1. Ni onlo frè é sè ki vlé fè plis pou Jéova. Ki òbjèktif yo ni ?

 MOND-LASA près bout é nou ni onlo biten a fè (Mat. 24:14 ; Lik 10:2 ; 1 Pyè 5:2). Anplisdisa, nou vlé fè tousa nou pé pou sèvi Jéova. Onlo adan nou vé fè plis an prédikasyon, ni sa ki anvi vin pyonyé é ni dòt aprézan ki anvi ay travay an Bétèl-la oben asi chantyé a konstriksyon. Anplisdisa, ni onlo frè ki ka chèché a pwogrésé pou vin asistan oben ansyen (1 Tim. 3:1, 8). A pa ti kontan Jéova dwèt kontan lè i ka vwè sèwvitè a-y ka sèvi-y èvè tout tchè a yo ! (Sòm 110:3 ; Iz. 6:8).

2. Siwvwè nou pa rivé atenn òbjèktif nou té ni, ka nou pé rèsanti ?

² Si nou vwè kè tan-la ka pasé é kè nou pa’a rivé about a sé òbjèktif-la nou té ni la, sa pé kasé dé bra an nou siwtou si nou ka vwè kè laj-la ka monté é kè sitiyasyon an nou chanjé (Pwov. 13:12). Melissa *, pa ègzanp, sé on sè ki té tèlman anvi travay an Bétèl-la oben fè Lékòl pou évanjélizatè a Wayòm-la ! Mi sa i ka di : « An ja two vyé pou fè tousa, kifè sa ka dékourajé-mwen. »

3. Ki kalité fò sèwten frè ni avan yo ba-yo rèsponsabilité adan lasanblé-la ?

³ Ni sèwten jenn ki ni on bon santé, men avan yo ba-yo rèsponsabilité adan lasanblé-la, fò yo travay sèwten kalité. Pa ègzanp, yo pé entélijan, pétèt lèspri a yo k’ay vit é yo pa pè travay. Men pétèt osi, yo bizwen ni plis pasyans,  pétèt fò yo ké aprann travay plibyen, oben pétèt fò yo ké aprann rèspèkté lézòt tibwen plis. Si yo ka fè éfò pou ni sé kalité-lasa, pétèt kè lè yo pé’é atann-yo, yo ké ba-yo on rèsponsabilité adan lasanblé-la. An-nou gadé ka ki rivé on frè yo ka kriyé Nick. Lè i té ni 20 an, i té tris toubònman pas yo pa té nonmé-y asistan. Mi sa i ka èspliké : « An té ka mandé-mwen si an té ni on pwoblèm. » Men i pa lésé sa dékourajé-y. I fè tousa i té pé pou édé frè é sè a lasanblé a-y é i kontinyé pòté bon mannèv adan lasanblé-la. Jòdila, i ka fè pawti a komité a on filyal.

4. Ka nou ké vwè adan awtik-lasa ?

⁴ Ès 2 bra a-w kasé pas ou ni on òbjèktif é ou pa’a rivé atenn-li ? Si sé sa, di Jéova sa ou ni an fon a tchè-a-w (Sòm 37:5-7). Anplisdisa, mandé déotwa frè ki ni onlo èkspéryans ka ou pé fè pou vin pibon adan sa ou ka fè pou Jéova, é lè yo ba-w on konsèy mété-y an pratik. Sèten sa ké édé-w atenn òbjèktif a-w. Men kon nou vwè pou Melissa, pétèt kè sa ou anvi fè ou pé’é pé fè-y konnyéla la. Alò kijan ou pé kontinyé ni tchè-kontan magrésa ? Pou réponn a kèsyon-lasa, nou ké vwè 1) ka ki ka ban-nou tchè-kontan, 2) kijan nou pé ni plis jwa an tchè an nou, 3) ki òbjèktif ki pé édé-nou ni tchè-kontan.

5. Dapré Éklézyas 6:9, pou nou pé sa ni tchè-kontan, asi ki biten pou nou konsantré-nou ?

⁵ Éklézyas 6:9 ka montré-nou ka nou pé fè pou nou pé sa ni tchè-kontan (li-y). On moun ki ka pwofité dè ‘sa ki anba zyé a-y’, sé on moun ki ka kontanté-y dè sa i ni. Kivédi i kontan sitiyasyon a-y kèlkèswa jan i yé. Pawkont, on moun ki ka kouri adwat-agòch dèyè sa tchè a-y anvi, sé on moun ki toujou ka kouri dèyè biten kè i pé’é jen pé ni. Ka sa ka aprann-nou ? Pou nou pé sa ni tchè-kontan, fò nou kontanté-nou dè sa nou ni é fò pa nou ni òbjèktif kè nou pé’é jen rivé atenn.

6. Ki ègzanp nou kay ègzaminé, é ka ègzanp-lasa ké aprann-nou ?

⁶ Ès on moun pé vréman kontanté-y dè sa i ja ni ? Onlo moun ka di kè sa pa posib, pas pou yo, nou toujou bizwen aprann on nouvo biten. Poutan sa posib. Non sèlman nou pé kontanté-nou dè sa ki ‘anba zyé an nou’. Men nou pé pwofité dè sé biten-lasa osi. Kijan nou pé fè sa ? Pou nou réponn a kèsyon-lasa, an-nou ègzaminé ègzanp a sé talan-la nou ka touvé an Matyé 25:14-30. Ègzanp-lasa ké montré-nou kijan nou pé ni tchè-kontan parapòt a sa nou ja ka fè pou Jéova. É nou ké vwè osi ka nou pé fè pou nou ni plis jwa.

7. Rakonté ègzanp a sé talan-la an dé mo kat pawòl.

⁷ Adan ègzanp a sé talan-la, on misyé ka pati an vwayaj. Alò, i ka kriyé èsklav a-y, é i ka ba-yo jéré déotwa talan *, kivédi on lajan. Misyé-la sav byen kè tout sé èsklav-la pa ni menm kapasité-la. Kifè, i ka ba prèmyé èsklav-la 5 talan, i ka ba dézyèm la 2 talan é i ka ba twazyèm la 1 talan. Sé dé prèmyé èsklav-la ka pran travay-la oséryé men twazyèm la pa’a fè  ayen èvè lajan-la yo té ba-y la, kifè mèt-la ka ba-y biyé pa lapenn a-y.

8. Poukwa prèmyé èsklav-la té ni tchè-kontan ?

⁸ Lè prèmyé èsklav-la vwè kè mèt-la ka ba-y 5 talan, i dwèt té kontan ! A pa té on ti lajan mèt-la té mèt an men a-y la ! Sa té ka montré kè mèt-la té ka fè-y konfyans toubònman. É dézyèm èsklav-la aprézan, ka i rèsanti lè i vwè kè mèt-la pa ba-y menm kantité talan ki prèmyé la ? I té pé dékourajé-y. Men a pa sa i fè.

9. Kijan dézyèm èsklav-la té’é pé réyaji ? (Matyé 25:22, 23).

⁹ (Li Matyé 25:22, 23.) Dézyèm èsklav-la pa fè kòlè pas yo ba-y yenki 2 talan. I pa plenn-li nonplis. É i pa di konsa : « Sé sa sèlman yo ban-mwen alò ? Poutan an ni menm kapasité ki èsklav-la yo bay 5 talan-la. Si mèt an mwen pa enmé-mwen, pisimé an téré 2 talan-la pas mwenmenm an ni biten an mwen a fè. »

10. Ka dézyèm èsklav-la fè èvè sé talan-la yo té ba-y la ?

¹⁰ Menmjan ki prèmyé èsklav-la, dézyèm èsklav-la pran travay-la oséryé é i fè travay-la mèt-la té ba-y fè la. Kifè, i gangné dézòt talan. Konm i travay rèd, i trapé on bèl rékonpans. Non sèlman mèt-la té kontan-y, men anplisdisa i ba-y plis rèsponsabilité.

11. Ka nou pé fè pou nou ni plis jwa an tchè an nou ?

¹¹ Menmjan-la osi, nou ké pi kontan si nou ka travay rèd kèlkèswa travay-la yo ka mandé-nou fè la. « Travay afon» adan  prédikasyon-la é fè tousa ou pé pou soutyenn lasanblé-la (Akt 18:5 ; Ébr. 10:24, 25). Préparé réinyon a-w byen pou ou pé sa bay dé bèl ti komantè pou ankourajé lézòt. Préparé-w byen konm i fo si yo ba-w on sijé a fè pou réinyon a simenn-la. Si yo ba-w fè on travay adan lasanblé-la é kè yo ba-w on dat pou fè-y, rèspèkté dat-lasa é montré kè ou sé on moun yo pé fè konfyans. Pa di kè sa pa enpòwtan é kè ou ké ni tan fè sa men fè éfò pou fè travay-la byen konm i fo (Pwov. 22:29). Si ou ka travay rèd pou Jéova, ou ké vin pibon zanmi èvè-y é ou ké ni tchè-kontan (Gal. 6:4). Konsa, si yo ba on moun a lasanblé-la on rèsponsabilité kè ou té’é vé ni, ou ké kontan pou-y é ou pé’é ni dimal a fè sa (Wom. 12:15 ; Gal. 5:26).

12. Ka ki mèt plis jwa adan tchè a Nick é Melissa ?

¹² An-nou wouvin asi ègzanp a Melissa. I té anvi ay travay an Bétèl-la oben i té anvi fè Lékòl pou évanjélizatè a Wayòm-la, men sa pa té posib. Kijan i fè pou rété pozitif ? Mi sa i ka di : « An pyonyé é an ka mèt tout tchè an mwen adan travay-lasa. Anplisdisa, an ka sèvi èvè plizyè métòd pou mwen préché, é sa ka mèt onlo jwa an tchè an mwen. » É Nick aprézan, ti frè-la ki té tris la pas yo pa té nonmé-y asistan ? Mi sa i ka di : « An konsantré-mwen asi sa an té pé fè, kivédi asi prédikasyon-la é asi sé komantè-la an té pé bay la lè an té k’ay réinyon. An ranpli osi on dèmann pou rantré an Bétèl-la é on lanné apré yo aksèpté-y. »

13. Dapré Éklézyas 2:24, ka ki ké rivé si nou ka mèt tout tchè an nou adan sa nou ka fè pou Jéova ?

¹³ Nou ka travay ba Jéova épi tout tchè an nou, men ès sa vlé kè di pas nou ka fè sa, yo ké ban-nou plis rèsponsabilité apré ? Pétèt, pas sé sa ki rivé pou Nick. Men si sa pa rivé-nou, nou ké ni tchè-kontan kon Melissa, pas nou sav kè nou ba Jéova sa nou ni dè méyè (li Éklézyas 2:24). Anplisdisa, nou ké kontan osi pas nou sav nou ka fè Mèt an nou Jézikris plézi, é kè i ka aprésyé tout éfò kè nou ka fè.

14. Poukwa fò nou toujou chèché a fè plis pou Jéova ?

¹⁴ Kon nou sòti vwè-y, fò-nou konsantré-nou asi sa nou pé fè konnyéla la. Men ès sa vlé di kè fò pa nou fè plis pou Jéova ? Awa ! Fò nou toujou chèché a vin pi filé an prédikasyon é fò nou fè tousa nou pé pou nou toujou montré frè é sè an nou kè nou enmé-yo pi fò. Si nou ka sonjé frè é sè an nou an prèmyé, olyé sèl moun nou ka sonjé sé nou, nou ké rivé fè sa. Lè nou ni létadèspri-lasa, nou ka montré kè nou ni sajès é kè nou ka rèkonnèt limit an nou (Pwov. 11:2 ; Akt 20:35).

15. Ki òbjèktif ki pé mèt plis jwa an tchè a-w ?

¹⁵ Ki òbjèktif ou té’é pé ni ? Mandé Jéova édé-w vwè ki òbjèktif ou pé atenn (Pwov. 16:3 ; Jak 1:5). Adan  prèmyé paragraf-la, nou vwè diféran òbjèktif kè nou té’é pé ni kon vin pyonyé an ranfò, vin pyonyé pèwmanan, travay adan Bétèl-la oben travay asi chantyé a konstriksyon. Ès ni yonn adan yo ki té’é pé entérésé-w ? Oben ès ou té’é pé aprann ondòt lang pou ou pé sa ay préché adan ondòt téritwa oben adan on dòt péyi ? Si ou vé atenn sé òbjèktif-lasa, sa té’é  byen si ou té ka gadé chapit 10 a liv-la Organisés pour faire la volonté de Jéhovah é si ou té ka palé dè sa èvè déotwa ansyen adan lasanblé a-w *. Si ou ka fè tousa ou pé pou atenn òbjèktif a-w, sé frè é sé-la ké vwè jan ou ka pwogrésé é sa ké mèt plis jwa an tchè a-w.

16. Si alèla ou pé pa atenn yonn adan sé òbjèktif-la nou palé talè la, ka ou pé fè ?

¹⁶ Si konnyéla la ou pé pa atenn yonn adan sé òbjèktif-la nou palé talè la, ka ou pé fè ? Ès ou té’é pé éséyé atenn ondòt òbjèktif ki pi fasil pou-w ? An-nou vwè déotwa biten ou pé fè.

17. Dapré sa 1 Timoté 4:13, 15 ka di, ka on frè pé fè pou i anségné plibyen ?

¹⁷ (Li 1 Timoté 4:13, 15.) Si ou sé on frè, ès ou pé vin pi filé lè ou ka fè diskou é lè ou ka anségné ? Sa enpòwtan pas si ou ka aprann li plibyen, palé plibyen é anségné plibyen, ou ké pé édé moun ki ka kouté-w plibyen osi. Anplisdisa, sa té’é byen si ou té ka éséyé étidyé chak lèson a bwochi-la Fè éfò pou li é pou anségné plibyen. Étidyé chak lèson yonn apré lòt, é mèt sé konsèy-la bwochi-la ka ba-w la an pratik lè ou akaz a-w. Aprésa, lè ou ni on sijé oben on diskou, suiv sé konsèy-la byen konm i fo. Anplisdisa, ou pé ay chèché konsèy owa konséyé adjwen la * oben owa dòt ansyen ki ka « travay rèd pou anségné é palé dè pawòl a Bondyé » (1 Tim. 5:17). Pa mèt an tèt a-w kè sé yenki apliké pou apliké sa ki  maké adan bwochi-la, men chèché a fè fwa a sé moun-la ki ka kouté-w la vin pli fò é édé-yo mèt sa yo ka aprann an pratik. Konsa ou ké ni tchè-kontan é séla ki ka kouté-w la ké kontan osi.

18. Ka ou pé fè pou ou vin pi filé an prédikasyon ?

¹⁸ Jéova ban-nou on bèl lonnè : nou pé préché é fè disip (Mat. 28:19, 20 ; Wom. 10:14). Sé on travay ki enpòwtan toubònman. Alò, ès ou té’é anvi vin pli filé adan travay-lasa ? Si sé ka a-w, ou pé étidyé é li bwochi Ansègnman la é ou pé éséyé gadé adan ki domenn ou pé pwogrésé. Ou pé touvé déotwa konsèy adan Kayé Vi é ministè la é adan sé vidéo-la ki ka édé-nou koumansé on ti kozé. Éséyé sé diféran lidé-la ou touvé la é gadé kilès ki ka maché plibyen. Si ou ka apliké sé konsèy-la ou ka touvé la adan sé piblikasyon-la, ou ké vin on pwoklamatè ki pi filé é ou ké ni tchè-kontan (2 Tim. 4:5).

19. Ka ou pé fè pou travay sé kalité-la kè Jéova anvi ou ni la ?

¹⁹ Jéova vé nou ni dé bèl kalité. On òbjèktif ou pé ni, sé travay pou nou pé sa ni sé bèl kalité-lasa. Sa enpòwtan toubònman ! (Gal. 5:22, 23 ; Kol. 3:12 ; 2 Pyè 1:5-8). Imajiné ou anvi ni plis fwa. Ou pé ay gadé sé sijé-la ki anrapò èvè sa adan sé piblikasyon-la. Adan JW Télédifizyon^®, yo toujou ka palé-nou dè sèwten frè é sè ki té ni on fwa ki solid é fwa-lasa édé-yo andiré sèwten difikilté. Pétèt kè si ou ka gadé sé émisyon-lasa, sa ké ba-w anvi imité-yo.

20. Ka nou pé fè pou nou pa lésé ayen désèvwa-nou é pou nou pé sa ni plis jwa an tchè an nou ?

²⁰ Noutout té’é anvi fè plis pou Jéova, sa sèten. Adan mond nouvo la nou ké pé sèvi Jéova a san pou san. Men annatandan, an-nou mèt tout tchè an nou adan tousa nou pé fè pou Jéova. Konsa, nou pé’é lésé ayen désèvwa-nou é nou ké ni plis jwa an tchè an nou. É on biten ki pli enpòwtan ankò, sé kè nou ké onoré Jéova, « Dyé-la tchè a-y kontan la » (1 Tim. 1:11). Alò, an-nou ni tchè-kontan adan tousa nou ka fè pou Jéova !