1. Ifa usun chómmóng ra achocho le alapaaló ar angang ngeni Jiowa?

 A CHÓMMÓNG ach angang atun a kakkanoto sópwólóón ei ótót. (Mat. 24:14; Luk. 10:2; 1 Pet. 5:2) Kich meinisin sia mochen unusen angang ngeni Jiowa úkúkún ach tufich. Chómmóng ra akkalapaaló ar angang. Ekkóch ra mochen pioneer, ekkóch ra mochen angang lón Bethel, are álillis lón kaútáán ekkewe imw sia áeá fán iten ach fel ngeni Jiowa. Chómmóng ekkewe mwán Chón Kraist ra achocho ar repwe wiliti chónálillisin mwichefel, are mwán mi ásimaw. (1 Tim. 3:1, 8) Jiowa a fókkun pwapwa ren an kúna úkúkún án néún kewe aramas mochen angang ngeni!​—Kölf. 110:3; Ais. 6:8.

2. Met sia tongeni meefi ika sise tongeni tikeri eú mettóch sia mochen achocho le tikeri lón án Jiowa angang?

² Sia tongeni poputá le lichippúng ika sise tikeri ren langattam fansoun ekkóch mettóch sia mochen achocho le tikeriir lón ach angang ngeni Jiowa. Are eli sia lichippúng pokiten sise chúen tongeni féri ekkóch angang lón án Jiowa mwicheich, pokiten ierich are ren pwal ekkóch popun. (SalF. 13:12) Ina met a fis ngeni Melissa. * A fókkun mochen angang Bethel are fiti ewe Sukulen Chón Afalafala ewe Mwú, nge iei met a erá: “Ua fen chinnap. Me rei pwe ekkena angang, iir masouen chék ai áneán. Fán ekkóch ua meefi lichippúng.”

3. Eli met a lamot ngeni ekkóch ar repwe féri pwe epwe fich ngeniir ekkóch wis lón án Jiowa angang?

³ Eli a lamot ngeni ekkóch alúwél me fépwúl mi péchékkúl ar repwe ásimawóló me ámááraatá ekkóch napanap me mwen an epwe fich ngeniir pwal ekkóch wis. Áwewe chék, eli ekkóch ra tipachem, angangéch le féri kefil, me tipemecheres le álillis. Nge eli a lamot ngeni ekkóch ar repwe káé le alapaaló ar mosonottam, féréchú ar angang, me káé ésúfél. Ika ka fókkun  achocho le ámááraatá ekkena napanap mi lamot ngonuk, eli ekkewe Chón Kraist mwán repwe ewisa ngonuk eú angang. Iei pwóróusen Nick. Atun a 20 ierin, a fókkun lichippúng pokiten ese kewis an epwe emén chónálillisin mwichefel. Iei alon: “Ua meefi pwe eli mi fen wor ai mwáál.” Nge, Nick ese afangafang. A fókkun achocho úkúkún an tufich le álillis lón ewe mwichefel me lón ewe angangen afalafal. Iei a chóni ewe Kúmiin Chón Túmúnú Keangen Ofesilap.

4. Met sipwele káé lón ei lesen?

⁴ Ka lichippúng pokiten kese mwo tikeri eú mettóch ka achocho ngeni lón pekin ngún? Ika ewer, iwe iótek ngeni Jiowa usun me ereni meefiom. (Kölf. 37:5-7) Pwal och, tingorei ekkewe Chón Kraist mwán mi ásimaw ekkóch pesepes wóón ifa usun ka tongeni lipwákéchúló lón óm angang ngeni Kot, me mwirin achocho úkúkún óm tufich le apwénúetá ar emmwen. Ika ka féri ena, eli kopwe tufichin wiseni och wis are tikeri met ewe ka achocho ngeni. Nge minne a fis ngeni Melissa, ewe sia fósun me mwan, eli esap tufich ngonuk iei óm kopwe féri met ka mochen féri fán iten Jiowa. Iwe met ka tongeni féri pwe kopwe chék pwapwapwa? Ren an epwe pélú ena kapas eis, sipwe pwóróus wóón ekkeei mettóch lón ei lesen: (1) minne a tongeni efisi óm pwapwa, (2) usun kalapólóón óm pwapwa, me (3) met ekkewe ka mochen achocho le tikeriir mi alapaaló óm pwapwa.

5. Met a lamot ach sipwe nefótófót wóón ren ach sipwe pwapwa? (Än Salomon Afalafal 6:9)

⁵ Än Salomon Afalafal 6:9, a áweweei met a tongeni álisikich le kúna pwapwa. (Álleani.) Emén aramas mi pwapwa are menemenéch “ren mine a nom ren,” a chék aúcheani ese lifilifil met a nóm ren, áwewe chék ren nónnómun lón ei fansoun. Nge emén mi mocheniaiti pwal och, a chék ákkáneánei met ese tongeni eáni. Iwe met sa káé seni? Ren ach sipwe kúna pwapwa, a lamot ach sipwe nefótófót wóón met ekkewe mi nóm rech, me wóón ekkewe mettóch sia tufichin tikeriir.

6. Ifa ewe kapas áwewe sipwele pwóróus wóón, me met sipwe káé seni?

⁶ Itá mi fókkun tufich ach sipwe chék menemenéch ren met mi fen wor rech? Chómmóng ra ekieki pwe ese tufich pokiten sia kan sani le chék kákkáé le féri minefé mettóch. Nge ren enletin, a tufich. Sia tongeni enletin pwapwa ren ‘mine a nom rech.’ Ifa usun sia tongeni féri ena? Ren ach sipwe silei, sipwe pwóróus wóón án Jesus we kapas áwewe usun ekkewe úlúmén chón angang mi mak lón Mateus 25:14-30. Sipwe káé ifa usun sia tongeni pwapwa, me pwal mwo nge alapaaló ach pwapwa ren ekkewe feiéch mi nóm rech lón ei fansoun.

7. Ekis apwóróusa án Jesus we kapas áwewe usun ekkewe úlúmén chón angang.

⁷ Lón ewe kapas áwewe, ewe mwán a ekiekin sái ngeni fénú towau. Me mwen an epwele sái, a kérato néún kewe chón angang me ngeni emén me emén ekkewe féún moni silifer pwe repwe amanawa. Ena mwán a silei pwe a sókkofesen tufichin néún kana chón angang. Ina popun a ngeni ewe áeménún chón angang nimungeréú, a ngeni ewe érúúeménún chón angang ruungéréú, me a ngeni ewe éúlúménún chón angang engeréú. Ekkewe rúúemén chón angang ra tinikken le amanawa ena moni, nge ewe éúlúménún chón angang, ese wor met e féri ngeni ena moni, iwe ewe masta a atowu.

8. Pwata ewe áeménún chón angang lón ewe kapas áwewe a tongeni pwapwa?

⁸ Ese mwáál, ewe áeménún chón angang a fókkun pwapwa ren án néún we masta ngeni  nimungeréú féún moni silifer. A mmen watte ena moni, me a pwári úkúkún án ewe masta lúkúlúkú. Nge ifa usun ren ewe érúúeménún chón angang? A tongeni lichippúng pokiten ese léllé ewe moni a angei ngeni met ewe áeménún chón angang a angei. Nge met a féri?

9. Met Jesus ese erá usun ewe érúúeménún chón angang? (Mateus 25:22, 23)

⁹ Álleani Mateus 25:22, 23. Jesus ese erá pwe ewe érúúeménún chón angang a song pokiten a chék angei ruungéréú féún moni silifer. Me ese pwal erá pwe ena chón angang a ngúnúngúnúngaw me erá: ‘Pwata e kúkkún met ewe masta e ngeniei seni met a ngeni ewe áeménún chón angang? Ika ewe masta ese aúcheani met ua féri, iwe upwele fen chék ló ireeló ekkeei ruungéréú féún moni silifer me chék pwisin féri met ua mochen.’

10. Met ewe érúúeménún chón angang a fér ngeni ekkewe ruungéréú féún moni?

¹⁰ Ewe érúúeménún chón angang a usun ewe áeménún chón angang le ngeni leten an anganga met a kewis ngeni me a fókkun angang weires fán iten néún we masta. Iwe ena chón angang a apacha ruungéréú féún moni pwe manawen met ewe a anganga. Ewe masta a efeiéchú án ena chón angang tinikken me angang weires. Ena masta ese chék pwapwa ren ena chón angang, nge a pwal lúkú ngeni pwal ekkóch wis!

11. Ifa usun sia tongeni alapaaló ach pwapwa?

¹¹ Pwal ina chék usun, a tongeni lapóló ach pwapwa ika sia angang weires lón ese lifilifil met a kewis ngenikich lón án Jiowa angang. Sipwe ‘awora unusen ach fansoun’ lón ewe angangen afalafal, me unusen álisatá mwékútúkútún  ewe mwichefel. (Föf. 18:5; Ipru 10:24, 25) Ammólnaéchúetá ekkewe mwich pwe kopwe tongeni uwawu meefiom mi apéchékkúla chón mwich. Ngeni leten óm apwénúetá meinisin óm kewe kinikin lón ach kewe mwich lón weekday. Ika a kewis ngonuk óm kopwe álillis lón eú angang lón ewe mwichefel, kopwe warekkái me uwólúkúlúk lón óm angang. Kosap ekieki pwe eú angang ka kewis ngeni le féri ese lamot, iwe ese pwal lamot óm kopwe áeáéchú óm fansoun le féri. Achocho le elipwákéchukóló. (SalF. 22:29) Lapólóón óm angang weires lón óm angang ngeni Jiowa me lón wisom kewe, epwe ina mwittirilóón feffeitáóm me lapólóón óm pwapwa. (Kal. 6:4) Kopwe pwal kúna pwe epwe mecheresiló óm pwapwa atun ekkewe ekkóch ra wiseni eú wis ka fókkun mochen wiseni.​—Rom 12:15; Kal. 5:26.

12. Met a álisi Melissa me Nick le alapaaló ar pwapwa?

¹² Ke mi chemeni Melissa ewe sia fen fós usun lón parakraf ruu, ewe mi mochen angang Bethel are fiti ewe Sukulen Chón Afalafala ewe Mwú? Inaamwo ika ese pwénútá met ekkena a mochen, nge a erá: “Ua fókkun achocho lón ai angangen pioneer me sótuni le fiti meinisin ekkewe alen afalafal. Ina met a eselipato watteen ai pwapwa.” Nge met Nick a féri atun a lichippúng ren an ese kefil pwe epwe emén chónálillisin mwichefel? Iei met a erá: “Ua nefótófót wóón ekkewe mettóch ua tufichin féri, áwewe chék ren ai fiffiti ewe angangen afalafal, me uwawu meefiei mi apéchékkúla chón mwich. Ua pwal apply ngeni angangen Bethel me mwirin chék eú ier ua ketiw.”

13. Met epwe fis ika ka angang weires lón wisom iei? (Än Salomon Afalafal 2:24)

¹³ Itá a tongeni fis pwe kopwe pwal wiseni ekkóch wis lón ekkan rán ika ka fókkun angang weires lón wisom iei? A tongeni fis, usun chék met a fis ngeni Nick. Nge ika ese fis, iwe kopwe usun Melissa, a tongeni lapóló óm pwapwa me kopwe fókkun chék pwapwa ren met ka féfféri fán iten Jiowa. (Álleani Än Salomon Afalafal 2:24.) Epwe pwal lapóló óm pwapwa pokiten ka silei pwe ka apwapwaai néúch we Masta, Jesus Kraist.

14. Met a lamot ach sipwe kan chechchemeni atun sia ekieki usun met ekkewe sia mochen achocho ngeniir lón ach angang ngeni Jiowa?

¹⁴ Ika sia achocho úkúkún ach tufich lón ach angang ngeni Jiowa iei, a itá wewe ngeni pwe esap pwal chúen lamot ach sipwe akkalapaaló ach angang ngeni? Esap ina weween! A lamot ach sipwe isetiw ekkewe mettóch sipwe achocho ngeniir mi álisikich le lipwákéchúló lón ach angangen afalafal me angangen asukul, me álilliséch ngeni pwiich kewe. Sipwe tikeri met ekkena sia mochen achocho ngeniir ika sia mirit me tipetekison le nefótófót wóón ach ákkálisi ekkewe ekkóch lap seni ach nefótófót wóón pwisinkich.​—SalF. 11:2; Föf. 20:35.

15. Ikkefa ekkóch mettóch ka tongeni achocho ngeniir mi alapaaló óm pwapwa?

¹⁵ Ikkefa ekkewe mettóch ka tongeni pwisin isetiw pwe kopwe achocho ngeniir? Tingorei Jiowa an epwe álisuk le esilla ika ka tufichin tikeri ekkewe mettóch ka achocho ngeniir. (SalF. 16:3; Jas. 1:5) Ka tongeni achocho le tikeri eú me lein ekkewe mi mak lón  parakraf eú, áwewe chék ren óm auxiliary pioneer are regular pioneer, angang Bethel are álillis lón angangen kaútáán ekkewe imw sia áeá fán iten ach fel ngeni Jiowa? Are eli ka tongeni káé pwal eú fós are ló afalafal lón pwal eú leeni. Ren óm kopwe silei met kopwe féri, ppii ewe puk Organized to Do Jehovah’s Will sópwun 10 (Ach Angangen Afalafala ewe Mwú minen March 2007.) Me ka tongeni pwal fós  ngeni ekkewe mwán mi ásimaw lón óm we mwichefel. * Atun ka achocho le tikeri ekkena mettóch, aramas repwe kúna óm feffeitá me epwe lapóló óm pwapwa.

16. Met ka tongeni féri ika kese tufichin tikeri eú mettóch ka mochen achocho ngeni iei?

¹⁶ Ifa usun ika ren mwo iei, kese tufichin tikeri eú me lein ekkeei mettóch sia fen fósur lón ei lesen? Achocho le isetiw met ka tufichin tikeri. Sipwe ppii ekkóch mettóch eli ka tongeni achocho le tikeriir.

17. Met emén mwán Chón Kraist a tongeni féri pwe epwe lipwákéchúló lón an asukul me ren 1 Timoty 4:13, 15?

¹⁷ Álleani 1 Timoty 4:13, 15. Ika en emén Chón Kraist mwán mi papatais, ka tongeni angang wóón óm kopwe lipwákéchúló lón óm tufichin fós me asukul. Pwata? Pokiten óm “fokun achocho” lón óm állea, fós, me asukul, epwe fókkun álisi ekkewe chón aúseling. Achocho le káé me apwénúetá eú me eú ekkewe napanapen afalafal mi affatetiw lón ewe puk Achocho lón Óm Állea me Asukul. Káé eú me eú, akkasóssót lón imwom me achocho le eáni ena napanapen afalafal lón óm kewe kinikin. Kútta álillis seni pwal emén soufén are pwal ekkóch mwán mi ásimaw iir mi “angang weires lon ar afalafal me asukula aramas.” * (1 Timoty 5:17) Kosap chék nefótófót wóón óm apwénúetá met ka káé seni ena puk, nge kopwe pwal nefótófót wóón óm ákkálisi ekkewe chón aúseling le apéchékkúlaló ar lúkú are wóón óm amwékútúúr le apwénúetá met ra káé. Óm féri ena, epwe alapaaló óm pwapwa me ar pwapwa.

18. Met a tongeni álisikich le tikeri met ekkewe sia mochen achocho ngeniir lón ach angangen afalafal?

 ¹⁸ Kich meinisin a wor wisach le afalafala me álisi aramas le wiliti Chón Kraist. (Mat. 28:19, 20; Rom. 10:14) Ka mochen elipwákéchukóló lón ena angang mi aúchea? Iwe kopwe káé ewe Asukul puk me mwirin isetiw met ekkewe ka mochen achocho ngeniir pwe epwe álisuk le apwénúetá met ka káé. Ka pwal tongeni kúna ekkewe kapasen emmwen mi álilliséch seni ewe Manawach me Ach Angangen Afalafal Minen Káé fán Iten Mwich me ekkewe alen pwóróusfengen lón ekkewe video mi ffich lón ach kewe mwich lón weekday. Sótuni ekkena minen álillis me ppii ika menni leir a kon álilliséch me reom. Óm apwénúetá ekkena kapasen emmwen, epwe álisuk le lipwákéchúló me alapaaló óm pwapwa.​—2 Tim. 4:5.

19. Ifa usun kopwe tongeni ámááraatá napanapen Chón Kraist kewe?

¹⁹ Atun ka ekieki met ekkewe ka mochen achocho ngeniir, kosap tunaló ei mettóch mi kon lamot, ina óm ámááraatá óm napanapeni napanapen Chón Kraist kewe. (Kal. 5:22, 23; Kol. 3:12; 2 Pet. 1:5-8) Ifa usun kopwe féri ena? Áwewe chék, eli ka mochen apéchékkúlaló óm lúkú. Ka tongeni álleani ekkewe lesen lón néúch kewe puk mi awora kapasen emmwen mi álilliséch wóón ifa usun kopwe apéchékkúlaló óm lúkú. Kopwe enletin kúna álillis seni óm katol kinikinin ewe JW Broadcasting mi pwári ifa usun pwiich kewe ra isetiw leenien áppirú ren watteen ar lúkú atun ra kúna sókkopaten sóssót. Mwirin, ppii ifa usun ka tongeni áppirú ar lúkú lón manawom.

20. Met sia tongeni féri le alapaaló ach pwapwa nge ekisikisaaló ach lichippúng?

²⁰ Ese wor tipemwaramwar pwe kich meinisin sia mochen alapaaló ach angang ngeni Jiowa lap seni met sia tongeni féri lón ei fansoun. Lón án Kot we ótót séfé, sipwe tufichin unusen angang ngeni. Nge ren mwo iei, ika sia féri úkúkún ach tufich lón ese lifilifil met sia tongeni féri, sia tongeni alapaaló ach pwapwa nge ekisikisaaló ach meefi lichippúng. Nge lap seni meinisin, sipwe elingaaló me mwareiti Jiowa, ach we “Kot mi pwapwa.” (1 Tim. 1:11, NW) Ina minne, ousipwe pwapwa ren ekkewe angang sia eáni iei!