1. Kai si lakoken enterem kalak guna mereken terbuen bas ngelayani Jahwe?

  MELALA kel si banci silakoken janahta nimai kedungen jaman enda. (Mat. 24:14; Luk. 10:2; 1 Pet. 5:2) Kerina kita, silakoken ateta asa ngasupta bas ngelayani Jahwe. Enterem ka si ngelakoken terbuen bas pelayanenna. Piga-piga merhat ngelayani jadi perintis, lit ka si merhat ngelayani bas Betel, ntah pe bas dahin pembangunen i organisasi. Mbue ka si erusaha gelah banci ngelayani jadi sinampati runggun ntah pe pertua. (1 Tim. 3:1, 8) Meriah kel ukur Jahwe ngidah enterem umatNa si semangat ngelayani Ia.​—Ms. 110:3; Jes. 6:8.

2. Banci saja uga perasanta adi la banci sidat cita-cita rohanita?

² Tapi banci saja kitik ukurta adi cita-cita rohani si sedekah enda siarapken bas ngelayani Jahwe la banci sidat. Ntah kitik ukurta perban la banci silakoken piga-piga pendahin bas organisasi Jahwe perban kita enggo metuasa ntah perban alasen si debanna. (Kua. 13:12) Bagenda me si inanami Melissa. * Merhat ia ngelayani bas Betel ntah pe ngikuti Sekolah man Perberita Kerajan, tapi nina, “Aku enggo metuasa, emaka terjeng bas nipi ngenca sura-suraku e. Mon-mon kitik kel ukurku.”

3. Kai saja si perlu lakokenndu gelah banci datndu tanggung jawap tambahen bas ngelayani Jahwe?

³ Piga-piga kalak si nguda denga ras sehat banci saja perlu pehulina sipat-sipatna gelah ngasup ia ndalanken tanggung jawap tambahen. Contohna, piga-piga banci saja beluh, meter erban keputusen, janah nggit kerja keras. Tapi, perlu denga kalak e erlajar gelah reh sabarna, gelah reh  hati-hatina bas ngelakoken dahinna, bage pe gelah reh belinna pengerganna man kalak si deban. Adi usahakenndu mpehuli sipat-sipatndu, banci saja bereken turang senina tanggung jawap tambahen man bandu bas waktu si la isangkandu. Cuba ukuri pengalamen Nick sanga umurna 20 tahun. Kitik kel ukurna perban la ia ilantik jadi sinampati runggun. Bagenda nina, “Tempa-tempa lit kuakap salahku.” Tapi Nick la nyerah, terus pehulina sipat-sipatna. Lakokenna si e kerina bas runggun bage pe bas dahin erberita. Gundari, ia enggo ngelayani jadi salah sada anggota Panitia Cabang.

4. Kai kari si ibahas bas artikel enda?

⁴ Kitik nge ukurndu perban la banci datndu cita-cita rohanindu? Adi bage, totokenlah kerna si e man Jahwe janah turikenlah uga perasanndu man baNa. (Ms. 37:5-7) Selain si e, pindolah nasehat arah turang senina si erpengalamen gelah banci reh buena si lakokenndu bas ngelayani Jahwe. Dalankenlah nasehat e asa ngasupndu. Adi bage banndu banci saja datndu tugas tambahen ntah pe cita-citandu e. Tapi bagi Melissa si enggo iceritaken ndai, banci saja la banci datndu cita-citandu e gundari. Emaka, uga carana gelah banci kam tetap ermeriah ukur? Guna njawap penungkunen e, sibahas kari bas artikel enda (1) uga carana gelah banci ermeriah ukur, (2) uga carana mpebelin keriahen ukurndu, janah (3) cita-cita si uga nge si nambahi keriahen ukurndu.

5. Gelah banci ermeriah ukur kai si arus siukuri? (Pengerana 6:9)

⁵ Bas Pengerana 6:9 lit ijelasken kerna kai si banci nampati kita gelah ermeriah ukur. (Baca.) Kalak si ngukuri ‘kai si idahna’ puas ia perban kai si lit bas ia. Tapi kalak si lalap ngukuri arapen si la banci datna, ndigan pe la banci puas. Adi bage, kai pelajarenna man banta? Gelah banci kita ermeriah ukur arus siukuri kai si banci silakoken janah siban cita-cita si banci sidat.

6. Perumpaman kai kari sibahas, janah pelajaren kai kari sidat jenari?

⁶ Banci kin kita puas nandangi kai si banci silakoken gundari? Enterem kalak ngatakenca maka e la mungkin perban biasana meriah siakap mpelajari kai si mbaru. Tapi situhuna banci nge kita tetap ermeriah ukur. Banci kita tuhu-tuhu ermeriah ukur perban kai si lit bas kita. Uga carana? Mari sipelajari perumpaman Jesus kerna talenta si itulis bas Matius 25:14-30. Arah perumpaman e, sipelajari kari uga carana kita ermeriah ukur ras mpebelin keriahen ukurta nandangi kai si banci silakoken gundari.

7. Ceritaken alu singkat perumpaman Jesus kerna talenta.

⁷ Bas perumpaman e, lit sekalak dilaki si lawes atena ku ingan si ndauh. Sope ia lawes, lebuhna budak-budakna janah berena man tiap budak e talenta guna ipake kalak e bas erbisnis. * Teh dilaki e maka beda-beda kengasupen budakna. Emaka berena lima talenta man budak si pertama, dua talenta man budak si peduaken, ras sada talenta man budak si peteluken. Kerja keras budak si pertama ras si peduaken janah datna untung. Tapi budak si peteluken, la pakena sen si enggo alokenna, emaka pecat tuanna ia.

8. Bas perumpaman e, engkai maka banci meriah ukur budak si pertama?

 ⁸ Pasti meriah kel ukur budak si pertama perban alokenna lima talenta arah tuanna. Mbue kel sen e, janah e mbuktiken maka tek kel tuanna man bana. Tapi uga kerna budak si peduaken? Situhuna banci nge kitik ukurna perban talenta si alokenna la seri buena bagi si aloken budak si pertama. Tapi kai nge si lakokenna?

9. Kai nge si la iceritaken Jesus kerna budak si peduaken? (Matius 25:22, 23)

⁹ Baca Matius 25:22, 23. La lit kataken Jesus maka budak si peduaken e merawa perban dua talenta ngenca si alokenna. Labo ka lit kataken Jesus maka jungut-jungut budak e janah nina, ‘Engkai maka asenda ngenca kudat? Padahal aku pe enggo kerja keras bagi budak si ngaloken lima talenta e. Adi labo ergai tuanku aku, pangen kukuburken senna e, nce kuurus urusenku.’

10. Kai si lakoken budak si peduaken nandangi talenta si alokenna?

¹⁰ Budak si peduaken pe angkana maka tugas si bere tuanna e penting janah kerja keras ia ngelayani tuanna, bali bagi budak si pertama ndai. Hasilna, bere tuanna dua talenta nari man bana. Upahi tuanna kerja keras budak e. Meriah ukur tuanna janah berena ia terbuen tanggung jawap.

11. Uga carata mpebelin keriahen ukurta?

¹¹ Bage ka pe, banci reh riahna ukurta adi tutus ateta ngelakoken tugas kai pe bas ngelayani Jahwe. Emaka ‘sibuklah’ kita erberita si meriah bage pe bas kegiaten runggun. (Perb. 18:5; Heb. 10:24, 25) Persiapkenlah alu mehuli bahan-bahan  guna perpulungen gelah banci berekenndu komentar si mpegegehi. Seriuslah kam ngelakoken tugas si alokenndu bas perpulungen tengah pekan. Adi lit tugas tertentu si ibereken man bandu, dungilah bas waktu si enggo itetapken janah buktiken maka banci kam iandalken. Penting min akapndu tugas kai pe si alokenndu, ula kam merudu-rudu ngelakokenca ntah pe gelah enggo saja. Usahakenlah reh ulina bas ngelakoken tugasndu. (Kua. 22:29) Adi reh tutusna atendu ngelakoken tugas si enggo bere Jahwe, reh rembakna me kam ras Ia janah reh riahna ukurndu. (Gal. 6:4) Alu bage, reh nukahna akapndu ermeriah ukur sanga lit kalak si ngaloken tanggung jawap si arapkenndu.​—Rom. 12:15; Gal. 5:26.

12. Kai nge si nampati Melissa ras Nick gelah ermeriah ukur?

¹² Ingetndu denga nge Melissa si iceritaken ndai bas paragrap 2, si merhat ngelayani i Betel ntah pe ikut bas Sekolah man Perberita Kerajan? Amin pe lenga banci datna sura-surana e, bagenda nina, “Kulakoken si mehulina bas pelayanenku selaku perintis janah kucubaken erbage-bage cara bas erberita. Enda erban reh riahna ukurku.” Selain si e, kai nge si lakoken Nick sanga kecewa ia perban la ilantik jadi sinampati runggun? Bagenda nina, “Tutus ateku ngelakoken kai si banci kulakoken, bagi erberita ras mereken komentar si mpegegehi bas perpulungen. Kuisi ka formulir guna ngelayani bas Betel, nce setahun kenca si e ngelayani aku i Betel.”

13. Kai hasilna adi tutus atendu ngelakoken tugasndu si gundari? (Pengerana 2:24)

¹³ Adi tutus atendu ngelakoken tugasndu gundari, enggo nge pasti datndu terbuen tanggung jawap? Banci saja, bage me si terjadi man Nick. Tapi bicara lang pe, banci reh belinna keriahen ukurndu bas ngelayani Jahwe bali bagi Melissa. (Baca Pengerana 2:24.) Selain si e, banci meriah ukurndu perban tehndu enggo banndu meriah ukur Tuanta, Jesus Kristus.

14. Banci denga nge silakoken terbuen bas ngelayani Jahwe, amin pe gundari enggo silakoken si mehulina?

¹⁴ Adi enggo silakoken si mehulina bas ngelayani Jahwe gundari, banci denga nge siusahaken ngelakoken terbuen bas ngelayani Ia? Banci. Banci siban cita-cita rohani si nampati kita gelah reh ulina bas erberita ras ngajar, janah reh rusurna sisampati turang seninata. Banci sidat cita-cita e adi siutamaken kepentingen kalak si deban asangken kepentingenta.​—Kua. 11:2; Perb. 20:35.

15. Kai saja cita-cita rohani si banci nampati kam mpebelin keriahen ukurndu?

¹⁵ Kai nge cita-cita rohani si banci banndu? Pindolah man Jahwe gelah sampatiNa kam erban cita-cita si ngasup kam ndatkenca. (Kua. 16:3; Jak. 1:5) Banci usahakenndu ndatken salah sada cita-cita rohani si ibahas bas  paragrap 1 ndai. Misalna jadi perintis ekstra, perintis biasa, ngelayani i Betel, erdahin bas bagin pembangunen organisasi, mpelajari bahasa si deban, ntah pe lawes erberita ku ingan si deban. Banci ka pelajarindu piga-piga cita-cita rohani bas buku Diorganisasi untuk Melakukan Kehendak Yehuwa pasal 10. Banci ka cakapkenndu kerna si e ras pertua bas runggun. * Adi usahakenndu  ndatken cita-cita rohani ndai, banci idah kalak si deban maka enggo maju kam secara rohani janah keriahen ukurndu pe reh belinna.

16. Kai si banci lakokenndu adi keadanndu erban kam la banci ndatken cita-cita rohani tertentu?

¹⁶ Tapi uga adi keadanndu erban kam la banci ndatken cita-cita rohani bagi si ikataken ndai? Silang-langna usahakenlah erban sada cita-cita rohani si banci datkenndu. Mari sibahas piga-piga contohna.

17. Menurut 1 Timotius 4:13, 15, kai si banci ilakoken turang senina si dilaki gelah reh ulina carana ngajar?

¹⁷ Baca 1 Timotius 4:13, 15. Adi kam sekalak dilaki si enggo iperidiken, banci usahakenndu gelah reh ulina carandu mpeseh khotbah ntah pe carandu ngajar. Engkai? Perban adi usahakenndu reh ulina sanga mbaca, sanga khotbah ras ngajar, reh buena manpaat si idat kalak si megiken kam. Banlah cita-cita guna mpelajari ras ndalanken petunjuk si lit bas brosur Tutuslah Atendu i bas Mbaca ras Ngajar. Benakenlah alu mpelajari sada petunjuk janah rajinlah kam latihen i rumah, jenari dalanken si pelajarindu e sanga kam mpeseh khotbah. Pindolah saran arah penasehat ekstra ntah pe pertua-pertua “si kerja keras bas mpeseh ras ngajarken kata Dibata.” * (1 Tim. 5:17) Si perlu perdiatekenndu labo saja cara makeken petunjuk si lit bas brosur e, tapi perlu ka ukurindu uga cara mpegegehi kiniteken kalak si megiken kam ras ngiahken kalak e ndalanken kai si pelajarina. Alu ngelakoken si e, reh belinna me keriahen ukurndu ras kalak si megiken kam.

18. Kai si banci silakoken gelah reh beluhna kita bas erberita ras ngajar?

 ¹⁸ Kerina kita lit tugasta erberita ras njadiken murid. (Mat. 28:19, 20; Rom. 10:14) Merhat nge kam reh ulina bas ngelakoken pendahin si penting e? Pelajarilah brosur Ngajar, kenca si e banlah cita-cita si banci nampati kam ndalanken kai si pelajarindu. Banci ka datndu penampat si erguna arah Agenda Perpulungen Pelayanen ras Kegeluhen Kristen ntah pe arah video-video contoh percakapen si iputar bas perpulungen tengah pekan. Cubakenlah erbage-bage cara e guna ndatken hasil si mehulina. Alu ndalankenca, reh ulina me kam bas erberita janah reh belinna keriahen ukurndu.​—2 Tim. 4:5.

19. Kai si banci lakokenndu gelah reh ulina sipat-sipatndu?

¹⁹ Ula kam lupa maka salah sada cita-cita rohani si pentingna eme mpehuli sipat-sipatndu gelah meriah ukur Dibata. (Gal. 5:22, 23; Kol. 3:12; 2 Pet. 1:5-8) Uga carandu ndatken cita-cita e? Contohna, katakenlah pepaguhndu atendu kinitekenndu. Adi bage, perlu bacandu artikel-artikel si lit bas publikasita si mereken saran-saran si banci mpepaguh kinitekenndu. Banci ka datndu manpaat adi tontonndu bagin arah JW Broadcasting^®, si nceritaken uga turang seninata banci tetap paguh kinitekenna amin pe ngadapi melala tentangen. Kenca si e, ukuri cara si apai si banci usihndu guna mpepaguh kinitekenndu.

20. Kai si banci silakoken gelah reh belinna keriahen ukurta ras la nukah kitik ukurta?

²⁰ Kerina kita pasti merhat mereken terbuen bas ngelayani Jahwe. Bas doni si mbaru pagi, banci sibereken kerina si lit bas kita guna ngelayani Dibata. Tapi, adi silakoken si mehulina gundari, banci erban reh belinna keriahen ukurta ras la nukah kitik ukurta. Si pentingna ka, banci simuliaken janah sipuji Jahwe ‘Dibatata si ermeriah ukur.’ (1 Tim. 1:11) Emaka, ermeriah ukurlah kita ndalanken tugasta si gundari!