1. How adaz di chrai du moa eena Jehoava servis?

 WEE ga wahn lata werk fi du bikaaz Jehoava wahn soon dischrai dis wikid sistem. (Mach. 24:14; Look 10:2; 1 Peet. 5:2) Aala wee waahn serv Jehoava az moch az wi kud. Lata bradaz ahn sistaz di chrai du moa eena di minischri. Som a dehn waahn serv az painyaaz. Adaz waahn serv da Betel er dehn waahn help eena di difrent kanschrokshan proajek. Ahn dehn ga wahn lata bradaz weh di werk haad soh dat dehn ku kwalifai fi bee wahn ministeeryal servant er elda. (1 Tim. 3:1, 8) Jehoava veri hapi wen ih si how fi hihn peepl wilin fi serv ahn!—Ps. 110:3; Isa. 6:8.

2. How wi mait feel if wi noh reech som a wi spirichwal goalz?

² If sohn taim don paas ahn wi noh reech wi spirichwal goalz, wi ku staat tu feel diskorij. Er maybi bikaaz a wi ayj er ada serkomstans, wi kyaahn du moch ahn dat ku mek wi feel diskorij tu. (Prov. 13:12) Dis da how Melissa feel. * Shee wuda lov fi serv da Betel er goh da di Skool fi Kingdom Ivanjelaizaz, bot dis da weh shee seh: “Ai don tu oal fi dat. Ai ku onli jreem bowt dehndeh kaina asainment. Sohntaim dat mek Ah feel reeli diskorij.”

3. Weh adaz mait need fi du fi kwalifai fi wahn privilij?

 ³ Dehn wan weh yong ahn helti mait need fi werk pahn difrent kwalitiz soh dat dehn ku kwalifai fi moa privilij eena Jehoava servis. Fi egzampl, som a dehn mait bee smaat, dehn ku mek gud disizhanz, ahn dehn eega fi werk. Bot dehn mait need fi laan fi bee payshent, du dehn werk gud, ahn rispek adaz. If yu foakos ahn werk pahn di kwalitiz weh yu need, di bradaz mait gi yu wahn rispansabiliti wen yu lees ekspek it. Noatis weh mi hapm tu Nick. Wen hihn mi 20 yaaz oal, hihn mi geh diskorij bikaaz dehn neva apoint hihn az wahn ministeeryal servant. Hihn seh, “Ai mi feel laik sohnting mi rang wid mee.” Bot Nick neva giv op. Hihn mi du ih bes eena di kangrigayshan an eena di minischri. Tudeh, hihn di serv az wahn memba a di Branch Komiti.

4. Weh wi wahn diskos eena dis aatikl?

⁴ Yoo eva feel diskorij bikaaz yu noh reech wan a yu spirichwal goalz? If dat da how yoo feel, pray tu Jehoava ahn tel ahn how yu feel. (Ps. 37:5-7) Pahn tap a dat, yu ku aks spirichwali machoar bradaz ahn sistaz eena di kangrigayshan fi help yu si how yu ku du beta eena yu servis tu Jehoava. Den, chrai yu bes fi fala di advais weh dehn gi yu. If yu du dat, yu mait en op di geh di privilij weh yu mi waahn er yu mait reech yu goal. Bot laik Melissa, weh wi mi menshan erliya, yu mait noh bee aybl fi du weh yu wuda waahn du fi Jehoava now. Soh den, weh yu ku du fi kip yu jai? Fi fain di ansa tu da kweschan, dis aatikl wahn diskos (1) weh ku gi yu jai, (2) how yu ku geh moa jai, ahn (3) weh kaina goalz yu ku set soh dat yu ku ga moa jai.

5. Weh wi shuda tink bowt soh dat wi ku ga jai? (Ecclesiastes 6:9)

⁵ Ecclesiastes 6:9 * help wi fi andastan weh ku help wi fi ga jai. (Reed.) Wahn persn weh foakos “pahn weh [ih] aiy si” hapi wid weh ih gat ahn weh ih ku du akaadn tu ih serkomstans. Pahn di ada han, wahn persn weh kip aan “di chays afta weh [ih] waahn” wahn neva bee hapi. Weh wi ku laan fahn dis? Fi mek wi ku ga jai, wi shuda foakos pahn weh wi gat ahn noh pahn di tingz weh wi noh gat.

6. Wich iloschrayshan wi wahn diskos, ahn weh wi wahn laan fan it?

⁶ Yu tink ih pasabl fi mek wi bee hapi wid di tingz weh wi gat? Lata peepl tink ih noh pasabl bikaaz wi laik laan how fi du nyoo tingz. Bot ih akchwali pasabl. Wee ku reeli injai di tingz weh wi gat ahn bee hapi. How wi ku du dat? Mek wi diskos di iloschrayshan a di talents weh Jeezas mi taak bowt da Machyu 25:14-30. Wi wahn laan how fi ga jai an aalso how fi ga moa jai wid di tingz weh wi gat now.

7. Pleez eksplayn Jeezas iloschrayshan bowt di talents.

⁷ Eena di iloschrayshan, wahn man mi gwehn pahn wahn lang chrip. Bifoa ih lef, ih kaal ih slayv dehn an ih gi eech wan a dehn sohn talents soh dat dehn ku du bizniz. * Di man mi noa dat ih slayv dehn difrent fahn eech ada, soh ih mi gi faiv talents tu di fers wan, too talents tu di sekant wan, ahn wan talent tu di terd  wan. Di fers too slayv mi werk haad soh dat dehn ku mek moa moni fi dehn maasta. Bot di terd slayv neva du notn wid di moni weh ih mi get, soh ih maasta mi let ahn goh.

8. Wat ku bee wahn reezn wai di fers slayv eena di iloschrayshan mi hapi?

⁸ Di fers slayv mosi mi veri hapi dat ih maasta mi chros ahn wid faiv talents. Dat da-mi wahn lata moni, an ih mi shoa dat ih maasta mi chros ahn wahn lat! How bowt di sekant slayv? Hihn kuda mi feel diskorij bikaaz hihn neva geh di saym amonk a talents laik di fers slayv. Bot weh hihn mi du?

9. Weh Jeezas neva seh bowt di sekant slayv? (Machyu 25:22, 23)

⁹ Reed Machyu 25:22, 23. Jeezas neva seh dat di sekant slayv mi geh beks ahn feel ofendid bikaaz ih mi onli geh too talents. Ahn Jeezas neva seh dat di slayv komplayn ahn seh: ‘Dis da aal dehn gi mee? Wai mai maasta neva gi mee di saym amonk a talents weh ih gi di fers slayv? If mai maasta tink Ai da noh wahn gud werka, den Ah wahn beri mai too talents ahn werk fi miself ahn noh fi hihn!ʼ

10. Weh di sekant slayv mi du wid ih talents?

¹⁰ Jos laik di fers slayv, di sekant slayv mi tek ih rispansabiliti seeryos an ih mi werk haad fi serv ih maasta. Bikaaz a dat, hihn mi werk haad fi mek too moa talents, soh ih mi en op wid foa talents. Di maasta mi riwaad di slayv fi aala ih haad werk an ih mi prayz ahn, an giv ahn moa rispansabiliti!

11. How wee ku geh moa jai?

 ¹¹ Sayhn way soh, wee ku geh moa jai wen wi foakos pahn weh wi kud du fi Jehoava. Werk haad fi “yooz aala [yu] taim” eena di minischri ahn du yu bes fi du moa eena di kangrigayshan. (Aks 18:5; Heeb. 10:24, 25) Pripyaa fi di meetin dehn soh dat yu ku giv inkorijin koments. Du yu bes eena yu asainments fi di midweek meetin. If dehn aks yu fi help wid sertn tingz eena di kangrigayshan, chrai yu bes fi du tingz pahn taim ahn shoa dat adaz ku pen pahn yu. Noh feel laik eni a di asainment dehn weh yu geh noh impoatant er dat yu noh need fi spen moch taim di du dehn. Chrai si how yu ku du beta ahn beta. (Prov. 22:29) If yu kip di werk haad ahn du yu bes fi Jehoava, yu frenship wid hihn wahn geh schranga ahn yu wahn ga moa jai. (Gal. 6:4) Yu wahn aalso fain it eeziya fi bee hapi wen adaz geh wahn privilij weh yoo mi waahnt.—Roam. 12:15; Gal. 5:26.

12. Weh mi help Melissa ahn Nick fi ga moa jai?

¹² Memba Melissa, di sista weh mi waahn goh serv da Betel er goh da di Skool fi Kingdom Ivanjelaizaz? Eevn doa ih neva pasabl fi mek shee reech dehnya goal, shee seh: “Ah di painyaa, soh Ah chrai mi bes fi deh eena di minischri aal di taim, an Ah chrai fi tek paat eena di difrent wayz fi du di preechin werk. Bikaaz a dis Ah ga lata jai.” Ahn weh mi help Nick wen hihn mi feel diskorij bikaaz ih neva geh apointid fi bee wahn ministeeryal servant? Hihn seh: “Ah mi foakos pahn di ting dehn weh Ah kuda mi du, soh Ah mi du mi bes eena di minischri an Ah mi chrai gi sohn inkorijin koments da di meetin dehn. Ah mi aalso aplai fi goh serv da Betel ahn dehn aksep mi di neks yaa.”

13. How yu wahn benifit if yu foakos pahn di asainment dehn weh yu ga rait now? (Ecclesiastes 2:24)

¹³ If yu foakos pahn di asainment weh yu ga rait now, yu tink yu wahn geh moa rispansabiliti eena di fyoocha? Dat kud hapm, jos laik weh mi hapm tu Nick. Bot if nat, jos laik Melissa, yu ku stil ga lata jai ahn yu ku bee hapi wid weh yu ku du fi Jehoava now. (Reed Ecclesiastes 2:24.) * Pahn tap a dat, yu wahn ga moa jai bikaaz yu noa dat yu Maasta, Jeezas Krais, hapi wid weh yu di du.

14. Weh wi shuda kip in main wen wi di tink bowt wi spirichwal goalz?

¹⁴ If wi di foakos pan di asainment weh wi ga rait now, yu tink ih meen dat wi shuda stap luk fi wayz fi du moa fi Jehoava? Non ataal! Wi shuda aalwayz set goalz weh wahn help wi fi du beta eena wi minischri ahn weh wahn help wi bradaz ahn sistaz. Wi wahn ga sokses eena di goalz weh wi set if wi foakos pahn serv adaz insteda foakos pahn wiself.—Prov. 11:2; Aks 20:35.

15. Wat da sohn goalz weh ku help yu ga moa jai?

¹⁵ Weh kaina goalz yu ku werk pan? Aks Jehoava fi help yu si weh kaina goalz yu ku werk pan ahn weh yu ku reech. (Prov. 16:3; Jay. 1:5) Yu tink yu ku werk pan di goal weh di  fers paragraaf eena dis aatikl mi menshan​—fi bee wahn agzilari painyaa er wahn regyula painyaa, fi serv da Betel, er fi help pahn wahn kanschrokshan proajek? Er maybi yu ku laan  wahn nyoo langwij er goh preech da wahn neks ayrya. Yu ku laan moa bowt dis eena chapta 10 a di buk Organized to Do Jehovahʼs Will ahn yu ku taak wid yu eldaz eena yu kangrigayshan. * Az yu di werk haad fi reech yu goalz, adaz wahn si dat yu di mek proagres ahn dat wahn mek yu hapiya.

16. Weh yu ku du if yu kyaahn reech wahn spesifik goal rait now?

¹⁶ Bot wat if yu kyaahn reech wan a di goalz weh wi mi menshan erliya? Set wahn neks goal weh yu kud reech. Mek wi luk pahn sohn egzamplz.

17. Akaadn tu 1 Timoti 4:13, 15, how wahn brada ku werk tuwaadz di goal fi bee wahn beta teecha?

¹⁷ Reed 1 Timoti 4:13, 15. If yoo da wahn baptaiz brada, yu mait waahn werk haad fi bee wahn beta speeka ahn teecha. Wai? Bikaaz if yu werk haad fi bee wahn beta reeda, speeka, ahn teecha, den dehn wan weh lisn tu yu wahn benifit. Chrai set di goal fi stodi an aplai eech wan a di stodi point weh deh eena di Laan fi Reed ahn Teech Beta broashoar! Stodi dehn wan at a taim, mek shoar yu praktis, ahn chrai aplai weh yu laan eena eni taak asainment weh yu get. Aks fi sojeshanz fahn di agzilari kongsla er ada eldaz “weh werk haad fi taak bowt di werd a Gaad ahn teech it.” * (1 Tim. 5:17) Noh onli foakos pahn weh yu andastan fahn di broashoar, bot chrai help dehn wahn weh di lisn tu yu fi schrentn dehn fayt an inkorij dehn fi  aplai weh dehn di laan eena di tingz weh dehn du. Wen yu du dat, aala unu wahn feel hapiya.

18. Weh ku help wi fi reech wi goalz eena di minischri?

¹⁸ Aala wi ga di asainment fi preech ahn mek disaiplz. (Mach. 28:19, 20; Roam. 10:14) Yu tink yu wuda laik fi du beta eena dis impoatant werk? Stodi di Reed ahn Teech broashoar, ahn set goalz weh wahn help yu fi aplai weh yu di laan. Yu ku eevn geh moa sojeshanz fahn Wi Kristyan Laif ahn Minischri Meetin Werkbuk ahn di sampl kanvasayshan veedyo dehn weh dehn shoa da di midweek meetin dehn. Chrai di difrent sojeshanz fi si weh werk bes fi yoo. Wen yu du dat, fi shoar yu wahn ekspeeryens di jai fi bee wahn beta teecha.—2 Tim. 4:5.

19. Weh ku help yu fi ga Kristyan kwalitiz?

¹⁹ Wen yu di tink bowt spirichwal goalz weh yu ku set fi yuself, noh ferget dat wan a di moas impoatant goalz da fi ga kwalitiz weh pleez Jehoava. (Gal. 5:22, 23; Kol. 3:12; 2 Peet. 1:5-8) How yu ku reech da goal? Mek wi luk pahn wahn egzampl. Sopoaz yu waahn ga schranga fayt. Yu ku reed sohn aatikl eena wi poblikayshanz weh gi yu sohn gud sojeshan bowt how yu ku schrentn yu fayt. Fi shoar, yu ku aalso benifit wahn lat if yu wach JW Braadkyaastin ahn si how sohn bradaz ahn sistaz ga schrang fayt eevn doa dehn di deel wid chraiyalz ahn chalenjiz. Den, luk fi wayz how yoo ku kapi fi dehn fayt.

20. How wi ku ga moa jai ahn noh feel diskorij?

²⁰ Fi shoar, aala wi wuda waahn du moa fi Jehoava dan weh wi di du rait now. Eena Gaad nyoo werl wi wahn ku du moa eena wi servis tu Jehoava. Meenwail, doh, if wi du wi bes eena evriting weh wi du rait now, wi wahn ga jai ahn wi noh wahn feel diskorij. Bot moa impoatant, wi wahn bring aana an prayz tu Jehoava, wi “hapi Gaad.” (1 Tim. 1:11) Soh mek wi fain jai eena di privilij dehn weh wi ga rait now!