1. ¿Chuqui woliʼ mel cabʌl hermanojob chaʼan miʼ ñumen melbeñob i yeʼtel Jehová?

 WOLIX i lʌcʼtiyel i jilibal ili pañimil (mulawil) i cabʌlto eʼtel (troñel) yom bʌ mi lac mel (Mt. 24:14; Lc. 10:2; 1 P. 5:2). Ti lac pejtelel la com lac ñumen melben i yeʼtel Jehová cheʼ bajcheʼ cʼamel mi lac mejlel. I cabʌlob woli (choncol) bʌ i ñumen melob, an yomoʼ bʌ sujtel bajcheʼ precursor, yambʌlob yomob majlel ti Betel i an yomoʼ bʌ coltaya chaʼan miʼ mejlel yaʼ baqui miʼ chʼujutesʌntel Jehová. I cabʌl hermanojob woli (yʌquel) i chaʼleñob wersa chaʼan miʼ yochelob bajcheʼ siervo ministerial o anciano (1 Ti. 3:1, 8). Miʼ mejlel la cʌl chaʼan Jehová tijicña miʼ yubin cheʼ miʼ qʼuel chaʼan jiñi i wiñicob yomob i melben i yeʼtel ti jumpʼejlob i pusicʼal (Sal. 110:3; Is. 6:8).

2. ¿Bajcheʼ yubil miʼ mejlel la cubin lac bʌ cheʼ bʌ an chuqui maʼañic miʼ mejlel lac taj?

² Pero tajol mach tijicñayic mi la cubin cheʼ miʼ ñumel majlel jiñi ora i maʼañic mi lac taj jiñi la com bʌ. O tajol cʼux mi la cubin cheʼ bʌ an tac chuqui maʼañic bʌ miʼ mejlel lac mel tiʼ yorganización Jehová tiʼ caj jiñi lac jabilel o tiʼ caj bajcheʼ añonla (Pr. 13:12). Jiñʌch muʼ bʌ i yujtel tiʼ tojlel Melissa, * yom bʌ majlel ti Betel o ti jiñi Cʌntesʌntel chaʼan xsubtʼañob chaʼan bʌ i yumʌntel Dios. Miʼ yʌl: «Ñoxoñix i maʼañix mic mejlel ti majlel yaʼi. An i tajol mi cubin c chʼijyemlel».

3. ¿Chuqui yom miʼ melob chaʼtiqui uxtiquil chaʼan miʼ mejlel i tajob yambʌ eʼtel tac?

³ An xcolelobto bʌ yicʼot cʼocʼob, pero ñaxan yom miʼ tajob i ñaʼtʌbal yicʼot wem bʌ melbalʌl (chaʼlibal) tac chaʼan miʼ ñumen  aqʼuentelob yambʌ eʼtel tac. Tajol cabʌl chuqui yujilob, chʼejlob yicʼot tijicñayob, pero tajol yomto miʼ ñumen pʌsob i pijt, tsajalob (xucʼulob) tiʼ yeʼtel yicʼot miʼ qʼuelob ti ñuc yambʌlob. Mi mucʼʌch i chaʼleñob wersa i tajob wen tac bʌ i melbal, tajol miʼ yʌqʼuentelob jiñi i yeʼtel cheʼ bʌ mach pijtʌbilobic i chaʼan. Laʼ laj qʼuel tsaʼ bʌ ujti tiʼ tojlel Nick. Cheʼ bʌ an 20 i jabilel mach tijicñayic tsiʼ yubi come maʼañic tsaʼ otsʌnti ti siervo ministerial. Miʼ yʌl: «Tsaʼ c ñaʼta chaʼan an chuqui mach weñic woli c mel». Pero tsiʼ bej chaʼle wersa, tsiʼ yʌcʼʌ i ñaʼtʌbal ti chuqui mucʼʌch i mejlel i mel ti congregación yicʼot ti subtʼan. Wʌle ochem ti jumpʼejl Comité chaʼan sucursal.

4. ¿Chuqui mi caj laj qʼuel ti ili estudio?

⁴ ¿Chʼijyemonbala tiʼ caj maxto lac taja junchajp la com bʌ? Mi cheʼʌchi, la lac suben Jehová bajcheʼ yubil mi la cubin (Sal. 37:5-7). Laʼ lac chaʼlen tʼan la quicʼot jiñi hermanojob añobix bʌ i ñaʼtʌbal chaʼan miʼ subeñoñobla chuqui yom bʌ mi lac weñʼesan i laʼ lac chaʼlen wersa chaʼan mi lac jacʼ chuqui miʼ subeñoñobla. Mi cheʼʌch mi lac mel, tajol mi caj i tsʼʌctiyel jiñi la com bʌ. Pero ¿ixcu mi wʌle maʼañic miʼ mejlel lac taj jiñi la com bʌ cheʼ bajcheʼ Melissa? ¿Chuqui miʼ mejlel lac mel chaʼan chʌn tijicñayonla? Ti ili estudio an uxchajp chuqui mi caj laj qʼuel. Ñaxam bʌ, chuqui miʼ mejlel i yʌqʼueñonla lac tijicñʌyel. I chaʼpʼejlel, chuqui miʼ mejlel lac mel chaʼan ñumen tijicñayonla. I yuxpʼejlel, chuqui ti meta miʼ mejlel la cʌqʼuen lac bʌ chaʼan ñumen tijicñayonla.

5. ¿Baqui yom mi la cʌcʼ lac ñaʼtʌbal mi la com la cubin lac tijicñʌyel? (Eclesiastés 6:9).

⁵ Mi la com la cubin lac tijicñʌyel yom mi lac mel muʼ bʌ i yʌl Eclesiastés 6:9 (pejcan). Juntiquil lac piʼʌl yom tijicña yicʼot jiñi am bʌ i chaʼan, junchajp jiñʌch yicʼot jiñi am bʌ i chaʼan ili ora. Pero jiñi muʼ bʌ i ‹cabʌl pensalin chuqui anto yom i chaʼan› tiʼ pejtelel ora woliʼ ñaʼtan jiñi mach bʌ añic miʼ mejlel i taj. ¿Chuqui mi laj cʌn? Chaʼan mi la com lac taj lac tijicñʌyel yom mi la cʌcʼ lac ñaʼtʌbal ti chuqui am bʌ lac chaʼan, i mach jiñic ti chuqui mach bʌ añic miʼ mejlel lac taj.

6. ¿Chuqui ti parábola mi caj laj qʼuel, i chuqui mi caj laj cʌn?

⁶ Ti lac pejtelel mi lac mulan laj cʌn chuqui tsijiʼ bʌ. Cheʼ jiñi, ¿muʼ ba i mejlel la cubin lac tijicñʌyel yicʼot jiñi am bʌ lac chaʼan? Mucʼʌch. Muʼto i mejlel lac ñusan lac bʌ yicʼot jiñi am bʌ lac chaʼan. ¿Bajcheʼ? Chaʼan mi lac ñaʼtan laʼ laj qʼuel jiñi parábola chaʼan talento tsaʼ bʌ i yʌlʌ Jesús muʼ bʌ lac taj ti Mateo 25:14-30. Mi caj laj qʼuel chuqui miʼ mejlel lac mel chaʼan tijicñayonla i chaʼan miʼ ñumen pʼojlel, mach yʌlʌyic bajcheʼ yilal añonla.

7. Tsʼitaʼ alʌ jiñi parábola chaʼan bʌ jiñi talento tsaʼ bʌ i yʌlʌ Jesús.

⁷ Yaʼ ti parábola tsaʼ bʌ i yʌlʌ Jesús tsiʼ taja ti tʼan juntiquil wiñic tsaʼ bʌ majli ti xʌmbal. Pero tsiʼ ñaxan pʌyʌ jiñi xyaj eʼtelob i chaʼan i tsiʼ yʌqʼueyob talento tac chaʼan mi cʼʌñob ti eʼtel. * Juntiquil tsiʼ yʌqʼue joʼpʼejl talento, yambʌ tsiʼ yʌqʼue chaʼpʼejl i yambʌ jumpʼejl, jujuntiquil cheʼ bajcheʼ miʼ mejlel i cʼʌn ti eʼtel. Jiñi ñaxam bʌ chaʼtiquilob tsiʼ cʼʌñʌyob ti eʼtel i tsiʼ ñumen tajayob taqʼuin. Pero Jiñi i yuxticlel maʼañic chuqui tsiʼ mele, jin chaʼan jiñi i yum tsiʼ chilbe i yeʼtel.

8. ¿Chucoch miʼ mejlel i yubin i tijicñʌyel jiñi ñaxam bʌ xyaj eʼtel tsaʼ bʌ ajli yaʼ ti parábola?

⁸ Tajol jiñi ñaxam bʌ xyaj eʼtel tijicña tsiʼ yubi cheʼ bʌ jiñi i yum tsiʼ yʌqʼue joʼpʼejl talento. Cabʌlʌch taqʼuin jiñi, i tsiʼ pʌsʌ chaʼan jiñi i yum  mucʼʌch i wen ñop tiʼ tojlel. ¿I chuqui miʼ mejlel la cʌl tiʼ tojlel jiñi i chaʼticlel xyaj eʼtel? Tsaʼ mejli i yubin i chʼijyemlel cheʼ bʌ tsiʼ qʼuele chaʼan mach cabʌlic talento tsaʼ aqʼuenti bajcheʼ jiñi ñaxam bʌ. Pero ¿chuqui tsiʼ mele?

9. ¿Chuqui maʼañic tsiʼ yʌlʌ Jesús tiʼ tojlel jiñi i chaʼticlel bʌ xyaj eʼtel? (Mateo 25:22, 23).

⁹ (Pejcan Mateo 25:22, 23). Jesús maʼañic tsiʼ yʌlʌ chaʼan jiñi i chaʼticlel xyaj eʼtel tsaʼ michʼa ti caj chaʼpʼejl jach talento tsaʼ aqʼuenti. I maʼañic tsiʼ yʌcʼʌ ti ñaʼtʌntel chaʼan tsiʼ yʌlʌ: «¿Jin jach ba mi caj cʌqʼuentel iliyi? ¡Pero wen cujil tsaʼ eʼtel jaʼel bajcheʼ jiñi tsaʼ bʌ aqʼuenti joʼpʼejl talento! Mi jiñi c yum maʼañic miʼ qʼuelon ti ñuc mi caj c muc ti yebal lum ili chaʼpʼejl talento i mi caj c mel queʼtel».

10. ¿Chuqui tsiʼ mele yicʼot i talento jiñi i chaʼticlel xyaj eʼtel?

¹⁰ Cheʼ bajcheʼ tsiʼ mele jiñi ñaxam bʌ xyaj eʼtel, jiñi i chaʼticlel tsiʼ chʼʌmʌ ti ñuc chuqui tsaʼ bʌ aqʼuenti tiʼ wenta i tsiʼ chaʼle tsʌts bʌ eʼtel chaʼan i yum. Cheʼ bajcheʼ jiñi, tsiʼ taja yambʌ chaʼpʼejl talento. Jiñi i yum wen tijicña tsiʼ yubi tsiʼ qʼuele ti ñuc cheʼ tsiʼ chaʼle wersa i tsiʼ ñumen aqʼue yambʌ eʼtel tac.

11. ¿Chuqui miʼ mejlel lac mel chaʼan mi lac ñumen ubin lac tijicñʌyel?

¹¹ Joñonla jaʼel miʼ mejlel lac ñumen ubin lac tijicñʌyel mi mucʼʌch lac chaʼlen wersa cheʼ bajcheʼ cʼamel ti baqui jach bʌ eʼtel mi la cʌqʼuentel. Laʼ la cʌcʼ lac bʌ ti subtʼan yicʼot laʼ lac ñumen chaʼlen coltaya ti congregación (Hch. 18:5; He. 10:24, 25). Laʼ lac wen chajpan lac bʌ chaʼan yaʼ ti tempa bʌ mi la cʌcʼ laj comentario muʼ bʌ i pʼʌtʼesan yambʌlob. Laʼ lac chʼʌm ti ñuc baqui jach bʌ asignación mi la cʌqʼuentel yaʼ ti tempa bʌ Subtʼan yicʼot Melbalʌl. Mi tsaʼ cʼajtibentiyonla laj coltaya chaʼan jumpʼejl eʼtel yaʼ ti  congregación, yom seb yaʼañonla yicʼot laʼ lac tsʼʌctesan. Mach lac ñaʼtan chaʼan an eʼtel tac mach bʌ wen ñuquic i cʼʌjñibal i chaʼan mach yomix mi lac wen aqʼuen i yorajlel. Laʼ lac chaʼlen wersa lac weñʼesan jiñi la cujil tac bʌ (Pr. 22:29). Cheʼ bʌ ñumen cabʌl la queʼtel tiʼ chaʼan bʌ Jehová ñumen ora mi caj laj colel majlel i ñumen tijicña mi caj la cubin (Gá. 6:4). Mach wocolic mi caj la cubin chaʼan mi la cubin lac tijicñʌyel cheʼ bʌ an majqui miʼ yʌqʼuentel jumpʼejl eʼtel la com bʌ lac taj jaʼel (Ro. 12:15; Gá. 5:26).

12. ¿Chuqui tsiʼ mele Melissa yicʼot Nick chaʼan ñumen tijicñayob?

¹² ¿Cʼajal ba lac chaʼan Melissa, jiñi hermana tsaʼ bʌ lac taj ti tʼan ti párrafo 2 yom bʌ majlel ti Betel o ti jiñi Cʌntesʌntel chaʼan xsubtʼañob chaʼan bʌ i yumʌntel Dios? Anquese maʼañix tsaʼ mejli ti majlel yaʼi, miʼ yʌl: «Mic chaʼlen wersa tic precursorado i mic chaʼlen coltaya ti bajcheʼ jach bʌ subtʼan miʼ mejlel. Ili an i yʌqʼueyon cabʌl c tijicñʌyel». ¿I chuqui tsiʼ mele Nick, tsaʼ bʌ lac taja ti tʼan ti párrafo 3, chaʼan miʼ ñumel i chʼijyemlel cheʼ bʌ maʼañic tsaʼ otsʌnti bajcheʼ siervo ministerial? Miʼ yʌl: «Tsaʼ cʌcʼʌ c ñaʼtʌbal ti chuqui mucʼʌch bʌ i mejlel c mel: Bajcheʼ jiñi subtʼan yicʼot chaʼan mi cʌcʼ comentario muʼ bʌ i pʼʌtʼesan yañoʼ bʌ yaʼ ti tempa bʌ. Tsaʼ c butʼu c solicitud chaʼan mic majlel ti Betel i cheʼ ti yambʌ jabil tsaʼ pʌjyiyon».

13. ¿Chuqui mi caj lac taj mi mucʼʌch lac chaʼlen wersa ti jiñi eʼtel am bʌ lac chaʼan ili ora? (Eclesiastés 2:24).

¹³ Yubil cheʼ jiñi, ¿yom ba i yʌl chaʼan mi mucʼʌch lac ñumen chaʼlen wersa ti jiñi eʼtel am bʌ lac chaʼan ili ora mi caj lac ñumen aqʼuentel ti talto bʌ qʼuin? Tajol mucʼʌch, cheʼ bajcheʼ tsaʼ ujti tiʼ tojlel Nick. Pero mi maʼañiqui, cheʼ bajcheʼ tsaʼ ujti tiʼ tojlel Melissa, wersa tijicña mi caj cubin lac bʌ (pejcan Eclesiastés 2:24). Cheʼ jaʼel, wen tijicña mi caj la cubin, come la cujil chaʼan jiñi lac yum, Jesucristo, utsʼat miʼ qʼuel cheʼ woli lac chaʼlen wersa.

14. ¿Chuqui yom cʼajal lac chaʼan chaʼan jiñi meta tac?

¹⁴ Mi wolix lac chaʼlen wersa tiʼ melol i yeʼtel Jehová, ¿yom ba i yʌl jiñi chaʼan maʼañix chuqui yambʌ miʼ mejlel lac mel? Tiʼ sujm maʼañic. Miʼ mejlel yicʼot yomʌch mi la cʌqʼuen lac bʌ meta tac muʼ bʌ i coltañonla chaʼan mi lac sujtel ti ñumen wem bʌ xsubtʼan, xcʌntesa yicʼot muʼ bʌ i yʌcʼ chaʼan mi laj coltan la quermañujob. Mi añʌch lac ñaʼtʌbal yicʼot lac pecʼlel mucʼʌch caj lac taj, yicʼot mi mucʼʌch la cʌcʼ lac ñaʼtʌbal chaʼan mi laj coltan yambʌlob i mach joñoñic jachla mi lac ñaʼtan lac bʌ (Pr. 11:2; Hch. 20:35).

15. ¿Baqui tac bʌ meta mi caj i ñumen aqʼueñonla lac tijicñʌyel?

¹⁵ ¿Chuqui ti meta tac miʼ mejlel la cʌqʼuen lac bʌ? Laʼ laj cʼajtiben Jehová chaʼan miʼ coltañonla laj qʼuel chuqui tac jiñi mucʼʌch bʌ i mejlel lac mel (Pr. 16:3; Stg. 1:5). ¿Muʼ ba i mejlel la cʌqʼuen lac bʌ meta tac bajcheʼ tsaʼ bʌ ajli yaʼ ti  párrafo 1, bajcheʼ precursor auxiliar, regular, Betel o chaʼan construcción? ¿Muʼ ba i mejlel laj cʌn yambʌ tʼan chaʼan miʼ mejlel lac ñumen suben wen tʼan yambʌlob o chaʼan mi lac majlel baqui ñumen yomto coltʌntel? Mi an chuqui la com lac ñumen cʌn chaʼan ili meta tac, miʼ mejlel lac pejcan jiñi libro Organizados para hacer la voluntad de Jehová ti capítulo 10 yicʼot miʼ mejlel lac pejcan jiñi ancianojob ti laj congregación. * Cheʼ bʌ mi lac chaʼlen wersa chaʼan mi lac taj ili meta tac ñumen tijicña mi caj la cubin lac bʌ i jiñi yambʌlob mi caj i qʼuelob bajcheʼ woli laj colel majlel.

16. ¿Chuqui miʼ mejlel lac mel mi an meta tac mach bʌ añic miʼ mejlel lac taj ili ora?

¹⁶ ¿Ixcu mi ili ora maʼañic miʼ mejlel lac taj jiñi  meta tac tsaʼ bʌ ujti la cʌl? Laʼ lac ñaʼtan jumpʼejl mucʼʌch bʌ i mejlel lac tsʼʌctesan. Laʼ laj qʼuel chaʼpʼej uxpʼejl.

17. Cheʼ bajcheʼ miʼ yʌl 1 Timoteo 4:13, 15, ¿chuqui miʼ mejlel i mel juntiquil hermano chaʼan miʼ sujtel ti ñumen wem bʌ xcʌntesa?

¹⁷ (Pejcan 1 Timoteo 4:13, 15). Mi juntiquilet hermano chʼʌmʌlix bʌ a chaʼan jaʼ, miʼ mejlel a chaʼlen wersa chaʼan maʼ ñumen weñʼesan bajcheʼ maʼ chaʼlen tʼan yicʼot cʌntesa. ¿Chucoch? Come mi maʼ wʌqʼuen i yorajlel a qʼuel bajcheʼ maʼ pejcan jun, bajcheʼ maʼ chaʼlen tʼan yicʼot cʌntesa, mi caj i wen coltan jiñi muʼ bʌ i ñʌchʼtañetob. Chaʼlen wersa chaʼan maʼ tsajin (qʼuel) yicʼot maʼ mel jujunchajp muʼ bʌ i yʌl jiñi folleto Sujten ti ñumen wem bʌ xcʌntesa yicʼot xpejcaya jun. Tsajin jujumpʼejl cʌntesʌntel, wen chaʼlen ensayo ti a wotot i chaʼlen wersa a cʼʌn ti a discurso jiñi muʼ bʌ a cʌn. Cʼajtiben ticʼojel jiñi xcoltaya ti acʼ ticʼojel * o yambʌ ancianojob «muʼ bʌ i chaʼleñob eʼtel ti subtʼan yicʼot ti cʌntesa» (1 Ti. 5:17). Mach jiñic jach yom maʼ qʼuel mi wolʌch a cʼʌn cheʼ bajcheʼ tsaʼ cʌñʌ yaʼ ti folleto, qʼuele bajcheʼ maʼ coltan jiñi muʼ bʌ i ñʌchʼtañetob chaʼan miʼ pʼʌtʼesañob i ñopoñel yicʼot chaʼan miʼ jacʼob jiñi woli bʌ i cʌñob. Cheʼ bajcheʼ jiñi ñumen tijicña mi caj a wubin yicʼot jiñi muʼ bʌ i ñʌchʼtañetob.

18. ¿Chuqui mi caj i coltañonla chaʼan mi lac tsʼʌctesan lac meta tac ti subtʼan?

¹⁸ Pejtelel xñoptʼañonbʌla yom mi lac chaʼlen subtʼan yicʼot mi lac sutqʼuin ti xcʌntʼan yambʌlob (Mt. 28:19, 20; Ro. 10:14). ¿La com ba lac ñumen weñʼesan bajcheʼ mi lac mel ili eʼtel tac? Miʼ mejlel lac pejcan jiñi folleto Cʌntesa i mi la cʌqʼuen lac bʌ meta tac muʼ bʌ i coltañonla lac mel jiñi muʼ bʌ laj cʌn. Miʼ mejlel lac taj jaʼel wen tac bʌ ticʼojel ti jiñi lac Jun chaʼan lac tempa bʌ:  I Subtʼan yicʼot i Melbal jiñi xÑoptʼan yicʼot ti jiñi video tac chaʼan muʼ bʌ i mejlel la cʌl muʼ bʌ i loqʼuel yaʼ ti tempa bʌ. Laʼ laj qʼuex majlel muʼ bʌ laj cʼʌn chaʼan mi laj qʼuel baqui bʌ miʼ ñumen coltañonla. Mi mucʼʌch lac jacʼ cheʼ bajcheʼ mi lac subentel, tijicña mi caj la cubin cheʼ mi lac sujtel ti ñumen wem bʌ xcʌntesa (2 Ti. 4:5).

19. ¿Chuqui mi caj i coltañonla chaʼan mi lac taj wen tac bʌ melbalʌl?

¹⁹ Laʼ laj cʼajtesan chaʼan jumpʼejl meta ñumen ñuc bʌ i cʼʌjñibal muʼ bʌ i mejlel la cʌqʼuen lac bʌ jiñʌch cheʼ mi lac taj jiñi wen tac bʌ melbalʌl (Gá. 5:22, 23; Col. 3:12; 2 P. 1:5-8). ¿Chuqui miʼ mejlel lac mel? Laʼ cu lac ñaʼtan chaʼan la com lac ñumen pʼʌtʼesan lac ñopoñel. Yaʼ ti lac jun tac miʼ mejlel lac pejcan temaj tac muʼ bʌ i taj ti tʼan jiñi. Mi mejlel laj qʼuel jaʼel video tac tsaʼ bʌ loqʼui ti JW Broadcasting^® muʼ bʌ i taj ti tʼan hermanojob tsaʼ bʌ i pʌsʌyob i ñopoñel cheʼ bʌ tsiʼ ñusayob wocol tac. Cheʼ jiñi laʼ lac ñaʼtan bajcheʼ miʼ mejlel lac lajiñob.

20. ¿Chuqui miʼ mejlel lac mel chaʼan mi lac ñumen ubin lac tijicñʌyel i maʼañic mi lac wen ubin lac chʼijyemlel?

²⁰ Tiʼ sujm, ti lac pejtelel lac com lac ñumen melben i yeʼtel Jehová. Yaʼ ti tsijiʼ bʌ Pañimil wʌn albil bʌ i chaʼan, mi caj i mejlel lac melben i yeʼtel ti tsʼʌcʌl. Cheʼ bʌ wolito lac pijtan miʼ cʼotel jiñi qʼuin, ñumen tijicña mi caj la cubin i maʼañic mi caj lac wen ubin lac chʼijyemlel mi mucʼʌch lac mel jiñi muʼ bʌ i mejlel lac mel ili ora. Pero ñumen ñuc bʌ i cʼʌjñibal jiñʌch cheʼ mi caj la cʌqʼuen i ñuclel Jehová, «jiñi tijicña bʌ Dios» (1 Ti. 1:11, TNM). Jin chaʼan, laʼ la cubin lac tijicñʌyel chaʼan chuqui miʼ mejlel lac mel tiʼ tojlel Jehová.