1. Ka hadügübei saragu íbirigu lun haganwoundagüdüni heseriwidun lun Heowá?

 YARAFAMÉMEELI lagumuchagüle ubóu le ani gíbegili wadagimanu lunti wadügüni (Mat. 24:14; Luk. 10:2; 1 Fe. 5:2). Sun wagía busentiwa weseriwidun lun Heowá lau sun wayaraati. Saragu íbirigu hagawoundagüdüñein hani ministeriu. Añahein hádangiñe busentiña heseriwidun kei prekursorugu, añahein amu busentiña heseriwidun tidan Beteli o hídehan lidan tábunawagun muna to eseriwiduboun lun láhudurawagun lun Heowá. Añahein saragu íbirigu wügüriña háfaaguña lun heseriwidun kei ídehatiña lidan damuriguaü o lun heseriwidun kei wéiyaaña lidan afiñeni (1 Tim. 3:1, 8). Chóuruti gunda lan Heowá larihini aranseñu haña lan lubúeingu lun heseriwidun lun (Sal. 110:3; Isa. 6:8).

2. Ida liña wasandiragun woungua dan le mibihin wamani le wagurabubei?

² Ligíati, anhein barühadiwa lubéi saragu dan ani mibihin wamagili le wabusenrubei wibihin, másiñati labürühan warüna. O másiñati gari lan woun ladüga warumudiri o ladüga lan le gádanbaliwa siñá lubéi wadügün saragu tidan lóundarun Heowá (Ari. 13:12). Ligía meha asuseredubei tun Melissa *, to meha busenboun teseriwidun tidan Beteli o tidin tidan Leskuela houn Apurichihatiña Larúeihan Bungiu. Ariñagatu: “Wéiyaadina. Lidanrügaali nisaminan eseriwiduni lira. Anihein dan aba burí labürühan narüna”.

3. Ka gayaraabei hadügün fiu íbirigu lun heresibirun ítaga dasi?

³ Añahein nibureintiña buiti hátuadi, lun gayara lan wagunfulirun lau saragu dasi, furumiñe mosu derebugu lan hasaminan  luma lun gagaburi hamá aban igaburi le buiti. Gayaraati chu lan hau, aranse hamá, ani chubalugutiña, gama lumoun mosu hafurendeirun gaguraasuni, hawadigimaridun buidu o inebehabu hamá. Ánhaña áfaagua lun gagaburi hamani igaburi le mégeiwabei, gayaraabei heresibirun aban dasi lidan dan le magurabun hamani. Ariha waméi likesin Nick. Dan le 20 lubéi irumu lau aba lábürühan larüna ladüga miridún lan keisi ídehati lidan afiñeni. Ariñagati: “Aba nasaminarun wuriba lan yebe sun le nadügübei”. Mígiraguagüdünti lungua. Aba letenirun lun le gayara lubéi adüga lidan damuriguaü luma lidan ministeriu. Uguñe weyu ligía aban hádangiñe lílana Sétanu le Arihibei tau Sukursáli.

4. Kaba wariha lidan aturiahani le?

⁴ Ábürühaali san warüna ladüga mibihin wamagili lan le wabusenrubei wadügün? Anhein ítara liña lubéi abahüdaha waméi lun Heowá ida liña lan wasandiragun woungua (Sal. 37:5-7). Ayanuha wamá hama íbirigu ha lǘhañabaña eseriwida lun Heowá lun hariñaguni woun kaba lan ida wabuiduragüdei wagaburi ani áfaagua wamá lun wadügüni le hariñagubei woun. Ánhawa adügei másiñati lagunfulirun le wayumahabei. Ánheinti siñá lubéi wibihini le wabusenrubei guentó, kei le asuseredubei tun Melissa?, ida luba wadüga lun gunda wamá? Lun wóunabuni álügüdahani le wakutihaba ǘrüwa puntu. Furumiñe, ka gayaraabei líchugun ugundani woun? Libiaman, kaba wadüga lúntima laganwoundun wagundan? Le lǘrüwan ka lubéi wadügüni lúntima wasandirun ugundani.

5. Kaba un wetenira anhein busén wabéi wasandirun ugundani? (Apurichihati 6:9).

⁵ Anhein busén wabéi wasandirun ugundani, lunti wadügüni le lariñagubei Apurichihati 6:9 (aliiha huméi). Gürigia le gúndaabei lau “le arihúbei”  gúndaati lau le lúmabei, kéiburi le gádanbalin guentó. Ánheinti gürigia le erederubei “yágütoun yaroun éibaaha katei le siñá lubéi ibiha” súnwandan lerederun ayumahei. Ka wafurendeirubei lídangiñe le? Anhein busén wabéi gunda wamá mosu wetenirun lun le wámabei, mama lun le siñá wabéi ibiha.

6. Kaba abahüdaguni wakutiha, ani kaba wafurendeira?

⁶ Sun wagía hínsiñeti woun wagagibudagun luma iseri sánsiguaü. Lau sun lira, gayaraati san wagundaarun lau le wámabei? Anha, gayaraati. Gayaraabei wagundaarun lau le wámabei. Ida? Lun wasubudiruni, akutiha waméi abahüdaguni luáguti seinsu le labahüdahabei Hesusu le wadarirubei lidan Matéu 25:14-30. Wafurendeiruba ka lan lunbei wadügüni lun gunda wamá luma lun warufuduni lidan le gádanbaliwa.

7. Abahüdaha humá murusun luáguti abahüdaguni le labahüdahabei Hesusu luagu seinsu.

⁷ Lidan abahüdaguni le labahüdagubei Hesusu, abahüdahati luagu aban wügüri le adügübei aban wéiyaasu. Lubaragiñe lidin wügüri le, aba lagúarun houn lumusuniña ani aba lederegerun seinsu houn kada aban lun hadügün bísinisi lau. Aba líchugun seingü milu lun aban lidamun, lun le aban bián milu lun le ábanya milu, ruti houn kada aban según hayaraati. Ha furumiñetiña biama chuti hau ibihatiña lanwoun seinsu lun hayubudiri. Ánheinti le háürüwan madügünti ni kata lau seinsu le líchugubei liyubudiri lun, ligía lábugunbalin liyubudiri.

8. Ka uagu gayara lubéi lagundaarun furumiñe musu le uágubei labahüdaha Hesusu lidan abahüdaguni luáguti seinsu?

⁸ Chóuruti buidu lan lasandiragun furumiñeti musu lungua luagu líchugun liyubudiri seingü milu fiádürü lun. Gíbeti meha seinsu lira  luagu aban dan ani furanguti hanarime lan lafiñen liyubudiri luagu. Kaba wariñaga luagu libiaman musu? Gayaraati hamuga lahirudagun lau larihin michugún lan saragu seinsu lun kei lun le furumiñeti. Kati ladügübei?

9. Ka mariñagun lubéi Hesusu luagu libiaman musu? (Matéu 25:22, 23).

⁹ (Aliiha huméi Matéu 25:22, 23). Mariñagunti Hesusu aban lan lagañidun libiaman musu o areidaha lan igarihabu ladügarügü bián mílurügüñein lan fiádürü íchuguti lun. Mariñagunti giñe ariñaga lan musu ligía dimurei kei burí: “Ligíarügüba san bíchiga nun? Gayaraaguatina giñe nungua kei le eresibirubei seingü milu fiádürü! Anhein mebegi nubéi lun niyubudiri, bunanei seinsu le, ábame netenirun lun le lunbei nadügüni”.

10. Ka ladügübei libiaman musu lau seinsu le ichugúbei lun?

¹⁰ Ítara kei likesin furumiñeti musu, adüga lumuti habiaman musu dasi le ichugúbei lun ani nadagimeinti saragu lun liyubudiri. Gáñeiti musu le bián milu lanwoun seinsu le ichugúbei lun. Lau saragu ugundani, aba líchugun iyubudiri lafayeiruaha ladüga áfaaguni le ladügübei ani aba líchugun lanwoun lidasin.

11. Ka gayaraabei wadügüni lúntima wasandirun ugundani?

¹¹ Ítarameme, gayaraati wasandirun saragu ugundani ánhawa áfaagua buidu buidu lidan furumiñeguarügü dasi le weresibirubei lidan weseriwidun lun Heowá. Rugua wamá woungua sunsuinagubei lun apurichihani ani rugua wamá giñe woungua lidoun dasi le adügǘbei lidan damuriguaü (Adü. 18:5; Ebü. 10:24, 25). Aranseñu wamá lun wíchugun dǘgüdaguaü houn amu lau burí óunabagülei le wíchugubei lidan adamuridaguni. Seriu lan wanügüni furumiñeguarügü dasi le ichugúti woun lubá adamuridaguni  le adügübei labadinagua dimaasu. Anhein amuriahóua wama lun wadügün somu wadagimanu lidan damuriguaü, chülügiñe wamá ani adüga wamá lun lafiñerúniwa wawagu. Masaminara wamá masudinin lan ítaga dasi ani siñá lan wetenirun lun saragu. Áfaagua wamá lun wabuiduragüdüni iyaraani le wawagubei (Ari. 22:29). Éibutima beresegu wamá lidan wadasin lidan damuriguaü, awansetimaabadiwa ani gúndaatimabadiwa (Gal. 6:4). Ani ménrenguntimaabei woun wagundaarun danme le heresibiruni amu dasi le hínsiñebei hamuga woun lun wagía lan eresibirei (Rom. 12:15; Gal. 5:26).

12. Ka tadügübei Melissa luma Nick lun gunda hamá?

¹² Aritagua humagiru Melissa, íbiri to buga uáguboun wayanuhan lidan párafu 2 to meha busenboun tidin eseriwida Betelirugu o tidin tidan Leskuela houn Apurichihatiña Larúeihan Bungiu? Íbini siñá lan tibihini eseriwiduni le, ariñagatu: “Adüga numuti sun niyaraati lidan neseriwidun kei prekursora ani áfaaguatina lun napurichihan lidan ámuñegueinarügü igaburi. Ru hali katei le ugundani nun”. Ka ladügübei Nick, le buga uágubei wayanuhan lidan párafu 3 lun liñuragun lídangiñe magundani le gádanbalin ladüga miridún lan kei ídehati lidan damuriguaü? Ariñagati: “Aba netenirun lun le gayara nubéi adüga: napurichihan luma lun níchugun óunabagülei le ruti dǘgüdaguaü. Buíngüdatina giñe gárada lun neseriwidun Betelirugu, ani leweñeguabei irumu aba nagunbirahóun eseriwida ñein”.

13. Kaba asusereda ánhawa áfaagua saragu lidan dasi le wámabei guentó? (Apurichihati 2:24).

¹³ Mini lan san le ánhawa lan áfaagua saragu lidan wadasin le wámabei guentó weresibiruba lan lanwoun ámuñegü? Másiñati gayara lan, ítara kei lasuseredun lun Nick. O, uá lan ítara kei lasuseredun tun Melissa, meberesenga ánhawa eresibira somu dasi o meresibirun wamá wasandiraguba woungua lau ugundani (aliiha huméi Apurichihani 2:24). Ani chóuruti wasandiruba lan aban lanarime ugundani ladüga subudi wamuti gúndaabei lan Hesukrístu, le wayubudiri luagu áfaaguni le wadügübei.

14. Ka lunbei wadügüni lidan luáguti wabusenrun wibihin somu dasi lidan weseriwidun lun Bungiu?

¹⁴ Anhein áfaaguaadiwa lubéi lidan weseriwidun lun Heowá, mini lan san lira moun lumuti lan wasaminarun ida luba lan waganwoundagüdüni? Uá. Gayaraati ani lunti wáfaagun luagu katei le gayaraabei lídehan abuiduragüdei ligaburi wapurichihan luma warufudahan, ani gayaraati ladügün le lun wíderaguniña wíbirigu. Wibihibei ánhawa arufuda lichú au ani ǘnabugu wagía, ani teni wagíame lun wíderaguniña lubaragiñe wetenirun lun wabuidun guánarügü (Ari. 11:2; Adü. 20:35).

15. Ka lídangiñe le wabusenrubei wadügün gayaraabei líchugun ugundani woun?

¹⁵ Ka katei wabusenrubei wibihin lidan le wabusenrubei wadügün? Amuriaha wamá luma Heowá lun líderaguniwa anúadirei katei le gayara wabéi adüga luma lun warihini katei le según le gádanbaliwa (Ari. 16:3; Sant. 1:5). Gayaraati san wáfaagun lun wibihin fiu dasi le wabusenrubei wibihin, según le ariñawagúbei lidan  furumiñeti párafu lidan aturiahani le, kei burí lun prekursoru wamá ha ídehatiña, o prekursoru wamá ha adügübaña 70 oura lidan hati, leseriwidun Betelirugu o lidan bunaguaü? Gayaraati san wafurendeirun amu iñeñein lun wapurichihan houn saragu gürigia o wáguyun lidoun amu fulasu le ñein lubéi hemegeirúa ídehatiña? Anhein busén wabéi lanwoun ariñahani burí le wabusenrubei wibihin lidan weseriwidun lun Heowá, gayaraati waliihaali kapítulu 10 tidan líburu Organizados para hacer la voluntad de Jehová luma lun  wayanuhan hama wéiyaaña lidan afiñeni ha lídanbaña damuriguaü le ñein wabéi. * Eibu wáfaagun lun wibihini le wabusenrubei wadügün gúndaatimabadiwa ani harihibei amu wawanserun.

16. Kaba wadüga anhein siñá lubéi wibihini le wabusenrubei wibihin?

¹⁶ Ánheinti siñagili lubéi wibihini fiu lídangiñe katei le uágubei wayanuhan? Áfaagua wamá lun gayara lan wibihini le gayara wabéi agunfulira. Samina wamá luagu amu katei le gayara wabéi ibiha.

17. Según 1 Timotéu 4:13, 15. Ka lunbei ladügüni aban íbiri lun aban lan máisturu buiti?

¹⁷ (Aliiha huméi 1 Timotéu 4:13, 15). Anhein aban lubéi íbiri badiseihali huguya, gayaraati háfaagun lun habuiduragüdüni hiyanun luma harufudahan. Ka uagu? Ladüga ánhaadün adireira dan lun haliiha, ru huguya yanu ani arufudaha huguyame, líderagubaña lira sun ha aganbütün. Áfaagua humá haturiahan luma lun hadügüni kada aban lídangiñe fánreinti le tídanbei garüdia Buídutima lan haliiha luma lun harufudahan. Aturiaha huméi fánreinti aban lárigiñe aban, asayaha humá saragu húbiñe danme le híchugun yanu, áfaagua humá hadügüni le hafurendeirubei. Amuriaha humá adundehani luma íbiri le ídehabei lidan líchugun adundehani * o hama amu wéiyaaña “hátima gafisiutebalin apurichihani luma arufudahani” (1 Tim. 5:17). Masaminara humá saragu lun hagunfuliruni fánreinti le tídanbei garüdia, samina humá giñe ida luba lan híderaguniña  gürigia ha aganbubalün lun hederebudagüdüni hafiñen luma lun hadügüni le hafurendeirubei. Ladügüba lira lun hasandirun ugundani, dandu huguya kei sun gürigia ha aganbubalün.

18. Kaba íderaguawa lun wibihini le wabusenrubei lidan ministeriu?

¹⁸ Sun wagía kristiánugu gani wamuti buligasion lun wapurichihan luma lun wadügün disipulugu (Mat. 28:19, 20; Rom. 10:14). Hínsiñeti hamuga san woun wabuiduragüdüni iyaraani le wawagubei lidan dasi súdiniti le? Lun lira, gayaraati waturiahanu garüdia Garufudahadi wamá luma lun wasaminarun waganwoundagüdüni weseriwidun, le lunbei líderaguniwa adügei le wafurendeirubei. Gayaraati giñe wadarirun adundehani buiti tidan garüdia Le lunbei ladügüniwa lidan adamuridaguni Habagari Kristiánugu luma Heseriwidun, luma lidan burí bidéu le laubei ariñahani luáguti “le gayaraabei wariñaguni lidan apurichihani” le arihibei lidan adamuridaguni le adügübei labadinagua dimaasu. Houcha wamá ámuñegueinarügü saminaü lun warihini kátima lan buídutimabei lidan fulasu ñein lubéi wapurichiha. Ánhawa asigirei adundehani le, wéiribei ugundani wawagu luagu garufudahadi wamá (2 Tim. 4:5).

19. Kaba íderaguawa lun gagaburi wamá aban igaburi kei kristiánu?

¹⁹ Mabulieida waméi aban lan katei súdiniti le lubéi wadügüni wabuiduragüdüni wagaburi keisi kristiánu (Gal. 5:22, 23; Kol. 3:12; 2 Fe. 1:5-8). Ida luba wabihini? Samina wamá, busén wamá wederebudagüdüni wafiñen. Gayaraati waliiha ariñahani tídangiñe wani agumeiraguagüdüni le ayanuhabei luagu ítaga tema burí ligía. Wasagaruba giñe buiti warihini fánreinti lídangiñe JW Broadcasting^® le ayanuhabei hawagu íbirigu ha arufudubaña aban afiñeni le derebuguti lidan dan hénrenguti. Lárigiñe samina wamá ida luba lan wáyeihani hafiñen.

20. Ka gayaraabei wadügüni lun gunda wamá luma lun mábürühan lan warüna?

²⁰ Chóuruti, sun lan wagía hínsiñeti hamuga woun waganwoundagüdüni weseriwidun lun Heowá sügǘ luéi le wadügünbei guentó. Lidan iseri ubóu le füramase lubéi Bungiu, gayaraabei weseriwidun lun, san luagu san. Sunme awanha lan agurabahei dan ligía, danme le wadarirun chansi meferidira waméi, ánhawa meferidirun wamá gúndaatimabadiwa ani mábürühanbei warüna. Ani le súdinitimabei wíchuguba uéiriguni lun Heowá ani walawahabei Wabungiute, “Bungiu le gúndaabei” (1 Tim. 1:11 TNM). Ligíati gunda wamá luagu le gayaraabei wadügüni luagu Heowá.