NSUNZO 33
Kaagalala na Mabasa Attomeliwiwe
“Ekala ojavo ena weyo, ehili weddana dhorohedha.”—KOH. 6:9.
JIBO 111 Dhilobo Dhinnagalaliha
DHINASUNZE IYO *
1. Txini enkosa attu enjene wi amulabelege Yehova mpaka apale vanwodhelani?
VENEVA VANADDAMELA omagomo wa elabo, iyo ninokaana mabasa menjene a okosa. (Mt. 24:14; Lk. 10:2; 1 Ped. 5:2) Iyo notene ninfuna nimulabele Yehova mpaka apale vanwodhelihu. Enjene anowenjedhedha mabasa awa olaleya. Ena anofuna olaba ninga apionero. Enagu akana efunelo yokamihedha mabasa Obeteli obe omaga. Abali enji anovilibihedha wila akale adhari okamihedha vina anddimuwa a mmulogoni. (1 Tim. 3:1, 8) Yehova onowagalala agawonaga adhari aye alabaga na guru mabasa-mabasavi!—Masal. 110:3; Iza. 6:8.
2. Nigahiwodhe wakwaniha dhogana dhehu niniwamo dhavi?
2 Dila dhina kinwodheya wakwaniha dhogana dhehu momaguva ninga mwafunelihu. Ninokumuwa nigazinddiyela wi nihunuwelavo wila nakwanihe yogana yehu obe nigaziwa wi nikaana makattamiho abuwene annitximiha okaana dhoganadha. (Gano 13:12) Jijene empadduweli Melissa. * Iyene wanfuna venjene olaba o Beteli obe okosa Eskola ya Anamalaleya a Omwene. Iyene ohiloga: “Vyaka dhaga dhikwaranya wi ddittikitte njangara na mabasaya. Miyo kaddinawodhe wakwaniha dhogana dhaga. Dila dhina, ddinkala okumuwene.”
3. Mpaddi gani onfwanyela muttu wogolela ahinatti ottomeliwa mabasa mmulogoni?
3 Makattamiho angumanana azombwe bottiyana, txino anofwanyela okaana mikalelo dhapama wi awodhe wakwaniha dhogana dhawa. Ena mwa awene attu a eziwelo, attu anziwa okosa dhosakula dhapama vina ahikaana guru dhottiddana mabasa. Masiki dhawene, ena mwa awene anofwanyela okala attu okurumuwa, anziwa okosa mabasa nofwaseya vina okala attu ana nriho. Ndowe noone yotagiha ya Nick. Vaniye vyaka 20, wahikubanya venjene sabwa yohittomiwa ninga mudhari wokamihedha. Nick ohiloga: “Miyo ddobuwela wila yakalawo elobo yahali deretu na miyo.” Mbwenye iyene keyeleli mundduni. Wankosa mpaka apale vawodhiye mmabasani attomeliwiye. Ovano Nick onokosa mpaddi wa asogoreli a Filiali.
4. Txini enasekeserhe iyo mwari mwa nsunzo ntti?
4 Weyo oli wokubanyene sabwa yohiwodha wakwaniha dhogana dhawo dhomuyani? Akala jijuwene, kamwaddela Yehova eniwamo weyo. (Masal. 37:5-7) Ottiya ejo, kakumbire malago abali adhile vawale alabaga mabasa a Yehova wila awukamihedhe wenjedhedha omulabela wawo Mulugu. Kavilibihedhe ovirihamo malago analoge awene, dhahene txino onodha wakwaniha dhogana dhawo. Ninga Melissa ologiwe mundduni, dhogana dhintadela iyo dhinodhaga okala yorutxa wakwanihedha. Egapadduwa dhahene ninawodhe dhavi okaanavi wagalala? Wila nakule nivuzona, ninele woona mwari mwa nsunzo ntti (1) dhilobo dhindana wagalala, (2) mukalelo wa wenjedhedha wagalala vina (3) dhogana dhinfwanyelela iyo okaana wila nagalalegevi.
TXINI ENANIVAHE WAGALALA
5. Wila nihirimeliwe wagalala ninfwanyelela ozuzumela eni? (Kohelét 6:9)
5 Kohelét 6:9, enologa elobo enwodha onivaha wagalala. (Kengesa.) Muttu onjavo “ena iyene” onovaha ttima eniyena obe onowagalala na dhiniyena. Oku, onedda na dhorohedha, onotamela ehinwodhiye okaana. Ninsunzavo eni na mazu aba? Wila nihirimeliwe wagalala, ninofwanyela ozuzumela dhina iyo vina ogana okosa esile dhinwodhihu.
6. Musibo gani wa Yezu onasekeserhe iyo vina onanisunzihe eni?
6 Enowodheya wagalala na dhilobo dhina iyo? Attu enjene anubuwela wi nne, sabwani enji anoziveliwa mabasa maswa. Mbwenye enowodheya. Ninga moonelihu kaninfwanyela ojavo “dhina iyo” bahi. Ninlogela nni dhahene? Wila nifwanye yowakulaya, ndowe noone musibo wa Yezu onloga mwaha wa kobiri, onfwanyeya va Mateu 25:14-30. Ninele woona ennisunziha musiboya mwaha wa ofwanya wagalala vina wenjedhedha wagalala wehu na ejile enihuna.
NENJENDHE DHAVI WAGALALA WEHU
7. Kagwaddela musibo wa Yezu onloga mwaha wa kobiri.
7 Mmusiboni wa kobiri, Yezu ohiloga mwaha wa mulobwana wafuna okosa oleddo. Ahinatti odhowa, owakuwela adhari aye bavaha kobiri yoromana marondda. * Iyene wanziwa wi adhari aye ahikaana ewodhelo yottiyana. Noona, mmodha ohimuttiyedha kobiri dha nddarama matxikwi matanu, mwina matxikwi meli mwinagu txikwi nimodha. Adhari eli oroma, ahimulabela nabwiyawa na guru. Mbwenye waneraru, kakosilena elo kobiri ettambirhiliye, nona, nabwiyaye ohimuttamagiha.
8. Txini emuttukuleli mudhari woroma ologiwe mmusiboni wagalala?
8 Mudhari woroma, owagalala muttambirhiliye matxikwi matanu wi aromena marondda. Kobiri dhattambiriliye dhahinjiva vaddiddi yoneyaga kakamwe wi nabwiyaye wannimuroromela venjene! Kito mudhari wanawili? Iyene agahinyimuwa sabwa yohittambira kobiri yakakene na dha mudhari woroma. Mbwenye txini ekosiliye?
Txini ensunza iyo na mudhari wanawili ologiwe mmusiboni wa Yezu? (1) Iyene ohittambirha kobiri dhanddarama matxikwi meeli dhivahiwiye na nabuye. (2) Ohivilibihedha wila enjedhedhe kobiridha. (3) Iyene owenjedhedha kobiri dha nabuye (Kang’ana ddima 9-11)
9. Txini ehilogile Yezu sabwa ya mudhari wanawili? (Mateu 25:22, 23)
9 Kengesa Mateu 25:22, 23. Yezu kalogile wi mudhari wanawili wahisilidhiwa sabwa ya ottambira kobiri matxikwi meli. Yezu vina kalogile wi mudhariya wahiroma orogela alogaga: ‘Kaddinrumela wi iyene oddivahile kobiri eji bahi. Miyo dili namalaba wadderetu opitta oddule ovahiwe kobiri matxikwi matanu! Vowi nabwiyaga kanddivaha ttima, ddinovuhela kobiri esi bili ddidhowe ottidda mabasa anaddipurele ddamwinya.’
10. Txini ekosilena mudhari wanawili kobiri matxikwi meli ettambiriliye?
10 Dhahene ninga mudhari woroma, wanawili ohilabiyedha deretu kobiri dhivahiwiye na nabwiyaye. Yopurelamoya, iyene ohejendhedha kobiri dhattambiriliye. Nanda wahiliviwa sabwa ya ovilibihedha waye vina olabihedha deretu kobiri ettiyedhiwiye. Nabwiyaye ottiya wagalalavi na mabasa akosiliye, ohimukuluvelana mabasa meena!
11. Iyo ninawodhe dhavi wenjedhedha wagalala wehu?
11 Nigavilibihedha olaba mabasa-mabasavi attomeliwe iyo mmulogoni ninele wagalala. ‘Nivilevele’ mmabasani olaleya vina a mmulogoni. (Mer. 18:5; Aheb. 10:24, 25) Kadhowa omattugumanoni bumalile ovisasanyedha deretu wi ovahe dhowakula dhoddiginya murima. Ogavahiwa epaddi mmatugumanoni a vari va sumana ovisasanyedhe pama. Anddimuwa agokumbira okosa mabasa-mabasavi kakosa na mudhidhiya wi ororomeliwe. Kuwubuwele wi kunfwanyela ononga mudhidhi na mabasa attomeliwiwe. Kakosa muli-mwetemwene wi wunuwiye ewodhelo yawo. (Gano 22:29) Ogavilibihedhaga onele wunuwa momaguva mpaddi womuyani vina onele wagalala. (Gal. 6:4) Onele wagalala vina ogamona mbali attambirhaga ettomo egaziveliwe weyo okaana.—Rom. 12:15; Gal. 5:26.
12. Txini emukamihedhile Melissa na Nick okaana wagalala?
12 Onomubuwela Melissa, wafuna olaba Obeteli obe okosa Eskola ya Anamaleleya a Omwene? Iyene kawodhile wakwaniha yogana yaye mbwenye koona elogiliye: “Miyo ddinovilibihedha mmabasani mwaga a opionera vina ddinolaba na mikalelo dhottiyana-ttiyana dholaleya. Eji enoddagalaliha venjene.” Nick okosile eni muhittomeliwiye okala mudhari wokamihedha mmulogoni? Iyene ohiloga, “Miyo ddanzuzumela mabasa anemi—ninga odhowa omalaleyoni vina ovaha dhowakula dholibiha. Ddihittikitta njangara nodhowa olaba o Beteli yaka yafwarela ddahikuweliwa wi ddirome olaba.”
13. Ogavilibihedha mmabasani attomeliwiwe yodhelavoya enakale evi? (Kohelét 2:24)
13 Weyo ogavilibihedha mmabasani attomeliwiwe onele okuluveliwana dhokosa dhina musogorho? Nde ondaga okuluveliwana, dhahene ninga empadduweli Nick. Akala kunaakela mabasa meena, ninga Melissa, enowodheya okaanavi wagalala vina oziveliwana mabasa ankosiwe. (Kengesa Kohelét 2:24.) Wagalala wawo onele wakwana, ogaziwa wi Nabuya wehu Yezu Kristu onottaba na mabasa ankosiwe.
DHOGANA DHINEJENDHEDHA WAGALALA WEHU
14. Jabure ovilibihedha okaana dhogana dhomuyani?
14 Akala iyo niromile omulabela Yehova ovanene ejo entapulela wi kaninfwanyela ovilibihedha wenjedhedha mabasa animukoselihu? Kahiye mwenemo! Enofuneya okaana dhogana dhomuyani. Dhogana esi dhinonikamihedha wenjedhedha mabasa ehu olaleya na osunziha vina wakamihedha abalihu. Wila nakwanihe dhoganadha ninofwanyela okala attu a zelu, ovyang’anela vina wazuzumela attu ena.—Gano 11:2; Mer. 20:35.
15. Dhogana gani dhigadhile wenjedhedha wagalala wehu?
15 Dhogana gani dhigawodhiliwe okaana? Kamukumbirhe Yehova wi awukamihedhe oziwa dhogana dhigawodhiliwe wakwaniha. (Gano 16:3; Tia. 1:5) Egahiwodheya weyo okala—pionero wokamihedha obe wa mudhidhi wotene? Okamihedha Obeteli obe mabasa omaga? Enowodheya wenjedhedha mabasa awo olaleya modhela osunza elogelo eswa obe omwalela elabo yina. Wi ononelemo makaniya deretu koona ddima 10 ya nivuru Organizados para Fazer a Vontade de Jeová obe kaloga na anddimuwa a mmulogoni sabwa ya makaniya. * Venevo vanvilibihedha weyo wakwaniya dhogana dhawo, etene anele woona wunuwa wawo mpaddi womuyani nanda onele wenjedhedha wagalala wawo.
16. Onakose eni akala kunwodha wakwaniha dhogana dhafuniwe?
16 Ki akala kunwodha wakwanihedha dhogana esi dhilogiwe veneva? Katamela dhogana dhinwodhiwe wakwanihedha. Koona dhotagiha dhing’onovi.
Dhogana gani dhigawodhile weyo wakwaniha? (Kang’ana ddima 17) *
17. Mowiwanana na 1 Timóteo 4:13, 15, txini enfwanyela okosa mbali wila akale namasunziha wapama?
17 Kengesa 1 Timóteo 4:13, 15. Akala wa mbali wobatiziwa konuwiha ewodhelo yawo yokosa madiskursu vina osunziha. Sabwaya? Sabwani ‘ogavilevela’ wunuwiha ewodhelo yawo ya wengesa, okosa diskursu vina osunziha onele wakamihedha abale anuvuruwana. Ogane osunza vina ovirihamo malago anvaha brochura Ovilibihedhe Wengesa na Osunziha. Wonege nsunzo nimodha-nimodha vina otagihege vatakulu nanda ogavahiwa epaddi ovilibihedhe ovirihamo esunziliwe. Omukumbirhe nikamihedho mukamihedhi wa namalaga obe anddimuwa ena a mmulogoni “makamaka abale antabuwela izo yolaleya, yosunziha.” * (1 Tim. 5:17) Yofuna yawo kikale bahi ononelamo malago anfwanyeya mbrochuranimwa mbwenye wakamihedha anamewa wunuwiha nroromelo nawa vina ovirihamo dhinsunziha weyo. Okosa ejene enele wenjedhedha wagalala wawo vina wa attu otene anuvuruwana.
Dhogana gani dhigawodhile weyo wakwaniha? (Kang’ana ddima 18) *
18. Txini enanikamihedhe wenjedhedha ewodhelo yehu yosunziha?
18 Notene nihikaana mabasa a olaleya vina wakosa anamafwara. (Mt. 28:19, 20; Rom. 10:14) Ogahifuna wenjedhedha ewodhelo yawo mmabasani aba amakamaka? Akala pumwenemo, kavilibihedhe osunza vina ovirihamo magano anfwanyeya mbrochurani Ovilibihedhe Wengesa na Osunziha! Ogasunzaga, kemetxa maddile anfuna weyo wakwanihedha. Mabasa na Yeddelo Yehu ya Okristu vina mavidiyu anloga mwaha wa oroma makani a mBibiliani anlagihiwa mmatugumanoni a vari va sumana, anodhana malago annikamihedha wenjedhedha ewodhelo yehu mmabasani a olaleya. Keha malago aba wi woone akala anowuvevuwela. Ogafwara malago aba onele okala namasunziha wa ttotto vina onele wenjedhedha wagalala wawo.—2 Tim. 4:5.
Dhogana gani dhigawodhile weyo wakwaniha? (Kang’ana ddima 19) *
19. Onawodhe dhavi okaana makalelo Okristu?
19 Kudduwale wi yogana yamakamaka enfwanyela weyo otamela,—okaana mikalelo dhinimwagalaliha Yehova. (Gal. 5:22, 23; Kol. 3:12; 2 Ped. 1:5-8) Onawodhe dhavi okaana mikalelo esi? Motagiha, akala weyo onfuna okaane nroromelo novadda, egahikala yamalago wengesa dhipano dhina iyo dhinloga mwaha wa makani anawukamihedhe ovaddiha nroromelo nawo. Mavidiyu menjene anfwanyeya mu JW Broadcasting® anowaloga abali atonyihedhile nroromelo vafwanyiwani makattamiho. Woona mavidiyu aba vina ofwara dhotagihadha enele wukamihedha venjene.
20. Ninawodhe dhavi wenjedha wagalala wehu?
20 Notene ninofuna okosa venjene mmabasani a Yehova. Mwilaboni eswa ninele omulabela na mukalelo woligana. Masaka abano ninofwanyela opura mudhidhi ona iyo nimulabelaga, nigakosa dhahene ninele wagalala venjene. Yamakamakaya ninele omuttittimiha Yehova oli ‘Mulugu wottaba.’ (1 Tim. 1:11) Kaagalala na mabasa attomeliwe weyo!
JIBO 82 ‘Nittiye Txeza Emoneye’
^ par. 5 Iyo ninomukwela venjene Yehova, noona ninovilibihedha omulabela mpaka apale vanwodhelihu. Ninovilibehedha mmabasani olaleya vina okaana ettomo mmulogoni. Kito nigavilibihedha wakwaniha yogana yehu mbwenye nihiwodha? Ninawodhe dhavi odhowanavi mabasa a Yehova owagalalene? Ninofwanya yowakulaya vamusiboni ologile Yezu mwaha wa kobiri.
^ par. 2 Mazina meena ahitxinjiwa.
^ par. 7 ONONELEMO PAMA: Txikwi nimodha yali kobiri enligana na enttambirha namalaba-namalabavi mwari mwa vyaka 20.
^ par. 15 Ninowalibiha abali obatiziwa wunuwiha mikalelo dhofwanyelela wi akale adhari okamihedha obe anddimuwa a mmulogoni. Wila ononelemo enfwanyela weyo okosa wi wakele vittomo esi koona kapitulu 5 na 6 ya nivuru Organizados para Fazer a Vontade de Jeová.
^ par. 17 ONONELEMO PAMA: Mukamihedhi wa namalaga, munddimuwa wa mulogo ottomeliwe wavaha malago vawavene abali ankosa dhipaddi mmulogoni oromana adhari okamihedha vina anddimuwa a mmulogoni egakala yofuneya.
^ par. 64 FOTO YA NIKUKU: Mbali onopepesa mmanivuruni ehu wila awodhe wakwaniya yogana yaye yokala namasunziha wa ttotto.
^ par. 66 FOTO YA NIKUKU: Murogora ona yogana ya olaleya vattaddo ononvaha servente wa mu restaurantini kartau n’ovolowana mwinternetini.
^ par. 68 FOTO YA NIKUKU: Muyana mwina ona efunelo yokalavi muttu wotapuwa mada, onodhowa vatakulu va murogora mwina wa mmulogoni mwaye wi anvahe sagwati.
