EKICWEKA C’OKWEGA 33
Tungira okushemererwa omu mirimo eyi oyine
‘Okushemerererwa ebi ori kureba nikikira okuguma nozengereza omutima aha bi ori kwetenga.’—MUB 6:9a.
ECESHONGORO CA 111 Ebirikutureetera Kushemererwa
EMPINYE *
1. Ni enki eki abahereza ba Yehova bari kukora ngu bakorere Yehova byingi?
TWINE byingi by’okukora omuri obu bwire obu egi nsi mbi eri hihi kuhwaho. (Mat 24:14; Luk 10:2; 1 Pet 5:2) Twena nitwenda kukorera Yehova oku turi kubasa. Abingi bari kongera aha murimo gwabo. Abamwe bine ecetengo c’okwija kuba abapayoniya. Abandi nibenda kukora ahari Beteli ninga shi omu by’obwombeki. Kandi benetata bingi bine entego y’okwijuza ebiri kushabwa ngu babe abahereza b’ekibina ninga abazehe. (1 Tim 3:1, 8) Ku nikishemeza munonga Yehova yareba oku abo bantu bona bari kwenda kumukorera bekundire!—Zab 110:3; Isa 6:8.
2. Ni bata oku turi kubasa kwehurira hahwa obwire tutari kuhika aha ntego zitu?
2 Konka nitubasa kushasha hahwaho obwire bwingi tutari kuhika aha ntego zitu. Nambwenu nitubasa kuhwamu amani ahabw’emyaka yitu ninga shi ebindi bizibu ebiri kubasa kutuma tutatunga endijo mirimo omu kibina. (Enf 13:12) Eco ni co ecahikire ahari Melissa. * Akaba ayine ecetengo c’okukora ahari Beteli ninga shi kwega Ishomero ry’Ababurizi b’Obukama, konka akagamba ati: “Emyaka ekansiga, tincayijwize ebiri kushabwa ngu mbihikeho. Hine obu biri kumaramu amani.”
3. Ni biha bintu ebi abamwe bashemerire kubanza bakora mbere y’okuhebwa endijo mirimo omu kibina?
3 Abamwe abacari bato nihaba hine emitwarize eyi bashemerire kubanza bagira, kugira ngu babase kutunga endijo mirimo. Abamwe nibabasa kuba bari abanyabwenge, bari kukora ensharamu ndungi, kandi bari kwenda kukora, konka nibaba bashemerire kwega kwehangana, kukora emirimo betonzire n’okukizaho kuha abandi ekitinisa. Ku ori kutamu amani kugira ngu ogire eyo mitwarize, benetata nibakuha endijo mirimo omu bwire obu otari kutekateka. Tekateka aha byahikire ahari Nick. Obu yabire ayine emyaka 20, akashasha munonga ahabw’okuba bataramutorine ngu abe omuhereza w’ekibina. Akagamba ati: “Nkatekateka ngu shana hine ekizibu eki nyine.” Nick taracwekire entege. Akakora n’amani emirimo eyi yabire ayine. Erizoba ni omwe omu b’omuri Komiti ya ofisi.
4. Ni enki eki twaza kushwijuma omuri eki kicweka?
4 Mbehi n’iwe noshasha ahakuba hine entego ezi otakahikireho? Yaba ari ko kiri, shaba Yehova, omugambire oku ori kwehurira. (Zab 37:5-7) Nambwenu nobasa kubuza benetata abakuzire omu by’omwika obuhabuzi oburi kubasa kukukwasa kuhika aha ntego zawe kandi ogezaho kuta omu nkora obuhabuzi obu bakuha. Ku orakikore basyoya, nobasa kwija kutunga ogo murimo ninga shi ohika aha ntego yawe. Konka nk’oku cahikire ahari Melissa owu tugambireho, kuhika aha ntego zawe nikibasa kuba kitacabasika. Konka shi ni enki eki ori kubasa kukora ngu ogumizemu kushemererwa? Eki kicweka caza kushwijuma (1) ahu ori kubasa kwiha okushemererwa, (2) oku ori kubasa kongera okushemererwa kwawe na (3) entego ezi ori kubasa kweteraho zikatuma wakizaho kushemererwa.
AHU TURI KUBASA KWIHA OKUSHEMERERWA
5. Twaba turi kwenda kushemererwa, ni enki eki tushemerire kutaho omutima? (Omubuurizi 6:9)
5 Omu Mubuurizi 6:9 nihashoborora ahu turi kubasa kwiha okushemererwa. (Shoma omu Mubuurizi 6:9a) Omuntu ori kushemerererwa ‘ebi ari kureba’ nayereka okusima ahabw’ebi ayine, konka omuntu ori kuzengereza omutima aha bi ari kwetenga naguma ari kwenda ebintu ebi atari n’okubasa kubona. Ni enki eki biri kutwegesa? Nitutunga okushemererwa twata omutima aha bi twine n’ebi turi kubasa kubona.
6. Ni kiha cokureberaho eki twaza kushwijuma, kandi shi ni enki eki twaza kutaho omutima twaba turi kucega?
6 Mbehi nikiba corobi kumarwa n’ebi oyine? N’obu hari kuhwaho obwire tukaba turi kwetenga ebintu bisya, nikibasika. Mazima nitubasa kushemerererwa ebintu ebi twine hati. Ni enki ekiri kubasa kutukwasa? Kugira ngu tukimanye, reka turebe ecokureberaho ca Yesu c’etalanta ekiri kugambwa omuri Matayo 25:14-30. Twaza kuta omutima aha ki biri kutwegesa ahu turi kubasa kwiha okushemererwa n’oku turi kubasa kushemerererwa ebi twine hati.
OKU ORI KUBASA KONGERA OKUSHEMERERWA KWAWE
7. Shoborora ecokureberaho ca Yesu c’etalanta?
7 Omuri eco cokureberaho, omuntu akaba ari kwenda kuza omu rugendo rwa hare. Mbere y’okugenda, aketa abagaragwa beye yabaha etalanta ngu bazishubure bihemu amagoba. * Ahabw’okuba ogo muntu yabire ari kumanya obushoborozi bw’abagaragwa beye, omwe akamuha etalanta itano, ondijo ibiri, n’ondijo yamuha emwe. Babiri omuri bo bakakoresa ge ezo talanta. Konka omugaragwa wa kashatu tarakoresize etalanta eyi mukama wabo yamuhire catuma yamubinga aha murimo.
8. Omu cokureberaho ca Yesu c’etalanta ahabw’enki omugaragwa w’okubanza yashemerirwe?
8 Omugaragwa w’okubanza akashemererwa ahakuba mukama weye yamwesigire akamuha etalanta itano. Zikaba ziri esente nyingi kandi kikereka ku mukama weye yabire ari kumwesiga. Kandi shi omugaragwa wa kabiri? Akaba nabasa kushasha ahakuba atarahirwe etalanta nyingi nk’ezi ow’okubanza yahibwe. Konka shi ni co eki yakozire?
Ni enki eki turi kwegera aha mugaragwa wa kabiri ori kugambwa omu cokureberaho ca Yesu c’etalanta? (1) Mukama weye akamuha etalanta ibiri. (2) Akakora n’amani kugira ngu mukama weye abone esente nyingi. (3) Akashubura etalanta za mukama weye zayekuba kabiri (Reba paragurafu ya 9-11)
9. Ni enki eki Yesu ataragambire aha mugaragwa wa kabiri? (Matayo 25:22, 23)
9 Shoma omuri Matayo 25:22, 23. Yesu taragambire ku omugaragwa wa kabiri yanyigire ninga shi ngu abike enzika ahabw’okuba yatungire etalanta ibiri zonka. Kandi Yesu taragambire ku ogo mugaragwa yatongine ari kugira ati: “Ebi ni byo bampa kusha? Nanye nyine obushoborozi nk’obw’omugaragwa owahebwa etalanta itano! Obu mukama wange atari kunsima, ezi talanta ibiri naza kuzishereka omu itaka nyekorere ebyange.”
10. Ni enki eki omugaragwa wa kabiri yakoresize etalanta zeye?
10 Omugaragwa wa kabiri na we akataho amani kugira ngu akorere mukama weye. Eco kikatuma etalanta za mukama weye zayekuba kabiri. Mukama wabo akabahemba ahabw’okukora n’amani. Eco kikashemeza mukama wabo, yabaha endijo mirimo!
11. Ni bata oku turi kubasa kongera aha kushemererwa kwitu?
11 N’itwe nitubasa kukizaho kushemererwa twakora n’amani omu murimo gona ogu twahebwa. Guma ohugire omu murimo g’okuburira kandi oyekwatanise omu bwijwire omu ndijo mirimo y’omu kibina. (Byak 18:5; Heb 10:24, 25) Guma oyekwetanise omu nterane kandi ozitebekanise kugira ngu oheyo ebitekateko ebiri kombeka. Guma otebekanise ekicweka c’omu ishomero eki ori kuba oyine omu nterane z’omu mizizi. Yaba hine ebi ohirwe kukora omu kibina, bikorere omu bwire kandi oyereke ku ori omwesiga. Omurimo gona ogu wahebwa otarigureba nk’ogutine mugasho ninga nk’oguri kukushishira obwire. Gezaho kongera obumanyi aha murimo gwawe. (Enf 22:29) Oku orikizaho kukora omurimo gwa Yehova, ni ko orikizaho kugugiraho obumanyi kandi okizeho kutunga okushemererwa. (Gal 6:4) Nambwenu nikija kukorobera kushemererwa abandi batunga emirimo eyi wabire ori kwetenga.—Rom 12:15; Gal 5:26.
12. Ni enki eki Abahamya babiri bakozire kikabakwasa kukizaho kushemererwa?
12 Yijuka omunyanyazi ori kwetwa Melissa owabire ayine ecetengo c’okukora ahari Beteli ninga kwega Ishomero ry’ababurizi b’Obukama. N’obu atari kuhika ahari ezo ntego zeye, akagamba ati: “Ningezaho kuhugira omu murimo g’obupayoniya n’omu ndijo mirimo. Eco kikatuma nakizaho kushemererwa.” Kandi shi ni enki ecakwasize Nick kwehangana n’obu yamazire emyaka myingi atakatorinwe ngu abe omuhereza omu kibina? Akagamba ati: “Nkata omutima aha bi ndi kubasa, nk’okwekwatanisa omu murimo g’okuburira n’okutanga ebitekateko ebiri kombeka omu nterane. Nambwenu nkijuza fomu y’okukora ahari Beteli kandi omwaka ogwakuratireho bakanyeta.”
13. Ni enki ekiri kubasa kubaho waguma otire omutima aha mirimo eyi oyine omuri obu bwire? (Omubuurizi 2:24)
13 Mbehi ku oragumizemu kuta omutima aha mirimo eyi oyine omuri obu bwire, noyija kutunga endijo mirimo omu biro by’omu misho? Eco nikibasika nk’oku cahikire ahari Nick. Konka caba kitabasikire nk’oku cahikire ahari Melissa, na bwo nobasa kuguma oshemerirwe kandi ohurira omazirwe. (Shoma omu Mubuurizi 2:24.) Nambwenu noyija kukizaho kushemererwa ahakuba ori kumanya ku ori kuhimbisa Omwegesa witu, Yesu Kristo.
ENTEGO EZIRI KUBASA KUTUMA WAKIZAHO KUSHEMERERWA
14. Ni enki eki tushemerire kuguma turi kutekatekaho twaba turi kweteraho entego?
14 Mbehi kuta omutima aha mirimo eyi twine omuri obu bwire, nikimanyisa ku tushemerire kurecera aho kukora byingi omu murimo gwa Yehova? Ingaha mazima! Tushemerire kweteraho entego eziri kubasa kutuma twaba ababurizi n’abegesa barungi kandi eziri kugasira benetata na banyanyazi. Nitwija kuzihikaho twaguma tutire omutima aha kukwasa abandi omu mwanya g’okwetekatekaho twenka.—Enf 11:2; Byak 20:35.
15. Ni ziha ntego zimwe eziri kubasa kutuma wakizaho kushemererwa?
15 Ni ziha ntego ezi ori kubasa kweteraho? Shaba Yehova kugira ngu akukwase kumanya entego ezi ori kubasa kuhikaho. (Enf 16:3; Yak 1:5) Mbehi tori kubasa kugezaho kweteraho entego emwe omu zi tugambireho omuri paragurafu y’okubanza, nk’okuba omupayoniya w’omuyambi ninga ow’obwire bwona, kukora ahari Beteli ninga kukora omu by’obwombeki? Ninga shi nobasa kwega orurimi rusya kugira ngu oyongere aha murimo gwawe ninga oze kuburira omu tundi tucweka. Nobasa kubyega omu kicweka ca 10 omu kitabo Abari kukora ebi Yehova ari kwenda ninga shi obiganiraho n’abazehe b’omu kibina cawe. * Ku oritamu amani ngu ohike ahari ezo ntego, okutunguka kwawe nikwija kurebwa kandi noyija kukizaho kushemererwa.
16. Ni enki eki ori kubasa kukora yaba omuri obu bwire otari kubasa kuhika aha ntego zimwe?
16 Kandi shi ku wakuba otari kubasa kuhika aha ntego ezi twagamba? Omubazi ni okweteraho endijo ntego eyi ori kubasa kuhikaho. Yetegereze zimwe omuri zo.
Ni ziha ntego ezi ori kubasa kuhikaho? (Reba paragurafu ya 17) *
17. Nk’oku biri kugambwa omuri 1 Timoseo 4:13, 15, ni enki eki mwenetata ari kubasa kukora ngu abe omwegesa murungi?
17 Shoma omuri 1 Timoseo 4:13, 15. Yaba ori mwenetata owabatizibwe, noba oshemerire kutamu amani kugira ngu obe omugambi murungi n’omwegesa murungi. Ahabw’enki oshemerire kukikora? Ahakuba ku ori kutaho amani okaba omushomi murungi, omugambi murunga n’omwegesa murungi nikikwasa abari kukuhurikiza. Gezaho kweteraho entego y’okwega n’okuta omu nkora obuhabuzi oburi omu katabo Yemanyize Okushoma n’Okwegesa. Guma obwege, obwemanyize waba ori omu ka, kandi obukorese waba ori kuha toku yawe. Nobasa n’okushaba obuyambi aha muzehe ori kuyamba omu kuha obuhabuzi ninga shi abandi bazehe ‘abari kukora omurimo g’okuburira n’okwegesa.’ * (1 Tim 5:17) Omutima ogute aha buhabuzi oburi omuri ako katabo kandi okwase abakuhurikize kugira okwikiriza kugumire kandi obahige kugira eki bakora. Ku orakikore basyoya, noyija kukizaho kushemererwa kandi na bo bakizeho kushemererwa.
Ni ziha ntego ezi ori kubasa kuhikaho? (Reba paragurafu ya 18) *
18. Ni enki ekiri kubasa kutukwasa kuhika aha ntego zitu omu murimo g’okuburira?
18 Twena twine omurimo g’okuburira n’okuhindura abantu abegi. (Mat 28:19, 20; Rom 10:14) Mbehi tori kubasa kwega kukora ge ogo murimo g’omugasho? Yeyegese akatabo Okwegesa, rero oyetereho entego ezirakukwase kubita omu nkora. Nobasa kwiha obundi buhabuzi omu Katabo k’Omukristo n’omurimo g’Okuburira, n’omuri za vidiyo z’ebyokureberaho ezi turi kureba omu nterane za rwagati y’esande. Gezaho kuronda obuhabuzi obutari kushushana, rero orebe oburi kubasa kukukwasa omuri teritori yawe. Ku orate obwo buhabuzi omu nkora noyija kutunga okushemererwa kwingi okuri kuruga omu kuba omuburizi n’omwegesa murungi.—2 Tim 4:5.
Ni ziha ntego ezi ori kubasa kuhikaho? (Reba paragurafu ya 19) *
19. Ni enki ekiri kubasa kukukwasa kukizaho kugira emitwarize eri kushemeza Yehova?
19 Waba ori kweteraho entego, otayebwa entego y’omugasho munonga, ni okugamba kugira emitwarize eri kuhimbisa Yehova. (Gal 5:22, 23; Kol 3:12; 2 Pet 1:5-8) Ni enki ekiri kubasa kukukwasa kuhika ahari eyo ntego? Ka tugire ngu noyenda kugira okwikiriza kugumire. Nobasa kushoma ebicweka by’omu bitabo byitu ebiri kugamba obuhabuzi bw’okugira okwikiriza kukugumire. Noyija kugasirwa wareba ahari Tivi yitu® benetata na banyanyazi abayerekire okwikiriza kukugumire ku babugine ebizibu. Ronda oburyo obu ori kubasa kutorezamu okwikiriza kw’abo omu kubaho kwawe.
20. Ni enki eki turi kubasa kukora ngu tukizeho kushemererwa n’okucendeza ebiri kutucwa entege?
20 Hatariho okubanganisa, twena nituhurira turi kwenda kukorera Yehova byingi ebiri kukira ebi turi kumukorera hati. Omu nsi ensya nitwija kuhereza Yehova omu bwijwire. Twakora ebi turi kubasa hati, nitutunga okushemererwa kandi kiturinda ebiri kubasa kutucwa entege. Kandi ekiri kukira byona, nitwija kuhimbisa Yehova, Ruhanga witu ori kushemererwa. (1 Tim 1:11) Obwe rero, nimureke tutunge okushemererwa omu mirimo eyi twine!
ECESHONGORO CA 82 ‘Jwisa Omushana Gwawe’
^ par. 5 Nitukunda Yehova munonga, ni yo nshonga turi kwenda kumukorera byingi omu murimo gweye. Nitwenda ngu twongere aha murimo gwitu, ninga shi twijuze ebiri kushabwa ngu tuhebwe endijo mirimo omu kibina. Konka shi ku twakutaho amani konka tutabihikeho? Ni enki ekiri kubasa kutukwasa kutacweka entege kandi tukaguma twine okushemererwa? Ecokureberaho ca Yesu c’etalanta nikituha eby’okugarukamu by’ebyo bibuzo.
^ par. 2 Amazina agamwe gakahindurwa
^ par. 7 Etalanta ni omushahara ogu omukozi yabire natunga omu myaka eri kuhika ahari 20.
^ par. 15 Benetata ababatizibwe nibahigwa kutaho amani kugira ngu bijuze ebiri kushabwa babe abahereza omu kibina ninga abazehe. Kugira ngu omanye ebiri kushabwa, reba ekicweka ca 5 n’eca 6 omu kitabo Abari kukora ebi Yehova ari kwenda.
^ par. 17 Ori kuyamba omu kuha obuhabuzi ni omuzehe ori kutoranwa kugira ngu ahe obuhabuzi abazehe n’abahereza b’ekibina aha ku bashemerire kuha toku ge, kwebembera Omunara g’Omurinzi n’okushoma za paragurafu omu nterane.
^ par. 64 EKISHUSHANI: Kugira ngu mwenetata abe omwegesa murungi, nacondoza omu bitabo byitu.
^ par. 66 EKISHUSHANI: Omunyanyazi ku yamara kuburira omu buryo obukwatirweho, yaha akakadi omukazi owamuhereza ebyokurya.
^ par. 68 EKISHUSHANI: Omunyanyazi ku yayeteraho entego y’okwereka emitwarize eri kushemeza Yehova, yatangaza ondijo omunyanyazi ari kumuha ekiconco.
