ICIPANDE CA KUSAMBILILAMO 33
Mulesekelela pa Milimo Mubomba
“Cisuma ukulasekela mu fyo tulemona na menso yesu ukucila ukulakonkelela fye ifyo umweo ulefwaya.”—LUK. MIL. 6:9.
ULWIMBO 111 Ifilenga Tulesekelela
IFYO TWALASAMBILILA *
1. Milimo nshi abengi bafwaya ukubomba mu cilonganino ca kwa Yehova?
APO CINO calo cili ku mpela, natukwata imilimo iingi iya kubomba. (Mat. 24:14; Luka 10:2; 1 Pet. 5:2) Bonse tulafwaya ukubombela Yehova ukufika apo twingapesha. Aba bwananyina abengi balebombesha mu mulimo wa kwa Yehova. Bamo balafwaya ukubombako bupainiya, bambi balafwaya ukubombelako pa Bethel nelyo mu makuule. Kabili bamunyinefwe balesha apo bengapesha ukufikapo pa fifwaikwa ukuba umubomfi atumikila nelyo eluda. (1 Tim. 3:1, 8) Yehova alatemwa nga nshi nga amona ifyo abantu bakwe baitemenwa ukumubombela.—Amalu. 110:3; Esa. 6:8.
2. Kuti twaumfwa shani nga twafilwa ukubombako imilimo imo iyo twapangile ukubomba mu cilonganino ca kwa Yehova?
2 Kuti twafuupuka nga papita inshita iikalamba ukwabula ukufishapo fimo ifyo twapangile ukubomba mu mulimo wa kwa Yehova. Na kabili kuti twafuupuka nga ca kuti twafilwa ukubombako imilimo imo pa mulandu wa mushinku nelyo ifintu fimbi. (Amapi. 13:12) Ifi fine e fyo caba na kuli ba Melissa, * balafwaya ukubombelako pa Bethel nelyo ukuyako kwi Sukulu lya Bakabila ba Bufumu. Ba Melissa batile: “Nalicila imyaka ya kuyila mu kubombela pa Bethel nelyo ukuya kwi Sukulu lya Bakabila ba Bufumu, kanshi inshita shimo ndomfwa ububi.”
3. Finshi bamo nalimo balingile ukucita pa kuti bafikepo ukubombako imilimo imo mu cilonganino?
3 Aba bwananyina bamo bacaice kabili baliba no bumi ubusuma. Nomba pa kuti bafikepo ukubomba imilimo na imbi mu cilonganino, nalimo kuti bakabila ukukwata imibele imo. Ku ca kumwenako, abacaice bamo nalimo balicenjela, baleshiba bwangu ifya kubombela pa fintu kabili balaitemenwa ukubomba imilimo. Lelo nalimo kuti bakabila ukusambilila ukuba abatekanya, ukubomba bwino imilimo babapeela, e lyo no kulacindika abantu bambi. Nga mwabika amano ku kucita ifingalenga mwaba ne mibele imo iyo mushakwata, kuti bamupeela imilimo na imbi mu cilonganino pa nshita mushile-enekela. Katulande pa fyacitikile ba Nick. Ilyo bali ne myaka 20, balifuupwike sana ilyo bashabasontele ukuba ababomfi batumikila. Batile: “Nalemona kwati nalikwete ubwafya ubwalengele bensonta.” Lelo ba Nick tabalekele ukwesha na maka ukukwata imibele iyo bashakwete. Balebomba bwino imilimo babapeele mu cilonganino kabili balebila sana imbila nsuma. Pali ino nshita ba Nick baba mu Komiti ya Musambo.
4. Finshi twalalanshanya muli cino cipande?
4 Bushe mwalifuupuka pa mulandu wa kuti mwalifilwa ukufishapo ifyo mwapanga ukucita mu mulimo wa kwa Lesa? Nga mwalifuupuka mulepepa kuli Yehova no kumweba ifyo muleumfwa. (Amalu. 37:5-7) Muleipushako abakalamba mu fya kwa Lesa pa kuti balemupandako amano pa fyo mwingacita pa kuti mulebombesha mu mulimo wa kwa Lesa. Na kabili mulecita ifyo bamupandako amano. Nga mulecita ifi nalimo mukafikapo ukubomba imilimo mufwaya ukubombako mu cilonganino. Nga fintu caba kuli ba Melissa abo tulandilepo kale, nalimo te kuti tubombe umulimo tufwaisha ukubomba mu cilonganino ca kwa Yehova. Ifi nga e fyo caba, kuti mwacita shani pa kuti mutwalilile ukusekelela? Pa kuti twasuke ici cipusho, muli cino cipande twalalanshanya (1) ifingalenga mwalasekelela (2) ifyo mwingacita pa kuti muletwalilila ukusekelela, na (3) ifyo mwingapanga ukucita pa kuti muletwalilila ukusekelela.
IFINGALENGA MWALASEKELELA
5. Ukulingana na Lukala Milandu 6:9, finshi tulingile ukubikako amano pa kuti tulesekelela?
5 Lukala Milandu 6:9 ilalondolola ifingalenga twalasekelela. (Belengeni.) Umuntu uusekelela ku ‘fyo amona na menso’ alatasha pa fyo akwete. Lelo umuntu uukonkelela fye ifyo umweo wakwe ulefwaya, te kuti abe ne nsansa. Finshi tulesambililako? Nga tulefwaya ukulasekelela, tufwile ukubika amano ku fyo tukwete, te kubika amano ku fyo tushingakwata.
6. Cilangililo nshi twalalandapo nomba, kabili finshi twalabikako sana amano ilyo tulesambilila?
6 Bushe ca cine kuti twasekelela na pa fintu ifyo twakwata kale? Abantu abengi batontonkanya ukuti te kuti tusekelele pa fintu ifyo twakwata kale, pantu mu kupita kwa nshita tulafwaya ukucitako ifintu ifyo tushacitapo. Lelo kuti twasekelela na pa fintu ifyo tukwete. Kuti twasekelela shani? Pa kuti twishibe ifyo twingacita, twalalanda pa cilangililo Yesu alandile ica matalanti icaba pali Mateo 25:14-30. Twalalanda pa fyo twingacita pa kuti tulesekelela, na pa fyo twingatwalilila ukulasekelela mu mulimo tulebomba pali ino nshita.
IFYO MWINGACITA PA KUTI MUTWALILILE UKULASEKELELA
7. Londololeni icilangililo Yesu alandile ica matalanti.
7 Mu cilangililo Yesu alandile, umwaume ali no kuya ku calo ca kutali. Ilyo ashilaya aitile abasha bakwe no kubapeela amatalanti ayo bali no kubomfya pa kucita amakwebo. * Apo uyu mwaume alishibe ifyo abasha bakwe bali no kukumanisha ukubomba, apeele umusha wa kubalilapo amatalanti 5, uwa bubili amupeele amatalanti yabili, no wakulekeleshako amupeele italanti limo. Abasha ba kubalilapo babili, balibombeshe ukupangila shikulu wabo indalama, lelo umusha wa kulekelesha ena tacitile amakwebo mu ndalama shikulu wakwe amushilile. E ico shikulu wakwe ali mutamfishe.
8. Cinshi cali no kulenga umusha wa kubalilapo muli ici cilangililo alesekelela sana?
8 Umusha wa kubalilapo alitemenwe sana pa kumupeela amatalanti 5. Amatalanti 5 shali ni ndalama ishingi nga nshi. Filya uyu umwaume apeele umusha wakwe ishi ndalama calelangilila ukuti alimucetekele sana. Inga umusha uo bapeele amatalanti yabili aumfwile shani? Nga alifuupwilwe pantu tabamupeele amatalanti ayengi nga filya bapeele umusha wa kubalilapo. Nomba bushe acitile shani?
Finshi twingasambililako ku musha walenga bubili uo Yesu alandilepo mu cilangililo? (1) Shikulu wakwe amupeela amatalanti yabili (2) Alibombeshe pa kuti alundulule indalama sha kwa shikulu wakwe. (3) Pa matalanti yabili ayo shikulu wakwe amupeele alipangilepo na yambi yabili (Moneni paragrafu 9 ukufika ku 11)
9. Ukulingana na Mateo 25:22, 23, finshi umusha walenga bubili ashacitile?
9 Belengeni Mateo 25:22, 23. Yesu talandile ukuti umusha walenga bubili alikalipe pa kumupeela amatalanti yabili. Na kabili Yesu talandile ukuti uyu musha aleilishanya no kuti: ‘E ndalama bengapeela ishi? Bushe ine te kuti mombe nga filya fine fye ulya uo bapeele amatalanti 5 engabomba? Nga ca kuti shikulu amona ukuti nshili mubomfi umusuma, nalayashika fye aya matalanti ndeya na mu kubomba imilimo yandi.’
10. Finshi umusha walenga bubili acitile ilyo bamupeele matalanti?
10 Nga fintu umusha wa kubalilapo acitile, umusha walenga bubili na o alibombeshe ukucita amakwebo mu ndalama shikulu wakwe amushilile. Ici calengele alundulule amatalanti yabili ayo bamushilile, no kupangilapo na yambi yabili. Uyu musha balimulambwile kuli shikulu wakwe pa fyo abombeshe. Shikulu wakwe alimutashishe kabili alimupeelelepo ne milimo na imbi.
11. Kuti twacita shani pa kuti tulesekelela nga nshi?
11 Na ifwe bene kuti tulesekelela nga ca kuti tulebomba apapela amaka yesu umulimo onse uo batupeela mu cilonganino ca kwa Yehova. ‘Mulebika amano yonse’ ku mulimo wa kubila imbila nsuma, kabili mulebombesha mu cilonganino. (Imil. 18:5; Heb. 10:24, 25) Mulepekanya sana pa kuti ilyo muli pa kulongana muleasukapo ifingakoselesha bambi. Mulebikako amano ilyo bamupeela ilyashi ilili lyonse ilya basambi mu kulongana kwa Mikalile. Nga bamupeela umulimo wa kubomba mu cilonganino, muleubomba pa nshita mulingile uku-ubombelapo, kabili mulecita ifingalenga bamucetekela. Mwilamona imilimo imo ukuti tayacindama. Na kabili mulebombesha pa kuti muleishibilako ukubomba imilimo bamupeela. (Amapi. 22:29) Nga mulebika sana amano ku mulimo bamupeela mu cilonganino, mukalalunduluka bwangu kabili mukalasekelela nga nshi. (Gal. 6:4) Na kabili mukalasekelela ilyo bambi babapeela imilimo iyo mwalefwaisha ukubomba.—Rom. 12:15; Gal. 5:26.
12. Finshi ba Nte babili bacitile pa kuti batwalilile ukulasekelela?
12 Ibukisheni ba Melissa abo tulandilepo mu paragrafu 2, abalefwaisha ukuya ku Bethel nelyo ukuya kwi Sukulu lya Bakabila ba Bufumu. Nangu ca kuti balicila umushinku wa kuyilapo ku Bethel na kwi sukulu, batile: “Ndesha na maka ukubomba bwino bupainiya, kabili ndabomfyako ne nshila ishalekanalekana isha kubililamo imbila nsuma. Ici calilenga ndesekelela nga nshi.” Finshi ba Nick bena bacitile pa kuti baleke ukufuupuka ilyo bashabasontele ukuba ababomfi batumikila? Batile: “Nabikile fye amano ku milimo nakwete, pamo nga ukubila imbila nsuma no kwasukapo pa kulongana. Na kabili nalisaine formu ya kuya mu kubombela pa Bethel kabili balinjitile umwaka wakonkelepo.”
13. Finshi fikacitika nga ca kuti mwabika fye amano ku milimo mulebomba? (Lukala Milandu 2:24)
13 Nga ca kuti mulebombesha sana mu milimo bamupeela pali ino nshita, bushe cilepilibula ukuti bakamupeelelapo imilimo na imbi ku ntanshi? Nalimo kuti bamupeela nga fintu cali kuli ba Nick. Nangu ca kuti tabamupeele nga filya cali kuli ba Melissa, kuti mwatwalilila ukusekelela. Kabili mukalaba ne nsansa pa milimo mulebombela Yehova. (Belengeni Lukala Milandu 2:24.) Ukwabula no kutwishika, mukalasekelela ukwishiba ukuti Shikulwifwe Yesu Kristu alatasha pa fyo mubombesha.
IFYO TWINGAPANGA UKUCITA IFINGALENGA TWALASEKELELA
14. Finshi tulingile ukulaibukisha ilyo tuletontonkanya pa milimo twingapanga ukubombako mu cilonganino ca kwa Lesa?
14 Nga ca kuti twalibika amano ku mulimo tubomba pali ino nshita, bushe cilepilibula ukuti takuli na fimbi ifyo twingacita pa kuti tutwalilile ukulabombesha mu mulimo wa kwa Lesa? Awe! Tulingile ukupanga ifya kucita ifingalenga twalabila bwino imbila nsuma, twalasambilisha bwino, kabili twala-afwako na ba bwananyina mu cilonganino. Tukalasekelela nga twabika sana amano ku kwafwa bambi ukucila ukubika fye amano ku fyo tulefwaya fwe bene.—Amapi. 11:2; Imil. 20:35.
15. Finshi fimo ifyo mwingapanga ukucita ifingalenga mwalasekelela nga nshi?
15 Milimo nshi mwingapanga ukubombako? Mulepepa kuli Yehova pa kuti alemwafwa ukupanga ifyo mwingakumanisha ukubomba mu cilonganino cakwe. (Amapi. 16:3; Yako. 1:5) Bushe kuti mwapanga ukubombako imilimo imo iyo twacilandapo mu paragrafu ya kubalilapo muli cino cipande, pamo nga ukubombako bupainiya bwakwafwilisha, bupainiya bwa nshita yonse, ukubombelako pa Bethel nelyo ukubombako mu makuule? Nelyo bushe kuti mwasambililako ululimi lumbi, nelyo kuti mwayako ku cifulo cimbi pa kuti mulebila sana imbila nsuma? Pa kuti mwishibe ifyo mwingacita, kuti mwabelenga icipandwa 10 mu citabo icitila Abateyanishiwa ku Kucita Ukufwaya kwa kwa Yehova, kabili kuti mwalandako na baeluda mu cilonganino mwaba. * Nga mwaesha apo mwingapesha ukufishapo ifyo mwapanga ukucita, bambi bakalamona ukuti mulelunduluka kabili mukalasekelela nga nshi.
16. Finshi mwingacita nga ca kuti pali ino nshita te kuti mufikepo ukubomba imilimo tulandilepo muli cino cipandwa?
16 Kuti mwacita shani nga ca kuti pali ino nshita te kuti mufikepo ukubomba imilimo iyo tulandilepo muli cino cipandwa? Icingamwafwa, kupanga ukubombako imilimo imbi iyo mwingakumanisha. Katulandeko pali imo.
Finshi fimo ifyo mwingapanga ukucita ifyo mwingafishapo? (Moneni paragrafu 17) *
17. Ukulingana na 1 Timote 4:13, 15, finshi munyina afwile ukucita pa kuti alesambilisha bwino?
17 Belengeni 1 Timote 4:13, 15. Nga muli baume kabili mwalibatishiwa, nalimo kuti mwawamyako ifyo mulanda amalyashi e lyo ne fyo musambilisha. Mulandu nshi? Pantu nga ‘mulebika sana amano’ ku kubelenga, ku kulanda bwino amalyashi, na ku kusambilisha, abalekutika kuli imwe bakalanonkelamo. Kuti mwapanga ukuisambilisha broshuwa itila Mulebika Amano ku Kubelenga na ku Kusambilisha no kulabomfya ifyaba mu masambililo yaba muli iyi broshuwa. Mulesambilila isambililo limo na limo, mulepitulukamo sana ilyo muli ku ng’anda kabili mule-esha ukubomfya ifyaba muli ilyo isambililo pa kulanda ilyashi. Mule-ebako kafunda wa cibili nelyo baeluda bambi “ababombesha mu kulanda na mu kusambilisha” pa kuti balemupandako amano pa fyo mwingacita. * (1 Tim. 5:17) Tamufwile ukubika fye amano ku kwishiba ifyo mufwile ukubomfya ifyo mwasambilile mwi sambililo, lelo mulingile ukubika amano na ku kulanda ifingalenga abalekutika baba ne citetekelo cakosa nelyo balafwaisha ukucitapo fimo. Nga mulecita ifi, mukalasekelela kabili na balekutika kuli imwe bakalasekelela.
Finshi fimo ifyo mwingapanga ukucita ifyo mwingafishapo? (Moneni paragrafu 18) *
18. Finshi fingatwafwa ukulabila bwino imbila nsuma?
18 Bonse fye twalikwata umulimo wa kubila imbila nsuma no wa kulenga abantu baba abasambi. (Mat. 28:19, 20; Rom. 10:14) Bushe kuti mwatemwa ukuwamyako ifyo mubomba uyu mulimo uwacindama? Mulesambilila broshuwa ya Ukusambilisha kabili mulesala ifyo mulefwaya ukubombelapo. Na kabili kuti mwasambilila na fimbi ifyo mwingabomfya mu Akatabo ka Kubomfya pa Kulongana kwa Imikalile ya Bwina Kristu no Mulimo Tubomba, e lyo na ku mavidio ayo tutamba pa kulongana kwa Mikalile umo balanga ifya kubomba umulimo wa kubila imbila nsuma. Mule-esha inshila ishalekanalekana pa kuti mwishibe ishingabomba bwino. Nga mwacita ifi twalandapo, mukalabila bwino imbila nsuma kabili mukalasekelela nga nshi.—2 Tim. 4:5.
Finshi fimo ifyo mwingapanga ukucita ifyo mwingafishapo? (Moneni paragrafu 19) *
19. Kuti mwacita shani pa kuti mube ne mibele iyo Yehova atemwa?
19 Tamufwile ukulaba ukuti cimo icacindama ico mwingapanga ukucita, kulacita ifingalenga mwaba ne mibele iyo Yehova atemwa. (Gal. 5:22, 23; Kol. 3:12; 2 Pet. 1:5-8) Finshi mwingacita pa kuti mube ne mibele Yehova atemwa? Tutile mulefwaya ukuba ne citetekelo icakosa, nalimo kuti mwabelengako ifipande mu mpapulo shesu ifilanda pa fyo mwingacita pa kuba ne citetekelo icakosa. Kabili kuti mwanonkelamo nga mwatambako amavidio yamo ayaba mu ma programu ya cila mweshi aya JW Broadcasting® umuba bamunyinefwe na bankashi ababa ne citetekelo icakosa ne fyo bacita nga bali na mafya ayalekanalekana. Lyena kuti mwamona ifyo mwingapashanya icitetekelo cabo mu fyo mucita cila bushiku.
20. Finshi twingacita pa kuti tulesekelela kabili twilafuupulwa?
20 Ukwabula no kutwishika, bonse tulafwaya ukubombako imilimo na imbi mu cilonganino ca kwa Yehova ukucila na pa fyo tulebomba pali ino nshita. Mu calo cipya ica kwa Lesa, tukamubombela ukufika apo imitima yesu ikalafwaya. Kanshi pali ino nshita tulebomba apapela amaka yesu imilimo iyo twapeelwa. Ici cikalenga tukabe ne nsansa kabili tatwakalafuupulwa. Ne cacilapo ukucindama, tukalenga Yehova “Lesa [wesu uwa] nsansa” ukucindikwa. (1 Tim. 1:11) Kanshi pali ino nshita katulesekelela mu mulimo onse uo tubomba.
ULWIMBO 82 ‘Lekeni Ulubuuto Lwenu Lubalike’
^ para. 5 Twalitemwa Yehova icine cine kabili tulafwaya ukubombesha mu mulimo wakwe. Ici e cilenga fwe bengi tulefwaisha ukulabila sana imbila nsuma no kulafwaisha ukubombako imilimo na imbi mu cilonganino. Nomba kuti twacita shani nga ca kuti twafilwa ukufishapo fimo ifyo twapanga ukubomba mu mulimo wa kwa Yehova nangu ca kuti natwesha apo twingapesha? Finshi fingatwafwa ukutwalilila ukubombesha no kusekelela ilyo tulebombela Yehova? Pa kwasuka aya mepusho twalalanda pa cilangililo Yesu alandile ica matalanti.
^ para. 2 Amashina yamo nabayalula.
^ para. 7 UBULONDOLOSHI: Italanti ni ndalama umubomfi alekwata nga abomba imyaka nalimo 20.
^ para. 15 Bamunyinefwe ababatishiwa balabakoselesha ukubombesha pa kuti bafikepo ukuba ababomfi batumikila nelyo baeluda. Nga mulefwaya ukwishiba ififwaikwa pa kuti umuntu afikepo ukuba umubomfi atumikila nelyo eluda, moneni icipandwa 5 na 6 mu citabo citila Abateyanishiwa ku Kucita Ukufwaya kwa kwa Yehova.
^ para. 17 UBULONDOLOSHI: Kafunda wa cibili ni eluda uo bapeela umulimo wa kufunda baeluda na babomfi batumikila pa mbali nga cakabilwa ilyo balanda ilyashi ilili lyonse pa cilonganino.
^ para. 64 UBULONDOLOSHI BWA CIKOPE: Pa kuti munyinefwe afishepo ifyo apanga ukucita e kutila, ukulasambilisha bwino, alefwailapo ifyebo na fimbi mu mpapulo shesu.
^ para. 66 UBULONDOLOSHI BWA CIKOPE: Nkashi uwapanga ukulabila ubunte bwa mulyashi, alepeela umukashana uulemupeela ifya kulya kardi apaba webusaiti yesu.
^ para. 68 UBULONDOLOSHI BWA CIKOPE: Nkashi uwapanga ukuba sana kapekape, atwalilako nkashi umbi ubupe.
