1. De vbene etẹn ima nibun ya hia hẹ, ne iran rhie egbe ye iwinna ugamwẹ e Jehova sayọ?

 IWINNA nibun wa rre ima otọ ne ima gha ru, zẹvbe ne ima ya bu ufomwẹ ọghe agbọn na. (Mat 24:14; Luk 10:2; 1 Pit 5:2) Ma hia hoo ne ima rhie egbe ye ugamwẹ e Jehova vbene ẹtin ima sẹ. Etẹn ima eso hoo ne iran rhie egbe ye iwinna arọndẹ. Eso hoo ne iran ga vbe Bẹtẹl, ra ne iran deba etẹn ni bọlọ avbe owa ugamwẹ. Deba ọni, etẹn ima nikpia nibun keghi rhie egbe ladian, ne iran mieke na gbegba nọ gha ga zẹvbe ọguọmwadia iwinna ra ọdiọn vbe uwu iko. (1 Tim 3:​1, 8) U miẹn vbene ẹko rhiẹnrhiẹn e Jehova hẹ, zẹvbe ne ọ ya bẹghe eguọmwadia ẹre ni hoo ne iran ya ekhọe hia gae!​—Psm 110:3; Aiz 6:8.

2. De vbene ọ ye ima hẹ, deghẹ ukpamuyọmọ ne ima te ya aro yi ma sẹ ima obọ?

² Orhiọn sẹtin gbe ye ima iwu deghẹ a na miẹn wẹẹ, ma zẹ khẹ ukpamuyọmọ eso ne ima te ya aro yi, sokpan ọ ma sẹ ima obọ. Orhiọn sẹtin vbe gbe ye ima iwu, deghẹ ukpamuyọmọ eso ma sẹ ima obọ, rhunmwuda inu ukpo ne ima ye ra emwi ọvbehe. (Itan 13:12) Ọna ọre emwi nọ sunu daa e Melissa. * Ọtẹn nokhuo na te hoo ne ọ ya ga vbe Bẹtẹl ra ne ọ yo Owebe Ọghe Etẹn Ni Kporhu Iyẹn Nọ Maan Ọghe Arriọba, sokpan ọ ma gba ẹre. Ọ khare wẹẹ: “Ai khian ghi sẹtin tie mwẹ vbe Bẹtẹl ra owebe na, rhunmwuda I gberra inu ukpo ne iran gualọ nẹ. I gha wa roro ẹre ugbẹnso, orhiọn ghi wa gbe yọ mwẹ iwu.”

3. De emwi nọ khẹke ne etẹn ima eso ru, ne iran mieke na gbegba nọ gha ru iwinna eso vbe ugamwẹ e Jehova?

³ Etẹn ima eso rrọọ ne esagiẹn iran wa ye hu, sokpan a te miẹn wẹẹ ukpamuyọmọ eso sẹ iran obọ, ọ mwẹ akpa eso na gualọ vbe obọ iran. Iran sẹtin wa rẹn emwi, iran sẹtin wa fuẹro, iran sẹtin vbe mu egbe ne iran ya ru iwinna na rhirhi mu ne iran; sokpan a  sẹtin miẹn wẹẹ, ọ khẹke ne iran gha rhie ẹre ma wẹẹ, ọmwa nọ mwẹ izinegbe, ọghọ kevbe nọ gbe aro ke otọ ru iwinna na mu ye iran obọ, ẹre iran khin. Adeghẹ u na gha hia ne u gha mwẹ akpa eso ne u i mwẹ, u i rẹn ẹghẹ ne ukpamuyọmọ eso gha ya sẹ ruẹ obọ. Gia ghee emwi nọ sunu daa e Nick. Vbe ọ ghi rre ukpo 20, ọ na te ya aro yọ wẹẹ, a gha wẹẹ ne irẹn suẹn gha ga zẹvbe ọguọmwadia iwinna. Sokpan ọ ma de vberriọ. Ọna keghi gbe orhiọn ye ọre iwu, ọ khare wẹẹ: “I na gha roro ẹre wẹẹ, egbọre ọ mwẹ ako eso ne I i na hia, ẹre ọ kue si ẹre ne iran ma na zẹ mwẹ.” Sokpan Nick ma gi egbe wọọ ẹre, ọ na gha hia, ne ọ gha ru emwi nọ sẹtin ru vbe uwu iko kevbe iwinna ikporhu iyẹn nọ maan. Vbe na guan na, ọkpa vbe Agbaziro Ọghe Abotu ẹre ghi nọ.

4. De emwi ne ima khian ziro yan vbe ako iruẹmwi na?

⁴ Ọ mwẹ ukpamuyọmọ eso ne u te ya aro yi, nọ ma he sẹ ruẹ obọ ra? Te ọ ghi ya orhiọn gbe yọ ruẹ iwu ra? Deghẹ erriọ nọ, tama e Jehova vbene ọ ye ruẹ hẹ. (Psm 37:​5-7) Deba ọni, u sẹtin vbe nọ etẹn eso ni deziẹn vbe odẹ ọghe orhiọn ne iran rhie ibude nuẹn, ne u mieke na rẹn emwi eso ne u gha ru, nọ gha ya ruẹ gha mwẹ alaghodaro. U ghi vbe hia ne u lele ibude ne iran rhie nuẹn. U gha ru vberriọ, egbọre ukpamuyọmọ ne u ya aro yi gha sẹ ruẹ obọ. Sokpan a sẹtin vbe miẹn wẹẹ, ọ ma sẹ ruẹ obọ rhunmwuda emwi eso, zẹvbe nọ ghaa ye ne Melissa. Ọ ghaa yerriọ, vbọ khian ru iyobọ nuẹn ne u ye gha sọyẹnmwẹ? Ne ima ya rhie ewanniẹn ye inọta na, ma gha ziro yan emwi eha vbe ako iruẹmwi na, (1) emwi nọ khian ya ima gha sọyẹnmwẹ, (2) emwi nọ khian ya ọyẹnmwẹ nọ sẹ ima gha muan yọ kevbe (3) okhuo eso ne ima gha sẹtin fian ne egbe ima, nọ gha ya ima kakabọ gha sọyẹnmwẹ.

5. Ma ghaa hoo ne ima gha sọyẹnmwẹ, vbọ khẹke ne ima ru? (Asan-Ibo 6:9)

⁵ Ebe Asan-Ibo 6:​9, ya ima rẹn emwi nọ khian ya ima gha sọyẹnmwẹ. (Tie ẹre.) Ako nii tama ima wẹẹ, ọmwa ne emwi nọ mwẹ “sẹ ọre okẹn” i “rhie aro ye ọvbehe” nẹi mwẹ. De emwi ne ọna maa ima re? Ma ghaa hoo ne ima gha sọyẹnmwẹ, ọ khẹke ne ima rhie aro tua emwi ne ima mwẹ nia, ọ ma khẹke ne ima rhie aro tua emwi ne ima rẹnrẹn wẹẹ, ẹi khian sẹtin sẹ ima obọ.

6. De erre ne ima khian ziro yan? De emwi nọ khian maa ima re?

⁶ Emwi ne ima mwẹ gha gele sẹtin sẹ ima ọkẹn ra? Emwa eso ma yayi wẹẹ ọna gha sẹtin sunu, rhunmwuda te a mwẹ emwi ba emwi. Sokpan ẹmwata nọ rrọọ ọre wẹẹ, ma gha sẹtin gi emwi ne ima mwẹ sẹ ima ọkẹn, ne ima gha te ya “rhie aro ye ọvbehe” ne ima i mwẹ. Vbe ima khian ya ru ọna hẹ? Ne ima ya rhie ewanniẹn ye inọta na, gi ima ziro yan erre ọghe talẹnt ne Jesu zẹ, vbe ebe Matiu 25:​14-30. Erre na gha gi ima rẹn vbene ima khian ya gi emwi ne ima mwẹ nia gha sẹ ima ọyẹnmwẹ, kevbe emwi nọ khian ya ọyẹnmwẹ nii gha muan yọ.

7. De emwi nọ sunu vbe erre ọghe talẹnt ne Jesu zẹ?

⁷ Vbe erre nii, okpia ọkpa kegha mu egbe ne ọ khian ya gha rrie isi. Sokpan ọ ke kpa, ọ keghi tie eguọmwadia ẹre, ọ na ghae igho na tie ẹre talẹnt ne iran, ne iran ya do ẹki. * Okpia na rẹn vbene eguọmwadia ẹre eha fuẹro sẹ hẹ, rhunmwuda ọni, ọ keghi viọ talẹnt isẹn ne ọguọmwadia nokaro, ọ na viọ eva ne ọguọmwadia nogieva, ọ na mu ọkpa ne nogieha. Ọguọmwadia nokaro kevbe nogieva keghi loo igho nọ sẹ iran obọ ya do ẹki, iran na khuan igho khẹ arowa ọghe iran. Sokpan nogieha ma loo igho nọ sẹ ọre obọ ya ru emwi rhọkpa, rhunmwuda ọni, arowa iran ghi rre, ọ na khu ẹre fua.

8. Vbọzẹ ne ọguọmwadia nokaro na gha ghọghọ?

⁸ Ẹi mwẹ ọguọmwadia nokaro ma gha ghọghọ  wẹẹ, e talẹnt isẹn ẹre arowa ẹre viọ nẹẹn, rhunmwuda, ọni i re igho nekherhe. Deba ọni, ọni rhie ma wẹẹ, te arowa ẹre wa kakabọ gba ẹko ẹre! Sokpan ọguọmwadia nogieva vbe vbo? Ọ gha te gi orhiọn gbe ye ọre iwu rhunmwuda, igho na mu ne nokaro ẹre ọ kpọlọ sẹ ọghẹe. Sokpan de emwi nọ ghi ru?

9. De emwi ne ọguọmwadia nogieva ma ru? (Matiu 25:​22, 23)

⁹ Tie Matiu 25:​22, 23. E Jesu ma kha wẹẹ, te ọguọmwadia nogieva ghi gha mu ohu, rhunmwuda wẹẹ, e talẹnt eva kẹkan ẹre ọ sẹ ọre obọ. E Jesu ma vbe kha wẹẹ, te ọ ghi gha vian wẹẹ: ‘Ọna ọkpa ẹre ọ wa sẹ mwẹ obọ ra? Ẹi re iwinna ne imẹ ru, ẹre ọguọmwadia nokaro nọ miẹn talẹnt isẹn vbe ru? Deghẹ arowa mwẹ ma gbọyẹmwẹ ye iwinna ne I ru, I i ghi wa hẹwẹ, ne I tọnnọ e talẹnt eva na ye otọ, ne I fẹko ya gha ru ọghe enegbe mwẹ khian.’

10. De vbene ọguọmwadia nogieva ya loo igho nọ sẹ ọre obọ hẹ?

¹⁰ Te ọguọmwadia nogieva wa vbe loo igho nọ sẹ ọre obọ ya do ẹki, ọ na yae khuan igho khẹ arowa ẹre zẹvbe ne ọguọmwadia nokaro ru ẹre. Ọ ghi ya e talẹnt eva nii ya do ẹki, ọ na vbe miẹn talẹnt eva ọvbehe. Arowa ẹre keghi san rẹn ẹse. Ọ keghi tian rẹn, ọ na vbe mu iwinna ba ẹre iwinna!

11. De emwi nọ khian ya ima gha kakabọ sọyẹnmwẹ?

¹¹ Ma gha sẹtin ya ọyẹnmwẹ nọ sẹ ima gha muan yọ, deghẹ ima na ya ekhọe hia rhiegba ye iwinna na waa ima re vbe ugamwẹ e Jehova. Rhie egbe ye iwinna ikporhu kevbe iwinna na ru vbe uwu iko. (Iwinna 18:5; Hib 10:​24, 25) Gha mu egbe ye otọ u ke gha rrie iko, ne u mieke na sẹtin zẹ ewanniẹn nọ gha rhie igiọdu ne etẹn. U ghaa mwẹ obọ vbe abọ ọghe owebe vbe iko ne ima do vbe uwu uzọla, u ghi tie ẹre ekhuarro. Ọ  ghaa mwẹ iwinna na mu nuẹn vbe iko, u ghi hia ne u rherhe gha sẹ iko, u ghi vbe gha ya ekhọe hia ru iwinna nii. Ghẹ ya iwinna rhọkpa na mu nuẹn rhẹghẹrẹ, hia ne u guẹ iwinna nii sayọ. (Itan 22:29) Zẹvbe ne u ya rhie egbe ye iwinna vbe ugamwẹ e Jehova, u ghi do gha mwẹ alaghodaro, ẹghẹ nii ọyẹnmwẹ ghi gha sẹ ruẹ. (Gal 6:4) Ọ ghaa yerriọ, deghẹ ukpamuyọmọ ne u te ya aro yi na ghi sẹ ọmwa ọvbehe obọ, u ghi sẹtin gu ọmwa nii ghọghọ.​—Rom 12:15; Gal 5:26.

12. De emwi ne etẹn eva ru, nọ ru iyobọ ne iran ya kakabọ gha sọyẹnmwẹ?

¹² E Melissa ne ima ka guan kaan sin, nọ te gha hoo ne ọ ya ga vbe Bẹtẹl, ra ne ọ yo Owebe Ọghe Etẹn Ni Kporhu Iyẹn Nọ Maan Ọghe Arriọba khare wẹẹ: “I keghi hia vbene ẹtin mwẹ sẹ vbe iwinna arọndẹ ọghomwẹ, I vbe hia ne I gha loo obẹlẹ ughughan ya kporhu. Ena hia wa ya mwẹ sọyẹnmwẹ.” Vbọ ru iyobọ ne Nick ya zin egbe, vbe ẹghẹ ne ukpamuyọmọ ne ọ te ya aro yi ma sẹ ọre obọ? Ọ khare wẹẹ: “I keghi rhie aro tua ukpamuyọmọ ne I mwẹ, ọni ọre ne I gha rhie egbe ye iwinna ikporhu iyẹn nọ maan, kevbe ne I gha zẹ ewanniẹn nọ rhie igiọdu ne etẹn. I na vbe rhie obọ ye ebe wẹẹ, I hoo ne I ya ga vbe Bẹtẹl; vbọ ghi rre ukpo nọ lelẹe, iran na ghi tie mwẹ gha die Bẹtẹl.”

13. De ere ne u gha miẹn, deghẹ u na rhie egbe ye iwinna ne u ru nia? (Asan-Ibo 2:24)

¹³ Adeghẹ u na mu aro ye iwinna ne u sẹtin ru nia vbe ugamwẹ e Jehova, ọni gha kie ẹkpotọ yọ ne ukpamuyọmọ ọvbehe ya sẹ ruẹ obọ vbe odaro ra? Egbọre ọ sẹtin gha ye vberriọ, zẹvbe nọ ghaa ye ne Nick. Sokpan deghẹ ọ ma na de vberriọ, vbene ọ ghaa ye ne Melissa, u gha ye sẹtin gha sọyẹnmwẹ, deghẹ u na rhie aro tua emwi ne u sẹtin ru nia, kevbe deghẹ u na gi ukpamuyọmọ ne u mwẹ sẹ ruẹ ọkẹn. (Tie Asan-Ibo 2:24.) Emwi ọvbehe nọ gha ya ruẹ gha sọyẹnmwẹ, ọre ne u na rẹn wẹẹ, arowa mwa ighẹ Jesu Kristi gbọyẹmwẹ ye ẹrhiọn ne u loo vbe ugamwẹ e Jehova.

14. De emwi eso nọ khẹke na gha mwẹ vbe ekhọe, vbe ọ gha de ọghe iwinna na ru vbe ugamwẹ Jehova?

¹⁴ Ne a na wẹẹ, ne ima mu aro ye iwinna ne ima ru vbe ugamwẹ e Jehova nia, te ọni ghi rhie ma wẹẹ, ne ima ghẹ ghi hia ne ima ru sayọ ra? Hiehie! Te ọ khẹke ne ima gha fian okhuo ne egbe ima, ne ima mieke na gha mwẹ alaghodaro vbe odẹ ne ima ya kporhu, odẹ ne ima ya maa emwa emwi, kevbe odẹ ne ima ya ru iyobọ ne etẹn ne ima gba ga. Ma gha sẹtin musọe vbe okhuo ne ima fian ne egbe ima, deghẹ ima na gha rhie aro tua vbene ima khian ya ru iyobọ ne emwa ọvbehe hẹ, ne ima gha te ya rẹn ọghe enegbe ima ọkpa.​—Itan 11:2; Iwinna 20:35.

15. De okhuo eso ne u gha sẹtin fian ne egbuẹ nọ gha ya ruẹ kakabọ gha sọyẹnmwẹ?

¹⁵ De okhuo eso ne u gha sẹtin fian ne egbuẹ? Rinmwian e Jehova ne ọ ru iyobọ nuẹn ya rẹn okhuo eso nọ ma lọghọ gbe ne u gha sẹtin fian ne egbuẹ. (Itan 16:3; Jems 1:5) Usun okhuo ne u gha sẹtin fian ne egbuẹ, ọre egbe na sunu yi vbe  okhuẹn nokaro. Vbe igiemwi, u sẹtin rhie egbe ye iwinna arọndẹ ọghe ovbi ẹghẹ kherhe ra ọghe ẹghẹ hia. U sẹtin ya ga vbe Bẹtẹl, u sẹtin vbe deba etẹn ni bọlọ owa ugamwẹ, u sẹtin vbe ruẹ urhuẹvbo ọgbọn ne u mieke na yae gha kporhu, u sẹtin kue vbe ya kporhu vbe ẹvbo ọvbehe. U ghaa hoo ne u rẹn sayọ vbekpa emwi ughughan ne u gha sẹtin ru vbe ugamwẹ e Jehova, ya ghee uhunmwuta 10 ọghe ebe ọghomwa na tie ẹre Organized to Do Jehovah’s Will, u sẹtin vbe gu ediọn ni rre iko ruẹ guan. * Zẹvbe ne u ya hia ne u musọe vbe avbe okhuo ne u fian ne egbuẹ, alaghodaro ne u mwẹ ghi do dewarowua, ẹghẹ nii u ghi do kakabọ gha sọyẹnmwẹ.

16. Vbọ khẹke ne u ru, deghẹ u ma sẹtin musọe vbe okhuo eso ne u fian ne egbuẹ?

 ¹⁶ Sokpan deghẹ u ma sẹtin musọe vbe okhuo eso ne u fian ne egbuẹ, vbọ khẹke ne u ru? U ghi fian okhuo ọvbehe ne ọ ma lọghọ gbe ne egbuẹ. Gia ziro yan emwi eso ne u gha sẹtin ru.

17. Zẹvbe nọ rre ebe 1 Timoti 4:​13, 15, de emwi nọ khian ru iyobọ ne ọtẹn nokpia ne ọ ya gha mwẹ alaghodaro vbe odẹ ne ọ ya maa emwa emwi?

¹⁷ Tie 1 Timoti 4:​13, 15. Adeghẹ ọtẹn nọkpia nọ dinmwiamẹ nẹ ẹre u khin, hia ne u gha mwẹ alaghodaro vbe odẹ ne u ya ya ọta guan kevbe odẹ ne u ya maa emwa emwi. Vbọzẹ? Rhunmwuda, deghẹ u na hia ne u gha mwẹ alaghodaro vbe odẹ ne u ya tie ebe, odẹ ne u ya ya ọta guan kevbe odẹ ne u ya maa emwa emwi, emwa ni danmwehọ ruẹ ghi miẹn ere vbọ. Emwi ọkpa nọ gha ru iyobọ nuẹn, ọre ne u winna yan dọmwadẹ iruẹmwi nọ rre ebe emu na tie ẹre Gha Mwẹ Alaghodaro Vbe Odẹ Ne U Ya Tie Ebe Kevbe Odẹ Ne U Ya Maa Emwa Emwi. U ghi ka winna yan iruẹmwi ọkpa, u ke la ọvbehe, u gha ghi tie dọmwadẹ iruẹmwi nẹ, u ghi hia ne u lele ibude ne u miẹn vbọ vbe u ghaa mu egbe ọta ruẹ; u ghi vbe hia ne u lele ẹre, vbe u gha khian vbe ya ọta nii guan. U sẹtin vbe gualọ adia vbe obọ ọbude ọghe etẹn ni ya ọta guan ra ediọn ọvbehe “ni winnaẹn ẹsẹse vbe orhu ne a kpe kevbe emwi ne a ma emwa ere.” * (1 Tim 5:17) Ẹmwata nọ wẹẹ, ọ khẹke ne u lele avbe ibude ni rre ebe ẹmu nii. Sokpan, ọ vbe khẹke ne u ru iyobọ ne emwa ni danmwehọ ruẹ, ne iran gha mwẹ amuẹtinyan nọ wegbe, u ghi vbe rhie igiọdu ne iran, ne iran rhie emwi ne iran ruẹ ye uyinmwẹ. U ghaa ru vberriọ, u ghi gha sọyẹnmwẹ, emwa ni danmwehọ ruẹ ghi vbe gha sọyẹnmwẹ.

18. De emwi eso ni gha ru iyobọ ne ima, ne ima ya gha mwẹ alaghodaro vbe iwinna ikporhu?

¹⁸ Ẹkpotọ kie ne ima hia ya gha mwẹ obọ vbe  iwinna ikporhu, kevbe ne ima ru iyobọ ne emwa ya khian erhuanegbe Kristi. (Mat 28:​19, 20, NW; Rom 10:14) U gha hoo ne u gha mwẹ alaghodaro vbe iwinna na ra? Hia ne u tie ebe ẹmu na tie ẹre Imamwaemwi, u ghi vbe hia ne u lele ibude ni rrọọ. U gha vbe miẹn adia eso vbe Ebe Iwinna Na Loo Vbe Ne Iko Uyinmwẹ Kevbe Iwinna Ọghe Ima, kevbe avbe vidio ne ima ghee vbe iko ọghomwa na do vbe uwu uzọla, ni maa ima vbene a ya kporhu hẹ. Hia ne u gha loo obẹlẹ ughughan vbe u ghaa kporhu, ne u mieke na rẹn nọ gha biẹ ọmọ esi vbọ. U ghaa lele adia na, u ghi do gha mwẹ alaghodaro vbe odẹ ne u ya kporhu, kevbe odẹ ne u ya maa emwa emwi. Ẹghẹ nii, u ghi do gha sọyẹnmwẹ.​—2 Tim 4:5.

19. De emwi nọ khian ru iyobọ nuẹn, ne u ya gha mwẹ avbe akpa ni khẹke Ivbiotu e Kristi?

¹⁹ Ghẹ mianmian wẹẹ, ọkpa vbe usun okhuo nọ khẹke ne u fian ne egbuẹ, ọre ne u hia ne u gha mwẹ avbe akpa nọ khẹke Ivbiotu e Kristi. (Gal 5:​22, 23; Kọl 3:12; 2 Pit 1:​5-8) Vbọ khian ru iyobọ nuẹn ya gha mwẹ avbe akpa na? Vbe igiemwi, gia kha wẹẹ, u hoo ne u gha mwẹ amuẹtinyan nọ wegbe. U sẹtin tie uhunmwuta eso vbe ebe ọghe ima, ni guan kaan emwi ughughan ne ima gha sẹtin ru, nọ gha ya ima gha mwẹ amuẹtinyan nọ wegbe. E vidio ughughan ni ladian vbe JW Broadcasting^® ni dekaan vbene etẹn ya rhie ẹre ma wẹẹ, iran mwẹ amuẹtinyan nọ wegbe vbe iran ghaa werriẹ aro daa ọlọghọmwa ughughan, gha vbe ru iyobọ nuẹn. Vbe iyeke ọni, u ghi hia ne u ya egbe taa iran.

20. Vbọ khian ya ima gha kakabọ sọyẹnmwẹ?

²⁰ Vbe nai na gbe awawẹ, ma hia fẹẹrẹ hoo ne ima ru sayọ vbe ugamwẹ e Jehova. Vbe agbọn ọgbọn nọ dee, ma gha sẹtin ru emwi hia ne ima hoo ne ima ru vbe ugamwẹ e Jehova, vbene emwi rhọkpa i na mu idobo yọ. Ọ ghi te sẹ ẹghẹ nii, gi ima gha ru emwi ke emwi ne ima gha sẹtin ru vbe ugamwẹ e Jehova; ẹghẹ nii, ọyẹnmwẹ ghi kakabọ gha sẹ ima, orhiọn i khian vbe gha gbe ye ima iwu vberriọ. Nọ ghi wa sẹ ehia ọre wẹẹ, ma ghi sẹtin rhie uyi kevbe ekpọnmwẹ gie Jehova, nọ re Osa nọ sọyẹnmwẹ. (1 Tim 1:11) Nọnaghiyerriọ, gi ima gi ukpamuyọmọ ne ima mwẹ gha sẹ ima ọyẹnmwẹ!