1. Asuh nup la-en yip tö hòṅ kētöre nö löklōn Yāvē?

RÖHTA pinyāingö ön ngih panam, pōitit pöri minë la-en hī tö hòṅ kēkaṙen. (Mët. 24:14; Lūk. 10:2; 1 Pīt. 5:2) Lōnu in öi holtö ellōn re öi kēken minë la-en. Ōt yip tö hòṅ la-entö painīör, la-evṙen nö el Pētěl, hēk i minānö inrē nö kētöre, ōtre yip prötör kamëtöre nö hamòlṙen töla-evṙen hēk la-entö la-en minröinylen inrē. (1 Tim. 3:1, 8) Ṙamölōn ang Yāvē nö meuk nup la-en hī im linökö lōn ò!—Sal. 110:3; Isa. 6:8.

2. Sitih inlahen öm min kò-òren yēḵ meh öt teungten inup kuilōn re la-en?

² Hēkpī pöri ayī-ö öt teungten in nup kuilōn re la-en, lökten öi haṙivölōn. Pi-a nö kūö ngam ṙēḵti hī hēk nup tahëng inrē lāinyngen. (Inch. 13:12) Kò-òren öi ngëichkö inlahen sistör Manchū. * Kalē-ělōn anga-aṅ nö hòṅ el Pētěl nö la-evṙen ane inrē chuh el ngam Iskul Ma-ahangköm Tölöök Inhānga. Ngöṙô pöri anga-aṅ “Pòrô nöng umuh ngam kuilōn chu, sön chū-ö öt teungten pön ngaich nö tôḵngö ngam ṙēḵti chu, haṙivölōn chin yěich fēkö inlahen re.”

3. Sitih inlahen öp kò-òren prötör yěn hòṅ kētu la-en nö el ngam māṅ?

³ Öt ilööṙen inrē yip ṙālö nö teūngen tö nup kuilōn re la-en. Pi-a nö hòṅ asīöp nup tövai tinrīken re cha-a. Lohten yip nö tö akaha elmat, tö ngöt inrē, hēk tö veūten inrē nö keuheūtngö nup la-en kinë-ekūöre. Sön pöri nö ōt nup tinrīken tö hòṅ asīöpö tö cha. Tö sā cha lohten nö hòṅ aṅhavin tö ngam manöiyö, hòṅ chumkūöṙen  inrē yěn la-evṙen hēk milēḵṙen inrē tö tahëng. Yēḵ cha min nö ngatī inlahen nö asīöp minë tövai tinrīken, ngaich öthō min cha-a nö öt teūngen tö minë kuilōn re la-en. Kò-òren öi ngëichkö inlahen prötör Nik. Ik sā ò nö ṙòngmö 20 samyeūheu ṙēḵti, haṙivölōn anga-aṅ pön öt vilöng nö hamòlṙen töla-evṙen. Ngö ṙô anga-aṅ, “pi-a lohten nö ṙahëichhangen öp in chu.” Höng iṙūöhen pöri anga-aṅ nö mehenöt nö im inhangköm tölöök inhānga, kētöre inrē nö in nup la-en tökētu nö el ngam māṅ. Ngaich öp töngamuh nö hol yip mupakö kömitī.

4. Asuh nup min haköp hī el ngih ātiköl?

⁴ Yēḵ meh haṙivölōn töre öt teūngen tö nup lōn re la-en i linökö lōn ngam Tēv, ngaich vë-ekūötēv më-eṅ keuheūtnyö ṙô ellōn re in Yāvē. (Sal. 37:5-7) Kò-òren inrē öm vë-ekūö yip prötör yip tö mihòiṅ min nö halēnö meh hēk hayööken meh inrē min im linökö lōn ngam Tēv. Yēḵ meh min hang inlēnö re, ötlöktu më-eṅ öt teung in minë chö-öny re. Yěm sāta inlahen pöri in sistör Manchū sitih inlahen öm kò-òren yěm hòṅ köptī tö ngam ṙanamlōn re? El ngih ātiköl in min teūngen tö sanapṙô e. Mikahtökūö re min ayī-ö (1) töp chūök hī teūngen tö ṙanamlōn re, (2) inlahen hī inrē asīöp ngam ṙanamlōn re hēk (3) tö sitih inlahen nup min la-en tösīöpö tī tö ngam ṙanamlōn hī.

5. Hòṅ sitih inlahen öi yěi hòṅ ṙamölōn? (Mumkahten 6:9)

⁵ Vënyu nang in töm Mumkahten 6:9 tö löktö ngam ṙanamölōn hī. (Vë-evkūö.) Ngam tarik ngamëchkö minë tö ōt nö lākūö re, ṙamölōn min anga-aṅ, kūö ò nöng fēkö minë la-en tö mihôiṅ kahëken re. Ngam tarik pöri famchūkö ngam tö karööna kuilōn re haṙivölōn min anga-aṅ, kūö ò nö afēkö inlahen re nö teūngen tö minë la-en töt taneūngen ò. Asuh öp haköplö hī in e? Hòṅ chöh ṙanamlōn re ayī-ö in minë la-en töng ōt nö lakūö hī nup tömihôiṅ inrē nö la-en kahëken hī hòṅ anū-ö tö afēka tö hī.

6. Asuh öp min ngahëchkö hī inchō-oṙô, asuh min öp haköplö hī in e?

⁶ Mihôiṅ öi rih teūngen tö ṙanamlōn re in minë töng aṅ in re? Hö-ö in töṙô yip rīkre. Kūö hī nyin öi tö hòṅ lōntö nup tö tufömngöre chehen. Vënyu nang pöri ayī-ö tö ngam Paipöl tö hī mihôiṅ öi ṙamölōn inup töng aṅ in re. Ta-a töi ngëichkö ngam inchōḵoṙô tövënyu imat ngam Mëtiv 25:14-30 inlahen yik mahalanṙen tö kalaha ṙôken kinë-ekūö. Lökten im inchōḵoṙô in min akahakūö tö löktö ṙanamölōn hī im linökölōn Yāvē.

7. Vë-eny inlahen ngam inchōḵṙô Yēsū man.

⁷ Vë-eny inlahen ök tarik ang Yēsū chamuh tahëng panam. Urēhěkūö ò pöri nö kiröönngöre, havëtö yik tölūöi tak mahalanṙenre anga-aṅ ngaich kē-ěkūö cha tö rupīö. * Ngaich kē-ěkūö cha tö rupīö asā ṙôkö tölngö heuneū-en cha. Taneui kinlaha kinë-ekūö ök raneh, nët ngam tahëng, hěng kinlaha kinë-ekūö ngam linūöi tak. Minā tönët tak mahalanṙen kiröönngöre cha-a nö inyih ngaich teūngen hēk cha-a tö rupīö asā ṙôken minë  kinë-ekūö cha. Öt taneungluṙen pöri ngam linūöi taka lökten ngam yöngkūö cha nö ha-ōngen ò.

8. Kūöyòh ök lohten raneh mahalanṙen nö ṙamölōn?

⁸ Ṙamölōn lohten ngam raneh mahalanṙen nö meuk ṙôken nuk rupīö kinë-ekūöre. Ṙamölōn anga-aṅ pön ṙātö ellōnre ngam mā nö in ò. Sitih inlahen ök innëtö mahalanṙen, haṙivölōn hòng anga-aṅ nö meuk ök holre nö pōyen kinë-ekūö?

9. Öt sitih inlahen ngam innët tak mahalanṙen? (Mëtiv 25:22, 23)

⁹ Vë-evkūö Mëtiv 25:22, 23. Öt vënyu nang in tö inlahen ngam innët tak mahalanṙen, nö līn hēk haṙivlōn nö meuk ṙôken kinë-ekūö ngam raneh hol re. Ötrěhěn anga-aṅ nö ngö ṙô, “Hö-ö chin chū-ö sā ṙôken taneūngen ngam holre, kūöyòh öich uroh harëtnyö elmat re, yěn höng öt pōyen ngam kinë-ekūö chu.”

10. Sitih inlahen ngam innët tak mahalanṙen?

¹⁰ Harëtnyö elmat re ngam innët tak mahalanṙen nö sā ngam holre raneh. Nët tāk kinë-ekūö anga-aṅ ngaich kamailö tö nët tāk hēk anga-aṅ. Ṙamölōn ngam yöngkūö ò nö in ò lökten nö kē-ěkūö ò hēk tö la-en!

11. Sitih inlahen öi kò-òren asīöp ngam ṙanamlōn re?

¹¹ Mihôiṅ ayī-ö öi asīöp ngam ṙanamölōn re i linökö lōn Yāvē, yēḵ hī asīnkö inlahen ngam innët tak mahalanṙen öi holtö ellōn re inup töng kinë-ekūöre la-en. Hòṅ ngöt ayī-ö im inhangköm  tölöök inhānga, holtö ellōn re inrē in nup töng kinë-ekūöre la-en el ngam māṅ. (Inl. 18:5; Hep. 10:24, 25) Hòṅ halēn nup sanapṙô re ayī-ö urēhěkūö re chuh el mīting, halēnöre inrē yěi kētu talk. Ngaich yěi kētu la-en el ngam māṅ, hòṅ keuheūtngen u ayī-ö in ngam ṙētak. Ötkô ayī-ö kūöṅn elmat tö nup töng la-en. (Inch. 22:29) Yēḵ hī min holtö ellōnre in minë la-en kinë-ekūöre ngaich ngönlöre min ngam innôlö hī in Yāvē. (Kal. 6:4) Ṙamölōn min inrē ayī-ö yěi meuk öp holre nö kē-ěvkūö tö ngam la-en ngam kuilōn hī lang nö la-en.—Rōm. 12:15; Kal. 5:26.

12. Sitih inlahen ang Manchū hēk Nik nö ṙūöhlö ngam ṙanamlōn re?

¹² Ta-a hēk töi ngëichkö inlahen Manchū ngam tö kakka taheui im innëtö perekrāf. Öt teūngen anga-aṅ tö minë lōn re la-en, ngö ṙô anga-aṅ: “Höng iṙūöhen pöri chū-ö im la-en painīör. Harunöre inrē öich in minë tufömngöre inlahen hī vë-ekūö tarik. Lökten nö ṙūöhlöre ngam ṙanamlōn chu.” Ngach sitih inlahen ang Nik ik sā ò nö öt teūngen nö vīlöng nö hamòlṙen töla-evṙen? Ngö ṙô ök: “Nuk tö ōt la-en nö ikūö chu kēken u chu-ö, tö sā ngam inhangkö tölöök inhānga, kinëtö sanapṙô el mīting. Fil mat ngam fôm chū-ö inrē chamuh el Pētěl, ilöö havëlöngö ngaich chū-ö.”

13. Sitih inlahen öi min yēḵ hī holtö ellōnre inup la-en re? (Mumkahten 2:24)

¹³ Yēḵ hī min holtö ellōnre i nup töng kinë-ekūö re la-en sā inlahen prötör Nik ngaich ötlöktu ayī-ö öt kē-ěvkūö hēk tö la-en re. Sitih inlahen pöri yěi töt kē-ěvkūö tö la-en re? Sön mihôiṅ öi asīöp ngam ṙanamlōn re yēḵ hī sā inlahen sistör Manchū öi keuheūttö ellōnre in minë töng la-en re. (Vë-evkūö Mumkahten 2:24.) Ṙamölōn min ang Yēsū nö in hī.

14. Hòṅ asuh nup inlahen hī i linökö lōn Yāvē?

¹⁴ Ngaich hòng pökeh nö tö ngö manah anū-ö kūö hī hamòltö ellōnre la-evṙen ngaich hòng söl in e ngam ṙanamlōn hī? Öt hēk hòng ayī-ö afēkö inlahen re tānyö ṙôkti minë la-en re i linökölōn Yāvē? Hö-ö nö töngatī manah! Hòṅ ngëichkö nup chö-öny re ayī-ö hòṅ hī öi heuveū-en im inhānga hēk heuveū-en inrē im inköphöti hòṅ hī min öi mihôiṅ hayööken yip prötör sistör. Ötkô inrē ayī-ö yahlö mat öi ngëichkö re, hòṅ hayaichngöre ayī-ö hayööken yip tahëng holre.—Inch. 11:2; Inl. 20:35.

15. Asuh nup min la-en löktö ṙanamlōn meh?

¹⁵ Asuh nup rih tömihôiṅ nö kahëken meh la-en i linökö lōn Yāvē? Mihôiṅ man kētöre öm òksölörī painīör hēk rekulör painīör inrē. Mihôiṅ inrē öm el Pētěl öm la-evṙen hēk in ngam la-en minānö inrē. Hēk harunöre me-en öm haköp ngam tufömngöre elô, chuh inup kamngö inrē tö öl nö teunghuvö töm tötölöök inhānga. (Inch. 16:3; Yāk. 1:5) Yēḵ meh hòṅ ṙūöhtö mikahkūöre tö inlahen minë tövënyu la-en, kò-òren öm ngëichkö ngam cheptör 10 imat ngam līpöre Yöhovā Ki Mörchī Pūrī Karne Kē Liyē Söngkötit höng löö kò-òren öm kēḵ inyööken re in yip minṙöinylen. * Yēḵ meh min ma-anyre asöltö re in nup  minhôiṅyö meh la-en, meukö ṙòng min minë la-en meh tö yip tahëng, ngaich teūngen min më-eṅ tö ṙanamlōn re.

16. Sitih inlahen öm kò-òren yěm öt teūngen tö nup afēkö re la-en?

¹⁶ Sitih inlahen pöri yěi öt teungten kētöre in minë la-en tö kakka taheui urěh? Nup la-en tö ōt nö ikūö meh, kētöre më-eṅ in u. Sā minë tövënyu inlahen lataṙeū.

17. Sā ṙô ngam 1 Timòtī 4:13, 15, sitih inlahen öp prötör yěn hòṅ heuveū-en nö haköphöti?

¹⁷ Vë-evkūö 1 Timòtī 4:13, 15. Yēḵ meh öm prötör töngaich öm vōkö, mihôiṅ më-eṅ ṙūöhlö heuneū-en re im ṙinô-òvö hēk inköphöti inrē. Kūöyòh? Pön yöölen min yip hamang ṙô meh tö tī meh, yēḵ meh “hakūötenre” vë-ekūö līpöre, ṙô-òvö, haköphöti inrē. Mihôiṅ öm harunöre tö minë kun(quality) tövënyu imat ngam prōsör Pörnë Òr Sikhane Me Chichān Lökayēṅ. Katöllö öp töhěng Kun më-eṅ ngaich harūnöre tö e, kò-òren öm hameuknyö ngam Kun yěm mikahten el mīting. Kēḵ inlēnö re in öp hamòlṙen mahalēn hēk in öp minröinylen inrē öp tö heuveū-en nö im ṙinò-òvö hēk inköphöti inrē. * (1 Tim. 5:17) Fēkö inlahen yip hamang ṙô re pöri më-eṅ hòṅ cha nö yöölen tö nup ahang re ngaich kēkö u inrē. Sīöpö ṙanamlōn man min yěm ngatī inlahen holre tö yip hamang rô meh.

18. Sitih inlahen öi ṙūöhlö heuneū-en re im inhangkö tölöök inhānga?

¹⁸ Ṙòkhöre ayī-ö öi kē-ěvkūö tö ngam la-en inhangkö ngam tölöök inhānga, vīten tarik inrē nö mahaköp.  (Mët. 28:19, 20; Rōm. 10:14) Lökten in hòṅ ṙūöhlö heuneū-en re in e. Öi sitih inlahen min? Mihôiṅ öi haköpmat minë līpöre minë inrunten hī im la-en ngaich asīnkö minë haköp re tö sā ngam Chichān prōsör pōyen nun minë inchöngten hī imat e. Mihôiṅ in inrē kēḵ inyööken re imat ngam Tinrīken hēk La-en Pustika Mumting in minë vitiō inrē inchōḵtô vamë-ekūöre. Chöh nup tö tuföm tufömngöre inlahen tī mahaköphti inrē. Yēḵ meh min ngatī inlahen öthō man min öt teūngen tö ṙanamölōn re, heuveū-en inrē min öm mahaköphöti.—2 Tim. 4:5.

19. Sitih inlahen öi asīöp nup tövai tinrīken re öi Kristīön?

¹⁹ Hěng kò-òren ngam tömihôiṅ nö la-en hī öi Kristīön, ngam inlahen hī öi asīöp nup tövai tinrīken re ööilōn Yāvē. (Kal. 5:22, 23; Kòl. 3:12; 2 Pīt. 1:5-8) Öi sitih inlahen min? Töi hachōḵ elmat re. Asehkūöre man tö inlahen re yěm hòṅ asīöp ngam ṙinātö ellōn ngaich sitih inlahen më-eṅ. Lohten öm vë-ekūö minë līpöre hī, minë mahayööken hī asīöp ngam ṙinātö ellōn. Meuk minë prokrām inrē el ngam JW Pròtkāsting mahameuknyö inlahen yip prötör sistör, tö köptī töm ṙinātö ellōnre pòrô nö kihngen. Ngaich kalahtenre më-eṅ öm asīnken cha.

20. Sitih inlahen öi min ṙūöhlö ngam ṙanamlōn re?

²⁰ Pōyen nup lohten lōn hī la-en i linökölōn ngam Tēv, öt teungten pöri ayī-ö kēken u. Yēḵ hī pöri öi keuheūttö ellōn re asā öp tölngö kanò-òṅ hī, ötlöktu ayī-ö haṙivölōn. Ötlöktu ayī-ö min öt hateung ngölōn re inup töng ööilōn re la-en el öp tufömngöre panam. Hanöng sā yanīhih e pöri, höng iṙūöhen ayī-ö chöh ṙanamlōn re inup töng ōt la-en hī töngamuh. Yēḵ hī ngatī inlahen harōilöng min ang Yāvē ṙamölōn inrē min anga-aṅ nö in hī. (1 Tim. 1:11) Ta-a chěi töi chöh ṙanamlōn re in minë töng kinë-ekūöre la-en!