1. Rosai naek srar koḇansya sifrur na fa sbukifarmyan Yahwe I?

 PAPUPES ro dunya ine fyanam kaku kwar, ma kona fararur nabor fandun kofrur na. (Mat. 24:14; Luk. 10:2; 1 Ptr. 5:2) Kokame koḇe kuffarmyan Yahwe I kuker roi bisa kofrur na. Ono sisya simarisen sakḇe perintis. Imbe sfararur ro Betel, ma sia imbe sakfnoḇek ro fararur babawes. Ḇesesya wer, naek ḇebor sya siḇesewar kaku fa sakḇe hamba pelayanan ma penatua. (1 Tim. 3:1, 8) Yahwe nari imarisen kaku myam manfamyan Ḇyesi suffarmyan I kuker sne ḇesiper!​—Mz. 110:3; Yes. 6:8.

2. Fafisu kosmai cita-cita rohani koḇena ḇaim ido rosai na koḇaḇir na?

² Imbape, bisa kosusu ḇaido kofafko fyor fyoro kwar fama kosmai ḇaim cita-cita rohani koḇena. Roḇaido imbude kofafko fyor tugas ḇaido fararur komarisen na kosmai na ḇa snar umur koḇedi ḇaido roi ḇesena. (Ams. 13:12) Roi ine iso Melissa daksmai ya. * Imarisen kaku fa dakuffarmyan ro Betel ḇaido imbe dakso ro Sekolah bagi Penginjil Kerajaan, ḇape ikofen ḇo doḇe, ”Ayama yaḇebinsar kwar inja jadi fa yakso ḇa. Kirine cita-cita yena mafafu monda rirya. Fyorno ido, yakain yafafko.”

3. Rosai nari naek srar sifrur kaku na insama saksmai fararur nabor ro sidang?

³ Naek srar ḇeḇeso ḇeḇabo kaker ma ḇesambraḇ iḇye kada sisewar fa sakfasnai rari-rari ḇepyum rofyor sismai suf fararur ḇebor ḇaime. Komam kada imbude sepande, sfararur fasaw, ma siryaḇ, ḇape imbude na sfarkor kaku  wer fa sfasnai kaḇaḇaḇ, ḇaḇeaunos, ḇaido ḇaḇesyowi na. Besewar fa fasnai rari-rari ḇefandun ine ido, na smam snar wasmai syarat kwar fa wuf fararur ḇebor na. Komam pan Nick fawar ḇyena ine. Fafisu ḇyeumur taun ri 20 ya, fyafko kaku snar skanow i ḇe hamba pelayanan ḇa. Ikofen radine, ”Imburo yafrur sasar indi.” Rarirya ḇoi Nick i isusu ḇa. Ḇyesewar kaku fa dafnoḇek ro sidang ma imyaren byaryas. Kirine, dakuffarmyan ḇe anggota Panitia Cabang.

4. Rosai nari kawos ro farkarkor ineni?

⁴ Wafafko snar wasmai cita-cita rohani Bena ḇa ke? Rarirya ido, wakofenḇair roi ḇero snembri faro Yahwe I. (Mz. 37:5-7) Wor anun kako ro naek srar ḇemas ro rur sya kuker moḇsa wakfrur nabor ro fararmyan Bena, ma ḇesewar pyum fa waso anun sḇuk na. Wafrur na ido, imbude nari wasmai cita-cita Bedi. Ḇape imnis Melissa ḇeyap ḇepon ani, fafisu ine wasmai cita-cita Bena ḇa ido, moḇsa waryaḇ pdef rai? Mgorama kawos fakfuken rikyor anskoine: (1) Rosai na ḇefrur fa waryaḇ ya? (2) Moḇsa waryaḇ syadi wer? (3) Roi risai monda bisa wafrur na insamaido waryaḇ syadi.

5. Insamaido koryaḇ, na komam monda faro rosai? (Pengkhotbah 6:9)

⁵ Pengkhotbah 6:9 ikofenḇair rosai na ḇefnoḇek ko fa kosmai raryaḇ. (Wasya Pengkhotbah 6:9.) Snonggaku oso ismai ’marisen faro rosai myam ro ḇarpon mgasi’ iryaḇ faro rosai ismai na ma ifrur kwar na roro fafisu ine. Ḇape snonggaku ’ḇesewar marisen manggun ḇyena’ ikyar faro rosai na ismai ḇa na. Farkarkor rosai imbe kun na? Insamaido koryaḇ ya, fandun fa komam monda faro rosai bisa kofrur na ma faro roi imḇe kosewar na.

6. Sarḇer rosai nari kawos na ma rosai nari kofarkor ro na?

⁶ Na kosmai kaku raryaḇ ya faro rosai kofrur ro kirine ke? Imboḇae, inoido komarisen kofrur roi ḇebabo na. Ḇape kakuya bisa kosmai raryaḇ. Bisa ’kosmai rosai komam ro ḇarpon komgasna’. Moḇsai na kofrur na rai? Infa kofawi na, mgorama kawos Yesus wos sarḇer ḇyena ḇekur talenta na ḇeḇefas ro Matius 25:14-30. Nari komam farkarkor kosmai na kuker rariso bisa kosmai raryaḇ syadi wer ro fafisu ine.

7. Fawar Yesus wos sarḇer ḇyena faro talenta ya.

⁷ Ro Yesus wos sarḇer ḇyena, snon oso isya imbe dakraḇe sup amber. Ryamura ḇaime, dor manfamyan ḇyeskoya ramnai byuk talenta ya ḇe sko fa skobukisasewar. * Snar myam ma kyara mura ro samambraḇ sena oser-oser inja, snon ani byuk talenta dirim faro manfamyan ḇeoser ya, talenta disuru faro manfamyan ḇesuru ya, ma talenta oser ya wer faro manfamyan ḇekyor ya. Manfamyan ḇeponi ma ḇesuru ya sufararur marḇak inja susmai untun. Ḇape manfamyan ḇekyor ya dakfrur royoḇaḇeri, mbarya tuan ḇyanine isasyar i.

8. Rosai ḇefnai fa manfamyan ḇepon ani ḇero Yesus wos sarḇer ḇyena na imarisen kaku?

⁸ Manfamyan ḇepon ani imarisen fafayaḇa snar tuan ḇyani ikyari fa ḇyukpyum talenta dirim ya. Inema pipi ḇebor rirya! Ḇape manfamyan ḇesuru ya ido rarso? Imbude na fyafko, snar talenta ismai na  nabor namnis manfamyan ḇepon ani ḇa. Inja rosai na ifrur ya?

9. Rosai Yesus ikofen ḇana faro manfamfyan ḇesuru ani? (Matius 25:22, 23)

⁹ Wasya Matius 25:22, 23. Yesus ikofen ḇa snar manfamfyan ḇesuru ani imsor snar ismai talenta risuru monda. Manfamfyan ani kako isurem ḇa: ’Yana sine monda ke? Yafararur marḇak imnis manfamyan Bena talenta dirim ani ḇa ke? Tuan yedi dakḇesyowi aya ḇa ido, na yakram pipi sine ro saprop monda. Ipyum ya yafararur faro manggundaya monda!’

10. Rosai manfamyan ḇesuru ani ifrur na faro talenta ḇyena?

¹⁰ Raris manfamyan ḇepon ani, manfamyan ḇesuruya fyawi snar fararur ḇyena nefandun kaku. I kako fyararur marḇak faro tuan ḇyani. Bon ḇyena iso, tuan ine pipi ḇyena ismai syadi wer ḇaido dua kali lipat. Fararur marḇak suḇena ine nefromo ḇa. Fararur marḇak ro manfamyan anine nefromo monda ḇa. Tuan ḇyani imarisen, ma byuk faro i fakamamar nabor wer!

11. Moḇsa na koryaḇ syadi wer?

¹¹ Rarirya kako, na koryaḇ syadi wer fyor kuker sne ḇesiper kofrur fararur rosai monda faro Yahwe. Komyaren kobaryas ma komyaren ro fararur sidang. (Kis. 18:5; Ibr. 10:24, 25) Wafrur fasasos faro fananjur ya insama wakbuk kankarem ḇeyun samambrab. Wasmai tugas siswa ro fananjur ari minggu fadu ido, wun pyum kaku na. Siwan Au fa wafrur fararur oso ro sidang ido, wafrurna  namnis oras ya ma fasnai snar Auma bisa sikyar Au. Fararur sarirya monda sḇuk na mamkyur awer na imnis ra wafrur famfnom ḇaido wafrur sawsaw na. Ḇesewar fa wakir syadi fyor wafrur fararur Bena. (Mz. 22:29) Kuker sne ḇesiper wafrur kaku fararur ḇesren Bena ido, nari ḇebati fanam kaku kuker Yahwe I, ma nari waryaḇ syadi. (Gal. 6:4) Osower ido, nari wakmarisen kako fyor ḇesesya saksmai fararur wamarisen na.​—Rm. 12:15; Gal. 5:26.

12. Melissa ma Nick susmai raryaḇ snaro?

¹² Waswarepen Melissa i kaker ke, imbesrar anine imarisen kaku fa dakuffarmyan ro Betel ḇaido imbe dakso ro Sekolah bagi Penginjil Kerajaan? Cita-cita ḇyena ismai na ḇa rariryano doḇo, ”Yaḇesewar fa yambran pyum fararur perintis yedi. Yaḇepake nyan nabor fa yaḇukibaryas. Ro nane nafrur yaryaḇ kaku.” Rariso kuker Nick i, randak ya fyafko snar dakḇe hamba pelayanan ḇa? Doḇo, ”Yamam monda faro roi bisa yafrur na, imnis ra yaso ro ḇaḇebaryas ma yabuk kankarem ḇesambraḇser sidang. Yaser kako formulir Betel, ma taun ḇepur ya sor aya yuffarmyan ro diwa.”

13. Bon rosai nari wasmai na fyor wafararur kuker sne ḇesiper faro fararur Bena ro kirine? (Pengkhotbah 2:24)

¹³ Wafararur kuker sne ḇesiper faro fararur Bena ro kirine ido, nari wasmai fakamamar ḇeba syadi ro fafisu iyama wer ke? Imbude na rarirya, imnis ra Nick i. Imboi oroḇa ido, imnis Melissa i, na bisa waryaḇ pdef, ma nari wasmai marisen kaku faro roi wafrur kwar na. (Wasya Pengkhotbah 2:24.) Osower ido, nari wasmai aski snar wafrur marisen Tuan koḇani, Yesus Kristus i.

14. Komam faro fararur koḇena monda ro kirine nama nasrow kwar ke? Fasnaiḇair pan.

¹⁴ Komam faro fararur koḇena monda ro kirine ido, ine nfasnai koḇesewar awer fa kofrur roi nabor faro Yahwe I ke? Rariryaḇa. Na kofrur na ma kosewar kaku fa kofrur fararur ḇesren, imnis ra insama koḇekir syadi ro ḇaḇebaryas ma kobuk farkarkor ḇaido kofnoḇek naek srar koḇesi. Bisa kosmai roi anna fyor komam monda fa kofnoḇek ḇesesya ḇardibur kokara manggun koḇardi.​—Ams. 11:2; Kis. 20:35.

15. Roi risai wer imbe wafrur kaku na insama waryaḇ syadi?

¹⁵ Roi risai wer imbe wafrur kaku na? Wor Yahwe ifnoḇek Au insamaido fawi roi risai imbe wasmai na. (Ams. 16:3; Yak. 1:5) Bisa ḇesewar fa waksmai roi oser ḇeyap ro syos  randak farkarkor ine ke imniso wakḇemerintis ekstra, ḇeperintis biasa, fararur ro Betel, ḇaido wakso ro fararur babawes? Ḇaido bisa wafarkor wos ḇese ḇaido baryas ro moḇ ḇefandun na ke? Imbe wafawi roi nabor ḇeḇeso ido ine nasya ro bab 10 ro syap Diorganisasi untuk Melakukan Kehendak Yehuwa. Bisa wawos roi anine kuker penatua ro sidang sya kako. * Besewar fa wasmai roi anane ido, nari wasur kaku ro rurya ma nari waryaḇ syadi.

16. Ro fafisu ine roi imbe waksewar na wasmai na ḇaim ido rosai na wafruri?

¹⁶ Ḇape rariso kuker fafisu ine, waksmai roi oser ḇeyap insandi ani ḇa ido, na rariso? Ḇesewar pan fa wafrur roi ḇesena  nari bisa wafrur na. Komam pan contoh ḇeḇeso nane.

17. Imnis 1 Timotius 4:13, 15 ya, moḇsa naek oso ḇye guru ḇepyum syadi rai?

¹⁷ Wasya 1 Timotius 4:13, 15. Au iso naek ḇebaptis kwar ido, bisa ḇesewar fa wakḇe manfaya ma guru ḇepyum syadi. Rosai ḇefnai ya? Snar besewar fa wakir ro ḇaḇewasya, wawose, ma buk farkarkor na ido, ḇerower Ausya nari sismai payamyum nabore. Besewar fa waso mnis farkarkor oser-oser ḇero syap Swewar Kaku fa Wawasya ma Buk Farkarkor. Farkor na oser-oser, wafrur farkarkor ani ker ma fasnai na ro ḇarpon rofyor wasmai tugas fa wun faya. Wor anun ro penasihat ekstra ḇaido penatua ḇesesya, ”ḇeḇesewar kuker ardomes faḇefaya ma ḇeḇuk farkarkorsya.” * (1 Tim. 5:17) Ḇape, mam monda ker faro nyan ḇyena awer ḇape kwarauser moḇsa wafrur ḇerower ansya kakyar sena nasambraḇ ḇaido nadif si sifrur naro kenem sena. Rarirya, Au ma ḇerower sya kako nari siryaḇ syadi.

18. Rosai nari kofrur ya insama koḇekir syadi ro fararmyan koḇena?

¹⁸ Kokame kona fararur fa kobaryas ma kofarkor snonggaku sya ḇe manfamyan. (Mat. 28:19, 20; Rm. 10:14) Wamarisen fa wakir syadi faro fararur ḇefandun kaku ine ke? Wafarkor anun ḇaido wos farkor ḇero brosur Farkarkor, ḇo besewar fa wafrur roi ḇero farkarkor ani kako. Bisa wasmai kako anun ḇese ḇero Syapram Farkarkor Kankenem ma Fararmyan Kristen Koḇena ma vidio awawos fa kobukibaryas sfasnai ro fananjur minggu  fadu ya. Besewar pan anun ḇebor na insama wafawi anun rosai ḇesrow ro moḇ Bedi. Wafrur nakam ido, nari waryaḇ syadi snar ḇekir ro fararmyan ya.​—2 Tim. 4:5.

19. Moḇsa swewar fa fasnai rari-rari Kristen na rai?

¹⁹ Roi oser ḇefandun ma wapok fa ḇefnder awer na iso syewar fa fasnai rari-rari Kristen na. (Gal. 5:22, 23; Kol. 3:12; 2 Ptr. 1:5-8) Moḇsa fasnai na rai? Imnis radine woḇo waḇe wana kakyar ḇesambraḇ syadi. Bisa wawasya fasfas ḇero syap koḇena ḇeser anun fa ḇefrur kakyar bena nsambraḇ. Mam kako vidio-vidio ḇero JW Broadcasting^® faro naek srar bena kakyar ḇesambraḇ sya fyor sismai farawrowes. Ramnai, kwarauser moḇsa waksofarari kakyar sena.

20. Rosai na kofrur kaku ya insama koryaḇ syadi ma kofafko ḇa?

²⁰ Kokame na komarisen fa kofrur roi nabor syadi wer faro Yahwe bardibur ro kirine. Ro dunya babo ya, nari kuffarmyan I isof fyoro ma oso ḇedwarek ko ḇa. Ḇape ro fafisu ine ya, kobukpyum oras koḇena fa kobukifarmyan Yahwe kuker samambraḇ koḇena ido, nari koryaḇ syadi ma kofafko ḇa. Ḇefandun syadi iso, nari nun ḇaḇesyowi ma sanandik faro Yahwe Allah ḇeaski. (1 Tim. 1:11) Inja, mgorama koryaḇ ro fararur risai monda kosmai na!