1. ¿Jehová Diosar jukʼamp serviñatakejj kunsa yaqhep jilat kullakanakajj amtawayapjje?

 NIYAKEJJAY akapachan tukusiñapajj wali jakʼankjjchejja, wali trabajonïtanwa (Mat. 24:14; Luc. 10:2; 1 Ped. 5:2). Jehová Diosarojj qhawqhatï chʼamasajj utjki ukampiw serviñ muntanjja. Walja jilat kullakanakaw Jupar jukʼamp serviñ amtawayapjje. Yaqhepajja, precursorata, Betelana jan ukajj Diosar serviñatak utanakajj luraski ukanakan yanaptʼañwa munapjje. Yaqhep jilatanakajja, siervo ministerialata jan ukajj ancianot serviñatakiw wal chʼamachasisipki (1 Tim. 3:1, 8). Jehová Diosajj ukham serviñ munapjjatapat wal kusispacha (Sal. 110:3; Is. 6:8).

2. ¿Mä kun lurañ munktan uk jan jikjjatañ puedisajj kunjamas jikjjatassna?

² Jehová Diosar serviñan kun lurañtï munkayätan uk jichhakam jan phoqkstan ukhajja, llakitaw jikjjatassna. Jan ukajj edadanëjjatasata, yaqha ukhamanakan uñjasitasatwa Diosan markapan mä kun jan lurirjamäsajj llakisiraksna (Prov. 13:12). Ukaw Melissa * kullakarojj pasi, jupajja Betelaru jan ukajj Diosan Reinopat Yatiyirinakataki Escuelar sarañwa muni. Kullakajj akham siwa: “Qhawqha marankamatï uka escuelar sarapjjañapäki uk nayajj pasjjtwa. Ukar sarañ munañajj nayatakejj inamayakiwa. Awisajj wali llakitaw jikjjatasta” sasa.

3. Privilegionak katoqañatakejja, ¿kunanaksa yaqhepanakajj lurapjjañapa?

³ Yaqhep wayn tawaqonakajja janiw usutäpkiti, ukampis privilegionak katoqañatakejja nayraqatajj kunjam jaqëñatï munaski  ukwa yateqapjjañapa. Sañäni, yaqhepanakajj yatiñani, ratuk kuns amtiri, wali kusisita ukhamäpjjewa. Ukampis inas jukʼamp paciencianïña, wali amuyump trabajtʼaña, mayninakarus respetomp uñjañ yateqapjjañapajj wakischi. Ukarjam lurañatak chʼamachasipjjani ukhajja, inas jan suykasa mä privilegio katoqapjjchini. Nick sat jilatat parltʼañäni. 20 maranëjjäna ukhajja, siervo ministerialat jan uttʼayapjjatap laykojj llakitaw jikjjatasïna. Jupajj akham siwa: “Mä kunwa jan wal luraskpachätjja, sasaw amuyayäta” sasa. Ukampis janiw aynachtʼkänti. Kuntï congregacionansa predicacionansa lurirjamäkäna uk lurañatakiw chʼamachasïna. Jichhajja Comité de Sucursal ukankirinakat maynïriwa.

4. ¿Kunsa aka yatichäwin yatjjataskañäni?

⁴ ¿Kun lurañtï amtkayätan uk jan phoqañ puedisati llakistanjja? Ukhamächi ukhajja, kunjamas jikjjatastan uk Jehová Diosar yatiyapjjañäni (Sal. 37:5-7). Kunansa jukʼamp chʼamachasiñasajj wakisi ukwa experienciani jilat kullakanakar jisktʼañasa, ukat uka ewjjtʼanakarjam lurañatakiw chʼamachasiñasaraki. Ukham lurañäni ukhajja, kun lurañtï amtkayätan ukajj phoqasispawa. Ukampis Melissa kullakjam jan phoqañ puedkstan ukhajja, ¿kunjamatsa kusisitakïsksna? Uka jisktʼar qhanañchañatakejja, aka yatichäwinwa kimsa toqet yatjjataskañäni. Maya, ¿kunas kusisiñ churistaspa? Paya, ¿kunsa jukʼamp kusisitäñatak lursna? Kimsa, ¿jukʼamp kusisitäñatakejj kunanak lurañsa amtsna?

5. ¿Kusisitäñ munstan ukhajj kuna toqetsa lupʼiñasa? (Eclesiastés 6:9).

⁵ Kusisitäñ munstan ukhajja, kuntï Eclesiastés 6:9 (liytʼañataki) textojj siski ukarjamaw lurañasa. ‘Kunanaktï nayranakapajj uñjki’ ukanakat kusisiri jaqejja, kunatï jupan utjki ukampejj kusisitakiwa, sañäni, kunjamantï jakaski ukampejj kusisitakiwa. Ukampis ‘kunanaktï munki ukan qhepap uksa aksa sarnaqeri’ jaqejja, kuntï jan jikjjatañ puedki uk munaskakiwa. ¿Kunsa ukat yateqtan? Kusisitäñatakejja, kunatï utjkistu ukatakwa lupʼiñasa, kuntï jan jikjjatirjamäktan ukat janiw lupʼiñasäkiti.

6. ¿Kuna uñachtʼäwitsa yatjjatañäni, ukat kunsa yateqañäni?

⁶ Kunanaktï jan lurañ yatktan uk yateqañajj taqeniruw gustistu. Ukhamajj ¿kunanakatï utj-jjestu ukamp kusisitäñ puedsnati? Jïsa. Kunanakatï jichhajj utjkistu ukanakamp kusisitakïsnawa. ¿Kunjamsa kusisitäsna? Uk yatiñatakejja, Jesusajj talento qollqenakat mä uñachtʼäwin parlkäna uk yatjjatañäni, ukajj Mateo 25:14-30 textonkiwa. Kunsa kusisitäñatakejj lursna, kunjamantï jichhajj jakasktan ukan jukʼamp kusisitäñatakejj kunanaksa luraraksna ukanakwa yateqañäni.

7. Jesusajj talento qollqenakat mä uñachtʼäwin parlkäna uk cuenttʼam.

⁷ Uka uñachtʼäwinjja, Jesusajj jaya markar viajir jaqetwa parläna. Janïr sarkasajja, esclavonakapar jawsayasajj sapa mayniruw negocionak lurapjjañapatak talento qollqenak churäna. * Maynirojj phesqa talento qollqe churäna, maynirusti paya, maynirusti mayaraki, qhawqtï sapa maynejj lurkaspa ukarjamaw churäna. Nayrïr pä esclavonakajja, uywiripatak jukʼamp qollqe ganañatakejj wal trabajipjjäna. Ukampis mä talento katoqeri esclavojj janiw kunsa uka qollqempejj lurkänti, ukatwa uywiripajj alisnukjjäna.

8. ¿Kunatsa nayrïr esclavojj wal kusispachäna?

 ⁸ Nayrïr esclavojja, uywiripajj jupar phesqa talento qollqe churatapat wal kusispachäna. Ukajj walja qollqënwa, qhawqsa uywiripajj jupar confiyäna ukwa ukajj uñachtʼayäna. ¿Pä talento katoqkäna uka esclavot kamsnasa? Nayrïr esclavjam jan walja talento qollqe katoqasajj aynachtʼaspänwa. Ukampis ¿kunsa luräna?

9. ¿Kunanaksa Jesusajj payïr esclavot jan siskäna? (Mateo 25:22, 23).

⁹ (Mateo 25:22, 23 liytʼañataki). Payïr esclavojj pä talento qollqek katoqasajj colerasïnwa, chuyma ustʼatänwa sasajj janiw Jesusajj siskänti. “¿Kunatsa uywirijajj jukʼak churitu? Nayajj phesqa talento katoqerjamarakiw wal trabajtjja. Uywirijatï suma trabajirit jan uñjkchitojja, uka pä talento qollqep oraqer allintasajj nayatakiw trabajisiskäjja” sasaw esclavojj quejasïna sasas janiw Jesusajj siskänti.

10. ¿Kunsa payïr esclavojj pä talento qollqemp luräna?

¹⁰ Kunjamtï nayrïr esclavojj lurkänjja, pä talento katoqer esclavojj ukhamarakiw uywiripat katoqkäna uka luräwi wali importantet uñjäna, ukatwa uywiripatak wal trabajïna. Ukham lurasajj pä talento qollqempwa ganäna. Uk uñjasajja, uywiripajj wal kusisïna, jukʼamp luräwinakwa churarakïna.

11. ¿Kunsa jukʼamp kusisitäñatakejj lursna?

¹¹ Jehová Diosar serviñan kuna luräwsa katoqkchiñänejja, uk phoqañatak taqe chuyma chʼamachasiñäni ukhajj ukhamarakiw kusisiñäni. Diosan arunakap ‘jan tiemponi’  yatiyapjjañäni, congregacionan kuna luräwinakatï utjki ukans taqe chuyma trabajipjjañäni (Hech. 18:5; Heb. 10:24, 25). Tantachäwinakan arstʼatanakasampi mayninakar chʼamañchtʼañatakejj sum wakichtʼasipjjañäni. Semanan apaski uka tantachäwin kuna asignacionjjay churapjjchistu uk wali importantet uñjapjjañäni. Congregacionan mä kun lurañatak yanaptʼa mayipjjestani ukhajj horasapar puripjjañäni, confiykayäpjjarakiñäni. Yaqhep luräwinakajj janis importantëkaspa, janis ukatak tiempo apsusiñasäkaspa ukham jan amuyapjjañäniti. Trabajos jukʼamp sum lurañatak chʼamachasipjjañäni (Prov. 22:29). Jehová Diosatak jukʼamp trabajiñäni ukhajja, jukʼamp ratukiw nayrar sartañäni, jukʼamp kusisitarakiñäniwa (Gál. 6:4). Kuna luräwtï jiwasajj katoqañ munkayätan uk mayninakajj katoqapjjani ukhas wal kusisirakiñäni (Rom. 12:15; Gál. 5:26).

12. ¿Melissa kullakasa ukat Nick jilatas kunsa jukʼamp kusisitäñatakejj lurapjjäna?

¹² ¿Melissa kullakat amtastanti? Jupajj Betelaru jan ukajj Diosan Reinopat Yatiyirinakataki Escuelar sarañwa munäna. Uka amtanak janis phoqañ puedkchïnjja, jupajj akham siwa: “Precursorjamajj qhawqtï puedkta ukarjam lurañatakiw wal chʼamachasta, kunayman kasta predicañajj utjki ukan predicañatakiw chʼamachasirakta. Ukaw kusisiñ churitu” sasa. Parlaniwayktan uka Nick jilatarojj siervo ministerialat jan uttʼayapkäna ukhajj llakitaw jikjjatasïna, ¿kunsa ukham jan jikjjatasjjañatakejj luräna? Jupajj akham siwa: “Kuntï lurañ puedkayäta uk lurañatakiw chʼamachasiyäta. Sañäni, predicañataki, tantachäwinakan chʼamañchtʼkir arstʼañataki. Betelar sarañatakis mä solicitud phoqantarakiyätwa, mä mara qhepat ukar invitapjjetänwa” sasa.

13. ¿Jichhajj kuna asignacionanïktantï uk sum phoqañatak wal chʼamachasiñäni ukhajj kunas pasani? (Eclesiastés 2:24).

¹³ Jichhajj kuna asignacionanïktantï uk sum phoqañatak wal chʼamachasisajj ¿jukʼamp privilegionakti qhepat katoqañäni? Inas Nick jilatjam jukʼamp katoqchiñäni. Ukampis jan katoqkañäni ukhajja, Melissa kullakjamaw qhawqtï Jehová Diosatak lurañ puedktan uk lurasajj jukʼamp kusisitäñäni (Eclesiastés 2:24 liytʼañataki). Janiw ukakïkiti, chʼamachasitasajj Jesusar kusisiyatap yatisajj wal kusisirakiñäni.

14. Jehová Diosar serviñan wal chʼamachasiskstan ukhajja, ¿janit jukʼamp lurañ amtañasäjje?

¹⁴ Jehová Diosar serviñan wal chʼamachasiskstan ukhajja, ¿janiw jukʼamp chʼamachasiñasajj wakisjjeti sañti munasktanjja? Janiwa. Sum predicañataki, sum yatichañataki, jilat kullakanakar yanaptʼañatakejj kunas yanaptʼistaspa ukanak lurañwa amtañasa. Jiwasatï amuytʼasirïñäni, humilde chuymanïñäni, jiwasatak llakisiñat sipansa mayninakar yanaptʼañat llakisiñäni ukhajja, uka amtanakas jikjjatañäniwa (Prov. 11:2; Hech. 20:35).

15. ¿Kunanak lurañ amtañas jukʼamp kusisiyistani?

¹⁵ ¿Kunanak lurañsa amtsna? Kuna amtanaktï jikjjatañ puedksna uk yatiñataki Jehová Diosar yanaptʼa mayisiñäni (Prov. 16:3; Sant. 1:5).  Nayrïr parrafon precursor auxiliarata, precursor regularata, Betelana jan ukajj construccionan serviñatwa parlaniwaytanjja, ¿janit ukanakat mä qhawqha lurañ amtksna? ¿Janit jukʼamp jaqenakar predicañatak yaqha aru yateqksna, jan ukajj kawkjantï yanapajj munaski ukar yanaptʼir sarksna? Kunjamsa uka amtanak phoqsna uka toqet jukʼamp yatiñ munstan ukhajja, Organizados para hacer la  voluntad de Jehová sat libron 10 capitulopwa liytʼsna, congregacionasankir ancianonakampiw parltʼaraksna. * Uka amtanak phoqañatak chʼamachasisajj jukʼamp kusisitäñäniwa, mayninakas nayrar sartaskatas amuyapjjaniwa.

16. ¿Jichhatï mä amta jan phoqañ puedkstan ukhajj kunsa lursna?

¹⁶ Parlaniwayktan uka amtanakat jichhajj may jan phoqañ puedkstan ukhajja, ¿kunsa lursna? Kuntï phoqañ puedksna uk lurañwa amtañasa. Ukanakat mä qhawqha yatjjatañäni.

17. 1 Timoteo 4:13, 15 textorjamajja, ¿kunanaksa mä jilatajj suma yatichirïñatakejj luraspa?

¹⁷ (1 Timoteo 4:13, 15 liytʼañataki). Jumatï bautisat jilatästajja, sum arstʼañataki, sum yatichañatakiw chʼamachasiñama. ¿Kunatsa? Jumatï suma liytʼirïñataki, arstʼirïñataki, yatichirïñatak chʼamachasïta ukhajja, khitinakatï istʼapjjätam ukanakar wal yanaptʼäta. Sum liytʼañataki yatichañataki chʼamachasiñäni sat folleton suma arstʼirïñ toqeta, suma predikirïñ toqet parlki ukanak mayat may yatjjatañataki, ukarjam lurañatak chʼamachasim. Ukankir leccionanak mayat may yatjjatam, utaman wal practictʼam, ukat kuntï yateqawaykta ukarjam arstʼañatak chʼamachasim. “Parlañansa yatichañansa wal chʼamachasisipki” uka ancianonakaru, ewjjtʼir jilatar (consejero auxiliar) * ewjjtʼanak mayim (1 Tim. 5:17). Janiw folleton yateqawaykta uka leccionarjam lurañatakik chʼamachasiñamäkiti, jan ukasti, kunjamsa tantachasirinakan Diosar jukʼamp confiyapjjañapataki,  kuntï yateqapki ukarjam lurapjjañapatak yanaptʼasma ukatakis chʼamachasiñamarakiwa. Ukham luräta ukhajja, jukʼamp kusisitäyätawa, tantachasirinakas kusisitäpjjarakiniwa.

18. ¿Kunanakas suma predikirïñatak yanaptʼistaspa?

¹⁸ Taqe cristianonakaw predicañasa, jaqenakar Jesusan discipulopar tukupjjañapatak yanaptʼañasaraki (Mat. 28:19, 20; Rom. 10:14). ¿Ukanak jukʼamp sum lurañ munsnati? Ukatakejj Sum yatichañataki sat folletotwa yatjjatsna, ukatsti kuna amtanakas kuntï yateqktan ukarjam lurañatak yanaptʼistaspa ukanak lurañwa amtsna. Cristianjam Jakañataki ukat Yatiyañataki: Tantachäwin yatjjatañataki sat qellqatana, semanan apaski uka tantachäwin yateqasiñatak videonakajj uñtayaski ukanwa suma yanaptʼanak jikjjataraksna. Ukanakat mä qhawqhanakwa yantʼsna, ukhamatwa kawkïris territoriosan jukʼamp yanaptʼistaspa uk yatiñäni. Uka ewjjtʼanakarjam lurañäni ukhajja, suma predikirïñäniwa, ukaw jukʼamp kusisiñ churistani (2 Tim. 4:5).

19. ¿Diosajj kunjam jaqëñastï munki ukham jaqëñasatakejj kunas yanaptʼistani?

¹⁹ Kunanak lurañti munktan ukanak amtkasajja, Jehová Diosajj kunjam jaqëñastï munki ukham jaqëñatak chʼamachasiñwa amtaraksna, uka amtajj wali wakiskiriwa (Gál. 5:22, 23; Col. 3:12; 2 Ped. 1:5-8). ¿Uk phoqañatakejj kunsa lursna? Jiwasatï Diosar jukʼamp confiyañ munstan ukhajja, uka toqet parlir yatichäwinakwa Bibliat apstʼat qellqatanakasan liytʼsna. Janiw ukakïkiti, kunjamsa jilat kullakanakajj jan walinakan uñjasisajj Jehová Diosar wal confiyapjjäna ukwa JW Broadcasting^® programat tʼaqaqat videonakan uñtsna. Ukatjja, kunjamsa jupanakat yateqassna ukwa amuytʼaraksna.

20. Jukʼamp kusisitäñataki, jan añch llakisiñatakejj ¿kunsa lursna?

²⁰ Cheqas taqeniw qhawqtï Jehová Diosatak lurktan ukat jukʼamp lurañ muntanjja. Diosajj arsuwayki uka Paraisonwa Jupar phoqatpach serviñäni. Uka uru puriniñapkamajja, kunanaktï jichhajj lurañ puedktan ukanak lurañatak wal chʼamachasiñäni ukhajj jukʼamp kusisitäñäniwa, janiw añch llakiskañäniti. Jukʼampisa, ‘kusisiri Jehová Diosasaruw’ jachʼañchañäni (1 Tim. 1:11). Ukhamajja, qhawqtï Diosatak lurañ puedktan uk lurasajj kusisitäpjjañäni.