1. Ki bagaj bokou frè ké sò ka chaché fè pou bay plis annan sèrvis pou Jéova ?

 NOU tout gen bokou bagaj pou fè pannan sa dèrnyé jou-ya (Mat. 24:14 ; Luc 10:2 ; 1 Pierre 5:2). É nou tout lé fè tousa nou pouvé pou sèrvi Jéova. Bokou frè ké sò ka fè tousa yé pouvé pou fè plis annan prédikasyon-an. Sèrten lé divini pyonyé. Ròt ankò lé travay annan Bétèl-a ouben partisipé annan konstriksyon-yan. É roun patché frè ka travay rèd pou divini asistan ouben ansyen (1 Tim. 3:1, 8). A pa ti kontan Jéova divèt kontan lò i ka wè kouman so sèrvitèr paré pou travay pou li ! (Ps. 110:3 ; Is. 6:8).

2. Kisa nou pouvé rousanti si nou pa ka rivé fè sa nou té prévwè ?

² Si tan-an pasé épi nou pa rivé fè sa nou té prévwè annan sèrvis pou Jéova, nou pouvé dékourajé. Sa pouvé rivé nou osi si, akoz di nou laj ouben di nou sitiasyon, i gen bagaj nou pa pouvé fè ankò (Prov. 13:12). Annou pran èkzanp Mélissa *. I té ké lé tèlman travay annan Bétèl-a ouben alé annan Lékòl pou évanjélizatèr Rwayonm-an ! Mé i ka di : « Aprézan mo tro vyé pou fè sa bagaj-ya. Détan mo dékourajé. »

3. Ki bèl kalité roun ran divèt pitèt travay anvan yé rousouvwè rèsponsabilité ?

³ Roun ran jenn toujou é yé gen bon lasanté, mé yé bézwen travay sèrten kalité anvan yé paré pou ròt rèsponsabilité.  Parèkzanp, sèrten pouvé entélijan, pouvé pran désizyon vitman é paré pou travay. Mé pitèt yé bézwen anprann gen plis pasyans, fè plis atansyon lò yé ka travay ouben rèspèkté ròt-ya plis ? Si yé ka fè tousa yé pouvé pou gen sa bèl kalité-ya, pitèt yé ké gen rèsponsabilité lò yé pa ké antann sa. Annou wè sa ki rivé Nick. Lò i té gen 20 an, i té yèg menm paské i patékò asistan. I ka di : « Mo doumandé mo kò si i pa té gen roun bagaj ki pa té k’ alé koté mo. » Mé i pa dékourajé. I mété so lidé asou sa i té pouvé fè annan so sèrvis pou Jéova. Jòdla i annan roun komité filyal.

4. Kisa nou ké wè annan sa artik-a ?

⁴ Ès to dékourajé paské to pòkò rivé fè roun bagaj to té prévwè fè pou Jéova ? Si a sa, di Jéova sa to gen asou to tchò (Ps. 37:5-7). Anplis di sa, doumandé frè ki gen èspéryans ki bagaj to divèt travay, épi fè sa yé ka di to. Asiré, sa ké idé to rivé fè sa to té prévwè. Mé kou Mélissa, pitèt sa pa posib aprézan pou to fè sa to lé pou Jéova. Magré sa, kouman to pouvé kontinyé gen tchò kontan ? Pou réponn sa késyon-an, nou ké wè 1) kisa ki pouvé fè nou tchò kontan, 2) kouman nou pouvé gen plis tchò kontan é 3) ki òbjèktif pouvé idé nou gen tchò kontan.

5. Dapré Ecclésiaste 6:9, asou kisa nou divèt mété nou lidé pou nou tchò kontan ?

⁵ Kou Ecclésiaste 6:9 ka di, a pou nou chaché lajwa-a koté i fika (li). Roun moun ki ka ‘profité di sa so wéy ka wè’ byen kontan sa i ja gen, parèkzanp sitiasyon i gen aprézan. Mé roun moun ki ka kouri ‘pa bò isi pa bò la’, dèyè sa i anvi, ka kontinyé antann roun bagaj i pa ké janmen pouvé gen. Kisa sa ka anprann nou ? Si nou lé nou tchò kontan, nou divèt mété nou lidé asou sa nou ja gen mé pa asou sa nou pa ké janmen pouvé gen.

6. a) Ki èkzanp nou ké wè ? b) Kisa sa ké anprann nou ?

⁶ Ès nou pouvé vréman kontan ké sa nou ja gen ? Bokou moun ka pansé ki sa pa posib, paské nou kontan anprann fè nouvo bagaj, a konsa nou fika. Pourtan, sa posib ! Nou pouvé vréman pran plézi annan sa nou ja gen. Kouman nou pouvé rivé fè sa ? Èkzanp talan-yan nou ka trouvé annan Matthieu 25:14-30, ké èspliké nou sa. I ké anprann nou kouman nou pouvé kontan bèl bagaj nou ja ka fè annan sèrvis Jéova, é menm kouman nou tchò pouvé pi kontan ankò.

7. Ké déztrwa mo, èspliké di kisa èkzanp talan-yan ka palé.

⁷ Annan èkzanp talan-yan, roun mouché paré pou vwayajé. I ka aplé so sèrvitèr pou bay yé plizyèr talan * é pou yé fè soumaké-a fè pitit. Kou i ka tchenbé kont di sa yé chak pouvé fè, i ka bay prémyé sèrvitèr-a senk talan, dézyèm-an dé, é trwazyèm-an roun. Dé prémyé sèrvitèr-ya ka travay rèd pou fè yé mèt ganyen plis soumaké. Trwazyèm-an, li menm, pa ka fè anyen ké lajan yé bay li-a, é finalman, so mèt ka mété l’ dèrò.

8. Poukisa prémyé sèrvitèr-a annan èkzanp-a té pouvé kontan ?

 ⁸ Prémyé sèrvitèr-a té divèt byen kontan lò so mèt bay li senk talan. A té bokou soumaké ; sa té lé di ki so mèt té ka fè l’ konfyans bokou. É dézyèm sèrvitèr-a ? I té pouvé dékourajé paské yé bay li mwens talan. Mé annou wè kouman i réyaji.

9. Kisa dézyèm sèrvitèr-a pa fè ? (Matthieu 25:22, 23).

⁹ (Li Matthieu 25:22, 23.) Dézyèm sèrvitèr-a pa faché paské yé bay li dé talan rounso. I pa plenn so kò non plis. É i pa di : « A sa sèlman yé ka bay mo ?! Mo ka travay rèd kou sa-la ki rousouvwè senk talan ! Si mo mèt pa kontan mo, bay mo alé fè roun trou épi mété sa dé talan-yan annan l’. Tchip, tout fason mo gen ròt bagaj pou fè. »

10. Kisa dézyèm sèrvitèr-a fè ké so talan ?

¹⁰ Kou prémyé sèrvitèr-a, dézyèm sèrvitèr-a konprann ki travay yé té bay li fè-a té enpòrtan, a pou sa i travay rèd pou so mèt. A konsa i ganyen dé ròt talan. É mèt-a rékonpansé so sèrvitèr paské i travay rèd. I félisité l’ épi i bay li plis bagaj pou fè !

11. Ki sa nou pouvé fè pou nou pi kontan ?

¹¹ Menm fason-an, si nou ka mété tout nou tchò annan nenpòrt ki travay yé ka bay nou fè pou Jéova, nou ké kontan ankò plis. ‘Mété tout to fòrs’ annan prédikasyon-an é travay rèd ansanm ké asanblé-a (Actes 18:5 ; Héb. 10:24, 25). Byen préparé to réinyon pou ankourajé  ròt-ya ké répons to ké bay. Byen préparé to kò osi lò to gen roun sijè pou fè, ouben roun démonstrasyon pou réinyon-an ki ka fèt an mitan simenn-an. É si yé ka bay to roun travay pou fè annan asanblé-a, pa pran plis tan ki sa yé ka bay to pou fè l’, é montré ròt-ya yé pouvé fè to konfyans. Pa di ki sa pa enpòrtan é ki to pa bézwen pasé tròp tan asou sa. Fè tousa to pouvé pou byen fè bagaj-ya (Prov. 22:29). Si to ka travay rèd pou Jéova to ké divini so bon zanmi é to ké kontan toubonnman (Gal. 6:4). Konsa, sa ké pi fasil pou to kontan ansanm ké sa-la ki ka rousouvwè roun rèsponsabilité ki to té ké byen lé gen (Rom. 12:15 ; Gal. 5:26).

12. Kisa ki idé Mélissa ké Nick pou yé pi kontan ?

¹² Annou viré palé di Mélissa, ki té ké lé travay annan Bétèl-a ouben alé annan Lékòl pou évanjélizatèr Rwayonm-an. Kouman i ka rivé rété pozitif ? I ka di : « Mo ka fè mo sèrvis pyonyé ké tout mo tchò é mo ka bay annan tout modèl prédikasyon i ganyen. Konsa mo tchò kontan toubonnman. » É kouman Nick réyaji, sa-la ki té yèg paské i pa té asistan ? I ka réponn : « Mo mété mo lidé asou sa mo té pouvé fè, sa lé di préché épi bay répons pou ankourajé ròt-ya pannan réinyon-yan. Mo doumandé osi pou travay annan Bétèl-a, é roun lannen pita, yé di mo wi. »

13. Dapré Ecclésiaste 2:24, kisa ki ké rivé si nou ka mété tout nou tchò annan sa nou pouvé fè pou Jéova jòdla ?

¹³ Si nou ka mété tout nou tchò annan sa nou pouvé fè pou Jéova jòdla, ès nou ké rousouvwè plis rèsponsabilité dimen ? Pitèt. A sa ki rivé Nick. Mé si a pa sa ki ka fèt, kou Mélissa, nou ké kontan kanmenm paské nou ké kontan ké sa nou ka fè pou Jéova (li Ecclésiaste 2:24). Anplis di sa, nou ké kontan paské nou savé ki nou Mèt, Jézi Kris, kontan tout éfòr nou ka fè.

14. Poukisa nou pa janmen divèt arété chaché fè plis pou Jéova ?

¹⁴ Kou nou fin wè l’, nou divèt mété tout nou fòrs annan sa nou pouvé fè jòdla. Mé ès sa lé di ki nou pa divèt kontinyé éséyé fè plis pou Jéova ? Non ! Nou divèt toujou chaché divini pi vayan annan prédikasyon-an é kontan nou frè ké nou sò plis. Nou ké rivé fè sa si sa nou ka chaché, a idé ròt-ya, é si nou pa ka gadé pou nou douvan lèstomak (Prov. 11:2 ; Actes 20:35).

15. Bay plizyèr òbjèktif ki pouvé idé to gen plis tchò kontan.

¹⁵ Ki bagaj to pouvé désidé fè pou Jéova ? Doumandé li idé to wè ki bagaj to pouvé rivé fè soulon to sitiasyon (Prov. 16:3 ; Jacq. 1:5). Ès to pouvé désidé fè roun di sé bagaj-ya ki annan  paragraf 1, parèkzanp divini pyonyé òksilyèr ouben pèrmanan, travay annan Bétèl-a ouben partisipé annan chantyé konstriksyon ? Ouben ès to pouvé anprann palé roun lang pou préché pou plis moun annan to téritwar ouben annan rounòt péyi ? Si to lé fè plis annan prédikasyon-an, sa té ké byen si to té ka rouli chapit 10 di liv Organisés pour faire la volonté de Jéhovah é ki to palé di sa ké ansyen annan to asanblé *. Si to ka fè tousa to pouvé pou  rivé fè sa, ròt-ya ké wè kouman to ka vansé é to ké gen plis tchò kontan.

16. Ki sa to pouvé fè si to pòkò pouvé fè roun di sé bagaj-ya nou ja palé ?

¹⁶ Kisa to pouvé fè si to pòkò pouvé fè roun di sé bagaj-ya nou ja palé ? To pouvé désidé fè rounòt bagaj ki pi fasil pou to ? Annou wè plizyèr bagaj to pouvé fè.

17. Dapré 1 Timothée 4:13, 15, kisa roun frè pouvé fè pou i divini pi vayan annan zafè ansényé ?

¹⁷ (Li 1 Timothée 4:13, 15.) Si to sa roun frè, to pouvé fè tousa to pouvé pou divini pi vayan annan zafè fè diskour ké ansényé. Poukisa sa enpòrtan ? Paské si to ka anprann li pi byen, palé pi byen épi ansényé pi byen, to ké idé sa-ya ki ka kouté to. Sa ké bon pou to étidyé chak léson annan ti liv Applique-toi à la lecture et à l’enseignement. Étidyé roun léson apré rounòt. Lò to annan to kaz, antrennen to kò pou fè sa yé ka di to fè annan ti liv-a. Épi annan prochen sijè ouben diskour to ké fè, apliké sa to anprann. To pouvé osi alé wè konséyé adjwen-an * ouben ròt ansyen « ki ka travay rèd annan paròl-a ké annan ansèyman-an » pou doumandé yé konsèy (1 Tim. 5:17). Sa to lé fè, a pa jis apliké roun léson annan ti liv-a, mé osi idé sa-ya ki ka kouté to fè yé lafwa vin pi fò é pousé yé aji. To ké gen plis tchò kontan, é yé ké pran plézi kouté to.

18. Kisa to pouvé fè pou divini pi vayan annan prédikasyon-an ?

¹⁸ Nou tout divèt préché ké fè disip (Mat. 28:19, 20 ; Rom. 10:14). Ès to té ké  lé divini pi vayan annan sa travay-a ki enpòrtan ? La osi, to pouvé étidyé ti liv Enseignement pou wè annan ki bagaj èspésyalman to divèt divini pi vayan. To ké jwenn plizyèr lidé osi annan Cahier pour la réunion Vie chrétienne et ministère é annan vidéyo ki ka montré kouman nou pouvé koumansé roun kozé ké roun moun. Éséyé plizyèr lidé é gadé sa-ya ki ka maché pi byen. Si to ka apliké konsèy yé ka bay to annan nou piblikasyon, to ké divini roun proklamatèr vayan é to tchò ké kontan toubonnman (2 Tim. 4:5).

19. Kisa nou pouvé fè pou nou gen kalité ka fè Bondjé plézi ?

¹⁹ Nou tout divèt travay pou gen kalité ka fè Bondjé plézi. A roun annan bagaj ki pi enpòrtan to pouvé désidé fè (Gal. 5:22, 23 ; Col. 3:12 ; 2 Pierre 1:5-8). Parèkzanp, pitèt to lé to lafwa pi fò. Kisa to pouvé fè pou sa ? To pouvé li artik annan nou piblikasyon ki ka bay konsèy asou sa. To pouvé gadé osi plizyèr parti annan émisyon Télé JW ki ka montré bèl lafwa sèrten frè ké sò annan éprèv té gen. Épi pran tan réfléchi asou fason to pouvé imité yé.

20. Kouman nou pouvé rivé pa rété tris akoz di sa nou pa pouvé fè é gen plis tchò kontan ?

²⁰ Nou tout, nou té ké lé fè plis pou Jéova. Annan monn nouvo-a, i pa ké gen pyès bagaj ki ké anpéché nou sèrvi l’ kou nou lé. Anvan sa jou-a, si nou ka fè tousa nou pouvé aprézan ké tout nou tchò, nou pa ké rété tris akoz di bagaj nou pa pouvé fè, é nou ké gen plis tchò kontan. É pi enpòrtan-an, nou ké bay Jéova, « Bondjé ki éré-a » lònò (1 Tim. 1:11). Atò, annou kontan ké sa nou pouvé fè pou sèrvi Jéova !