NIKASEMƆ 33
Ná Miishɛɛ Yɛ Nɔ Ni Onyɛɔ Otsuɔ Yɛ Yehowa Sɔɔmɔ Lɛ Mli Lɛ Hewɔ
“Ehi akɛ gbɔmɔ baaná nɔ ni ehiŋmɛii naa lɛ mli ŋɔɔmɔ, moŋ fe nɔ ni ebaatiu nɔ ni eshweɔ lɛ sɛɛ.”—JAJ. 6:9.
LALA 111 Nibii Ni Hãa Wɔnáa Miishɛɛ
NƆ NI ABAASUSU HE *
1. Mɛɛ otii nyɛmimɛi komɛi kɛmamɔ amɛhiɛ ni tsɔɔ akɛ amɛmiitao amɛlɛɛ amɛsɔɔmɔ lɛ mli?
JEŊ fɔŋ nɛɛ naagbee lɛ miibɛŋkɛ, ni nitsumɔ pii yɛ ni esa akɛ atsu yɛ Yehowa asafo lɛ mli. (Mat. 24:14; Luka 10:2; 1 Pet. 5:2) Wɔ fɛɛ wɔmiisumɔ ni wɔsɔmɔ Yehowa kɛ wɔnyɛmɔ fɛɛ. Wɔteŋ mɛi pii elɛɛ wɔsɔɔmɔ lɛ mli. Wɔteŋ mɛi komɛi kɛma wɔhiɛ akɛ wɔbaasɔmɔ akɛ gbɛgbalɔi. Mɛi komɛi hu miitao amɛyasɔmɔ yɛ Betel loo amɛye amɛbua kɛmamɔ Maŋtsɛyeli Asai kɛ asafo lɛ tsũi krokomɛi. Ni nyɛmimɛi hii pii miibɔ mɔdɛŋ koni amɛya amɛhiɛ ni amɛnyɛ amɛsɔmɔ akɛ asafoŋ sɔɔlɔi loo asafoŋ onukpai. (1 Tim. 3:1, 8) Kɛ́ Yehowa na bɔ ni etsuji lɛ miimia amɛhiɛ koni amɛlɛɛ amɛsɔɔmɔ lɛ mli lɛ, enáa miishɛɛ waa!—Lala 110:3; Yes. 6:8.
2. Kɛ́ wɔnyɛɛɛ wɔshɛ oti ko ni wɔkɛma wɔhiɛ yɛ Yehowa sɔɔmɔ lɛ mli lɛ he lɛ, te no baanyɛ ahã wɔnu he wɔhã tɛŋŋ?
2 Shi kɛ́ be kplaŋŋ eho ni wɔnyɛko wɔshɛ otii ni wɔkɛmamɔ wɔhiɛ lɛ ekomɛi ahe lɛ, wɔnijiaŋ baanyɛ aje wui. Nakai nɔŋŋ kɛ́ afii ni wɔye loo shihilɛ kroko hewɔ lɛ wɔnyɛŋ wɔshɛ oti ko ni wɔkɛma wɔhiɛ lɛ he kɔkɔɔkɔ lɛ, no hu baanyɛ aje wɔnijiaŋ wui. (Abɛi 13:12) Nakai eba lɛ yɛ nyɛmi yoo ko ni atsɛɔ lɛ Melissa lɛ gbɛfaŋ. * Melissa ná kulɛ ebaayasɔmɔ yɛ Betel loo ebaaya Skul Kɛhã Maŋtsɛyeli Sane Kpakpa Jajelɔi lɛ eko. Shi ewie akɛ: “Afii ni miye lɛ hewɔ lɛ, mináŋ hegbɛ ni mafee nakai. Bei komɛi lɛ, enɛ jeɔ minijiaŋ wui.”
3. Mɛni ebaabi ni mɛi komɛi afee dani amɛnine ashɛ sɔɔmɔ hegbɛ ko ni amɛtaoɔ lɛ nɔ?
3 Ni kɛ́ oblanyo loo oblayoo ji bo ni oyɛ gbɔmɔtsoŋ hewalɛ kpakpa hu? Ekolɛ loloolo lɛ, ehe baahia ni oya ohiɛ ni ojie Kristofoi asui komɛi akpo dani abaanyɛ atu sɔ̃i krokomɛi awo odɛŋ. Ekolɛ wɔle nii waa, wɔtsuɔ saji ahe nii oya, ni wɔtsuɔ nii waa. Shi ekolɛ ehe baahia ni wɔto wɔtsui shi, ni wɔbu mɛi waa fe bɔ ni wɔfeɔ amrɔ nɛɛ, ni agbɛnɛ hu, kɛ́ akɛ nitsumɔ wo wɔdɛŋ lɛ, wɔto wɔtsui shi wɔtsu lɛ jogbaŋŋ kɛmɔ shi. Kɛ́ wɔmia wɔhiɛ waa akɛ wɔbaajie sui nɛɛ akpo lɛ, ekolɛ wɔnine baashɛ sɔɔmɔ hegbɛ ni wɔtaoɔ lɛ nɔ be ni wɔkpaaa gbɛ po. Nyɛmi nuu ko ni atsɛɔ lɛ Nick lɛ ná enɛ mli niiashikpamɔ. Be ni eye afii 20 lɛ, no mli lɛ eeshwe waa ni etsɔ asafoŋ sɔɔlɔ, shi awóoo lɛ, ni enɛ gba enaa waa. Ewie akɛ, “Miyasusu akɛ naagba ko yɛ mihe ni no hewɔ awóoo mi lɛ.” Shi Nick nijiaŋ ejeee wui. Ekɛ hiɛdɔɔ tsu nɔ fɛɛ nɔ ni ebaanyɛ etsu kɛye ebua asafo lɛ, ni eshiɛ kɛ ekãa hu. Ŋmɛnɛ lɛ, eesɔmɔ akɛ Nitsumɔhe Nine Ajinafoi Akuu lɛ mli nyo yɛ nitsumɔhe nine ko.
4. Mɛni he wɔbaasusu yɛ nikasemɔ nɛɛ mli?
4 Ani onijiaŋ eje wui akɛni onyɛko oshɛ oti ko ni okɛma ohiɛ yɛ Yehowa sɔɔmɔ lɛ mli lɛ he lɛ hewɔ? Kɛ́ nakai ni lɛ, sɔlemɔ okɛɛ Yehowa bɔ ni onuɔ he ohãa lɛ. (Lala 37:5-7) Agbɛnɛ hu, bi nyɛmimɛi ni bɔɔ mɔdɛŋ yɛ asafo lɛ mli lɛ ŋaawoo yɛ bɔ ni obaafee oya ohiɛ lɛ he, ni obɔ mɔdɛŋ okɛ amɛŋaawoo lɛ atsu nii. Kɛ́ ofee nakai lɛ, ekolɛ onine baashɛ sɔɔmɔ hegbɛ ni otaoɔ lɛ nɔ loo obaashɛ oti ni okɛma ohiɛ lɛ he. Shi kɛ́ tamɔ eji yɛ Melissa ni wɔtsĩ etã kɛtsɔ hiɛ lɛ gbɛfaŋ lɛ, onyɛŋ oshɛ oti nɛɛ he hu? Mɛni baaye ebua bo ni oya nɔ osɔmɔ Yehowa kɛ miishɛɛ? Yɛ nikasemɔ nɛɛ mli lɛ, wɔbaasusu nibii etɛ ni baaye abua bo ni ohã sanebimɔ nɛɛ hetoo lɛ ahe. Nomɛi ji: (1) Mɛni baanyɛ ahã oná miishɛɛ? (2) Mɛni obaanyɛ ofee koni oná miishɛɛ waa? (3) Mɛɛ otii kɛ́ okɛmamɔ ohiɛ lɛ ebaahã oná miishɛɛ babaoo?
MƐNI BAANYƐ AHÃ ONÁ MIISHƐƐ?
5. Kɛ́ wɔmiitao wɔná miishɛɛ lɛ, mɛni nɔ esa akɛ wɔkɛ wɔjwɛŋmɔ ama? (Jajelɔ 6:9)
5 Jajelɔ 6:9 lɛ tsɔɔ wɔ nɔ ni baanyɛ ahã wɔná miishɛɛ. (Kanemɔ.) Kɛ́ akɛɛ mɔ ko náa “nɔ ni ehiŋmɛii naa lɛ mli ŋɔɔmɔ” lɛ, no tsɔɔ akɛ eyɛ nɔ ni eyɔɔ lɛ he miishɛɛ. Shi mɔ ni tiuɔ nɔ ni eshweɔ lɛ sɛɛ lɛ, lɛ lɛ daa nɛɛ eedi nɔ ko ni enine nyɛŋ ashɛ nɔ lɛ sɛɛ. Mɛni wɔkaseɔ yɛ enɛ mli? No ji akɛ, kɛ́ wɔmiitao wɔná miishɛɛ lɛ, no lɛ esa akɛ wɔkɛ wɔjwɛŋmɔ ama nɔ ni wɔyɔɔ loo nɔ ni wɔle akɛ wɔnine baanyɛ ashɛ nɔ lɛ nɔ.
6. Mɛɛ nɔkwɛmɔnɔ he wɔbaasusu? Ni mɛni ebaatsɔɔ wɔ?
6 Ani nɔ ni oyɔɔ momo lɛ baanyɛ ahã oná miishɛɛ lɛɛlɛŋ? Mɛi pii susuɔ akɛ sanebimɔ nɛɛ hetoo ji dabi. Ejaakɛ adesai yɔɔ nɛɛ lɛ, kɛ́ wɔfee nɔ kome aahu lɛ, efeemɔ jeɔ wɔtsine. Shi yɛ anɔkwale mli lɛ, nɔ ni wɔyɔɔ momo lɛ baanyɛ ahã wɔná miishɛɛ, ejaakɛ ŋmalɛ lɛ kɛɛ wɔbaanyɛ wɔná nɔ ni ‘wɔhiŋmɛii naa’ lɛ mli ŋɔɔmɔ. No hewɔ lɛ, te wɔbaafee tɛŋŋ wɔfee nakai lɛ? Yesu nɔkwɛmɔnɔ ni kɔɔ talɛntai lɛ ahe ni abɔ he amaniɛ yɛ Mateo 25:14-30 lɛ baaye abua wɔ ni wɔna bɔ ni wɔbaafee wɔfee nakai. Nɔkwɛmɔnɔ nɛɛ baaye abua wɔ ni wɔna nɔ ni kɛ́ wɔfee lɛ, nibii kpakpai ni wɔyɔɔ amrɔ nɛɛ baahã wɔná miishɛɛ ni nakai miishɛɛ ateke nɔ.
MƐNI OBAANYƐ OFEE KONI ONÁ MIISHƐƐ WAA?
7. Gbaa Yesu nɔkwɛmɔnɔ ni kɔɔ talɛntai lɛ ahe lɛ.
7 Yɛ nɔkwɛmɔnɔ lɛ mli lɛ, Yesu wie nuu ko ni fã gbɛ lɛ he. Dani ebaashi lɛ, ehã enyɔji lɛ ateŋ mɔ fɛɛ mɔ talɛntai ni ekɛtsu nii. * Ehã mɔ kome talɛntai enumɔ, mɔ kome hu enyɔ, ni mɔ kroko hu ekome yɛ amɛteŋ mɔ fɛɛ mɔ nyɛmɔ naa. Klɛŋklɛŋ nyɔji enyɔ lɛ kɛ talɛntai ni akɛhã amɛ lɛ tsu nii jogbaŋŋ. Nyɔŋ ni ji etɛ lɛ kɛ enɔ lɛ tsuuu nɔ ko nɔ ko, no hewɔ lɛ, nuŋtsɔ lɛ shwie lɛ.
8. Mɛni hewɔ eeenyɛ efee akɛ klɛŋklɛŋ nyɔŋ lɛ mii shɛ ehe waa lɛ?
8 Ekã shi faŋŋ akɛ, klɛŋklɛŋ nyɔŋ lɛ ná miishɛɛ waa akɛ enuŋtsɔ lɛ ehã lɛ talɛntai enumɔ sɔŋŋ. Enɛ jeee shika bibioo, ni ehãa wɔnaa akɛ enuŋtsɔ lɛ heɔ lɛ eyeɔ waa. Ni nyɔŋ ni ji enyɔ lɛ hu? Ani emli fu akɛ enuŋtsɔ lɛ hãaa lɛ talɛntai pii tamɔ klɛŋklɛŋ nyɔŋ lɛ? Hã wɔkwɛ bɔ ni efee enii ehã.
Mɛni wɔkaseɔ yɛ bɔ ni nyɔŋ ni ji enyɔ yɛ Yesu nɔkwɛmɔnɔ lɛ mli lɛ fee enii ehã lɛ mli? (1) Ená miishɛɛ akɛ enuŋtsɔ lɛ ehã lɛ talɛntai enyɔ (2) Etsu nii waa ehã enuŋtsɔ lɛ (3) Ená talɛntai enyɔ efata enyɔ lɛ ni enuŋtsɔ lɛ hã lɛ lɛ he (Kwɛmɔ kuku 9-11)
9. Mɛni nyɔŋ ni ji enyɔ lɛ efeee? (Mateo 25:22, 23)
9 Kanemɔ Mateo 25:22, 23. Yesu ewieee akɛ nyɔŋ ni ji enyɔ lɛ mli fu akɛni ahã lɛ talɛntai enyɔ lɛ hewɔ. Ni Yesu ewieee akɛ nyɔŋ lɛ tɔke akɛ: ‘Ni mi lɛ, enɛ pɛ ahã mi? Bɛ mitsuɔ ni waa tamɔ nyɔŋ lɛ ni ahã lɛ talɛntai enumɔ lɛ nɔŋŋ? Kɛ́ nɔ ni mitsuɔ lɛ esaaa minuŋtsɔ lɛ hiɛ lɛ, belɛ miyafu etalɛntai enyɔ lɛ ni matao mi diɛŋtsɛ mi nɔ ko matsu.’
10. Mɛni nyɔŋ ni ji enyɔ lɛ kɛ etalɛntai lɛ fee?
10 Nyɔŋ ni ji enyɔ lɛ ebuuu nitsumɔ ni enuŋtsɔ lɛ ehã lɛ lɛ akɛ nɔ ko flɛflɛ. Moŋ lɛ, egbe ehe etsu nii waa tamɔ klɛŋklɛŋ nyɔŋ lɛ. Enɛ hewɔ lɛ, ená talɛntai enyɔ efata nɔ ni enuŋtsɔ lɛ hã lɛ lɛ he. Be ni enuŋtsɔ lɛ ba lɛ, ená miishɛɛ waa ni ejwere lɛ yɛ enitsumɔ kpakpa lɛ hewɔ. Ejie eyi, ni etu nitsumɔi krokomɛi ewo edɛŋ!
11. Mɛni kɛ́ wɔfee lɛ wɔbaaná miishɛɛ waa?
11 Kɛ́ wɔjɛ wɔtsuiŋ fɛɛ wɔtsu nitsumɔ fɛɛ nitsumɔ ni abaahã wɔ yɛ Yehowa sɔɔmɔ lɛ mli lɛ, wɔ hu wɔbaaná miishɛɛ. Okɛ ekãa atsu shiɛmɔ nitsumɔ lɛ, ni okɛ ohe awo nɔ fɛɛ nɔ ni asafo lɛ feɔ lɛ mli waa. (Bɔf. 18:5; Heb. 10:24, 25) Dani obaaya asafoŋ kpeei lɛ, tsɔ hiɛ okase nibii ni abaasusu he yɛ jɛmɛ lɛ jogbaŋŋ, ni kɛ́ otee lɛ ohã sane hetoo ni mɔɔ shi. Kɛ́ ahã bo nifeemɔ yɛ otsi teŋ kpee lɛ shishi lɛ, okɛkafee shwɛmɔ, kasemɔ lɛ jogbaŋŋ. Kɛ́ akɛ nitsumɔ ko wo odɛŋ yɛ asafo lɛ mli lɛ, tsu lɛ jogbaŋŋ, ni otsu yɛ be naa hu. Kaabu nitsumɔ ko nitsumɔ ko ni akɛbaawo odɛŋ lɛ akɛ ehe ehiaaa ni no hewɔ lɛ esaaa akɛ ofiteɔ obe yɛ he. Bɔɔ mɔdɛŋ ni ole nitsumɔ fɛɛ nitsumɔ ni akɛbaahã bo lɛ mli jogbaŋŋ, ni ohe asa kɛ etsumɔ. (Abɛi 22:29) Kɛ́ ojɛ otsuiŋ otsu nitsumɔ fɛɛ nitsumɔ ni akɛbaahã bo yɛ Yehowa sɔɔmɔ lɛ mli lɛ jogbaŋŋ lɛ, obaaya ohiɛ oyayaayai, ni obaaná miishɛɛ waa. (Gal. 6:4) Agbɛnɛ hu, kɛ́ mɔ ko nine shɛ sɔɔmɔ hegbɛ ko ni ooshwe waa ni onine ashɛ nɔ lɛ nɔ lɛ, ewaŋ tsɔ kɛhãŋ bo akɛ omii baashɛ ohe akɛ mɔ lɛ nine eshɛ nakai sɔɔmɔ hegbɛ lɛ nɔ.—Rom. 12:15; Gal. 5:26.
12. Mɛni nyɛmimɛi enyɔ komɛi fee ni hã amɛná miishɛɛ waa?
12 Ani okaiɔ Melissa, nyɛmi yoo lɛ ni kulɛ eetao ni eyasɔmɔ yɛ Betel loo eya Skul Kɛhã Maŋtsɛyeli Sane Kpakpa Jajelɔi lɛ eko lɛ? Eyɛ mli akɛ enáaa hegbɛ eyasɔmɔ yɛ Betel loo eya skul lɛ eko moŋ, shi ewie akɛ: “Mibɔɔ mɔdɛŋ akɛ matsu gbɛgbamɔ nitsumɔ lɛ jogbaŋŋ ni mikɛ mihe awo gbɛi srɔtoi ni wɔtsɔɔ nɔ wɔshiɛɔ lɛ fɛɛ amli. Enɛ ehã miná miishɛɛ waa.” Be ni awóoo Nick asafoŋ sɔɔlɔ lɛ, mɛni ye ebua lɛ ni emiishɛɛ etãaa? Ewie akɛ: “Mikɛ mijwɛŋmɔ ma shiɛmɔ nitsumɔ lɛ, saji ahetoohamɔ, kɛ nibii krokomɛi ni manyɛ matsu yɛ Yehowa sɔɔmɔ lɛ mli lɛ anɔ. Agbɛnɛ hu, miŋmala Betel sɔɔmɔ gbɛbimɔ wolo nɔ nii, ni enɔ afi lɛ atsɛ mi Betel.”
13. Kɛ́ ojɛ otsui muu fɛɛ mli otsu nɔ ni obaanyɛ yɛ Yehowa sɔɔmɔ lɛ mli lɛ, mɛni baajɛ mli kɛba? (Jajelɔ 2:24)
13 Kɛ́ ojɛ otsui muu fɛɛ mli otsu nɔ ni obaanyɛ amrɔ nɛɛ yɛ Yehowa sɔɔmɔ lɛ mli lɛ, ekolɛ wɔsɛɛ lɛ, abaatu sɔ̃i krokomɛi awo odɛŋ, tamɔ eba lɛ yɛ Nick gbɛfaŋ lɛ. Shi kɛ́ eyabaaa lɛ nakai po, tamɔ eji yɛ Melissa gbɛfaŋ lɛ, loloolo lɛ obaaná miishɛɛ waa, ni otsui baanyɔ omli akɛ ootsu nɔ ko oohã Yehowa. (Kanemɔ Jajelɔ 2:24.) Agbɛnɛ hu, obaaná miishɛɛ waa akɛ nɔ ni otsuɔ lɛ sa wɔ-Nuŋtsɔ Yesu Kristo hiɛ.
OTII NI KƐ́ OKƐMAMƆ OHIƐ LƐ OBAANÁ MIISHƐƐ WAA
14. Kɛ́ wɔmiitao wɔkɛ otii amamɔ wɔhiɛ yɛ Yehowa sɔɔmɔ lɛ mli lɛ, mɛni esa akɛ wɔhã ehi wɔjwɛŋmɔ mli?
14 Kɛ́ akɛɛ wɔkɛ wɔjwɛŋmɔ ama nɔ ni wɔtsuɔ amrɔ nɛɛ yɛ Yehowa sɔɔmɔ lɛ mli lɛ nɔ lɛ, ani no tsɔɔ akɛ wɔkɛ otii ni baaye abua wɔ ni wɔlɛɛ wɔsɔɔmɔ lɛ mli lɛ akamamɔ wɔhiɛ? Dabi kwraa, etsɔɔɔ nakai. Kɛ́ wɔkɛ otii mamɔ wɔhiɛ yɛ Yehowa sɔɔmɔ lɛ mli lɛ, no baaye abua wɔ ni wɔnyɛ wɔtsu babaoo yɛ wɔsɔɔmɔ nitsumɔ lɛ mli ni wɔye wɔbua wɔnyɛmimɛi Kristofoi lɛ. Kɛ́ wɔkɛ otii ni sa mamɔ wɔhiɛ, ni wɔkɛ wɔjwɛŋmɔ ma nɔ ni wɔbaanyɛ wɔfee kɛye wɔbua wɔnyɛmimɛi lɛ nɔ lɛ, wɔbaashɛ otii nɛɛ ahe.—Abɛi 11:2; Bɔf. 20:35.
15. Mɛɛ otii komɛi kɛ́ okɛmamɔ ohiɛ lɛ, ebaahã oná miishɛɛ waa?
15 Mɛɛ otii obaanyɛ okɛmamɔ ohiɛ? Sɔlemɔ okpa Yehowa fai ni eye ebua bo ni ona otii ni kɛ́ okɛmamɔ ohiɛ lɛ, obaanyɛ oshɛ he. (Abɛi 16:3; Yak. 1:5) Ani obaanyɛ okɛ otii ni atsĩ tã yɛ nikasemɔ nɛɛ klɛŋklɛŋ kuku lɛ mli lɛ eko ama ohiɛ? Nomɛi ji, ni obaasɔmɔ akɛ gbɛgbalɔi awalɔ loo daa gbɛgbalɔ, loo oyasɔmɔ yɛ Betel, loo oyaye obua kɛmamɔ Maŋtsɛyeli Asai kɛ asafo lɛ tsũi krokomɛi. Aloo obaanyɛ okase wiemɔ kroko loo ofã kɛya he kroko ni oyashiɛ yɛ jɛmɛ. Kɛ́ ootao ole otii nɛɛ ahe saji pii lɛ, kwɛmɔ Ato Wɔhe Gbɛjianɔ Koni Wɔfee Yehowa Suɔmɔnaa Nii wolo lɛ yitso 10 lɛ, ni okɛ osafoŋ onukpai lɛ hu agba sane. * Be ni obɔɔ mɔdɛŋ koni oshɛ otii nɛɛ ahe lɛ, abaana ohiɛyaa lɛ faŋŋ, ni obaaná miishɛɛ waa.
16. Kɛ́ bianɛ lɛ, onyɛŋ oshɛ otii ni wɔtsĩ tã nɛɛ eko kwraa he lɛ, mɛni obaanyɛ ofee?
16 Shi kɛ́ bianɛ lɛ, onyɛŋ oshɛ otii ni wɔtsĩ tã nɛɛ eko kwraa he hu? Mɛni obaanyɛ ofee? Taomɔ oti kroko ni obaanyɛ oshɛ he ni okɛma ohiɛ. Naa otii nɛɛ ekomɛi.
Mɛɛ otii ni sa obaanyɛ okɛmamɔ ohiɛ? (Kwɛmɔ kuku 17) *
17. Yɛ nɔ ni awie yɛ 1 Timoteo 4:13, 15 lɛ naa lɛ, mɛni kɛ́ nyɛmi nuu ko fee lɛ ebaatsɔ tsɔɔlɔ ni he esa?
17 Kanemɔ 1 Timoteo 4:13, 15. Ani oji nyɛmi nuu ni abaptisi bo? Belɛ bɔɔ mɔdɛŋ ni oya ohiɛ yɛ wiemɔhamɔ kɛ nitsɔɔmɔ mli. Mɛni hewɔ? Ejaakɛ kɛ́ “otee ohiɛ” yɛ nikanemɔ, wiemɔhamɔ, kɛ nitsɔɔmɔ mli lɛ, mɛi ni boɔ bo toi lɛ baaná he sɛɛ waa. Obaanyɛ okɛma ohiɛ akɛ, obaakase nikasemɔi fɛɛ ni yɔɔ Okɛ Ojwɛŋmɔ Ama Nikanemɔ Kɛ Nitsɔɔmɔ Nɔ broshuɔ lɛ mli lɛ ni okɛtsu nii. Kɛ́ okɔ nikasemɔ lɛ ekome lɛ, kasemɔ lɛ jogbaŋŋ ni ofee lɛ shii abɔ yɛ shĩa okwɛ, ni obɔ mɔdɛŋ okɛtsu nii kɛ́ oná asaimɛnt. Bi ŋaawolɔ ni yeɔ buaa lɛ loo asafoŋ onukpai krokomɛi ni “tsuɔ nii waa yɛ wiemɔ kɛ nitsɔɔmɔ mli” lɛ ŋaawoo. * (1 Tim. 5:17) Kwɛmɔ bɔ ni obaafee okɛ nikasemɔ lɛ atsu nii, ni agbɛnɛ hu oye obua otoibolɔi lɛ ni amɛhemɔkɛyeli lɛ mli awa, ni amɛkɛ nɔ ni amɛkaseɔ atsu nii. Kɛ́ ofee nakai lɛ, obaaná miishɛɛ waa, ni amɛ hu amɛbaaná miishɛɛ.
Mɛɛ otii ni sa obaanyɛ okɛmamɔ ohiɛ? (Kwɛmɔ kuku 18) *
18. Mɛni baanyɛ aye abua bo ni obatsɔ shiɛlɔ ni he esa?
18 Anɔkwa Kristofoi fɛɛ yɛ nitsumɔ ko ni esa akɛ amɛtsu. No ji, ni amɛshiɛ ni amɛfee mɛi Yesu kaselɔi. (Mat. 28:19, 20; Rom. 10:14) Ani obaasumɔ ni ohe asa waa yɛ nitsumɔ nɛɛ mli? Kɛ́ nakai lɛ, kasemɔ Nitsɔɔmɔ broshuɔ lɛ, ni okɛ otii ni baaye abua bo ni okɛ nɔ ni okase lɛ atsu nii lɛ amamɔ ohiɛ. Obaanyɛ oná ŋaawoi kpakpai ni baaye abua bo yɛ shiɛmɔ nitsumɔ lɛ mli yɛ Wɔshiɛmɔ Kɛ Wɔshihilɛ Akɛ Kristofoi—Kpee Nifeemɔ Wolo lɛ kɛ shiɛmɔ wiemɔ he vidioi ni ajieɔ yɛ otsi teŋ kpee lɛ shishi lɛ amli. Okɛ ŋaawoi nɛɛ atsu nii, ni okwɛ emli nɔ ni yeɔ omanye waa yɛ nyɛshikpɔŋkuku lɛ mli. Kɛ́ okɛ ŋaawoi nɛɛ tsu nii lɛ, obaatsɔ shiɛlɔ ni he esa, ni no baahã oná miishɛɛ waa.—2 Tim. 4:5.
Mɛɛ otii ni sa obaanyɛ okɛmamɔ ohiɛ? (Kwɛmɔ kuku 19) *
19. Kɛ́ ootao oná sui ni baahã Yehowa aná ohe miishɛɛ lɛ, mɛni obaanyɛ ofee?
19 Otii ni obaanyɛ okɛmamɔ ohiɛ lɛ ateŋ ekome ni he hiaa waa ni esaaa akɛ ohiɛ kpaa nɔ ji, ni obaajie sui ni baahã Yehowa aná ohe miishɛɛ lɛ akpo. (Gal. 5:22, 23; Kol. 3:12; 2 Pet. 1:5-8) Kɛ́ okɛ oti nɛɛ ma ohiɛ lɛ, mɛɛ gbɛ nɔ obaanyɛ otsu he nii? Ŋɔɔ lɛ akɛ, ootao ohemɔkɛyeli mli awa. Mɛni obaanyɛ ofee? Obaanyɛ okane asafo lɛ woji ni tsɔɔ nibii ni wɔbaanyɛ wɔfee koni wɔhemɔkɛyeli mli awa. Agbɛnɛ hu, obaanyɛ okwɛ JW Broadcasting® nifeemɔi ni tsɔɔ bɔ ni nyɛmimɛi etsɔɔ akɛ amɛyɛ hemɔkɛyeli ni mli wa be ni amɛkɛ kai srɔtoi kpeɔ lɛ, ni okwɛ bɔ ni obaafee okase amɛ.
20. Mɛni kɛ́ wɔfee lɛ wɔbaaná miishɛɛ ni wɔnijiaŋ ejeŋ wui?
20 Ŋwanejee ko bɛ he akɛ, wɔ fɛɛ wɔná kulɛ wɔbaanyɛ wɔtsu babaoo wɔhã Yehowa fe bɔ ni wɔtsuɔ amrɔ nɛɛ. Yɛ jeŋ hee lɛ mli lɛ, wɔbaaná hegbɛ wɔsɔmɔ Yehowa jogbaŋŋ bɔ ni wɔtaoɔ. Shi kɛyashi nakai be lɛ baashɛ lɛ, nyɛhãa wɔtsua nɔ fɛɛ nɔ ni wɔbaanyɛ yɛ Yehowa sɔɔmɔ lɛ mli. Kɛ́ wɔfee nakai lɛ, wɔbaaná miishɛɛ ni wɔnijiaŋ ejeŋ wui. Nɔ ni fe fɛɛ lɛ, wɔbaawo Yehowa, “miishɛɛ Nyɔŋmɔ” lɛ hiɛ nyam ni wɔbaajie eyi. (1 Tim. 1:11) No hewɔ lɛ, nyɛhãa wɔ fɛɛ wɔnáa miishɛɛ yɛ nɔ ni wɔnyɛɔ wɔtsuɔ yɛ Yehowa sɔɔmɔ lɛ mli lɛ hewɔ!
LALA 82 “Nyɛhãa Nyɛla Lɛ Atsoa”
^ kk. 5 Wɔsumɔɔ Yehowa waa, ni wɔmiisumɔ ni wɔtsu nɔ fɛɛ nɔ ni wɔbaanyɛ yɛ esɔɔmɔ lɛ mli. Enɛ hewɔ lɛ, ekolɛ wɔmiisumɔ ni wɔlɛɛ wɔsɔɔmɔ lɛ mli loo wɔya wɔhiɛ ni wɔná sɔɔmɔ hegbɛi komɛi yɛ asafo lɛ mli. Shi bei komɛi lɛ, yɛ mɔdɛŋ ni wɔbɔɔ lɛ fɛɛ sɛɛ lɛ, wɔnyɛɛɛ wɔshɛ otii komɛi ni wɔkɛmamɔ wɔhiɛ lɛ ahe. Kɛ́ eba lɛ nakai lɛ, mɛni baaye abua wɔ ni wɔya nɔ wɔtsu babaoo yɛ Yehowa sɔɔmɔ lɛ mli ni wɔná miishɛɛ? Yesu nɔkwɛmɔnɔ ni kɔɔ talɛntai lɛ ahe lɛ baanyɛ aye abua wɔ ni wɔhã sanebimɔ nɛɛ hetoo.
^ kk. 2 Atsake gbɛ́i lɛ ekomɛi.
^ kk. 7 WIEMƆ NI ATSƆƆ MLI: Apaafonyo baatsu nii aaafee afii 20 dani ebaaná talɛnta kome.
^ kk. 15 Kɛ́ oji nyɛmi nuu ni abaptisi bo lɛ, bɔɔ mɔdɛŋ ni oya ohiɛ koni anyɛ awó bo asafoŋ sɔɔlɔ loo asafoŋ onukpa. Kɛ́ ootao ole taomɔ nii ni esa akɛ mɔ ashɛ he dani awó lɛ asafoŋ sɔɔlɔ loo asafoŋ onukpa lɛ, kwɛmɔ Ato Wɔhe Gbɛjianɔ Koni Wɔfee Yehowa Suɔmɔnaa Nii wolo lɛ yitso 5 kɛ 6 lɛ.
^ kk. 17 WIEMƆ NI ATSƆƆ MLI: Ŋaawolɔ ni yeɔ buaa lɛ ji asafoŋ onukpa ko ni ahala lɛ akɛ kɛ́ asafoŋ onukpa ko loo asafoŋ sɔɔlɔ ko hã wiemɔ, ekwɛ kpee nɔ, loo ekane kukuji lɛ amli yɛ asafoŋ kpee shishi ni ehe miihia ni awo lɛ ŋaa yɛ nɔ ko he lɛ, ewo lɛ ŋaa.
^ kk. 64 NƆ NI WƆNAA YƐ MFONIRI LƐ MLI: Nyɛmi nuu ko miitao ebatsɔ tsɔɔlɔ ni he esa. No hewɔ lɛ, eetao nii amli yɛ asafo lɛ woji lɛ amli.
^ kk. 66 NƆ NI WƆNAA YƐ MFONIRI LƐ MLI: Nyɛmi yoo ko kɛfee oti akɛ ebaashiɛ be ni enyiɛɛɛ shiɛmɔ nɔ. No hewɔ lɛ, eehã mɔ ko ni tsuɔ nii yɛ niyelihe ko lɛ jw.org kaadi lɛ eko.
^ kk. 68 NƆ NI WƆNAA YƐ MFONIRI LƐ MLI: Nyɛmi yoo ko hu miisumɔ ni ená sui ni baahã Yehowa aná ehe miishɛɛ. No hewɔ lɛ, eyake enyɛmi Kristofonyo ko nɔ ko be ni mɔ lɛ kpaaa gbɛ.
