1. San omen baala anga sisa wani du fu di den lobi Yehofa?

A KABA fu a goontapu ya koosube. Ma wooko lai di u mu du fosi a kaba doo (Mat. 24:14; Luk. 10:2; 1 Peit. 5:2). U wani du ala san u poi gi Yehofa. Son baala anga sisa wani pionili, taawan wani go wooko a Betel, efuso go yeepi bow Kownukondee zaal. A omen baala e meke moiti fu toon dinali efuso owluman aini a kemeente (1 Tim. 3:1, 8). Yehofa e piisii te ai si a moiti di wi e meke fu dini en anga u hii ati.​—Ps. 110:3; Yes. 6:8.

2. Fa wi e fii son yuu te wi á poi doo den maiki fu u?

² Te u nai doo den maiki fu u, a sani ya sa meke u lasi-ati. Son leisi wi á poi du san u wani gi Yehofa fu di u gaandi, efuso fu di wi abi taa polobelema (Odo 13:12). Na a sani ya be miti wan sisa den e kai Melissa. * A sisa ya be wani go a Betel efuso a Sikoo gi Kownukondee Peleikiman. Ma a taki: ‘Mi gaandi pasa a yali di den taki i mu abi fu man du den sani ya. A sani ya e meke mi fii booko-saka son yuu.’

3. San son sama mu du fu man fende moo faantiwowtu aini a olikanisâsi?

³ Den yonkuuwan man du omen sani gi Yehofa, bika den koni, den gaw, den poi wooko taanga tu. Ma toku den abi fu meke moiti fosi fu abi den manii di o yeepi den fu du son wooko aini a olikanisâsi. Den mu abi  manii enke pasensi anga lesipeki. Den mu leli fa fu du den wooko bun tu. Efi yu e meke moiti fu abi den manii di o yeepi i fu du i wooko bun, kande i fende wan gaandi di yu á be denki seefi. Luku a toli fu Nick. Di a be abi 20 yali, a be hati en di den baala á poti en enke dinali. A taki: ‘Mi be fii enke a di mi á bun sai meke mi á fende a gaandi ya.’ Ma Nick á gi abaa. A tan meke moiti fu abi den manii di be o yeepi en fu du en wooko moo bun. A be e du den wooko di a be e fende aini a kemeente bun tu. Tide na a dei, Nick e wooko aini wan Beikantoo komte.

4. San wi o luku aini a artikel ya?

⁴ Efi yu e fii booko-saka fu di yu á doo wan maiki di i wani ete, taigi Yehofa fa yu e fii (Ps. 37:5-7). I sa akisi baala di abi ondoofeni tu fu soi i fa i sa du i wooko moo bun, da i meke moiti wooko anga san den taigi i. Efi i du den sani ya, kande i sa doo a maiki fi i bakaten. Ma son leisi a kan taki leti enke Melissa, yu á poi doo a maiki fi yu aini a goontapu ya. San o yeepi i fu piisii winsi yu á poi du ala san i wani gi Yehofa? Aini a artikel ya, wi o luku (1) san i mu du efi i wani piisii, (2) san o yeepi i fu moo piisii, anga (3) sowtu maiki i sa poti di o yeepi i fu moo piisii.

5. San u mu du efu u wani piisii? (Peleikiman 6:9)

⁵ Peleikiman 6:9 e soi u san u mu du efu u wani piisii tuutuu. (Leisi en.) Wan sama ‘di e poolo anga san a abi’, e tifeedi anga sani. Ma wan sama di nai tifeedi anga san a abi, ‘e feti a sani baka di a á poi fende’. San a toli ya e leli u? Ai leli u taki efu u wani piisii, u mu e poti pakisei a san u poi du, pe fu wi e poti pakisei a sani di u sabi taki u ná o poi du aini a ten ya.

6. Sowtu ageisitoli wi o luku? San a ageisitoli ya o leli u?

⁶ Wan sama poi piisii tuutuu anga den sani di a abi namo? Enke libisama, te u du wan sani te wan pisi, wi e wani du wan taa sani, neen meke omen sama e si enke kande yu o fuka efu na aseefi sani yu e du naamo. Ma toku u poi piisii tuutuu anga san u poi du nownow. Fa u sa du a sani ya? Meke u poti pakisei na a ageisitoli di Yesesi be gi fu den talenti di sikiifi a Mateyesi 25:14-30. A ageisitoli ya o yeepi u fu si fa u sa piisii anga san u poi du.

7. San na a ageisitoli di Yesesi be gi?

⁷ Aini a ageisitoli, wan man di be o go a wan taa kondee kai den saafu fi en, neen a gi den moni fu den wooko gi en. * A be sabi san ibiiwan fu den be poi du, neen meke a gi wan fu den saafu feifi talenti, a taawan a gi tu talenti, du fu dii a gi wan talenti. Den tu fosi saafu wooko taanga fu meke moo moni gi a masaa fu den. Ma du fu dii saafu á du nawan sani anga a moni di a masaa gi en, neen meke a basi puu en a wooko.

8. Saide a fosi saafu be musu poolo anga a moni di a masaa be gi en?

⁸ A be musu bigi gi a fosi saafu taki en masaa be gi en feifi talenti, bika a be wan gaan moni. A sani ya be e soi taki a masaa be e fitoow en. Du fu tu saafu be  sa fii booko-saka di a masaa gi en tu talenti namo. Ma san a du?

9. San du fu tu saafu á be du? (Mateyesi 25:22, 23)

⁹ Leisi Mateyesi 25:22, 23. Yesesi á taki a taa saafu ati boon taki a masaa be gi en tu talenti namo. A á taki a be e kuutu tu. Kande a saafu ya be sa taki: ‘Mi anga a saafu di fende feifi talenti poi du denseefi sani, neen na a moni ya namo a masaa gi mi? Efu a fende taki mi nai wooko sai gi en, da a moo betee mi beli a moni ya da mi go wooko gi miseefi.’

10. San du fu tu saafu du anga a moni di a masaa gi en?

¹⁰ Leti enke a fosi saafu, du fu tu saafu be fusutan taki a wan gaan faantiwowtu a masaa fi en be gi en, neen meke a wooko taanga anga den tu talenti di a be fende, neen a fende ete tu. A masaa be poolo anga en. Di a daai kon baka, a gafa en fu a wooko di a du, neen a gi en moo faantiwowtu.

11. San o yeepi u fu moo piisii?

¹¹ Leti enke a saafu ya, useefi o moo piisii te wi e meke moiti fu du u wooko bun, winsi sowtu wooko neen. I mu e peleiki fayafaya. I mu e du den wooko di yu e fende aini a kemeente bun (Toli 18:5; Heb. 10:24, 25). Meke moiti fu seeka bun fosi i go a den komakandaa, fi i sa gi piki di o gi taawan taanga-sikin. Te yu abi wan paati na a mindiiwiki komakandaa, meke moiti fu du en bun. Efu den baala akisi i fu yeepi anga wan  sani, du en na a yuu, yu á mu gwenti kon lati a peesi. Yu á mu e si nawan wooko di i fende aini a olikanisâsi enke wan lawlaw sani. Ala yuu i mu e meke moiti fu du i wooko moo bun (Odo 22:29). Te yu e wooko taanga gi Yehofa, yu anga en o toon moo bun mati, yu o moo piisii tu (Gal. 6:4). Te yu e du den sani ya, a o moo makiliki gi i fu piisii anga i baala efuso sisa te den fende wan gaandi di i be wani.​—Rom. 12:15; Gal. 5:26.

12. San yeepi Melissa anga Nick fu piisii anga san den be poi du?

¹² Melissa di u be taki fi en aini paragraaf tu, be wani go na a Sikoo gi Kownukondee Peleikiman efuso Betel, ma a á be poi du nawan fu den tu sani ya. A taki: ‘Ala yuu mi e meke moiti fu du mi pioniliwooko moo bun, mi e suku nyun fasi fu peleiki gi sama tu. A sani ya e meke mi piisii.’ Fa fu Nick di be wani toon dinali? A taki: ‘Winsi fa mi á be toon dinali, toku sani be de di mi be sa du. Mi be abi a gaandi fu peleiki, anga fu gi piki di e gi taawan taanga-sikin. Neen meke mi be meke moiti fu du den sani ya moo bun. Mi be poti mi nen tu fu go yeepi a Betel. A taa yali fi en, mi fende a gaandi fu go a Betel.’

13. Sowtu wini yu o fende te yu e du i wooko fayafaya? (Peleikiman 2:24)

¹³ Sowtu wini yu o fende te yu e meke moiti fu du i wooko moo bun? Kande leti enke Nick, yu o fende moo faantiwowtu aini a olikanisâsi. Ma winsi yu á fende den gaandi di i be wani, toku yu o piisii fu di yu e wooko taanga gi Yehofa. (Leisi Peleikiman 2:24.) Boiti dati, yu o piisii tu fu di i sabi taki u Masaa, Yesesi Kelestesi e poolo anga i.

14. San u mu holi a pakisei te wi e luku san u wani du gi Yehofa?

¹⁴ U mu e poti pakisei a den sani di u poi du nownow, ma dati á wani taki wi á mu e meke moiti fu du moo gi Yehofa. U mu e meke moiti fu du sani di o yeepi u fu toon moo bun peleikiman. U mu e du ala san u poi tu fu yeepi den baala anga sisa fu u. Efu wi e poti pakisei a fa u sa yeepi taawan, a o moo makiliki gi u fu doo den maiki fu u.​—Odo 11:2; Toli 20:35.

15. Sowtu maiki i sa poti di o yeepi i fu moo piisii?

¹⁵ Sowtu maiki i sa poti gi iseefi? Begi Yehofa fu a yeepi i fu si san a wantu maiki di yu o poi doo (Odo 16:3; Yak. 1:5). Kande i sa meke moiti fu du a yeepi pioniliwooko efuso a kowownu pioniliwooko. I sa poti i nen tu fu go a Betel efuso fu go yeepi anga den bow wooko fu a olikanisâsi. Efi i poi, i sa leli wan taa tongo tu fu go yeepi a pe moo peleikiman de fanowdu. Kapitel 10 fu a buku di den e kai Wi orga fu du a wani fu Yehovah e taki fu wantu sani di i sa du aini a olikanisâsi. * I sa taki anga den owluman aini a kemeente fi i tu fu luku sowtu sani i sa du. Te yu e du den sani ya, taa sama seefi o si taki yu e go a fesi. Yu o moo piisii tu.

16. San i sa du efi i si taki yu á poi du den sani di i be sa wani du?

¹⁶ San i sa du efi yu á poi pionili, go a Betel, leli wan taa tongo efuso yeepi  anga den bow wooko fu a olikanisâsi? We, i sa suku wan taa sani di i si taki yu o poi du nownow. Wi o luku wantu taa maiki di i sa poti.

17. Enke fa 1 Timotiyesi 4:13, 15 e soi, da san wan baala sa du fu toon wan moo bun leliman?

¹⁷ Leisi 1 Timotiyesi 4:13, 15. Efi yu a wan baala di dopu, i sa meke moiti fu toon wan moo bun leliman efuso takiman. Saide a sani ya pelensipali? Te yu a wan bun leisiman, wan bun takiman efuso wan bun leliman, da den sama di e aliki yu o moo fende wini fu den sani di yu e leli den. Meke moiti fu du ala den sani di sikiifi aini a Gi leli!-bolosilo. Poti pakisei a wan kapitel fosi, da i luku fa i sa wooko anga en. Te i kaba anga dati, da i go a wan taa kapitel te enke i kaba a hii buku. Akisi a baala di e soi den owluman anga dinali fa den sa holi den pisi fu den moo bun, efuso wan fu den taa owluman fu yeepi i. Den baala ya e wooko taanga fu yeepi sama fu kon sabi a Wowtu fu Gadu moo bun, neen meke efi yu akisi den den o yeepi i (1 Tim. 5:17). Yu á mu luku fa i mu wooko anga den sani di sikiifi aini a buku namo, ma i mu meke moiti fu si fa i sa yeepi den sama di e aliki i fu den biibi kon moo taanga. Gi den taanga-sikin fu du den sani di den e leli. Te yu e du den sani ya, yu o moo piisii, ma den sama di e aliki yu o fende wini fu den sani di yu e leli den tu.

18. San o yeepi u fu toon moo bun peleikiman?

¹⁸ Na ala wi abi a gaandi fu peleiki, anga fu yeepi sama fu kon dini Yehofa (Mat. 28:19, 20; Rom. 10:14). Efi i wani du a wooko ya moo bun, i sa sutudeli a Gi leli!-bolosilo, da i meke moiti fu du  den sani di sikiifi aini. Den sani di wi e leli na a mindiiwiki komakandaa, anga den lezing di e soi fa u sa taki anga sama aini a peleikiwooko sa yeepi i fu toon wan moo bun leliman. Puubei fu peleiki a omen fasi, da i luku sowtu wan e moo wooko bun na a pisi pe yu e peleiki. Te yu e meke moiti du den sani, yu o toon wan moo bun leliman. A sani ya o meke i moo piisii fu du a peleikiwooko.​—2 Tim. 4:5.

19. Fa i sa kon abi den manii di wan Kelesten mu abi?

¹⁹ Wan taa pelensipali maiki di ala u sa meke moiti fu doo, a fu kon abi den manii di Yehofa wani wan Kelesten mu abi (Gal. 5:22, 23; Kol. 3:12; 2 Peit. 1:5-8). Fa i sa du a sani ya? Meke u taki i wani i biibi kon moo taanga. I sa leisi den buku anga taa sani di de na a website di e taki fu sama di biibi be taanga, anga san i mu du efi iseefi wani abi a manii ya. A omen felon de a JW Broadcasting^® tu fu baala anga sisa di soi taki den biibi taanga. Te yu e leisi efuso luku den toli ya, meke moiti fu si fa i sa du sani enke den baala anga sisa ya.

20. San u mu du fu moo piisii nownow?

²⁰ Ala u wani du moo gi Yehofa, ma a libi e meke son sani taanga gi u. Aini a nyun goontapu, wi o man du ala den sani di u wani du gi Yehofa. Ma fosi a ten de doo, meke moiti fu du den sani di i poi du nownow anga i hii ati. A sani ya o meke i piisii. A o yeepi i tu fi yu á lasi-ati. Efi yu e du ala den sani ya, da taa sama seefi o gafa Yehofa, a piisii Gadu te den si fa yu e piisii (1 Tim. 1:11). Neen meke, kon u meke moiti fu piisii anga den sani di u poi du nownow.