Ḅilhẹ aZizọs o/ghaạph mọ odị agum ni esi oḅẹm mọ: ‘Iphẹn phọ bịn? Mị rakumuan aani ghan ni idiphọ ophoriphọ ebenhẹ phọ ongọ bọ ḍioph oonịr anaira phọ! Eḍighi maạr dị odẹ-otu phọ amhị imhị u/miịn idiphọ ebenhẹ dị rakumuan ni agey, pọ eeni mị kaguph aḍi aani ude inya oonịr anaira phọ odị ungọ bọ imhị, akị akumuan ghụn elọ imhị.’
10. Omhunhenhiom iyạl ebenhẹ phọ aḍighinhom eeghe ikpoki phọ ongọ bọ nyodị?
10 Idiphọ oḅẹl ebenhẹ phọ, omhunhenhiom iyạl ebenhẹ phọ amhiịn ni mọ oḍighi phọ odẹ-otu phọ angọ bọ nyodị amạn ni maạr, kụ alhọgh inyaạm omhiịn mọ odị akumuan ni angọ odẹ-otu phọ odị. Kụ iphẹn phọ ikọm idị odị amhoọgh inhọn inya oonịr apumom. Odẹ-otu phọ asẹph ni nyodị loor aḍighalhanyạ arukumuan phọ odị. Odẹ-otu phọ o/ḅaạl olhoghi bịn kuolọ amhiịn mọ odị akpeanhaạn ni oḅilhẹ oḅaạr ri ipẹ ongọ bọ nyodị, kụ abughẹ iiḍighi phọ odị!
11. Ika kụ idị yira kotue obughẹ ibo phọ ayira?
11 Iniin phọ kẹn ni, yira kotue ni obughẹ ibo phọ ayira esi olhọgh inyaạm oḍighi ghan atorobọ iyaạr dị ungọ iyira oḍighi siẹn arukumuan phọ aZihova. ‘Kuọm oomo amem’ anạ oḍighi iphelhegbeel phọ, kụ aphinhomaam aani ghan bin iiḍighi ookpomhoghan phọ. (Iiḍighi 18:5; Hib. 10:24, 25) Kookolhobian ghan agey kụ agbi oghị ituughạ pidị nạ arue ghan angọ ophagharanhaạn dị kalọgh bunhọn apophe. Maghamhị ghan maạr torobọ asaimẹnt dị ongọ nyinạ siphẹ ituughạ ogboku awiki phọ. Eḍighi maạr dị ongọ nyinhạ oḍighi oḍighi siphẹ ookpomhoghan phọ, miịn ni mọ nạ aḅon ghan ni akị aḍighi ḅilhẹ akpẹ obeḍenhọm. Ka/sighẹ iniin iiḍighi dị ongọ nyinhạ idiphọ iiḍighi dị i/kạr imoghi olhọgh amem r’inyaạm. Kparaghạ orophomhi asighalhanyạ phọ anạ. (Prov. 22:29) Mem dị nạ alhọgh inyaạm oḍighi ghan oḍighi r’asaimẹnt dị ongọ nyinhạ, kụ edị nạ kanuụn apoph akị ghisigh ḅilhẹ abughẹ ibo phọ anạ. (Gal. 6:4) Ḅilhẹ kẹn kedughanhaan nyinhạ obo r’abudị ongọ roopoogh arukumuan dị nạ rawạ aani ghan omhoọgh.—Rom. 12:15; Gal. 5:26.
12. Eeghe aradạ kụ edị iyạl Abugbaanhaạn ogbariọn orue obughẹ ibo phọ abidị?
12 Nạ aatughiạn ni umarani phọ Melissa, awạ ghan bọ oghị aBetẹl obobọ School for Kingdom Evangelizers? Ghalhamọ r’iduọn i/dugh bọ dị odị kakị, odị aḅẹm mọ: “Mị ukparaghạ ni oḍighi oomo ipẹ mị katue bọ siẹn oḍighi okọy eten phọ amhị ḅilhẹ r’omhiịn mọ mị asighẹ ghan ni imhoom areten aḍighinhom. Iphẹn phọ ikạr kụ ingọ imhị iboom ibo.” ANick akparạm ika mabi phọ odị alhoghoma bọ mem mọ u/mạ aani bọ nyodị idiphọ oniin odị raloghonhaạn aani ḍighaạgh ikumor awe phọ? Odị aḅẹm mọ, “mị ugbon roopoogh phọ mị amhoọgh bọ—idiphọ omite ghan epẹ erugh phọ ḅilhẹ r’ophagharanhaạn ghan asipuru dị emhoon mem dị oghị ituughạ. Mị uḅilhẹ kẹn asighẹ aani ḍinyạ oghị aBetẹl, kụ umhạgh ni imhị lhạ phọ etum bọ siphẹ.”
13. Eeghe kụ kemite eḍighi maạr dị nạ alhọgh inyaạm oḍighi phọ nạ raḍighi bọ nyiidiphọ? (Ecclesiastes 2:24)
13 Eḍighi maạr dị nạ alhọgh ghan inyaạm oḍighi oḍighi phọ nạ amhoọgh bọ nyiidiphọ, nạ katue ni amoọgh igbogh iiḍighi ghisigh ḍughụm? Ii nạ katue ni amoọgh, idiphọ aNick. Kuolọ eḍighi maạr dị i/ḍighi idiphọ, idiphọ aMelissa, ibo phọ anạ kekị ni ghisigh ebụgh, ḅilhẹ nạ kamoọgh ni oboom ogbaanyạn r’oḅaạl olhoghi esi ipẹ nạ maḍighi bọ. (Bạl Ecclesiastes 2:24.) Opumom isiphẹ, nạ kamoọgh ni iboom ibo olhegheri mọ ikuph phọ nạ alhọgh bọ eḅeraạn ni Odẹ-otu phọ ayira, Zizọs Kraist.
ASIIGBU DỊ KEBUGHẸ IBO AYIRA
14. Idị egbolhomaam siigbu phọ ayira, eeghe iyaạr kụ edị ewạ mọ ootughiạn ghan?
14 Ogbon oḍighi phọ yira omhoọgh bọ nyiidiphọ remạ ghan mọ yira ko/wạ mun reten obughẹ arukumuan phọ ayira ḍughụm? Eeye! Yira kotue ni oḅilhẹ opighi siigbu dị kilhoghonhaạn iyira ḍighaạgh oḍighi awe dị osilor ogbạ ikpo onhụ phọ r’itughemhị ḅilhẹ r’olhoghonhaạn ghan aḍighaạgh bumor r’abumarani phọ ayira. Yira kotue ni oteẹny siigbu phọ iphẹn phọ eḍighi maạr dị yira ogbon olhoghonhaạn ghan aḍighaạgh bunhọn kparipẹ r’asiloor ayira bịn.—Prov. 11:2; Iiḍighi 20:35.
15. Eeghe kụ iniin asiigbu dị kelhoghonhaạn nyinhạ ḍighaạgh obughẹ ibo phọ anạ?
15 Emoọgh ni siigbu dị nạ aphighi ḍughụm? Pọ lọm aZihova alhoghonhaạn nyinhạ ḍighaạgh okạr olhegheri asiigbu dị nạ katue ateẹny. (Prov. 16:3; Jems. 1:5) Nạ katue ni aporogh aani siigbu phọ ogoolhạ bọ siphẹ eḅẹl ekpịgh emhuoghaạph phọ—okọy eten opọ ekulha amem mọ obobọ opọ oomo amem mọ, oghị aani aBetẹl, obobọ ophinhom aani abin oḍighi odoghoḍi aani aruutu phọ ḍughụm? Obobọ eeni nạ atue ni atuughạ onhọn onhụ orue olheenye aani elheeny oghaạph iiḅi iinhaghạn phọ obobọ oghị enhọn ekpisi ogbạ ikpo onhụ phọ. Nạ katue ni atuughạ alegheri ilọ iniin asiigbu phọ iphẹn phọ siphẹ aḍinyạ phọ Organized to Do Jehovah’s Will emhuoghaạph phọ 10, ḅilhẹ akaaphạn ikumor awe ookpomhoghan phọ anạ. * Idiphọ nạ rakparaghạ bọ oteẹny asiigbu phọ ipẹ phọ, awe komiịn ni eghimọm aghisigh phọ anạ ḅilhẹ ibo phọ anạ kebụgh ghan bịn.
16. Nạ kaḍighi ika eḍighi maạr dị nạ ko/rue oteẹny r’aḍiniin aḍiigbu?
16 Kuolọ kokaạph ika eḍighi maạr dị nyiidiphọ nạ ko/rue oteẹny aani siigbu phọ ipẹ ogoolhạ bọ? Iyaạr dị ekạr emhạn maạr pọ, porogh ḍiigbu dị nạ katue ni ateẹny. Ooḅeghiọn iniin araraạr dị ketue elhoghonhaạn nyinhạ ḍighaạgh.
Eeghe aḍiigbu kụ edị eeni nạ katue ateẹny? (Miịn ekpịgh phọ 17) *
17. Odaphạn 1 Timoti 4:13, 15, ika kụ idị onyọ umor kaḍighi kụ amaạr itughemhị?
17 Bạl 1 Timoti 4:13, 15. Eḍighi maạr dị nạ aḍighi onyọ umor dị maḍiiny ni muụm, pọ nạ atue ni atophomhi eten oghaạph r’itughemhị phọ anạ. Eeghe kụ iḍighi? Loor esi dị nạ “akuọm loor phọ anạ” esi ibạl, amhaạr oghaạph, ḅilhẹ amhaạr itughemhị keḍighi ḍisẹph kụ engọ buphẹ ronaghạn bọ. Pighi ḍiigbu otuughạ ilọ osighẹ oḍighinhom atorobọ esi ituughạ aḍinyạ phọ Kuọm Loor Esi Ibạl r’Itughemhị. Tuughạ eniin mem mem, aḅilhẹ amhaạr amhiigha loor aḍighinhom siphẹ olhoghotu anạ r’amem dị nạ rangọ oghaạph. Teẹny otomoghiom mọ rangọ ghan bọ oromha we dị ongọ oghaạph obobọ oḍighi asaimẹnt ongọ anạ oromha. Obobọ teẹny ikumor awe ookpomhoghan phọ “okpạr bọ ḍighaạgh oghaạph ghan, r’otụghemị ghan.” * (1 Tim. 5:17) U/gbon ghan osighẹ oḍighinhom ariisi ituughạ aḍinyạ phọ Kuọm Loor Esi Ibạl r’Itughemhị bịn mem dị nạ rangọ oghaạph. Kuolọ gbon okparamhị omheeraam abuphẹ ronaghạn bọ r’oḍighi idị kenyu bidị osighẹ oḍighinhom ipẹ bidị rotuughạ bọ. Nạ aḍighi iduọn phọ, nạ kabughẹ ni ibo phọ anạ r’abidị.
Eeghe aḍiigbu kụ edị eeni nạ katue ateẹny? (Miịn ekpịgh phọ 18) *
18. Eeghe kụ ketue elhoghonhaạn nyinhạ ḍighaạgh oteẹny asiigbu oḍighinhom epẹ erugh phọ?
18 Oomo ayira omoọgh oḍighi ogbạ ikpo onhụ phọ r’oḍighi awe bumatuạn. (Mat. 28:19, 20; Rom. 10:14) Keḅeraạn ni nyinhạ orophomhi asighalhanyạ phọ anạ esi oḍighi phọ ophọn phọ amhạn bọ maạr ḍughụm? Pọ tuughạ ḍinyạ Ibạl r’Itughemhị phọ, kụ aghoọr ḍiigbu osighẹ oḍighinhom ipẹ nạ atuughạ bọ. Aḍinyạ Ituughạ—Adọl Aghuḍum Onyọ Akristẹn r’Oghaạph Ilọ Omhạr Phọ ḅilhẹ r’asividio areḍeenhaan ilọ oghaạph phọ ketue kẹn elhoghonhaạn nyinhạ ḍighaạgh. Kparaghạ oḍighinhom kirokirọ areten phọ omaaghị bọ orue olhegheri epẹ kekạr bọ enighẹ osighẹ oḍighinhom. Mem dị nạ asighẹ aḍighinhom oomo phọ iphẹn omaaghị bọ, nạ kakạr kụ amoọgh iboom ibo phọ reḍuạ ghan bo keru oḍighi onyọ aKristẹn dị amhaạr ogbạ r’otughemhị ikpo onhụ phọ.—2 Tim. 4:5.
Eeghe aḍiigbu kụ edị eeni nạ katue ateẹny? (Miịn ekpịgh phọ 19) *
19. Ika kụ idị nạ kamoọgh raagharạ onyọ aKristẹn?
19 Mem dị nạ raatughiạn ophighi asiigbu dị nạ kateẹny, u/gunhọm ghan ḍiigbu phọ aḍiẹn emhạn bọ maạr—ḍiigbu omhoọgh aani araagharạ onyọ aKristẹn. (Gal. 5:22, 23; Kọl. 3:12; 2 Pit. 1:5-8) Nạ kaḍighi ikạ kụ ateẹny ḍiigbu phọ aḍiphẹ phọ? Oḅẹm mọ nạ rawạ omhoọgh omheeraam dị akpạr. Nạ atue ni abalạgh rumhuoghaạph dị ediighi siphẹ arinyạ phọ ayira, dị emaaghị reten dị nạ katue akparamhị omheeraam mọ anạ. Nạ kakạr kụ amooghọm suọ kẹn esi ophogh ghan agạ edeọm aJW Broadcasting® phọ reḍeenhaan ghan bọ idị abumor r’abumarani moḍeenhaan ogey phọ omheeraam etigheri odẹgh ophogh kirokirọ. Kụ aaḅeghiọn reten dị nạ katue atuughaạny aani omheeraam mọ abidị.
20. Ika kụ idị yira kotue obughẹ ibo phọ ayira kụ okome olhoghoma ghan amabi?
20 Iikia i/lo, eḅeraạn ni oomo phọ ayira oḍighi idị epu iphẹn yira roḍighi bọ nyiidiphọ siẹn arukumuan phọ aZihova. Siphẹ omhoom aḅirinhi phọ, yira kotue ni okumu nyodị eten dị emhunhughan. Yira olhọgh inyaạm oḍighi oomo ipẹ yira kotue bọ esi atorobọ eepoogh arukumuan dị yira omhoọgh nyiidiphọ, pọ yira kobughẹ ni ibo phọ ayira bịn yira ko/kạr ghan ologhoma mabi. Edị ekạr emhạn maạr, yira kosighẹ eghuan r’iiseeny otuom aZihova ‘Enaạn oḅaạl olhoghi’ phọ ayira. (1 Tim. 1:11) Esi iduọn phọ, moọgh ibo esi aroopoogh arukumuan phọ nạ amhoọgh bọ!
AḌUỌR PHỌ 82 “Let Your Light Shine”
^ par. 5 Yira opomhoghiạn aZihova iboom, kụ yira rowạ ni oḍighi oomo ipẹ yira kotue bọ siẹn arukumuan phọ odị. Loor ephigh phọ ephẹn phọ, eeni rinyu ghan ni iyira obughẹ arukumuan epẹ erugh phọ ayira obobọ osianhaan inhọn aroopoogh siẹn ookpomhoghan phọ. Kuolọ kokaạph ika eḍighi maạr dị yira moḍighi ni oomo ipẹ yira kotue bọ oteẹny eepoogh arukumuan dị yira rowạ, kuolọ i/ḅọph? Ika kụ idị yira kokiọm ghisigh oḅilhẹ opamanhạm ibo phọ ayira? Yira komiịn ophanyanhaạn phọ siphẹ aḍidogh ikpoki phọ aZizọs adogh bọ.
^ par. 2 M’onme iniin asiḍien.
^ par. 15 Rolọm ni mọ abumor dị moḍiiny muụm okparaghạ ni osianhaan aḍiigbu oḍighi aani oniin odị raloghonhaạn ḍighaạgh ikumor awe phọ obobọ idiphọ okumor oye ookpomhoghan. Okaạph ni ilọ ipẹ nạ katue bọ asianhaan siphẹ aḍinyạ phọ Organized to Do Jehovah’s Will, rumhuoghaạph phọ 5 r’6.
^ par. 17 EKPO ONHỤ DỊ OGBẠ: Otomoghiom pọ okumor oye dị ongọ oḍighi ongọ ghan oroma ikumor awe r’abuphẹ rologhonhaạn bọ ḍighaạgh ikumor awe phọ mem dị ongọ oghaạph siphẹ ookpomhoghan phọ.
^ par. 63 ILỌ AFOTO: Orue oteẹny aḍiigbu oḍighi oye dị amhaạr itughemhị onyọ umor phọ rabalhạgh ghan rinyạ phọ ayira.
^ par. 65 ILỌ AFOTO: Onyọ umarani dị aghoọr ḍiigbu ongọ ghan ogbaanhaạn dị u/gu rangọ ghan kontạt kạd onyanhị dị rabool ghan eḍien.
^ par. 67 ILỌ AFOTO: Onyọ umarani dị amhoọgh ḍiigbu oḍeenhaan ghan araagharạ aKristẹn, ranmo inmo onhọn onyọ umarani.
