1. Кӧп ака-эјелер нени эдерге кӱӱнзейт?

 БУ ТЕЛЕКЕЙДИҤ учы там ла јууктап јат, оныҥ учун бистиҥ ижис кӧп (Матф. 24:14; Лука 10:2; 1 Петр 5:2). Кем де кӧп јарлаар деп сананат, а та кем де текши пионер болорго, Бет-Элде иштеерге ол эмезе бистиҥ организацияныҥ туралар тудар проектеринде туружар амаду тургузат. Је кӧп ака-карындаштар аксагалга ла болушчы ишчиге берилген некелтелерге келижерге албаданат (1 Тим. 3:1, 8). Иегова албатызыныҥ ого иштеерге белен болгонын кӧрӱп, тыҥ сӱӱнип јат (Сар. 110:3; Иса. 6:8).

2. Амадуларына јединбеген ака-эјелерде кандый сезимдер болот?

² Је ӧйлӧр ӧдӱп, тургускан кӧгӱс амадуларыстыҥ кезиги анайып ла бӱтпей калат. Кезик ака-эјелерге јажы јаанаганынаҥ эмезе ӧскӧ дӧ айалгалардаҥ улам, кӱӱнзеген молјулары берилбей јат. Оныҥ учун олор кунугып, тыҥ санааркап јадылар (Укаа 13:12). Темдектезе, Мелисса * эје Бет-Элде иштеер эди эмезе Каандыктыҥ јарчыларыныҥ сургалында ӱренер эди, је оныҥ јажы јаанап калган. Ол бойы мынайып айдат: «Мениҥ амадуларым качан да бӱтпес. Мынаҥ улам кезикте тыҥ санааркай бередим».

3. Молјулар аларга тургандарга нени эдер керек?

³ Јуунда молјулар аларга турган јиит ака-эјелерге кӧгӱзин тыҥыдып, кезик кылык-јаҥдарга ӱренер керек. Бир јанынаҥ јииттер тӱрген, тапкыр, су-кадык. Је бир јанынаҥ олорго чыдамкай, ойгор болорго ло улусты јакшы оҥдоорго ӱренер керек болуп јат. Олор бу кылык-јаҥдарга ӱренип турза, акалар олорды белен деп кӧрӱп,  молјулар берер аргалу. Ник ака 20 јаштуда болушчы ишчи болорго тыҥ кӱӱнзеген. Ол айдат: «Мени акалар нениҥ учун кӧстӧбӧй турганын оҥдобой туратам». Је Ник ака чӧкӧбӧгӧн. Ол јарлаар иште эрчимдӱ туружып, алган кандый ла јакылтаны јазап бӱдӱрерге албаданып туратан. Бӱгӱнги кӱнде ол филиалдыҥ комитединде иштеп јат.

4. Бу јӧрмӧлдӧ нени шӱӱжерис?

⁴ Слер кандый бир бӱтпей турган амадулараардаҥ улам санааркайдаар ба? Эйе болзо, бу керегинде Иеговага куучындагар (Сар. 37:5—7). Анайда ок слерге база не јанынаҥ иштеер керек деп, ченемелдӱ ака-эјелердеҥ јӧп сурагар. Олордыҥ берген јӧптӧрин тузаланзаар, слерге молјулар берилер болор эмезе тургускан амадулараарга јединер болороор. Ол эмезе бистиҥ амадуларыс Мелисса эјениҥ амадулары чылап, качан да бӱтпес болор. Мындый айалгада сӱӱнчилӱ болорго биске не болужар? Бу сурактыҥ каруузын аларга, мындый ӱч сурак шӱӱжип кӧрӧрис: 1) сӱӱнчи недеҥ камаанду, 2) сӱӱнчилӱ болорго нени эдер керек, 3) сӱӱнчилӱ болорго, кандый амадулар тургузар керек?

5. Сӱӱнчи недеҥ камаанду? (Экклезиаст 6:9).

⁵ Сӱӱнчи недеҥ камаанду деп, Экклезиаст 6:9 (кычырыгар) јакшы јартайт. Андагы сӧстӧрлӧ болзо, кӧскӧ кӧрӱнип турганына сӱӱнип турган кижи бар немезиле болорзынып јат. Је алар арга јок немени кӱӱнзеп турган кижи јединип болбос амадулар тургузат. Айдарда, биске сӱӱнчилӱ болорго, бар немегисле болорзынып јӱрер керек ле једингедий амадулар тургузар керек.

6. Бис кандый укаа сӧсти шӱӱжерис, оноҥ оныла колбой нени кӧрӧрис?

⁶ Кижи јаҥыс јерге турбай, јаҥы неме билип аларга албаданат. Је ол тушта, ол бар немезиле болорзынар ба? Ол јӱк ле болорзынар эмес, је сӱӱнер де аргалу. Ого сӱӱнчилӱ болорго не болужар? Иисустыҥ талант акча керегинде укаа сӧзин шӱӱжип ийектер (Матф. 25:14—30). Бу укаа сӧсти шӱӱжип, канайып сӱӱнчилӱ болорын ла оноҥ јаан сӱӱнчини аларга нени эдерин кӧрӧрис.

7. Иисустыҥ талант акча керегинде укаа сӧзин куучындап беригер.

⁷ Иисустыҥ укаа сӧзиндеги бий кижи ӧскӧ ороонго атанар алдында кулдарына талант * акча берип, оны кӧптӧтсин деп јакарган. Бу ла ок ӧйдӧ ол кулдарыныҥ аргазын кӧрӱп, кажызына ла кирезинче, бирӱзине беш талант, бирӱзине — эки, бирӱзине бир талант акча берген. Баштапкы эки кул албаданып иштенген. Је ӱчинчизи дезе берилген акчала нени де этпеген. Анайып ол бийин ачындырып, оныҥ јарадузын јылыйткан.

8. Баштапкы кул нениҥ учун сӱӱнген?

⁸ Баштапкы кул бийинеҥ сӱреен кӧп акча алганына тыҥ сӱӱнген болор. Нениҥ учун дезе, бу андый јаан акча болгон! Айдарда, бийи оны бӱдӱмјилӱ кижи деп кӧргӧн. Је экинчи кул бийинеҥ баштапкы кулга кӧрӧ, ас акча алган деп, ачынар аргалу болгон. Је ол ачынган ба?

9. Экинчи кул нени этпеген? (Матфей 25:22, 23).

⁹ Матфей 25:22, 23 кычырыгар. Бу укаа сӧстӧ экинчи кул ачынган деп айдылбай јат. Ол бийине мынайып айдар  аргалу болгон: «Бу ла ба?! Сен нениҥ учун баштапкы кулга акчаны кӧп бергеҥ? Мен не, оноҥ уйан ба? Мени уйан кӧрӱп турган болзоҥ, бергеҥ акчаҥды кӧмӱп салала, бойымныҥ керектеримди эдетем». Иисус оны мынайып комудаган кижи деп айтпаган.

10. Экинчи кул талант акчала нени эткен?

¹⁰ Экинчи кул, баштапкы ла кул чылап, бийиниҥ јакылтазын јакшы бӱдӱрерге албаданган. Анайып, ол берген акчаны эки катапка кӧптӧткӧн. Бийи оны тапкыры ла албаданып иштенгени учун, јӱк ле мактаган эмес, је ого оноҥ јаан молјулар берген.

11. Бис нени этсеес, јаан сӱӱнчи аларыс?

¹¹ Анайып ла бис Иегованыҥ берген јакылталарын бӱдӱрерге тыҥ албаданып турзаас, јаан сӱӱнчи аларыс. Оныҥ учун јарлаар иште ле јуунныҥ керектеринде эрчимдӱ туружыгар (Ап. ижи 18:5; Евр. 10:24, 25). Кажы ла туштажуга јакшы белетенигер. Ол тушта слердиҥ јартамалдараар ака-эјелердиҥ кӱӱнин кӧдӱрер. Иштеер кӱндерде ӧдӱп турган туштажуга слерге јакылта берилген болзо, оны јазап белетегер. Акалар слерди та нени де эдип ийзин деп сураган болзо, оны ӧйи-ӧйинде эдерге албаданыгар. Бу јакылталарды бӱдӱрерин ӧйди калас ӧткӱрери деп сананбагар. Карын слер мынайып керектӱ темигӱлерге ӱренип јадаар (Укаа 22:29). Јакылталарды канча ла кире јакшы бӱдӱрерге албаданзаар, Иеговала колбулараар ончо ло кире тыҥыыр ла оноҥ јаан сӱӱнчи алараар (Гал. 6:4). Анайда ок слердиҥ аларга турган молјулараар  ӧскӧ ака-эјелерге берилзе, слерге олор учун сӱӱнерге јеҥил болор (Рим. 12:15; Гал. 5:26).

12. Мелисса эје ле Ник ака сӱӱнчизин јылыйтпаска нени эткен?

¹² Мелиссаныҥ темин база катап кӧрӱп ийектер. Оныҥ Бет-Элде иштеер эмезе Каандыктыҥ јарчыларыныҥ сургалында ӱренер амадузы бӱтпес деп ол билген. Је андый да болзо, ол пионер болуп, јарлаар иштиҥ кандый ла бӱдӱминде туружып, јаан сӱӱнчи алат деп куучындайт. Ник аканы болушчы ишчи деп кӧстӧбӧстӧ, ого сӱӱнчини јылыйтпаска не болушкан? Ол куучындайт: «Мен нени эдер аргалу, оны эткем. Мен јарлаар иште кӧп турушкам. Туштажуларга јакшы белетенип, бойымныҥ карууларымла ака-эјелердиҥ кӱӱн-санаазын кӧдӱргем. Анайда ок Бет-Элде иштеерге анкета бичииримде, бир јылдаҥ мени ары кычырган».

13. Албаданып бойыстыҥ ижисти бӱдӱрзеес, бисте кандый сезимдер болор? (Экклезиаст 2:24).

¹³ Берилген јакылтаны албаданып бӱдӱрип турзаар, слерге оноҥ јаан молјулар берилер бе? Ник аканыҥ учуралын кӧрзӧ, берилердеҥ айабас. Берилбезе де, берген јакылтаны албаданып, акту кӱӱнеердеҥ бӱдӱрип турзаар, Мелисса эје чилеп, бойоордыҥ ижеердеҥ јаан сӱӱнчи алараар. (Экклезиаст 2:24 кычырыгар.) Анайда ок Иисус Христос Кайраканысты сӱӱндирип турганыстаҥ улам чыннаҥ ла ырысту болорыс.

14. Кӧгӱс амадулар тургузып тура, биске нени ундыбас керек?

¹⁴ Јуундагы бар молјуларысла болорзынып турганыс Иеговага кӧптӧдӧ иштеерге албаданбай турганысты кӧргӱспей јат. Биске кӧгӱс амадулар тургузар керек! Оноҥ башка, бис ака-эјелерге де болужып болбозыс, јарлаар иштиҥ темигӱлерин де тыҥыдып болбозыс. Је кӧгӱс амадуларга јединерге кӱӱнзеп турган болзоос, бойыстыҥ кемисти билип, ойгор болуп, улуска болужып турар керек (Укаа 11:2; Ап. ижи 20:35).

15. Кандый амадуларыгарга једингенеер слерге сӱӱнчи экелер?

¹⁵ Кандый амадулар тургузарга јараар? Слер кандый кӧгӱс амадуга јединип ийер аргалу деп оҥдоорго, Иегованаҥ болуш сурагар (Укаа 16:3; Иак. 1:5). Бу јӧрмӧлдиҥ  баштапкы абзацында айдылган амаду тургузарга јараар. Темдектезе, подсобный пионер, текши пионер, Бет-Элде иштеери эмезе теократиялык туралар тударында туружары. Анайда ок ӧскӧ тил ӱренип, ол тилге јарлаар эмезе ол тилле куучындап турган јерге кӧчӧр. Ӧскӧ амадуларды «Организованы, чтобы исполнять волю Иеговы» деген бичиктиҥ 10-чы бажалыгын кычырып эмезе јуунныҥ аксагалдарыла куучындажып, билип аларга јараар *. Кӧгӱс амадулараарга јединген сайын, јаан сӱӱнчи алараар ла једимигер улуска да кӧрӱне берер.

16. Кандый бир амадуга јединерге айалгагар келишпей турган болзо, нени эдер?

¹⁶ Ӧрӧги айдылган амадулардыҥ бирӱзине де јединерге айалгагар келишпей турган болзо, канайдар? Андый болзо, јединип ийгедий амадулар тургузыгар. Бир канча эп-аргалар кӧрӱп ийектер.

17. 1 Тимофейге 4:13, 15-ле болзо, акаларга јакшы ӱредӱчи болорго не болужар?

 ¹⁷ 1 Тимофейге 4:13, 15 кычырыгар. Сен сууга чӧҥӱрилип калган ака болзоҥ, куучындайтан, ӱредетен аргаларыҥды тыҥыдып, бого бастыра бойыҥды бер. Ол тушта нени кычырып, нени айдып, неге ӱредип турганыҥ угаачыларыҥныҥ јӱрегин томултар. Је угаачылардыҥ јӱрегин томултарга, «Кычыратан ла ӱредетен темигӱлериҥди тыҥыт» деген брошюраны шиҥдеп, оныҥ јӧптӧрин тузалан. Је оныҥ урокторыныҥ ончолорын бир уунда эмес, ээчий-деечий ӱренерге јараар. Оноҥ оныҥ јӧптӧрин куучын-эрмегиҥе тузаланып, јакшы белетен. Анайда ок «јарлыктап ла ӱредип» турганында тем болуп турган аксагалдардаҥ болуш сура, анчада ла јӧп берип турган аканаҥ * (1 Тим. 5:17). Је бу ок ӧйдӧ, јӱк ле бойыстыҥ ӱредетен темигӱлеристи тыҥыдарга албаданар керек эмес, угаачылардыҥ бӱдӱп турганын тыҥыдып, олорды билип алганын јӱрӱмде тузаланзын деп кӱӱнзет. Ол тушта сен де, угаачыларыҥ да, јаан сӱӱнчи алар.

18. Оноҥ јакшы јарлаарга ла ӱренчиктер белетеерге биске не болужар?

¹⁸ Бистиҥ кажыбыска ла јаан учурлу иш берилген — јарлаары ла ӱренчиктер белетеери (Матф. 28:19, 20; Рим. 10:14). Слер бу ишти оноҥ јакшы бӱдӱрерге кӱӱнзейдеер бе? «Эйе» болзо, слерге «Темигӱлериҥди тыҥыт» деп брошюра база болужар. Ол брошюраныҥ кандый бир урогыла иштеп тура, оныҥ јӧптӧрин тузаланарга амаду тургузыгар. Анайда  ок кӧп јӧптӧрди «Бистиҥ христиан јӱрӱмис ле ижибис» деген тетрадинаҥ ла иштеер кӱнде болуп турган туштажуларда куучын баштаарга берилген видеолордоҥ таап аларга јараар. Бу эп-аргаларды канча ла кире кӧптӧдӧ тузаланарга албаданзаар, бойоорго јарагадыйын таап аларыгар. Анайып, слер Кудайдыҥ Сӧзиниҥ јакшы ӱредӱчилери болуп, јаан сӱӱнчи алараар (2 Тим. 4:5).

19. Кудайга јарагадый кылык-јаҥдарга канайып ӱренер?

¹⁹ Анайда ок эҥ учурлу амадуларга Кудайга јарагадый кылык-јаҥдарга ӱренери кирет (Гал. 5:22, 23; Кол. 3:12; 2 Петр 1:5—8). Бу амадуга канайып јединер? Темдектезе, слер бӱдӱмјигерди тыҥыдарга кӱӱнзеп турган болороор. Андый болзо, бистиҥ бичиктерде берилген јӧптӧрди кычырыгар. Анайда ок JW Broadcasting^®-теҥ кандый ла ченелтелерде бек бӱдӱмјизин кӧргӱскен ака-эјелердиҥ темдерин кӧрӱгер. Олордыҥ теминеҥ слер неге ӱренер аргалу деп шӱӱп сананыгар. Олордыҥ теми слерге јаан туза экелер.

20. Јӱрӱмде кунукпай, сӱӱнип јӱрерге нени эдер керек?

²⁰ Бистиҥ кажыбыс ла Иеговага эмдигизине кӧрӧ кӧптӧдӧ иштеерге кӱӱнзеп јат. Бу мындый кӱӱнис Кудайдыҥ јаҥы телекейинде бӱткӱлинче бӱдӱп калар. Је ол ӧй келгенче Иеговага иштейтен ончо бар аргаларды баалап, тузаланып турактар. Ол тушта бис кунукпай, сӱӱнчилӱ јӱрерис. Је эҥ учурлузы — бис ырысту Кудайысты, Иегованы макка чыгарарыс (1 Тим. 1:11). Оныҥ учун Иеговага иштееринде бар аргаларга сӱӱнип јӱректер!