1. Aval avé abui bebo bisaé be Yéhôva da jeñe na e nene ésaé ba bo nye?

 ÉSAÉ ya bo ja jembane ki ékôane Yéhôva melu ma su’ulane ma. (Mt. 24:14; Luc 10:2; 1 P. 5:2) Bia bese bia kômbô bo Yéhôva ésaé a ngule jangan ése. Abui bobejañ da ve ngule ya nene ésaé nkañete jap. Ba béziñe ba kômbô nyoñ ésaé nkpwa’a mefan. Bevo’o ki ba kômbô saé Béthel, nge nyoñ ngap a ésaé melôñ ékôane Yéhôva ja bo. Wôna, abui bobejañ afe ki da ve ngule na be bo bediakon a bemvendé. (1 Tim. 3:1, 8) Yéhôva a ne njalan a mevak éyoñ a yen abim avé bebo bisaé bé be bili nkômbane ya bo Nye ésaé!​—Bs. 110:3; És. 6:8.

2. Bi ne wô’ôtan aya nge bia kate tôé minsôñan miziñ?

² Éko éziñ bi boya mimbu mimbu bi jeñe’e na bi tôé nsôñan éziñ, ve teke ndoñ. Nalé a ne bo na bi bili atek. E ne fe kui na ôkala wongan nge ki mame mefe me kamane bia na bi be’e mimbe’e miziñ ékôane Yéhôva. (Min. 13:12) Melissa a nga tebe été éte. * A mbe a yi na a saé Béthel, nge ke na a tabe Sikôlô bekañete mbamba foé ya Éjôé. Ve a jô na: “Me nji beta bi ôkala ya bo mame mete. Minsôñane mite mise mi keya fo’o ma abo si. Jam ete e wô’ô bo na me bili ate’e biyoñe biziñ.”

3. Mame mevé bobejañ béziñ ba yiane bo asu na be be’e mimbe’e akônda?

³ Bisoé biziñ, bi kusa bo mvo’é minsôn, bia yiane taté yaé nsisim, a bi mefulu méziñ ôsusua na ba ve be mimbe’e  mife. Éve’an é ne na, ô ne yen ésoé éziñ é to atyeñ, ôdidi’i, é bili fe éva’a ya bo bisaé. Ve e ne sili na a tu’a bo ôjibi, ésemé, a na a bo teke bo ôjeja’a éyoñ ba ve nye ésaé. Nge wo ve ngule na ô bi mbamba mefulu ma jembane wo, ô ne teme be nga ve wo mimbe’e éyoñ ô nji bunan. Bi tame zu yene jam e nga kui Nick. Éyoñ a nga yene na a biya mimbu 20, be teke nye telé diakon akônda, nlem ô nga taé nye angôndô ya abui. A jô na: “Me nga simesane na ma me ne ajô.” Ve Nick a nji sili mo si. A nga ve ngule na a bo bisaé bise a mbe ngule ya bo akônda. Den, a ne mojañ wua ya ba ba wulu ésaé ya Béthel.

4. Jé bia zu yen ayé’é di?

⁴ Ye wo wô’ô womien éngôngol amu wo kate tôé minsôñane miziñ ya nsisim? Nge e ne nalé, kate’e de Yéhôva. (Bs. 37:5-7) Ô ne fe sili bitôtôlô Bekristene biziñ na bi kate wo mimfa’a mivé wo yiane beta ve ngul, mvuse ya valé, jeñe’e na ô tôñe mbamba melebe bé ve wo. Nge ô bo de, ô ne tôé nsôñane wôé môs éziñ. Nde fe, aval e nga kui Melissa bia te jôô nye yôp, bi ne fe bo teke tôé mbamba nsôñane wongan môs éziñ. Nde ñhe, aval avé ô ne ba’ale ava’a dôé? Asu na bi bi éyalane ya nsili ôte, ayé’é di da zu liti bia (1) jam e ne so bia mevak, (2) avale bi ne nene ava’a dangan, a (3) avale minsôñan e ne ve bia abui mevak.

5. Jé bia yiane bo asu na bi bi mevak? (Écclésiaste 6:9)

⁵ Écclésiaste 6:9 a liti bia jam e ne volô bia na bi bi avak. (Lañe’e.) Môt a bu’ubane “jôm a yen a mis” éyoñ a vak a abim a bili, to’o a tele été évé. Ve môt a tôñesane minkômbane mié a ke ôsu ve nyamete biôm a vo’o bi. Jé nalé a ye’ele bia? Asu na bi bi mevak, bia yiane beme mise mangan mame bi bili, a minsôñane bi ne ngule ya tôé.

6. Nkana ôvé bia zu yen, a jé wo zu ye’ele bia?

⁶ Ye môt a ne fo’o kôme vak a abime biôm a bili? Abui bôte dé yalane na momo, amu bia bese bia nye’e bi bili mimfefé mi biôm. Ve nya ajôô a ne na, bi ne ngule ya bu’ubane mam bi bili éyoñ ji. Aval avé bi ne bo de? Bia zu yene nkana betalent bia koone wô kalate Matthieu 25:14-30 asu na bi bi éyalane ya nsili ôte. Nkana ôte wo zu ye’ele bia avale bi ne yene mevak bibotane bi bili éyoñ ji.

7. Nkana betalent wo kobô ajô jé?

⁷ Nkana betalent wo kobô ajô môt a mbe a za’a ke dulu. Ôsusua na a ke, a nga loone bebo bisaé bé a kabe be betalent na be li’i be bo’o makit, a fulu akume dé. * Mbôle a mbe a yeme’e na bese be nji bi abime ngule da, a nji ve bese abime betalent da. A nga ve nyi ôsu betalent betan, nyi baa betalent bebaé, nyi lale talent wua. Mbo ésaé ôsu a nyi baa be nga saé a ngul ése asu na masa wop a bi abui moné. Ve mbo ésaé lale a nji bo ésaé be nga li’i be, ane masa wé a nga titane nye.

8. Jé é mbe ve bo na mbo ésaé ôsu a vak?

⁸ Mbo ésaé ôsu a nga yiane wô’ô mvaé éyoñe masa wé a nga ve nye betalent  betan. Masa wé a nga ve fo’o nye abui moné, a nalé a mbe a liti’i abim avé a nto nye ndi. Ve mbo ésaé baa ki? A mbe ve wô’ô émien éngôngol amu a nji bi abime betalent mbo ésaé ôsu a nga bi. Jé a nga bo ñhe?

9. Jé Yésus a nji jô a lat a mbo ésaé baa? (Matthieu 25:22, 23)

⁹ Lañe’e Matthieu 25:22, 23. Yésus a nji jô na mbo ésaé baa a nga wô’ô ôlun amu be nga ve nye ve betalent bebaé, nge na a nga ke a kobô menyiñ a jô’ô na: ‘Amu jé abime di étame nde ba te ma ve? Nga ma fe me ne éwôlô mbo ésaé aval ane nyi a te bi betalent betan? Nge masa wom a nye’e ke ésaé ma bo, ma fe me ne ke jame betalent bé bebaé ba si, a ke ôsu a bo mame mam.’

10. Jé mbo ésaé baa a nga bo a betalent be nga ve nye?

¹⁰ Aval ane mbo ésaé ôsu, mbo ésaé baa a nji nyoñ ésaé masa wé a nga ve nye éngbwemese. Ajô te, a nga kui na a bi betalent bebaé befe. Mbo ésaé ate a nga su’ulane bi ma’an amu mbamba ésaé a nga bo. Ane ô vaa na masa wé a nga wô’ô mvaé, a nga yene fe na a yiane mimbe’e mife.

11. Aval avé bi ne nene avak dangan?

¹¹ Aval ete da da, bia fe bii bi mevak nge bia bo ésaé ése Yéhôva a ve bia a nlem ôse. Ajô te, bulu’ bo ésaé nkañete a nyoñe ngap bisaé bise bia boban akônda dôé. (Mam 18:5; Beh. 10:24, 25) Kôme’e kômesane bisulane bise, ndembene wé ve mbamba biyalan.  Éyoñe ba ve wo ésaé ésulane ya zañe sondô, tuka’a kômesane je. Nge be jô wo na ô bo ésaé éziñ ya akônda, te jañele éyoñ, bo’o avale môte be ne tabe de ndi. Te simesane na ésaé éziñ ba ve wo akônda é nji bo mfi, a na ô nji yiane wu nju’u ya bo je. Jeñe’e na ô tu’a yeme bo ésaé ése ba ve wo. (Min. 22:29) Nge wo ve ngule ya bo bisaé bise ba ve wo a nlem ôse, wé yaé nsisim avôl, a élate mia Yéhôva jé tu’a bo ngul. (Beg. 6:4) Nalé é volô fe wo na ô vak éyoñe bôte bevo’o ba bi mimbe’e ô nga jaé yi na be ve wo.​—Bero. 12:15; Beg. 5:26.

12. Jé Melissa ba Nick be nga bo asu na be nene ava’a dap?

¹² Ye ô ngenan ô simesa’ane Melissa, sita a mbe a kômbô’ô ke saé Béthel, a tabe Sikôlô bekañete mbamba foé ya Éjôé? Akusa bo a nji kui na a tôé minsôñane mite, a jô na: “Ma jeñe na me bo ésaé nkpwa’a mefan jam nya mboone, a ve’ele befatane bekañete bese. Jam ete e nga soo ma abui mevak.” Nick ki a nga bo aya éyoñ a yeneya na ba telé ke nye diakon? A jô na: “Me nga bem ôsimesane wom mame me mbe ngule ya bo, aval ane ésaé nkañete. Me nga jeñe fe na me bo me va’a mbamba biyalane bisulan. Me nga jalé fe afeb asu na me ke su’u ésaé ya Béthel, nde be nga loone ma mbu ô nga tôé valé.”

13. Ma’ane mevé wé bi nge wo bo bisaé ba ve wo dene nya mboone? (Écclésiaste 2:24)

¹³ Nge wo bo ésaé ba ve wo dene nya mboone, ye nalé a tinane na, teke vaa nge beté bé ve wo beta mimbe’e melu ma zu? E ne kui nalé avale nkañete Nick wo liti bia, e ne fe bo te kui. Ve aval ane Mélissa, bi ne ke ôsu a yen avak ésaé bia bo Yéhôva. (Lañe’e Écclésiaste 2:24.) Wo ye bi abui mevak amu wo yeme na masa wongan, Yésus Krist, a wô’ô ésaé wo bo mvaé.

14. Jé bia yiane ba’ale ôsimesan éyoñ bi bili minsôñane ya nsisim?

¹⁴ Nge bia bo ésaé be nga ve bia dene nya mboone, ye nalé a tinane na bi nji yiane beta jeñe na bi nene ésaé bia bo Yéhôva? Teke jôm! Bia yiane jeñe na bi bi minsôñane ya nsisim mia volô bia na bi bo bitôtôlô bekañete mbamba foé, mintyetyeñe beye’ele Kalate Zambe, a na bi volô bobejañ a besita bangan. Bii kui na bi tôé minsôñane mite nge nkômbane wongan ô ne na bi saane bôte bevok, sake na bi telé miñyiane miangan ôsu.​—Min. 11:2; Mam. 20:35.

15. Minsôñane mivé mi ne bo na bi tu’a nene ava’a dangan?

¹⁵ Minsôñane ya nsisim mivé ô ne bi? Ô ne sili Yéhôva mvolan asu na ô yeme minsôñan ô ne ngul ya tôé. (Min. 16:3; Jc. 1:5) Ô ne jeñe na ô tôé nsôñane wua ya mi bia te jôô mie  abeñ ôsu ya ayé’é di, aval ane e bo nkpwa’a mefan, e ke saé Béthel, nge ke e su’u bisaé melôñe ya ékôane Yéhôva. Ô ne fe yé’é nkobô ôfe asu na ô kañete bôte ba kobô ki nkobô wôé. Kalate Organisés pour faire la volonté de Jéhovah kabetôlô 10, a ne volô wo na ô yem aval avé ô ne tôé minsôñane mite. * Ô ne fe ke laan a bemvendé. Nté wo jeñe na ô tôé avale  minsôñan ete, bôte bese bé yene na wo yaé nsisim, a meva’a môé mé fuluku.

16. Jé ô ne bo nge wo kate tôé minsôñane miziñ?

¹⁶ Ve jé ô ne bo nge ô nji bo ngule ya tôé minsôñane bia te yen ayé’é di éyoñ ji? Jeñe’e nsôñan ôfe wo yeme na ô ne ngule ya tôé. Tame yene minsôñane mite.

17. Bela’ane 1 Timothée 4:13, 15 na ô liti jame mojañ a yiane bo asu na a bo mbamba ñye’ele.

¹⁷ Lañe’e 1 Timothée 4:13, 15. Ye ô ne fam? Nge ô dubaneya, wôna ô ne jeñe na ô bo ntyetyeñe ñye’ele Kalate Zambe. Amu jé wo yiane bo de? Amu, éyoñe wo ‘ve womien ngumba mfa’a ya’ ñye’elan, nlañan, nkañetane mbamba foé, nje wé tu’a volô bôte ba vô’ôlô wo. Jeñe’e na ô yé’é, a na ô tôñe ñye’elan ôse ya nsoé kalate Bo’o atyeñ mfa’a ya nlañan a ñye’elan. Te jeñe na ô tôñ abui minlô mejô éyoñe jia. Nyoñe’e nlô ajô wua, bo’o besisia nda jôé, a tôñe mame wo te yé’é été éyoñ ô bili na wo bo nkañete. Ô ne fe sili mvee melebe ya akônda mvolan, nge ke bemvendé befe ba “bo ésaé ya kate bôte mejô me Zambe a ye’ele [me]” a ayôñ ese. * (1 Tim. 5:17) Te jeñe ve na ô tôñe miñye’elane ya nsoé kalate ôte, jeñe’e fe na ô yemete mbunane bôte ba vô’ôlô wo, nge ke na ô ve be nkômbane ya bo jame wo ye’ele be. Nge ô bo nalé, wé nene ava’a dôé a di bôte bevok.

18. Jé é ne volô bia na bi tôé minsôñane miangan a lat a ésaé nkañete?

¹⁸ Bia bese bi bili mbe’e ya kañete a bo bôte beyé’é. (Mt. 28:19, 20; Bero. 10:14) Ye wo kômbô tu’a bo atyeñ ésaé  nkañete? Nté wo yé’é nsoé kalate ô ne nlô ajô na Nlañan a ñye’elan, Jeñe’e mezene me ne volô wo na ô tôñe mame wo te yé’é été. Ô ne fe bi mbamba melebe nsoé kalate Ényiñe Kristen a ésaé nkañete jangan, a bive’ela bia lôte bevidéo ya ésulane ya zañe sondô. Bela’ane bive’ela bite a yene bi bia wume mbamba bibuma abôta nkañete dôé. Nge ô bo de, wé bo mbamba ñye’ele, éwôlô nkañete mbamba foé, a bi abui mevak.​—2 Tim. 4:5.

19. Aval avé bi ne bi mbamba mefulu?

¹⁹ Te vuane na Kristen ése ja yiane bi nsôñane ya bi mefulu ma ve Yéhôva nlem avak. (Beg. 5:22, 23; Beco. 3:12; 2 P. 1:5-8) Jé ô ne bo asu na ô tôé nsôñan ôte? Bi tame jô na wo kômbô bi ngule mbunan. Wé lañe minlô mejô ya bekalate bangane mia ve melebe mfa’a ôte. Ô ne fe yene minkañete mi bobejañ a besita be nga ke ôsu a kañe Yéhôva akusa bo meve’ele Télé Bengaa be Yéhôva. Mvuse ya valé, jene’ aval avé ô ne vu mbunane wop.

20. Jé é ne bo na bi bi mevak a na te bia biasé ésaé bia bo Yéhôva?

²⁰ Teke bisô na môt ase ya be bia a kômbô bo Yéhôva ésaé adañ abim a bo den. Ve bia yeme na mfefé émo, bii kôme bo Yéhôva ésaé nnôm éto mevak été. Nté bia yange môs ôte, nge bia ke ôsu a bo Yéhôva ésaé a ngule jangan ése, bii bi mevak, a bia ye ke wô’ôtane na ésaé bia bo nye é ne zezé. Jame da dañ e ne na, bii ve Yéhôva duma, Zambe ya mevak. (1 Tim. 1:11) Nde ñhe, nkelan ôsu a yen avak ésaé ése bia bo Yéhôva.