1. Nemene la hna kuca hnei itre xan matre troa catre huliwa koi Iehova?

  NYIMUTRE la itre huliwa së ngöne la fene celë ka troa paatr. (Mat. 24:14; Luka 10:2; 1 Pet. 5:2) Easa ajane troa kuca la hne së hna atrein ngöne la huliwa i Iehova. Alanyimu la itre ka thele troa akökötrene la huliwa ne cainöj. Itre xan a mekun troa xome la huliwa ne pionie, me huliwa ngöne la Bethela, me sine la Huliwa Ne Xupi Uma Ne Baselaia. Nge kola thele hnene la itre xaa trejin trahmany troa xome la hnëqa ne qatre thup me atre ixatua. (1 Tim. 3:1, 8) Drei la madrine i Iehova troa goeëne la itre trengecatr hna nue hnene la itre hlue i Nyidrë!—Sal. 110:3; Is. 6:8.

2. Nemene la thangan e tha eatrëne kö së la itre mekuna së ngöne la huliwa i Iehova?

² Ijije hi tro sa kucakuca ke, tha hne së kö hna eatrëne la itre mekuna së ngöne la huliwa i Iehova. Maine jë, easa uti ipië trootro maine cile kowe la itre xaa jol. E cili, thatreine hë së eatrëne la itre mekuna së. (Ite edomë 13:12) Celë hi hna melën hnei Melissa. * Öni eahlo: “Qatre föe hë ni, matre tha ijijinge hë troa huliwa ngöne la Bethela maine sine la Ini Koi Itre Ka Cainöj. Hleuhleu me akötre la hning.”

3. Nemene la nyine troa kuca matre xome la ketre hnëqa e hnine la ekalesia?

³ Ame la itre xaa nekötrahmany me neköjajiny ke, loi e tro angatr a pane macaj, me hetrenyi la itre thiina ka aijijë angatr troa xom la itre hnëqa. Maine jë, tro angatr a  thele troa inamacan matre troa atreine axecië mekun, me hetre aja troa huliwa. Loi e tro fe angatr a inine troa xomihni aqean me metrötr. Maine tro epuni a eënyine la itre thiina cili me thele troa catre huliwa koi Iehova, tro ha ahnithe koi epun la ketre hnëqa. Hanawang la hna melën hnei Nick. Ame lo kola 20 lao macatre i angeic, tha hna acili angeice kö troa hane atre ixatua. Öni angeic: “Hleuhleu me akötre la hning ke, ame koi ni, hetre ewekë ka ngazo hnenge hna kuca.” Ngo hnei Nick pe hna catre huliwa koi Iehova e hnine la ekalesia. Ame enehila, angeice hë la ketre atrene la filial.

4. Nemene la hne së hna troa ce wang ngöne la tane mekun celë?

⁴ Hapeu, epuni kö a kucakuca pine laka, tha hnei epuni kö hna eatrëne la mekuna i epun ngöne la huliwa i Iehova? Maine eje hi, loi e tro epuni a fe la aliene hni epun koi Iehova. (Sal. 37:5-7) Loi e tro fe epuni a sipo ixatua kowe la itre trejin ka macaj, me trongëne la itre eamo hnei angatr hna hamën. E cili, tro hë epuni a eatrëne la mekuna i epun. Ngo tui Melissa, maine jë, tha ijiji epuni hmaca kö troa kuca la hnei epuni hna ajan ngöne la huliwa i Iehova. Nemene la nyine tro epuni a kuca matre tro palahi a madrin? Ame ngöne la tane mekun celë, tro sa ce wang (1) la hnë tro sa öhnyi madrin, me (2) aqane tro sa akökötrene la madrine së, me (3) itre mekun nyine tro sa eatrëne matre tro palahi sa madrin.

5. Nemene la nyine troa kuca matre tro sa madrin? (Ate Cainöj 6:9)

⁵ Ame ngöne Ate Cainöj 6:9, kola qaja la ka troa xatua së troa madrin. (E jë.) Ame la atr ka madrine “la hna goeëne hnei lue mek” ke, angeic a mejihnine la hna hetreny. Ngo ame la atr ka thele “la hna ajane hnene la hni” ke, angeic a piine la ketre ewekë hna thatreine troa kapa. Nemene la ini koi së? Maine easa ajane troa madrin, loi e tro sa mejihnine la hne së hna hetreny, me thele la itre ewekë hne së hna atreine troa kapa.

6. Nemene la ceitune hna hamën hnei Iesu, nge nemene la ini hne së hna troa xom?

⁶ Hapeu, ijije kö tro sa mejihnine la hna hetreny? Ame koi itre xan, tha ijiji angatre kö. Ngacama hetre hnëqa i angatre hë, ngo angatre palahi a thele troa eatrëne la itre xaa mekuna i angatr. Ame pe, ijije hi tro sa madrine “la hna goeëne hnei lue mek.” Tune kaa? Tro sa ce wang la ceitune hna hamën hnei Iesu göne la itre talan, ngöne Mataio 25:14-30. Tro ej a xatua së troa öhn me akökötrene la madrine së enehila.

7. Qejepengöne jë la ceitune hna hamën hnei Iesu.

⁷ Ame ngöne la ceitune i Iesu, hnene la ketre maseta hna hëne la itre hlue i nyidrëti qëmekene troa tro. Hnei nyidrëti hna isa hamë talan koi angatr, * thenge la hnei angatr hna isa atrein. Hnei nyidrëti hna hamëne la faifi lao talan kowe la pane hlu, me lue talan kowe la ketre, nge ame la hnaakönin ke, hna hamëne hi la caas. Hnene la lue pane hlu hna catre huliwa matre akökötrene la itre talane i nyidro. Ngo ame la hnaakönin, pëkö  hnei angeic hna kuca, matre hna helë angeic hnene la maseta.

8. Pine nemene matre tru la madrinene la pane hlu?

⁸ Tru la madrinene la pane hlu ke, hnene la maseta hna hamë angeic la faifi lao talan, nge ketre manie ka tru. Kolo lai a amamane la mejiune la maseta koi angeic! Ngo tune kaa la hnaaluene hlu? Hapeu, hnei angeice kö hna zalu, pine laka hna hamë angeice hi la lue talan? Nemene la hnei angeic hna kuca?

9. Nemene la mekun tha hna qaja kö hnei Iesu, göne la hnaaluene hlu? (Mat. 25:22, 23)

⁹ E jë la Mataio 25:22, 23. Tha hnei Iesu kö hna qaja ka hape, hna elëhni maine zalu hnene la hnaaluene hlu. Ketre, tha hnei nyidrëti kö hna qaja ka hape, hnene la hlu hna eetr me hape: “Hnauëne la kola hamë ni la lue talan, nge faifi kowe la ketre? Maine ju, tro fe a hamë ni la faifi lao talan! Maine tha hnimi ni kö hnene la maseta, nga ka loi e tro ni a keleme la lue talan me kuca la hnenge hna ajan.”

10. Nemene la hna kuca hnene la hnaaluene hlu?

¹⁰ Tune la pane hlu, hnene la hnaaluen hna catre huliwa kowe la maseta. E cili, hnei angeice hna kapa la lue xaa talan. Madrine catre la maseta matre hnei nyidrëti hna amanathithi angeic. Hnei nyidrëti hna mejiune koi angeic me hamëne la itre xaa hnëqa!

11. Nemene la aqane tro sa akökötrene la madrine së?

¹¹ Haawe, ketre tune fe, nyipiewekë  tro sa wangatrune la itre hnëqa hna ahnithe koi së ngöne la huliwa i Iehova. E cili, tro hë sa madrin. Loi e tro “pala hi a tru hnei huliwa” së ngöne la hna cainöj me e hnine la ekalesia. Loi e tro fe sa hnëkë hnyawa matre hamë mekun ka ithuecatre kowe la itre trejin. (Itre hu. 18:5; Heb. 10:24, 25) Ketre, loi e tro sa wangatrune la itre hnëqa hna hamë së kowe la icasikeu e nyipine la wiik me metrötrëne la hawa. Tha tro kö sa wangacone la itre hnëqa cili. Loi e tro pe sa thele troa maca ngöne la huliwa i Iehova. (Ite edomë 22:29) Eje hi, maine tro sa catre huliwa i Akötresie, tro hë sa madrin. (Gal. 6:4) Ketre, tro hë sa ce madrine memine la itre xaa trejin ka kapa la ketre hnëqa hne së hna ajan.—Rom. 12:15; Gal. 5:26.

12. Nemene la hna kuca hnei Melissa me Nick matre troa akökötrene la madrine i nyidro?

¹² Tune kaa Melissa, lo trejine föe ka ajane troa huliwa ngöne la Bethela me sine la Ini Koi Itre Ka Cainöj? Ngacama tha ijiji eahlo kö troa eatrëne la mekuna i eahlo, ngo öni eahlo: “Eni a kuca la hnenge hna atrein ngöne la huliwa ne pionie, me thele troa maca ngöne la hna cainöj. Celë hi matre madrine catre ni.” Nge tune kaa Nick, lo trejin ka kucakuca pine laka, tha hna acili angeice kö troa atre ixatua? Öni angeic: “Hnenge hna thele troa eatrëne la hnenge hna atreine kuca, tune la troa cainöj me hamë mekun ka ithuecatr ngöne la hna icasikeu. Hnenge fe hna saen troa huliwa ngöne la Bethela, nge hna kapa la sipong ngöne la macatre thupen.”

13. Nemene la thangan e tro epuni a catre huliwa i Akötresie enehila?

¹³ Maine tro epuni a catre huliwa i Akötresie, hapeu, tro kö epuni a kapa la itre xaa hnëqa? Eje hi, celë hi lai ka traqa koi Nick. Ngo maine tha kapa kö epun la itre xaa hnëqa tui Melissa, tro palahi epuni a madrine ngöne la huliwa i epun. (E jë la Ate Cainöj 2:24.) Ketre, epuni a madrin ke, tha sihngödri kö koi Iesu Keriso, Maseta së, la itre trengecatre së.

14. Pine nemene matre nyipiewekë troa thele la itre xaa mekun nyine eatrën?

¹⁴ Maine jë, easa kuca la hne së hna atreine matre eatrëne la hnëqa së ngöne la huliwa i Iehova. Ngo hapeu, tro kö lai a sewe së troa thele la itre xaa mekun nyine eatrën? Waea! Nyipiewekë tro palahi sa akökötrene la huliwa së koi Iehova. Tro lai a aijijë së troa maca ngöne la huliwa ne cainöj, me xatuane la itre trejin. E cili, tha tro hë sa wangatrune la itre sipu aja së, ngo tro pe sa hetre hni ne ipië me madrine troa xatua itre xan.—Ite edomë 11:2; Itre hu. 20:35.

15. Nemene la itre xaa mekun nyine tro sa eatrën ka troa thue madrine koi së?

¹⁵ Nemene la itre xaa mekun nyine tro sa eatrën? Loi e tro sa sipo Iehova troa xatua së troa atreine waiewekë, göne la itre mekun hne së hna ajane troa eatrën. (Ite edomë 16:3; Iako. 1:5) Tune la hna qaja ngöne la  paragarafe 1, ijije hi tro sa mekun troa xome la huliwa ne pionie ka ixatua maine pionie lapa, maine saen pena troa huliwa ngöne la Bethela, me Xupi Uma Ne Baselaia. Maine pena, tro sa inine la ketre qene hlapa matre cainöj ngöne la ketre nöje ka aja ixatua. Hetre itre xaa ithuemacanyi ngöne  la mekene 10 ne la itus, Organizasio Ka Kuca La Aja i Iehova, maine sipo ixatua kowe la itre qatre thup. * Maine tro sa thele troa eatrëne la itre mekun cili, tro hë së lai a maca me madrin.

16. Tune kaa e thatreine kö së eatrëne la itre mekun hne së hna ce wange hë?

¹⁶ Ngo tune kaa e thatreine kö së eatrëne la itre mekun hne së hna ce wange hë? Loi e tro sa thele la itre xaa mekun hne së hna atreine troa eatrën. Hane hi la itre xan.

17. Thenge la 1 Timoteo 4:13, 15, nemene la nyine troa kuca hnene la ketre trejin trahmany matre troa maca?

¹⁷ E jë la 1 Timoteo 4:13, 15. Maine epuni la ketre trejin trahmany ka bapataiso, loi e tro epuni a maca ngöne la aqane ithanata me hamë ini. Pine nemen? Pine laka, maine tro epuni a thele troa maca troa e tus, me ithanata, me hamë ini, tro hë lai a hetre thangane kowe la itre ka drei epun. Loi e tro epuni a thele troa eatrëne la itre ini ngöne la boroshür, Troa Atreine e Tus Me Hamë Ini. Loi e tro fe epuni a inine me hnëkëne itre ej ngöne la hnalapa, me trongëne ngöne la epuni a cile fë hnëqa ngöne la ekalesia. Ketre, sipo ixatua jë kowe la itre trejin “ka huliwa catr göi troa cainöj me hamë ini,” tune la atre ixatua troa eamo maine itre qatre thup. * (1 Tim. 5:17) Tha tro hmekuje kö epuni a trotrohnine la ini, ngo nyipiewekë  mina fe tro epuni a thele troa acatrene la lapaunene la itre ka dreng, me thue aja koi angatr troa trongën la itre ini hna hamën. E cili, tro hë angatr a madrin, me epuni fe.

18. Nemene la ka troa xatua së troa maca ngöne la huliwa ne cainöj?

¹⁸ Hnëqa së troa cainöj me inine la itre atr. (Mat. 28:19, 20; Rom. 10:14) Hapeu, epuni kö a ajane troa maca ngöne la hnëqa cili? Loi e tro epuni a inine me trongëne la itre ini qa hnine la boroshür, Troa Atreine e Tus Me Hamë Ini, me ngöne la Mele Me Huliwa Ne Cainöj Ne La Keresiano—Pepa Nyine Huliwan, me ngöne la itre video hna amamane ngöne la icasikeu e nyipine la wiik. Thele jë troa trongëne la itre mekun hna hamën, matre wang la ka hetre thangan. E cili, tro hë sa madrin troa maca ngöne la huliwa i Iehova.—2 Tim. 4:5.

19. Nemene la aqane tro sa eënyine la itre thiina ka lolo?

¹⁹ Ame la ketre mekun nyine tro sa eatrën, tre, tro sa eënyine la itre thiina ka lolo. (Gal. 5:22, 23; Kol. 3:12; 2 Pet. 1:5-8) Tune kaa? Maine jë, easa ajane troa acatrene la lapaune së. Loi e tro sa e la itre tane mekun ngöne la itre itusi së. Loi e tro fe sa goeëne la itre video ngöne JW Télédiffusion, ka amamane la itre hna kuca hnene la itre trejin ka catre lapaune ngöne la itre jol. Thupene lai, thele jë troa nyitipune la lapaune i angatr.

20. Tune kaa la aqane tro sa akökötrene la madrine së?

²⁰ Eje hi laka, easa ajane troa akökötrene la huliwa së koi Iehova. Ame ngöne la fene ka hnyipixe, tro palakö sa catre huliwa koi Nyidrë. Ngo maine tro sa kuca asë la hne së hna atrein enehila, tro hë sa madrin. Nge ame la ka sisitria ke, troa atrunyi Iehova, “Akötresie ka madrin.” (1 Tim. 1:11) Haawe, catre jë së wangatrune la itre hnëqa hna hamën koi së enehila!